𑁩. 𑀲𑀫𑁆𑀩𑀭𑀺𑀫𑀸𑀬𑀸𑀲𑀼𑀢𑁆𑀢𑀁

𑁨𑁬𑁯. 𑀲𑀸𑀯𑀢𑁆𑀣𑀺𑀬𑀁…𑀧𑁂… 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀆𑀩𑀸𑀥𑀺𑀓𑁄 𑀅𑀳𑁄𑀲𑀺 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺 𑀕𑀺𑀮𑀸𑀦𑀧𑀼𑀘𑁆𑀙𑀓𑁄. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀢𑀺𑀓𑀺𑀘𑁆𑀙 𑀫𑀁 𑀤𑁂𑀯𑀸𑀦𑀫𑀺𑀦𑁆𑀤𑀸’𑀢𑀺. ‘𑀯𑀸𑀘𑁂𑀳𑀺 𑀫𑀁, 𑀯𑁂𑀧𑀘𑀺𑀢𑁆𑀢𑀺, 𑀲𑀫𑁆𑀩𑀭𑀺𑀫𑀸𑀬’𑀦𑁆𑀢𑀺. ‘𑀦 𑀢𑀸𑀯𑀸𑀳𑀁 𑀯𑀸𑀘𑁂𑀫𑀺, 𑀬𑀸𑀯𑀸𑀳𑀁, 𑀫𑀸𑀭𑀺𑀲, 𑀅𑀲𑀼𑀭𑁂 𑀧𑀝𑀺𑀧𑀼𑀘𑁆𑀙𑀸𑀫𑀻’’’𑀢𑀺. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀅𑀲𑀼𑀭𑁂 𑀧𑀝𑀺𑀧𑀼𑀘𑁆𑀙𑀺 𑁋 ‘𑀯𑀸𑀘𑁂𑀫𑀳𑀁, 𑀫𑀸𑀭𑀺𑀲𑀸, 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀲𑀫𑁆𑀩𑀭𑀺𑀫𑀸𑀬’𑀦𑁆𑀢𑀺? ‘𑀫𑀸 𑀔𑁄 𑀢𑁆𑀯𑀁, 𑀫𑀸𑀭𑀺𑀲, 𑀯𑀸𑀘𑁂𑀲𑀺 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀲𑀫𑁆𑀩𑀭𑀺𑀫𑀸𑀬’’’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀫𑀸𑀬𑀸𑀯𑀻 𑀫𑀖𑀯𑀸 𑀲𑀓𑁆𑀓, 𑀤𑁂𑀯𑀭𑀸𑀚 𑀲𑀼𑀚𑀫𑁆𑀧𑀢𑀺;

𑀉𑀧𑁂𑀢𑀺 𑀦𑀺𑀭𑀬𑀁 𑀖𑁄𑀭𑀁, 𑀲𑀫𑁆𑀩𑀭𑁄𑀯 𑀲𑀢𑀁 𑀲𑀫’’𑀦𑁆𑀢𑀺.