𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀙𑁂𑀢𑁆𑀯𑀸𑀲𑀼𑀢𑁆𑀢𑀁

𑁨𑁬𑁭. 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀁𑀲𑀼 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑀺𑀁𑀲𑀼 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀏𑀓𑀥𑀫𑁆𑀫𑀲𑁆𑀲, 𑀯𑀥𑀁 𑀭𑁄𑀘𑁂𑀲𑀺 𑀕𑁄𑀢𑀫𑀸’’𑀢𑀺.

‘‘𑀓𑁄𑀥𑀁 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑁄𑀥𑀁 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑁄𑀥𑀲𑁆𑀲 𑀯𑀺𑀲𑀫𑀽𑀮𑀲𑁆𑀲, 𑀫𑀥𑀼𑀭𑀕𑁆𑀕𑀲𑁆𑀲 𑀯𑀸𑀲𑀯;

𑀯𑀥𑀁 𑀅𑀭𑀺𑀬𑀸 𑀧𑀲𑀁𑀲𑀦𑁆𑀢𑀺, 𑀢𑀜𑁆𑀳𑀺 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀻’’𑀢𑀺.

𑁨. 𑀤𑀼𑀩𑁆𑀩𑀡𑁆𑀡𑀺𑀬𑀲𑀼𑀢𑁆𑀢𑀁

𑁨𑁬𑁮. 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂. 𑀢𑀢𑁆𑀭 𑀔𑁄…𑀧𑁂… 𑀏𑀢𑀤𑀯𑁄𑀘 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑁄 𑀬𑀓𑁆𑀔𑁄 𑀤𑀼𑀩𑁆𑀩𑀡𑁆𑀡𑁄 𑀑𑀓𑁄𑀝𑀺𑀫𑀓𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀳𑁄𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄! 𑀅𑀬𑀁 𑀬𑀓𑁆𑀔𑁄 𑀤𑀼𑀩𑁆𑀩𑀡𑁆𑀡𑁄 𑀑𑀓𑁄𑀝𑀺𑀫𑀓𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄’’’𑀢𑀺! 𑀬𑀣𑀸 𑀬𑀣𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, 𑀢𑀣𑀸 𑀢𑀣𑀸 𑀲𑁄 𑀬𑀓𑁆𑀔𑁄 𑀅𑀪𑀺𑀭𑀽𑀧𑀢𑀭𑁄 𑀘𑁂𑀯 𑀳𑁄𑀢𑀺 𑀤𑀲𑁆𑀲𑀦𑀻𑀬𑀢𑀭𑁄 𑀘 𑀧𑀸𑀲𑀸𑀤𑀺𑀓𑀢𑀭𑁄 𑀘.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 𑁋 ‘𑀇𑀥 𑀢𑁂, 𑀫𑀸𑀭𑀺𑀲, 𑀅𑀜𑁆𑀜𑀢𑀭𑁄 𑀬𑀓𑁆𑀔𑁄 𑀤𑀼𑀩𑁆𑀩𑀡𑁆𑀡𑁄 𑀑𑀓𑁄𑀝𑀺𑀫𑀓𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄. 𑀢𑀢𑁆𑀭 𑀲𑀼𑀤𑀁, 𑀫𑀸𑀭𑀺𑀲, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄! 𑀅𑀬𑀁 𑀬𑀓𑁆𑀔𑁄 𑀤𑀼𑀩𑁆𑀩𑀡𑁆𑀡𑁄 𑀑𑀓𑁄𑀝𑀺𑀫𑀓𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄𑀢𑀺. 𑀬𑀣𑀸 𑀬𑀣𑀸 𑀔𑁄, 𑀫𑀸𑀭𑀺𑀲, 𑀤𑁂𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, 𑀢𑀣𑀸 𑀢𑀣𑀸 𑀲𑁄 𑀬𑀓𑁆𑀔𑁄 𑀅𑀪𑀺𑀭𑀽𑀧𑀢𑀭𑁄 𑀘𑁂𑀯 𑀳𑁄𑀢𑀺 𑀤𑀲𑁆𑀲𑀦𑀻𑀬𑀢𑀭𑁄 𑀘 𑀧𑀸𑀲𑀸𑀤𑀺𑀓𑀢𑀭𑁄 𑀘𑀸𑀢𑀺. 𑀲𑁄 𑀳𑀺 𑀦𑀽𑀦, 𑀫𑀸𑀭𑀺𑀲, 𑀓𑁄𑀥𑀪𑀓𑁆𑀔𑁄 𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦 𑀲𑁄 𑀓𑁄𑀥𑀪𑀓𑁆𑀔𑁄 𑀬𑀓𑁆𑀔𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀦𑀺𑀳𑀦𑁆𑀢𑁆𑀯𑀸 𑀬𑁂𑀦 𑀲𑁄 𑀓𑁄𑀥𑀪𑀓𑁆𑀔𑁄 𑀬𑀓𑁆𑀔𑁄 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀦𑀸𑀫𑀁 𑀲𑀸𑀯𑁂𑀢𑀺 𑁋 ‘𑀲𑀓𑁆𑀓𑁄𑀳𑀁 𑀫𑀸𑀭𑀺𑀲, 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀲𑀓𑁆𑀓𑁄𑀳𑀁, 𑀫𑀸𑀭𑀺𑀲, 𑀤𑁂𑀯𑀸𑀦𑀫𑀺𑀦𑁆𑀤𑁄’𑀢𑀺. 𑀬𑀣𑀸 𑀬𑀣𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀦𑀸𑀫𑀁 𑀲𑀸𑀯𑁂𑀲𑀺, 𑀢𑀣𑀸 𑀢𑀣𑀸 𑀲𑁄 𑀬𑀓𑁆𑀔𑁄 𑀤𑀼𑀩𑁆𑀩𑀡𑁆𑀡𑀢𑀭𑁄 𑀘𑁂𑀯 𑀅𑀳𑁄𑀲𑀺 𑀑𑀓𑁄𑀝𑀺𑀫𑀓𑀢𑀭𑁄 𑀘. 𑀤𑀼𑀩𑁆𑀩𑀡𑁆𑀡𑀢𑀭𑁄 𑀘𑁂𑀯 𑀳𑀼𑀢𑁆𑀯𑀸 𑀑𑀓𑁄𑀝𑀺𑀫𑀓𑀢𑀭𑁄 𑀘 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀦𑀼𑀦𑀬𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀦 𑀲𑀽𑀧𑀳𑀢𑀘𑀺𑀢𑁆𑀢𑁄𑀫𑁆𑀳𑀺, 𑀦𑀸𑀯𑀢𑁆𑀢𑁂𑀦 𑀲𑀼𑀯𑀸𑀦𑀬𑁄;

𑀦 𑀯𑁄 𑀘𑀺𑀭𑀸𑀳𑀁 𑀓𑀼𑀚𑁆𑀛𑀸𑀫𑀺, 𑀓𑁄𑀥𑁄 𑀫𑀬𑀺 𑀦𑀸𑀯𑀢𑀺𑀝𑁆𑀞𑀢𑀺.

‘‘𑀓𑀼𑀤𑁆𑀥𑀸𑀳𑀁 𑀦 𑀨𑀭𑀼𑀲𑀁 𑀩𑁆𑀭𑀽𑀫𑀺, 𑀦 𑀘 𑀥𑀫𑁆𑀫𑀸𑀦𑀺 𑀓𑀺𑀢𑁆𑀢𑀬𑁂;

𑀲𑀦𑁆𑀦𑀺𑀕𑁆𑀕𑀡𑁆𑀳𑀸𑀫𑀺 𑀅𑀢𑁆𑀢𑀸𑀦𑀁, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄’’𑀢𑀺.

𑁩. 𑀲𑀫𑁆𑀩𑀭𑀺𑀫𑀸𑀬𑀸𑀲𑀼𑀢𑁆𑀢𑀁

𑁨𑁬𑁯. 𑀲𑀸𑀯𑀢𑁆𑀣𑀺𑀬𑀁…𑀧𑁂… 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀆𑀩𑀸𑀥𑀺𑀓𑁄 𑀅𑀳𑁄𑀲𑀺 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺 𑀕𑀺𑀮𑀸𑀦𑀧𑀼𑀘𑁆𑀙𑀓𑁄. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀢𑀺𑀓𑀺𑀘𑁆𑀙 𑀫𑀁 𑀤𑁂𑀯𑀸𑀦𑀫𑀺𑀦𑁆𑀤𑀸’𑀢𑀺. ‘𑀯𑀸𑀘𑁂𑀳𑀺 𑀫𑀁, 𑀯𑁂𑀧𑀘𑀺𑀢𑁆𑀢𑀺, 𑀲𑀫𑁆𑀩𑀭𑀺𑀫𑀸𑀬’𑀦𑁆𑀢𑀺. ‘𑀦 𑀢𑀸𑀯𑀸𑀳𑀁 𑀯𑀸𑀘𑁂𑀫𑀺, 𑀬𑀸𑀯𑀸𑀳𑀁, 𑀫𑀸𑀭𑀺𑀲, 𑀅𑀲𑀼𑀭𑁂 𑀧𑀝𑀺𑀧𑀼𑀘𑁆𑀙𑀸𑀫𑀻’’’𑀢𑀺. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀅𑀲𑀼𑀭𑁂 𑀧𑀝𑀺𑀧𑀼𑀘𑁆𑀙𑀺 𑁋 ‘𑀯𑀸𑀘𑁂𑀫𑀳𑀁, 𑀫𑀸𑀭𑀺𑀲𑀸, 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀲𑀫𑁆𑀩𑀭𑀺𑀫𑀸𑀬’𑀦𑁆𑀢𑀺? ‘𑀫𑀸 𑀔𑁄 𑀢𑁆𑀯𑀁, 𑀫𑀸𑀭𑀺𑀲, 𑀯𑀸𑀘𑁂𑀲𑀺 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀲𑀫𑁆𑀩𑀭𑀺𑀫𑀸𑀬’’’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀫𑀸𑀬𑀸𑀯𑀻 𑀫𑀖𑀯𑀸 𑀲𑀓𑁆𑀓, 𑀤𑁂𑀯𑀭𑀸𑀚 𑀲𑀼𑀚𑀫𑁆𑀧𑀢𑀺;

𑀉𑀧𑁂𑀢𑀺 𑀦𑀺𑀭𑀬𑀁 𑀖𑁄𑀭𑀁, 𑀲𑀫𑁆𑀩𑀭𑁄𑀯 𑀲𑀢𑀁 𑀲𑀫’’𑀦𑁆𑀢𑀺.

𑁪. 𑀅𑀘𑁆𑀘𑀬𑀲𑀼𑀢𑁆𑀢𑀁

𑁨𑁭𑁦. 𑀲𑀸𑀯𑀢𑁆𑀣𑀺𑀬𑀁…𑀧𑁂… 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁆𑀯𑁂 𑀪𑀺𑀓𑁆𑀔𑀽 𑀲𑀫𑁆𑀧𑀬𑁄𑀚𑁂𑀲𑀼𑀁. 𑀢𑀢𑁆𑀭𑁂𑀓𑁄 𑀪𑀺𑀓𑁆𑀔𑀼 𑀅𑀘𑁆𑀘𑀲𑀭𑀸. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑁂𑀲𑁂𑀢𑀺; 𑀲𑁄 𑀪𑀺𑀓𑁆𑀔𑀼 𑀦𑀧𑁆𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀤𑁆𑀯𑁂 𑀪𑀺𑀓𑁆𑀔𑀽 𑀲𑀫𑁆𑀧𑀬𑁄𑀚𑁂𑀲𑀼𑀁, 𑀢𑀢𑁆𑀭𑁂𑀓𑁄 𑀪𑀺𑀓𑁆𑀔𑀼 𑀅𑀘𑁆𑀘𑀲𑀭𑀸. 𑀅𑀣 𑀔𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑁂𑀲𑁂𑀢𑀺, 𑀲𑁄 𑀪𑀺𑀓𑁆𑀔𑀼 𑀦𑀧𑁆𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺.

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑀸. 𑀬𑁄 𑀘 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀦 𑀧𑀲𑁆𑀲𑀢𑀺, 𑀬𑁄 𑀘 𑀅𑀘𑁆𑀘𑀬𑀁 𑀤𑁂𑀲𑁂𑀦𑁆𑀢𑀲𑁆𑀲 𑀬𑀣𑀸𑀥𑀫𑁆𑀫𑀁 𑀦𑀧𑁆𑀧𑀝𑀺𑀕𑁆𑀕𑀡𑁆𑀳𑀸’’𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀩𑀸𑀮𑀸. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀸. 𑀬𑁄 𑀘 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀲𑁆𑀲𑀢𑀺, 𑀬𑁄 𑀘 𑀅𑀘𑁆𑀘𑀬𑀁 𑀤𑁂𑀲𑁂𑀦𑁆𑀢𑀲𑁆𑀲 𑀬𑀣𑀸𑀥𑀫𑁆𑀫𑀁 𑀧𑀝𑀺𑀕𑁆𑀕𑀡𑁆𑀳𑀸’’𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀡𑁆𑀟𑀺𑀢𑀸.

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀦𑀼𑀦𑀬𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀓𑁄𑀥𑁄 𑀯𑁄 𑀯𑀲𑀫𑀸𑀬𑀸𑀢𑀼, 𑀫𑀸 𑀘 𑀫𑀺𑀢𑁆𑀢𑁂𑀳𑀺 𑀯𑁄 𑀚𑀭𑀸;

𑀅𑀕𑀭𑀳𑀺𑀬𑀁 𑀫𑀸 𑀕𑀭𑀳𑀺𑀢𑁆𑀣, 𑀫𑀸 𑀘 𑀪𑀸𑀲𑀺𑀢𑁆𑀣 𑀧𑁂𑀲𑀼𑀡𑀁;

𑀅𑀣 𑀧𑀸𑀧𑀚𑀦𑀁 𑀓𑁄𑀥𑁄, 𑀧𑀩𑁆𑀩𑀢𑁄𑀯𑀸𑀪𑀺𑀫𑀤𑁆𑀤𑀢𑀻’’𑀢𑀺.

𑁫. 𑀅𑀓𑁆𑀓𑁄𑀥𑀲𑀼𑀢𑁆𑀢𑀁

𑁨𑁭𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽…𑀧𑁂… 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀦𑀼𑀦𑀬𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀫𑀸 𑀯𑁄 𑀓𑁄𑀥𑁄 𑀅𑀚𑁆𑀛𑀪𑀯𑀺, 𑀫𑀸 𑀘 𑀓𑀼𑀚𑁆𑀛𑀺𑀢𑁆𑀣 𑀓𑀼𑀚𑁆𑀛𑀢𑀁;

𑀅𑀓𑁆𑀓𑁄𑀥𑁄 𑀅𑀯𑀺𑀳𑀺𑀁𑀲𑀸 𑀘, 𑀅𑀭𑀺𑀬𑁂𑀲𑀼 𑀘 𑀧𑀝𑀺𑀧𑀤𑀸 [𑀯𑀲𑀢𑀻 𑀲𑀤𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀅𑀣 𑀧𑀸𑀧𑀚𑀦𑀁 𑀓𑁄𑀥𑁄, 𑀧𑀩𑁆𑀩𑀢𑁄𑀯𑀸𑀪𑀺𑀫𑀤𑁆𑀤𑀢𑀻’’𑀢𑀺.

𑀢𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀙𑁂𑀢𑁆𑀯𑀸 𑀤𑀼𑀩𑁆𑀩𑀡𑁆𑀡𑀺𑀬𑀫𑀸𑀬𑀸, 𑀅𑀘𑁆𑀘𑀬𑁂𑀦 𑀅𑀓𑁄𑀥𑀦𑁄;

𑀤𑁂𑀲𑀺𑀢𑀁 𑀩𑀼𑀤𑁆𑀥𑀲𑁂𑀝𑁆𑀞𑁂𑀦, 𑀇𑀤𑀜𑁆𑀳𑀺 𑀲𑀓𑁆𑀓𑀧𑀜𑁆𑀘𑀓𑀦𑁆𑀢𑀺.

𑀲𑀓𑁆𑀓𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.