𑁧. 𑀙𑁂𑀢𑁆𑀯𑀸𑀲𑀼𑀢𑁆𑀢𑀁

𑁨𑁬𑁭. 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀁𑀲𑀼 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑀺𑀁𑀲𑀼 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀏𑀓𑀥𑀫𑁆𑀫𑀲𑁆𑀲, 𑀯𑀥𑀁 𑀭𑁄𑀘𑁂𑀲𑀺 𑀕𑁄𑀢𑀫𑀸’’𑀢𑀺.

‘‘𑀓𑁄𑀥𑀁 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑁄𑀥𑀁 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑁄𑀥𑀲𑁆𑀲 𑀯𑀺𑀲𑀫𑀽𑀮𑀲𑁆𑀲, 𑀫𑀥𑀼𑀭𑀕𑁆𑀕𑀲𑁆𑀲 𑀯𑀸𑀲𑀯;

𑀯𑀥𑀁 𑀅𑀭𑀺𑀬𑀸 𑀧𑀲𑀁𑀲𑀦𑁆𑀢𑀺, 𑀢𑀜𑁆𑀳𑀺 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀻’’𑀢𑀺.