𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀯𑀢𑀧𑀤𑀲𑀼𑀢𑁆𑀢𑀁

𑁨𑁫𑁭. 𑀲𑀸𑀯𑀢𑁆𑀣𑀺𑀬𑀁. ‘‘𑀲𑀓𑁆𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀲𑀢𑁆𑀢 𑀯𑀢𑀧𑀤𑀸𑀦𑀺 [𑀯𑀢𑁆𑀢𑀧𑀤𑀸𑀦𑀺 (𑀓.)] 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸. 𑀓𑀢𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺? 𑀬𑀸𑀯𑀚𑀻𑀯𑀁 𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀻 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀲𑀡𑁆𑀳𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀅𑀧𑀺𑀲𑀼𑀡𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑁂𑀬𑁆𑀬𑀁 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄, 𑀬𑀸𑀯𑀚𑀻𑀯𑀁 𑀲𑀘𑁆𑀘𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀅𑀓𑁆𑀓𑁄𑀥𑀦𑁄 𑀅𑀲𑁆𑀲𑀁 𑁋 𑀲𑀘𑁂𑀧𑀺 𑀫𑁂 𑀓𑁄𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀦𑀁 𑀧𑀝𑀺𑀯𑀺𑀦𑁂𑀬𑁆𑀬’’𑀦𑁆𑀢𑀺. ‘‘𑀲𑀓𑁆𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀇𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸’’𑀢𑀺.

‘‘𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀁 𑀚𑀦𑁆𑀢𑀼𑀁, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑀁;

𑀲𑀡𑁆𑀳𑀁 𑀲𑀔𑀺𑀮𑀲𑀫𑁆𑀪𑀸𑀲𑀁, 𑀧𑁂𑀲𑀼𑀡𑁂𑀬𑁆𑀬𑀧𑁆𑀧𑀳𑀸𑀬𑀺𑀦𑀁.

‘‘𑀫𑀘𑁆𑀙𑁂𑀭𑀯𑀺𑀦𑀬𑁂 𑀬𑀼𑀢𑁆𑀢𑀁, 𑀲𑀘𑁆𑀘𑀁 𑀓𑁄𑀥𑀸𑀪𑀺𑀪𑀼𑀁 𑀦𑀭𑀁;

𑀢𑀁 𑀯𑁂 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀆𑀳𑀼 𑀲𑀧𑁆𑀧𑀼𑀭𑀺𑀲𑁄 𑀇𑀢𑀻’’𑀢𑀺.

𑁨. 𑀲𑀓𑁆𑀓𑀦𑀸𑀫𑀲𑀼𑀢𑁆𑀢𑀁

𑁨𑁫𑁮. 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀲𑀓𑁆𑀓𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀫𑀖𑀯𑀸𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀧𑀼𑀭𑁂 [𑀧𑀼𑀭𑁂 𑀧𑀼𑀭𑁂 (𑀲𑀻. 𑀧𑀻.)] 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 𑀧𑀼𑀭𑀺𑀦𑁆𑀤𑀤𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 𑀲𑀓𑁆𑀓𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀆𑀯𑀲𑀣𑀁 𑀅𑀤𑀸𑀲𑀺, 𑀢𑀲𑁆𑀫𑀸 𑀯𑀸𑀲𑀯𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀳𑀲𑁆𑀲𑀫𑁆𑀧𑀺 𑀅𑀢𑁆𑀣𑀸𑀦𑀁 𑀫𑀼𑀳𑀼𑀢𑁆𑀢𑁂𑀦 𑀘𑀺𑀦𑁆𑀢𑁂𑀢𑀺, 𑀢𑀲𑁆𑀫𑀸 𑀲𑀳𑀲𑁆𑀲𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀼𑀚𑀸 𑀦𑀸𑀫 𑀅𑀲𑀼𑀭𑀓𑀜𑁆𑀜𑀸 𑀧𑀚𑀸𑀧𑀢𑀺, 𑀢𑀲𑁆𑀫𑀸 𑀲𑀼𑀚𑀫𑁆𑀧𑀢𑀻𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀢𑀲𑁆𑀫𑀸 𑀤𑁂𑀯𑀸𑀦𑀫𑀺𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑀲𑁆𑀲, 𑀪𑀺𑀓𑁆𑀔𑀯𑁂 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸. 𑀓𑀢𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺? 𑀬𑀸𑀯𑀚𑀻𑀯𑀁 𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀻 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀲𑀡𑁆𑀳𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀅𑀧𑀺𑀲𑀼𑀡𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑁂𑀬𑁆𑀬𑀁 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄, 𑀬𑀸𑀯𑀚𑀻𑀯𑀁 𑀲𑀘𑁆𑀘𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀅𑀓𑁆𑀓𑁄𑀥𑀦𑁄 𑀅𑀲𑁆𑀲𑀁 𑁋 𑀲𑀘𑁂𑀧𑀺 𑀫𑁂 𑀓𑁄𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀦𑀁 𑀧𑀝𑀺𑀯𑀺𑀦𑁂𑀬𑁆𑀬’’𑀦𑁆𑀢𑀺. ‘‘𑀲𑀓𑁆𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀇𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸’’𑀢𑀺.

‘‘𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀁 𑀚𑀦𑁆𑀢𑀼𑀁, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑀁;

𑀲𑀡𑁆𑀳𑀁 𑀲𑀔𑀺𑀮𑀲𑀫𑁆𑀪𑀸𑀲𑀁, 𑀧𑁂𑀲𑀼𑀡𑁂𑀬𑁆𑀬𑀧𑁆𑀧𑀳𑀸𑀬𑀺𑀦𑀁.

‘‘𑀫𑀘𑁆𑀙𑁂𑀭𑀯𑀺𑀦𑀬𑁂 𑀬𑀼𑀢𑁆𑀢𑀁, 𑀲𑀘𑁆𑀘𑀁 𑀓𑁄𑀥𑀸𑀪𑀺𑀪𑀼𑀁 𑀦𑀭𑀁;

𑀢𑀁 𑀯𑁂 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀆𑀳𑀼 𑀲𑀧𑁆𑀧𑀼𑀭𑀺𑀲𑁄 𑀇𑀢𑀻’’𑀢𑀺.

𑁩. 𑀫𑀳𑀸𑀮𑀺𑀲𑀼𑀢𑁆𑀢𑀁

𑁨𑁫𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀫𑀳𑀸𑀮𑀺 𑀮𑀺𑀘𑁆𑀙𑀯𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀮𑀺 𑀮𑀺𑀘𑁆𑀙𑀯𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀤𑀺𑀝𑁆𑀞𑁄 𑀔𑁄, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺?

‘‘𑀤𑀺𑀝𑁆𑀞𑁄 𑀔𑁄 𑀫𑁂, 𑀫𑀳𑀸𑀮𑀺, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺.

‘‘𑀲𑁄 𑀳𑀺 𑀦𑀽𑀦, 𑀪𑀦𑁆𑀢𑁂, 𑀲𑀓𑁆𑀓𑀧𑀢𑀺𑀭𑀽𑀧𑀓𑁄 𑀪𑀯𑀺𑀲𑁆𑀲𑀢𑀺. 𑀤𑀼𑀤𑁆𑀤𑀲𑁄 𑀳𑀺, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺.

‘‘𑀲𑀓𑁆𑀓𑀜𑁆𑀘 𑀔𑁆𑀯𑀸𑀳𑀁, 𑀫𑀳𑀸𑀮𑀺, 𑀧𑀚𑀸𑀦𑀸𑀫𑀺 𑀲𑀓𑁆𑀓𑀓𑀭𑀡𑁂 𑀘 𑀥𑀫𑁆𑀫𑁂, 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸, 𑀢𑀜𑁆𑀘 𑀧𑀚𑀸𑀦𑀸𑀫𑀺.

‘‘𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀫𑀖𑀯𑀸𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 𑀲𑀓𑁆𑀓𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀧𑀼𑀭𑁂 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 𑀧𑀼𑀭𑀺𑀦𑁆𑀤𑀤𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀆𑀯𑀲𑀣𑀁 𑀅𑀤𑀸𑀲𑀺, 𑀢𑀲𑁆𑀫𑀸 𑀯𑀸𑀲𑀯𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀳𑀲𑁆𑀲𑀫𑁆𑀧𑀺 𑀅𑀢𑁆𑀣𑀸𑀦𑀁 𑀫𑀼𑀳𑀼𑀢𑁆𑀢𑁂𑀦 𑀘𑀺𑀦𑁆𑀢𑁂𑀢𑀺, 𑀢𑀲𑁆𑀫𑀸 𑀲𑀳𑀲𑁆𑀲𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑀲𑁆𑀲, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀼𑀚𑀸 𑀦𑀸𑀫 𑀅𑀲𑀼𑀭𑀓𑀜𑁆𑀜𑀸 𑀧𑀚𑀸𑀧𑀢𑀺, 𑀢𑀲𑁆𑀫𑀸 𑀲𑀼𑀚𑀫𑁆𑀧𑀢𑀻𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀢𑀲𑁆𑀫𑀸 𑀤𑁂𑀯𑀸𑀦𑀫𑀺𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀓𑁆𑀓𑀲𑁆𑀲, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸. 𑀓𑀢𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺? 𑀬𑀸𑀯𑀚𑀻𑀯𑀁 𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀻 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀲𑀡𑁆𑀳𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀅𑀧𑀺𑀲𑀼𑀡𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑁂𑀬𑁆𑀬𑀁 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄, 𑀬𑀸𑀯𑀚𑀻𑀯𑀁 𑀲𑀘𑁆𑀘𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀅𑀓𑁆𑀓𑁄𑀥𑀦𑁄 𑀅𑀲𑁆𑀲𑀁 𑁋 𑀲𑀘𑁂𑀧𑀺 𑀫𑁂 𑀓𑁄𑀥𑁄 𑀉𑀧𑁆𑀧𑀚𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀦𑀁 𑀧𑀝𑀺𑀯𑀺𑀦𑁂𑀬𑁆𑀬’’𑀦𑁆𑀢𑀺. ‘‘𑀲𑀓𑁆𑀓𑀲𑁆𑀲, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀇𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸’’𑀢𑀺.

‘‘𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀁 𑀚𑀦𑁆𑀢𑀼𑀁, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑀁;

𑀲𑀡𑁆𑀳𑀁 𑀲𑀔𑀺𑀮𑀲𑀫𑁆𑀪𑀸𑀲𑀁, 𑀧𑁂𑀲𑀼𑀡𑁂𑀬𑁆𑀬𑀧𑁆𑀧𑀳𑀸𑀬𑀺𑀦𑀁.

‘‘𑀫𑀘𑁆𑀙𑁂𑀭𑀯𑀺𑀦𑀬𑁂 𑀬𑀼𑀢𑁆𑀢𑀁, 𑀲𑀘𑁆𑀘𑀁 𑀓𑁄𑀥𑀸𑀪𑀺𑀪𑀼𑀁 𑀦𑀭𑀁;

𑀢𑀁 𑀯𑁂 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀆𑀳𑀼 𑀲𑀧𑁆𑀧𑀼𑀭𑀺𑀲𑁄 𑀇𑀢𑀻’’𑀢𑀺.

𑁪. 𑀤𑀮𑀺𑀤𑁆𑀤𑀲𑀼𑀢𑁆𑀢𑀁

𑁨𑁬𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀇𑀫𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀤𑀮𑀺𑀤𑁆𑀤𑁄 [𑀫𑀦𑀼𑀲𑁆𑀲𑀤𑀴𑀺𑀤𑁆𑀤𑁄 (𑀲𑀻. 𑀲𑁆𑀬𑀸. 𑀓𑀁.)] 𑀅𑀳𑁄𑀲𑀺 𑀫𑀦𑀼𑀲𑁆𑀲𑀓𑀧𑀡𑁄 𑀫𑀦𑀼𑀲𑁆𑀲𑀯𑀭𑀸𑀓𑁄. 𑀲𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀤𑁆𑀥𑀁 𑀲𑀫𑀸𑀤𑀺𑀬𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀺, 𑀲𑀼𑀢𑀁 𑀲𑀫𑀸𑀤𑀺𑀬𑀺, 𑀘𑀸𑀕𑀁 𑀲𑀫𑀸𑀤𑀺𑀬𑀺, 𑀧𑀜𑁆𑀜𑀁 𑀲𑀫𑀸𑀤𑀺𑀬𑀺. 𑀲𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀤𑁆𑀥𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀼𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀘𑀸𑀕𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀜𑁆𑀜𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁. 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀅𑀬𑀜𑁆𑀳𑀺 𑀤𑁂𑀯𑀧𑀼𑀢𑁆𑀢𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀫𑀦𑀼𑀲𑁆𑀲𑀤𑀮𑀺𑀤𑁆𑀤𑁄 𑀅𑀳𑁄𑀲𑀺 𑀫𑀦𑀼𑀲𑁆𑀲𑀓𑀧𑀡𑁄 𑀫𑀦𑀼𑀲𑁆𑀲𑀯𑀭𑀸𑀓𑁄; 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁. 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘𑀸’’’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘𑀫𑀸 𑀔𑁄 𑀢𑀼𑀫𑁆𑀳𑁂, 𑀫𑀸𑀭𑀺𑀲𑀸, 𑀏𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀉𑀚𑁆𑀛𑀸𑀬𑀺𑀢𑁆𑀣. 𑀏𑀲𑁄 𑀔𑁄, 𑀫𑀸𑀭𑀺𑀲𑀸, 𑀤𑁂𑀯𑀧𑀼𑀢𑁆𑀢𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀤𑁆𑀥𑀁 𑀲𑀫𑀸𑀤𑀺𑀬𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀺, 𑀲𑀼𑀢𑀁 𑀲𑀫𑀸𑀤𑀺𑀬𑀺, 𑀘𑀸𑀕𑀁 𑀲𑀫𑀸𑀤𑀺𑀬𑀺, 𑀧𑀜𑁆𑀜𑀁 𑀲𑀫𑀸𑀤𑀺𑀬𑀺. 𑀲𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀤𑁆𑀥𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀼𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀘𑀸𑀕𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀜𑁆𑀜𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁. 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘𑀸’’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀦𑀼𑀦𑀬𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀬𑀲𑁆𑀲 𑀲𑀤𑁆𑀥𑀸 𑀢𑀣𑀸𑀕𑀢𑁂, 𑀅𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀲𑀻𑀮𑀜𑁆𑀘 𑀬𑀲𑁆𑀲 𑀓𑀮𑁆𑀬𑀸𑀡𑀁, 𑀅𑀭𑀺𑀬𑀓𑀦𑁆𑀢𑀁 𑀧𑀲𑀁𑀲𑀺𑀢𑀁.

‘‘𑀲𑀗𑁆𑀖𑁂 𑀧𑀲𑀸𑀤𑁄 𑀬𑀲𑁆𑀲𑀢𑁆𑀣𑀺, 𑀉𑀚𑀼𑀪𑀽𑀢𑀜𑁆𑀘 𑀤𑀲𑁆𑀲𑀦𑀁;

𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

‘‘𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.

𑁫. 𑀭𑀸𑀫𑀡𑁂𑀬𑁆𑀬𑀓𑀲𑀼𑀢𑁆𑀢𑀁

𑁨𑁬𑁧. 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺?

‘‘𑀆𑀭𑀸𑀫𑀘𑁂𑀢𑁆𑀬𑀸 𑀯𑀦𑀘𑁂𑀢𑁆𑀬𑀸, 𑀧𑁄𑀓𑁆𑀔𑀭𑀜𑁆𑀜𑁄 𑀲𑀼𑀦𑀺𑀫𑁆𑀫𑀺𑀢𑀸;

𑀫𑀦𑀼𑀲𑁆𑀲𑀭𑀸𑀫𑀡𑁂𑀬𑁆𑀬𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺.

𑁬. 𑀬𑀚𑀫𑀸𑀦𑀲𑀼𑀢𑁆𑀢𑀁

𑁨𑁬𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀓𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄.

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

𑁭. 𑀩𑀼𑀤𑁆𑀥𑀯𑀦𑁆𑀤𑀦𑀸𑀲𑀼𑀢𑁆𑀢𑀁

𑁨𑁬𑁩. 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀤𑀺𑀯𑀸𑀯𑀺𑀳𑀸𑀭𑀕𑀢𑁄 𑀳𑁄𑀢𑀺 𑀧𑀝𑀺𑀲𑀮𑁆𑀮𑀻𑀦𑁄. 𑀅𑀣 𑀔𑁄 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀩𑀸𑀳𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀁𑀲𑀼. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀉𑀝𑁆𑀞𑁂𑀳𑀺 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫,

𑀧𑀦𑁆𑀦𑀪𑀸𑀭 𑀅𑀦𑀡 𑀯𑀺𑀘𑀭 𑀮𑁄𑀓𑁂;

𑀘𑀺𑀢𑁆𑀢𑀜𑁆𑀘 𑀢𑁂 𑀲𑀼𑀯𑀺𑀫𑀼𑀢𑁆𑀢𑀁,

𑀘𑀦𑁆𑀤𑁄 𑀬𑀣𑀸 𑀧𑀦𑁆𑀦𑀭𑀲𑀸𑀬 𑀭𑀢𑁆𑀢𑀺’’𑀦𑁆𑀢𑀺.

‘‘𑀦 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀢𑀣𑀸𑀕𑀢𑀸 𑀏𑀯𑀁 𑀯𑀦𑁆𑀤𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀢𑀣𑀸𑀕𑀢𑀸 𑀯𑀦𑁆𑀤𑀺𑀢𑀩𑁆𑀩𑀸 𑁋

‘‘𑀉𑀝𑁆𑀞𑁂𑀳𑀺 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫,

𑀲𑀢𑁆𑀣𑀯𑀸𑀳 𑀅𑀦𑀡 𑀯𑀺𑀘𑀭 𑀮𑁄𑀓𑁂;

𑀤𑁂𑀲𑀲𑁆𑀲𑀼 𑀪𑀕𑀯𑀸 𑀥𑀫𑁆𑀫𑀁,

𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.

𑁮. 𑀕𑀳𑀝𑁆𑀞𑀯𑀦𑁆𑀤𑀦𑀸𑀲𑀼𑀢𑁆𑀢𑀁

𑁨𑁬𑁪. 𑀲𑀸𑀯𑀢𑁆𑀣𑀺𑀬𑀁. 𑀢𑀢𑁆𑀭…𑀧𑁂… 𑀏𑀢𑀤𑀯𑁄𑀘 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀸𑀢𑀮𑀺𑀁 𑀲𑀗𑁆𑀕𑀸𑀳𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑁄𑀚𑁂𑀳𑀺, 𑀲𑀫𑁆𑀫 𑀫𑀸𑀢𑀮𑀺, 𑀲𑀳𑀲𑁆𑀲𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣𑀁. 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀸𑀫 𑀲𑀼𑀪𑀽𑀫𑀺𑀁 𑀤𑀲𑁆𑀲𑀦𑀸𑀬𑀸’𑀢𑀺. ‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀮𑀺 𑀲𑀗𑁆𑀕𑀸𑀳𑀓𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑀳𑀲𑁆𑀲𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣𑀁 𑀬𑁄𑀚𑁂𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀯𑁂𑀤𑁂𑀲𑀺 𑁋 ‘𑀬𑀼𑀢𑁆𑀢𑁄 𑀔𑁄 𑀢𑁂, 𑀫𑀸𑀭𑀺𑀲, 𑀲𑀳𑀲𑁆𑀲𑀬𑀼𑀢𑁆𑀢𑁄 𑀆𑀚𑀜𑁆𑀜𑀭𑀣𑁄. 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀸 𑀑𑀭𑁄𑀳𑀦𑁆𑀢𑁄 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 [𑀧𑀜𑁆𑀚𑀮𑀺𑀓𑁄 (𑀧𑀻.), 𑀧𑀜𑁆𑀚𑀮𑀺𑀁 𑀓𑀢𑁆𑀯𑀸 (𑀓.)] 𑀲𑀼𑀤𑀁 𑀧𑀼𑀣𑀼𑀤𑁆𑀤𑀺𑀲𑀸 𑀦𑀫𑀲𑁆𑀲𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀮𑀺 𑀲𑀗𑁆𑀕𑀸𑀳𑀓𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀢𑀁 𑀦𑀫𑀲𑁆𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸, 𑀲𑀩𑁆𑀩𑁂 𑀪𑀼𑀫𑁆𑀫𑀸 𑀘 𑀔𑀢𑁆𑀢𑀺𑀬𑀸;

𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸, 𑀢𑀺𑀤𑀲𑀸 𑀘 𑀬𑀲𑀲𑁆𑀲𑀺𑀦𑁄;

𑀅𑀣 𑀓𑁄 𑀦𑀸𑀫 𑀲𑁄 𑀬𑀓𑁆𑀔𑁄, 𑀬𑀁 𑀢𑁆𑀯𑀁 𑀲𑀓𑁆𑀓 𑀦𑀫𑀲𑁆𑀲𑀲𑀻’’𑀢𑀺.

‘‘𑀫𑀁 𑀦𑀫𑀲𑁆𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸, 𑀲𑀩𑁆𑀩𑁂 𑀪𑀼𑀫𑁆𑀫𑀸 𑀘 𑀔𑀢𑁆𑀢𑀺𑀬𑀸;

𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸, 𑀢𑀺𑀤𑀲𑀸 𑀘 𑀬𑀲𑀲𑁆𑀲𑀺𑀦𑁄.

‘‘𑀅𑀳𑀜𑁆𑀘 𑀲𑀻𑀮𑀲𑀫𑁆𑀧𑀦𑁆𑀦𑁂, 𑀘𑀺𑀭𑀭𑀢𑁆𑀢𑀲𑀫𑀸𑀳𑀺𑀢𑁂;

𑀲𑀫𑁆𑀫𑀸𑀧𑀩𑁆𑀩𑀚𑀺𑀢𑁂 𑀯𑀦𑁆𑀤𑁂, 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀦𑁂.

‘‘𑀬𑁂 𑀕𑀳𑀝𑁆𑀞𑀸 𑀧𑀼𑀜𑁆𑀜𑀓𑀭𑀸, 𑀲𑀻𑀮𑀯𑀦𑁆𑀢𑁄 𑀉𑀧𑀸𑀲𑀓𑀸;

𑀥𑀫𑁆𑀫𑁂𑀦 𑀤𑀸𑀭𑀁 𑀧𑁄𑀲𑁂𑀦𑁆𑀢𑀺, 𑀢𑁂 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀻’’𑀢𑀺.

‘‘𑀲𑁂𑀝𑁆𑀞𑀸 𑀳𑀺 𑀓𑀺𑀭 𑀮𑁄𑀓𑀲𑁆𑀫𑀺𑀁, 𑀬𑁂 𑀢𑁆𑀯𑀁 𑀲𑀓𑁆𑀓 𑀦𑀫𑀲𑁆𑀲𑀲𑀺;

𑀅𑀳𑀫𑁆𑀧𑀺 𑀢𑁂 𑀦𑀫𑀲𑁆𑀲𑀸𑀫𑀺, 𑀬𑁂 𑀦𑀫𑀲𑁆𑀲𑀲𑀺 𑀯𑀸𑀲𑀯𑀸’’𑀢𑀺.

‘‘𑀇𑀤𑀁 𑀯𑀢𑁆𑀯𑀸𑀦 𑀫𑀖𑀯𑀸, 𑀤𑁂𑀯𑀭𑀸𑀚𑀸 𑀲𑀼𑀚𑀫𑁆𑀧𑀢𑀺;

𑀧𑀼𑀣𑀼𑀤𑁆𑀤𑀺𑀲𑀸 𑀦𑀫𑀲𑁆𑀲𑀺𑀢𑁆𑀯𑀸, 𑀧𑀫𑀼𑀔𑁄 𑀭𑀣𑀫𑀸𑀭𑀼𑀳𑀻’’𑀢𑀺.

𑁯. 𑀲𑀢𑁆𑀣𑀸𑀭𑀯𑀦𑁆𑀤𑀦𑀸𑀲𑀼𑀢𑁆𑀢𑀁

𑁨𑁬𑁫. 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀸𑀢𑀮𑀺𑀁 𑀲𑀗𑁆𑀕𑀸𑀳𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑁄𑀚𑁂𑀳𑀺, 𑀲𑀫𑁆𑀫 𑀫𑀸𑀢𑀮𑀺, 𑀲𑀳𑀲𑁆𑀲𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣𑀁, 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀸𑀫 𑀲𑀼𑀪𑀽𑀫𑀺𑀁 𑀤𑀲𑁆𑀲𑀦𑀸𑀬𑀸’𑀢𑀺. ‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀮𑀺 𑀲𑀗𑁆𑀕𑀸𑀳𑀓𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑀳𑀲𑁆𑀲𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣𑀁 𑀬𑁄𑀚𑁂𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀯𑁂𑀤𑁂𑀲𑀺 𑁋 ‘𑀬𑀼𑀢𑁆𑀢𑁄 𑀔𑁄 𑀢𑁂, 𑀫𑀸𑀭𑀺𑀲, 𑀲𑀳𑀲𑁆𑀲𑀬𑀼𑀢𑁆𑀢𑁄 𑀆𑀚𑀜𑁆𑀜𑀭𑀣𑁄. 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀸 𑀑𑀭𑁄𑀳𑀦𑁆𑀢𑁄 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀲𑀼𑀤𑀁 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀮𑀺 𑀲𑀗𑁆𑀕𑀸𑀳𑀓𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀬𑀜𑁆𑀳𑀺 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘, 𑀢𑀁 𑀦𑀫𑀲𑁆𑀲𑀦𑁆𑀢𑀺 𑀯𑀸𑀲𑀯;

𑀅𑀣 𑀓𑁄 𑀦𑀸𑀫 𑀲𑁄 𑀬𑀓𑁆𑀔𑁄, 𑀬𑀁 𑀢𑁆𑀯𑀁 𑀲𑀓𑁆𑀓 𑀦𑀫𑀲𑁆𑀲𑀲𑀻’’𑀢𑀺.

‘‘𑀬𑁄 𑀇𑀥 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀲𑁆𑀫𑀺𑀁 𑀮𑁄𑀓𑁂 𑀲𑀤𑁂𑀯𑀓𑁂;

𑀅𑀦𑁄𑀫𑀦𑀸𑀫𑀁 𑀲𑀢𑁆𑀣𑀸𑀭𑀁, 𑀢𑀁 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀺.

‘‘𑀬𑁂𑀲𑀁 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀢𑁂 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀺.

‘‘𑀬𑁂 𑀭𑀸𑀕𑀤𑁄𑀲𑀯𑀺𑀦𑀬𑀸, 𑀅𑀯𑀺𑀚𑁆𑀚𑀸𑀲𑀫𑀢𑀺𑀓𑁆𑀓𑀫𑀸;

𑀲𑁂𑀓𑁆𑀔𑀸 𑀅𑀧𑀘𑀬𑀸𑀭𑀸𑀫𑀸, 𑀅𑀧𑁆𑀧𑀫𑀢𑁆𑀢𑀸𑀦𑀼𑀲𑀺𑀓𑁆𑀔𑀭𑁂;

𑀢𑁂 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀻’’𑀢𑀺.

‘‘𑀲𑁂𑀝𑁆𑀞𑀸 𑀳𑀺 𑀓𑀺𑀭 𑀮𑁄𑀓𑀲𑁆𑀫𑀺𑀁, 𑀬𑁂 𑀢𑁆𑀯𑀁 𑀲𑀓𑁆𑀓 𑀦𑀫𑀲𑁆𑀲𑀲𑀺;

𑀅𑀳𑀫𑁆𑀧𑀺 𑀢𑁂 𑀦𑀫𑀲𑁆𑀲𑀸𑀫𑀺, 𑀬𑁂 𑀦𑀫𑀲𑁆𑀲𑀲𑀺 𑀯𑀸𑀲𑀯𑀸’’𑀢𑀺.

‘‘𑀇𑀤𑀁 𑀯𑀢𑁆𑀯𑀸𑀦 𑀫𑀖𑀯𑀸, 𑀤𑁂𑀯𑀭𑀸𑀚𑀸 𑀲𑀼𑀚𑀫𑁆𑀧𑀢𑀺;

𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀺𑀢𑁆𑀯𑀸, 𑀧𑀫𑀼𑀔𑁄 𑀭𑀣𑀫𑀸𑀭𑀼𑀳𑀻’’𑀢𑀺.

𑁧𑁦. 𑀲𑀗𑁆𑀖𑀯𑀦𑁆𑀤𑀦𑀸𑀲𑀼𑀢𑁆𑀢𑀁

𑁨𑁬𑁬. 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂. 𑀢𑀢𑁆𑀭 𑀔𑁄…𑀧𑁂… 𑀏𑀢𑀤𑀯𑁄𑀘 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀸𑀢𑀮𑀺𑀁 𑀲𑀗𑁆𑀕𑀸𑀳𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑁄𑀚𑁂𑀳𑀺, 𑀲𑀫𑁆𑀫 𑀫𑀸𑀢𑀮𑀺, 𑀲𑀳𑀲𑁆𑀲𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣𑀁, 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀸𑀫 𑀲𑀼𑀪𑀽𑀫𑀺𑀁 𑀤𑀲𑁆𑀲𑀦𑀸𑀬𑀸’𑀢𑀺. ‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀮𑀺 𑀲𑀗𑁆𑀕𑀸𑀳𑀓𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀲𑀳𑀲𑁆𑀲𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣𑀁 𑀬𑁄𑀚𑁂𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀯𑁂𑀤𑁂𑀲𑀺 𑁋 ‘𑀬𑀼𑀢𑁆𑀢𑁄 𑀔𑁄 𑀢𑁂, 𑀫𑀸𑀭𑀺𑀲, 𑀲𑀳𑀲𑁆𑀲𑀬𑀼𑀢𑁆𑀢𑁄 𑀆𑀚𑀜𑁆𑀜𑀭𑀣𑁄, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀸 𑀑𑀭𑁄𑀳𑀦𑁆𑀢𑁄 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀲𑀼𑀤𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀫𑀲𑁆𑀲𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀮𑀺 𑀲𑀗𑁆𑀕𑀸𑀳𑀓𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀢𑀜𑁆𑀳𑀺 𑀏𑀢𑁂 𑀦𑀫𑀲𑁆𑀲𑁂𑀬𑁆𑀬𑀼𑀁, 𑀧𑀽𑀢𑀺𑀤𑁂𑀳𑀲𑀬𑀸 𑀦𑀭𑀸;

𑀦𑀺𑀫𑀼𑀕𑁆𑀕𑀸 𑀓𑀼𑀡𑀧𑀫𑁆𑀳𑁂𑀢𑁂, 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑀸.

‘‘𑀓𑀺𑀁 𑀦𑀼 𑀢𑁂𑀲𑀁 𑀧𑀺𑀳𑀬𑀲𑀺, 𑀅𑀦𑀸𑀕𑀸𑀭𑀸𑀦 𑀯𑀸𑀲𑀯;

𑀆𑀘𑀸𑀭𑀁 𑀇𑀲𑀺𑀦𑀁 𑀩𑁆𑀭𑀽𑀳𑀺, 𑀢𑀁 𑀲𑀼𑀡𑁄𑀫 𑀯𑀘𑁄 𑀢𑀯𑀸’’𑀢𑀺.

‘‘𑀏𑀢𑀁 𑀢𑁂𑀲𑀁 𑀧𑀺𑀳𑀬𑀸𑀫𑀺, 𑀅𑀦𑀸𑀕𑀸𑀭𑀸𑀦 𑀫𑀸𑀢𑀮𑀺;

𑀬𑀫𑁆𑀳𑀸 𑀕𑀸𑀫𑀸 𑀧𑀓𑁆𑀓𑀫𑀦𑁆𑀢𑀺, 𑀅𑀦𑀧𑁂𑀓𑁆𑀔𑀸 𑀯𑀚𑀦𑁆𑀢𑀺 𑀢𑁂.

‘‘𑀦 𑀢𑁂𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀺, 𑀦 𑀓𑀼𑀫𑁆𑀪𑀺 [𑀦 𑀓𑀼𑀫𑁆𑀪𑀸 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀦 𑀓𑀴𑁄𑀧𑀺𑀬𑀁 [𑀔𑀴𑁄𑀧𑀺𑀬𑀁 (𑀲𑀻.)];

𑀧𑀭𑀦𑀺𑀝𑁆𑀞𑀺𑀢𑀫𑁂𑀲𑀸𑀦𑀸 [𑀧𑀭𑀦𑀺𑀝𑁆𑀞𑀺𑀢𑀫𑁂𑀲𑀦𑀸 (𑀲𑁆𑀬𑀸. 𑀓𑀁. 𑀓.)], 𑀢𑁂𑀦 𑀬𑀸𑀧𑁂𑀦𑁆𑀢𑀺 𑀲𑀼𑀩𑁆𑀩𑀢𑀸.

‘‘𑀲𑀼𑀫𑀦𑁆𑀢𑀫𑀦𑁆𑀢𑀺𑀦𑁄 𑀥𑀻𑀭𑀸, 𑀢𑀼𑀡𑁆𑀳𑀻𑀪𑀽𑀢𑀸 𑀲𑀫𑀜𑁆𑀘𑀭𑀸;

𑀤𑁂𑀯𑀸 𑀯𑀺𑀭𑀼𑀤𑁆𑀥𑀸 𑀅𑀲𑀼𑀭𑁂𑀳𑀺, 𑀧𑀼𑀣𑀼 𑀫𑀘𑁆𑀘𑀸 𑀘 𑀫𑀸𑀢𑀮𑀺.

‘‘𑀅𑀯𑀺𑀭𑀼𑀤𑁆𑀥𑀸 𑀯𑀺𑀭𑀼𑀤𑁆𑀥𑁂𑀲𑀼, 𑀅𑀢𑁆𑀢𑀤𑀡𑁆𑀟𑁂𑀲𑀼 𑀦𑀺𑀩𑁆𑀩𑀼𑀢𑀸;

𑀲𑀸𑀤𑀸𑀦𑁂𑀲𑀼 𑀅𑀦𑀸𑀤𑀸𑀦𑀸, 𑀢𑁂 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀻’’𑀢𑀺.

‘‘𑀲𑁂𑀝𑁆𑀞𑀸 𑀳𑀺 𑀓𑀺𑀭 𑀮𑁄𑀓𑀲𑁆𑀫𑀺𑀁, 𑀬𑁂 𑀢𑁆𑀯𑀁 𑀲𑀓𑁆𑀓 𑀦𑀫𑀲𑁆𑀲𑀲𑀺;

𑀅𑀳𑀫𑁆𑀧𑀺 𑀢𑁂 𑀦𑀫𑀲𑁆𑀲𑀸𑀫𑀺, 𑀬𑁂 𑀦𑀫𑀲𑁆𑀲𑀲𑀺 𑀯𑀸𑀲𑀯𑀸’’𑀢𑀺.

‘‘𑀇𑀤𑀁 𑀯𑀢𑁆𑀯𑀸𑀦 𑀫𑀖𑀯𑀸, 𑀤𑁂𑀯𑀭𑀸𑀚𑀸 𑀲𑀼𑀚𑀫𑁆𑀧𑀢𑀺;

𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀫𑀲𑁆𑀲𑀺𑀢𑁆𑀯𑀸, 𑀧𑀫𑀼𑀔𑁄 𑀭𑀣𑀫𑀸𑀭𑀼𑀳𑀻’’𑀢𑀺.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁂𑀯𑀸 𑀧𑀦 [𑀯 𑀢𑀧𑀤𑁂𑀦 (𑀲𑀻. 𑀲𑁆𑀬𑀸. 𑀓𑀁.)] 𑀢𑀬𑁄 𑀯𑀼𑀢𑁆𑀢𑀸, 𑀤𑀮𑀺𑀤𑁆𑀤𑀜𑁆𑀘 𑀭𑀸𑀫𑀡𑁂𑀬𑁆𑀬𑀓𑀁;

𑀬𑀚𑀫𑀸𑀦𑀜𑁆𑀘 𑀯𑀦𑁆𑀤𑀦𑀸, 𑀢𑀬𑁄 𑀲𑀓𑁆𑀓𑀦𑀫𑀲𑁆𑀲𑀦𑀸𑀢𑀺.