𑁪. 𑀯𑁂𑀧𑀘𑀺𑀢𑁆𑀢𑀺𑀲𑀼𑀢𑁆𑀢𑀁

𑁨𑁫𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 𑀅𑀳𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀅𑀲𑀼𑀭𑁂 𑀆𑀫𑀦𑁆𑀢𑁂𑀲𑀺 𑁋 ‘𑀲𑀘𑁂, 𑀫𑀸𑀭𑀺𑀲𑀸, 𑀤𑁂𑀯𑀸𑀦𑀁 𑀅𑀲𑀼𑀭𑀲𑀗𑁆𑀕𑀸𑀫𑁂 𑀲𑀫𑀼𑀧𑀩𑁆𑀬𑀽𑀴𑁆𑀳𑁂 𑀅𑀲𑀼𑀭𑀸 𑀚𑀺𑀦𑁂𑀬𑁆𑀬𑀼𑀁 𑀤𑁂𑀯𑀸 𑀧𑀭𑀸𑀚𑀺𑀦𑁂𑀬𑁆𑀬𑀼𑀁 [𑀧𑀭𑀸𑀚𑁂𑀬𑁆𑀬𑀼𑀁 (𑀲𑀻. 𑀧𑀻.)], 𑀬𑁂𑀦 𑀦𑀁 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀆𑀦𑁂𑀬𑁆𑀬𑀸𑀣 𑀅𑀲𑀼𑀭𑀧𑀼𑀭’𑀦𑁆𑀢𑀺. 𑀲𑀓𑁆𑀓𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘𑀲𑀘𑁂, 𑀫𑀸𑀭𑀺𑀲𑀸, 𑀤𑁂𑀯𑀸𑀦𑀁 𑀅𑀲𑀼𑀭𑀲𑀗𑁆𑀕𑀸𑀫𑁂 𑀲𑀫𑀼𑀧𑀩𑁆𑀬𑀽𑀴𑁆𑀳𑁂 𑀤𑁂𑀯𑀸 𑀚𑀺𑀦𑁂𑀬𑁆𑀬𑀼𑀁 𑀅𑀲𑀼𑀭𑀸 𑀧𑀭𑀸𑀚𑀺𑀦𑁂𑀬𑁆𑀬𑀼𑀁, 𑀬𑁂𑀦 𑀦𑀁 𑀯𑁂𑀧𑀘𑀺𑀢𑁆𑀢𑀺𑀁 𑀅𑀲𑀼𑀭𑀺𑀦𑁆𑀤𑀁 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀆𑀦𑁂𑀬𑁆𑀬𑀸𑀣 𑀲𑀼𑀥𑀫𑁆𑀫𑀲𑀪’’’𑀦𑁆𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀕𑀸𑀫𑁂 𑀤𑁂𑀯𑀸 𑀚𑀺𑀦𑀺𑀁𑀲𑀼, 𑀅𑀲𑀼𑀭𑀸 𑀧𑀭𑀸𑀚𑀺𑀦𑀺𑀁𑀲𑀼 [𑀧𑀭𑀸𑀚𑀺𑀁𑀲𑀼 (𑀲𑀻. 𑀧𑀻.)]. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀯𑁂𑀧𑀘𑀺𑀢𑁆𑀢𑀺𑀁 𑀅𑀲𑀼𑀭𑀺𑀦𑁆𑀤𑀁 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀲𑀼𑀁 𑀲𑀼𑀥𑀫𑁆𑀫𑀲𑀪𑀁. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀤𑁆𑀥𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀲𑀼𑀥𑀫𑁆𑀫𑀲𑀪𑀁 𑀧𑀯𑀺𑀲𑀦𑁆𑀢𑀜𑁆𑀘 𑀦𑀺𑀓𑁆𑀔𑀫𑀦𑁆𑀢𑀜𑁆𑀘 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀮𑀺 𑀲𑀗𑁆𑀕𑀸𑀳𑀓𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀪𑀬𑀸 𑀦𑀼 𑀫𑀖𑀯𑀸 𑀲𑀓𑁆𑀓, 𑀤𑀼𑀩𑁆𑀩𑀮𑁆𑀬𑀸 𑀦𑁄 𑀢𑀺𑀢𑀺𑀓𑁆𑀔𑀲𑀺;

𑀲𑀼𑀡𑀦𑁆𑀢𑁄 𑀨𑀭𑀼𑀲𑀁 𑀯𑀸𑀘𑀁, 𑀲𑀫𑁆𑀫𑀼𑀔𑀸 𑀯𑁂𑀧𑀘𑀺𑀢𑁆𑀢𑀺𑀦𑁄’’𑀢𑀺.

‘‘𑀦𑀸𑀳𑀁 𑀪𑀬𑀸 𑀦 𑀤𑀼𑀩𑁆𑀩𑀮𑁆𑀬𑀸, 𑀔𑀫𑀸𑀫𑀺 𑀯𑁂𑀧𑀘𑀺𑀢𑁆𑀢𑀺𑀦𑁄;

𑀓𑀣𑀜𑁆𑀳𑀺 𑀫𑀸𑀤𑀺𑀲𑁄 𑀯𑀺𑀜𑁆𑀜𑀽, 𑀩𑀸𑀮𑁂𑀦 𑀧𑀝𑀺𑀲𑀁𑀬𑀼𑀚𑁂’’𑀢𑀺.

‘‘𑀪𑀺𑀬𑁆𑀬𑁄 𑀩𑀸𑀮𑀸 𑀧𑀪𑀺𑀚𑁆𑀚𑁂𑀬𑁆𑀬𑀼𑀁, 𑀦𑁄 𑀘𑀲𑁆𑀲 𑀧𑀝𑀺𑀲𑁂𑀥𑀓𑁄;

𑀢𑀲𑁆𑀫𑀸 𑀪𑀼𑀲𑁂𑀦 𑀤𑀡𑁆𑀟𑁂𑀦, 𑀥𑀻𑀭𑁄 𑀩𑀸𑀮𑀁 𑀦𑀺𑀲𑁂𑀥𑀬𑁂’’𑀢𑀺.

‘‘𑀏𑀢𑀤𑁂𑀯 𑀅𑀳𑀁 𑀫𑀜𑁆𑀜𑁂, 𑀩𑀸𑀮𑀲𑁆𑀲 𑀧𑀝𑀺𑀲𑁂𑀥𑀦𑀁;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀻’’𑀢𑀺.

‘‘𑀏𑀢𑀤𑁂𑀯 𑀢𑀺𑀢𑀺𑀓𑁆𑀔𑀸𑀬, 𑀯𑀚𑁆𑀚𑀁 𑀧𑀲𑁆𑀲𑀸𑀫𑀺 𑀯𑀸𑀲𑀯;

𑀬𑀤𑀸 𑀦𑀁 𑀫𑀜𑁆𑀜𑀢𑀺 𑀩𑀸𑀮𑁄, 𑀪𑀬𑀸 𑀫𑁆𑀬𑀸𑀬𑀁 𑀢𑀺𑀢𑀺𑀓𑁆𑀔𑀢𑀺;

𑀅𑀚𑁆𑀛𑀸𑀭𑀼𑀳𑀢𑀺 𑀤𑀼𑀫𑁆𑀫𑁂𑀥𑁄, 𑀕𑁄𑀯 𑀪𑀺𑀬𑁆𑀬𑁄 𑀧𑀮𑀸𑀬𑀺𑀦’’𑀦𑁆𑀢𑀺.

‘‘𑀓𑀸𑀫𑀁 𑀫𑀜𑁆𑀜𑀢𑀼 𑀯𑀸 𑀫𑀸 𑀯𑀸, 𑀪𑀬𑀸 𑀫𑁆𑀬𑀸𑀬𑀁 𑀢𑀺𑀢𑀺𑀓𑁆𑀔𑀢𑀺;

𑀲𑀤𑀢𑁆𑀣𑀧𑀭𑀫𑀸 𑀅𑀢𑁆𑀣𑀸, 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀺.

‘‘𑀬𑁄 𑀳𑀯𑁂 𑀩𑀮𑀯𑀸 𑀲𑀦𑁆𑀢𑁄, 𑀤𑀼𑀩𑁆𑀩𑀮𑀲𑁆𑀲 𑀢𑀺𑀢𑀺𑀓𑁆𑀔𑀢𑀺;

𑀢𑀫𑀸𑀳𑀼 𑀧𑀭𑀫𑀁 𑀔𑀦𑁆𑀢𑀺𑀁, 𑀦𑀺𑀘𑁆𑀘𑀁 𑀔𑀫𑀢𑀺 𑀤𑀼𑀩𑁆𑀩𑀮𑁄.

‘‘𑀅𑀩𑀮𑀁 𑀢𑀁 𑀩𑀮𑀁 𑀆𑀳𑀼, 𑀬𑀲𑁆𑀲 𑀩𑀸𑀮𑀩𑀮𑀁 𑀩𑀮𑀁;

𑀩𑀮𑀲𑁆𑀲 𑀥𑀫𑁆𑀫𑀕𑀼𑀢𑁆𑀢𑀲𑁆𑀲, 𑀧𑀝𑀺𑀯𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺.

‘‘𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄, 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬𑀁.

‘‘𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀺.

‘‘𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀸𑀦𑀁, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀚𑀦𑀸 𑀫𑀜𑁆𑀜𑀦𑁆𑀢𑀺 𑀩𑀸𑀮𑁄𑀢𑀺, 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸’’𑀢𑀺.

‘‘𑀲𑁄 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀓𑀁 𑀧𑀼𑀜𑁆𑀜𑀨𑀮𑀁 𑀉𑀧𑀚𑀻𑀯𑀫𑀸𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀔𑀦𑁆𑀢𑀺𑀲𑁄𑀭𑀘𑁆𑀘𑀲𑁆𑀲 𑀯𑀡𑁆𑀡𑀯𑀸𑀤𑀻 𑀪𑀯𑀺𑀲𑁆𑀲𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑁄𑀪𑁂𑀣 𑀬𑀁 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀔𑀫𑀸 𑀘 𑀪𑀯𑁂𑀬𑁆𑀬𑀸𑀣 𑀲𑁄𑀭𑀢𑀸 𑀘𑀸’’𑀢𑀺.