𑁫. 𑀲𑀼𑀪𑀸𑀲𑀺𑀢𑀚𑀬𑀲𑀼𑀢𑁆𑀢𑀁

𑁨𑁫𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 𑀅𑀳𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀳𑁄𑀢𑀼, 𑀤𑁂𑀯𑀸𑀦𑀫𑀺𑀦𑁆𑀤, 𑀲𑀼𑀪𑀸𑀲𑀺𑀢𑁂𑀦 𑀚𑀬𑁄’𑀢𑀺. ‘𑀳𑁄𑀢𑀼, 𑀯𑁂𑀧𑀘𑀺𑀢𑁆𑀢𑀺, 𑀲𑀼𑀪𑀸𑀲𑀺𑀢𑁂𑀦 𑀚𑀬𑁄’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀘 𑀅𑀲𑀼𑀭𑀸 𑀘 𑀧𑀸𑀭𑀺𑀲𑀚𑁆𑀚𑁂 𑀞𑀧𑁂𑀲𑀼𑀁 𑁋 ‘𑀇𑀫𑁂 𑀦𑁄 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀆𑀚𑀸𑀦𑀺𑀲𑁆𑀲𑀦𑁆𑀢𑀻’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺𑀁 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀪𑀡, 𑀤𑁂𑀯𑀸𑀦𑀫𑀺𑀦𑁆𑀤, 𑀕𑀸𑀣’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀢𑀼𑀫𑁆𑀳𑁂 𑀔𑁆𑀯𑁂𑀢𑁆𑀣, 𑀯𑁂𑀧𑀘𑀺𑀢𑁆𑀢𑀺, 𑀧𑀼𑀩𑁆𑀩𑀤𑁂𑀯𑀸. 𑀪𑀡, 𑀯𑁂𑀧𑀘𑀺𑀢𑁆𑀢𑀺, 𑀕𑀸𑀣’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀪𑀺𑀬𑁆𑀬𑁄 𑀩𑀸𑀮𑀸 𑀧𑀪𑀺𑀚𑁆𑀚𑁂𑀬𑁆𑀬𑀼𑀁, 𑀦𑁄 𑀘𑀲𑁆𑀲 𑀧𑀝𑀺𑀲𑁂𑀥𑀓𑁄;

𑀢𑀲𑁆𑀫𑀸 𑀪𑀼𑀲𑁂𑀦 𑀤𑀡𑁆𑀟𑁂𑀦, 𑀥𑀻𑀭𑁄 𑀩𑀸𑀮𑀁 𑀦𑀺𑀲𑁂𑀥𑀬𑁂’’𑀢𑀺.

‘‘𑀪𑀸𑀲𑀺𑀢𑀸𑀬 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺𑀦𑀸 𑀅𑀲𑀼𑀭𑀺𑀦𑁆𑀤𑁂𑀦 𑀕𑀸𑀣𑀸𑀬 𑀅𑀲𑀼𑀭𑀸 𑀅𑀦𑀼𑀫𑁄𑀤𑀺𑀁𑀲𑀼, 𑀤𑁂𑀯𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀪𑀡, 𑀤𑁂𑀯𑀸𑀦𑀫𑀺𑀦𑁆𑀤, 𑀕𑀸𑀣’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀏𑀢𑀤𑁂𑀯 𑀅𑀳𑀁 𑀫𑀜𑁆𑀜𑁂, 𑀩𑀸𑀮𑀲𑁆𑀲 𑀧𑀝𑀺𑀲𑁂𑀥𑀦𑀁;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀻’’𑀢𑀺.

‘‘𑀪𑀸𑀲𑀺𑀢𑀸𑀬 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀕𑀸𑀣𑀸𑀬, 𑀤𑁂𑀯𑀸 𑀅𑀦𑀼𑀫𑁄𑀤𑀺𑀁𑀲𑀼, 𑀅𑀲𑀼𑀭𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀧𑀘𑀺𑀢𑁆𑀢𑀺𑀁 𑀅𑀲𑀼𑀭𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀪𑀡, 𑀯𑁂𑀧𑀘𑀺𑀢𑁆𑀢𑀺, 𑀕𑀸𑀣’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀏𑀢𑀤𑁂𑀯 𑀢𑀺𑀢𑀺𑀓𑁆𑀔𑀸𑀬, 𑀯𑀚𑁆𑀚𑀁 𑀧𑀲𑁆𑀲𑀸𑀫𑀺 𑀯𑀸𑀲𑀯;

𑀬𑀤𑀸 𑀦𑀁 𑀫𑀜𑁆𑀜𑀢𑀺 𑀩𑀸𑀮𑁄, 𑀪𑀬𑀸 𑀫𑁆𑀬𑀸𑀬𑀁 𑀢𑀺𑀢𑀺𑀓𑁆𑀔𑀢𑀺;

𑀅𑀚𑁆𑀛𑀸𑀭𑀼𑀳𑀢𑀺 𑀤𑀼𑀫𑁆𑀫𑁂𑀥𑁄, 𑀕𑁄𑀯 𑀪𑀺𑀬𑁆𑀬𑁄 𑀧𑀮𑀸𑀬𑀺𑀦’’𑀦𑁆𑀢𑀺.

‘‘𑀪𑀸𑀲𑀺𑀢𑀸𑀬 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺𑀦𑀸 𑀅𑀲𑀼𑀭𑀺𑀦𑁆𑀤𑁂𑀦 𑀕𑀸𑀣𑀸𑀬 𑀅𑀲𑀼𑀭𑀸 𑀅𑀦𑀼𑀫𑁄𑀤𑀺𑀁𑀲𑀼, 𑀤𑁂𑀯𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀪𑀡, 𑀤𑁂𑀯𑀸𑀦𑀫𑀺𑀦𑁆𑀤, 𑀕𑀸𑀣’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀓𑀸𑀫𑀁 𑀫𑀜𑁆𑀜𑀢𑀼 𑀯𑀸 𑀫𑀸 𑀯𑀸, 𑀪𑀬𑀸 𑀫𑁆𑀬𑀸𑀬𑀁 𑀢𑀺𑀢𑀺𑀓𑁆𑀔𑀢𑀺;

𑀲𑀤𑀢𑁆𑀣𑀧𑀭𑀫𑀸 𑀅𑀢𑁆𑀣𑀸, 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀺.

‘‘𑀬𑁄 𑀳𑀯𑁂 𑀩𑀮𑀯𑀸 𑀲𑀦𑁆𑀢𑁄, 𑀤𑀼𑀩𑁆𑀩𑀮𑀲𑁆𑀲 𑀢𑀺𑀢𑀺𑀓𑁆𑀔𑀢𑀺;

𑀢𑀫𑀸𑀳𑀼 𑀧𑀭𑀫𑀁 𑀔𑀦𑁆𑀢𑀺𑀁, 𑀦𑀺𑀘𑁆𑀘𑀁 𑀔𑀫𑀢𑀺 𑀤𑀼𑀩𑁆𑀩𑀮𑁄.

‘‘𑀅𑀩𑀮𑀁 𑀢𑀁 𑀩𑀮𑀁 𑀆𑀳𑀼, 𑀬𑀲𑁆𑀲 𑀩𑀸𑀮𑀩𑀮𑀁 𑀩𑀮𑀁;

𑀩𑀮𑀲𑁆𑀲 𑀥𑀫𑁆𑀫𑀕𑀼𑀢𑁆𑀢𑀲𑁆𑀲, 𑀧𑀝𑀺𑀯𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺.

‘‘𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄, 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬𑀁.

‘‘𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀺.

‘‘𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀸𑀦𑀁, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀚𑀦𑀸 𑀫𑀜𑁆𑀜𑀦𑁆𑀢𑀺 𑀩𑀸𑀮𑁄𑀢𑀺, 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸’’𑀢𑀺.

‘‘𑀪𑀸𑀲𑀺𑀢𑀸𑀲𑀼 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀕𑀸𑀣𑀸𑀲𑀼, 𑀤𑁂𑀯𑀸 𑀅𑀦𑀼𑀫𑁄𑀤𑀺𑀁𑀲𑀼, 𑀅𑀲𑀼𑀭𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀜𑁆𑀘 𑀅𑀲𑀼𑀭𑀸𑀦𑀜𑁆𑀘 𑀧𑀸𑀭𑀺𑀲𑀚𑁆𑀚𑀸 𑀏𑀢𑀤𑀯𑁄𑀘𑀼𑀁 𑁋 ‘𑀪𑀸𑀲𑀺𑀢𑀸 𑀔𑁄 𑀯𑁂𑀧𑀘𑀺𑀢𑁆𑀢𑀺𑀦𑀸 𑀅𑀲𑀼𑀭𑀺𑀦𑁆𑀤𑁂𑀦 𑀕𑀸𑀣𑀸𑀬𑁄. 𑀢𑀸 𑀘 𑀔𑁄 𑀲𑀤𑀡𑁆𑀟𑀸𑀯𑀘𑀭𑀸 𑀲𑀲𑀢𑁆𑀣𑀸𑀯𑀘𑀭𑀸, 𑀇𑀢𑀺 𑀪𑀡𑁆𑀟𑀦𑀁 𑀇𑀢𑀺 𑀯𑀺𑀕𑁆𑀕𑀳𑁄 𑀇𑀢𑀺 𑀓𑀮𑀳𑁄. 𑀪𑀸𑀲𑀺𑀢𑀸 𑀔𑁄 [𑀪𑀸𑀲𑀺𑀢𑀸 𑀔𑁄 𑀧𑀦 (𑀲𑀻.)] 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀕𑀸𑀣𑀸𑀬𑁄. 𑀢𑀸 𑀘 𑀔𑁄 𑀅𑀤𑀡𑁆𑀟𑀸𑀯𑀘𑀭𑀸 𑀅𑀲𑀢𑁆𑀣𑀸𑀯𑀘𑀭𑀸, 𑀇𑀢𑀺 𑀅𑀪𑀡𑁆𑀟𑀦𑀁 𑀇𑀢𑀺 𑀅𑀯𑀺𑀕𑁆𑀕𑀳𑁄 𑀇𑀢𑀺 𑀅𑀓𑀮𑀳𑁄. 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀼𑀪𑀸𑀲𑀺𑀢𑁂𑀦 𑀚𑀬𑁄’𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀼𑀪𑀸𑀲𑀺𑀢𑁂𑀦 𑀚𑀬𑁄 𑀅𑀳𑁄𑀲𑀻’’𑀢𑀺.