𑁩. 𑀥𑀚𑀕𑁆𑀕𑀲𑀼𑀢𑁆𑀢𑀁

𑁨𑁪𑁯. 𑀲𑀸𑀯𑀢𑁆𑀣𑀺𑀬𑀁. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 𑀅𑀳𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

‘𑀲𑀘𑁂, 𑀫𑀸𑀭𑀺𑀲𑀸, 𑀤𑁂𑀯𑀸𑀦𑀁 𑀲𑀗𑁆𑀕𑀸𑀫𑀕𑀢𑀸𑀦𑀁 𑀉𑀧𑁆𑀧𑀚𑁆𑀚𑁂𑀬𑁆𑀬 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀫𑀫𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣. 𑀫𑀫𑀜𑁆𑀳𑀺 𑀯𑁄 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑀬𑀢𑀁 𑀬𑀁 𑀪𑀯𑀺𑀲𑁆𑀲𑀢𑀺 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀺’.

‘𑀦𑁄 𑀘𑁂 𑀫𑁂 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣, 𑀅𑀣 𑀧𑀚𑀸𑀧𑀢𑀺𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣. 𑀧𑀚𑀸𑀧𑀢𑀺𑀲𑁆𑀲 𑀳𑀺 𑀯𑁄 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑀬𑀢𑀁 𑀬𑀁 𑀪𑀯𑀺𑀲𑁆𑀲𑀢𑀺 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀺’.

‘𑀦𑁄 𑀘𑁂 𑀧𑀚𑀸𑀧𑀢𑀺𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣, 𑀅𑀣 𑀯𑀭𑀼𑀡𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣. 𑀯𑀭𑀼𑀡𑀲𑁆𑀲 𑀳𑀺 𑀯𑁄 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑀬𑀢𑀁 𑀬𑀁 𑀪𑀯𑀺𑀲𑁆𑀲𑀢𑀺 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀺’.

‘𑀦𑁄 𑀘𑁂 𑀯𑀭𑀼𑀡𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣, 𑀅𑀣 𑀈𑀲𑀸𑀦𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣. 𑀈𑀲𑀸𑀦𑀲𑁆𑀲 𑀳𑀺 𑀯𑁄 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑀬𑀢𑀁 𑀬𑀁 𑀪𑀯𑀺𑀲𑁆𑀲𑀢𑀺 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀻’’’𑀢𑀺.

‘‘𑀢𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀲𑁆𑀲 𑀯𑀸 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑀬𑀢𑀁, 𑀧𑀚𑀸𑀧𑀢𑀺𑀲𑁆𑀲 𑀯𑀸 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑀬𑀢𑀁, 𑀯𑀭𑀼𑀡𑀲𑁆𑀲 𑀯𑀸 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑀬𑀢𑀁, 𑀈𑀲𑀸𑀦𑀲𑁆𑀲 𑀯𑀸 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑀬𑀢𑀁 𑀬𑀁 𑀪𑀯𑀺𑀲𑁆𑀲𑀢𑀺 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀲𑁄 𑀧𑀳𑀻𑀬𑁂𑀣𑀸𑀧𑀺 𑀦𑁄𑀧𑀺 𑀧𑀳𑀻𑀬𑁂𑀣 [𑀦𑁄 𑀧𑀳𑀻𑀬𑁂𑀣 (𑀓.)].

‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀓𑁆𑀓𑁄 𑀳𑀺, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀯𑀻𑀢𑀭𑀸𑀕𑁄 𑀅𑀯𑀻𑀢𑀤𑁄𑀲𑁄 𑀅𑀯𑀻𑀢𑀫𑁄𑀳𑁄 𑀪𑀻𑀭𑀼 𑀙𑀫𑁆𑀪𑀻 𑀉𑀢𑁆𑀭𑀸𑀲𑀻 𑀧𑀮𑀸𑀬𑀻𑀢𑀺.

‘‘𑀅𑀳𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁂 𑀢𑀼𑀫𑁆𑀳𑀸𑀓𑀁, 𑀪𑀺𑀓𑁆𑀔𑀯𑁂, 𑀅𑀭𑀜𑁆𑀜𑀕𑀢𑀸𑀦𑀁 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑀸𑀦𑀁 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑀸𑀦𑀁 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀫𑀫𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑀼𑀲𑁆𑀲𑀭𑁂𑀬𑁆𑀬𑀸𑀣 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀫𑀫𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀭𑀢𑀁 𑀬𑀁 𑀪𑀯𑀺𑀲𑁆𑀲𑀢𑀺 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀺.

‘‘𑀦𑁄 𑀘𑁂 𑀫𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀸𑀣, 𑀅𑀣 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀸𑀣 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺. 𑀥𑀫𑁆𑀫𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀭𑀢𑀁 𑀬𑀁 𑀪𑀯𑀺𑀲𑁆𑀲𑀢𑀺 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀺.

‘‘𑀦𑁄 𑀘𑁂 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀸𑀣, 𑀅𑀣 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀸𑀣 𑁋 ‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’𑀢𑀺. 𑀲𑀗𑁆𑀖𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀭𑀢𑀁 𑀬𑀁 𑀪𑀯𑀺𑀲𑁆𑀲𑀢𑀺 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀺.

‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀕𑀢𑁄 𑀳𑀺, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄 𑀅𑀪𑀻𑀭𑀼 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀼𑀜𑁆𑀜𑀸𑀕𑀸𑀭𑁂𑀯 𑀪𑀺𑀓𑁆𑀔𑀯𑁄;

𑀅𑀦𑀼𑀲𑁆𑀲𑀭𑁂𑀣 [𑀅𑀦𑀼𑀲𑁆𑀲𑀭𑁂𑀬𑁆𑀬𑀸𑀣 (𑀓.) 𑀧𑀤𑀲𑀺𑀤𑁆𑀥𑀺 𑀧𑀦 𑀘𑀺𑀦𑁆𑀢𑁂𑀢𑀩𑁆𑀩𑀸] 𑀲𑀫𑁆𑀩𑀼𑀤𑁆𑀥𑀁, 𑀪𑀬𑀁 𑀢𑀼𑀫𑁆𑀳𑀸𑀓 𑀦𑁄 𑀲𑀺𑀬𑀸.

‘‘𑀦𑁄 𑀘𑁂 𑀩𑀼𑀤𑁆𑀥𑀁 𑀲𑀭𑁂𑀬𑁆𑀬𑀸𑀣, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀅𑀣 𑀥𑀫𑁆𑀫𑀁 𑀲𑀭𑁂𑀬𑁆𑀬𑀸𑀣, 𑀦𑀺𑀬𑁆𑀬𑀸𑀦𑀺𑀓𑀁 𑀲𑀼𑀤𑁂𑀲𑀺𑀢𑀁.

‘‘𑀦𑁄 𑀘𑁂 𑀥𑀫𑁆𑀫𑀁 𑀲𑀭𑁂𑀬𑁆𑀬𑀸𑀣, 𑀦𑀺𑀬𑁆𑀬𑀸𑀦𑀺𑀓𑀁 𑀲𑀼𑀤𑁂𑀲𑀺𑀢𑀁;

𑀅𑀣 𑀲𑀗𑁆𑀖𑀁 𑀲𑀭𑁂𑀬𑁆𑀬𑀸𑀣, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁.

‘‘𑀏𑀯𑀁 𑀩𑀼𑀤𑁆𑀥𑀁 𑀲𑀭𑀦𑁆𑀢𑀸𑀦𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀪𑀺𑀓𑁆𑀔𑀯𑁄;

𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸, 𑀮𑁄𑀫𑀳𑀁𑀲𑁄 𑀦 𑀳𑁂𑀲𑁆𑀲𑀢𑀻’’𑀢𑀺.