𑁨. 𑀲𑀼𑀲𑀻𑀫𑀲𑀼𑀢𑁆𑀢𑀁

𑁨𑁪𑁮. 𑀲𑀸𑀯𑀢𑁆𑀣𑀺𑀬𑀁. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸 𑀤𑁂𑀯𑁂 𑀅𑀪𑀺𑀬𑀁𑀲𑀼. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀼𑀲𑀻𑀫𑀁 [𑀲𑀼𑀲𑀺𑀫𑀁 (𑀲𑁆𑀬𑀸. 𑀓𑀁. 𑀓.)] 𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘𑀏𑀢𑁂, 𑀢𑀸𑀢 𑀲𑀼𑀲𑀻𑀫, 𑀅𑀲𑀼𑀭𑀸 𑀤𑁂𑀯𑁂 𑀅𑀪𑀺𑀬𑀦𑁆𑀢𑀺. 𑀕𑀘𑁆𑀙, 𑀢𑀸𑀢 𑀲𑀼𑀲𑀻𑀫, 𑀅𑀲𑀼𑀭𑁂 𑀧𑀘𑁆𑀘𑀼𑀬𑁆𑀬𑀸𑀳𑀻’𑀢𑀺. ‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀲𑀻𑀫𑁄 𑀤𑁂𑀯𑀧𑀼𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀧𑀫𑀸𑀤𑀁 𑀆𑀧𑀸𑀤𑁂𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀼𑀲𑀻𑀫𑀁 𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺…𑀧𑁂… 𑀤𑀼𑀢𑀺𑀬𑀫𑁆𑀧𑀺 𑀧𑀫𑀸𑀤𑀁 𑀆𑀧𑀸𑀤𑁂𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀼𑀲𑀻𑀫𑀁 𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀧𑀫𑀸𑀤𑀁 𑀆𑀧𑀸𑀤𑁂𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀼𑀲𑀻𑀫𑀁 𑀤𑁂𑀯𑀧𑀼𑀢𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀦𑀼𑀝𑁆𑀞𑀳𑀁 𑀅𑀯𑀸𑀬𑀸𑀫𑀁, 𑀲𑀼𑀔𑀁 𑀬𑀢𑁆𑀭𑀸𑀥𑀺𑀕𑀘𑁆𑀙𑀢𑀺;

𑀲𑀼𑀲𑀻𑀫 𑀢𑀢𑁆𑀣 𑀕𑀘𑁆𑀙𑀸𑀳𑀺, 𑀫𑀜𑁆𑀘 𑀢𑀢𑁆𑀣𑁂𑀯 𑀧𑀸𑀧𑀬𑀸’’𑀢𑀺.

‘‘𑀅𑀮𑀲𑁆𑀯𑀲𑁆𑀲 𑀅𑀦𑀼𑀝𑁆𑀞𑀸𑀢𑀸, 𑀦 𑀘 𑀓𑀺𑀘𑁆𑀘𑀸𑀦𑀺 𑀓𑀸𑀭𑀬𑁂;

𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀲𑁆𑀲, 𑀢𑀁 𑀫𑁂 𑀲𑀓𑁆𑀓 𑀯𑀭𑀁 𑀤𑀺𑀲𑀸’’𑀢𑀺.

‘‘𑀬𑀢𑁆𑀣𑀸𑀮𑀲𑁄 𑀅𑀦𑀼𑀝𑁆𑀞𑀸𑀢𑀸, 𑀅𑀘𑁆𑀘𑀦𑁆𑀢𑀁 𑀲𑀼𑀔𑀫𑁂𑀥𑀢𑀺;

𑀲𑀼𑀲𑀻𑀫 𑀢𑀢𑁆𑀣 𑀕𑀘𑁆𑀙𑀸𑀳𑀺, 𑀫𑀜𑁆𑀘 𑀢𑀢𑁆𑀣𑁂𑀯 𑀧𑀸𑀧𑀬𑀸’’𑀢𑀺.

‘‘𑀅𑀓𑀫𑁆𑀫𑀼𑀦𑀸 𑀤𑁂𑀯𑀲𑁂𑀝𑁆𑀞, 𑀲𑀓𑁆𑀓 𑀯𑀺𑀦𑁆𑀤𑁂𑀫𑀼 𑀬𑀁 𑀲𑀼𑀔𑀁;

𑀅𑀲𑁄𑀓𑀁 𑀅𑀦𑀼𑀧𑀸𑀬𑀸𑀲𑀁, 𑀢𑀁 𑀫𑁂 𑀲𑀓𑁆𑀓 𑀯𑀭𑀁 𑀤𑀺𑀲𑀸’’𑀢𑀺.

‘‘𑀲𑀘𑁂 𑀅𑀢𑁆𑀣𑀺 𑀅𑀓𑀫𑁆𑀫𑁂𑀦, 𑀓𑁄𑀘𑀺 𑀓𑁆𑀯𑀘𑀺 𑀦 𑀚𑀻𑀯𑀢𑀺;

𑀦𑀺𑀩𑁆𑀩𑀸𑀦𑀲𑁆𑀲 𑀳𑀺 𑀲𑁄 𑀫𑀕𑁆𑀕𑁄, 𑀲𑀼𑀲𑀻𑀫 𑀢𑀢𑁆𑀣 𑀕𑀘𑁆𑀙𑀸𑀳𑀺;

𑀫𑀜𑁆𑀘 𑀢𑀢𑁆𑀣𑁂𑀯 𑀧𑀸𑀧𑀬𑀸’’𑀢𑀺.

‘‘𑀲𑁄 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀓𑀁 𑀧𑀼𑀜𑁆𑀜𑀨𑀮𑀁 𑀉𑀧𑀚𑀻𑀯𑀫𑀸𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑁆𑀲 𑀯𑀡𑁆𑀡𑀯𑀸𑀤𑀻 𑀪𑀯𑀺𑀲𑁆𑀲𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑁄𑀪𑁂𑀣, 𑀬𑀁 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀉𑀝𑁆𑀞𑀳𑁂𑀬𑁆𑀬𑀸𑀣 𑀖𑀝𑁂𑀬𑁆𑀬𑀸𑀣 𑀯𑀸𑀬𑀫𑁂𑀬𑁆𑀬𑀸𑀣 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸, 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬, 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺.