𑁧𑁦. 𑀲𑀫𑀼𑀤𑁆𑀤𑀓𑀲𑀼𑀢𑁆𑀢𑀁

𑁨𑁫𑁬. 𑀲𑀸𑀯𑀢𑁆𑀣𑀺𑀬𑀁. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀇𑀲𑀬𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀲𑀫𑀼𑀤𑁆𑀤𑀢𑀻𑀭𑁂 𑀧𑀡𑁆𑀡𑀓𑀼𑀝𑀻𑀲𑀼 𑀲𑀫𑁆𑀫𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 𑀅𑀳𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀇𑀲𑀻𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀓𑀮𑁆𑀬𑀸𑀡𑀥𑀫𑁆𑀫𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀥𑀫𑁆𑀫𑀺𑀓𑀸 𑀔𑁄 𑀤𑁂𑀯𑀸, 𑀅𑀥𑀫𑁆𑀫𑀺𑀓𑀸 𑀅𑀲𑀼𑀭𑀸. 𑀲𑀺𑀬𑀸𑀧𑀺 𑀦𑁄 𑀅𑀲𑀼𑀭𑀢𑁄 𑀪𑀬𑀁. 𑀬𑀁𑀦𑀽𑀦 𑀫𑀬𑀁 𑀲𑀫𑁆𑀩𑀭𑀁 𑀅𑀲𑀼𑀭𑀺𑀦𑁆𑀤𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀬𑀤𑀓𑁆𑀔𑀺𑀡𑀁 𑀬𑀸𑀘𑁂𑀬𑁆𑀬𑀸𑀫𑀸’’’𑀢𑀺. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀇𑀲𑀬𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀲𑀫𑀼𑀤𑁆𑀤𑀢𑀻𑀭𑁂 𑀧𑀡𑁆𑀡𑀓𑀼𑀝𑀻𑀲𑀼 𑀅𑀦𑁆𑀢𑀭𑀳𑀺𑀢𑀸 𑀲𑀫𑁆𑀩𑀭𑀲𑁆𑀲 𑀅𑀲𑀼𑀭𑀺𑀦𑁆𑀤𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀇𑀲𑀬𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀲𑀫𑁆𑀩𑀭𑀁 𑀅𑀲𑀼𑀭𑀺𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑀁𑀲𑀼 𑁋

‘‘𑀇𑀲𑀬𑁄 𑀲𑀫𑁆𑀩𑀭𑀁 𑀧𑀢𑁆𑀢𑀸, 𑀬𑀸𑀘𑀦𑁆𑀢𑀺 𑀅𑀪𑀬𑀤𑀓𑁆𑀔𑀺𑀡𑀁;

𑀓𑀸𑀫𑀁𑀓𑀭𑁄 𑀳𑀺 𑀢𑁂 𑀤𑀸𑀢𑀼𑀁, 𑀪𑀬𑀲𑁆𑀲 𑀅𑀪𑀬𑀲𑁆𑀲 𑀯𑀸’’𑀢𑀺.

‘‘𑀇𑀲𑀻𑀦𑀁 𑀅𑀪𑀬𑀁 𑀦𑀢𑁆𑀣𑀺, 𑀤𑀼𑀝𑁆𑀞𑀸𑀦𑀁 𑀲𑀓𑁆𑀓𑀲𑁂𑀯𑀺𑀦𑀁;

𑀅𑀪𑀬𑀁 𑀬𑀸𑀘𑀫𑀸𑀦𑀸𑀦𑀁, 𑀪𑀬𑀫𑁂𑀯 𑀤𑀤𑀸𑀫𑀺 𑀯𑁄’’𑀢𑀺.

‘‘𑀅𑀪𑀬𑀁 𑀬𑀸𑀘𑀫𑀸𑀦𑀸𑀦𑀁, 𑀪𑀬𑀫𑁂𑀯 𑀤𑀤𑀸𑀲𑀺 𑀦𑁄;

𑀧𑀝𑀺𑀕𑁆𑀕𑀡𑁆𑀳𑀸𑀫 𑀢𑁂 𑀏𑀢𑀁, 𑀅𑀓𑁆𑀔𑀬𑀁 𑀳𑁄𑀢𑀼 𑀢𑁂 𑀪𑀬𑀁.

‘‘𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀁;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁;

𑀧𑀯𑀼𑀢𑁆𑀢𑀁 𑀢𑀸𑀢 𑀢𑁂 𑀩𑀻𑀚𑀁, 𑀨𑀮𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀲𑀻’’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀇𑀲𑀬𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀲𑀫𑁆𑀩𑀭𑀁 𑀅𑀲𑀼𑀭𑀺𑀦𑁆𑀤𑀁 𑀅𑀪𑀺𑀲𑀧𑀺𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀲𑀫𑁆𑀩𑀭𑀲𑁆𑀲 𑀅𑀲𑀼𑀭𑀺𑀦𑁆𑀤𑀲𑁆𑀲 𑀲𑀫𑁆𑀫𑀼𑀔𑁂 𑀅𑀦𑁆𑀢𑀭𑀳𑀺𑀢𑀸 𑀲𑀫𑀼𑀤𑁆𑀤𑀢𑀻𑀭𑁂 𑀧𑀡𑁆𑀡𑀓𑀼𑀝𑀻𑀲𑀼 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀭𑁄 𑀅𑀲𑀼𑀭𑀺𑀦𑁆𑀤𑁄 𑀢𑁂𑀳𑀺 𑀇𑀲𑀻𑀳𑀺 𑀲𑀻𑀮𑀯𑀦𑁆𑀢𑁂𑀳𑀺 𑀓𑀮𑁆𑀬𑀸𑀡𑀥𑀫𑁆𑀫𑁂𑀳𑀺 𑀅𑀪𑀺𑀲𑀧𑀺𑀢𑁄 𑀭𑀢𑁆𑀢𑀺𑀬𑀸 𑀲𑀼𑀤𑀁 𑀢𑀺𑀓𑁆𑀔𑀢𑁆𑀢𑀼𑀁 𑀉𑀩𑁆𑀩𑀺𑀚𑁆𑀚𑀻’’𑀢𑀺.

𑀧𑀞𑀫𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀼𑀯𑀻𑀭𑀁 𑀲𑀼𑀲𑀻𑀫𑀜𑁆𑀘𑁂𑀯, 𑀥𑀚𑀕𑁆𑀕𑀁 𑀯𑁂𑀧𑀘𑀺𑀢𑁆𑀢𑀺𑀦𑁄;

𑀲𑀼𑀪𑀸𑀲𑀺𑀢𑀁 𑀚𑀬𑀜𑁆𑀘𑁂𑀯, 𑀓𑀼𑀮𑀸𑀯𑀓𑀁 𑀦𑀤𑀼𑀩𑁆𑀪𑀺𑀬𑀁;

𑀯𑁂𑀭𑁄𑀘𑀦 𑀅𑀲𑀼𑀭𑀺𑀦𑁆𑀤𑁄, 𑀇𑀲𑀬𑁄 𑀅𑀭𑀜𑁆𑀜𑀓𑀜𑁆𑀘𑁂𑀯;

𑀇𑀲𑀬𑁄 𑀘 𑀲𑀫𑀼𑀤𑁆𑀤𑀓𑀸𑀢𑀺.