𑁬. 𑀧𑀺𑀬𑀗𑁆𑀓𑀭𑀲𑀼𑀢𑁆𑀢𑀁

𑁨𑁪𑁦. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀥𑀫𑁆𑀫𑀧𑀤𑀸𑀦𑀺 𑀪𑀸𑀲𑀢𑀺. 𑀅𑀣 𑀔𑁄 𑀧𑀺𑀬𑀗𑁆𑀓𑀭𑀫𑀸𑀢𑀸 𑀬𑀓𑁆𑀔𑀺𑀦𑀻 𑀧𑀼𑀢𑁆𑀢𑀓𑀁 𑀏𑀯𑀁 𑀢𑁄𑀲𑁂𑀲𑀺 𑁋

‘‘𑀫𑀸 𑀲𑀤𑁆𑀤𑀁 𑀓𑀭𑀺 𑀧𑀺𑀬𑀗𑁆𑀓𑀭, 𑀪𑀺𑀓𑁆𑀔𑀼 𑀥𑀫𑁆𑀫𑀧𑀤𑀸𑀦𑀺 𑀪𑀸𑀲𑀢𑀺;

𑀅𑀧𑀺 [𑀅𑀧𑀺 (𑀲𑀻.)] 𑀘 𑀥𑀫𑁆𑀫𑀧𑀤𑀁 𑀯𑀺𑀚𑀸𑀦𑀺𑀬, 𑀧𑀝𑀺𑀧𑀚𑁆𑀚𑁂𑀫 𑀳𑀺𑀢𑀸𑀬 𑀦𑁄 𑀲𑀺𑀬𑀸.

‘‘𑀧𑀸𑀡𑁂𑀲𑀼 𑀘 𑀲𑀁𑀬𑀫𑀸𑀫𑀲𑁂, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀦 𑀪𑀡𑀸𑀫𑀲𑁂;

𑀲𑀺𑀓𑁆𑀔𑁂𑀫 𑀲𑀼𑀲𑀻𑀮𑁆𑀬𑀫𑀢𑁆𑀢𑀦𑁄 [𑀲𑀼𑀲𑀻𑀮𑀫𑀢𑁆𑀢𑀦𑁄 (𑀲𑀻. 𑀓.)], 𑀅𑀧𑀺 𑀫𑀼𑀘𑁆𑀘𑁂𑀫 𑀧𑀺𑀲𑀸𑀘𑀬𑁄𑀦𑀺𑀬𑀸’’𑀢𑀺.