𑁬. 𑀦𑀚𑀻𑀭𑀢𑀺𑀲𑀼𑀢𑁆𑀢𑀁

𑁭𑁬. ‘‘𑀓𑀺𑀁 𑀚𑀻𑀭𑀢𑀺 𑀓𑀺𑀁 𑀦 𑀚𑀻𑀭𑀢𑀺, 𑀓𑀺𑀁𑀲𑀼 𑀉𑀧𑁆𑀧𑀣𑁄𑀢𑀺 𑀯𑀼𑀘𑁆𑀘𑀢𑀺;

𑀓𑀺𑀁𑀲𑀼 𑀥𑀫𑁆𑀫𑀸𑀦𑀁 𑀧𑀭𑀺𑀧𑀦𑁆𑀣𑁄, 𑀓𑀺𑀁𑀲𑀼 𑀭𑀢𑁆𑀢𑀺𑀦𑁆𑀤𑀺𑀯𑀓𑁆𑀔𑀬𑁄;

𑀓𑀺𑀁 𑀫𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀓𑀺𑀁 𑀲𑀺𑀦𑀸𑀦𑀫𑀦𑁄𑀤𑀓𑀁.

‘‘𑀓𑀢𑀺 𑀮𑁄𑀓𑀲𑁆𑀫𑀺𑀁 𑀙𑀺𑀤𑁆𑀤𑀸𑀦𑀺, 𑀬𑀢𑁆𑀣 𑀯𑀺𑀢𑁆𑀢𑀁 [𑀘𑀺𑀢𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦 𑀢𑀺𑀝𑁆𑀞𑀢𑀺;

𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑁆𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

‘‘𑀭𑀽𑀧𑀁 𑀚𑀻𑀭𑀢𑀺 𑀫𑀘𑁆𑀘𑀸𑀦𑀁, 𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀺;

𑀭𑀸𑀕𑁄 𑀉𑀧𑁆𑀧𑀣𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀮𑁄𑀪𑁄 𑀥𑀫𑁆𑀫𑀸𑀦𑀁 𑀧𑀭𑀺𑀧𑀦𑁆𑀣𑁄, 𑀯𑀬𑁄 𑀭𑀢𑁆𑀢𑀺𑀦𑁆𑀤𑀺𑀯𑀓𑁆𑀔𑀬𑁄;

𑀇𑀢𑁆𑀣𑀻 𑀫𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀏𑀢𑁆𑀣𑀸𑀬𑀁 𑀲𑀚𑁆𑀚𑀢𑁂 𑀧𑀚𑀸;

𑀢𑀧𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘, 𑀢𑀁 𑀲𑀺𑀦𑀸𑀦𑀫𑀦𑁄𑀤𑀓𑀁.

‘‘𑀙 𑀮𑁄𑀓𑀲𑁆𑀫𑀺𑀁 𑀙𑀺𑀤𑁆𑀤𑀸𑀦𑀺, 𑀬𑀢𑁆𑀣 𑀯𑀺𑀢𑁆𑀢𑀁 𑀦 𑀢𑀺𑀝𑁆𑀞𑀢𑀺;

𑀆𑀮𑀲𑁆𑀬𑀜𑁆𑀘 [𑀆𑀮𑀲𑁆𑀲𑀜𑁆𑀘 (𑀲𑀻. 𑀧𑀻.)] 𑀧𑀫𑀸𑀤𑁄 𑀘, 𑀅𑀦𑀼𑀝𑁆𑀞𑀸𑀦𑀁 𑀅𑀲𑀁𑀬𑀫𑁄;

𑀦𑀺𑀤𑁆𑀤𑀸 𑀢𑀦𑁆𑀤𑀻 [𑀢𑀦𑁆𑀤𑀺 (𑀲𑀻.)] 𑀘 𑀢𑁂 𑀙𑀺𑀤𑁆𑀤𑁂, 𑀲𑀩𑁆𑀩𑀲𑁄 𑀢𑀁 𑀯𑀺𑀯𑀚𑁆𑀚𑀬𑁂’’𑀢𑀺.