𑁮. 𑀙𑁂𑀢𑁆𑀯𑀸𑀯𑀕𑁆𑀕𑁄

𑁧. 𑀙𑁂𑀢𑁆𑀯𑀸𑀲𑀼𑀢𑁆𑀢𑀁

𑁭𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀁𑀲𑀼 𑀙𑁂𑀢𑁆𑀯𑀸 [𑀛𑀢𑁆𑀯𑀸 (𑀲𑀻.), 𑀖𑀢𑁆𑀯𑀸 (𑀲𑁆𑀬𑀸. 𑀓𑀁.) 𑀏𑀯𑀫𑀼𑀧𑀭𑀺𑀧𑀺] 𑀲𑀼𑀔𑀁 𑀲𑁂𑀢𑀺, 𑀓𑀺𑀁𑀲𑀼 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀏𑀓𑀥𑀫𑁆𑀫𑀲𑁆𑀲, 𑀯𑀥𑀁 𑀭𑁄𑀘𑁂𑀲𑀺 𑀕𑁄𑀢𑀫𑀸’’𑀢𑀺.

‘‘𑀓𑁄𑀥𑀁 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑁄𑀥𑀁 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑁄𑀥𑀲𑁆𑀲 𑀯𑀺𑀲𑀫𑀽𑀮𑀲𑁆𑀲, 𑀫𑀥𑀼𑀭𑀕𑁆𑀕𑀲𑁆𑀲 𑀤𑁂𑀯𑀢𑁂;

𑀯𑀥𑀁 𑀅𑀭𑀺𑀬𑀸 𑀧𑀲𑀁𑀲𑀦𑁆𑀢𑀺, 𑀢𑀜𑁆𑀳𑀺 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀻’’𑀢𑀺.

𑁨. 𑀭𑀣𑀲𑀼𑀢𑁆𑀢𑀁

𑁭𑁨. ‘‘𑀓𑀺𑀁𑀲𑀼 𑀭𑀣𑀲𑁆𑀲 𑀧𑀜𑁆𑀜𑀸𑀡𑀁, 𑀓𑀺𑀁𑀲𑀼 𑀧𑀜𑁆𑀜𑀸𑀡𑀫𑀕𑁆𑀕𑀺𑀦𑁄;

𑀓𑀺𑀁𑀲𑀼 𑀭𑀝𑁆𑀞𑀲𑁆𑀲 𑀧𑀜𑁆𑀜𑀸𑀡𑀁, 𑀓𑀺𑀁𑀲𑀼 𑀧𑀜𑁆𑀜𑀸𑀡𑀫𑀺𑀢𑁆𑀣𑀺𑀬𑀸’’𑀢𑀺.

‘‘𑀥𑀚𑁄 𑀭𑀣𑀲𑁆𑀲 𑀧𑀜𑁆𑀜𑀸𑀡𑀁, 𑀥𑀽𑀫𑁄 𑀧𑀜𑁆𑀜𑀸𑀡𑀫𑀕𑁆𑀕𑀺𑀦𑁄;

𑀭𑀸𑀚𑀸 𑀭𑀝𑁆𑀞𑀲𑁆𑀲 𑀧𑀜𑁆𑀜𑀸𑀡𑀁, 𑀪𑀢𑁆𑀢𑀸 𑀧𑀜𑁆𑀜𑀸𑀡𑀫𑀺𑀢𑁆𑀣𑀺𑀬𑀸’’𑀢𑀺.

𑁩. 𑀯𑀺𑀢𑁆𑀢𑀲𑀼𑀢𑁆𑀢𑀁

𑁭𑁩. ‘‘𑀓𑀺𑀁𑀲𑀽𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁, 𑀓𑀺𑀁𑀲𑀼 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀢𑀺;

𑀓𑀺𑀁𑀲𑀼 𑀳𑀯𑁂 𑀲𑀸𑀤𑀼𑀢𑀭𑀁 [𑀲𑀸𑀥𑀼𑀢𑀭𑀁 (𑀓.)] 𑀭𑀲𑀸𑀦𑀁, 𑀓𑀣𑀁𑀚𑀻𑀯𑀺𑀁 [𑀓𑀺𑀁𑀲𑀼𑀚𑀻𑀯𑀺𑀁 (𑀓.)] 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺.

‘‘𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀢𑀺;

𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁, 𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺.

𑁪. 𑀯𑀼𑀝𑁆𑀞𑀺𑀲𑀼𑀢𑁆𑀢𑀁

𑁭𑁪. ‘‘𑀓𑀺𑀁𑀲𑀼 𑀉𑀧𑁆𑀧𑀢𑀢𑀁 𑀲𑁂𑀝𑁆𑀞𑀁, 𑀓𑀺𑀁𑀲𑀼 𑀦𑀺𑀧𑀢𑀢𑀁 𑀯𑀭𑀁;

𑀓𑀺𑀁𑀲𑀼 𑀧𑀯𑀚𑀫𑀸𑀦𑀸𑀦𑀁, 𑀓𑀺𑀁𑀲𑀼 𑀧𑀯𑀤𑀢𑀁 𑀯𑀭’’𑀦𑁆𑀢𑀺.

‘‘𑀩𑀻𑀚𑀁 𑀉𑀧𑁆𑀧𑀢𑀢𑀁 𑀲𑁂𑀝𑁆𑀞𑀁, 𑀯𑀼𑀝𑁆𑀞𑀺 𑀦𑀺𑀧𑀢𑀢𑀁 𑀯𑀭𑀸;

𑀕𑀸𑀯𑁄 𑀧𑀯𑀚𑀫𑀸𑀦𑀸𑀦𑀁, 𑀧𑀼𑀢𑁆𑀢𑁄 𑀧𑀯𑀤𑀢𑀁 𑀯𑀭𑁄𑀢𑀺.

‘‘𑀯𑀺𑀚𑁆𑀚𑀸 𑀉𑀧𑁆𑀧𑀢𑀢𑀁 𑀲𑁂𑀝𑁆𑀞𑀸, 𑀅𑀯𑀺𑀚𑁆𑀚𑀸 𑀦𑀺𑀧𑀢𑀢𑀁 𑀯𑀭𑀸;

𑀲𑀗𑁆𑀖𑁄 𑀧𑀯𑀚𑀫𑀸𑀦𑀸𑀦𑀁, 𑀩𑀼𑀤𑁆𑀥𑁄 𑀧𑀯𑀤𑀢𑀁 𑀯𑀭𑁄’’𑀢𑀺.

𑁫. 𑀪𑀻𑀢𑀸𑀲𑀼𑀢𑁆𑀢𑀁

𑁭𑁫. ‘‘𑀓𑀺𑀁𑀲𑀽𑀥 𑀪𑀻𑀢𑀸 𑀚𑀦𑀢𑀸 𑀅𑀦𑁂𑀓𑀸,

𑀫𑀕𑁆𑀕𑁄 𑀘𑀦𑁂𑀓𑀸𑀬𑀢𑀦𑀧𑁆𑀧𑀯𑀼𑀢𑁆𑀢𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀕𑁄𑀢𑀫 𑀪𑀽𑀭𑀺𑀧𑀜𑁆𑀜,

𑀓𑀺𑀲𑁆𑀫𑀺𑀁 𑀞𑀺𑀢𑁄 𑀧𑀭𑀮𑁄𑀓𑀁 𑀦 𑀪𑀸𑀬𑁂’’𑀢𑀺.

‘‘𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀲𑀫𑁆𑀫𑀸,

𑀓𑀸𑀬𑁂𑀦 𑀧𑀸𑀧𑀸𑀦𑀺 𑀅𑀓𑀼𑀩𑁆𑀩𑀫𑀸𑀦𑁄;

𑀩𑀯𑁆𑀳𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄,

𑀲𑀤𑁆𑀥𑁄 𑀫𑀼𑀤𑀽 𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽;

𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄 𑀘𑀢𑀽𑀲𑀼,

𑀥𑀫𑁆𑀫𑁂 𑀞𑀺𑀢𑁄 𑀧𑀭𑀮𑁄𑀓𑀁 𑀦 𑀪𑀸𑀬𑁂’’𑀢𑀺.

𑁬. 𑀦𑀚𑀻𑀭𑀢𑀺𑀲𑀼𑀢𑁆𑀢𑀁

𑁭𑁬. ‘‘𑀓𑀺𑀁 𑀚𑀻𑀭𑀢𑀺 𑀓𑀺𑀁 𑀦 𑀚𑀻𑀭𑀢𑀺, 𑀓𑀺𑀁𑀲𑀼 𑀉𑀧𑁆𑀧𑀣𑁄𑀢𑀺 𑀯𑀼𑀘𑁆𑀘𑀢𑀺;

𑀓𑀺𑀁𑀲𑀼 𑀥𑀫𑁆𑀫𑀸𑀦𑀁 𑀧𑀭𑀺𑀧𑀦𑁆𑀣𑁄, 𑀓𑀺𑀁𑀲𑀼 𑀭𑀢𑁆𑀢𑀺𑀦𑁆𑀤𑀺𑀯𑀓𑁆𑀔𑀬𑁄;

𑀓𑀺𑀁 𑀫𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀓𑀺𑀁 𑀲𑀺𑀦𑀸𑀦𑀫𑀦𑁄𑀤𑀓𑀁.

‘‘𑀓𑀢𑀺 𑀮𑁄𑀓𑀲𑁆𑀫𑀺𑀁 𑀙𑀺𑀤𑁆𑀤𑀸𑀦𑀺, 𑀬𑀢𑁆𑀣 𑀯𑀺𑀢𑁆𑀢𑀁 [𑀘𑀺𑀢𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦 𑀢𑀺𑀝𑁆𑀞𑀢𑀺;

𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑁆𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

‘‘𑀭𑀽𑀧𑀁 𑀚𑀻𑀭𑀢𑀺 𑀫𑀘𑁆𑀘𑀸𑀦𑀁, 𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀺;

𑀭𑀸𑀕𑁄 𑀉𑀧𑁆𑀧𑀣𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀮𑁄𑀪𑁄 𑀥𑀫𑁆𑀫𑀸𑀦𑀁 𑀧𑀭𑀺𑀧𑀦𑁆𑀣𑁄, 𑀯𑀬𑁄 𑀭𑀢𑁆𑀢𑀺𑀦𑁆𑀤𑀺𑀯𑀓𑁆𑀔𑀬𑁄;

𑀇𑀢𑁆𑀣𑀻 𑀫𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀏𑀢𑁆𑀣𑀸𑀬𑀁 𑀲𑀚𑁆𑀚𑀢𑁂 𑀧𑀚𑀸;

𑀢𑀧𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘, 𑀢𑀁 𑀲𑀺𑀦𑀸𑀦𑀫𑀦𑁄𑀤𑀓𑀁.

‘‘𑀙 𑀮𑁄𑀓𑀲𑁆𑀫𑀺𑀁 𑀙𑀺𑀤𑁆𑀤𑀸𑀦𑀺, 𑀬𑀢𑁆𑀣 𑀯𑀺𑀢𑁆𑀢𑀁 𑀦 𑀢𑀺𑀝𑁆𑀞𑀢𑀺;

𑀆𑀮𑀲𑁆𑀬𑀜𑁆𑀘 [𑀆𑀮𑀲𑁆𑀲𑀜𑁆𑀘 (𑀲𑀻. 𑀧𑀻.)] 𑀧𑀫𑀸𑀤𑁄 𑀘, 𑀅𑀦𑀼𑀝𑁆𑀞𑀸𑀦𑀁 𑀅𑀲𑀁𑀬𑀫𑁄;

𑀦𑀺𑀤𑁆𑀤𑀸 𑀢𑀦𑁆𑀤𑀻 [𑀢𑀦𑁆𑀤𑀺 (𑀲𑀻.)] 𑀘 𑀢𑁂 𑀙𑀺𑀤𑁆𑀤𑁂, 𑀲𑀩𑁆𑀩𑀲𑁄 𑀢𑀁 𑀯𑀺𑀯𑀚𑁆𑀚𑀬𑁂’’𑀢𑀺.

𑁭. 𑀇𑀲𑁆𑀲𑀭𑀺𑀬𑀲𑀼𑀢𑁆𑀢𑀁

𑁭𑁭. ‘‘𑀓𑀺𑀁𑀲𑀼 𑀇𑀲𑁆𑀲𑀭𑀺𑀬𑀁 𑀮𑁄𑀓𑁂, 𑀓𑀺𑀁𑀲𑀼 𑀪𑀡𑁆𑀟𑀸𑀦𑀫𑀼𑀢𑁆𑀢𑀫𑀁;

𑀓𑀺𑀁𑀲𑀼 𑀲𑀢𑁆𑀣𑀫𑀮𑀁 𑀮𑁄𑀓𑁂, 𑀓𑀺𑀁𑀲𑀼 𑀮𑁄𑀓𑀲𑁆𑀫𑀺𑀫𑀩𑁆𑀩𑀼𑀤𑀁.

‘‘𑀓𑀺𑀁𑀲𑀼 𑀳𑀭𑀦𑁆𑀢𑀁 𑀯𑀸𑀭𑁂𑀦𑁆𑀢𑀺, 𑀳𑀭𑀦𑁆𑀢𑁄 𑀧𑀦 𑀓𑁄 𑀧𑀺𑀬𑁄;

𑀓𑀺𑀁𑀲𑀼 𑀧𑀼𑀦𑀧𑁆𑀧𑀼𑀦𑀸𑀬𑀦𑁆𑀢𑀁, 𑀅𑀪𑀺𑀦𑀦𑁆𑀤𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

‘‘𑀯𑀲𑁄 𑀇𑀲𑁆𑀲𑀭𑀺𑀬𑀁 𑀮𑁄𑀓𑁂, 𑀇𑀢𑁆𑀣𑀻 𑀪𑀡𑁆𑀟𑀸𑀦𑀫𑀼𑀢𑁆𑀢𑀫𑀁;

𑀓𑁄𑀥𑁄 𑀲𑀢𑁆𑀣𑀫𑀮𑀁 𑀮𑁄𑀓𑁂, 𑀘𑁄𑀭𑀸 𑀮𑁄𑀓𑀲𑁆𑀫𑀺𑀫𑀩𑁆𑀩𑀼𑀤𑀸.

‘‘𑀘𑁄𑀭𑀁 𑀳𑀭𑀦𑁆𑀢𑀁 𑀯𑀸𑀭𑁂𑀦𑁆𑀢𑀺, 𑀳𑀭𑀦𑁆𑀢𑁄 𑀲𑀫𑀡𑁄 𑀧𑀺𑀬𑁄;

𑀲𑀫𑀡𑀁 𑀧𑀼𑀦𑀧𑁆𑀧𑀼𑀦𑀸𑀬𑀦𑁆𑀢𑀁, 𑀅𑀪𑀺𑀦𑀦𑁆𑀤𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑁮. 𑀓𑀸𑀫𑀲𑀼𑀢𑁆𑀢𑀁

𑁭𑁮. ‘‘𑀓𑀺𑀫𑀢𑁆𑀣𑀓𑀸𑀫𑁄 𑀦 𑀤𑀤𑁂, 𑀓𑀺𑀁 𑀫𑀘𑁆𑀘𑁄 𑀦 𑀧𑀭𑀺𑀘𑁆𑀘𑀚𑁂;

𑀓𑀺𑀁𑀲𑀼 𑀫𑀼𑀜𑁆𑀘𑁂𑀬𑁆𑀬 𑀓𑀮𑁆𑀬𑀸𑀡𑀁, 𑀧𑀸𑀧𑀺𑀓𑀁 𑀦 𑀘 𑀫𑁄𑀘𑀬𑁂’’𑀢𑀺.

‘‘𑀅𑀢𑁆𑀢𑀸𑀦𑀁 𑀦 𑀤𑀤𑁂 𑀧𑁄𑀲𑁄, 𑀅𑀢𑁆𑀢𑀸𑀦𑀁 𑀦 𑀧𑀭𑀺𑀘𑁆𑀘𑀚𑁂;

𑀯𑀸𑀘𑀁 𑀫𑀼𑀜𑁆𑀘𑁂𑀬𑁆𑀬 𑀓𑀮𑁆𑀬𑀸𑀡𑀁, 𑀧𑀸𑀧𑀺𑀓𑀜𑁆𑀘 𑀦 𑀫𑁄𑀘𑀬𑁂’’𑀢𑀺.

𑁯. 𑀧𑀸𑀣𑁂𑀬𑁆𑀬𑀲𑀼𑀢𑁆𑀢𑀁

𑁭𑁯. ‘‘𑀓𑀺𑀁𑀲𑀼 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬𑀁, 𑀓𑀺𑀁𑀲𑀼 𑀪𑁄𑀕𑀸𑀦𑀫𑀸𑀲𑀬𑁄;

𑀓𑀺𑀁𑀲𑀼 𑀦𑀭𑀁 𑀧𑀭𑀺𑀓𑀲𑁆𑀲𑀢𑀺, 𑀓𑀺𑀁𑀲𑀼 𑀮𑁄𑀓𑀲𑁆𑀫𑀺 𑀤𑀼𑀚𑁆𑀚𑀳𑀁;

𑀓𑀺𑀲𑁆𑀫𑀺𑀁 𑀩𑀤𑁆𑀥𑀸 𑀧𑀼𑀣𑀽 𑀲𑀢𑁆𑀢𑀸, 𑀧𑀸𑀲𑁂𑀦 𑀲𑀓𑀼𑀡𑀻 𑀬𑀣𑀸’’𑀢𑀺.

‘‘𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬𑀁, 𑀲𑀺𑀭𑀻 𑀪𑁄𑀕𑀸𑀦𑀫𑀸𑀲𑀬𑁄;

𑀇𑀘𑁆𑀙𑀸 𑀦𑀭𑀁 𑀧𑀭𑀺𑀓𑀲𑁆𑀲𑀢𑀺, 𑀇𑀘𑁆𑀙𑀸 𑀮𑁄𑀓𑀲𑁆𑀫𑀺 𑀤𑀼𑀚𑁆𑀚𑀳𑀸;

𑀇𑀘𑁆𑀙𑀸𑀩𑀤𑁆𑀥𑀸 𑀧𑀼𑀣𑀽 𑀲𑀢𑁆𑀢𑀸, 𑀧𑀸𑀲𑁂𑀦 𑀲𑀓𑀼𑀡𑀻 𑀬𑀣𑀸’’𑀢𑀺.

𑁧𑁦. 𑀧𑀚𑁆𑀚𑁄𑀢𑀲𑀼𑀢𑁆𑀢𑀁

𑁮𑁦. ‘‘𑀓𑀺𑀁𑀲𑀼 𑀮𑁄𑀓𑀲𑁆𑀫𑀺 𑀧𑀚𑁆𑀚𑁄𑀢𑁄, 𑀓𑀺𑀁𑀲𑀼 𑀮𑁄𑀓𑀲𑁆𑀫𑀺 𑀚𑀸𑀕𑀭𑁄;

𑀓𑀺𑀁𑀲𑀼 𑀓𑀫𑁆𑀫𑁂 𑀲𑀚𑀻𑀯𑀸𑀦𑀁, 𑀓𑀺𑀫𑀲𑁆𑀲 𑀇𑀭𑀺𑀬𑀸𑀧𑀣𑁄.

‘‘𑀓𑀺𑀁𑀲𑀼 𑀅𑀮𑀲𑀁 𑀅𑀦𑀮𑀲𑀜𑁆𑀘 [𑀓𑀺𑀁 𑀆𑀮𑀲𑁆𑀬𑀸𑀦𑀸𑀮𑀲𑁆𑀬𑀜𑁆𑀘 (𑀓.)], 𑀫𑀸𑀢𑀸 𑀧𑀼𑀢𑁆𑀢𑀁𑀯 𑀧𑁄𑀲𑀢𑀺;

𑀓𑀺𑀁 𑀪𑀽𑀢𑀸 𑀉𑀧𑀚𑀻𑀯𑀦𑁆𑀢𑀺, 𑀬𑁂 𑀧𑀸𑀡𑀸 𑀧𑀣𑀯𑀺𑀲𑁆𑀲𑀺𑀢𑀸’’𑀢𑀺.

‘‘𑀧𑀜𑁆𑀜𑀸 𑀮𑁄𑀓𑀲𑁆𑀫𑀺 𑀧𑀚𑁆𑀚𑁄𑀢𑁄, 𑀲𑀢𑀺 𑀮𑁄𑀓𑀲𑁆𑀫𑀺 𑀚𑀸𑀕𑀭𑁄;

𑀕𑀸𑀯𑁄 𑀓𑀫𑁆𑀫𑁂 𑀲𑀚𑀻𑀯𑀸𑀦𑀁, 𑀲𑀻𑀢𑀲𑁆𑀲 𑀇𑀭𑀺𑀬𑀸𑀧𑀣𑁄.

‘‘𑀯𑀼𑀝𑁆𑀞𑀺 𑀅𑀮𑀲𑀁 𑀅𑀦𑀮𑀲𑀜𑁆𑀘, 𑀫𑀸𑀢𑀸 𑀧𑀼𑀢𑁆𑀢𑀁𑀯 𑀧𑁄𑀲𑀢𑀺;

𑀯𑀼𑀝𑁆𑀞𑀺𑀁 𑀪𑀽𑀢𑀸 𑀉𑀧𑀚𑀻𑀯𑀦𑁆𑀢𑀺, 𑀬𑁂 𑀧𑀸𑀡𑀸 𑀧𑀣𑀯𑀺𑀲𑁆𑀲𑀺𑀢𑀸’’𑀢𑀺.

𑁧𑁧. 𑀅𑀭𑀡𑀲𑀼𑀢𑁆𑀢𑀁

𑁮𑁧. ‘‘𑀓𑁂𑀲𑀽𑀥 𑀅𑀭𑀡𑀸 𑀮𑁄𑀓𑁂, 𑀓𑁂𑀲𑀁 𑀯𑀼𑀲𑀺𑀢𑀁 𑀦 𑀦𑀲𑁆𑀲𑀢𑀺;

𑀓𑁂𑀥 𑀇𑀘𑁆𑀙𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀓𑁂𑀲𑀁 𑀪𑁄𑀚𑀺𑀲𑁆𑀲𑀺𑀬𑀁 𑀲𑀤𑀸.

‘‘𑀓𑀺𑀁𑀲𑀼 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀯𑀦𑁆𑀤𑀦𑁆𑀢𑀺 𑀦𑀁 𑀧𑀢𑀺𑀝𑁆𑀞𑀺𑀢𑀁;

𑀓𑀺𑀁𑀲𑀼 𑀇𑀥 𑀚𑀸𑀢𑀺𑀳𑀻𑀦𑀁, 𑀅𑀪𑀺𑀯𑀸𑀤𑁂𑀦𑁆𑀢𑀺 𑀔𑀢𑁆𑀢𑀺𑀬𑀸’’𑀢𑀺.

‘‘𑀲𑀫𑀡𑀻𑀥 𑀅𑀭𑀡𑀸 𑀮𑁄𑀓𑁂, 𑀲𑀫𑀡𑀸𑀦𑀁 𑀯𑀼𑀲𑀺𑀢𑀁 𑀦 𑀦𑀲𑁆𑀲𑀢𑀺;

𑀲𑀫𑀡𑀸 𑀇𑀘𑁆𑀙𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀲𑀫𑀡𑀸𑀦𑀁 𑀪𑁄𑀚𑀺𑀲𑁆𑀲𑀺𑀬𑀁 𑀲𑀤𑀸.

‘‘𑀲𑀫𑀡𑀁 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀯𑀦𑁆𑀤𑀦𑁆𑀢𑀺 𑀦𑀁 𑀧𑀢𑀺𑀝𑁆𑀞𑀺𑀢𑀁;

𑀲𑀫𑀡𑀻𑀥 𑀚𑀸𑀢𑀺𑀳𑀻𑀦𑀁, 𑀅𑀪𑀺𑀯𑀸𑀤𑁂𑀦𑁆𑀢𑀺 𑀔𑀢𑁆𑀢𑀺𑀬𑀸’’𑀢𑀺.

𑀙𑁂𑀢𑁆𑀯𑀸𑀯𑀕𑁆𑀕𑁄 𑀅𑀝𑁆𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀙𑁂𑀢𑁆𑀯𑀸 𑀭𑀣𑀜𑁆𑀘 𑀘𑀺𑀢𑁆𑀢𑀜𑁆𑀘, 𑀯𑀼𑀝𑁆𑀞𑀺 𑀪𑀻𑀢𑀸 𑀦𑀚𑀻𑀭𑀢𑀺;

𑀇𑀲𑁆𑀲𑀭𑀁 𑀓𑀸𑀫𑀁 𑀧𑀸𑀣𑁂𑀬𑁆𑀬𑀁, 𑀧𑀚𑁆𑀚𑁄𑀢𑁄 𑀅𑀭𑀡𑁂𑀦 𑀘𑀸𑀢𑀺.

𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.