𑁧𑁧. 𑀅𑀭𑀡𑀲𑀼𑀢𑁆𑀢𑀁

𑁮𑁧. ‘‘𑀓𑁂𑀲𑀽𑀥 𑀅𑀭𑀡𑀸 𑀮𑁄𑀓𑁂, 𑀓𑁂𑀲𑀁 𑀯𑀼𑀲𑀺𑀢𑀁 𑀦 𑀦𑀲𑁆𑀲𑀢𑀺;

𑀓𑁂𑀥 𑀇𑀘𑁆𑀙𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀓𑁂𑀲𑀁 𑀪𑁄𑀚𑀺𑀲𑁆𑀲𑀺𑀬𑀁 𑀲𑀤𑀸.

‘‘𑀓𑀺𑀁𑀲𑀼 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀯𑀦𑁆𑀤𑀦𑁆𑀢𑀺 𑀦𑀁 𑀧𑀢𑀺𑀝𑁆𑀞𑀺𑀢𑀁;

𑀓𑀺𑀁𑀲𑀼 𑀇𑀥 𑀚𑀸𑀢𑀺𑀳𑀻𑀦𑀁, 𑀅𑀪𑀺𑀯𑀸𑀤𑁂𑀦𑁆𑀢𑀺 𑀔𑀢𑁆𑀢𑀺𑀬𑀸’’𑀢𑀺.

‘‘𑀲𑀫𑀡𑀻𑀥 𑀅𑀭𑀡𑀸 𑀮𑁄𑀓𑁂, 𑀲𑀫𑀡𑀸𑀦𑀁 𑀯𑀼𑀲𑀺𑀢𑀁 𑀦 𑀦𑀲𑁆𑀲𑀢𑀺;

𑀲𑀫𑀡𑀸 𑀇𑀘𑁆𑀙𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀲𑀫𑀡𑀸𑀦𑀁 𑀪𑁄𑀚𑀺𑀲𑁆𑀲𑀺𑀬𑀁 𑀲𑀤𑀸.

‘‘𑀲𑀫𑀡𑀁 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀯𑀦𑁆𑀤𑀦𑁆𑀢𑀺 𑀦𑀁 𑀧𑀢𑀺𑀝𑁆𑀞𑀺𑀢𑀁;

𑀲𑀫𑀡𑀻𑀥 𑀚𑀸𑀢𑀺𑀳𑀻𑀦𑀁, 𑀅𑀪𑀺𑀯𑀸𑀤𑁂𑀦𑁆𑀢𑀺 𑀔𑀢𑁆𑀢𑀺𑀬𑀸’’𑀢𑀺.

𑀙𑁂𑀢𑁆𑀯𑀸𑀯𑀕𑁆𑀕𑁄 𑀅𑀝𑁆𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀙𑁂𑀢𑁆𑀯𑀸 𑀭𑀣𑀜𑁆𑀘 𑀘𑀺𑀢𑁆𑀢𑀜𑁆𑀘, 𑀯𑀼𑀝𑁆𑀞𑀺 𑀪𑀻𑀢𑀸 𑀦𑀚𑀻𑀭𑀢𑀺;

𑀇𑀲𑁆𑀲𑀭𑀁 𑀓𑀸𑀫𑀁 𑀧𑀸𑀣𑁂𑀬𑁆𑀬𑀁, 𑀧𑀚𑁆𑀚𑁄𑀢𑁄 𑀅𑀭𑀡𑁂𑀦 𑀘𑀸𑀢𑀺.

𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.