𑁭. 𑀅𑀤𑁆𑀥𑀯𑀕𑁆𑀕𑁄

𑁧. 𑀦𑀸𑀫𑀲𑀼𑀢𑁆𑀢𑀁

𑁬𑁧. ‘‘𑀓𑀺𑀁𑀲𑀼 𑀲𑀩𑁆𑀩𑀁 𑀅𑀤𑁆𑀥𑀪𑀯𑀺 [𑀅𑀦𑁆𑀯𑀪𑀯𑀺 (𑀲𑀻.)], 𑀓𑀺𑀲𑁆𑀫𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀏𑀓𑀥𑀫𑁆𑀫𑀲𑁆𑀲, 𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽’’𑀢𑀺 [𑀯𑀲𑀫𑀤𑁆𑀥𑀕𑀽 (𑀓.)].

‘‘𑀦𑀸𑀫𑀁 𑀲𑀩𑁆𑀩𑀁 𑀅𑀤𑁆𑀥𑀪𑀯𑀺, 𑀦𑀸𑀫𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀺;

𑀦𑀸𑀫𑀲𑁆𑀲 𑀏𑀓𑀥𑀫𑁆𑀫𑀲𑁆𑀲, 𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽’’𑀢𑀺.

𑁨. 𑀘𑀺𑀢𑁆𑀢𑀲𑀼𑀢𑁆𑀢𑀁

𑁬𑁨. ‘‘𑀓𑁂𑀦𑀲𑁆𑀲𑀼 𑀦𑀻𑀬𑀢𑀺 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀧𑀭𑀺𑀓𑀲𑁆𑀲𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀏𑀓𑀥𑀫𑁆𑀫𑀲𑁆𑀲, 𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽’’𑀢𑀺.

‘‘𑀘𑀺𑀢𑁆𑀢𑁂𑀦 𑀦𑀻𑀬𑀢𑀺 𑀮𑁄𑀓𑁄, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀺;

𑀘𑀺𑀢𑁆𑀢𑀲𑁆𑀲 𑀏𑀓𑀥𑀫𑁆𑀫𑀲𑁆𑀲, 𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽’’𑀢𑀺.

𑁩. 𑀢𑀡𑁆𑀳𑀸𑀲𑀼𑀢𑁆𑀢𑀁

𑁬𑁩. ‘‘𑀓𑁂𑀦𑀲𑁆𑀲𑀼 𑀦𑀻𑀬𑀢𑀺 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀧𑀭𑀺𑀓𑀲𑁆𑀲𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀏𑀓𑀥𑀫𑁆𑀫𑀲𑁆𑀲, 𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽’’𑀢𑀺.

‘‘𑀢𑀡𑁆𑀳𑀸𑀬 𑀦𑀻𑀬𑀢𑀺 𑀮𑁄𑀓𑁄, 𑀢𑀡𑁆𑀳𑀸𑀬 𑀧𑀭𑀺𑀓𑀲𑁆𑀲𑀢𑀺;

𑀢𑀡𑁆𑀳𑀸𑀬 𑀏𑀓𑀥𑀫𑁆𑀫𑀲𑁆𑀲, 𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽’’𑀢𑀺.

𑁪. 𑀲𑀁𑀬𑁄𑀚𑀦𑀲𑀼𑀢𑁆𑀢𑀁

𑁬𑁪. ‘‘𑀓𑀺𑀁𑀲𑀼 𑀲𑀁𑀬𑁄𑀚𑀦𑁄 𑀮𑁄𑀓𑁄, 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀘𑀸𑀭𑀡𑀁;

𑀓𑀺𑀲𑁆𑀲𑀲𑁆𑀲𑀼 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘𑀦𑀦𑁆𑀤𑀻𑀲𑀁𑀬𑁄𑀚𑀦𑁄 [𑀦𑀦𑁆𑀤𑀺𑀲𑀁𑀬𑁄𑀚𑀦𑁄 (𑀲𑀻. 𑀲𑁆𑀬𑀸. 𑀓𑀁.)] 𑀮𑁄𑀓𑁄, 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀡𑀁;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑁫. 𑀩𑀦𑁆𑀥𑀦𑀲𑀼𑀢𑁆𑀢𑀁

𑁬𑁫. ‘‘𑀓𑀺𑀁𑀲𑀼 𑀲𑀫𑁆𑀩𑀦𑁆𑀥𑀦𑁄 𑀮𑁄𑀓𑁄, 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀘𑀸𑀭𑀡𑀁;

𑀓𑀺𑀲𑁆𑀲𑀲𑁆𑀲𑀼 𑀯𑀺𑀧𑁆𑀧𑀳𑀸𑀦𑁂𑀦, 𑀲𑀩𑁆𑀩𑀁 𑀙𑀺𑀦𑁆𑀤𑀢𑀺 𑀩𑀦𑁆𑀥𑀦’’𑀦𑁆𑀢𑀺.

‘‘𑀦𑀦𑁆𑀤𑀻𑀲𑀫𑁆𑀩𑀦𑁆𑀥𑀦𑁄 𑀮𑁄𑀓𑁄, 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀡𑀁;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦, 𑀲𑀩𑁆𑀩𑀁 𑀙𑀺𑀦𑁆𑀤𑀢𑀺 𑀩𑀦𑁆𑀥𑀦’’𑀦𑁆𑀢𑀺.

𑁬. 𑀅𑀢𑁆𑀢𑀳𑀢𑀲𑀼𑀢𑁆𑀢𑀁

𑁬𑁬. ‘‘𑀓𑁂𑀦𑀲𑁆𑀲𑀼𑀩𑁆𑀪𑀸𑀳𑀢𑁄 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀧𑀭𑀺𑀯𑀸𑀭𑀺𑀢𑁄;

𑀓𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀓𑀺𑀲𑁆𑀲 𑀥𑀽𑀧𑀸𑀬𑀺𑀢𑁄 𑀲𑀤𑀸’’𑀢𑀺.

‘‘𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 𑀮𑁄𑀓𑁄, 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄;

𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀇𑀘𑁆𑀙𑀸𑀥𑀽𑀧𑀸𑀬𑀺𑀢𑁄 𑀲𑀤𑀸’’𑀢𑀺.

𑁭. 𑀉𑀟𑁆𑀟𑀺𑀢𑀲𑀼𑀢𑁆𑀢𑀁

𑁬𑁭. ‘‘𑀓𑁂𑀦𑀲𑁆𑀲𑀼 𑀉𑀟𑁆𑀟𑀺𑀢𑁄 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀧𑀭𑀺𑀯𑀸𑀭𑀺𑀢𑁄;

𑀓𑁂𑀦𑀲𑁆𑀲𑀼 𑀧𑀺𑀳𑀺𑀢𑁄 𑀮𑁄𑀓𑁄, 𑀓𑀺𑀲𑁆𑀫𑀺𑀁 𑀮𑁄𑀓𑁄 𑀧𑀢𑀺𑀝𑁆𑀞𑀺𑀢𑁄’’𑀢𑀺.

‘‘𑀢𑀡𑁆𑀳𑀸𑀬 𑀉𑀟𑁆𑀟𑀺𑀢𑁄 𑀮𑁄𑀓𑁄, 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄;

𑀫𑀘𑁆𑀘𑀼𑀦𑀸 𑀧𑀺𑀳𑀺𑀢𑁄 𑀮𑁄𑀓𑁄, 𑀤𑀼𑀓𑁆𑀔𑁂 𑀮𑁄𑀓𑁄 𑀧𑀢𑀺𑀝𑁆𑀞𑀺𑀢𑁄’’𑀢𑀺.

𑁮. 𑀧𑀺𑀳𑀺𑀢𑀲𑀼𑀢𑁆𑀢𑀁

𑁬𑁮. ‘‘𑀓𑁂𑀦𑀲𑁆𑀲𑀼 𑀧𑀺𑀳𑀺𑀢𑁄 𑀮𑁄𑀓𑁄, 𑀓𑀺𑀲𑁆𑀫𑀺𑀁 𑀮𑁄𑀓𑁄 𑀧𑀢𑀺𑀝𑁆𑀞𑀺𑀢𑁄;

𑀓𑁂𑀦𑀲𑁆𑀲𑀼 𑀉𑀟𑁆𑀟𑀺𑀢𑁄 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀧𑀭𑀺𑀯𑀸𑀭𑀺𑀢𑁄’’𑀢𑀺.

‘‘𑀫𑀘𑁆𑀘𑀼𑀦𑀸 𑀧𑀺𑀳𑀺𑀢𑁄 𑀮𑁄𑀓𑁄, 𑀤𑀼𑀓𑁆𑀔𑁂 𑀮𑁄𑀓𑁄 𑀧𑀢𑀺𑀝𑁆𑀞𑀺𑀢𑁄;

𑀢𑀡𑁆𑀳𑀸𑀬 𑀉𑀟𑁆𑀟𑀺𑀢𑁄 𑀮𑁄𑀓𑁄, 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄’’𑀢𑀺.

𑁯. 𑀇𑀘𑁆𑀙𑀸𑀲𑀼𑀢𑁆𑀢𑀁

𑁬𑁯. ‘‘𑀓𑁂𑀦𑀲𑁆𑀲𑀼 𑀩𑀚𑁆𑀛𑀢𑀻 𑀮𑁄𑀓𑁄, 𑀓𑀺𑀲𑁆𑀲 𑀯𑀺𑀦𑀬𑀸𑀬 𑀫𑀼𑀘𑁆𑀘𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀯𑀺𑀧𑁆𑀧𑀳𑀸𑀦𑁂𑀦, 𑀲𑀩𑁆𑀩𑀁 𑀙𑀺𑀦𑁆𑀤𑀢𑀺 𑀩𑀦𑁆𑀥𑀦’’𑀦𑁆𑀢𑀺.

‘‘𑀇𑀘𑁆𑀙𑀸𑀬 𑀩𑀚𑁆𑀛𑀢𑀻 𑀮𑁄𑀓𑁄, 𑀇𑀘𑁆𑀙𑀸𑀯𑀺𑀦𑀬𑀸𑀬 𑀫𑀼𑀘𑁆𑀘𑀢𑀺;

𑀇𑀘𑁆𑀙𑀸𑀬 𑀯𑀺𑀧𑁆𑀧𑀳𑀸𑀦𑁂𑀦, 𑀲𑀩𑁆𑀩𑀁 𑀙𑀺𑀦𑁆𑀤𑀢𑀺 𑀩𑀦𑁆𑀥𑀦’’𑀦𑁆𑀢𑀺.

𑁧𑁦. 𑀮𑁄𑀓𑀲𑀼𑀢𑁆𑀢𑀁

𑁭𑁦. ‘‘𑀓𑀺𑀲𑁆𑀫𑀺𑀁 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯𑀁;

𑀓𑀺𑀲𑁆𑀲 𑀮𑁄𑀓𑁄 𑀉𑀧𑀸𑀤𑀸𑀬, 𑀓𑀺𑀲𑁆𑀫𑀺𑀁 𑀮𑁄𑀓𑁄 𑀯𑀺𑀳𑀜𑁆𑀜𑀢𑀻’’𑀢𑀺.

‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑀼 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯𑀁;

𑀙𑀦𑁆𑀦𑀫𑁂𑀯 𑀉𑀧𑀸𑀤𑀸𑀬, 𑀙𑀲𑀼 𑀮𑁄𑀓𑁄 𑀯𑀺𑀳𑀜𑁆𑀜𑀢𑀻’’𑀢𑀺.

𑀅𑀤𑁆𑀥𑀯𑀕𑁆𑀕𑁄 [𑀅𑀦𑁆𑀯𑀯𑀕𑁆𑀕𑁄 (𑀲𑀻.)] 𑀲𑀢𑁆𑀢𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀦𑀸𑀫𑀁 𑀘𑀺𑀢𑁆𑀢𑀜𑁆𑀘 𑀢𑀡𑁆𑀳𑀸 𑀘, 𑀲𑀁𑀬𑁄𑀚𑀦𑀜𑁆𑀘 𑀩𑀦𑁆𑀥𑀦𑀸;

𑀅𑀩𑁆𑀪𑀸𑀳𑀢𑀼𑀟𑁆𑀟𑀺𑀢𑁄 𑀧𑀺𑀳𑀺𑀢𑁄, 𑀇𑀘𑁆𑀙𑀸 𑀮𑁄𑀓𑁂𑀦 𑀢𑁂 𑀤𑀲𑀸𑀢𑀺.