𑁬. 𑀚𑀭𑀸𑀯𑀕𑁆𑀕𑁄

𑁧. 𑀚𑀭𑀸𑀲𑀼𑀢𑁆𑀢𑀁

𑁫𑁧. ‘‘𑀓𑀺𑀁𑀲𑀼 𑀬𑀸𑀯 𑀚𑀭𑀸 𑀲𑀸𑀥𑀼, 𑀓𑀺𑀁𑀲𑀼 𑀲𑀸𑀥𑀼 𑀧𑀢𑀺𑀝𑁆𑀞𑀺𑀢𑀁;

𑀓𑀺𑀁𑀲𑀼 𑀦𑀭𑀸𑀦𑀁 𑀭𑀢𑀦𑀁, 𑀓𑀺𑀁𑀲𑀼 𑀘𑁄𑀭𑁂𑀳𑀺 𑀤𑀽𑀳𑀭’’𑀦𑁆𑀢𑀺.

‘‘𑀲𑀻𑀮𑀁 𑀬𑀸𑀯 𑀚𑀭𑀸 𑀲𑀸𑀥𑀼, 𑀲𑀤𑁆𑀥𑀸 𑀲𑀸𑀥𑀼 𑀧𑀢𑀺𑀝𑁆𑀞𑀺𑀢𑀸;

𑀧𑀜𑁆𑀜𑀸 𑀦𑀭𑀸𑀦𑀁 𑀭𑀢𑀦𑀁, 𑀧𑀼𑀜𑁆𑀜𑀁 𑀘𑁄𑀭𑁂𑀳𑀺 𑀤𑀽𑀳𑀭’’𑀦𑁆𑀢𑀺.

𑁨. 𑀅𑀚𑀭𑀲𑀸𑀲𑀼𑀢𑁆𑀢𑀁

𑁫𑁨. ‘‘𑀓𑀺𑀁𑀲𑀼 𑀅𑀚𑀭𑀲𑀸 𑀲𑀸𑀥𑀼, 𑀓𑀺𑀁𑀲𑀼 𑀲𑀸𑀥𑀼 𑀅𑀥𑀺𑀝𑁆𑀞𑀺𑀢𑀁;

𑀓𑀺𑀁𑀲𑀼 𑀦𑀭𑀸𑀦𑀁 𑀭𑀢𑀦𑀁, 𑀓𑀺𑀁𑀲𑀼 𑀘𑁄𑀭𑁂𑀳𑁆𑀬𑀳𑀸𑀭𑀺𑀬’’𑀦𑁆𑀢𑀺.

‘‘𑀲𑀻𑀮𑀁 𑀅𑀚𑀭𑀲𑀸 𑀲𑀸𑀥𑀼, 𑀲𑀤𑁆𑀥𑀸 𑀲𑀸𑀥𑀼 𑀅𑀥𑀺𑀝𑁆𑀞𑀺𑀢𑀸;

𑀧𑀜𑁆𑀜𑀸 𑀦𑀭𑀸𑀦𑀁 𑀭𑀢𑀦𑀁, 𑀧𑀼𑀜𑁆𑀜𑀁 𑀘𑁄𑀭𑁂𑀳𑁆𑀬𑀳𑀸𑀭𑀺𑀬’’𑀦𑁆𑀢𑀺.

𑁩. 𑀫𑀺𑀢𑁆𑀢𑀲𑀼𑀢𑁆𑀢𑀁

𑁫𑁩. ‘‘𑀓𑀺𑀁𑀲𑀼 𑀧𑀯𑀲𑀢𑁄 [𑀧𑀣𑀯𑀢𑁄 (𑀧𑀻. 𑀓.)] 𑀫𑀺𑀢𑁆𑀢𑀁, 𑀓𑀺𑀁𑀲𑀼 𑀫𑀺𑀢𑁆𑀢𑀁 𑀲𑀓𑁂 𑀖𑀭𑁂;

𑀓𑀺𑀁 𑀫𑀺𑀢𑁆𑀢𑀁 𑀅𑀢𑁆𑀣𑀚𑀸𑀢𑀲𑁆𑀲, 𑀓𑀺𑀁 𑀫𑀺𑀢𑁆𑀢𑀁 𑀲𑀫𑁆𑀧𑀭𑀸𑀬𑀺𑀓’’𑀦𑁆𑀢𑀺.

‘‘𑀲𑀢𑁆𑀣𑁄 𑀧𑀯𑀲𑀢𑁄 𑀫𑀺𑀢𑁆𑀢𑀁, 𑀫𑀸𑀢𑀸 𑀫𑀺𑀢𑁆𑀢𑀁 𑀲𑀓𑁂 𑀖𑀭𑁂;

𑀲𑀳𑀸𑀬𑁄 𑀅𑀢𑁆𑀣𑀚𑀸𑀢𑀲𑁆𑀲, 𑀳𑁄𑀢𑀺 𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀲𑀬𑀁𑀓𑀢𑀸𑀦𑀺 𑀧𑀼𑀜𑁆𑀜𑀸𑀦𑀺, 𑀢𑀁 𑀫𑀺𑀢𑁆𑀢𑀁 𑀲𑀫𑁆𑀧𑀭𑀸𑀬𑀺𑀓’’𑀦𑁆𑀢𑀺.

𑁪. 𑀯𑀢𑁆𑀣𑀼𑀲𑀼𑀢𑁆𑀢𑀁

𑁫𑁪. ‘‘𑀓𑀺𑀁𑀲𑀼 𑀯𑀢𑁆𑀣𑀼 𑀫𑀦𑀼𑀲𑁆𑀲𑀸𑀦𑀁, 𑀓𑀺𑀁𑀲𑀽𑀥 𑀧𑀭𑀫𑁄 𑀲𑀔𑀸;

𑀓𑀺𑀁𑀲𑀼 𑀪𑀽𑀢𑀸 𑀉𑀧𑀚𑀻𑀯𑀦𑁆𑀢𑀺, 𑀬𑁂 𑀧𑀸𑀡𑀸 𑀧𑀣𑀯𑀺𑀲𑁆𑀲𑀺𑀢𑀸’’𑀢𑀺 [𑀧𑀣𑀯𑀺𑀁 𑀲𑀺𑀢𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

‘‘𑀧𑀼𑀢𑁆𑀢𑀸 𑀯𑀢𑁆𑀣𑀼 𑀫𑀦𑀼𑀲𑁆𑀲𑀸𑀦𑀁, 𑀪𑀭𑀺𑀬𑀸 𑀘 [𑀪𑀭𑀺𑀬𑀸𑀯 (𑀲𑀻.), 𑀪𑀭𑀺𑀬𑀸 (𑀲𑁆𑀬𑀸. 𑀓𑀁.)] 𑀧𑀭𑀫𑁄 𑀲𑀔𑀸;

𑀯𑀼𑀝𑁆𑀞𑀺𑀁 𑀪𑀽𑀢𑀸 𑀉𑀧𑀚𑀻𑀯𑀦𑁆𑀢𑀺, 𑀬𑁂 𑀧𑀸𑀡𑀸 𑀧𑀣𑀯𑀺𑀲𑁆𑀲𑀺𑀢𑀸’’𑀢𑀺.

𑁫. 𑀧𑀞𑀫𑀚𑀦𑀲𑀼𑀢𑁆𑀢𑀁

𑁫𑁫. ‘‘𑀓𑀺𑀁𑀲𑀼 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀥𑀸𑀯𑀢𑀺;

𑀓𑀺𑀁𑀲𑀼 𑀲𑀁𑀲𑀸𑀭𑀫𑀸𑀧𑀸𑀤𑀺, 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀘𑀺𑀢𑁆𑀢𑀫𑀲𑁆𑀲 𑀯𑀺𑀥𑀸𑀯𑀢𑀺;

𑀲𑀢𑁆𑀢𑁄 𑀲𑀁𑀲𑀸𑀭𑀫𑀸𑀧𑀸𑀤𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

𑁬. 𑀤𑀼𑀢𑀺𑀬𑀚𑀦𑀲𑀼𑀢𑁆𑀢𑀁

𑁫𑁬. ‘‘𑀓𑀺𑀁𑀲𑀼 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀥𑀸𑀯𑀢𑀺;

𑀓𑀺𑀁𑀲𑀼 𑀲𑀁𑀲𑀸𑀭𑀫𑀸𑀧𑀸𑀤𑀺, 𑀓𑀺𑀲𑁆𑀫𑀸 𑀦 𑀧𑀭𑀺𑀫𑀼𑀘𑁆𑀘𑀢𑀻’’𑀢𑀺.

‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀘𑀺𑀢𑁆𑀢𑀫𑀲𑁆𑀲 𑀯𑀺𑀥𑀸𑀯𑀢𑀺;

𑀲𑀢𑁆𑀢𑁄 𑀲𑀁𑀲𑀸𑀭𑀫𑀸𑀧𑀸𑀤𑀺, 𑀤𑀼𑀓𑁆𑀔𑀸 𑀦 𑀧𑀭𑀺𑀫𑀼𑀘𑁆𑀘𑀢𑀻’’𑀢𑀺.

𑁭. 𑀢𑀢𑀺𑀬𑀚𑀦𑀲𑀼𑀢𑁆𑀢𑀁

𑁫𑁭. ‘‘𑀓𑀺𑀁𑀲𑀼 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀥𑀸𑀯𑀢𑀺;

𑀓𑀺𑀁𑀲𑀼 𑀲𑀁𑀲𑀸𑀭𑀫𑀸𑀧𑀸𑀤𑀺, 𑀓𑀺𑀁𑀲𑀼 𑀢𑀲𑁆𑀲 𑀧𑀭𑀸𑀬𑀦’’𑀦𑁆𑀢𑀺.

‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀘𑀺𑀢𑁆𑀢𑀫𑀲𑁆𑀲 𑀯𑀺𑀥𑀸𑀯𑀢𑀺;

𑀲𑀢𑁆𑀢𑁄 𑀲𑀁𑀲𑀸𑀭𑀫𑀸𑀧𑀸𑀤𑀺, 𑀓𑀫𑁆𑀫𑀁 𑀢𑀲𑁆𑀲 𑀧𑀭𑀸𑀬𑀦’’𑀦𑁆𑀢𑀺.

𑁮. 𑀉𑀧𑁆𑀧𑀣𑀲𑀼𑀢𑁆𑀢𑀁

𑁫𑁮. ‘‘𑀓𑀺𑀁𑀲𑀼 𑀉𑀧𑁆𑀧𑀣𑁄 𑀅𑀓𑁆𑀔𑀸𑀢𑁄, 𑀓𑀺𑀁𑀲𑀼 𑀭𑀢𑁆𑀢𑀺𑀦𑁆𑀤𑀺𑀯𑀓𑁆𑀔𑀬𑁄;

𑀓𑀺𑀁 𑀫𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀓𑀺𑀁 𑀲𑀺𑀦𑀸𑀦𑀫𑀦𑁄𑀤𑀓’’𑀦𑁆𑀢𑀺.

‘‘𑀭𑀸𑀕𑁄 𑀉𑀧𑁆𑀧𑀣𑁄 𑀅𑀓𑁆𑀔𑀸𑀢𑁄, 𑀯𑀬𑁄 𑀭𑀢𑁆𑀢𑀺𑀦𑁆𑀤𑀺𑀯𑀓𑁆𑀔𑀬𑁄;

𑀇𑀢𑁆𑀣𑀻 𑀫𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀏𑀢𑁆𑀣𑀸𑀬𑀁 𑀲𑀚𑁆𑀚𑀢𑁂 𑀧𑀚𑀸;

𑀢𑀧𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘, 𑀢𑀁 𑀲𑀺𑀦𑀸𑀦𑀫𑀦𑁄𑀤𑀓’’𑀦𑁆𑀢𑀺.

𑁯. 𑀤𑀼𑀢𑀺𑀬𑀲𑀼𑀢𑁆𑀢𑀁

𑁫𑁯. ‘‘𑀓𑀺𑀁𑀲𑀼 𑀤𑀼𑀢𑀺𑀬𑀸 [𑀤𑀼𑀢𑀺𑀬𑀁 (𑀲𑁆𑀬𑀸. 𑀓𑀁. 𑀧𑀻.)] 𑀧𑀼𑀭𑀺𑀲𑀲𑁆𑀲 𑀳𑁄𑀢𑀺, 𑀓𑀺𑀁𑀲𑀼 𑀘𑁂𑀦𑀁 𑀧𑀲𑀸𑀲𑀢𑀺;

𑀓𑀺𑀲𑁆𑀲 𑀘𑀸𑀪𑀺𑀭𑀢𑁄 𑀫𑀘𑁆𑀘𑁄, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

‘‘𑀲𑀤𑁆𑀥𑀸 𑀤𑀼𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑁄𑀢𑀺, 𑀧𑀜𑁆𑀜𑀸 𑀘𑁂𑀦𑀁 𑀧𑀲𑀸𑀲𑀢𑀺;

𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑁄 𑀫𑀘𑁆𑀘𑁄, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑁧𑁦. 𑀓𑀯𑀺𑀲𑀼𑀢𑁆𑀢𑀁

𑁬𑁦. ‘‘𑀓𑀺𑀁𑀲𑀼 𑀦𑀺𑀤𑀸𑀦𑀁 𑀕𑀸𑀣𑀸𑀦𑀁, 𑀓𑀺𑀁𑀲𑀼 𑀢𑀸𑀲𑀁 𑀯𑀺𑀬𑀜𑁆𑀚𑀦𑀁;

𑀓𑀺𑀁𑀲𑀼 𑀲𑀦𑁆𑀦𑀺𑀲𑁆𑀲𑀺𑀢𑀸 𑀕𑀸𑀣𑀸, 𑀓𑀺𑀁𑀲𑀼 𑀕𑀸𑀣𑀸𑀦𑀫𑀸𑀲𑀬𑁄’’𑀢𑀺.

‘‘𑀙𑀦𑁆𑀤𑁄 𑀦𑀺𑀤𑀸𑀦𑀁 𑀕𑀸𑀣𑀸𑀦𑀁, 𑀅𑀓𑁆𑀔𑀭𑀸 𑀢𑀸𑀲𑀁 𑀯𑀺𑀬𑀜𑁆𑀚𑀦𑀁;

𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀸 𑀕𑀸𑀣𑀸, 𑀓𑀯𑀺 𑀕𑀸𑀣𑀸𑀦𑀫𑀸𑀲𑀬𑁄’’𑀢𑀺.

𑀚𑀭𑀸𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀚𑀭𑀸 𑀅𑀚𑀭𑀲𑀸 𑀫𑀺𑀢𑁆𑀢𑀁, 𑀯𑀢𑁆𑀣𑀼 𑀢𑀻𑀡𑀺 𑀚𑀦𑀸𑀦𑀺 𑀘;

𑀉𑀧𑁆𑀧𑀣𑁄 𑀘 𑀤𑀼𑀢𑀺𑀬𑁄 𑀘, 𑀓𑀯𑀺𑀦𑀸 𑀧𑀽𑀭𑀺𑀢𑁄 𑀯𑀕𑁆𑀕𑁄𑀢𑀺.