𑁫. 𑀆𑀤𑀺𑀢𑁆𑀢𑀯𑀕𑁆𑀕𑁄

𑁧. 𑀆𑀤𑀺𑀢𑁆𑀢𑀲𑀼𑀢𑁆𑀢𑀁

𑁪𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀆𑀤𑀺𑀢𑁆𑀢𑀲𑁆𑀫𑀺𑀁 𑀅𑀕𑀸𑀭𑀲𑁆𑀫𑀺𑀁, 𑀬𑀁 𑀦𑀻𑀳𑀭𑀢𑀺 𑀪𑀸𑀚𑀦𑀁;

𑀢𑀁 𑀢𑀲𑁆𑀲 𑀳𑁄𑀢𑀺 𑀅𑀢𑁆𑀣𑀸𑀬, 𑀦𑁄 𑀘 𑀬𑀁 𑀢𑀢𑁆𑀣 𑀟𑀬𑁆𑀳𑀢𑀺.

‘‘𑀏𑀯𑀁 𑀆𑀤𑀺𑀢𑁆𑀢𑀓𑁄 𑀮𑁄𑀓𑁄, 𑀚𑀭𑀸𑀬 𑀫𑀭𑀡𑁂𑀦 𑀘;

𑀦𑀻𑀳𑀭𑁂𑀣𑁂𑀯 𑀤𑀸𑀦𑁂𑀦, 𑀤𑀺𑀦𑁆𑀦𑀁 𑀳𑁄𑀢𑀺 𑀲𑀼𑀦𑀻𑀳𑀢𑀁.

‘‘𑀤𑀺𑀦𑁆𑀦𑀁 𑀲𑀼𑀔𑀨𑀮𑀁 𑀳𑁄𑀢𑀺, 𑀦𑀸𑀤𑀺𑀦𑁆𑀦𑀁 𑀳𑁄𑀢𑀺 𑀢𑀁 𑀢𑀣𑀸;

𑀘𑁄𑀭𑀸 𑀳𑀭𑀦𑁆𑀢𑀺 𑀭𑀸𑀚𑀸𑀦𑁄, 𑀅𑀕𑁆𑀕𑀺 𑀟𑀳𑀢𑀺 𑀦𑀲𑁆𑀲𑀢𑀺.

‘‘𑀅𑀣 𑀅𑀦𑁆𑀢𑁂𑀦 𑀚𑀳𑀢𑀺, 𑀲𑀭𑀻𑀭𑀁 𑀲𑀧𑀭𑀺𑀕𑁆𑀕𑀳𑀁;

𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀪𑀼𑀜𑁆𑀚𑁂𑀣 𑀘 𑀤𑀤𑁂𑀣 𑀘;

𑀤𑀢𑁆𑀯𑀸 𑀘 𑀪𑀼𑀢𑁆𑀯𑀸 𑀘 𑀬𑀣𑀸𑀦𑀼𑀪𑀸𑀯𑀁;

𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦’’𑀦𑁆𑀢𑀺.

𑁨. 𑀓𑀺𑀁𑀤𑀤𑀲𑀼𑀢𑁆𑀢𑀁

𑁪𑁨. ‘‘𑀓𑀺𑀁𑀤𑀤𑁄 𑀩𑀮𑀤𑁄 𑀳𑁄𑀢𑀺, 𑀓𑀺𑀁𑀤𑀤𑁄 𑀳𑁄𑀢𑀺 𑀯𑀡𑁆𑀡𑀤𑁄;

𑀓𑀺𑀁𑀤𑀤𑁄 𑀲𑀼𑀔𑀤𑁄 𑀳𑁄𑀢𑀺, 𑀓𑀺𑀁𑀤𑀤𑁄 𑀳𑁄𑀢𑀺 𑀘𑀓𑁆𑀔𑀼𑀤𑁄;

𑀓𑁄 𑀘 𑀲𑀩𑁆𑀩𑀤𑀤𑁄 𑀳𑁄𑀢𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

‘‘𑀅𑀦𑁆𑀦𑀤𑁄 𑀩𑀮𑀤𑁄 𑀳𑁄𑀢𑀺, 𑀯𑀢𑁆𑀣𑀤𑁄 𑀳𑁄𑀢𑀺 𑀯𑀡𑁆𑀡𑀤𑁄;

𑀬𑀸𑀦𑀤𑁄 𑀲𑀼𑀔𑀤𑁄 𑀳𑁄𑀢𑀺, 𑀤𑀻𑀧𑀤𑁄 𑀳𑁄𑀢𑀺 𑀘𑀓𑁆𑀔𑀼𑀤𑁄.

‘‘𑀲𑁄 𑀘 𑀲𑀩𑁆𑀩𑀤𑀤𑁄 𑀳𑁄𑀢𑀺, 𑀬𑁄 𑀤𑀤𑀸𑀢𑀺 𑀉𑀧𑀲𑁆𑀲𑀬𑀁;

𑀅𑀫𑀢𑀁 𑀤𑀤𑁄 𑀘 𑀲𑁄 𑀳𑁄𑀢𑀺, 𑀬𑁄 𑀥𑀫𑁆𑀫𑀫𑀦𑀼𑀲𑀸𑀲𑀢𑀻’’𑀢𑀺.

𑁩. 𑀅𑀦𑁆𑀦𑀲𑀼𑀢𑁆𑀢𑀁

𑁪𑁩. ‘‘𑀅𑀦𑁆𑀦𑀫𑁂𑀯𑀸𑀪𑀺𑀦𑀦𑁆𑀤𑀦𑁆𑀢𑀺, 𑀉𑀪𑀬𑁂 𑀤𑁂𑀯𑀫𑀸𑀦𑀼𑀲𑀸;

𑀅𑀣 𑀓𑁄 𑀦𑀸𑀫 𑀲𑁄 𑀬𑀓𑁆𑀔𑁄, 𑀬𑀁 𑀅𑀦𑁆𑀦𑀁 𑀦𑀸𑀪𑀺𑀦𑀦𑁆𑀤𑀢𑀻’’𑀢𑀺.

‘‘𑀬𑁂 𑀦𑀁 𑀤𑀤𑀦𑁆𑀢𑀺 𑀲𑀤𑁆𑀥𑀸𑀬, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑀫𑁂𑀯 𑀅𑀦𑁆𑀦𑀁 𑀪𑀚𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

‘‘𑀢𑀲𑁆𑀫𑀸 𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀁, 𑀤𑀚𑁆𑀚𑀸 𑀤𑀸𑀦𑀁 𑀫𑀮𑀸𑀪𑀺𑀪𑀽;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑁪. 𑀏𑀓𑀫𑀽𑀮𑀲𑀼𑀢𑁆𑀢𑀁

𑁪𑁪. ‘‘𑀏𑀓𑀫𑀽𑀮𑀁 𑀤𑁆𑀯𑀺𑀭𑀸𑀯𑀝𑁆𑀝𑀁, 𑀢𑀺𑀫𑀮𑀁 𑀧𑀜𑁆𑀘𑀧𑀢𑁆𑀣𑀭𑀁;

𑀲𑀫𑀼𑀤𑁆𑀤𑀁 𑀤𑁆𑀯𑀸𑀤𑀲𑀸𑀯𑀝𑁆𑀝𑀁, 𑀧𑀸𑀢𑀸𑀮𑀁 𑀅𑀢𑀭𑀻 𑀇𑀲𑀻’’𑀢𑀺.

𑁫. 𑀅𑀦𑁄𑀫𑀲𑀼𑀢𑁆𑀢𑀁

𑁪𑁫. ‘‘𑀅𑀦𑁄𑀫𑀦𑀸𑀫𑀁 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺𑀁, 𑀧𑀜𑁆𑀜𑀸𑀤𑀤𑀁 𑀓𑀸𑀫𑀸𑀮𑀬𑁂 𑀅𑀲𑀢𑁆𑀢𑀁;

𑀢𑀁 𑀧𑀲𑁆𑀲𑀣 𑀲𑀩𑁆𑀩𑀯𑀺𑀤𑀼𑀁 𑀲𑀼𑀫𑁂𑀥𑀁, 𑀅𑀭𑀺𑀬𑁂 𑀧𑀣𑁂 𑀓𑀫𑀫𑀸𑀦𑀁 𑀫𑀳𑁂𑀲𑀺’’𑀦𑁆𑀢𑀺.

𑁬. 𑀅𑀘𑁆𑀙𑀭𑀸𑀲𑀼𑀢𑁆𑀢𑀁

𑁪𑁬. ‘‘𑀅𑀘𑁆𑀙𑀭𑀸𑀕𑀡𑀲𑀗𑁆𑀖𑀼𑀝𑁆𑀞𑀁, 𑀧𑀺𑀲𑀸𑀘𑀕𑀡𑀲𑁂𑀯𑀺𑀢𑀁;

𑀯𑀦𑀦𑁆𑀢𑀁 𑀫𑁄𑀳𑀦𑀁 𑀦𑀸𑀫, 𑀓𑀣𑀁 𑀬𑀸𑀢𑁆𑀭𑀸 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀉𑀚𑀼𑀓𑁄 𑀦𑀸𑀫 𑀲𑁄 𑀫𑀕𑁆𑀕𑁄, 𑀅𑀪𑀬𑀸 𑀦𑀸𑀫 𑀲𑀸 𑀤𑀺𑀲𑀸;

𑀭𑀣𑁄 𑀅𑀓𑀽𑀚𑀦𑁄 𑀦𑀸𑀫, 𑀥𑀫𑁆𑀫𑀘𑀓𑁆𑀓𑁂𑀳𑀺 𑀲𑀁𑀬𑀼𑀢𑁄.

‘‘𑀳𑀺𑀭𑀻 𑀢𑀲𑁆𑀲 𑀅𑀧𑀸𑀮𑀫𑁆𑀩𑁄, 𑀲𑀢𑁆𑀬𑀲𑁆𑀲 𑀧𑀭𑀺𑀯𑀸𑀭𑀡𑀁;

𑀥𑀫𑁆𑀫𑀸𑀳𑀁 𑀲𑀸𑀭𑀣𑀺𑀁 𑀩𑁆𑀭𑀽𑀫𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀚𑀯𑀁.

‘‘𑀬𑀲𑁆𑀲 𑀏𑀢𑀸𑀤𑀺𑀲𑀁 𑀬𑀸𑀦𑀁, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

𑀲 𑀯𑁂 𑀏𑀢𑁂𑀦 𑀬𑀸𑀦𑁂𑀦, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂’’𑀢𑀺.

𑁭. 𑀯𑀦𑀭𑁄𑀧𑀲𑀼𑀢𑁆𑀢𑀁

𑁪𑁭. ‘‘𑀓𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺;

𑀥𑀫𑁆𑀫𑀝𑁆𑀞𑀸 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀓𑁂 𑀚𑀦𑀸 𑀲𑀕𑁆𑀕𑀕𑀸𑀫𑀺𑀦𑁄’’𑀢𑀺.

‘‘𑀆𑀭𑀸𑀫𑀭𑁄𑀧𑀸 𑀯𑀦𑀭𑁄𑀧𑀸, 𑀬𑁂 𑀚𑀦𑀸 𑀲𑁂𑀢𑀼𑀓𑀸𑀭𑀓𑀸;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀬𑁂 𑀤𑀤𑀦𑁆𑀢𑀺 𑀉𑀧𑀲𑁆𑀲𑀬𑀁.

‘‘𑀢𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺;

𑀥𑀫𑁆𑀫𑀝𑁆𑀞𑀸 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀢𑁂 𑀚𑀦𑀸 𑀲𑀕𑁆𑀕𑀕𑀸𑀫𑀺𑀦𑁄’’𑀢𑀺.

𑁮. 𑀚𑁂𑀢𑀯𑀦𑀲𑀼𑀢𑁆𑀢𑀁

𑁪𑁮. ‘‘𑀇𑀤𑀜𑁆𑀳𑀺 𑀢𑀁 𑀚𑁂𑀢𑀯𑀦𑀁, 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀁;

𑀆𑀯𑀼𑀢𑁆𑀣𑀁 [𑀆𑀯𑀼𑀝𑁆𑀞𑀁 (𑀓.)] 𑀥𑀫𑁆𑀫𑀭𑀸𑀚𑁂𑀦, 𑀧𑀻𑀢𑀺𑀲𑀜𑁆𑀚𑀦𑀦𑀁 𑀫𑀫.

‘‘𑀓𑀫𑁆𑀫𑀁 𑀯𑀺𑀚𑁆𑀚𑀸 𑀘 𑀥𑀫𑁆𑀫𑁄 𑀘, 𑀲𑀻𑀮𑀁 𑀚𑀻𑀯𑀺𑀢𑀫𑀼𑀢𑁆𑀢𑀫𑀁;

𑀏𑀢𑁂𑀦 𑀫𑀘𑁆𑀘𑀸 𑀲𑀼𑀚𑁆𑀛𑀦𑁆𑀢𑀺, 𑀦 𑀕𑁄𑀢𑁆𑀢𑁂𑀦 𑀥𑀦𑁂𑀦 𑀯𑀸.

‘‘𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀁, 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀺.

‘‘𑀲𑀸𑀭𑀺𑀧𑀼𑀢𑁆𑀢𑁄𑀯 𑀧𑀜𑁆𑀜𑀸𑀬, 𑀲𑀻𑀮𑁂𑀦 𑀉𑀧𑀲𑀫𑁂𑀦 𑀘;

𑀬𑁄𑀧𑀺 𑀧𑀸𑀭𑀗𑁆𑀕𑀢𑁄 𑀪𑀺𑀓𑁆𑀔𑀼, 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸’’𑀢𑀺.

𑁯. 𑀫𑀘𑁆𑀙𑀭𑀺𑀲𑀼𑀢𑁆𑀢𑀁

𑁪𑁯. ‘‘𑀬𑁂𑀥 𑀫𑀘𑁆𑀙𑀭𑀺𑀦𑁄 𑀮𑁄𑀓𑁂, 𑀓𑀤𑀭𑀺𑀬𑀸 𑀧𑀭𑀺𑀪𑀸𑀲𑀓𑀸;

𑀅𑀜𑁆𑀜𑁂𑀲𑀁 𑀤𑀤𑀫𑀸𑀦𑀸𑀦𑀁, 𑀅𑀦𑁆𑀢𑀭𑀸𑀬𑀓𑀭𑀸 𑀦𑀭𑀸.

‘‘𑀓𑀻𑀤𑀺𑀲𑁄 𑀢𑁂𑀲𑀁 𑀯𑀺𑀧𑀸𑀓𑁄, 𑀲𑀫𑁆𑀧𑀭𑀸𑀬𑁄 𑀘 𑀓𑀻𑀤𑀺𑀲𑁄;

𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑁆𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

‘‘𑀬𑁂𑀥 𑀫𑀘𑁆𑀙𑀭𑀺𑀦𑁄 𑀮𑁄𑀓𑁂, 𑀓𑀤𑀭𑀺𑀬𑀸 𑀧𑀭𑀺𑀪𑀸𑀲𑀓𑀸;

𑀅𑀜𑁆𑀜𑁂𑀲𑀁 𑀤𑀤𑀫𑀸𑀦𑀸𑀦𑀁, 𑀅𑀦𑁆𑀢𑀭𑀸𑀬𑀓𑀭𑀸 𑀦𑀭𑀸.

‘‘𑀦𑀺𑀭𑀬𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁, 𑀬𑀫𑀮𑁄𑀓𑀁 𑀉𑀧𑀧𑀚𑁆𑀚𑀭𑁂;

𑀲𑀘𑁂 𑀏𑀦𑁆𑀢𑀺 𑀫𑀦𑀼𑀲𑁆𑀲𑀢𑁆𑀢𑀁, 𑀤𑀮𑀺𑀤𑁆𑀤𑁂 𑀚𑀸𑀬𑀭𑁂 𑀓𑀼𑀮𑁂.

‘‘𑀘𑁄𑀴𑀁 𑀧𑀺𑀡𑁆𑀟𑁄 𑀭𑀢𑀻 𑀔𑀺𑀟𑁆𑀟𑀸, 𑀬𑀢𑁆𑀣 𑀓𑀺𑀘𑁆𑀙𑁂𑀦 𑀮𑀩𑁆𑀪𑀢𑀺;

𑀧𑀭𑀢𑁄 𑀆𑀲𑀻𑀲𑀭𑁂 [𑀆𑀲𑀺𑀁𑀲𑀭𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀩𑀸𑀮𑀸, 𑀢𑀫𑁆𑀧𑀺 𑀢𑁂𑀲𑀁 𑀦 𑀮𑀩𑁆𑀪𑀢𑀺;

𑀤𑀺𑀝𑁆𑀞𑁂 𑀥𑀫𑁆𑀫𑁂𑀲 𑀯𑀺𑀧𑀸𑀓𑁄, 𑀲𑀫𑁆𑀧𑀭𑀸𑀬𑁂 [𑀲𑀫𑁆𑀧𑀭𑀸𑀬𑁄 (𑀲𑁆𑀬𑀸. 𑀓𑀁. 𑀧𑀻.)] 𑀘 𑀤𑀼𑀕𑁆𑀕𑀢𑀻’’𑀢𑀺.

‘‘𑀇𑀢𑀺𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀅𑀜𑁆𑀜𑀁 𑀧𑀼𑀘𑁆𑀙𑀸𑀫 𑀕𑁄𑀢𑀫;

𑀬𑁂𑀥 𑀮𑀤𑁆𑀥𑀸 𑀫𑀦𑀼𑀲𑁆𑀲𑀢𑁆𑀢𑀁, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸.

‘‘𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀘, 𑀲𑀗𑁆𑀖𑁂 𑀘 𑀢𑀺𑀩𑁆𑀩𑀕𑀸𑀭𑀯𑀸;

𑀓𑀻𑀤𑀺𑀲𑁄 𑀢𑁂𑀲𑀁 𑀯𑀺𑀧𑀸𑀓𑁄, 𑀲𑀫𑁆𑀧𑀭𑀸𑀬𑁄 𑀘 𑀓𑀻𑀤𑀺𑀲𑁄;

𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑁆𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

‘‘𑀬𑁂𑀥 𑀮𑀤𑁆𑀥𑀸 𑀫𑀦𑀼𑀲𑁆𑀲𑀢𑁆𑀢𑀁, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸;

𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀘, 𑀲𑀗𑁆𑀖𑁂 𑀘 𑀢𑀺𑀩𑁆𑀩𑀕𑀸𑀭𑀯𑀸;

𑀏𑀢𑁂 𑀲𑀕𑁆𑀕𑀸 [𑀲𑀕𑁆𑀕𑁂 (𑀲𑀻. 𑀲𑁆𑀬𑀸. 𑀓𑀁.)] 𑀧𑀓𑀸𑀲𑀦𑁆𑀢𑀺, 𑀬𑀢𑁆𑀣 𑀢𑁂 𑀉𑀧𑀧𑀚𑁆𑀚𑀭𑁂.

‘‘𑀲𑀘𑁂 𑀏𑀦𑁆𑀢𑀺 𑀫𑀦𑀼𑀲𑁆𑀲𑀢𑁆𑀢𑀁, 𑀅𑀟𑁆𑀠𑁂 𑀆𑀚𑀸𑀬𑀭𑁂 𑀓𑀼𑀮𑁂;

𑀘𑁄𑀴𑀁 𑀧𑀺𑀡𑁆𑀟𑁄 𑀭𑀢𑀻 𑀔𑀺𑀟𑁆𑀟𑀸, 𑀬𑀢𑁆𑀣𑀸𑀓𑀺𑀘𑁆𑀙𑁂𑀦 𑀮𑀩𑁆𑀪𑀢𑀺.

‘‘𑀧𑀭𑀲𑀫𑁆𑀪𑀢𑁂𑀲𑀼 𑀪𑁄𑀕𑁂𑀲𑀼, 𑀯𑀲𑀯𑀢𑁆𑀢𑀻𑀯 𑀫𑁄𑀤𑀭𑁂;

𑀤𑀺𑀝𑁆𑀞𑁂 𑀥𑀫𑁆𑀫𑁂𑀲 𑀯𑀺𑀧𑀸𑀓𑁄, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻’’𑀢𑀺.

𑁧𑁦. 𑀖𑀝𑀻𑀓𑀸𑀭𑀲𑀼𑀢𑁆𑀢𑀁

𑁫𑁦. ‘‘𑀅𑀯𑀺𑀳𑀁 𑀉𑀧𑀧𑀦𑁆𑀦𑀸𑀲𑁂, 𑀯𑀺𑀫𑀼𑀢𑁆𑀢𑀸 𑀲𑀢𑁆𑀢 𑀪𑀺𑀓𑁆𑀔𑀯𑁄;

𑀭𑀸𑀕𑀤𑁄𑀲𑀧𑀭𑀺𑀓𑁆𑀔𑀻𑀡𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

‘‘𑀓𑁂 𑀘 𑀢𑁂 𑀅𑀢𑀭𑀼𑀁 𑀧𑀗𑁆𑀓𑀁 [𑀲𑀗𑁆𑀕𑀁 (𑀲𑀻. 𑀲𑁆𑀬𑀸.)], 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁;

𑀓𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀘𑁆𑀘𑀕𑀼’’𑀦𑁆𑀢𑀺.

‘‘𑀉𑀧𑀓𑁄 𑀧𑀮𑀕𑀡𑁆𑀟𑁄 𑀘, 𑀧𑀼𑀓𑁆𑀓𑀼𑀲𑀸𑀢𑀺 𑀘 𑀢𑁂 𑀢𑀬𑁄;

𑀪𑀤𑁆𑀤𑀺𑀬𑁄 𑀔𑀡𑁆𑀟𑀤𑁂𑀯𑁄 𑀘, 𑀩𑀸𑀳𑀼𑀭𑀕𑁆𑀕𑀺 𑀘 𑀲𑀺𑀗𑁆𑀕𑀺𑀬𑁄 [𑀩𑀳𑀼𑀤𑀦𑁆𑀢𑀻 𑀘 𑀧𑀺𑀗𑁆𑀕𑀬𑁄 (𑀲𑀻.)];

𑀢𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀘𑁆𑀘𑀕𑀼’’𑀦𑁆𑀢𑀺.

‘‘𑀓𑀼𑀲𑀮𑀻 𑀪𑀸𑀲𑀲𑀻 𑀢𑁂𑀲𑀁, 𑀫𑀸𑀭𑀧𑀸𑀲𑀧𑁆𑀧𑀳𑀸𑀬𑀺𑀦𑀁;

𑀓𑀲𑁆𑀲 𑀢𑁂 𑀥𑀫𑁆𑀫𑀫𑀜𑁆𑀜𑀸𑀬, 𑀅𑀘𑁆𑀙𑀺𑀤𑀼𑀁 𑀪𑀯𑀩𑀦𑁆𑀥𑀦’’𑀦𑁆𑀢𑀺.

‘‘𑀦 𑀅𑀜𑁆𑀜𑀢𑁆𑀭 𑀪𑀕𑀯𑀢𑀸, 𑀦𑀸𑀜𑁆𑀜𑀢𑁆𑀭 𑀢𑀯 𑀲𑀸𑀲𑀦𑀸;

𑀬𑀲𑁆𑀲 𑀢𑁂 𑀥𑀫𑁆𑀫𑀫𑀜𑁆𑀜𑀸𑀬, 𑀅𑀘𑁆𑀙𑀺𑀤𑀼𑀁 𑀪𑀯𑀩𑀦𑁆𑀥𑀦𑀁.

‘‘𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀢𑀁 𑀢𑁂 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀅𑀘𑁆𑀙𑀺𑀤𑀼𑀁 𑀪𑀯𑀩𑀦𑁆𑀥𑀦’’𑀦𑁆𑀢𑀺.

‘‘𑀕𑀫𑁆𑀪𑀻𑀭𑀁 𑀪𑀸𑀲𑀲𑀻 𑀯𑀸𑀘𑀁, 𑀤𑀼𑀩𑁆𑀩𑀺𑀚𑀸𑀦𑀁 𑀲𑀼𑀤𑀼𑀩𑁆𑀩𑀼𑀥𑀁;

𑀓𑀲𑁆𑀲 𑀢𑁆𑀯𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀸𑀘𑀁 𑀪𑀸𑀲𑀲𑀺 𑀈𑀤𑀺𑀲’’𑀦𑁆𑀢𑀺.

‘‘𑀓𑀼𑀫𑁆𑀪𑀓𑀸𑀭𑁄 𑀧𑀼𑀭𑁂 𑀆𑀲𑀺𑀁, 𑀯𑁂𑀓𑀴𑀺𑀗𑁆𑀕𑁂 [𑀯𑁂𑀳𑀴𑀺𑀗𑁆𑀕𑁂 (𑀲𑀻.), 𑀯𑁂𑀪𑀴𑀺𑀗𑁆𑀕𑁂 (𑀲𑁆𑀬𑀸. 𑀓𑀁.)] 𑀖𑀝𑀻𑀓𑀭𑁄;

𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑁄 𑀆𑀲𑀺𑀁, 𑀓𑀲𑁆𑀲𑀧𑀲𑁆𑀲 𑀉𑀧𑀸𑀲𑀓𑁄.

‘‘𑀯𑀺𑀭𑀢𑁄 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀩𑁆𑀭𑀳𑁆𑀫𑀘𑀸𑀭𑀻 𑀦𑀺𑀭𑀸𑀫𑀺𑀲𑁄;

𑀅𑀳𑀼𑀯𑀸 𑀢𑁂 𑀲𑀕𑀸𑀫𑁂𑀬𑁆𑀬𑁄, 𑀅𑀳𑀼𑀯𑀸 𑀢𑁂 𑀧𑀼𑀭𑁂 𑀲𑀔𑀸.

‘‘𑀲𑁄𑀳𑀫𑁂𑀢𑁂 𑀧𑀚𑀸𑀦𑀸𑀫𑀺, 𑀯𑀺𑀫𑀼𑀢𑁆𑀢𑁂 𑀲𑀢𑁆𑀢 𑀪𑀺𑀓𑁆𑀔𑀯𑁄;

𑀭𑀸𑀕𑀤𑁄𑀲𑀧𑀭𑀺𑀓𑁆𑀔𑀻𑀡𑁂, 𑀢𑀺𑀡𑁆𑀡𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

‘‘𑀏𑀯𑀫𑁂𑀢𑀁 𑀢𑀤𑀸 𑀆𑀲𑀺, 𑀬𑀣𑀸 𑀪𑀸𑀲𑀲𑀺 𑀪𑀕𑁆𑀕𑀯;

𑀓𑀼𑀫𑁆𑀪𑀓𑀸𑀭𑁄 𑀧𑀼𑀭𑁂 𑀆𑀲𑀺, 𑀯𑁂𑀓𑀴𑀺𑀗𑁆𑀕𑁂 𑀖𑀝𑀻𑀓𑀭𑁄;

𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑁄 𑀆𑀲𑀺, 𑀓𑀲𑁆𑀲𑀧𑀲𑁆𑀲 𑀉𑀧𑀸𑀲𑀓𑁄.

‘‘𑀯𑀺𑀭𑀢𑁄 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀩𑁆𑀭𑀳𑁆𑀫𑀘𑀸𑀭𑀻 𑀦𑀺𑀭𑀸𑀫𑀺𑀲𑁄;

𑀅𑀳𑀼𑀯𑀸 𑀫𑁂 𑀲𑀕𑀸𑀫𑁂𑀬𑁆𑀬𑁄, 𑀅𑀳𑀼𑀯𑀸 𑀫𑁂 𑀧𑀼𑀭𑁂 𑀲𑀔𑀸’’𑀢𑀺.

‘‘𑀏𑀯𑀫𑁂𑀢𑀁 𑀧𑀼𑀭𑀸𑀡𑀸𑀦𑀁, 𑀲𑀳𑀸𑀬𑀸𑀦𑀁 𑀅𑀳𑀼 𑀲𑀗𑁆𑀕𑀫𑁄;

𑀉𑀪𑀺𑀦𑁆𑀦𑀁 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀲𑀭𑀻𑀭𑀦𑁆𑀢𑀺𑀫𑀥𑀸𑀭𑀺𑀦’’𑀦𑁆𑀢𑀺.

𑀆𑀤𑀺𑀢𑁆𑀢𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀆𑀤𑀺𑀢𑁆𑀢𑀁 𑀓𑀺𑀁𑀤𑀤𑀁 𑀅𑀦𑁆𑀦𑀁, 𑀏𑀓𑀫𑀽𑀮𑀅𑀦𑁄𑀫𑀺𑀬𑀁;

𑀅𑀘𑁆𑀙𑀭𑀸𑀯𑀦𑀭𑁄𑀧𑀚𑁂𑀢𑀁, 𑀫𑀘𑁆𑀙𑀭𑁂𑀦 𑀖𑀝𑀻𑀓𑀭𑁄𑀢𑀺.