𑁯. 𑀧𑀞𑀫𑀧𑀚𑁆𑀚𑀼𑀦𑁆𑀦𑀥𑀻𑀢𑀼𑀲𑀼𑀢𑁆𑀢𑀁

𑁩𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀓𑁄𑀓𑀦𑀤𑀸 𑀧𑀚𑁆𑀚𑀼𑀦𑁆𑀦𑀲𑁆𑀲 𑀥𑀻𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀫𑀳𑀸𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀓𑁄𑀓𑀦𑀤𑀸 𑀧𑀚𑁆𑀚𑀼𑀦𑁆𑀦𑀲𑁆𑀲 𑀥𑀻𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀯𑁂𑀲𑀸𑀮𑀺𑀬𑀁 𑀯𑀦𑁂 𑀯𑀺𑀳𑀭𑀦𑁆𑀢𑀁, 𑀅𑀕𑁆𑀕𑀁 𑀲𑀢𑁆𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀁;

𑀓𑁄𑀓𑀦𑀤𑀸𑀳𑀫𑀲𑁆𑀫𑀺 𑀅𑀪𑀺𑀯𑀦𑁆𑀤𑁂, 𑀓𑁄𑀓𑀦𑀤𑀸 𑀧𑀚𑁆𑀚𑀼𑀦𑁆𑀦𑀲𑁆𑀲 𑀥𑀻𑀢𑀸.

‘‘𑀲𑀼𑀢𑀫𑁂𑀯 𑀧𑀼𑀭𑁂 𑀆𑀲𑀺, 𑀥𑀫𑁆𑀫𑁄 𑀘𑀓𑁆𑀔𑀼𑀫𑀢𑀸𑀦𑀼𑀩𑀼𑀤𑁆𑀥𑁄;

𑀲𑀸𑀳𑀁 𑀤𑀸𑀦𑀺 𑀲𑀓𑁆𑀔𑀺 𑀚𑀸𑀦𑀸𑀫𑀺, 𑀫𑀼𑀦𑀺𑀦𑁄 𑀤𑁂𑀲𑀬𑀢𑁄 𑀲𑀼𑀕𑀢𑀲𑁆𑀲.

‘‘𑀬𑁂 𑀓𑁂𑀘𑀺 𑀅𑀭𑀺𑀬𑀁 𑀥𑀫𑁆𑀫𑀁, 𑀯𑀺𑀕𑀭𑀳𑀦𑁆𑀢𑀸 𑀘𑀭𑀦𑁆𑀢𑀺 𑀤𑀼𑀫𑁆𑀫𑁂𑀥𑀸;

𑀉𑀧𑁂𑀦𑁆𑀢𑀺 𑀭𑁄𑀭𑀼𑀯𑀁 𑀖𑁄𑀭𑀁, 𑀘𑀺𑀭𑀭𑀢𑁆𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺.

‘‘𑀬𑁂 𑀘 𑀔𑁄 𑀅𑀭𑀺𑀬𑁂 𑀥𑀫𑁆𑀫𑁂, 𑀔𑀦𑁆𑀢𑀺𑀬𑀸 𑀉𑀧𑀲𑀫𑁂𑀦 𑀉𑀧𑁂𑀢𑀸;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺.