𑁧𑁦. 𑀤𑀼𑀢𑀺𑀬𑀧𑀚𑁆𑀚𑀼𑀦𑁆𑀦𑀥𑀻𑀢𑀼𑀲𑀼𑀢𑁆𑀢𑀁

𑁪𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀘𑀽𑀴𑀓𑁄𑀓𑀦𑀤𑀸 [𑀘𑀼𑀮𑁆𑀮𑀓𑁄𑀓𑀦𑀤𑀸 (𑀲𑀻. 𑀲𑁆𑀬𑀸. 𑀓𑀁.)] 𑀧𑀚𑁆𑀚𑀼𑀦𑁆𑀦𑀲𑁆𑀲 𑀥𑀻𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀫𑀳𑀸𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀘𑀽𑀴𑀓𑁄𑀓𑀦𑀤𑀸 𑀧𑀚𑁆𑀚𑀼𑀦𑁆𑀦𑀲𑁆𑀲 𑀥𑀻𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀇𑀥𑀸𑀕𑀫𑀸 𑀯𑀺𑀚𑁆𑀚𑀼𑀧𑀪𑀸𑀲𑀯𑀡𑁆𑀡𑀸, 𑀓𑁄𑀓𑀦𑀤𑀸 𑀧𑀚𑁆𑀚𑀼𑀦𑁆𑀦𑀲𑁆𑀲 𑀥𑀻𑀢𑀸;

𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀦𑀫𑀲𑁆𑀲𑀫𑀸𑀦𑀸, 𑀕𑀸𑀣𑀸𑀘𑀺𑀫𑀸 𑀅𑀢𑁆𑀣𑀯𑀢𑀻 𑀅𑀪𑀸𑀲𑀺.

‘‘𑀩𑀳𑀼𑀦𑀸𑀧𑀺 𑀔𑁄 𑀢𑀁 𑀯𑀺𑀪𑀚𑁂𑀬𑁆𑀬𑀁, 𑀧𑀭𑀺𑀬𑀸𑀬𑁂𑀦 𑀢𑀸𑀤𑀺𑀲𑁄 𑀥𑀫𑁆𑀫𑁄;

𑀲𑀁𑀔𑀺𑀢𑁆𑀢𑀫𑀢𑁆𑀣𑀁 [𑀲𑀁𑀔𑀺𑀢𑁆𑀢𑀫𑀢𑁆𑀢𑀁 (𑀓.)] 𑀮𑀧𑀬𑀺𑀲𑁆𑀲𑀸𑀫𑀺, 𑀬𑀸𑀯𑀢𑀸 𑀫𑁂 𑀫𑀦𑀲𑀸 𑀧𑀭𑀺𑀬𑀢𑁆𑀢𑀁.

‘‘𑀧𑀸𑀧𑀁 𑀦 𑀓𑀬𑀺𑀭𑀸 𑀯𑀘𑀲𑀸 𑀫𑀦𑀲𑀸,

𑀓𑀸𑀬𑁂𑀦 𑀯𑀸 𑀓𑀺𑀜𑁆𑀘𑀦 𑀲𑀩𑁆𑀩𑀮𑁄𑀓𑁂;

𑀓𑀸𑀫𑁂 𑀧𑀳𑀸𑀬 𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄,

𑀤𑀼𑀓𑁆𑀔𑀁 𑀦 𑀲𑁂𑀯𑁂𑀣 𑀅𑀦𑀢𑁆𑀣𑀲𑀁𑀳𑀺𑀢’’𑀦𑁆𑀢𑀺.

𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀩𑁆𑀪𑀺𑀫𑀘𑁆𑀙𑀭𑀺𑀦𑀸 𑀲𑀸𑀥𑀼, 𑀦 𑀲𑀦𑁆𑀢𑀼𑀚𑁆𑀛𑀸𑀦𑀲𑀜𑁆𑀜𑀺𑀦𑁄;

𑀲𑀤𑁆𑀥𑀸 𑀲𑀫𑀬𑁄 𑀲𑀓𑀮𑀺𑀓𑀁, 𑀉𑀪𑁄 𑀧𑀚𑁆𑀚𑀼𑀦𑁆𑀦𑀥𑀻𑀢𑀭𑁄𑀢𑀺.