𑁮. 𑀲𑀓𑀮𑀺𑀓𑀲𑀼𑀢𑁆𑀢𑀁

𑁩𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀫𑀤𑁆𑀤𑀓𑀼𑀘𑁆𑀙𑀺𑀲𑁆𑀫𑀺𑀁 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 [𑀲𑀓𑁆𑀔𑀮𑀺𑀓𑀸𑀬 (𑀓.)] 𑀔𑀢𑁄 𑀳𑁄𑀢𑀺. 𑀪𑀼𑀲𑀸 𑀲𑀼𑀤𑀁 𑀪𑀕𑀯𑀢𑁄 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 [𑀢𑀺𑀧𑁆𑀧𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀔𑀭𑀸 𑀓𑀝𑀼𑀓𑀸 𑀅𑀲𑀸𑀢𑀸 𑀅𑀫𑀦𑀸𑀧𑀸; 𑀢𑀸 𑀲𑀼𑀤𑀁 𑀪𑀕𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀢𑀺 𑀅𑀯𑀺𑀳𑀜𑁆𑀜𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄.

𑀅𑀣 𑀔𑁄 𑀲𑀢𑁆𑀢𑀲𑀢𑀸 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀸 𑀤𑁂𑀯𑀢𑀸𑀬𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀫𑀤𑁆𑀤𑀓𑀼𑀘𑁆𑀙𑀺𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀦𑀸𑀕𑁄 𑀯𑀢, 𑀪𑁄, 𑀲𑀫𑀡𑁄 𑀕𑁄𑀢𑀫𑁄; 𑀦𑀸𑀕𑀯𑀢𑀸 𑀘 𑀲𑀫𑀼𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀅𑀲𑀸𑀢𑀸 𑀅𑀫𑀦𑀸𑀧𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀢𑀺 𑀅𑀯𑀺𑀳𑀜𑁆𑀜𑀫𑀸𑀦𑁄’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀲𑀻𑀳𑁄 𑀯𑀢, 𑀪𑁄, 𑀲𑀫𑀡𑁄 𑀕𑁄𑀢𑀫𑁄; 𑀲𑀻𑀳𑀯𑀢𑀸 𑀘 𑀲𑀫𑀼𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀅𑀲𑀸𑀢𑀸 𑀅𑀫𑀦𑀸𑀧𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀢𑀺 𑀅𑀯𑀺𑀳𑀜𑁆𑀜𑀫𑀸𑀦𑁄’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀆𑀚𑀸𑀦𑀻𑀬𑁄 𑀯𑀢, 𑀪𑁄, 𑀲𑀫𑀡𑁄 𑀕𑁄𑀢𑀫𑁄; 𑀆𑀚𑀸𑀦𑀻𑀬𑀯𑀢𑀸 𑀘 𑀲𑀫𑀼𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀅𑀲𑀸𑀢𑀸 𑀅𑀫𑀦𑀸𑀧𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀢𑀺 𑀅𑀯𑀺𑀳𑀜𑁆𑀜𑀫𑀸𑀦𑁄’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀦𑀺𑀲𑀪𑁄 𑀯𑀢, 𑀪𑁄, 𑀲𑀫𑀡𑁄 𑀕𑁄𑀢𑀫𑁄; 𑀦𑀺𑀲𑀪𑀯𑀢𑀸 𑀘 𑀲𑀫𑀼𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀅𑀲𑀸𑀢𑀸 𑀅𑀫𑀦𑀸𑀧𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀢𑀺 𑀅𑀯𑀺𑀳𑀜𑁆𑀜𑀫𑀸𑀦𑁄’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀥𑁄𑀭𑀬𑁆𑀳𑁄 𑀯𑀢, 𑀪𑁄, 𑀲𑀫𑀡𑁄 𑀕𑁄𑀢𑀫𑁄; 𑀥𑁄𑀭𑀬𑁆𑀳𑀯𑀢𑀸 𑀘 𑀲𑀫𑀼𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀅𑀲𑀸𑀢𑀸 𑀅𑀫𑀦𑀸𑀧𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀢𑀺 𑀅𑀯𑀺𑀳𑀜𑁆𑀜𑀫𑀸𑀦𑁄’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀤𑀦𑁆𑀢𑁄 𑀯𑀢, 𑀪𑁄, 𑀲𑀫𑀡𑁄 𑀕𑁄𑀢𑀫𑁄; 𑀤𑀦𑁆𑀢𑀯𑀢𑀸 𑀘 𑀲𑀫𑀼𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀅𑀲𑀸𑀢𑀸 𑀅𑀫𑀦𑀸𑀧𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀢𑀺 𑀅𑀯𑀺𑀳𑀜𑁆𑀜𑀫𑀸𑀦𑁄’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀧𑀲𑁆𑀲 𑀲𑀫𑀸𑀥𑀺𑀁 𑀲𑀼𑀪𑀸𑀯𑀺𑀢𑀁 𑀘𑀺𑀢𑁆𑀢𑀜𑁆𑀘 𑀲𑀼𑀯𑀺𑀫𑀼𑀢𑁆𑀢𑀁, 𑀦 𑀘𑀸𑀪𑀺𑀦𑀢𑀁 𑀦 𑀘𑀸𑀧𑀦𑀢𑀁 𑀦 𑀘 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑀁 [𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀯𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀯𑀸𑀯𑀢𑀁 (𑀓.)]. 𑀬𑁄 𑀏𑀯𑀭𑀽𑀧𑀁 𑀧𑀼𑀭𑀺𑀲𑀦𑀸𑀕𑀁 𑀧𑀼𑀭𑀺𑀲𑀲𑀻𑀳𑀁 𑀧𑀼𑀭𑀺𑀲𑀆𑀚𑀸𑀦𑀻𑀬𑀁 𑀧𑀼𑀭𑀺𑀲𑀦𑀺𑀲𑀪𑀁 𑀧𑀼𑀭𑀺𑀲𑀥𑁄𑀭𑀬𑁆𑀳𑀁 𑀧𑀼𑀭𑀺𑀲𑀤𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬 𑀓𑀺𑀫𑀜𑁆𑀜𑀢𑁆𑀭 𑀅𑀤𑀲𑁆𑀲𑀦𑀸’’𑀢𑀺.

‘‘𑀧𑀜𑁆𑀘𑀯𑁂𑀤𑀸 𑀲𑀢𑀁 𑀲𑀫𑀁, 𑀢𑀧𑀲𑁆𑀲𑀻 𑀩𑁆𑀭𑀸𑀳𑁆𑀫𑀡𑀸 𑀘𑀭𑀁;

𑀘𑀺𑀢𑁆𑀢𑀜𑁆𑀘 𑀦𑁂𑀲𑀁 𑀦 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀁, 𑀳𑀻𑀦𑀢𑁆𑀣𑀭𑀽𑀧𑀸 𑀦 𑀧𑀸𑀭𑀗𑁆𑀕𑀫𑀸 𑀢𑁂.

‘‘𑀢𑀡𑁆𑀳𑀸𑀥𑀺𑀧𑀦𑁆𑀦𑀸 𑀯𑀢𑀲𑀻𑀮𑀩𑀤𑁆𑀥𑀸, 𑀮𑀽𑀔𑀁 𑀢𑀧𑀁 𑀯𑀲𑁆𑀲𑀲𑀢𑀁 𑀘𑀭𑀦𑁆𑀢𑀸;

𑀘𑀺𑀢𑁆𑀢𑀜𑁆𑀘 𑀦𑁂𑀲𑀁 𑀦 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀁, 𑀳𑀻𑀦𑀢𑁆𑀣𑀭𑀽𑀧𑀸 𑀦 𑀧𑀸𑀭𑀗𑁆𑀕𑀫𑀸 𑀢𑁂.

‘‘𑀦 𑀫𑀸𑀦𑀓𑀸𑀫𑀲𑁆𑀲 𑀤𑀫𑁄 𑀇𑀥𑀢𑁆𑀣𑀺, 𑀦 𑀫𑁄𑀦𑀫𑀢𑁆𑀣𑀺 𑀅𑀲𑀫𑀸𑀳𑀺𑀢𑀲𑁆𑀲;

𑀏𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀁 𑀧𑀫𑀢𑁆𑀢𑁄, 𑀦 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀢𑀭𑁂𑀬𑁆𑀬 𑀧𑀸𑀭’’𑀦𑁆𑀢𑀺.

‘‘𑀫𑀸𑀦𑀁 𑀧𑀳𑀸𑀬 𑀲𑀼𑀲𑀫𑀸𑀳𑀺𑀢𑀢𑁆𑀢𑁄, 𑀲𑀼𑀘𑁂𑀢𑀲𑁄 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄;

𑀏𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀫𑀧𑁆𑀧𑀫𑀢𑁆𑀢𑁄, 𑀲 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀢𑀭𑁂𑀬𑁆𑀬 𑀧𑀸𑀭’’𑀦𑁆𑀢𑀺.