𑁭. 𑀲𑀫𑀬𑀲𑀼𑀢𑁆𑀢𑀁

𑁩𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺; 𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀺 𑀤𑁂𑀯𑀢𑀸 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀅𑀣 𑀔𑁄 𑀘𑀢𑀼𑀦𑁆𑀦𑀁 𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀺𑀓𑀸𑀦𑀁 𑀤𑁂𑀯𑀢𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺; 𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀺 𑀤𑁂𑀯𑀢𑀸 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀬𑀁𑀦𑀽𑀦 𑀫𑀬𑀫𑁆𑀧𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀘𑁆𑀘𑁂𑀓𑀁 𑀕𑀸𑀣𑀁 [𑀧𑀘𑁆𑀘𑁂𑀓𑀕𑀸𑀣𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀸𑀲𑁂𑀬𑁆𑀬𑀸𑀫𑀸’’𑀢𑀺.

𑀅𑀣 𑀔𑁄 𑀢𑀸 𑀤𑁂𑀯𑀢𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬. 𑀏𑀯𑀫𑁂𑀯 𑁋 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀤𑁂𑀯𑁂𑀲𑀼 𑀅𑀦𑁆𑀢𑀭𑀳𑀺𑀢𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀣 𑀔𑁄 𑀢𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺𑀁, 𑀤𑁂𑀯𑀓𑀸𑀬𑀸 𑀲𑀫𑀸𑀕𑀢𑀸;

𑀆𑀕𑀢𑀫𑁆𑀳 𑀇𑀫𑀁 𑀥𑀫𑁆𑀫𑀲𑀫𑀬𑀁, 𑀤𑀓𑁆𑀔𑀺𑀢𑀸𑀬𑁂 𑀅𑀧𑀭𑀸𑀚𑀺𑀢𑀲𑀗𑁆𑀖’’𑀦𑁆𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀢𑁆𑀭 𑀪𑀺𑀓𑁆𑀔𑀯𑁄 𑀲𑀫𑀸𑀤𑀳𑀁𑀲𑀼, 𑀘𑀺𑀢𑁆𑀢𑀫𑀢𑁆𑀢𑀦𑁄 𑀉𑀚𑀼𑀓𑀁 𑀅𑀓𑀁𑀲𑀼 [𑀉𑀚𑀼𑀓𑀫𑀓𑀁𑀲𑀼 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀲𑀸𑀭𑀣𑀻𑀯 𑀦𑁂𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀙𑁂𑀢𑁆𑀯𑀸 𑀔𑀻𑀮𑀁 𑀙𑁂𑀢𑁆𑀯𑀸 𑀧𑀮𑀺𑀖𑀁, 𑀇𑀦𑁆𑀤𑀔𑀻𑀮𑀁 𑀊𑀳𑀘𑁆𑀘 𑀫𑀦𑁂𑀚𑀸;

𑀢𑁂 𑀘𑀭𑀦𑁆𑀢𑀺 𑀲𑀼𑀤𑁆𑀥𑀸 𑀯𑀺𑀫𑀮𑀸, 𑀘𑀓𑁆𑀔𑀼𑀫𑀢𑀸 𑀲𑀼𑀤𑀦𑁆𑀢𑀸 𑀲𑀼𑀲𑀼𑀦𑀸𑀕𑀸’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺.