𑁬. 𑀲𑀤𑁆𑀥𑀸𑀲𑀼𑀢𑁆𑀢𑀁

𑁩𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀸 𑀤𑁂𑀯𑀢𑀸𑀬𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀤𑁆𑀥𑀸 𑀤𑀼𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑁄𑀢𑀺,

𑀦𑁄 𑀘𑁂 𑀅𑀲𑁆𑀲𑀤𑁆𑀥𑀺𑀬𑀁 𑀅𑀯𑀢𑀺𑀝𑁆𑀞𑀢𑀺;

𑀬𑀲𑁄 𑀘 𑀓𑀺𑀢𑁆𑀢𑀻 𑀘 𑀢𑀢𑁆𑀯𑀲𑁆𑀲 𑀳𑁄𑀢𑀺,

𑀲𑀕𑁆𑀕𑀜𑁆𑀘 𑀲𑁄 𑀕𑀘𑁆𑀙𑀢𑀺 𑀲𑀭𑀻𑀭𑀁 𑀯𑀺𑀳𑀸𑀬𑀸’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀓𑁄𑀥𑀁 𑀚𑀳𑁂 𑀯𑀺𑀧𑁆𑀧𑀚𑀳𑁂𑀬𑁆𑀬 𑀫𑀸𑀦𑀁,

𑀲𑀁𑀬𑁄𑀚𑀦𑀁 𑀲𑀩𑁆𑀩𑀫𑀢𑀺𑀓𑁆𑀓𑀫𑁂𑀬𑁆𑀬;

𑀢𑀁 𑀦𑀸𑀫𑀭𑀽𑀧𑀲𑁆𑀫𑀺𑀫𑀲𑀚𑁆𑀚𑀫𑀸𑀦𑀁,

𑀅𑀓𑀺𑀜𑁆𑀘𑀦𑀁 𑀦𑀸𑀦𑀼𑀧𑀢𑀦𑁆𑀢𑀺 𑀲𑀗𑁆𑀕𑀸’’𑀢𑀺.

‘‘𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀩𑀸𑀮𑀸 𑀤𑀼𑀫𑁆𑀫𑁂𑀥𑀺𑀦𑁄 𑀚𑀦𑀸;

𑀅𑀧𑁆𑀧𑀫𑀸𑀤𑀜𑁆𑀘 𑀫𑁂𑀥𑀸𑀯𑀻, 𑀥𑀦𑀁 𑀲𑁂𑀝𑁆𑀞𑀁𑀯 𑀭𑀓𑁆𑀔𑀢𑀺.

‘‘𑀫𑀸 𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑁂𑀣, 𑀫𑀸 𑀓𑀸𑀫𑀭𑀢𑀺 𑀲𑀦𑁆𑀣𑀯𑀁;

𑀅𑀧𑁆𑀧𑀫𑀢𑁆𑀢𑁄 𑀳𑀺 𑀛𑀸𑀬𑀦𑁆𑀢𑁄, 𑀧𑀧𑁆𑀧𑁄𑀢𑀺 𑀧𑀭𑀫𑀁 𑀲𑀼𑀔’’𑀦𑁆𑀢𑀺.