𑁫. 𑀉𑀚𑁆𑀛𑀸𑀦𑀲𑀜𑁆𑀜𑀺𑀲𑀼𑀢𑁆𑀢𑀁

𑁩𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀉𑀚𑁆𑀛𑀸𑀦𑀲𑀜𑁆𑀜𑀺𑀓𑀸 𑀤𑁂𑀯𑀢𑀸𑀬𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑁂𑀳𑀸𑀲𑀁 𑀅𑀝𑁆𑀞𑀁𑀲𑀼. 𑀯𑁂𑀳𑀸𑀲𑀁 𑀞𑀺𑀢𑀸 𑀔𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀜𑁆𑀜𑀣𑀸 𑀲𑀦𑁆𑀢𑀫𑀢𑁆𑀢𑀸𑀦𑀁, 𑀅𑀜𑁆𑀜𑀣𑀸 𑀬𑁄 𑀧𑀯𑁂𑀤𑀬𑁂;

𑀦𑀺𑀓𑀘𑁆𑀘 𑀓𑀺𑀢𑀯𑀲𑁆𑀲𑁂𑀯, 𑀪𑀼𑀢𑁆𑀢𑀁 𑀣𑁂𑀬𑁆𑀬𑁂𑀦 𑀢𑀲𑁆𑀲 𑀢𑀁.

‘‘𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

‘‘𑀦 𑀬𑀺𑀤𑀁 𑀪𑀸𑀲𑀺𑀢𑀫𑀢𑁆𑀢𑁂𑀦, 𑀏𑀓𑀦𑁆𑀢𑀲𑀯𑀦𑁂𑀦 𑀯𑀸;

𑀅𑀦𑀼𑀓𑁆𑀓𑀫𑀺𑀢𑀯𑁂 𑀲𑀓𑁆𑀓𑀸, 𑀬𑀸𑀬𑀁 𑀧𑀝𑀺𑀧𑀤𑀸 𑀤𑀴𑁆𑀳𑀸;

𑀬𑀸𑀬 𑀥𑀻𑀭𑀸 𑀧𑀫𑀼𑀘𑁆𑀘𑀦𑁆𑀢𑀺, 𑀛𑀸𑀬𑀺𑀦𑁄 𑀫𑀸𑀭𑀩𑀦𑁆𑀥𑀦𑀸.

‘‘𑀦 𑀯𑁂 𑀥𑀻𑀭𑀸 𑀧𑀓𑀼𑀩𑁆𑀩𑀦𑁆𑀢𑀺, 𑀯𑀺𑀤𑀺𑀢𑁆𑀯𑀸 𑀮𑁄𑀓𑀧𑀭𑀺𑀬𑀸𑀬𑀁;

𑀅𑀜𑁆𑀜𑀸𑀬 𑀦𑀺𑀩𑁆𑀩𑀼𑀢𑀸 𑀥𑀻𑀭𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀅𑀣 𑀔𑁄 𑀢𑀸 𑀤𑁂𑀯𑀢𑀸𑀬𑁄 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀘𑁆𑀘𑀬𑁄 𑀦𑁄, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁 [𑀬𑀣𑀸𑀩𑀸𑀮𑀸 𑀬𑀣𑀸𑀫𑀽𑀴𑁆𑀳𑀸 𑀬𑀣𑀸𑀅𑀓𑀼𑀲𑀮𑀸 (𑀲𑀩𑁆𑀩𑀢𑁆𑀣)], 𑀬𑀸 𑀫𑀬𑀁 𑀪𑀕𑀯𑀦𑁆𑀢𑀁 𑀆𑀲𑀸𑀤𑁂𑀢𑀩𑁆𑀩𑀁 𑀅𑀫𑀜𑁆𑀜𑀺𑀫𑁆𑀳𑀸. 𑀢𑀸𑀲𑀁 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀅𑀣 𑀔𑁄 𑀢𑀸 𑀤𑁂𑀯𑀢𑀸𑀬𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀚𑁆𑀛𑀸𑀬𑀦𑁆𑀢𑀺𑀬𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀜𑁆𑀙𑀼𑀁. 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀘𑁆𑀘𑀬𑀁 𑀤𑁂𑀲𑀬𑀦𑁆𑀢𑀻𑀦𑀁, 𑀬𑁄 𑀘𑁂 𑀦 𑀧𑀝𑀺𑀕𑀡𑁆𑀳𑀢𑀺;

𑀓𑁄𑀧𑀦𑁆𑀢𑀭𑁄 𑀤𑁄𑀲𑀕𑀭𑀼, 𑀲 𑀯𑁂𑀭𑀁 𑀧𑀝𑀺𑀫𑀼𑀜𑁆𑀘𑀢𑀻’’𑀢𑀺.

‘‘𑀅𑀘𑁆𑀘𑀬𑁄 𑀘𑁂 𑀦 𑀯𑀺𑀚𑁆𑀚𑁂𑀣, 𑀦𑁄𑀘𑀺𑀥𑀸𑀧𑀕𑀢𑀁 [𑀦𑁄𑀘𑀻𑀥 𑀅𑀧𑀳𑀢𑀁 (𑀲𑁆𑀬𑀸. 𑀓𑀁.), 𑀦𑁄𑀘𑀺𑀥𑀸𑀧𑀓𑀢𑀁 (?)] 𑀲𑀺𑀬𑀸;

𑀯𑁂𑀭𑀸𑀦𑀺 𑀦 𑀘 𑀲𑀫𑁆𑀫𑁂𑀬𑁆𑀬𑀼𑀁, 𑀓𑁂𑀦𑀻𑀥 [𑀯𑁂𑀭𑀸𑀦𑀺 𑀘 𑀲𑀫𑁆𑀫𑁂𑀬𑁆𑀬𑀼𑀁, 𑀢𑁂𑀦𑀺𑀥 (𑀲𑀻.)] 𑀓𑀼𑀲𑀮𑁄 𑀲𑀺𑀬𑀸’’𑀢𑀺.

‘‘𑀓𑀲𑁆𑀲𑀘𑁆𑀘𑀬𑀸 𑀦 𑀯𑀺𑀚𑁆𑀚𑀦𑁆𑀢𑀺, 𑀓𑀲𑁆𑀲 𑀦𑀢𑁆𑀣𑀺 𑀅𑀧𑀸𑀕𑀢𑀁;

𑀓𑁄 𑀦 𑀲𑀫𑁆𑀫𑁄𑀳𑀫𑀸𑀧𑀸𑀤𑀺, 𑀓𑁄 𑀘 𑀥𑀻𑀭𑁄 [𑀓𑁄𑀥 𑀥𑀻𑀭𑁄 (𑀲𑁆𑀬𑀸. 𑀓𑀁.)] 𑀲𑀤𑀸 𑀲𑀢𑁄’’𑀢𑀺.

‘‘𑀢𑀣𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄;

𑀢𑀲𑁆𑀲𑀘𑁆𑀘𑀬𑀸 𑀦 𑀯𑀺𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀦𑀢𑁆𑀣𑀺 𑀅𑀧𑀸𑀕𑀢𑀁;

𑀲𑁄 𑀦 𑀲𑀫𑁆𑀫𑁄𑀳𑀫𑀸𑀧𑀸𑀤𑀺, 𑀲𑁄𑀯 [𑀲𑁄𑀥 (𑀲𑁆𑀬𑀸. 𑀓𑀁.)] 𑀥𑀻𑀭𑁄 𑀲𑀤𑀸 𑀲𑀢𑁄’’𑀢𑀺.

‘‘𑀅𑀘𑁆𑀘𑀬𑀁 𑀤𑁂𑀲𑀬𑀦𑁆𑀢𑀻𑀦𑀁, 𑀬𑁄 𑀘𑁂 𑀦 𑀧𑀝𑀺𑀕𑀡𑁆𑀳𑀢𑀺;

𑀓𑁄𑀧𑀦𑁆𑀢𑀭𑁄 𑀤𑁄𑀲𑀕𑀭𑀼, 𑀲 𑀯𑁂𑀭𑀁 𑀧𑀝𑀺𑀫𑀼𑀜𑁆𑀘𑀢𑀺;

𑀢𑀁 𑀯𑁂𑀭𑀁 𑀦𑀸𑀪𑀺𑀦𑀦𑁆𑀤𑀸𑀫𑀺, 𑀧𑀝𑀺𑀕𑁆𑀕𑀡𑁆𑀳𑀸𑀫𑀺 𑀯𑁄𑀘𑁆𑀘𑀬’’𑀦𑁆𑀢𑀺.