𑁪. 𑀦𑀲𑀦𑁆𑀢𑀺𑀲𑀼𑀢𑁆𑀢𑀁

𑁩𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀸 𑀤𑁂𑀯𑀢𑀸𑀬𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦 𑀲𑀦𑁆𑀢𑀺 𑀓𑀸𑀫𑀸 𑀫𑀦𑀼𑀚𑁂𑀲𑀼 𑀦𑀺𑀘𑁆𑀘𑀸,

𑀲𑀦𑁆𑀢𑀻𑀥 𑀓𑀫𑀦𑀻𑀬𑀸𑀦𑀺 𑀬𑁂𑀲𑀼 [𑀓𑀸𑀫𑁂𑀲𑀼 (𑀓.)] 𑀩𑀤𑁆𑀥𑁄;

𑀬𑁂𑀲𑀼 𑀧𑀫𑀢𑁆𑀢𑁄 𑀅𑀧𑀼𑀦𑀸𑀕𑀫𑀦𑀁,

𑀅𑀦𑀸𑀕𑀦𑁆𑀢𑀸 𑀧𑀼𑀭𑀺𑀲𑁄 𑀫𑀘𑁆𑀘𑀼𑀥𑁂𑀬𑁆𑀬𑀸’’𑀢𑀺.

‘‘𑀙𑀦𑁆𑀤𑀚𑀁 𑀅𑀖𑀁 𑀙𑀦𑁆𑀤𑀚𑀁 𑀤𑀼𑀓𑁆𑀔𑀁;

𑀙𑀦𑁆𑀤𑀯𑀺𑀦𑀬𑀸 𑀅𑀖𑀯𑀺𑀦𑀬𑁄;

𑀅𑀖𑀯𑀺𑀦𑀬𑀸 𑀤𑀼𑀓𑁆𑀔𑀯𑀺𑀦𑀬𑁄’’𑀢𑀺.

‘‘𑀦 𑀢𑁂 𑀓𑀸𑀫𑀸 𑀬𑀸𑀦𑀺 𑀘𑀺𑀢𑁆𑀭𑀸𑀦𑀺 𑀮𑁄𑀓𑁂,

𑀲𑀗𑁆𑀓𑀧𑁆𑀧𑀭𑀸𑀕𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄;

𑀢𑀺𑀝𑁆𑀞𑀦𑁆𑀢𑀺 𑀘𑀺𑀢𑁆𑀭𑀸𑀦𑀺 𑀢𑀣𑁂𑀯 𑀮𑁄𑀓𑁂,

𑀅𑀣𑁂𑀢𑁆𑀣 𑀥𑀻𑀭𑀸 𑀯𑀺𑀦𑀬𑀦𑁆𑀢𑀺 𑀙𑀦𑁆𑀤𑀁.

‘‘𑀓𑁄𑀥𑀁 𑀚𑀳𑁂 𑀯𑀺𑀧𑁆𑀧𑀚𑀳𑁂𑀬𑁆𑀬 𑀫𑀸𑀦𑀁,

𑀲𑀁𑀬𑁄𑀚𑀦𑀁 𑀲𑀩𑁆𑀩𑀫𑀢𑀺𑀓𑁆𑀓𑀫𑁂𑀬𑁆𑀬;

𑀢𑀁 𑀦𑀸𑀫𑀭𑀽𑀧𑀲𑁆𑀫𑀺𑀫𑀲𑀚𑁆𑀚𑀫𑀸𑀦𑀁,

𑀅𑀓𑀺𑀜𑁆𑀘𑀦𑀁 𑀦𑀸𑀦𑀼𑀧𑀢𑀦𑁆𑀢𑀺 𑀤𑀼𑀓𑁆𑀔𑀸.

‘‘𑀧𑀳𑀸𑀲𑀺 𑀲𑀗𑁆𑀔𑀁 𑀦 𑀯𑀺𑀫𑀸𑀦𑀫𑀚𑁆𑀛𑀕𑀸 [𑀦 𑀘 𑀫𑀸𑀦𑀫𑀚𑁆𑀛𑀕𑀸 (𑀓. 𑀲𑀻.), 𑀦 𑀯𑀺𑀫𑀸𑀦𑀫𑀸𑀕𑀸 (𑀲𑁆𑀬𑀸. 𑀓𑀁.)],

𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁 𑀇𑀥 𑀦𑀸𑀫𑀭𑀽𑀧𑁂;

𑀢𑀁 𑀙𑀺𑀦𑁆𑀦𑀕𑀦𑁆𑀣𑀁 𑀅𑀦𑀺𑀖𑀁 𑀦𑀺𑀭𑀸𑀲𑀁,

𑀧𑀭𑀺𑀬𑁂𑀲𑀫𑀸𑀦𑀸 𑀦𑀸𑀚𑁆𑀛𑀕𑀫𑀼𑀁;

𑀤𑁂𑀯𑀸 𑀫𑀦𑀼𑀲𑁆𑀲𑀸 𑀇𑀥 𑀯𑀸 𑀳𑀼𑀭𑀁 𑀯𑀸,

𑀲𑀕𑁆𑀕𑁂𑀲𑀼 𑀯𑀸 𑀲𑀩𑁆𑀩𑀦𑀺𑀯𑁂𑀲𑀦𑁂𑀲𑀽’’𑀢𑀺.

‘‘𑀢𑀁 𑀘𑁂 𑀳𑀺 𑀦𑀸𑀤𑁆𑀤𑀓𑁆𑀔𑀼𑀁 𑀢𑀣𑀸𑀯𑀺𑀫𑀼𑀢𑁆𑀢𑀁 (𑀇𑀘𑁆𑀘𑀸𑀬𑀲𑁆𑀫𑀸 𑀫𑁄𑀖𑀭𑀸𑀚𑀸),

𑀤𑁂𑀯𑀸 𑀫𑀦𑀼𑀲𑁆𑀲𑀸 𑀇𑀥 𑀯𑀸 𑀳𑀼𑀭𑀁 𑀯𑀸;

𑀦𑀭𑀼𑀢𑁆𑀢𑀫𑀁 𑀅𑀢𑁆𑀣𑀘𑀭𑀁 𑀦𑀭𑀸𑀦𑀁,

𑀬𑁂 𑀢𑀁 𑀦𑀫𑀲𑁆𑀲𑀦𑁆𑀢𑀺 𑀧𑀲𑀁𑀲𑀺𑀬𑀸 𑀢𑁂’’𑀢𑀺.

‘‘𑀧𑀲𑀁𑀲𑀺𑀬𑀸 𑀢𑁂𑀧𑀺 𑀪𑀯𑀦𑁆𑀢𑀺 𑀪𑀺𑀓𑁆𑀔𑀽 (𑀫𑁄𑀖𑀭𑀸𑀚𑀸𑀢𑀺 𑀪𑀕𑀯𑀸),

𑀬𑁂 𑀢𑀁 𑀦𑀫𑀲𑁆𑀲𑀦𑁆𑀢𑀺 𑀢𑀣𑀸𑀯𑀺𑀫𑀼𑀢𑁆𑀢𑀁;

𑀅𑀜𑁆𑀜𑀸𑀬 𑀥𑀫𑁆𑀫𑀁 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬,

𑀲𑀗𑁆𑀕𑀸𑀢𑀺𑀕𑀸 𑀢𑁂𑀧𑀺 𑀪𑀯𑀦𑁆𑀢𑀺 𑀪𑀺𑀓𑁆𑀔𑀽’’𑀢𑀺.