𑁩. 𑀲𑀸𑀥𑀼𑀲𑀼𑀢𑁆𑀢𑀁

𑁩𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀸 𑀤𑁂𑀯𑀢𑀸𑀬𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀸𑀥𑀼 𑀔𑁄, 𑀫𑀸𑀭𑀺𑀲, 𑀤𑀸𑀦𑀁;

𑀫𑀘𑁆𑀙𑁂𑀭𑀸 𑀘 𑀧𑀫𑀸𑀤𑀸 𑀘, 𑀏𑀯𑀁 𑀤𑀸𑀦𑀁 𑀦 𑀤𑀻𑀬𑀢𑀺;

𑀧𑀼𑀜𑁆𑀜𑀁 𑀆𑀓𑀗𑁆𑀔𑀫𑀸𑀦𑁂𑀦, 𑀤𑁂𑀬𑁆𑀬𑀁 𑀳𑁄𑀢𑀺 𑀯𑀺𑀚𑀸𑀦𑀢𑀸’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀸𑀥𑀼 𑀔𑁄, 𑀫𑀸𑀭𑀺𑀲, 𑀤𑀸𑀦𑀁;

𑀅𑀧𑀺 𑀘 𑀅𑀧𑁆𑀧𑀓𑀲𑁆𑀫𑀺𑀫𑁆𑀧𑀺 𑀲𑀸𑀳𑀼 𑀤𑀸𑀦𑀁’’.

‘‘𑀅𑀧𑁆𑀧𑀲𑁆𑀫𑁂𑀓𑁂 𑀧𑀯𑁂𑀘𑁆𑀙𑀦𑁆𑀢𑀺, 𑀩𑀳𑀼𑀦𑁂𑀓𑁂 𑀦 𑀤𑀺𑀘𑁆𑀙𑀭𑁂;

𑀅𑀧𑁆𑀧𑀲𑁆𑀫𑀸 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀲𑀳𑀲𑁆𑀲𑁂𑀦 𑀲𑀫𑀁 𑀫𑀺𑀢𑀸’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀸𑀥𑀼 𑀔𑁄, 𑀫𑀸𑀭𑀺𑀲, 𑀤𑀸𑀦𑀁; 𑀅𑀧𑁆𑀧𑀓𑀲𑁆𑀫𑀺𑀫𑁆𑀧𑀺 𑀲𑀸𑀳𑀼 𑀤𑀸𑀦𑀁;

𑀅𑀧𑀺 𑀘 𑀲𑀤𑁆𑀥𑀸𑀬𑀧𑀺 𑀲𑀸𑀳𑀼 𑀤𑀸𑀦𑀁’’.

‘‘𑀤𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘 𑀲𑀫𑀸𑀦𑀫𑀸𑀳𑀼,

𑀅𑀧𑁆𑀧𑀸𑀧𑀺 𑀲𑀦𑁆𑀢𑀸 𑀩𑀳𑀼𑀓𑁂 𑀚𑀺𑀦𑀦𑁆𑀢𑀺;

𑀅𑀧𑁆𑀧𑀫𑁆𑀧𑀺 𑀘𑁂 𑀲𑀤𑁆𑀤𑀳𑀸𑀦𑁄 𑀤𑀤𑀸𑀢𑀺,

𑀢𑁂𑀦𑁂𑀯 𑀲𑁄 𑀳𑁄𑀢𑀺 𑀲𑀼𑀔𑀻 𑀧𑀭𑀢𑁆𑀣𑀸’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀸𑀥𑀼 𑀔𑁄, 𑀫𑀸𑀭𑀺𑀲, 𑀤𑀸𑀦𑀁; 𑀅𑀧𑁆𑀧𑀓𑀲𑁆𑀫𑀺𑀫𑁆𑀧𑀺 𑀲𑀸𑀳𑀼 𑀤𑀸𑀦𑀁;

𑀲𑀤𑁆𑀥𑀸𑀬𑀧𑀺 𑀲𑀸𑀳𑀼 𑀤𑀸𑀦𑀁; 𑀅𑀧𑀺 𑀘 𑀥𑀫𑁆𑀫𑀮𑀤𑁆𑀥𑀲𑁆𑀲𑀸𑀧𑀺 𑀲𑀸𑀳𑀼 𑀤𑀸𑀦𑀁’’.

‘‘𑀬𑁄 𑀥𑀫𑁆𑀫𑀮𑀤𑁆𑀥𑀲𑁆𑀲 𑀤𑀤𑀸𑀢𑀺 𑀤𑀸𑀦𑀁,

𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑀲𑁆𑀲 𑀚𑀦𑁆𑀢𑀼;

𑀅𑀢𑀺𑀓𑁆𑀓𑀫𑁆𑀫 𑀲𑁄 𑀯𑁂𑀢𑀭𑀡𑀺𑀁 𑀬𑀫𑀲𑁆𑀲,

𑀤𑀺𑀩𑁆𑀩𑀸𑀦𑀺 𑀞𑀸𑀦𑀸𑀦𑀺 𑀉𑀧𑁂𑀢𑀺 𑀫𑀘𑁆𑀘𑁄’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀸𑀥𑀼 𑀔𑁄, 𑀫𑀸𑀭𑀺𑀲, 𑀤𑀸𑀦𑀁; 𑀅𑀧𑁆𑀧𑀓𑀲𑁆𑀫𑀺𑀫𑁆𑀧𑀺 𑀲𑀸𑀳𑀼 𑀤𑀸𑀦𑀁;

𑀲𑀤𑁆𑀥𑀸𑀬𑀧𑀺 𑀲𑀸𑀳𑀼 𑀤𑀸𑀦𑀁; 𑀥𑀫𑁆𑀫𑀮𑀤𑁆𑀥𑀲𑁆𑀲𑀸𑀧𑀺 𑀲𑀸𑀳𑀼 𑀤𑀸𑀦𑀁;

𑀅𑀧𑀺 𑀘 𑀯𑀺𑀘𑁂𑀬𑁆𑀬 𑀤𑀸𑀦𑀫𑁆𑀧𑀺 𑀲𑀸𑀳𑀼 𑀤𑀸𑀦𑀁’’.

‘‘𑀯𑀺𑀘𑁂𑀬𑁆𑀬 𑀤𑀸𑀦𑀁 𑀲𑀼𑀕𑀢𑀧𑁆𑀧𑀲𑀢𑁆𑀣𑀁,

𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀇𑀥 𑀚𑀻𑀯𑀮𑁄𑀓𑁂;

𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀺,

𑀩𑀻𑀚𑀸𑀦𑀺 𑀯𑀼𑀢𑁆𑀢𑀸𑀦𑀺 𑀬𑀣𑀸 𑀲𑀼𑀔𑁂𑀢𑁆𑀢𑁂’’𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀸𑀥𑀼 𑀔𑁄, 𑀫𑀸𑀭𑀺𑀲, 𑀤𑀸𑀦𑀁; 𑀅𑀧𑁆𑀧𑀓𑀲𑁆𑀫𑀺𑀫𑁆𑀧𑀺 𑀲𑀸𑀳𑀼 𑀤𑀸𑀦𑀁;

𑀲𑀤𑁆𑀥𑀸𑀬𑀧𑀺 𑀲𑀸𑀳𑀼 𑀤𑀸𑀦𑀁; 𑀥𑀫𑁆𑀫𑀮𑀤𑁆𑀥𑀲𑁆𑀲𑀸𑀧𑀺 𑀲𑀸𑀳𑀼 𑀤𑀸𑀦𑀁;

𑀯𑀺𑀘𑁂𑀬𑁆𑀬 𑀤𑀸𑀦𑀫𑁆𑀧𑀺 𑀲𑀸𑀳𑀼 𑀤𑀸𑀦𑀁; 𑀅𑀧𑀺 𑀘 𑀧𑀸𑀡𑁂𑀲𑀼𑀧𑀺 𑀲𑀸𑀥𑀼 𑀲𑀁𑀬𑀫𑁄’’.

‘‘𑀬𑁄 𑀧𑀸𑀡𑀪𑀽𑀢𑀸𑀦𑀺 [𑀧𑀸𑀡𑀪𑀽𑀢𑁂𑀲𑀼 (𑀲𑀻. 𑀧𑀻.)] 𑀅𑀳𑁂𑀞𑀬𑀁 𑀘𑀭𑀁,

𑀧𑀭𑀽𑀧𑀯𑀸𑀤𑀸 𑀦 𑀓𑀭𑁄𑀦𑁆𑀢𑀺 𑀧𑀸𑀧𑀁;

𑀪𑀻𑀭𑀼𑀁 𑀧𑀲𑀁𑀲𑀦𑁆𑀢𑀺 𑀦 𑀳𑀺 𑀢𑀢𑁆𑀣 𑀲𑀽𑀭𑀁,

𑀪𑀬𑀸 𑀳𑀺 𑀲𑀦𑁆𑀢𑁄 𑀦 𑀓𑀭𑁄𑀦𑁆𑀢𑀺 𑀧𑀸𑀧’’𑀦𑁆𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀲𑁆𑀲 𑀦𑀼 𑀔𑁄, 𑀪𑀕𑀯𑀸, 𑀲𑀼𑀪𑀸𑀲𑀺𑀢’’𑀦𑁆𑀢𑀺?

‘‘𑀲𑀩𑁆𑀩𑀸𑀲𑀁 𑀯𑁄 𑀲𑀼𑀪𑀸𑀲𑀺𑀢𑀁 𑀧𑀭𑀺𑀬𑀸𑀬𑁂𑀦, 𑀅𑀧𑀺 𑀘 𑀫𑀫𑀧𑀺 𑀲𑀼𑀡𑀸𑀣 𑁋

‘‘𑀲𑀤𑁆𑀥𑀸 𑀳𑀺 𑀤𑀸𑀦𑀁 𑀩𑀳𑀼𑀥𑀸 𑀧𑀲𑀢𑁆𑀣𑀁,

𑀤𑀸𑀦𑀸 𑀘 𑀔𑁄 𑀥𑀫𑁆𑀫𑀧𑀤𑀁𑀯 𑀲𑁂𑀬𑁆𑀬𑁄;

𑀧𑀼𑀩𑁆𑀩𑁂 𑀘 𑀳𑀺 𑀧𑀼𑀩𑁆𑀩𑀢𑀭𑁂 𑀘 𑀲𑀦𑁆𑀢𑁄,

𑀦𑀺𑀩𑁆𑀩𑀸𑀦𑀫𑁂𑀯𑀚𑁆𑀛𑀕𑀫𑀼𑀁 𑀲𑀧𑀜𑁆𑀜𑀸’’𑀢𑀺.