𑁫. 𑀅𑀭𑀳𑀦𑁆𑀢𑀲𑀼𑀢𑁆𑀢𑀁

𑁨𑁫. ‘‘𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀭𑀳𑀁 𑀓𑀢𑀸𑀯𑀻,

𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻;

𑀅𑀳𑀁 𑀯𑀤𑀸𑀫𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬,

𑀫𑀫𑀁 𑀯𑀤𑀦𑁆𑀢𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬𑀸’’𑀢𑀺.

‘‘𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀭𑀳𑀁 𑀓𑀢𑀸𑀯𑀻,

𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻;

𑀅𑀳𑀁 𑀯𑀤𑀸𑀫𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬,

𑀫𑀫𑀁 𑀯𑀤𑀦𑁆𑀢𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬;

𑀮𑁄𑀓𑁂 𑀲𑀫𑀜𑁆𑀜𑀁 𑀓𑀼𑀲𑀮𑁄 𑀯𑀺𑀤𑀺𑀢𑁆𑀯𑀸,

𑀯𑁄𑀳𑀸𑀭𑀫𑀢𑁆𑀢𑁂𑀦 𑀲𑁄 [𑀲 (?)] 𑀯𑁄𑀳𑀭𑁂𑀬𑁆𑀬𑀸’’𑀢𑀺.

‘‘𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀭𑀳𑀁 𑀓𑀢𑀸𑀯𑀻,

𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻;

𑀫𑀸𑀦𑀁 𑀦𑀼 𑀔𑁄 𑀲𑁄 𑀉𑀧𑀕𑀫𑁆𑀫 𑀪𑀺𑀓𑁆𑀔𑀼,

𑀅𑀳𑀁 𑀯𑀤𑀸𑀫𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬;

𑀫𑀫𑀁 𑀯𑀤𑀦𑁆𑀢𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬𑀸’’𑀢𑀺.

‘‘𑀧𑀳𑀻𑀦𑀫𑀸𑀦𑀲𑁆𑀲 𑀦 𑀲𑀦𑁆𑀢𑀺 𑀕𑀦𑁆𑀣𑀸,

𑀯𑀺𑀥𑀽𑀧𑀺𑀢𑀸 𑀫𑀸𑀦𑀕𑀦𑁆𑀣𑀲𑁆𑀲 𑀲𑀩𑁆𑀩𑁂;

𑀲 𑀯𑀻𑀢𑀺𑀯𑀢𑁆𑀢𑁄 𑀫𑀜𑁆𑀜𑀢𑀁 [𑀫𑀸𑀦𑀦𑀁 (𑀲𑀻.), 𑀫𑀜𑁆𑀜𑀻𑀢𑀁 (?)] 𑀲𑀼𑀫𑁂𑀥𑁄,

𑀅𑀳𑀁 𑀯𑀤𑀸𑀫𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬.

‘‘𑀫𑀫𑀁 𑀯𑀤𑀦𑁆𑀢𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬;

𑀮𑁄𑀓𑁂 𑀲𑀫𑀜𑁆𑀜𑀁 𑀓𑀼𑀲𑀮𑁄 𑀯𑀺𑀤𑀺𑀢𑁆𑀯𑀸;

𑀯𑁄𑀳𑀸𑀭𑀫𑀢𑁆𑀢𑁂𑀦 𑀲𑁄 𑀯𑁄𑀳𑀭𑁂𑀬𑁆𑀬𑀸’’𑀢𑀺.