𑁩. 𑀲𑀢𑁆𑀢𑀺𑀯𑀕𑁆𑀕𑁄

𑁧. 𑀲𑀢𑁆𑀢𑀺𑀲𑀼𑀢𑁆𑀢𑀁

𑁨𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 [𑀟𑀬𑁆𑀳𑀫𑀸𑀦𑁂𑀯 (𑀲𑀩𑁆𑀩𑀢𑁆𑀣)] 𑀫𑀢𑁆𑀣𑀓𑁂;

𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑁨. 𑀨𑀼𑀲𑀢𑀺𑀲𑀼𑀢𑁆𑀢𑀁

𑁨𑁨. ‘‘𑀦𑀸𑀨𑀼𑀲𑀦𑁆𑀢𑀁 𑀨𑀼𑀲𑀢𑀺 𑀘, 𑀨𑀼𑀲𑀦𑁆𑀢𑀜𑁆𑀘 𑀢𑀢𑁄 𑀨𑀼𑀲𑁂;

𑀢𑀲𑁆𑀫𑀸 𑀨𑀼𑀲𑀦𑁆𑀢𑀁 𑀨𑀼𑀲𑀢𑀺, 𑀅𑀧𑁆𑀧𑀤𑀼𑀝𑁆𑀞𑀧𑀤𑁄𑀲𑀺𑀦’’𑀦𑁆𑀢𑀺.

‘‘𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺,

𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁,

𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄’’𑀢𑀺.

𑁩. 𑀚𑀝𑀸𑀲𑀼𑀢𑁆𑀢𑀁

𑁨𑁩. ‘‘𑀅𑀦𑁆𑀢𑁄 𑀚𑀝𑀸 𑀩𑀳𑀺 𑀚𑀝𑀸, 𑀚𑀝𑀸𑀬 𑀚𑀝𑀺𑀢𑀸 𑀧𑀚𑀸;

𑀢𑀁 𑀢𑀁 𑀕𑁄𑀢𑀫 𑀧𑀼𑀘𑁆𑀙𑀸𑀫𑀺, 𑀓𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺.

‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀁.

‘‘𑀬𑁂𑀲𑀁 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀢𑁂𑀲𑀁 𑀯𑀺𑀚𑀝𑀺𑀢𑀸 𑀚𑀝𑀸.

‘‘𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀧𑀝𑀺𑀖𑀁 𑀭𑀽𑀧𑀲𑀜𑁆𑀜𑀸 𑀘, 𑀏𑀢𑁆𑀣𑁂𑀲𑀸 𑀙𑀺𑀚𑁆𑀚𑀢𑁂 [𑀯𑀺𑀚𑀝𑁂 (𑀓.)] 𑀚𑀝𑀸’’𑀢𑀺.

𑁪. 𑀫𑀦𑁄𑀦𑀺𑀯𑀸𑀭𑀡𑀲𑀼𑀢𑁆𑀢𑀁

𑁨𑁪. ‘‘𑀬𑀢𑁄 𑀬𑀢𑁄 𑀫𑀦𑁄 𑀦𑀺𑀯𑀸𑀭𑀬𑁂,

𑀦 𑀤𑀼𑀓𑁆𑀔𑀫𑁂𑀢𑀺 𑀦𑀁 𑀢𑀢𑁄 𑀢𑀢𑁄;

𑀲 𑀲𑀩𑁆𑀩𑀢𑁄 𑀫𑀦𑁄 𑀦𑀺𑀯𑀸𑀭𑀬𑁂,

𑀲 𑀲𑀩𑁆𑀩𑀢𑁄 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺’’.

‘‘𑀦 𑀲𑀩𑁆𑀩𑀢𑁄 𑀫𑀦𑁄 𑀦𑀺𑀯𑀸𑀭𑀬𑁂,

𑀦 𑀫𑀦𑁄 𑀲𑀁𑀬𑀢𑀢𑁆𑀢𑀫𑀸𑀕𑀢𑀁;

𑀬𑀢𑁄 𑀬𑀢𑁄 𑀘 𑀧𑀸𑀧𑀓𑀁,

𑀢𑀢𑁄 𑀢𑀢𑁄 𑀫𑀦𑁄 𑀦𑀺𑀯𑀸𑀭𑀬𑁂’’𑀢𑀺.

𑁫. 𑀅𑀭𑀳𑀦𑁆𑀢𑀲𑀼𑀢𑁆𑀢𑀁

𑁨𑁫. ‘‘𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀭𑀳𑀁 𑀓𑀢𑀸𑀯𑀻,

𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻;

𑀅𑀳𑀁 𑀯𑀤𑀸𑀫𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬,

𑀫𑀫𑀁 𑀯𑀤𑀦𑁆𑀢𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬𑀸’’𑀢𑀺.

‘‘𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀭𑀳𑀁 𑀓𑀢𑀸𑀯𑀻,

𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻;

𑀅𑀳𑀁 𑀯𑀤𑀸𑀫𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬,

𑀫𑀫𑀁 𑀯𑀤𑀦𑁆𑀢𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬;

𑀮𑁄𑀓𑁂 𑀲𑀫𑀜𑁆𑀜𑀁 𑀓𑀼𑀲𑀮𑁄 𑀯𑀺𑀤𑀺𑀢𑁆𑀯𑀸,

𑀯𑁄𑀳𑀸𑀭𑀫𑀢𑁆𑀢𑁂𑀦 𑀲𑁄 [𑀲 (?)] 𑀯𑁄𑀳𑀭𑁂𑀬𑁆𑀬𑀸’’𑀢𑀺.

‘‘𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀭𑀳𑀁 𑀓𑀢𑀸𑀯𑀻,

𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻;

𑀫𑀸𑀦𑀁 𑀦𑀼 𑀔𑁄 𑀲𑁄 𑀉𑀧𑀕𑀫𑁆𑀫 𑀪𑀺𑀓𑁆𑀔𑀼,

𑀅𑀳𑀁 𑀯𑀤𑀸𑀫𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬;

𑀫𑀫𑀁 𑀯𑀤𑀦𑁆𑀢𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬𑀸’’𑀢𑀺.

‘‘𑀧𑀳𑀻𑀦𑀫𑀸𑀦𑀲𑁆𑀲 𑀦 𑀲𑀦𑁆𑀢𑀺 𑀕𑀦𑁆𑀣𑀸,

𑀯𑀺𑀥𑀽𑀧𑀺𑀢𑀸 𑀫𑀸𑀦𑀕𑀦𑁆𑀣𑀲𑁆𑀲 𑀲𑀩𑁆𑀩𑁂;

𑀲 𑀯𑀻𑀢𑀺𑀯𑀢𑁆𑀢𑁄 𑀫𑀜𑁆𑀜𑀢𑀁 [𑀫𑀸𑀦𑀦𑀁 (𑀲𑀻.), 𑀫𑀜𑁆𑀜𑀻𑀢𑀁 (?)] 𑀲𑀼𑀫𑁂𑀥𑁄,

𑀅𑀳𑀁 𑀯𑀤𑀸𑀫𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬.

‘‘𑀫𑀫𑀁 𑀯𑀤𑀦𑁆𑀢𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬;

𑀮𑁄𑀓𑁂 𑀲𑀫𑀜𑁆𑀜𑀁 𑀓𑀼𑀲𑀮𑁄 𑀯𑀺𑀤𑀺𑀢𑁆𑀯𑀸;

𑀯𑁄𑀳𑀸𑀭𑀫𑀢𑁆𑀢𑁂𑀦 𑀲𑁄 𑀯𑁄𑀳𑀭𑁂𑀬𑁆𑀬𑀸’’𑀢𑀺.

𑁬. 𑀧𑀚𑁆𑀚𑁄𑀢𑀲𑀼𑀢𑁆𑀢𑀁

𑁨𑁬. ‘‘𑀓𑀢𑀺 𑀮𑁄𑀓𑀲𑁆𑀫𑀺𑀁 𑀧𑀚𑁆𑀚𑁄𑀢𑀸, 𑀬𑁂𑀳𑀺 𑀮𑁄𑀓𑁄 𑀧𑀓𑀸𑀲𑀢𑀺 [𑀧𑀪𑀸𑀲𑀢𑀺 (𑀓. 𑀲𑀻.)];

𑀪𑀕𑀯𑀦𑁆𑀢𑀁 [𑀪𑀯𑀦𑁆𑀢𑀁 (𑀓.)] 𑀧𑀼𑀝𑁆𑀞𑀼𑀫𑀸𑀕𑀫𑁆𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

‘‘𑀘𑀢𑁆𑀢𑀸𑀭𑁄 𑀮𑁄𑀓𑁂 𑀧𑀚𑁆𑀚𑁄𑀢𑀸, 𑀧𑀜𑁆𑀘𑀫𑁂𑀢𑁆𑀣 𑀦 𑀯𑀺𑀚𑁆𑀚𑀢𑀺;

𑀤𑀺𑀯𑀸 𑀢𑀧𑀢𑀺 𑀆𑀤𑀺𑀘𑁆𑀘𑁄, 𑀭𑀢𑁆𑀢𑀺𑀫𑀸𑀪𑀸𑀢𑀺 𑀘𑀦𑁆𑀤𑀺𑀫𑀸.

‘‘𑀅𑀣 𑀅𑀕𑁆𑀕𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀢𑀺;

𑀲𑀫𑁆𑀩𑀼𑀤𑁆𑀥𑁄 𑀢𑀧𑀢𑀁 𑀲𑁂𑀝𑁆𑀞𑁄, 𑀏𑀲𑀸 𑀆𑀪𑀸 𑀅𑀦𑀼𑀢𑁆𑀢𑀭𑀸’’𑀢𑀺.

𑁭. 𑀲𑀭𑀲𑀼𑀢𑁆𑀢𑀁

𑁨𑁭. ‘‘𑀓𑀼𑀢𑁄 𑀲𑀭𑀸 𑀦𑀺𑀯𑀢𑁆𑀢𑀦𑁆𑀢𑀺, 𑀓𑀢𑁆𑀣 𑀯𑀝𑁆𑀝𑀁 𑀦 𑀯𑀢𑁆𑀢𑀢𑀺;

𑀓𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

‘‘𑀬𑀢𑁆𑀣 𑀆𑀧𑁄 𑀘 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀦 𑀕𑀸𑀥𑀢𑀺;

𑀅𑀢𑁄 𑀲𑀭𑀸 𑀦𑀺𑀯𑀢𑁆𑀢𑀦𑁆𑀢𑀺, 𑀏𑀢𑁆𑀣 𑀯𑀝𑁆𑀝𑀁 𑀦 𑀯𑀢𑁆𑀢𑀢𑀺;

𑀏𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑁮. 𑀫𑀳𑀤𑁆𑀥𑀦𑀲𑀼𑀢𑁆𑀢𑀁

𑁨𑁮. ‘‘𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸, 𑀭𑀝𑁆𑀞𑀯𑀦𑁆𑀢𑁄𑀧𑀺 𑀔𑀢𑁆𑀢𑀺𑀬𑀸;

𑀅𑀜𑁆𑀜𑀫𑀜𑁆𑀜𑀸𑀪𑀺𑀕𑀺𑀚𑁆𑀛𑀦𑁆𑀢𑀺, 𑀓𑀸𑀫𑁂𑀲𑀼 𑀅𑀦𑀮𑀗𑁆𑀓𑀢𑀸.

‘‘𑀢𑁂𑀲𑀼 𑀉𑀲𑁆𑀲𑀼𑀓𑁆𑀓𑀚𑀸𑀢𑁂𑀲𑀼, 𑀪𑀯𑀲𑁄𑀢𑀸𑀦𑀼𑀲𑀸𑀭𑀺𑀲𑀼;

𑀓𑁂𑀥 𑀢𑀡𑁆𑀳𑀁 [𑀭𑁄𑀥𑀢𑀡𑁆𑀳𑀁 (𑀲𑁆𑀬𑀸. 𑀓𑀁.), 𑀕𑁂𑀥𑀢𑀡𑁆𑀳𑀁 (𑀓.)] 𑀧𑀚𑀳𑀺𑀁𑀲𑀼 [𑀧𑀯𑀸𑀳𑀺𑀁𑀲𑀼 (𑀲𑁆𑀬𑀸. 𑀓𑀁. 𑀓.)], 𑀓𑁂 𑀮𑁄𑀓𑀲𑁆𑀫𑀺𑀁 𑀅𑀦𑀼𑀲𑁆𑀲𑀼𑀓𑀸’’𑀢𑀺.

‘‘𑀳𑀺𑀢𑁆𑀯𑀸 𑀅𑀕𑀸𑀭𑀁 𑀧𑀩𑁆𑀩𑀚𑀺𑀢𑀸, 𑀳𑀺𑀢𑁆𑀯𑀸 𑀧𑀼𑀢𑁆𑀢𑀁 𑀧𑀲𑀼𑀁 𑀯𑀺𑀬𑀁;

𑀳𑀺𑀢𑁆𑀯𑀸 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘, 𑀅𑀯𑀺𑀚𑁆𑀚𑀜𑁆𑀘 𑀯𑀺𑀭𑀸𑀚𑀺𑀬;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀢𑁂 𑀮𑁄𑀓𑀲𑁆𑀫𑀺𑀁 𑀅𑀦𑀼𑀲𑁆𑀲𑀼𑀓𑀸’’𑀢𑀺.

𑁯. 𑀘𑀢𑀼𑀘𑀓𑁆𑀓𑀲𑀼𑀢𑁆𑀢𑀁

𑁨𑁯. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁, 𑀧𑀼𑀡𑁆𑀡𑀁 𑀮𑁄𑀪𑁂𑀦 𑀲𑀁𑀬𑀼𑀢𑀁;

𑀧𑀗𑁆𑀓𑀚𑀸𑀢𑀁 𑀫𑀳𑀸𑀯𑀻𑀭, 𑀓𑀣𑀁 𑀬𑀸𑀢𑁆𑀭𑀸 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀙𑁂𑀢𑁆𑀯𑀸 𑀦𑀤𑁆𑀥𑀺𑀁 𑀯𑀭𑀢𑁆𑀢𑀜𑁆𑀘, 𑀇𑀘𑁆𑀙𑀸 𑀮𑁄𑀪𑀜𑁆𑀘 𑀧𑀸𑀧𑀓𑀁;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀏𑀯𑀁 𑀬𑀸𑀢𑁆𑀭𑀸 𑀪𑀯𑀺𑀲𑁆𑀲𑀢𑀻’’𑀢𑀺.

𑁧𑁦. 𑀏𑀡𑀺𑀚𑀗𑁆𑀖𑀲𑀼𑀢𑁆𑀢𑀁

𑁩𑁦. ‘‘𑀏𑀡𑀺𑀚𑀗𑁆𑀖𑀁 𑀓𑀺𑀲𑀁 𑀯𑀻𑀭𑀁, 𑀅𑀧𑁆𑀧𑀸𑀳𑀸𑀭𑀁 𑀅𑀮𑁄𑀮𑀼𑀧𑀁;

𑀲𑀻𑀳𑀁 𑀯𑁂𑀓𑀘𑀭𑀁 𑀦𑀸𑀕𑀁, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑀁;

𑀉𑀧𑀲𑀗𑁆𑀓𑀫𑁆𑀫 𑀧𑀼𑀘𑁆𑀙𑀸𑀫, 𑀓𑀣𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

‘‘𑀧𑀜𑁆𑀘 𑀓𑀸𑀫𑀕𑀼𑀡𑀸 𑀮𑁄𑀓𑁂, 𑀫𑀦𑁄𑀙𑀝𑁆𑀞𑀸 𑀧𑀯𑁂𑀤𑀺𑀢𑀸;

𑀏𑀢𑁆𑀣 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀏𑀯𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑀲𑀢𑁆𑀢𑀺𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀢𑁆𑀢𑀺𑀬𑀸 𑀨𑀼𑀲𑀢𑀺 𑀘𑁂𑀯, 𑀚𑀝𑀸 𑀫𑀦𑁄𑀦𑀺𑀯𑀸𑀭𑀡𑀸;

𑀅𑀭𑀳𑀦𑁆𑀢𑁂𑀦 𑀧𑀚𑁆𑀚𑁄𑀢𑁄, 𑀲𑀭𑀸 𑀫𑀳𑀤𑁆𑀥𑀦𑁂𑀦 𑀘;

𑀘𑀢𑀼𑀘𑀓𑁆𑀓𑁂𑀦 𑀦𑀯𑀫𑀁, 𑀏𑀡𑀺𑀚𑀗𑁆𑀖𑁂𑀦 𑀢𑁂 𑀤𑀲𑀸𑀢𑀺.