𑁯. 𑀓𑀼𑀝𑀺𑀓𑀸𑀲𑀼𑀢𑁆𑀢𑀁

𑁧𑁯. ‘‘𑀓𑀘𑁆𑀘𑀺 𑀢𑁂 𑀓𑀼𑀝𑀺𑀓𑀸 𑀦𑀢𑁆𑀣𑀺, 𑀓𑀘𑁆𑀘𑀺 𑀦𑀢𑁆𑀣𑀺 𑀓𑀼𑀮𑀸𑀯𑀓𑀸;

𑀓𑀘𑁆𑀘𑀺 𑀲𑀦𑁆𑀢𑀸𑀦𑀓𑀸 𑀦𑀢𑁆𑀣𑀺, 𑀓𑀘𑁆𑀘𑀺 𑀫𑀼𑀢𑁆𑀢𑁄𑀲𑀺 𑀩𑀦𑁆𑀥𑀦𑀸’’𑀢𑀺.

‘‘𑀢𑀕𑁆𑀖 𑀫𑁂 𑀓𑀼𑀝𑀺𑀓𑀸 𑀦𑀢𑁆𑀣𑀺, 𑀢𑀕𑁆𑀖 𑀦𑀢𑁆𑀣𑀺 𑀓𑀼𑀮𑀸𑀯𑀓𑀸;

𑀢𑀕𑁆𑀖 𑀲𑀦𑁆𑀢𑀸𑀦𑀓𑀸 𑀦𑀢𑁆𑀣𑀺, 𑀢𑀕𑁆𑀖 𑀫𑀼𑀢𑁆𑀢𑁄𑀫𑁆𑀳𑀺 𑀩𑀦𑁆𑀥𑀦𑀸’’𑀢𑀺.

‘‘𑀓𑀺𑀦𑁆𑀢𑀸𑀳𑀁 𑀓𑀼𑀝𑀺𑀓𑀁 𑀩𑁆𑀭𑀽𑀫𑀺, 𑀓𑀺𑀁 𑀢𑁂 𑀩𑁆𑀭𑀽𑀫𑀺 𑀓𑀼𑀮𑀸𑀯𑀓𑀁;

𑀓𑀺𑀁 𑀢𑁂 𑀲𑀦𑁆𑀢𑀸𑀦𑀓𑀁 𑀩𑁆𑀭𑀽𑀫𑀺, 𑀓𑀺𑀦𑁆𑀢𑀸𑀳𑀁 𑀩𑁆𑀭𑀽𑀫𑀺 𑀩𑀦𑁆𑀥𑀦’’𑀦𑁆𑀢𑀺.

‘‘𑀫𑀸𑀢𑀭𑀁 𑀓𑀼𑀝𑀺𑀓𑀁 𑀩𑁆𑀭𑀽𑀲𑀺, 𑀪𑀭𑀺𑀬𑀁 𑀩𑁆𑀭𑀽𑀲𑀺 𑀓𑀼𑀮𑀸𑀯𑀓𑀁;

𑀧𑀼𑀢𑁆𑀢𑁂 𑀲𑀦𑁆𑀢𑀸𑀦𑀓𑁂 𑀩𑁆𑀭𑀽𑀲𑀺, 𑀢𑀡𑁆𑀳𑀁 𑀫𑁂 𑀩𑁆𑀭𑀽𑀲𑀺 𑀩𑀦𑁆𑀥𑀦’’𑀦𑁆𑀢𑀺.

‘‘𑀲𑀸𑀳𑀼 𑀢𑁂 𑀓𑀼𑀝𑀺𑀓𑀸 𑀦𑀢𑁆𑀣𑀺, 𑀲𑀸𑀳𑀼 𑀦𑀢𑁆𑀣𑀺 𑀓𑀼𑀮𑀸𑀯𑀓𑀸;

𑀲𑀸𑀳𑀼 𑀲𑀦𑁆𑀢𑀸𑀦𑀓𑀸 𑀦𑀢𑁆𑀣𑀺, 𑀲𑀸𑀳𑀼 𑀫𑀼𑀢𑁆𑀢𑁄𑀲𑀺 𑀩𑀦𑁆𑀥𑀦𑀸’’𑀢𑀺.