𑁨. 𑀦𑀦𑁆𑀤𑀦𑀯𑀕𑁆𑀕𑁄

𑁧. 𑀦𑀦𑁆𑀤𑀦𑀲𑀼𑀢𑁆𑀢𑀁

𑁧𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀸 𑀢𑀸𑀯𑀢𑀺𑀁𑀲𑀓𑀸𑀬𑀺𑀓𑀸 𑀤𑁂𑀯𑀢𑀸 𑀦𑀦𑁆𑀤𑀦𑁂 𑀯𑀦𑁂 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑀸 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑀺𑀬𑀫𑀸𑀦𑀸 [𑀧𑀭𑀺𑀘𑀸𑀭𑀺𑀬𑀫𑀸𑀦𑀸 (𑀲𑁆𑀬𑀸. 𑀓𑀁. 𑀓.)] 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦 𑀢𑁂 𑀲𑀼𑀔𑀁 𑀧𑀚𑀸𑀦𑀦𑁆𑀢𑀺, 𑀬𑁂 𑀦 𑀧𑀲𑁆𑀲𑀦𑁆𑀢𑀺 𑀦𑀦𑁆𑀤𑀦𑀁;

𑀆𑀯𑀸𑀲𑀁 𑀦𑀭𑀤𑁂𑀯𑀸𑀦𑀁, 𑀢𑀺𑀤𑀲𑀸𑀦𑀁 𑀬𑀲𑀲𑁆𑀲𑀺𑀦’’𑀦𑁆𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀢𑀁 𑀤𑁂𑀯𑀢𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀦 𑀢𑁆𑀯𑀁 𑀩𑀸𑀮𑁂 𑀧𑀚𑀸𑀦𑀸𑀲𑀺, 𑀬𑀣𑀸 𑀅𑀭𑀳𑀢𑀁 𑀯𑀘𑁄;

𑀅𑀦𑀺𑀘𑁆𑀘𑀸 𑀲𑀩𑁆𑀩𑀲𑀗𑁆𑀔𑀸𑀭𑀸 [𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 (𑀲𑀻. 𑀲𑁆𑀬𑀸. 𑀓𑀁.)], 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑁨. 𑀦𑀦𑁆𑀤𑀢𑀺𑀲𑀼𑀢𑁆𑀢𑀁

𑁧𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸,

𑀕𑁄𑀫𑀸 [𑀕𑁄𑀫𑀺𑀓𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀕𑁄𑀳𑀺 𑀢𑀣𑁂𑀯 𑀦𑀦𑁆𑀤𑀢𑀺;

𑀉𑀧𑀥𑀻𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸,

𑀦 𑀳𑀺 𑀲𑁄 𑀦𑀦𑁆𑀤𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸,

𑀕𑁄𑀫𑀸 𑀕𑁄𑀳𑀺 𑀢𑀣𑁂𑀯 𑀲𑁄𑀘𑀢𑀺;

𑀉𑀧𑀥𑀻𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸,

𑀦 𑀳𑀺 𑀲𑁄 𑀲𑁄𑀘𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

𑁩. 𑀦𑀢𑁆𑀣𑀺𑀧𑀼𑀢𑁆𑀢𑀲𑀫𑀲𑀼𑀢𑁆𑀢𑀁

𑁧𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫𑀁, 𑀦𑀢𑁆𑀣𑀺 𑀕𑁄𑀲𑀫𑀺𑀢𑀁 𑀥𑀦𑀁;

𑀦𑀢𑁆𑀣𑀺 𑀲𑀽𑀭𑀺𑀬𑀲𑀫𑀸 [𑀲𑀼𑀭𑀺𑀬𑀲𑀫𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀆𑀪𑀸, 𑀲𑀫𑀼𑀤𑁆𑀤𑀧𑀭𑀫𑀸 𑀲𑀭𑀸’’𑀢𑀺.

‘‘𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫𑀁, 𑀦𑀢𑁆𑀣𑀺 𑀥𑀜𑁆𑀜𑀲𑀫𑀁 𑀥𑀦𑀁;

𑀦𑀢𑁆𑀣𑀺 𑀧𑀜𑁆𑀜𑀸𑀲𑀫𑀸 𑀆𑀪𑀸, 𑀯𑀼𑀝𑁆𑀞𑀺 𑀯𑁂 𑀧𑀭𑀫𑀸 𑀲𑀭𑀸’’𑀢𑀺.

𑁪. 𑀔𑀢𑁆𑀢𑀺𑀬𑀲𑀼𑀢𑁆𑀢𑀁

𑁧𑁪. ‘‘𑀔𑀢𑁆𑀢𑀺𑀬𑁄 𑀤𑁆𑀯𑀺𑀧𑀤𑀁 𑀲𑁂𑀝𑁆𑀞𑁄, 𑀩𑀮𑀻𑀩𑀤𑁆𑀤𑁄 [𑀩𑀮𑀺𑀯𑀤𑁆𑀤𑁄 (𑀲𑀻. 𑀧𑀻.), 𑀩𑀮𑀺𑀩𑀤𑁆𑀤𑁄 (𑀲𑁆𑀬𑀸. 𑀓𑀁. 𑀓.)] 𑀘𑀢𑀼𑀧𑁆𑀧𑀤𑀁.

𑀓𑁄𑀫𑀸𑀭𑀻 𑀲𑁂𑀝𑁆𑀞𑀸 𑀪𑀭𑀺𑀬𑀸𑀦𑀁, 𑀬𑁄 𑀘 𑀧𑀼𑀢𑁆𑀢𑀸𑀦 𑀧𑀼𑀩𑁆𑀩𑀚𑁄’’𑀢𑀺.

‘‘𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀁 𑀲𑁂𑀝𑁆𑀞𑁄, 𑀆𑀚𑀸𑀦𑀻𑀬𑁄 𑀘𑀢𑀼𑀧𑁆𑀧𑀤𑀁;

𑀲𑀼𑀲𑁆𑀲𑀽𑀲𑀸 𑀲𑁂𑀝𑁆𑀞𑀸 𑀪𑀭𑀺𑀬𑀸𑀦𑀁, 𑀬𑁄 𑀘 𑀧𑀼𑀢𑁆𑀢𑀸𑀦𑀫𑀲𑁆𑀲𑀯𑁄’’𑀢𑀺.

𑁫. 𑀲𑀡𑀫𑀸𑀦𑀲𑀼𑀢𑁆𑀢𑀁

𑁧𑁫. ‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 [𑀫𑀚𑁆𑀛𑀦𑁆𑀢𑀺𑀓𑁂 (𑀲𑀩𑁆𑀩𑀢𑁆𑀣)] 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼.

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁 [𑀫𑀳𑀸𑀭𑀜𑁆𑀜𑀁 (𑀓. 𑀲𑀻. 𑀲𑁆𑀬𑀸. 𑀓𑀁. 𑀓.)], 𑀢𑀁 𑀪𑀬𑀁 𑀧𑀝𑀺𑀪𑀸𑀢𑀺 𑀫’’𑀦𑁆𑀢𑀺.

‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼;

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁, 𑀲𑀸 𑀭𑀢𑀺 𑀧𑀝𑀺𑀪𑀸𑀢𑀺 𑀫’’𑀦𑁆𑀢𑀺.

𑁬. 𑀦𑀺𑀤𑁆𑀤𑀸𑀢𑀦𑁆𑀤𑀻𑀲𑀼𑀢𑁆𑀢𑀁

𑁧𑁬. ‘‘𑀦𑀺𑀤𑁆𑀤𑀸 𑀢𑀦𑁆𑀤𑀻 𑀯𑀺𑀚𑀫𑁆𑀪𑀺𑀢𑀸 [𑀢𑀦𑁆𑀤𑀺 𑀯𑀺𑀚𑀫𑁆𑀪𑀺𑀓𑀸 (𑀲𑀻. 𑀧𑀻.)], 𑀅𑀭𑀢𑀻 𑀪𑀢𑁆𑀢𑀲𑀫𑁆𑀫𑀤𑁄.

𑀏𑀢𑁂𑀦 𑀦𑀧𑁆𑀧𑀓𑀸𑀲𑀢𑀺, 𑀅𑀭𑀺𑀬𑀫𑀕𑁆𑀕𑁄 𑀇𑀥 𑀧𑀸𑀡𑀺𑀦’’𑀦𑁆𑀢𑀺.

‘‘𑀦𑀺𑀤𑁆𑀤𑀁 𑀢𑀦𑁆𑀤𑀺𑀁 𑀯𑀺𑀚𑀫𑁆𑀪𑀺𑀢𑀁, 𑀅𑀭𑀢𑀺𑀁 𑀪𑀢𑁆𑀢𑀲𑀫𑁆𑀫𑀤𑀁;

𑀯𑀻𑀭𑀺𑀬𑁂𑀦 [𑀯𑀺𑀭𑀺𑀬𑁂𑀦 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀁 𑀧𑀡𑀸𑀫𑁂𑀢𑁆𑀯𑀸, 𑀅𑀭𑀺𑀬𑀫𑀕𑁆𑀕𑁄 𑀯𑀺𑀲𑀼𑀚𑁆𑀛𑀢𑀻’’𑀢𑀺.

𑁭. 𑀤𑀼𑀓𑁆𑀓𑀭𑀲𑀼𑀢𑁆𑀢𑀁

𑁧𑁭. ‘‘𑀤𑀼𑀓𑁆𑀓𑀭𑀁 𑀤𑀼𑀢𑁆𑀢𑀺𑀢𑀺𑀓𑁆𑀔𑀜𑁆𑀘, 𑀅𑀩𑁆𑀬𑀢𑁆𑀢𑁂𑀦 𑀘 𑀲𑀸𑀫𑀜𑁆𑀜𑀁.

𑀩𑀳𑀽𑀳𑀺 𑀢𑀢𑁆𑀣 𑀲𑀫𑁆𑀩𑀸𑀥𑀸, 𑀬𑀢𑁆𑀣 𑀩𑀸𑀮𑁄 𑀯𑀺𑀲𑀻𑀤𑀢𑀻’’𑀢𑀺.

‘‘𑀓𑀢𑀺𑀳𑀁 𑀘𑀭𑁂𑀬𑁆𑀬 𑀲𑀸𑀫𑀜𑁆𑀜𑀁, 𑀘𑀺𑀢𑁆𑀢𑀁 𑀘𑁂 𑀦 𑀦𑀺𑀯𑀸𑀭𑀬𑁂;

𑀧𑀤𑁂 𑀧𑀤𑁂 𑀯𑀺𑀲𑀻𑀤𑁂𑀬𑁆𑀬, 𑀲𑀗𑁆𑀓𑀧𑁆𑀧𑀸𑀦𑀁 𑀯𑀲𑀸𑀦𑀼𑀕𑁄’’𑀢𑀺.

‘‘𑀓𑀼𑀫𑁆𑀫𑁄𑀯 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂,

𑀲𑀫𑁄𑀤𑀳𑀁 𑀪𑀺𑀓𑁆𑀔𑀼 𑀫𑀦𑁄𑀯𑀺𑀢𑀓𑁆𑀓𑁂;

𑀅𑀦𑀺𑀲𑁆𑀲𑀺𑀢𑁄 𑀅𑀜𑁆𑀜𑀫𑀳𑁂𑀞𑀬𑀸𑀦𑁄,

𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀽𑀧𑀯𑀤𑁂𑀬𑁆𑀬 𑀓𑀜𑁆𑀘𑀻’’𑀢𑀺.

𑁮. 𑀳𑀺𑀭𑀻𑀲𑀼𑀢𑁆𑀢𑀁

𑁧𑁮. ‘‘𑀳𑀺𑀭𑀻𑀦𑀺𑀲𑁂𑀥𑁄 𑀧𑀼𑀭𑀺𑀲𑁄, 𑀓𑁄𑀘𑀺 𑀮𑁄𑀓𑀲𑁆𑀫𑀺𑀁 𑀯𑀺𑀚𑁆𑀚𑀢𑀺.

𑀬𑁄 𑀦𑀺𑀦𑁆𑀤𑀁 𑀅𑀧𑀩𑁄𑀥𑀢𑀺 [𑀅𑀧𑀩𑁄𑀥𑁂𑀢𑀺 (𑀲𑁆𑀬𑀸. 𑀓𑀁. 𑀓.)], 𑀅𑀲𑁆𑀲𑁄 𑀪𑀤𑁆𑀭𑁄 𑀓𑀲𑀸𑀫𑀺𑀯𑀸’’𑀢𑀺.

‘‘𑀳𑀺𑀭𑀻𑀦𑀺𑀲𑁂𑀥𑀸 𑀢𑀦𑀼𑀬𑀸, 𑀬𑁂 𑀘𑀭𑀦𑁆𑀢𑀺 𑀲𑀤𑀸 𑀲𑀢𑀸;

𑀅𑀦𑁆𑀢𑀁 𑀤𑀼𑀓𑁆𑀔𑀲𑁆𑀲 𑀧𑀧𑁆𑀧𑀼𑀬𑁆𑀬, 𑀘𑀭𑀦𑁆𑀢𑀺 𑀯𑀺𑀲𑀫𑁂 𑀲𑀫’’𑀦𑁆𑀢𑀺.

𑁯. 𑀓𑀼𑀝𑀺𑀓𑀸𑀲𑀼𑀢𑁆𑀢𑀁

𑁧𑁯. ‘‘𑀓𑀘𑁆𑀘𑀺 𑀢𑁂 𑀓𑀼𑀝𑀺𑀓𑀸 𑀦𑀢𑁆𑀣𑀺, 𑀓𑀘𑁆𑀘𑀺 𑀦𑀢𑁆𑀣𑀺 𑀓𑀼𑀮𑀸𑀯𑀓𑀸;

𑀓𑀘𑁆𑀘𑀺 𑀲𑀦𑁆𑀢𑀸𑀦𑀓𑀸 𑀦𑀢𑁆𑀣𑀺, 𑀓𑀘𑁆𑀘𑀺 𑀫𑀼𑀢𑁆𑀢𑁄𑀲𑀺 𑀩𑀦𑁆𑀥𑀦𑀸’’𑀢𑀺.

‘‘𑀢𑀕𑁆𑀖 𑀫𑁂 𑀓𑀼𑀝𑀺𑀓𑀸 𑀦𑀢𑁆𑀣𑀺, 𑀢𑀕𑁆𑀖 𑀦𑀢𑁆𑀣𑀺 𑀓𑀼𑀮𑀸𑀯𑀓𑀸;

𑀢𑀕𑁆𑀖 𑀲𑀦𑁆𑀢𑀸𑀦𑀓𑀸 𑀦𑀢𑁆𑀣𑀺, 𑀢𑀕𑁆𑀖 𑀫𑀼𑀢𑁆𑀢𑁄𑀫𑁆𑀳𑀺 𑀩𑀦𑁆𑀥𑀦𑀸’’𑀢𑀺.

‘‘𑀓𑀺𑀦𑁆𑀢𑀸𑀳𑀁 𑀓𑀼𑀝𑀺𑀓𑀁 𑀩𑁆𑀭𑀽𑀫𑀺, 𑀓𑀺𑀁 𑀢𑁂 𑀩𑁆𑀭𑀽𑀫𑀺 𑀓𑀼𑀮𑀸𑀯𑀓𑀁;

𑀓𑀺𑀁 𑀢𑁂 𑀲𑀦𑁆𑀢𑀸𑀦𑀓𑀁 𑀩𑁆𑀭𑀽𑀫𑀺, 𑀓𑀺𑀦𑁆𑀢𑀸𑀳𑀁 𑀩𑁆𑀭𑀽𑀫𑀺 𑀩𑀦𑁆𑀥𑀦’’𑀦𑁆𑀢𑀺.

‘‘𑀫𑀸𑀢𑀭𑀁 𑀓𑀼𑀝𑀺𑀓𑀁 𑀩𑁆𑀭𑀽𑀲𑀺, 𑀪𑀭𑀺𑀬𑀁 𑀩𑁆𑀭𑀽𑀲𑀺 𑀓𑀼𑀮𑀸𑀯𑀓𑀁;

𑀧𑀼𑀢𑁆𑀢𑁂 𑀲𑀦𑁆𑀢𑀸𑀦𑀓𑁂 𑀩𑁆𑀭𑀽𑀲𑀺, 𑀢𑀡𑁆𑀳𑀁 𑀫𑁂 𑀩𑁆𑀭𑀽𑀲𑀺 𑀩𑀦𑁆𑀥𑀦’’𑀦𑁆𑀢𑀺.

‘‘𑀲𑀸𑀳𑀼 𑀢𑁂 𑀓𑀼𑀝𑀺𑀓𑀸 𑀦𑀢𑁆𑀣𑀺, 𑀲𑀸𑀳𑀼 𑀦𑀢𑁆𑀣𑀺 𑀓𑀼𑀮𑀸𑀯𑀓𑀸;

𑀲𑀸𑀳𑀼 𑀲𑀦𑁆𑀢𑀸𑀦𑀓𑀸 𑀦𑀢𑁆𑀣𑀺, 𑀲𑀸𑀳𑀼 𑀫𑀼𑀢𑁆𑀢𑁄𑀲𑀺 𑀩𑀦𑁆𑀥𑀦𑀸’’𑀢𑀺.

𑁧𑁦. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀁

𑁨𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀢𑀧𑁄𑀤𑀸𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀬𑁂𑀦 𑀢𑀧𑁄𑀤𑀸 𑀢𑁂𑀦𑀼𑀧𑀲𑀗𑁆𑀓𑀫𑀺 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀁. 𑀢𑀧𑁄𑀤𑁂 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀺 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀢𑀧𑁄𑀤𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑁂𑀳𑀸𑀲𑀁 𑀞𑀺𑀢𑀸 𑀆𑀬𑀲𑁆𑀫𑀦𑁆𑀢𑀁 𑀲𑀫𑀺𑀤𑁆𑀥𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀲𑀺 𑀪𑀺𑀓𑁆𑀔𑀼, 𑀦 𑀳𑀺 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀲𑀺;

𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀲𑁆𑀲𑀼, 𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺.

‘‘𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀺, 𑀙𑀦𑁆𑀦𑁄 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀺, 𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺.

𑀅𑀣 𑀔𑁄 𑀲𑀸 𑀤𑁂𑀯𑀢𑀸 𑀧𑀣𑀯𑀺𑀬𑀁 [𑀧𑀞𑀯𑀺𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀫𑀺𑀤𑁆𑀥𑀺𑀁 𑀏𑀢𑀤𑀯𑁄𑀘 𑁋 ‘‘𑀤𑀳𑀭𑁄 𑀢𑁆𑀯𑀁 𑀪𑀺𑀓𑁆𑀔𑀼, 𑀧𑀩𑁆𑀩𑀚𑀺𑀢𑁄 𑀲𑀼𑀲𑀼 𑀓𑀸𑀴𑀓𑁂𑀲𑁄, 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀧𑀞𑀫𑁂𑀦 𑀯𑀬𑀲𑀸, 𑀅𑀦𑀺𑀓𑁆𑀓𑀻𑀴𑀺𑀢𑀸𑀯𑀻 𑀓𑀸𑀫𑁂𑀲𑀼. 𑀪𑀼𑀜𑁆𑀚, 𑀪𑀺𑀓𑁆𑀔𑀼, 𑀫𑀸𑀦𑀼𑀲𑀓𑁂 𑀓𑀸𑀫𑁂; 𑀫𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀻’’𑀢𑀺.

‘‘𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀸𑀫𑀺. 𑀓𑀸𑀮𑀺𑀓𑀜𑁆𑀘 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀳𑀺𑀢𑁆𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀦𑀼𑀥𑀸𑀯𑀸𑀫𑀺. 𑀓𑀸𑀮𑀺𑀓𑀸 𑀳𑀺, 𑀆𑀯𑀼𑀲𑁄, 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸; 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀬𑀁 𑀥𑀫𑁆𑀫𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀼, 𑀓𑀸𑀮𑀺𑀓𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄? 𑀓𑀣𑀁 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀬𑀁 𑀥𑀫𑁆𑀫𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺?

‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀦𑀯𑁄 𑀅𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀥𑀼𑀦𑀸𑀕𑀢𑁄 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁. 𑀦 𑀢𑀸𑀳𑀁 [𑀦 𑀔𑁆𑀯𑀸𑀳𑀁 (𑀲𑀻. 𑀧𑀻.)] 𑀲𑀓𑁆𑀓𑁄𑀫𑀺 𑀯𑀺𑀢𑁆𑀣𑀸𑀭𑁂𑀦 𑀆𑀘𑀺𑀓𑁆𑀔𑀺𑀢𑀼𑀁. 𑀅𑀬𑀁 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀢𑀧𑁄𑀤𑀸𑀭𑀸𑀫𑁂. 𑀢𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙. 𑀬𑀣𑀸 𑀢𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀲𑀻’’𑀢𑀺.

‘‘𑀦 𑀔𑁄, 𑀪𑀺𑀓𑁆𑀔𑀼, 𑀲𑀼𑀓𑀭𑁄 𑀲𑁄 𑀪𑀕𑀯𑀸 𑀅𑀫𑁆𑀳𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀅𑀜𑁆𑀜𑀸𑀳𑀺 𑀫𑀳𑁂𑀲𑀓𑁆𑀔𑀸𑀳𑀺 𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄. 𑀲𑀘𑁂 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀢𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀺, 𑀫𑀬𑀫𑁆𑀧𑀺 𑀆𑀕𑀘𑁆𑀙𑁂𑀬𑁆𑀬𑀸𑀫 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀬𑁂𑀦 𑀢𑀧𑁄𑀤𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀁. 𑀢𑀧𑁄𑀤𑁂 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀺𑀁 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄. 𑀅𑀣 𑀔𑁄, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀢𑀧𑁄𑀤𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑁂𑀳𑀸𑀲𑀁 𑀞𑀺𑀢𑀸 𑀇𑀫𑀸𑀬 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀲𑀺 𑀪𑀺𑀓𑁆𑀔𑀼, 𑀦 𑀳𑀺 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀲𑀺;

𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀲𑁆𑀲𑀼, 𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀪𑀦𑁆𑀢𑁂, 𑀢𑀁 𑀤𑁂𑀯𑀢𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺𑀁 𑁋

‘‘𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀺, 𑀙𑀦𑁆𑀦𑁄 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀺, 𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺.

‘‘𑀅𑀣 𑀔𑁄, 𑀪𑀦𑁆𑀢𑁂, 𑀲𑀸 𑀤𑁂𑀯𑀢𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀤𑀳𑀭𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀩𑁆𑀩𑀚𑀺𑀢𑁄 𑀲𑀼𑀲𑀼 𑀓𑀸𑀴𑀓𑁂𑀲𑁄, 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀧𑀞𑀫𑁂𑀦 𑀯𑀬𑀲𑀸, 𑀅𑀦𑀺𑀓𑁆𑀓𑀻𑀴𑀺𑀢𑀸𑀯𑀻 𑀓𑀸𑀫𑁂𑀲𑀼. 𑀪𑀼𑀜𑁆𑀚, 𑀪𑀺𑀓𑁆𑀔𑀼, 𑀫𑀸𑀦𑀼𑀲𑀓𑁂 𑀓𑀸𑀫𑁂; 𑀫𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀻’’’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑀸𑀳𑀁, 𑀪𑀦𑁆𑀢𑁂, 𑀢𑀁 𑀤𑁂𑀯𑀢𑀁 𑀏𑀢𑀤𑀯𑁄𑀘𑀁 𑁋 ‘𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀸𑀫𑀺; 𑀓𑀸𑀮𑀺𑀓𑀜𑁆𑀘 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀳𑀺𑀢𑁆𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀦𑀼𑀥𑀸𑀯𑀸𑀫𑀺. 𑀓𑀸𑀮𑀺𑀓𑀸 𑀳𑀺, 𑀆𑀯𑀼𑀲𑁄, 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸; 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀬𑀁 𑀥𑀫𑁆𑀫𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀓𑀣𑀜𑁆𑀘, 𑀪𑀺𑀓𑁆𑀔𑀼, 𑀓𑀸𑀮𑀺𑀓𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸; 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄? 𑀓𑀣𑀁 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀬𑀁 𑀥𑀫𑁆𑀫𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺? 𑀏𑀯𑀁 𑀯𑀼𑀢𑁆𑀢𑀸𑀳𑀁, 𑀪𑀦𑁆𑀢𑁂, 𑀢𑀁 𑀤𑁂𑀯𑀢𑀁 𑀏𑀢𑀤𑀯𑁄𑀘𑀁 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀦𑀯𑁄 𑀅𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀥𑀼𑀦𑀸𑀕𑀢𑁄 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀦 𑀢𑀸𑀳𑀁 𑀲𑀓𑁆𑀓𑁄𑀫𑀺 𑀯𑀺𑀢𑁆𑀣𑀸𑀭𑁂𑀦 𑀆𑀘𑀺𑀓𑁆𑀔𑀺𑀢𑀼𑀁. 𑀅𑀬𑀁 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀢𑀧𑁄𑀤𑀸𑀭𑀸𑀫𑁂. 𑀢𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙. 𑀬𑀣𑀸 𑀢𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀲𑀻’’’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀦 𑀔𑁄, 𑀪𑀺𑀓𑁆𑀔𑀼, 𑀲𑀼𑀓𑀭𑁄 𑀲𑁄 𑀪𑀕𑀯𑀸 𑀅𑀫𑁆𑀳𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀅𑀜𑁆𑀜𑀸𑀳𑀺 𑀫𑀳𑁂𑀲𑀓𑁆𑀔𑀸𑀳𑀺 𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄. 𑀲𑀘𑁂 𑀔𑁄, 𑀢𑁆𑀯𑀁 𑀪𑀺𑀓𑁆𑀔𑀼, 𑀢𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀺, 𑀫𑀬𑀫𑁆𑀧𑀺 𑀆𑀕𑀘𑁆𑀙𑁂𑀬𑁆𑀬𑀸𑀫 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’𑀢𑀺. 𑀲𑀘𑁂, 𑀪𑀦𑁆𑀢𑁂, 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀲𑀘𑁆𑀘𑀁 𑀯𑀘𑀦𑀁, 𑀇𑀥𑁂𑀯 𑀲𑀸 𑀤𑁂𑀯𑀢𑀸 𑀅𑀯𑀺𑀤𑀽𑀭𑁂’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀲𑀸 𑀤𑁂𑀯𑀢𑀸 𑀆𑀬𑀲𑁆𑀫𑀦𑁆𑀢𑀁 𑀲𑀫𑀺𑀤𑁆𑀥𑀺𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀘𑁆𑀙, 𑀪𑀺𑀓𑁆𑀔𑀼, 𑀧𑀼𑀘𑁆𑀙, 𑀪𑀺𑀓𑁆𑀔𑀼, 𑀬𑀫𑀳𑀁 𑀅𑀦𑀼𑀧𑁆𑀧𑀢𑁆𑀢𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀁 𑀤𑁂𑀯𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀓𑁆𑀔𑁂𑀬𑁆𑀬𑀲𑀜𑁆𑀜𑀺𑀦𑁄 𑀲𑀢𑁆𑀢𑀸, 𑀅𑀓𑁆𑀔𑁂𑀬𑁆𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸;

𑀅𑀓𑁆𑀔𑁂𑀬𑁆𑀬𑀁 𑀅𑀧𑀭𑀺𑀜𑁆𑀜𑀸𑀬, 𑀬𑁄𑀕𑀫𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄.

‘‘𑀅𑀓𑁆𑀔𑁂𑀬𑁆𑀬𑀜𑁆𑀘 𑀧𑀭𑀺𑀜𑁆𑀜𑀸𑀬, 𑀅𑀓𑁆𑀔𑀸𑀢𑀸𑀭𑀁 𑀦 𑀫𑀜𑁆𑀜𑀢𑀺;

𑀢𑀜𑁆𑀳𑀺 𑀢𑀲𑁆𑀲 𑀦 𑀳𑁄𑀢𑀻𑀢𑀺, 𑀬𑁂𑀦 𑀦𑀁 𑀯𑀚𑁆𑀚𑀸 𑀦 𑀢𑀲𑁆𑀲 𑀅𑀢𑁆𑀣𑀺;

𑀲𑀘𑁂 𑀯𑀺𑀚𑀸𑀦𑀸𑀲𑀺 𑀯𑀤𑁂𑀳𑀺 𑀬𑀓𑁆𑀔𑀸’’𑀢𑀺 [𑀬𑀓𑁆𑀔𑀻𑀢𑀺 (𑀧𑀻. 𑀓.)].

‘‘𑀦 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀣𑀸 𑀪𑀸𑀲𑀢𑀼 𑀬𑀣𑀸𑀳𑀁 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀚𑀸𑀦𑁂𑀬𑁆𑀬’’𑀦𑁆𑀢𑀺.

‘‘𑀲𑀫𑁄 𑀯𑀺𑀲𑁂𑀲𑀻 𑀉𑀤 𑀯𑀸 [𑀅𑀣𑀯𑀸 (𑀲𑀻. 𑀧𑀻.)] 𑀦𑀺𑀳𑀻𑀦𑁄,

𑀬𑁄 𑀫𑀜𑁆𑀜𑀢𑀻 𑀲𑁄 𑀯𑀺𑀯𑀤𑁂𑀣 [𑀲𑁄𑀧𑀺 𑀯𑀤𑁂𑀣 (𑀓.)] 𑀢𑁂𑀦;

𑀢𑀻𑀲𑀼 𑀯𑀺𑀥𑀸𑀲𑀼 𑀅𑀯𑀺𑀓𑀫𑁆𑀧𑀫𑀸𑀦𑁄,

𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺;

𑀲𑀘𑁂 𑀯𑀺𑀚𑀸𑀦𑀸𑀲𑀺 𑀯𑀤𑁂𑀳𑀺 𑀬𑀓𑁆𑀔𑀸’’𑀢𑀺.

‘‘𑀇𑀫𑀲𑁆𑀲𑀸𑀧𑀺 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀦 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀣𑀸 𑀪𑀸𑀲𑀢𑀼 𑀬𑀣𑀸𑀳𑀁 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀚𑀸𑀦𑁂𑀬𑁆𑀬’’𑀦𑁆𑀢𑀺.

‘‘𑀧𑀳𑀸𑀲𑀺 𑀲𑀗𑁆𑀔𑀁 𑀦 𑀯𑀺𑀫𑀸𑀦𑀫𑀚𑁆𑀛𑀕𑀸, 𑀅𑀘𑁆𑀙𑁂𑀘𑁆𑀙𑀺 [𑀅𑀘𑁆𑀙𑁂𑀚𑁆𑀚𑀺 (𑀲𑁆𑀬𑀸. 𑀓𑀁. 𑀓.)] 𑀢𑀡𑁆𑀳𑀁 𑀇𑀥 𑀦𑀸𑀫𑀭𑀽𑀧𑁂;

𑀢𑀁 𑀙𑀺𑀦𑁆𑀦𑀕𑀦𑁆𑀣𑀁 𑀅𑀦𑀺𑀖𑀁 𑀦𑀺𑀭𑀸𑀲𑀁, 𑀧𑀭𑀺𑀬𑁂𑀲𑀫𑀸𑀦𑀸 𑀦𑀸𑀚𑁆𑀛𑀕𑀫𑀼𑀁;

𑀤𑁂𑀯𑀸 𑀫𑀦𑀼𑀲𑁆𑀲𑀸 𑀇𑀥 𑀯𑀸 𑀳𑀼𑀭𑀁 𑀯𑀸, 𑀲𑀕𑁆𑀕𑁂𑀲𑀼 𑀯𑀸 𑀲𑀩𑁆𑀩𑀦𑀺𑀯𑁂𑀲𑀦𑁂𑀲𑀼;

𑀲𑀘𑁂 𑀯𑀺𑀚𑀸𑀦𑀸𑀲𑀺 𑀯𑀤𑁂𑀳𑀺 𑀬𑀓𑁆𑀔𑀸’’𑀢𑀺.

‘‘𑀇𑀫𑀲𑁆𑀲 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺 𑁋

‘‘𑀧𑀸𑀧𑀁 𑀦 𑀓𑀬𑀺𑀭𑀸 𑀯𑀘𑀲𑀸 𑀫𑀦𑀲𑀸,

𑀓𑀸𑀬𑁂𑀦 𑀯𑀸 𑀓𑀺𑀜𑁆𑀘𑀦 𑀲𑀩𑁆𑀩𑀮𑁄𑀓𑁂;

𑀓𑀸𑀫𑁂 𑀧𑀳𑀸𑀬 𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄,

𑀤𑀼𑀓𑁆𑀔𑀁 𑀦 𑀲𑁂𑀯𑁂𑀣 𑀅𑀦𑀢𑁆𑀣𑀲𑀁𑀳𑀺𑀢’’𑀦𑁆𑀢𑀺.

𑀦𑀦𑁆𑀤𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀦𑀦𑁆𑀤𑀦𑀸 𑀦𑀦𑁆𑀤𑀢𑀺 𑀘𑁂𑀯, 𑀦𑀢𑁆𑀣𑀺𑀧𑀼𑀢𑁆𑀢𑀲𑀫𑁂𑀦 𑀘;

𑀔𑀢𑁆𑀢𑀺𑀬𑁄 𑀲𑀡𑀫𑀸𑀦𑁄 𑀘, 𑀦𑀺𑀤𑁆𑀤𑀸𑀢𑀦𑁆𑀤𑀻 𑀘 𑀤𑀼𑀓𑁆𑀓𑀭𑀁;

𑀳𑀺𑀭𑀻 𑀓𑀼𑀝𑀺𑀓𑀸 𑀦𑀯𑀫𑁄, 𑀤𑀲𑀫𑁄 𑀯𑀼𑀢𑁆𑀢𑁄 𑀲𑀫𑀺𑀤𑁆𑀥𑀺𑀦𑀸𑀢𑀺.