𑁧𑁦. 𑀅𑀭𑀜𑁆𑀜𑀲𑀼𑀢𑁆𑀢𑀁

𑁧𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀸𑀦𑀁, 𑀲𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀁;

𑀏𑀓𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀓𑁂𑀦 𑀯𑀡𑁆𑀡𑁄 𑀧𑀲𑀻𑀤𑀢𑀻’’𑀢𑀺.

‘‘𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀦𑁆𑀢𑀺, 𑀦𑀧𑁆𑀧𑀚𑀧𑁆𑀧𑀦𑁆𑀢𑀺 𑀦𑀸𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀢𑁂𑀦 𑀯𑀡𑁆𑀡𑁄 𑀧𑀲𑀻𑀤𑀢𑀺’’.

‘‘𑀅𑀦𑀸𑀕𑀢𑀧𑁆𑀧𑀚𑀧𑁆𑀧𑀸𑀬, 𑀅𑀢𑀻𑀢𑀲𑁆𑀲𑀸𑀦𑀼𑀲𑁄𑀘𑀦𑀸;

𑀏𑀢𑁂𑀦 𑀩𑀸𑀮𑀸 𑀲𑀼𑀲𑁆𑀲𑀦𑁆𑀢𑀺, 𑀦𑀴𑁄𑀯 𑀳𑀭𑀺𑀢𑁄 𑀮𑀼𑀢𑁄’’𑀢𑀺.

𑀦𑀴𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀑𑀖𑀁 𑀦𑀺𑀫𑁄𑀓𑁆𑀔𑀁 𑀉𑀧𑀦𑁂𑀬𑁆𑀬𑀁, 𑀅𑀘𑁆𑀘𑁂𑀦𑁆𑀢𑀺 𑀓𑀢𑀺𑀙𑀺𑀦𑁆𑀤𑀺 𑀘;

𑀚𑀸𑀕𑀭𑀁 𑀅𑀧𑁆𑀧𑀝𑀺𑀯𑀺𑀤𑀺𑀢𑀸, 𑀲𑀼𑀲𑀫𑁆𑀫𑀼𑀝𑁆𑀞𑀸 𑀫𑀸𑀦𑀓𑀸𑀫𑀺𑀦𑀸;

𑀅𑀭𑀜𑁆𑀜𑁂 𑀤𑀲𑀫𑁄 𑀯𑀼𑀢𑁆𑀢𑁄, 𑀯𑀕𑁆𑀕𑁄 𑀢𑁂𑀦 𑀧𑀯𑀼𑀘𑁆𑀘𑀢𑀺.