𑁯. 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀁

𑁨𑁪𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀺 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀺 𑀩𑀸𑀮𑀸𑀧𑀤𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀥, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀳𑁄𑀢𑀺 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻 𑀘 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻 𑀘. 𑀦𑁄 𑀘𑁂𑀢𑀁 [𑀦𑁄 𑀘𑁂𑀤𑀁 (𑀲𑀁. 𑀦𑀺. 𑁩.𑁨𑁭-𑁨𑁮)], 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀅𑀪𑀯𑀺𑀲𑁆𑀲 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻 𑀘 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻 𑀘 𑀓𑁂𑀦 𑀦𑀁 [𑀦 𑀢𑁂𑀦 𑀦𑀁 (𑀓.), 𑀦 𑀦𑀁 (?)] 𑀧𑀡𑁆𑀟𑀺𑀢𑀸 𑀚𑀸𑀦𑁂𑀬𑁆𑀬𑀼𑀁 𑁋 ‘𑀩𑀸𑀮𑁄 𑀅𑀬𑀁 𑀪𑀯𑀁 𑀅𑀲𑀧𑁆𑀧𑀼𑀭𑀺𑀲𑁄’𑀢𑀺? 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀳𑁄𑀢𑀺 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻 𑀘 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻 𑀘 𑀢𑀲𑁆𑀫𑀸 𑀦𑀁 𑀧𑀡𑁆𑀟𑀺𑀢𑀸 𑀚𑀸𑀦𑀦𑁆𑀢𑀺 𑁋 ‘𑀩𑀸𑀮𑁄 𑀅𑀬𑀁 𑀪𑀯𑀁 𑀅𑀲𑀧𑁆𑀧𑀼𑀭𑀺𑀲𑁄’𑀢𑀺. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀢𑀺𑀯𑀺𑀥𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀲𑀪𑀸𑀬𑀁 𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀭𑀣𑀺𑀓𑀸𑀬 [𑀭𑀣𑀺𑀬𑀸𑀬 (𑀩𑀳𑀽𑀲𑀼)] 𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑀺𑀗𑁆𑀖𑀸𑀝𑀓𑁂 𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺; 𑀢𑀢𑁆𑀭 𑀘𑁂 𑀚𑀦𑁄 𑀢𑀚𑁆𑀚𑀁 𑀢𑀲𑁆𑀲𑀸𑀭𑀼𑀧𑁆𑀧𑀁 𑀓𑀣𑀁 𑀫𑀦𑁆𑀢𑁂𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀳𑁄𑀢𑀺, 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑀁 𑀔𑁄 𑀚𑀦𑁄 𑀢𑀚𑁆𑀚𑀁 𑀢𑀲𑁆𑀲𑀸𑀭𑀼𑀧𑁆𑀧𑀁 𑀓𑀣𑀁 𑀫𑀦𑁆𑀢𑁂𑀢𑀺, 𑀲𑀁𑀯𑀺𑀚𑁆𑀚𑀦𑁆𑀢𑁂𑀯 𑀢𑁂 [𑀲𑀁𑀯𑀺𑀚𑁆𑀚𑀦𑁆𑀢𑁂 𑀢𑁂 𑀘 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀥𑀫𑁆𑀫𑀸 𑀫𑀬𑀺, 𑀅𑀳𑀜𑁆𑀘 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀦𑁆𑀤𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀧𑀞𑀫𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

𑁨𑁪𑁭. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀧𑀲𑁆𑀲𑀢𑀺 𑀭𑀸𑀚𑀸𑀦𑁄 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑁂 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑁂 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑁂 𑀅𑀤𑁆𑀥𑀤𑀡𑁆𑀟𑀓𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑁂 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀦𑁆𑀢𑁂 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 [𑀔𑀸𑀭𑀸𑀧𑀝𑀺𑀘𑁆𑀙𑀓𑀫𑁆𑀧𑀺 (𑀓.)] 𑀓𑀭𑁄𑀦𑁆𑀢𑁂 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 [𑀧𑀮𑀸𑀮𑀧𑀺𑀝𑁆𑀞𑀓𑀫𑁆𑀧𑀺 (𑀧𑀻.)] 𑀓𑀭𑁄𑀦𑁆𑀢𑁂 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑁆𑀢𑁂 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑁂 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑁂 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑁂. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑀣𑀸𑀭𑀽𑀧𑀸𑀦𑀁 𑀔𑁄 𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀳𑁂𑀢𑀼 𑀭𑀸𑀚𑀸𑀦𑁄 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑀺 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑀺…𑀧𑁂… 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺; 𑀲𑀁𑀯𑀺𑀚𑁆𑀚𑀦𑁆𑀢𑁂𑀯 𑀢𑁂 𑀥𑀫𑁆𑀫𑀸 𑀫𑀬𑀺, 𑀅𑀳𑀜𑁆𑀘 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀦𑁆𑀤𑀺𑀲𑁆𑀲𑀸𑀫𑀺. 𑀫𑀁 𑀘𑁂𑀧𑀺 𑀭𑀸𑀚𑀸𑀦𑁄 [𑀲𑀘𑁂 𑀫𑀫𑁆𑀧𑀺 (𑀓.)] 𑀚𑀸𑀦𑁂𑀬𑁆𑀬𑀼𑀁, 𑀫𑀫𑁆𑀧𑀺 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀬𑁆𑀬𑀼𑀁 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀬𑁆𑀬𑀼𑀁…𑀧𑁂… 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀬𑁆𑀬𑀼𑀁, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬𑀼’𑀦𑁆𑀢𑀺. 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀤𑀼𑀢𑀺𑀬𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

𑁨𑁪𑁮. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀩𑀸𑀮𑀁 𑀧𑀻𑀞𑀲𑀫𑀸𑀭𑀽𑀴𑁆𑀳𑀁 𑀯𑀸 𑀫𑀜𑁆𑀘𑀲𑀫𑀸𑀭𑀽𑀴𑁆𑀳𑀁 𑀯𑀸 𑀙𑀫𑀸𑀬𑀁 [𑀙𑀫𑀸𑀬 (𑀲𑀻. 𑀧𑀻.)] 𑀯𑀸 𑀲𑁂𑀫𑀸𑀦𑀁, 𑀬𑀸𑀦𑀺𑀲𑁆𑀲 𑀧𑀼𑀩𑁆𑀩𑁂 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀸𑀦𑀺 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀸𑀦𑀺 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀸𑀦𑀺 𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀢𑀁 𑀧𑀩𑁆𑀩𑀢𑀓𑀽𑀝𑀸𑀦𑀁 𑀙𑀸𑀬𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀣𑀯𑀺𑀬𑀸 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑀁 𑀧𑀻𑀞𑀲𑀫𑀸𑀭𑀽𑀴𑁆𑀳𑀁 𑀯𑀸 𑀫𑀜𑁆𑀘𑀲𑀫𑀸𑀭𑀽𑀴𑁆𑀳𑀁 𑀯𑀸 𑀙𑀫𑀸𑀬𑀁 𑀯𑀸 𑀲𑁂𑀫𑀸𑀦𑀁, 𑀬𑀸𑀦𑀺𑀲𑁆𑀲 𑀧𑀼𑀩𑁆𑀩𑁂 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀸𑀦𑀺 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀸𑀦𑀺 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀸𑀦𑀺 𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁, 𑀅𑀓𑀢𑀁 𑀓𑀼𑀲𑀮𑀁, 𑀅𑀓𑀢𑀁 𑀪𑀻𑀭𑀼𑀢𑁆𑀢𑀸𑀡𑀁; 𑀓𑀢𑀁 𑀧𑀸𑀧𑀁, 𑀓𑀢𑀁 𑀮𑀼𑀤𑁆𑀤𑀁, 𑀓𑀢𑀁 𑀓𑀺𑀩𑁆𑀩𑀺𑀲𑀁. 𑀬𑀸𑀯𑀢𑀸, 𑀪𑁄, 𑀅𑀓𑀢𑀓𑀮𑁆𑀬𑀸𑀡𑀸𑀦𑀁 𑀅𑀓𑀢𑀓𑀼𑀲𑀮𑀸𑀦𑀁 𑀅𑀓𑀢𑀪𑀻𑀭𑀼𑀢𑁆𑀢𑀸𑀡𑀸𑀦𑀁 𑀓𑀢𑀧𑀸𑀧𑀸𑀦𑀁 𑀓𑀢𑀮𑀼𑀤𑁆𑀤𑀸𑀦𑀁 𑀓𑀢𑀓𑀺𑀩𑁆𑀩𑀺𑀲𑀸𑀦𑀁 𑀕𑀢𑀺 𑀢𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀸𑀫𑀻’𑀢𑀺. 𑀲𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀢𑀢𑀺𑀬𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀬𑀁 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀏𑀓𑀦𑁆𑀢𑀁 𑀅𑀦𑀺𑀝𑁆𑀞𑀁 𑀏𑀓𑀦𑁆𑀢𑀁 𑀅𑀓𑀦𑁆𑀢𑀁 𑀏𑀓𑀦𑁆𑀢𑀁 𑀅𑀫𑀦𑀸𑀧’𑀦𑁆𑀢𑀺, 𑀦𑀺𑀭𑀬𑀫𑁂𑀯 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀏𑀓𑀦𑁆𑀢𑀁 𑀅𑀦𑀺𑀝𑁆𑀞𑀁 𑀏𑀓𑀦𑁆𑀢𑀁 𑀅𑀓𑀦𑁆𑀢𑀁 𑀏𑀓𑀦𑁆𑀢𑀁 𑀅𑀫𑀦𑀸𑀧’𑀦𑁆𑀢𑀺. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀉𑀧𑀫𑀸𑀧𑀺 [𑀉𑀧𑀫𑀸𑀳𑀺𑀧𑀺 (𑀲𑀻.)] 𑀦 𑀲𑀼𑀓𑀭𑀸 𑀬𑀸𑀯 𑀤𑀼𑀓𑁆𑀔𑀸 𑀦𑀺𑀭𑀬𑀸’’𑀢𑀺.

𑁨𑁪𑁯. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀁 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀬𑁆𑀬𑀼𑀁 𑁋 ‘𑀅𑀬𑀁 𑀔𑁄, 𑀤𑁂𑀯, 𑀘𑁄𑀭𑁄 𑀆𑀕𑀼𑀘𑀸𑀭𑀻, 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀕𑀘𑁆𑀙𑀣, 𑀪𑁄, 𑀇𑀫𑀁 𑀧𑀼𑀭𑀺𑀲𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑀣𑀸’𑀢𑀺. 𑀢𑀫𑁂𑀦𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑁂𑀬𑁆𑀬𑀼𑀁. 𑀅𑀣 𑀭𑀸𑀚𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 [𑀫𑀚𑁆𑀛𑀦𑁆𑀢𑀺𑀓𑀲𑀫𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀓.), 𑀫𑀚𑁆𑀛𑀦𑁆𑀢𑀺𑀓𑀁 𑀲𑀫𑀬𑀁 (𑀧𑀻.)] 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀫𑁆𑀪𑁄, 𑀓𑀣𑀁 𑀲𑁄 𑀧𑀼𑀭𑀺𑀲𑁄’𑀢𑀺? ‘‘‘𑀢𑀣𑁂𑀯, 𑀤𑁂𑀯, 𑀚𑀻𑀯𑀢𑀻’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀕𑀘𑁆𑀙𑀣, 𑀪𑁄, 𑀢𑀁 𑀧𑀼𑀭𑀺𑀲𑀁 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑀣𑀸’𑀢𑀺. 𑀢𑀫𑁂𑀦𑀁 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑁂𑀬𑁆𑀬𑀼𑀁. 𑀅𑀣 𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀫𑁆𑀪𑁄, 𑀓𑀣𑀁 𑀲𑁄 𑀧𑀼𑀭𑀺𑀲𑁄’𑀢𑀺? ‘𑀢𑀣𑁂𑀯, 𑀤𑁂𑀯, 𑀚𑀻𑀯𑀢𑀻’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀕𑀘𑁆𑀙𑀣, 𑀪𑁄, 𑀢𑀁 𑀧𑀼𑀭𑀺𑀲𑀁 𑀲𑀸𑀬𑀦𑁆𑀳𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑀣𑀸’𑀢𑀺. 𑀢𑀫𑁂𑀦𑀁 𑀲𑀸𑀬𑀦𑁆𑀳𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑁂𑀬𑁆𑀬𑀼𑀁. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀢𑀻𑀳𑀺 𑀲𑀢𑁆𑀢𑀺𑀲𑀢𑁂𑀳𑀺 𑀳𑀜𑁆𑀜𑀫𑀸𑀦𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑁂𑀣𑀸’’𑀢𑀺? ‘‘𑀏𑀓𑀺𑀲𑁆𑀲𑀸𑀧𑀺, 𑀪𑀦𑁆𑀢𑁂, 𑀲𑀢𑁆𑀢𑀺𑀬𑀸 𑀳𑀜𑁆𑀜𑀫𑀸𑀦𑁄 𑀲𑁄 𑀧𑀼𑀭𑀺𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑁂𑀣, 𑀓𑁄 𑀧𑀦 𑀯𑀸𑀤𑁄 𑀢𑀻𑀳𑀺 𑀲𑀢𑁆𑀢𑀺𑀲𑀢𑁂𑀳𑀻’’𑀢𑀺?

𑁨𑁫𑁦. 𑀅𑀣 𑀔𑁄 𑀪𑀕𑀯𑀸 𑀧𑀭𑀺𑀢𑁆𑀢𑀁 𑀧𑀸𑀡𑀺𑀫𑀢𑁆𑀢𑀁 𑀧𑀸𑀲𑀸𑀡𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑁄 𑀦𑀼 𑀔𑁄 𑀫𑀳𑀦𑁆𑀢𑀢𑀭𑁄 𑁋 𑀬𑁄 𑀘𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 𑀧𑀸𑀡𑀺𑀫𑀢𑁆𑀢𑁄 𑀧𑀸𑀲𑀸𑀡𑁄 𑀕𑀳𑀺𑀢𑁄, 𑀬𑁄 𑀘 𑀳𑀺𑀫𑀯𑀸 𑀧𑀩𑁆𑀩𑀢𑀭𑀸𑀚𑀸’’𑀢𑀺? ‘‘𑀅𑀧𑁆𑀧𑀫𑀢𑁆𑀢𑀓𑁄 𑀅𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀧𑀭𑀺𑀢𑁆𑀢𑁄 𑀧𑀸𑀡𑀺𑀫𑀢𑁆𑀢𑁄 𑀧𑀸𑀲𑀸𑀡𑁄 𑀕𑀳𑀺𑀢𑁄, 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀸𑀦𑀁 𑀉𑀧𑀦𑀺𑀥𑀸𑀬 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀢𑀺, 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺, 𑀉𑀧𑀦𑀺𑀥𑀫𑁆𑀧𑀺 [𑀉𑀧𑀦𑀺𑀥𑀺𑀫𑁆𑀧𑀺 (𑀲𑀻. 𑀧𑀻.)] 𑀦 𑀉𑀧𑁂𑀢𑀺’’. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀲𑁄 𑀧𑀼𑀭𑀺𑀲𑁄 𑀢𑀻𑀳𑀺 𑀲𑀢𑁆𑀢𑀺𑀲𑀢𑁂𑀳𑀺 𑀳𑀜𑁆𑀜𑀫𑀸𑀦𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀢𑀁 𑀦𑀺𑀭𑀬𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀉𑀧𑀦𑀺𑀥𑀸𑀬 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀢𑀺, 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺, 𑀉𑀧𑀦𑀺𑀥𑀫𑁆𑀧𑀺 𑀦 𑀉𑀧𑁂𑀢𑀺’’.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀁 𑀦𑀸𑀫 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀦𑁆𑀢𑀺 𑁋 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 [𑀅𑀬𑁄𑀔𑀻𑀮𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀫𑀚𑁆𑀛𑁂 𑀉𑀭𑀲𑁆𑀫𑀺𑀁 𑀕𑀫𑁂𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺 [𑀩𑁆𑀬𑀦𑁆𑀢𑀺𑀳𑁄𑀢𑀺 (𑀧𑀻. 𑀓.)]. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀲𑀁𑀯𑁂𑀲𑁂𑀢𑁆𑀯𑀸 𑀓𑀼𑀞𑀸𑀭𑀻𑀳𑀺 [𑀓𑀼𑀥𑀸𑀭𑀻𑀳𑀺 (𑀓.)] 𑀢𑀘𑁆𑀙𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸…𑀧𑁂… 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀯𑀸𑀲𑀻𑀳𑀺 𑀢𑀘𑁆𑀙𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸…𑀧𑁂… 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀆𑀤𑀺𑀢𑁆𑀢𑀸𑀬 𑀧𑀣𑀯𑀺𑀬𑀸 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 [𑀲𑀜𑁆𑀚𑁄𑀢𑀺𑀪𑀽𑀢𑀸𑀬 (𑀲𑁆𑀬𑀸. 𑀓𑀁. 𑀧𑀻.)] 𑀲𑀸𑀭𑁂𑀦𑁆𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀦𑁆𑀢𑀺𑀧𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸…𑀧𑁂… 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀫𑀳𑀦𑁆𑀢𑀁 𑀅𑀗𑁆𑀕𑀸𑀭𑀧𑀩𑁆𑀩𑀢𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀭𑁄𑀧𑁂𑀦𑁆𑀢𑀺𑀧𑀺 𑀑𑀭𑁄𑀧𑁂𑀦𑁆𑀢𑀺𑀧𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀢𑀢𑁆𑀢𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑀦𑁆𑀢𑀺 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀢𑀺. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑁄 𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀅𑀥𑁄 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀢𑀺𑀭𑀺𑀬𑀁 𑀕𑀘𑁆𑀙𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 [𑀦𑀺𑀭𑀬𑀧𑀸𑀮𑀸 𑀧𑀼𑀦𑀧𑁆𑀧𑀼𑀦𑀁 (𑀓.)] 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀲𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀦𑀺𑀭𑀬𑁄 𑁋

‘‘𑀘𑀢𑀼𑀓𑁆𑀓𑀡𑁆𑀡𑁄 𑀘𑀢𑀼𑀤𑁆𑀯𑀸𑀭𑁄, 𑀯𑀺𑀪𑀢𑁆𑀢𑁄 𑀪𑀸𑀕𑀲𑁄 𑀫𑀺𑀢𑁄;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑁄, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸’’.

‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀧𑀺 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀓𑀣𑀁 𑀓𑀣𑁂𑀬𑁆𑀬𑀁; 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀸 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀁 𑀬𑀸𑀯 𑀤𑀼𑀓𑁆𑀔𑀸 𑀦𑀺𑀭𑀬𑀸.

𑁨𑁫𑁧. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀢𑀺𑀡𑀪𑀓𑁆𑀔𑀸. 𑀢𑁂 𑀅𑀮𑁆𑀮𑀸𑀦𑀺𑀧𑀺 𑀢𑀺𑀡𑀸𑀦𑀺 𑀲𑀼𑀓𑁆𑀔𑀸𑀦𑀺𑀧𑀺 𑀢𑀺𑀡𑀸𑀦𑀺 𑀤𑀦𑁆𑀢𑀼𑀮𑁆𑀮𑁂𑀳𑀓𑀁 𑀔𑀸𑀤𑀦𑁆𑀢𑀺. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀢𑀺𑀡𑀪𑀓𑁆𑀔𑀸? 𑀳𑀢𑁆𑀣𑀻 𑀅𑀲𑁆𑀲𑀸 𑀕𑁄𑀡𑀸 𑀕𑀤𑁆𑀭𑀪𑀸 𑀅𑀚𑀸 𑀫𑀺𑀕𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀢𑀺𑀡𑀪𑀓𑁆𑀔𑀸. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀇𑀥 𑀧𑀼𑀩𑁆𑀩𑁂 𑀭𑀲𑀸𑀤𑁄 𑀇𑀥 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺 𑀬𑁂 𑀢𑁂 𑀲𑀢𑁆𑀢𑀸 𑀢𑀺𑀡𑀪𑀓𑁆𑀔𑀸.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀕𑀽𑀣𑀪𑀓𑁆𑀔𑀸. 𑀢𑁂 𑀤𑀽𑀭𑀢𑁄𑀯 𑀕𑀽𑀣𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀥𑀸𑀯𑀦𑁆𑀢𑀺 𑁋 ‘𑀏𑀢𑁆𑀣 𑀪𑀼𑀜𑁆𑀚𑀺𑀲𑁆𑀲𑀸𑀫, 𑀏𑀢𑁆𑀣 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑁆𑀭𑀸𑀳𑁆𑀫𑀡𑀸 𑀆𑀳𑀼𑀢𑀺𑀕𑀦𑁆𑀥𑁂𑀦 𑀥𑀸𑀯𑀦𑁆𑀢𑀺 𑁋 ‘𑀏𑀢𑁆𑀣 𑀪𑀼𑀜𑁆𑀚𑀺𑀲𑁆𑀲𑀸𑀫, 𑀏𑀢𑁆𑀣 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀕𑀽𑀣𑀪𑀓𑁆𑀔𑀸, 𑀢𑁂 𑀤𑀽𑀭𑀢𑁄𑀯 𑀕𑀽𑀣𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀥𑀸𑀯𑀦𑁆𑀢𑀺 𑁋 ‘𑀏𑀢𑁆𑀣 𑀪𑀼𑀜𑁆𑀚𑀺𑀲𑁆𑀲𑀸𑀫, 𑀏𑀢𑁆𑀣 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’𑀢𑀺. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀕𑀽𑀣𑀪𑀓𑁆𑀔𑀸? 𑀓𑀼𑀓𑁆𑀓𑀼𑀝𑀸 𑀲𑀽𑀓𑀭𑀸 𑀲𑁄𑀡𑀸 𑀲𑀺𑀗𑁆𑀕𑀸𑀮𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀕𑀽𑀣𑀪𑀓𑁆𑀔𑀸. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀇𑀥 𑀧𑀼𑀩𑁆𑀩𑁂 𑀭𑀲𑀸𑀤𑁄 𑀇𑀥 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺 𑀬𑁂 𑀢𑁂 𑀲𑀢𑁆𑀢𑀸 𑀕𑀽𑀣𑀪𑀓𑁆𑀔𑀸.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀅𑀦𑁆𑀥𑀓𑀸𑀭𑁂 𑀚𑀸𑀬𑀦𑁆𑀢𑀺 𑀅𑀦𑁆𑀥𑀓𑀸𑀭𑁂 𑀚𑀻𑀬𑀦𑁆𑀢𑀺 [𑀚𑀺𑀬𑁆𑀬𑀦𑁆𑀢𑀺 (𑀓.)] 𑀅𑀦𑁆𑀥𑀓𑀸𑀭𑁂 𑀫𑀻𑀬𑀦𑁆𑀢𑀺 [𑀫𑀺𑀬𑁆𑀬𑀦𑁆𑀢𑀺 (𑀓.)]. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀅𑀦𑁆𑀥𑀓𑀸𑀭𑁂 𑀚𑀸𑀬𑀦𑁆𑀢𑀺 𑀅𑀦𑁆𑀥𑀓𑀸𑀭𑁂 𑀚𑀻𑀬𑀦𑁆𑀢𑀺 𑀅𑀦𑁆𑀥𑀓𑀸𑀭𑁂 𑀫𑀻𑀬𑀦𑁆𑀢𑀺? 𑀓𑀻𑀝𑀸 𑀧𑀼𑀴𑀯𑀸 [𑀧𑀝𑀗𑁆𑀕𑀸 (𑀲𑁆𑀬𑀸. 𑀓𑀁. 𑀓.)] 𑀕𑀡𑁆𑀟𑀼𑀧𑁆𑀧𑀸𑀤𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀅𑀦𑁆𑀥𑀓𑀸𑀭𑁂 𑀚𑀸𑀬𑀦𑁆𑀢𑀺 𑀅𑀦𑁆𑀥𑀓𑀸𑀭𑁂 𑀚𑀻𑀬𑀦𑁆𑀢𑀺 𑀅𑀦𑁆𑀥𑀓𑀸𑀭𑁂 𑀫𑀻𑀬𑀦𑁆𑀢𑀺. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀇𑀥 𑀧𑀼𑀩𑁆𑀩𑁂 𑀭𑀲𑀸𑀤𑁄, 𑀇𑀥 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺 𑀬𑁂 𑀢𑁂 𑀲𑀢𑁆𑀢𑀸 𑀅𑀦𑁆𑀥𑀓𑀸𑀭𑁂 𑀚𑀸𑀬𑀦𑁆𑀢𑀺 𑀅𑀦𑁆𑀥𑀓𑀸𑀭𑁂 𑀚𑀻𑀬𑀦𑁆𑀢𑀺 𑀅𑀦𑁆𑀥𑀓𑀸𑀭𑁂 𑀫𑀻𑀬𑀦𑁆𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀉𑀤𑀓𑀲𑁆𑀫𑀺𑀁 𑀚𑀸𑀬𑀦𑁆𑀢𑀺 𑀉𑀤𑀓𑀲𑁆𑀫𑀺𑀁 𑀚𑀻𑀬𑀦𑁆𑀢𑀺 𑀉𑀤𑀓𑀲𑁆𑀫𑀺𑀁 𑀫𑀻𑀬𑀦𑁆𑀢𑀺. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀉𑀤𑀓𑀲𑁆𑀫𑀺𑀁 𑀚𑀸𑀬𑀦𑁆𑀢𑀺 𑀉𑀤𑀓𑀲𑁆𑀫𑀺𑀁 𑀚𑀻𑀬𑀦𑁆𑀢𑀺 𑀉𑀤𑀓𑀲𑁆𑀫𑀺𑀁 𑀫𑀻𑀬𑀦𑁆𑀢𑀺? 𑀫𑀘𑁆𑀙𑀸 𑀓𑀘𑁆𑀙𑀧𑀸 𑀲𑀼𑀲𑀼𑀫𑀸𑀭𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀉𑀤𑀓𑀲𑁆𑀫𑀺𑀁 𑀚𑀸𑀬𑀦𑁆𑀢𑀺 𑀉𑀤𑀓𑀲𑁆𑀫𑀺𑀁 𑀚𑀻𑀬𑀦𑁆𑀢𑀺 𑀉𑀤𑀓𑀲𑁆𑀫𑀺𑀁 𑀫𑀻𑀬𑀦𑁆𑀢𑀺. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀇𑀥 𑀧𑀼𑀩𑁆𑀩𑁂 𑀭𑀲𑀸𑀤𑁄 𑀇𑀥 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺 𑀬𑁂 𑀢𑁂 𑀲𑀢𑁆𑀢𑀸 𑀉𑀤𑀓𑀲𑁆𑀫𑀺𑀁 𑀚𑀸𑀬𑀦𑁆𑀢𑀺 𑀉𑀤𑀓𑀲𑁆𑀫𑀺𑀁 𑀚𑀻𑀬𑀦𑁆𑀢𑀺 𑀉𑀤𑀓𑀲𑁆𑀫𑀺𑀁 𑀫𑀻𑀬𑀦𑁆𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀅𑀲𑀼𑀘𑀺𑀲𑁆𑀫𑀺𑀁 𑀚𑀸𑀬𑀦𑁆𑀢𑀺 𑀅𑀲𑀼𑀘𑀺𑀲𑁆𑀫𑀺𑀁 𑀚𑀻𑀬𑀦𑁆𑀢𑀺 𑀅𑀲𑀼𑀘𑀺𑀲𑁆𑀫𑀺𑀁 𑀫𑀻𑀬𑀦𑁆𑀢𑀺. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀅𑀲𑀼𑀘𑀺𑀲𑁆𑀫𑀺𑀁 𑀚𑀸𑀬𑀦𑁆𑀢𑀺 𑀅𑀲𑀼𑀘𑀺𑀲𑁆𑀫𑀺𑀁 𑀚𑀻𑀬𑀦𑁆𑀢𑀺 𑀅𑀲𑀼𑀘𑀺𑀲𑁆𑀫𑀺𑀁 𑀫𑀻𑀬𑀦𑁆𑀢𑀺? 𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀧𑀽𑀢𑀺𑀫𑀘𑁆𑀙𑁂 𑀯𑀸 𑀚𑀸𑀬𑀦𑁆𑀢𑀺 𑀧𑀽𑀢𑀺𑀫𑀘𑁆𑀙𑁂 𑀯𑀸 𑀚𑀻𑀬𑀦𑁆𑀢𑀺 𑀧𑀽𑀢𑀺𑀫𑀘𑁆𑀙𑁂 𑀯𑀸 𑀫𑀻𑀬𑀦𑁆𑀢𑀺 𑀧𑀽𑀢𑀺𑀓𑀼𑀡𑀧𑁂 𑀯𑀸…𑀧𑁂… 𑀧𑀽𑀢𑀺𑀓𑀼𑀫𑁆𑀫𑀸𑀲𑁂 𑀯𑀸… 𑀘𑀦𑁆𑀤𑀦𑀺𑀓𑀸𑀬 𑀯𑀸… 𑀑𑀮𑀺𑀕𑀮𑁆𑀮𑁂 𑀯𑀸 𑀚𑀸𑀬𑀦𑁆𑀢𑀺, (𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀅𑀲𑀼𑀘𑀺𑀲𑁆𑀫𑀺𑀁 𑀚𑀸𑀬𑀦𑁆𑀢𑀺 𑀅𑀲𑀼𑀘𑀺𑀲𑁆𑀫𑀺𑀁 𑀚𑀻𑀬𑀦𑁆𑀢𑀺 𑀅𑀲𑀼𑀘𑀺𑀲𑁆𑀫𑀺𑀁 𑀫𑀻𑀬𑀦𑁆𑀢𑀺.) [( ) 𑀦𑀢𑁆𑀣𑀺 𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀇𑀥 𑀧𑀼𑀩𑁆𑀩𑁂 𑀭𑀲𑀸𑀤𑁄 𑀇𑀥 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺 𑀬𑁂 𑀢𑁂 𑀲𑀢𑁆𑀢𑀸 𑀅𑀲𑀼𑀘𑀺𑀲𑁆𑀫𑀺𑀁 𑀚𑀸𑀬𑀦𑁆𑀢𑀺 𑀅𑀲𑀼𑀘𑀺𑀲𑁆𑀫𑀺𑀁 𑀚𑀻𑀬𑀦𑁆𑀢𑀺 𑀅𑀲𑀼𑀘𑀺𑀲𑁆𑀫𑀺𑀁 𑀫𑀻𑀬𑀦𑁆𑀢𑀺.

‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀧𑀺 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀣𑀁 𑀓𑀣𑁂𑀬𑁆𑀬𑀁; 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀁 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀁 𑀬𑀸𑀯 𑀤𑀼𑀓𑁆𑀔𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺.

𑁨𑁫𑁨. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀏𑀓𑀘𑁆𑀙𑀺𑀕𑁆𑀕𑀮𑀁 𑀬𑀼𑀕𑀁 𑀫𑀳𑀸𑀲𑀫𑀼𑀤𑁆𑀤𑁂 𑀧𑀓𑁆𑀔𑀺𑀧𑁂𑀬𑁆𑀬. 𑀢𑀫𑁂𑀦𑀁 𑀧𑀼𑀭𑀢𑁆𑀣𑀺𑀫𑁄 𑀯𑀸𑀢𑁄 𑀧𑀘𑁆𑀙𑀺𑀫𑁂𑀦 𑀲𑀁𑀳𑀭𑁂𑀬𑁆𑀬, 𑀧𑀘𑁆𑀙𑀺𑀫𑁄 𑀯𑀸𑀢𑁄 𑀧𑀼𑀭𑀢𑁆𑀣𑀺𑀫𑁂𑀦 𑀲𑀁𑀳𑀭𑁂𑀬𑁆𑀬, 𑀉𑀢𑁆𑀢𑀭𑁄 𑀯𑀸𑀢𑁄 𑀤𑀓𑁆𑀔𑀺𑀡𑁂𑀦 𑀲𑀁𑀳𑀭𑁂𑀬𑁆𑀬, 𑀤𑀓𑁆𑀔𑀺𑀡𑁄 𑀯𑀸𑀢𑁄 𑀉𑀢𑁆𑀢𑀭𑁂𑀦 𑀲𑀁𑀳𑀭𑁂𑀬𑁆𑀬. 𑀢𑀢𑁆𑀭𑀸𑀲𑁆𑀲 𑀓𑀸𑀡𑁄 𑀓𑀘𑁆𑀙𑀧𑁄, 𑀲𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 [𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀳𑀲𑁆𑀲𑀲𑁆𑀲 𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲 (𑀲𑀻.), 𑀯𑀲𑁆𑀲𑀲𑀢𑀲𑁆𑀲 (𑀲𑁆𑀬𑀸. 𑀓𑀁. 𑀧𑀻.)] 𑀅𑀘𑁆𑀘𑀬𑁂𑀦 𑀲𑀓𑀺𑀁 𑀉𑀫𑁆𑀫𑀼𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑁄 𑀓𑀸𑀡𑁄 𑀓𑀘𑁆𑀙𑀧𑁄 𑀅𑀫𑀼𑀲𑁆𑀫𑀺𑀁 𑀏𑀓𑀘𑁆𑀙𑀺𑀕𑁆𑀕𑀮𑁂 𑀬𑀼𑀕𑁂 𑀕𑀻𑀯𑀁 𑀧𑀯𑁂𑀲𑁂𑀬𑁆𑀬𑀸’’𑀢𑀺? (‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.) [( ) 𑀦𑀢𑁆𑀣𑀺 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼] ‘‘𑀬𑀤𑀺 𑀧𑀦 [𑀬𑀤𑀺 𑀦𑀽𑀦 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀪𑀦𑁆𑀢𑁂, 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦𑀸’’𑀢𑀺. ‘‘𑀔𑀺𑀧𑁆𑀧𑀢𑀭𑀁 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀓𑀸𑀡𑁄 𑀓𑀘𑁆𑀙𑀧𑁄 𑀅𑀫𑀼𑀲𑁆𑀫𑀺𑀁 𑀏𑀓𑀘𑁆𑀙𑀺𑀕𑁆𑀕𑀮𑁂 𑀬𑀼𑀕𑁂 𑀕𑀻𑀯𑀁 𑀧𑀯𑁂𑀲𑁂𑀬𑁆𑀬, 𑀅𑀢𑁄 𑀤𑀼𑀮𑁆𑀮𑀪𑀢𑀭𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀢𑁆𑀢𑀁 𑀯𑀤𑀸𑀫𑀺 𑀲𑀓𑀺𑀁 𑀯𑀺𑀦𑀺𑀧𑀸𑀢𑀕𑀢𑁂𑀦 𑀩𑀸𑀮𑁂𑀦. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦 𑀳𑁂𑀢𑁆𑀣, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀥𑀫𑁆𑀫𑀘𑀭𑀺𑀬𑀸 𑀲𑀫𑀘𑀭𑀺𑀬𑀸 𑀓𑀼𑀲𑀮𑀓𑀺𑀭𑀺𑀬𑀸 𑀧𑀼𑀜𑁆𑀜𑀓𑀺𑀭𑀺𑀬𑀸. 𑀅𑀜𑁆𑀜𑀫𑀜𑁆𑀜𑀔𑀸𑀤𑀺𑀓𑀸 𑀏𑀢𑁆𑀣, 𑀪𑀺𑀓𑁆𑀔𑀯𑁂, 𑀯𑀢𑁆𑀢𑀢𑀺 𑀤𑀼𑀩𑁆𑀩𑀮𑀔𑀸𑀤𑀺𑀓𑀸’’.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀲𑀘𑁂 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀫𑀦𑀼𑀲𑁆𑀲𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀬𑀸𑀦𑀺 𑀢𑀸𑀦𑀺 𑀦𑀻𑀘𑀓𑀼𑀮𑀸𑀦𑀺 𑁋 𑀘𑀡𑁆𑀟𑀸𑀮𑀓𑀼𑀮𑀁 𑀯𑀸 𑀦𑁂𑀲𑀸𑀤𑀓𑀼𑀮𑀁 𑀯𑀸 𑀯𑁂𑀦𑀓𑀼𑀮𑀁 [𑀯𑁂𑀡𑀓𑀼𑀮𑀁 (𑀲𑀻. 𑀧𑀻.)] 𑀯𑀸 𑀭𑀣𑀓𑀸𑀭𑀓𑀼𑀮𑀁 𑀯𑀸 𑀧𑀼𑀓𑁆𑀓𑀼𑀲𑀓𑀼𑀮𑀁 𑀯𑀸. 𑀢𑀣𑀸𑀭𑀽𑀧𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀬𑀢𑀺 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑀪𑁄𑀚𑀦𑁂 𑀓𑀲𑀺𑀭𑀯𑀼𑀢𑁆𑀢𑀺𑀓𑁂, 𑀬𑀢𑁆𑀣 𑀓𑀲𑀺𑀭𑁂𑀦 𑀖𑀸𑀲𑀘𑁆𑀙𑀸𑀤𑁄 𑀮𑀩𑁆𑀪𑀢𑀺. 𑀲𑁄 𑀘 𑀳𑁄𑀢𑀺 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀑𑀓𑁄𑀝𑀺𑀫𑀓𑁄 𑀩𑀯𑁆𑀳𑀸𑀩𑀸𑀥𑁄 [𑀩𑀳𑁆𑀯𑀸𑀩𑀸𑀥𑁄 (𑀓.)] 𑀓𑀸𑀡𑁄 𑀯𑀸 𑀓𑀼𑀡𑀻 𑀯𑀸 𑀔𑀼𑀚𑁆𑀚𑁄 𑀯𑀸 𑀧𑀓𑁆𑀔𑀳𑀢𑁄 𑀯𑀸 𑀦 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀓𑁆𑀔𑀥𑀼𑀢𑁆𑀢𑁄 𑀧𑀞𑀫𑁂𑀦𑁂𑀯 𑀓𑀮𑀺𑀕𑁆𑀕𑀳𑁂𑀦 𑀧𑀼𑀢𑁆𑀢𑀫𑁆𑀧𑀺 𑀚𑀻𑀬𑁂𑀣, 𑀤𑀸𑀭𑀫𑁆𑀧𑀺 𑀚𑀻𑀬𑁂𑀣, 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀫𑁆𑀧𑀺 𑀚𑀻𑀬𑁂𑀣, 𑀉𑀢𑁆𑀢𑀭𑀺𑀧𑀺 𑀅𑀥𑀺𑀩𑀦𑁆𑀥𑀁 [𑀅𑀦𑀼𑀩𑀦𑁆𑀥𑀁 (𑀲𑀻. 𑀧𑀻.), 𑀅𑀤𑁆𑀥𑀼𑀩𑀦𑁆𑀥𑀁 (𑀲𑁆𑀬𑀸. 𑀓𑀁.)] 𑀦𑀺𑀕𑀘𑁆𑀙𑁂𑀬𑁆𑀬. 𑀅𑀧𑁆𑀧𑀫𑀢𑁆𑀢𑀓𑁄 𑀲𑁄, 𑀪𑀺𑀓𑁆𑀔𑀯𑁂, 𑀓𑀮𑀺𑀕𑁆𑀕𑀳𑁄 𑀬𑀁 𑀲𑁄 𑀅𑀓𑁆𑀔𑀥𑀼𑀢𑁆𑀢𑁄 𑀧𑀞𑀫𑁂𑀦𑁂𑀯 𑀓𑀮𑀺𑀕𑁆𑀕𑀳𑁂𑀦 𑀧𑀼𑀢𑁆𑀢𑀫𑁆𑀧𑀺 𑀚𑀻𑀬𑁂𑀣, 𑀤𑀸𑀭𑀫𑁆𑀧𑀺 𑀚𑀻𑀬𑁂𑀣, 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀫𑁆𑀧𑀺 𑀚𑀻𑀬𑁂𑀣, 𑀉𑀢𑁆𑀢𑀭𑀺𑀧𑀺 𑀅𑀥𑀺𑀩𑀦𑁆𑀥𑀁 𑀦𑀺𑀕𑀘𑁆𑀙𑁂𑀬𑁆𑀬. 𑀅𑀣 𑀔𑁄 𑀅𑀬𑀫𑁂𑀯 𑀢𑀢𑁄 𑀫𑀳𑀦𑁆𑀢𑀢𑀭𑁄 𑀓𑀮𑀺𑀕𑁆𑀕𑀳𑁄 𑀬𑀁 𑀲𑁄 𑀩𑀸𑀮𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀓𑁂𑀯𑀮𑀸 𑀧𑀭𑀺𑀧𑀽𑀭𑀸 [𑀓𑁂𑀯𑀮𑀧𑀭𑀺𑀧𑀽𑀭𑀸 (𑀲𑀻. 𑀧𑀻.) 𑀫. 𑀦𑀺. 𑁧.𑁨𑁪𑁪 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑁂𑀢𑀩𑁆𑀩𑀸] 𑀩𑀸𑀮𑀪𑀽𑀫𑀻’’𑀢𑀺.

𑁨𑁫𑁩. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀺 𑀧𑀡𑁆𑀟𑀺𑀢𑀦𑀺𑀫𑀺𑀢𑁆𑀢𑀸𑀦𑀺 𑀧𑀡𑁆𑀟𑀺𑀢𑀸𑀧𑀤𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀳𑁄𑀢𑀺 𑀲𑀼𑀪𑀸𑀲𑀺𑀢𑀪𑀸𑀲𑀻 𑀘 𑀲𑀼𑀓𑀢𑀓𑀫𑁆𑀫𑀓𑀸𑀭𑀻 𑀘. 𑀦𑁄 𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀅𑀪𑀯𑀺𑀲𑁆𑀲 𑀲𑀼𑀪𑀸𑀲𑀺𑀢𑀪𑀸𑀲𑀻 𑀘 𑀲𑀼𑀓𑀢𑀓𑀫𑁆𑀫𑀓𑀸𑀭𑀻 𑀘, 𑀓𑁂𑀦 𑀦𑀁 [𑀦 𑀢𑁂𑀦 𑀦𑀁 (𑀓.), 𑀦 𑀦𑀁 (?)] 𑀧𑀡𑁆𑀟𑀺𑀢𑀸 𑀚𑀸𑀦𑁂𑀬𑁆𑀬𑀼𑀁 𑁋 ‘𑀧𑀡𑁆𑀟𑀺𑀢𑁄 𑀅𑀬𑀁 𑀪𑀯𑀁 𑀲𑀧𑁆𑀧𑀼𑀭𑀺𑀲𑁄’𑀢𑀺? 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀳𑁄𑀢𑀺 𑀲𑀼𑀪𑀸𑀲𑀺𑀢𑀪𑀸𑀲𑀻 𑀘 𑀲𑀼𑀓𑀢𑀓𑀫𑁆𑀫𑀓𑀸𑀭𑀻 𑀘 𑀢𑀲𑁆𑀫𑀸 𑀦𑀁 𑀧𑀡𑁆𑀟𑀺𑀢𑀸 𑀚𑀸𑀦𑀦𑁆𑀢𑀺 𑁋 ‘𑀧𑀡𑁆𑀟𑀺𑀢𑁄 𑀅𑀬𑀁 𑀪𑀯𑀁 𑀲𑀧𑁆𑀧𑀼𑀭𑀺𑀲𑁄’𑀢𑀺. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀢𑀺𑀯𑀺𑀥𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀲𑀪𑀸𑀬𑀁 𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀭𑀣𑀺𑀓𑀸𑀬 𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑀺𑀗𑁆𑀖𑀸𑀝𑀓𑁂 𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺; 𑀢𑀢𑁆𑀭 𑀘𑁂 𑀚𑀦𑁄 𑀢𑀚𑁆𑀚𑀁 𑀢𑀲𑁆𑀲𑀸𑀭𑀼𑀧𑁆𑀧𑀁 𑀓𑀣𑀁 𑀫𑀦𑁆𑀢𑁂𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺; 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑀁 𑀔𑁄 𑀚𑀦𑁄 𑀢𑀚𑁆𑀚𑀁 𑀢𑀲𑁆𑀲𑀸𑀭𑀼𑀧𑁆𑀧𑀁 𑀓𑀣𑀁 𑀫𑀦𑁆𑀢𑁂𑀢𑀺; 𑀲𑀁𑀯𑀺𑀚𑁆𑀚𑀦𑁆𑀢𑁂𑀯 𑀢𑁂 𑀥𑀫𑁆𑀫𑀸 𑀫𑀬𑀺, 𑀅𑀳𑀜𑁆𑀘 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀦𑁆𑀤𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀧𑀞𑀫𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

𑁨𑁫𑁪. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀧𑀲𑁆𑀲𑀢𑀺 𑀭𑀸𑀚𑀸𑀦𑁄 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑁂 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑁂 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑁂 𑀅𑀤𑁆𑀥𑀤𑀡𑁆𑀟𑀓𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑁂 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀦𑁆𑀢𑁂 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀩𑀮𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑁆𑀢𑁂 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑁂 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑁂 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑁂. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑀣𑀸𑀭𑀽𑀧𑀸𑀦𑀁 𑀔𑁄 𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀳𑁂𑀢𑀼 𑀭𑀸𑀚𑀸𑀦𑁄 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑀺 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀅𑀤𑁆𑀥𑀤𑀡𑁆𑀟𑀓𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀩𑀮𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑁆𑀢𑀺, 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑀺, 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑀺, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺, 𑀦 𑀢𑁂 𑀥𑀫𑁆𑀫𑀸 𑀫𑀬𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀅𑀳𑀜𑁆𑀘 𑀦 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀦𑁆𑀤𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀤𑀼𑀢𑀺𑀬𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

𑁨𑁫𑁫. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀁 𑀧𑀻𑀞𑀲𑀫𑀸𑀭𑀽𑀴𑁆𑀳𑀁 𑀯𑀸 𑀫𑀜𑁆𑀘𑀲𑀫𑀸𑀭𑀽𑀴𑁆𑀳𑀁 𑀯𑀸 𑀙𑀫𑀸𑀬𑀁 𑀯𑀸 𑀲𑁂𑀫𑀸𑀦𑀁, 𑀬𑀸𑀦𑀺𑀲𑁆𑀲 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀓𑀸𑀬𑁂𑀦 𑀲𑀼𑀘𑀭𑀺𑀢𑀸𑀦𑀺 𑀯𑀸𑀘𑀸𑀬 𑀲𑀼𑀘𑀭𑀺𑀢𑀸𑀦𑀺 𑀫𑀦𑀲𑀸 𑀲𑀼𑀘𑀭𑀺𑀢𑀸𑀦𑀺 𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺…𑀧𑁂… 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀢𑀁 𑀧𑀩𑁆𑀩𑀢𑀓𑀽𑀝𑀸𑀦𑀁 𑀙𑀸𑀬𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀣𑀯𑀺𑀬𑀸 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀁 𑀧𑀻𑀞𑀲𑀫𑀸𑀭𑀽𑀴𑁆𑀳𑀁 𑀯𑀸 𑀫𑀜𑁆𑀘𑀲𑀫𑀸𑀭𑀽𑀴𑁆𑀳𑀁 𑀯𑀸 𑀙𑀫𑀸𑀬𑀁 𑀯𑀸 𑀲𑁂𑀫𑀸𑀦𑀁 𑀬𑀸𑀦𑀺𑀲𑁆𑀲 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀓𑀸𑀬𑁂𑀦 𑀲𑀼𑀘𑀭𑀺𑀢𑀸𑀦𑀺 𑀯𑀸𑀘𑀸𑀬 𑀲𑀼𑀘𑀭𑀺𑀢𑀸𑀦𑀺 𑀫𑀦𑀲𑀸 𑀲𑀼𑀘𑀭𑀺𑀢𑀸𑀦𑀺 𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀓𑀢𑀁 𑀯𑀢 𑀫𑁂 𑀧𑀸𑀧𑀁, 𑀅𑀓𑀢𑀁 𑀮𑀼𑀤𑁆𑀤𑀁, 𑀅𑀓𑀢𑀁 𑀓𑀺𑀩𑁆𑀩𑀺𑀲𑀁; 𑀓𑀢𑀁 𑀓𑀮𑁆𑀬𑀸𑀡𑀁, 𑀓𑀢𑀁 𑀓𑀼𑀲𑀮𑀁, 𑀓𑀢𑀁 𑀪𑀻𑀭𑀼𑀢𑁆𑀢𑀸𑀡𑀁. 𑀬𑀸𑀯𑀢𑀸, 𑀪𑁄, 𑀅𑀓𑀢𑀧𑀸𑀧𑀸𑀦𑀁 𑀅𑀓𑀢𑀮𑀼𑀤𑁆𑀤𑀸𑀦𑀁 𑀅𑀓𑀢𑀓𑀺𑀩𑁆𑀩𑀺𑀲𑀸𑀦𑀁 𑀓𑀢𑀓𑀮𑁆𑀬𑀸𑀡𑀸𑀦𑀁 𑀓𑀢𑀓𑀼𑀲𑀮𑀸𑀦𑀁 𑀓𑀢𑀪𑀻𑀭𑀼𑀢𑁆𑀢𑀸𑀡𑀸𑀦𑀁 𑀕𑀢𑀺 𑀢𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀸𑀫𑀻’𑀢𑀺. 𑀲𑁄 𑀦 𑀲𑁄𑀘𑀢𑀺, 𑀦 𑀓𑀺𑀮𑀫𑀢𑀺, 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀢𑀢𑀺𑀬𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀬𑀁 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀏𑀓𑀦𑁆𑀢𑀁 𑀇𑀝𑁆𑀞𑀁 𑀏𑀓𑀦𑁆𑀢𑀁 𑀓𑀦𑁆𑀢𑀁 𑀏𑀓𑀦𑁆𑀢𑀁 𑀫𑀦𑀸𑀧’𑀦𑁆𑀢𑀺, 𑀲𑀕𑁆𑀕𑀫𑁂𑀯 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀏𑀓𑀦𑁆𑀢𑀁 𑀇𑀝𑁆𑀞𑀁 𑀏𑀓𑀦𑁆𑀢𑀁 𑀓𑀦𑁆𑀢𑀁 𑀏𑀓𑀦𑁆𑀢𑀁 𑀫𑀦𑀸𑀧’𑀦𑁆𑀢𑀺. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀉𑀧𑀫𑀸𑀧𑀺 𑀦 𑀲𑀼𑀓𑀭𑀸 𑀬𑀸𑀯 𑀲𑀼𑀔𑀸 𑀲𑀕𑁆𑀕𑀸’’𑀢𑀺.

𑁨𑁫𑁬. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀁 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀘 𑀇𑀤𑁆𑀥𑀻𑀳𑀺 𑀢𑀢𑁄𑀦𑀺𑀤𑀸𑀦𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀲𑀻𑀲𑀁𑀦𑁆𑀳𑀸𑀢𑀲𑁆𑀲 𑀉𑀧𑁄𑀲𑀣𑀺𑀓𑀲𑁆𑀲 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺 𑀲𑀳𑀲𑁆𑀲𑀸𑀭𑀁 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁. 𑀢𑀁 𑀤𑀺𑀲𑁆𑀯𑀸𑀦 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀏𑀯𑀁 𑀳𑁄𑀢𑀺 [𑀏𑀢𑀤𑀳𑁄𑀲𑀺 (𑀲𑁆𑀬𑀸. 𑀓𑀁. 𑀓.)] 𑁋 ‘𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀬𑀲𑁆𑀲 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀲𑀻𑀲𑀁𑀦𑁆𑀳𑀸𑀢𑀲𑁆𑀲 𑀉𑀧𑁄𑀲𑀣𑀺𑀓𑀲𑁆𑀲 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺 𑀲𑀳𑀲𑁆𑀲𑀸𑀭𑀁 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁, 𑀲𑁄 𑀳𑁄𑀢𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻𑀢𑀺. 𑀅𑀲𑁆𑀲𑀁 𑀦𑀼 𑀔𑁄 𑀅𑀳𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’’’𑀢𑀺?

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀢𑀺 𑁋 ‘𑀧𑀯𑀢𑁆𑀢𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦𑀁, 𑀅𑀪𑀺𑀯𑀺𑀚𑀺𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’𑀦𑁆𑀢𑀺. 𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀭𑀢𑀦𑀁 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀧𑀯𑀢𑁆𑀢𑀢𑀺. 𑀅𑀦𑁆𑀯𑀤𑁂𑀯 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑀲𑁆𑀫𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀤𑁂𑀲𑁂 𑀘𑀓𑁆𑀓𑀭𑀢𑀦𑀁 𑀧𑀢𑀺𑀝𑁆𑀞𑀸𑀢𑀺 𑀢𑀢𑁆𑀣 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀯𑀸𑀲𑀁 𑀉𑀧𑁂𑀢𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄 𑀢𑁂 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀏𑀳𑀺 𑀔𑁄, 𑀫𑀳𑀸𑀭𑀸𑀚! 𑀲𑁆𑀯𑀸𑀕𑀢𑀁 𑀢𑁂, 𑀫𑀳𑀸𑀭𑀸𑀚 [𑀲𑁆𑀯𑀸𑀕𑀢𑀁 𑀫𑀳𑀸𑀭𑀸𑀚 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]! 𑀲𑀓𑀁 𑀢𑁂, 𑀫𑀳𑀸𑀭𑀸𑀚! 𑀅𑀦𑀼𑀲𑀸𑀲, 𑀫𑀳𑀸𑀭𑀸𑀚𑀸’𑀢𑀺. 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀏𑀯𑀫𑀸𑀳 𑁋 ‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦𑀸𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀸, 𑀫𑀼𑀲𑀸 𑀦 𑀪𑀸𑀲𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁, 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’𑀢𑀺. 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄 𑀢𑁂 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀅𑀦𑀼𑀬𑀦𑁆𑀢𑀸 [𑀅𑀦𑀼𑀬𑀼𑀢𑁆𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀯𑀦𑁆𑀢𑀺 [𑀅𑀳𑁂𑀲𑀼𑀁 (𑀲𑁆𑀬𑀸. 𑀓𑀁. 𑀓.)].

𑁨𑁫𑁭. ‘‘𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀭𑀢𑀦𑀁 𑀧𑀼𑀭𑀢𑁆𑀣𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 [𑀅𑀚𑁆𑀛𑁄𑀕𑀳𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀯𑀢𑁆𑀢𑀢𑀺…𑀧𑁂… 𑀤𑀓𑁆𑀔𑀺𑀡𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀧𑀯𑀢𑁆𑀢𑀢𑀺… 𑀧𑀘𑁆𑀙𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀉𑀢𑁆𑀢𑀭𑀁 𑀤𑀺𑀲𑀁 𑀧𑀯𑀢𑁆𑀢𑀢𑀺 𑀅𑀦𑁆𑀯𑀤𑁂𑀯 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑀲𑁆𑀫𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀤𑁂𑀲𑁂 𑀘𑀓𑁆𑀓𑀭𑀢𑀦𑀁 𑀧𑀢𑀺𑀝𑁆𑀞𑀸𑀢𑀺 𑀢𑀢𑁆𑀣 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀯𑀸𑀲𑀁 𑀉𑀧𑁂𑀢𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬.

‘‘𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄 𑀢𑁂 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀏𑀳𑀺 𑀔𑁄, 𑀫𑀳𑀸𑀭𑀸𑀚! 𑀲𑁆𑀯𑀸𑀕𑀢𑀁 𑀢𑁂, 𑀫𑀳𑀸𑀭𑀸𑀚! 𑀲𑀓𑀁 𑀢𑁂, 𑀫𑀳𑀸𑀭𑀸𑀚! 𑀅𑀦𑀼𑀲𑀸𑀲, 𑀫𑀳𑀸𑀭𑀸𑀚𑀸’𑀢𑀺. 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀏𑀯𑀫𑀸𑀳 𑁋 ‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦𑀸𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀸, 𑀫𑀼𑀲𑀸 𑀦 𑀪𑀸𑀲𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁; 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’𑀢𑀺. 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄 𑀢𑁂 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀅𑀦𑀼𑀬𑀦𑁆𑀢𑀸 𑀪𑀯𑀦𑁆𑀢𑀺.

‘‘𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀭𑀢𑀦𑀁 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀢𑀫𑁂𑀯 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑁂 𑀅𑀓𑁆𑀔𑀸𑀳𑀢𑀁 𑀫𑀜𑁆𑀜𑁂 𑀢𑀺𑀝𑁆𑀞𑀢𑀺 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑀁 𑀉𑀧𑀲𑁄𑀪𑀬𑀫𑀸𑀦𑀁. 𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀏𑀯𑀭𑀽𑀧𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺.

𑁨𑁫𑁮. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀳𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺 𑁋 𑀲𑀩𑁆𑀩𑀲𑁂𑀢𑁄 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸. 𑀢𑀁 𑀤𑀺𑀲𑁆𑀯𑀸𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺 𑁋 ‘𑀪𑀤𑁆𑀤𑀓𑀁 𑀯𑀢, 𑀪𑁄, 𑀳𑀢𑁆𑀣𑀺𑀬𑀸𑀦𑀁, 𑀲𑀘𑁂 𑀤𑀫𑀣𑀁 𑀉𑀧𑁂𑀬𑁆𑀬𑀸’𑀢𑀺. 𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀺𑀭𑀢𑀦𑀁 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀪𑀤𑁆𑀤𑁄 𑀳𑀢𑁆𑀣𑀸𑀚𑀸𑀦𑀻𑀬𑁄 𑀤𑀻𑀖𑀭𑀢𑁆𑀢𑀁 𑀲𑀼𑀧𑀭𑀺𑀤𑀦𑁆𑀢𑁄 𑀏𑀯𑀫𑁂𑀯 𑀤𑀫𑀣𑀁 𑀉𑀧𑁂𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀢𑀫𑁂𑀯 𑀳𑀢𑁆𑀣𑀺𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀢𑀫𑁂𑀯 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀸𑀢𑀭𑀸𑀲𑀫𑀓𑀸𑀲𑀺. 𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀏𑀯𑀭𑀽𑀧𑀁 𑀳𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀅𑀲𑁆𑀲𑀭𑀢𑀦𑀁 𑀧𑀸𑀢𑀼𑀪𑀯𑀢𑀺 𑁋 𑀲𑀩𑁆𑀩𑀲𑁂𑀢𑁄 𑀓𑀸𑀴𑀲𑀻𑀲𑁄 𑀫𑀼𑀜𑁆𑀚𑀓𑁂𑀲𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀯𑀮𑀸𑀳𑀓𑁄 𑀦𑀸𑀫 𑀅𑀲𑁆𑀲𑀭𑀸𑀚𑀸. 𑀢𑀁 𑀤𑀺𑀲𑁆𑀯𑀸𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺 𑁋 ‘𑀪𑀤𑁆𑀤𑀓𑀁 𑀯𑀢, 𑀪𑁄, 𑀅𑀲𑁆𑀲𑀬𑀸𑀦𑀁, 𑀲𑀘𑁂 𑀤𑀫𑀣𑀁 𑀉𑀧𑁂𑀬𑁆𑀬𑀸’𑀢𑀺. 𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀭𑀢𑀦𑀁 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀪𑀤𑁆𑀤𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀤𑀻𑀖𑀭𑀢𑁆𑀢𑀁 𑀲𑀼𑀧𑀭𑀺𑀤𑀦𑁆𑀢𑁄 𑀏𑀯𑀫𑁂𑀯 𑀤𑀫𑀣𑀁 𑀉𑀧𑁂𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀢𑀫𑁂𑀯 𑀅𑀲𑁆𑀲𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀢𑀫𑁂𑀯 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀸𑀢𑀭𑀸𑀲𑀫𑀓𑀸𑀲𑀺. 𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀏𑀯𑀭𑀽𑀧𑀁 𑀅𑀲𑁆𑀲𑀭𑀢𑀦𑀁 𑀧𑀸𑀢𑀼𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀫𑀡𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀲𑁄 𑀳𑁄𑀢𑀺 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄. 𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀡𑀺𑀭𑀢𑀦𑀲𑁆𑀲 𑀆𑀪𑀸 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀨𑀼𑀝𑀸 𑀳𑁄𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀢𑀫𑁂𑀯 𑀫𑀡𑀺𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀡𑀺𑀁 𑀥𑀚𑀕𑁆𑀕𑀁 𑀆𑀭𑁄𑀧𑁂𑀢𑁆𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬 𑀧𑀸𑀬𑀸𑀲𑀺. 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀦𑁆𑀢𑀸 𑀕𑀸𑀫𑀸 𑀅𑀳𑁂𑀲𑀼𑀁 𑀢𑁂 𑀢𑁂𑀦𑁄𑀪𑀸𑀲𑁂𑀦 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀲𑀼𑀁 ‘𑀤𑀺𑀯𑀸’𑀢𑀺 𑀫𑀜𑁆𑀜𑀫𑀸𑀦𑀸. 𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀏𑀯𑀭𑀽𑀧𑀁 𑀫𑀡𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀲𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸 𑀦𑀸𑀢𑀺𑀓𑀸𑀴𑀺𑀓𑀸 [𑀦𑀸𑀢𑀺𑀓𑀸𑀴𑀻 (𑀲𑀻. 𑀧𑀻.)] 𑀦𑀸𑀘𑁆𑀘𑁄𑀤𑀸𑀢𑀸, 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀁 𑀯𑀡𑁆𑀡𑀁, 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀁 𑀯𑀡𑁆𑀡𑀁. 𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀏𑀯𑀭𑀽𑀧𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀳𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀢𑀽𑀮𑀧𑀺𑀘𑀼𑀦𑁄 𑀯𑀸 𑀓𑀧𑁆𑀧𑀸𑀲𑀧𑀺𑀘𑀼𑀦𑁄 𑀯𑀸. 𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀲𑀻𑀢𑁂 𑀉𑀡𑁆𑀳𑀸𑀦𑀺 𑀕𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀡𑁆𑀳𑁂 𑀲𑀻𑀢𑀸𑀦𑀺 𑀕𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺. 𑀢𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀭𑀢𑀦𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻 𑀳𑁄𑀢𑀺 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻 𑀫𑀦𑀸𑀧𑀘𑀸𑀭𑀺𑀦𑀻 𑀧𑀺𑀬𑀯𑀸𑀤𑀺𑀦𑀻. 𑀢𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀭𑀢𑀦𑀁 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀫𑀦𑀲𑀸𑀧𑀺 𑀦𑁄 𑀅𑀢𑀺𑀘𑀭𑀢𑀺, 𑀓𑀼𑀢𑁄 𑀧𑀦 𑀓𑀸𑀬𑁂𑀦? 𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀏𑀯𑀭𑀽𑀧𑀁 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀚𑀁 𑀤𑀺𑀩𑁆𑀩𑀘𑀓𑁆𑀔𑀼 𑀧𑀸𑀢𑀼𑀪𑀯𑀢𑀺, 𑀬𑁂𑀦 𑀦𑀺𑀥𑀺𑀁 𑀧𑀲𑁆𑀲𑀢𑀺 𑀲𑀲𑁆𑀲𑀸𑀫𑀺𑀓𑀫𑁆𑀧𑀺 𑀅𑀲𑁆𑀲𑀸𑀫𑀺𑀓𑀫𑁆𑀧𑀺. 𑀲𑁄 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺. 𑀅𑀳𑀁 𑀢𑁂 𑀥𑀦𑁂𑀦 𑀥𑀦𑀓𑀭𑀡𑀻𑀬𑀁 [𑀥𑀦𑁂𑀦 𑀓𑀭𑀡𑀻𑀬𑀁 (𑀓.)] 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀢𑀫𑁂𑀯 𑀕𑀳𑀧𑀢𑀺𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑀁 𑀑𑀕𑀸𑀳𑀺𑀢𑁆𑀯𑀸 [𑀑𑀕𑀳𑁂𑀢𑁆𑀯𑀸 (𑀲𑀻. 𑀧𑀻.)] 𑀕𑀳𑀧𑀢𑀺𑀭𑀢𑀦𑀁 𑀏𑀢𑀤𑀯𑁄𑀘 𑁋 ‘𑀅𑀢𑁆𑀣𑁄 𑀫𑁂, 𑀕𑀳𑀧𑀢𑀺, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦𑀸’𑀢𑀺. ‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀏𑀓𑀁 𑀢𑀻𑀭𑀁 𑀦𑀸𑀯𑀸 𑀉𑀧𑁂𑀢𑀽’𑀢𑀺. ‘𑀇𑀥𑁂𑀯 𑀫𑁂, 𑀕𑀳𑀧𑀢𑀺, 𑀅𑀢𑁆𑀣𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦𑀸’𑀢𑀺. 𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀺𑀭𑀢𑀦𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀉𑀤𑀓𑁂 𑀑𑀫𑀲𑀺𑀢𑁆𑀯𑀸 𑀧𑀽𑀭𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲 𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀏𑀢𑀤𑀯𑁄𑀘 𑁋 ‘𑀅𑀮𑀫𑁂𑀢𑁆𑀢𑀸𑀯𑀢𑀸, 𑀫𑀳𑀸𑀭𑀸𑀚! 𑀓𑀢𑀫𑁂𑀢𑁆𑀢𑀸𑀯𑀢𑀸, 𑀫𑀳𑀸𑀭𑀸𑀚! 𑀧𑀽𑀚𑀺𑀢𑀫𑁂𑀢𑁆𑀢𑀸𑀯𑀢𑀸, 𑀫𑀳𑀸𑀭𑀸𑀚𑀸’𑀢𑀺. 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀏𑀯𑀫𑀸𑀳 𑁋 ‘𑀅𑀮𑀫𑁂𑀢𑁆𑀢𑀸𑀯𑀢𑀸, 𑀕𑀳𑀧𑀢𑀺! 𑀓𑀢𑀫𑁂𑀢𑁆𑀢𑀸𑀯𑀢𑀸, 𑀕𑀳𑀧𑀢𑀺! 𑀧𑀽𑀚𑀺𑀢𑀫𑁂𑀢𑁆𑀢𑀸𑀯𑀢𑀸, 𑀕𑀳𑀧𑀢𑀻’𑀢𑀺. 𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀏𑀯𑀭𑀽𑀧𑀁 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺 𑁋 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀝𑀺𑀩𑀮𑁄 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀉𑀧𑀬𑀸𑀧𑁂𑀢𑀩𑁆𑀩𑀁 𑀉𑀧𑀬𑀸𑀧𑁂𑀢𑀼𑀁 [𑀉𑀧𑀝𑁆𑀞𑀧𑁂𑀢𑀩𑁆𑀩𑀁 𑀉𑀧𑀝𑁆𑀞𑀧𑁂𑀢𑀼𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀧𑀬𑀸𑀧𑁂𑀢𑀩𑁆𑀩𑀁 𑀅𑀧𑀬𑀸𑀧𑁂𑀢𑀼𑀁 𑀞𑀧𑁂𑀢𑀩𑁆𑀩𑀁 𑀞𑀧𑁂𑀢𑀼𑀁. 𑀲𑁄 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺. 𑀅𑀳𑀫𑀦𑀼𑀲𑀸𑀲𑀺𑀲𑁆𑀲𑀸𑀫𑀻’𑀢𑀺. 𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀏𑀯𑀭𑀽𑀧𑀁 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀭𑀸𑀚𑀸, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀻 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

𑁨𑁫𑁯. ‘‘𑀓𑀢𑀫𑀸𑀳𑀺 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀅𑀪𑀺𑀭𑀽𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺. 𑀭𑀸𑀚𑀸, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀻 𑀇𑀫𑀸𑀬 𑀧𑀞𑀫𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀤𑀻𑀖𑀸𑀬𑀼𑀓𑁄 𑀳𑁄𑀢𑀺 𑀘𑀺𑀭𑀝𑁆𑀞𑀺𑀢𑀺𑀓𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺. 𑀭𑀸𑀚𑀸, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀻 𑀇𑀫𑀸𑀬 𑀤𑀼𑀢𑀺𑀬𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺. 𑀭𑀸𑀚𑀸, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀻 𑀇𑀫𑀸𑀬 𑀢𑀢𑀺𑀬𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀺𑀢𑀸 𑀧𑀼𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄. 𑀭𑀜𑁆𑀜𑁄𑀧𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀺𑀬𑀸 𑀳𑁄𑀦𑁆𑀢𑀺 𑀫𑀦𑀸𑀧𑀸. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀺𑀢𑀼 𑀧𑀼𑀢𑁆𑀢𑀸 𑀧𑀺𑀬𑀸 𑀳𑁄𑀦𑁆𑀢𑀺 𑀫𑀦𑀸𑀧𑀸, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄𑀧𑀺 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀺𑀬𑀸 𑀳𑁄𑀦𑁆𑀢𑀺 𑀫𑀦𑀸𑀧𑀸.

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀸𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀢𑀭𑀫𑀸𑀦𑁄, 𑀤𑁂𑀯, 𑀬𑀸𑀳𑀺 𑀬𑀣𑀸 𑀢𑀁 𑀫𑀬𑀁 𑀘𑀺𑀭𑀢𑀭𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’𑀢𑀺. 𑀭𑀸𑀚𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀻 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀅𑀢𑀭𑀫𑀸𑀦𑁄, 𑀲𑀸𑀭𑀣𑀺, 𑀧𑁂𑀲𑁂𑀳𑀺 𑀬𑀣𑀸 𑀫𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀘𑀺𑀭𑀢𑀭𑀁 𑀧𑀲𑁆𑀲𑁂𑀬𑁆𑀬𑀼’𑀦𑁆𑀢𑀺. 𑀭𑀸𑀚𑀸, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀻 𑀇𑀫𑀸𑀬 𑀘𑀢𑀼𑀢𑁆𑀣𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀭𑀸𑀚𑀸, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀻 𑀇𑀫𑀸𑀳𑀺 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀔𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀇𑀫𑀸𑀳𑀺 𑀘𑀢𑀽𑀳𑀺 𑀘 𑀇𑀤𑁆𑀥𑀻𑀳𑀺 𑀢𑀢𑁄𑀦𑀺𑀤𑀸𑀦𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑁂𑀣𑀸’’𑀢𑀺? ‘‘𑀏𑀓𑀫𑁂𑀓𑁂𑀦𑀧𑀺, 𑀪𑀦𑁆𑀢𑁂, 𑀭𑀢𑀦𑁂𑀦 [𑀢𑁂𑀦 𑀭𑀢𑀦𑁂𑀦 (𑀲𑀻.)] 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀢𑀢𑁄𑀦𑀺𑀤𑀸𑀦𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑁂𑀣, 𑀓𑁄 𑀧𑀦 𑀯𑀸𑀤𑁄 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀘𑀢𑀽𑀳𑀺 𑀘 𑀇𑀤𑁆𑀥𑀻𑀳𑀻’’𑀢𑀺?

𑁨𑁬𑁦. 𑀅𑀣 𑀔𑁄 𑀪𑀕𑀯𑀸 𑀧𑀭𑀺𑀢𑁆𑀢𑀁 𑀧𑀸𑀡𑀺𑀫𑀢𑁆𑀢𑀁 𑀧𑀸𑀲𑀸𑀡𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑁄 𑀦𑀼 𑀔𑁄 𑀫𑀳𑀦𑁆𑀢𑀢𑀭𑁄 𑁋 𑀬𑁄 𑀘𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 𑀧𑀸𑀡𑀺𑀫𑀢𑁆𑀢𑁄 𑀧𑀸𑀲𑀸𑀡𑁄 𑀕𑀳𑀺𑀢𑁄 𑀬𑁄 𑀘 𑀳𑀺𑀫𑀯𑀸 𑀧𑀩𑁆𑀩𑀢𑀭𑀸𑀚𑀸’’𑀢𑀺? ‘‘𑀅𑀧𑁆𑀧𑀫𑀢𑁆𑀢𑀓𑁄 𑀅𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀧𑀭𑀺𑀢𑁆𑀢𑁄 𑀧𑀸𑀡𑀺𑀫𑀢𑁆𑀢𑁄 𑀧𑀸𑀲𑀸𑀡𑁄 𑀕𑀳𑀺𑀢𑁄; 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀸𑀦𑀁 𑀉𑀧𑀦𑀺𑀥𑀸𑀬 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀢𑀺; 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺; 𑀉𑀧𑀦𑀺𑀥𑀫𑁆𑀧𑀺 𑀦 𑀉𑀧𑁂𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀘 𑀇𑀤𑁆𑀥𑀻𑀳𑀺 𑀢𑀢𑁄𑀦𑀺𑀤𑀸𑀦𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀢𑀁 𑀤𑀺𑀩𑁆𑀩𑀲𑁆𑀲 𑀲𑀼𑀔𑀲𑁆𑀲 𑀉𑀧𑀦𑀺𑀥𑀸𑀬 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀢𑀺; 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺; 𑀉𑀧𑀦𑀺𑀥𑀫𑁆𑀧𑀺 𑀦 𑀉𑀧𑁂𑀢𑀺’’.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀲𑀘𑁂 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀫𑀦𑀼𑀲𑁆𑀲𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀬𑀸𑀦𑀺 𑀢𑀸𑀦𑀺 𑀉𑀘𑁆𑀘𑀸𑀓𑀼𑀮𑀸𑀦𑀺 𑁋 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀁 𑀯𑀸 𑀢𑀣𑀸𑀭𑀽𑀧𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀬𑀢𑀺 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁂 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂 𑀧𑀳𑀽𑀢𑀥𑀦𑀥𑀜𑁆𑀜𑁂. 𑀲𑁄 𑀘 𑀳𑁄𑀢𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀓𑁆𑀔𑀥𑀼𑀢𑁆𑀢𑁄 𑀧𑀞𑀫𑁂𑀦𑁂𑀯 𑀓𑀝𑀕𑁆𑀕𑀳𑁂𑀦 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑁂𑀬𑁆𑀬; 𑀅𑀧𑁆𑀧𑀫𑀢𑁆𑀢𑀓𑁄 𑀲𑁄, 𑀪𑀺𑀓𑁆𑀔𑀯𑁂, 𑀓𑀝𑀕𑁆𑀕𑀳𑁄 𑀬𑀁 𑀲𑁄 𑀅𑀓𑁆𑀔𑀥𑀼𑀢𑁆𑀢𑁄 𑀧𑀞𑀫𑁂𑀦𑁂𑀯 𑀓𑀝𑀕𑁆𑀕𑀳𑁂𑀦 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑁂𑀬𑁆𑀬. 𑀅𑀣 𑀔𑁄 𑀅𑀬𑀫𑁂𑀯 𑀢𑀢𑁄 𑀫𑀳𑀦𑁆𑀢𑀢𑀭𑁄 𑀓𑀝𑀕𑁆𑀕𑀳𑁄 𑀬𑀁 𑀲𑁄 𑀧𑀡𑁆𑀟𑀺𑀢𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀓𑁂𑀯𑀮𑀸 𑀧𑀭𑀺𑀧𑀽𑀭𑀸 𑀧𑀡𑁆𑀟𑀺𑀢𑀪𑀽𑀫𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.