𑁩. 𑀲𑀼𑀜𑁆𑀜𑀢𑀯𑀕𑁆𑀕𑁄

𑁧. 𑀘𑀽𑀴𑀲𑀼𑀜𑁆𑀜𑀢𑀲𑀼𑀢𑁆𑀢𑀁

𑁧𑁭𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀓𑀫𑀺𑀤𑀁, 𑀪𑀦𑁆𑀢𑁂, 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀦𑀕𑀭𑀓𑀁 𑀦𑀸𑀫 𑀲𑀓𑁆𑀬𑀸𑀦𑀁 𑀦𑀺𑀕𑀫𑁄. 𑀢𑀢𑁆𑀣 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦𑀸𑀳𑀁, 𑀆𑀦𑀦𑁆𑀤, 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀸𑀫𑀻’𑀢𑀺. 𑀓𑀘𑁆𑀘𑀺 𑀫𑁂𑀢𑀁, 𑀪𑀦𑁆𑀢𑁂, 𑀲𑀼𑀲𑁆𑀲𑀼𑀢𑀁 𑀲𑀼𑀕𑁆𑀕𑀳𑀺𑀢𑀁 𑀲𑀼𑀫𑀦𑀲𑀺𑀓𑀢𑀁 𑀲𑀽𑀧𑀥𑀸𑀭𑀺𑀢’’𑀦𑁆𑀢𑀺? ‘‘𑀢𑀕𑁆𑀖 𑀢𑁂 𑀏𑀢𑀁, 𑀆𑀦𑀦𑁆𑀤, 𑀲𑀼𑀲𑁆𑀲𑀼𑀢𑀁 𑀲𑀼𑀕𑁆𑀕𑀳𑀺𑀢𑀁 𑀲𑀼𑀫𑀦𑀲𑀺𑀓𑀢𑀁 𑀲𑀽𑀧𑀥𑀸𑀭𑀺𑀢𑀁. 𑀧𑀼𑀩𑁆𑀩𑁂𑀧𑀸𑀳𑀁 [𑀧𑀼𑀩𑁆𑀩𑁂𑀘𑀸𑀳𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀆𑀦𑀦𑁆𑀤, 𑀏𑀢𑀭𑀳𑀺𑀧𑀺 [𑀏𑀢𑀭𑀳𑀺 𑀘 (𑀲𑀩𑁆𑀩𑀢𑁆𑀣)] 𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦 𑀩𑀳𑀼𑀮𑀁 𑀯𑀺𑀳𑀭𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀅𑀬𑀁 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀲𑀼𑀜𑁆𑀜𑁄 𑀳𑀢𑁆𑀣𑀺𑀕𑀯𑀲𑁆𑀲𑀯𑀴𑀯𑁂𑀦, 𑀲𑀼𑀜𑁆𑀜𑁄 𑀚𑀸𑀢𑀭𑀽𑀧𑀭𑀚𑀢𑁂𑀦, 𑀲𑀼𑀜𑁆𑀜𑁄 𑀇𑀢𑁆𑀣𑀺𑀧𑀼𑀭𑀺𑀲𑀲𑀦𑁆𑀦𑀺𑀧𑀸𑀢𑁂𑀦 𑀅𑀢𑁆𑀣𑀺 𑀘𑁂𑀯𑀺𑀤𑀁 𑀅𑀲𑀼𑀜𑁆𑀜𑀢𑀁 𑀬𑀤𑀺𑀤𑀁 𑁋 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢𑀁; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀕𑀸𑀫𑀲𑀜𑁆𑀜𑀁, 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀲𑀜𑁆𑀜𑀁, 𑀅𑀭𑀜𑁆𑀜𑀲𑀜𑁆𑀜𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀁. 𑀢𑀲𑁆𑀲 𑀅𑀭𑀜𑁆𑀜𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀕𑀸𑀫𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀫𑀦𑀼𑀲𑁆𑀲𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀅𑀢𑁆𑀣𑀺 𑀘𑁂𑀯𑀸𑀬𑀁 𑀤𑀭𑀣𑀫𑀢𑁆𑀢𑀸 𑀬𑀤𑀺𑀤𑀁 𑁋 𑀅𑀭𑀜𑁆𑀜𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀲𑁄 ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀕𑀸𑀫𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀫𑀦𑀼𑀲𑁆𑀲𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀅𑀢𑁆𑀣𑀺 𑀘𑁂𑀯𑀺𑀤𑀁 𑀅𑀲𑀼𑀜𑁆𑀜𑀢𑀁 𑀬𑀤𑀺𑀤𑀁 𑁋 𑀅𑀭𑀜𑁆𑀜𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀇𑀢𑀺 𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀺 𑀢𑁂𑀦 𑀢𑀁 𑀲𑀼𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀢𑀁 ‘𑀲𑀦𑁆𑀢𑀫𑀺𑀤𑀁 𑀅𑀢𑁆𑀣𑀻’’’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀏𑀲𑀸, 𑀆𑀦𑀦𑁆𑀤, 𑀬𑀣𑀸𑀪𑀼𑀘𑁆𑀘𑀸 𑀅𑀯𑀺𑀧𑀮𑁆𑀮𑀢𑁆𑀣𑀸 𑀧𑀭𑀺𑀲𑀼𑀤𑁆𑀥𑀸 𑀲𑀼𑀜𑁆𑀜𑀢𑀸𑀯𑀓𑁆𑀓𑀦𑁆𑀢𑀺 𑀪𑀯𑀢𑀺.

𑁧𑁭𑁭. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀲𑀜𑁆𑀜𑀁, 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀭𑀜𑁆𑀜𑀲𑀜𑁆𑀜𑀁, 𑀧𑀣𑀯𑀻𑀲𑀜𑁆𑀜𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀁. 𑀢𑀲𑁆𑀲 𑀧𑀣𑀯𑀻𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀆𑀲𑀪𑀘𑀫𑁆𑀫𑀁 𑀲𑀗𑁆𑀓𑀼𑀲𑀢𑁂𑀦 𑀲𑀼𑀯𑀺𑀳𑀢𑀁 𑀯𑀺𑀕𑀢𑀯𑀮𑀺𑀓𑀁; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀬𑀁 𑀇𑀫𑀺𑀲𑁆𑀲𑀸 𑀧𑀣𑀯𑀺𑀬𑀸 𑀉𑀓𑁆𑀓𑀽𑀮𑀯𑀺𑀓𑁆𑀓𑀽𑀮𑀁 𑀦𑀤𑀻𑀯𑀺𑀤𑀼𑀕𑁆𑀕𑀁 𑀔𑀸𑀡𑀼𑀓𑀡𑁆𑀝𑀓𑀝𑁆𑀞𑀸𑀦𑀁 𑀧𑀩𑁆𑀩𑀢𑀯𑀺𑀲𑀫𑀁 𑀢𑀁 𑀲𑀩𑁆𑀩𑀁 [𑀲𑀩𑁆𑀩𑀁 (𑀓.)] 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀧𑀣𑀯𑀻𑀲𑀜𑁆𑀜𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀁. 𑀢𑀲𑁆𑀲 𑀧𑀣𑀯𑀻𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀫𑀦𑀼𑀲𑁆𑀲𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀅𑀭𑀜𑁆𑀜𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀅𑀢𑁆𑀣𑀺 𑀘𑁂𑀯𑀸𑀬𑀁 𑀤𑀭𑀣𑀫𑀢𑁆𑀢𑀸 𑀬𑀤𑀺𑀤𑀁 𑁋 𑀧𑀣𑀯𑀻𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀲𑁄 ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀫𑀦𑀼𑀲𑁆𑀲𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀅𑀭𑀜𑁆𑀜𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀅𑀢𑁆𑀣𑀺 𑀘𑁂𑀯𑀺𑀤𑀁 𑀅𑀲𑀼𑀜𑁆𑀜𑀢𑀁 𑀬𑀤𑀺𑀤𑀁 𑁋 𑀧𑀣𑀯𑀻𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀇𑀢𑀺 𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀺 𑀢𑁂𑀦 𑀢𑀁 𑀲𑀼𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀢𑀁 ‘𑀲𑀦𑁆𑀢𑀫𑀺𑀤𑀁 𑀅𑀢𑁆𑀣𑀻’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀏𑀲𑀸, 𑀆𑀦𑀦𑁆𑀤, 𑀬𑀣𑀸𑀪𑀼𑀘𑁆𑀘𑀸 𑀅𑀯𑀺𑀧𑀮𑁆𑀮𑀢𑁆𑀣𑀸 𑀧𑀭𑀺𑀲𑀼𑀤𑁆𑀥𑀸 𑀲𑀼𑀜𑁆𑀜𑀢𑀸𑀯𑀓𑁆𑀓𑀦𑁆𑀢𑀺 𑀪𑀯𑀢𑀺.

𑁧𑁭𑁮. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀭𑀜𑁆𑀜𑀲𑀜𑁆𑀜𑀁, 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀧𑀣𑀯𑀻𑀲𑀜𑁆𑀜𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀁. 𑀢𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀅𑀭𑀜𑁆𑀜𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀧𑀣𑀯𑀻𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀅𑀢𑁆𑀣𑀺 𑀘𑁂𑀯𑀸𑀬𑀁 𑀤𑀭𑀣𑀫𑀢𑁆𑀢𑀸 𑀬𑀤𑀺𑀤𑀁 𑁋 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀲𑁄 ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀅𑀭𑀜𑁆𑀜𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀧𑀣𑀯𑀻𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀅𑀢𑁆𑀣𑀺 𑀘𑁂𑀯𑀺𑀤𑀁 𑀅𑀲𑀼𑀜𑁆𑀜𑀢𑀁 𑀬𑀤𑀺𑀤𑀁 𑁋 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀇𑀢𑀺 𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀺 𑀢𑁂𑀦 𑀢𑀁 𑀲𑀼𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀢𑀁 ‘𑀲𑀦𑁆𑀢𑀫𑀺𑀤𑀁 𑀅𑀢𑁆𑀣𑀻’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀏𑀲𑀸, 𑀆𑀦𑀦𑁆𑀤, 𑀬𑀣𑀸𑀪𑀼𑀘𑁆𑀘𑀸 𑀅𑀯𑀺𑀧𑀮𑁆𑀮𑀢𑁆𑀣𑀸 𑀧𑀭𑀺𑀲𑀼𑀤𑁆𑀥𑀸 𑀲𑀼𑀜𑁆𑀜𑀢𑀸𑀯𑀓𑁆𑀓𑀦𑁆𑀢𑀺 𑀪𑀯𑀢𑀺.

𑁧𑁭𑁯. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀧𑀣𑀯𑀻𑀲𑀜𑁆𑀜𑀁, 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀁. 𑀢𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀧𑀣𑀯𑀻𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀅𑀢𑁆𑀣𑀺 𑀘𑁂𑀯𑀸𑀬𑀁 𑀤𑀭𑀣𑀫𑀢𑁆𑀢𑀸 𑀬𑀤𑀺𑀤𑀁 𑁋 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀲𑁄 ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀧𑀣𑀯𑀻𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀅𑀢𑁆𑀣𑀺 𑀘𑁂𑀯𑀺𑀤𑀁 𑀅𑀲𑀼𑀜𑁆𑀜𑀢𑀁 𑀬𑀤𑀺𑀤𑀁 𑁋 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀇𑀢𑀺 𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀺 𑀢𑁂𑀦 𑀢𑀁 𑀲𑀼𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀢𑀁 ‘𑀲𑀦𑁆𑀢𑀫𑀺𑀤𑀁 𑀅𑀢𑁆𑀣𑀻’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀏𑀲𑀸, 𑀆𑀦𑀦𑁆𑀤, 𑀬𑀣𑀸𑀪𑀼𑀘𑁆𑀘𑀸 𑀅𑀯𑀺𑀧𑀮𑁆𑀮𑀢𑁆𑀣𑀸 𑀧𑀭𑀺𑀲𑀼𑀤𑁆𑀥𑀸 𑀲𑀼𑀜𑁆𑀜𑀢𑀸𑀯𑀓𑁆𑀓𑀦𑁆𑀢𑀺 𑀪𑀯𑀢𑀺.

𑁧𑁮𑁦. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁, 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀁. 𑀢𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀅𑀢𑁆𑀣𑀺 𑀘𑁂𑀯𑀸𑀬𑀁 𑀤𑀭𑀣𑀫𑀢𑁆𑀢𑀸 𑀬𑀤𑀺𑀤𑀁 𑁋 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀲𑁄 ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀅𑀢𑁆𑀣𑀺 𑀘𑁂𑀯𑀺𑀤𑀁 𑀅𑀲𑀼𑀜𑁆𑀜𑀢𑀁 𑀬𑀤𑀺𑀤𑀁 𑁋 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀇𑀢𑀺 𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀺 𑀢𑁂𑀦 𑀢𑀁 𑀲𑀼𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀢𑀁 ‘𑀲𑀦𑁆𑀢𑀫𑀺𑀤𑀁 𑀅𑀢𑁆𑀣𑀻’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀏𑀲𑀸, 𑀆𑀦𑀦𑁆𑀤, 𑀬𑀣𑀸𑀪𑀼𑀘𑁆𑀘𑀸 𑀅𑀯𑀺𑀧𑀮𑁆𑀮𑀢𑁆𑀣𑀸 𑀧𑀭𑀺𑀲𑀼𑀤𑁆𑀥𑀸 𑀲𑀼𑀜𑁆𑀜𑀢𑀸𑀯𑀓𑁆𑀓𑀦𑁆𑀢𑀺 𑀪𑀯𑀢𑀺.

𑁧𑁮𑁧. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤 𑀪𑀺𑀓𑁆𑀔𑀼 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁, 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀁. 𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀅𑀢𑁆𑀣𑀺 𑀘𑁂𑀯𑀸𑀬𑀁 𑀤𑀭𑀣𑀫𑀢𑁆𑀢𑀸 𑀬𑀤𑀺𑀤𑀁 𑁋 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀲𑁄 ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀅𑀢𑁆𑀣𑀺 𑀘𑁂𑀯𑀺𑀤𑀁 𑀅𑀲𑀼𑀜𑁆𑀜𑀢𑀁 𑀬𑀤𑀺𑀤𑀁 𑁋 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀏𑀓𑀢𑁆𑀢’𑀦𑁆𑀢𑀺. 𑀇𑀢𑀺 𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀺 𑀢𑁂𑀦 𑀢𑀁 𑀲𑀼𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀢𑀁 ‘𑀲𑀦𑁆𑀢𑀫𑀺𑀤𑀁 𑀅𑀢𑁆𑀣𑀻’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀏𑀲𑀸, 𑀆𑀦𑀦𑁆𑀤, 𑀬𑀣𑀸𑀪𑀼𑀘𑁆𑀘𑀸 𑀅𑀯𑀺𑀧𑀮𑁆𑀮𑀢𑁆𑀣𑀸 𑀧𑀭𑀺𑀲𑀼𑀤𑁆𑀥𑀸 𑀲𑀼𑀜𑁆𑀜𑀢𑀸𑀯𑀓𑁆𑀓𑀦𑁆𑀢𑀺 𑀪𑀯𑀢𑀺.

𑁧𑁮𑁨. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁, 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀁, 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀁. 𑀢𑀲𑁆𑀲 𑀅𑀦𑀺𑀫𑀺𑀢𑁆𑀢𑁂 𑀘𑁂𑀢𑁄𑀲𑀫𑀸𑀥𑀺𑀫𑁆𑀳𑀺 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀅𑀢𑁆𑀣𑀺 𑀘𑁂𑀯𑀸𑀬𑀁 𑀤𑀭𑀣𑀫𑀢𑁆𑀢𑀸 𑀬𑀤𑀺𑀤𑀁 𑁋 𑀇𑀫𑀫𑁂𑀯 𑀓𑀸𑀬𑀁 𑀧𑀝𑀺𑀘𑁆𑀘 𑀲𑀴𑀸𑀬𑀢𑀦𑀺𑀓𑀁 𑀚𑀻𑀯𑀺𑀢𑀧𑀘𑁆𑀘𑀬𑀸’𑀢𑀺. 𑀲𑁄 ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺, ‘𑀅𑀢𑁆𑀣𑀺 𑀘𑁂𑀯𑀺𑀤𑀁 𑀅𑀲𑀼𑀜𑁆𑀜𑀢𑀁 𑀬𑀤𑀺𑀤𑀁 𑁋 𑀇𑀫𑀫𑁂𑀯 𑀓𑀸𑀬𑀁 𑀧𑀝𑀺𑀘𑁆𑀘 𑀲𑀴𑀸𑀬𑀢𑀦𑀺𑀓𑀁 𑀚𑀻𑀯𑀺𑀢𑀧𑀘𑁆𑀘𑀬𑀸’𑀢𑀺. 𑀇𑀢𑀺 𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀺 𑀢𑁂𑀦 𑀢𑀁 𑀲𑀼𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀢𑀁 ‘𑀲𑀦𑁆𑀢𑀫𑀺𑀤𑀁 𑀅𑀢𑁆𑀣𑀻’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀏𑀲𑀸, 𑀆𑀦𑀦𑁆𑀤, 𑀬𑀣𑀸𑀪𑀼𑀘𑁆𑀘𑀸 𑀅𑀯𑀺𑀧𑀮𑁆𑀮𑀢𑁆𑀣𑀸 𑀧𑀭𑀺𑀲𑀼𑀤𑁆𑀥𑀸 𑀲𑀼𑀜𑁆𑀜𑀢𑀸𑀯𑀓𑁆𑀓𑀦𑁆𑀢𑀺 𑀪𑀯𑀢𑀺.

𑁧𑁮𑁩. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁, 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀁, 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀁. 𑀢𑀲𑁆𑀲 𑀅𑀦𑀺𑀫𑀺𑀢𑁆𑀢𑁂 𑀘𑁂𑀢𑁄𑀲𑀫𑀸𑀥𑀺𑀫𑁆𑀳𑀺 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀬𑀫𑁆𑀧𑀺 𑀔𑁄 𑀅𑀦𑀺𑀫𑀺𑀢𑁆𑀢𑁄 𑀘𑁂𑀢𑁄𑀲𑀫𑀸𑀥𑀺 𑀅𑀪𑀺𑀲𑀗𑁆𑀔𑀢𑁄 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑁄’. ‘𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀅𑀪𑀺𑀲𑀗𑁆𑀔𑀢𑀁 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀁 𑀢𑀤𑀦𑀺𑀘𑁆𑀘𑀁 𑀦𑀺𑀭𑁄𑀥𑀥𑀫𑁆𑀫’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀓𑀸𑀫𑀸𑀲𑀯𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀪𑀯𑀸𑀲𑀯𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀅𑀯𑀺𑀚𑁆𑀚𑀸𑀲𑀯𑀁 𑀧𑀝𑀺𑀘𑁆𑀘 𑀢𑁂𑀥 𑀦 𑀲𑀦𑁆𑀢𑀺, 𑀅𑀢𑁆𑀣𑀺 𑀘𑁂𑀯𑀸𑀬𑀁 𑀤𑀭𑀣𑀫𑀢𑁆𑀢𑀸 𑀬𑀤𑀺𑀤𑀁 𑁋 𑀇𑀫𑀫𑁂𑀯 𑀓𑀸𑀬𑀁 𑀧𑀝𑀺𑀘𑁆𑀘 𑀲𑀴𑀸𑀬𑀢𑀦𑀺𑀓𑀁 𑀚𑀻𑀯𑀺𑀢𑀧𑀘𑁆𑀘𑀬𑀸’𑀢𑀺. 𑀲𑁄 ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀓𑀸𑀫𑀸𑀲𑀯𑁂𑀦𑀸’𑀢𑀺 𑀧𑀚𑀸𑀦𑀸𑀢𑀺, ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀪𑀯𑀸𑀲𑀯𑁂𑀦𑀸’𑀢𑀺 𑀧𑀚𑀸𑀦𑀸𑀢𑀺, ‘𑀲𑀼𑀜𑁆𑀜𑀫𑀺𑀤𑀁 𑀲𑀜𑁆𑀜𑀸𑀕𑀢𑀁 𑀅𑀯𑀺𑀚𑁆𑀚𑀸𑀲𑀯𑁂𑀦𑀸’𑀢𑀺 𑀧𑀚𑀸𑀦𑀸𑀢𑀺, ‘𑀅𑀢𑁆𑀣𑀺 𑀘𑁂𑀯𑀺𑀤𑀁 𑀅𑀲𑀼𑀜𑁆𑀜𑀢𑀁 𑀬𑀤𑀺𑀤𑀁 𑁋 𑀇𑀫𑀫𑁂𑀯 𑀓𑀸𑀬𑀁 𑀧𑀝𑀺𑀘𑁆𑀘 𑀲𑀴𑀸𑀬𑀢𑀦𑀺𑀓𑀁 𑀚𑀻𑀯𑀺𑀢𑀧𑀘𑁆𑀘𑀬𑀸’𑀢𑀺. 𑀇𑀢𑀺 𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀺 𑀢𑁂𑀦 𑀢𑀁 𑀲𑀼𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀢𑀁 ‘𑀲𑀦𑁆𑀢𑀫𑀺𑀤𑀁 𑀅𑀢𑁆𑀣𑀻’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀏𑀲𑀸, 𑀆𑀦𑀦𑁆𑀤, 𑀬𑀣𑀸𑀪𑀼𑀘𑁆𑀘𑀸 𑀅𑀯𑀺𑀧𑀮𑁆𑀮𑀢𑁆𑀣𑀸 𑀧𑀭𑀺𑀲𑀼𑀤𑁆𑀥𑀸 𑀧𑀭𑀫𑀸𑀦𑀼𑀢𑁆𑀢𑀭𑀸 𑀲𑀼𑀜𑁆𑀜𑀢𑀸𑀯𑀓𑁆𑀓𑀦𑁆𑀢𑀺 𑀪𑀯𑀢𑀺.

𑁧𑁮𑁪. ‘‘𑀬𑁂𑀧𑀺 𑀳𑀺 𑀓𑁂𑀘𑀺, 𑀆𑀦𑀦𑁆𑀤, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀭𑀺𑀲𑀼𑀤𑁆𑀥𑀁 𑀧𑀭𑀫𑀸𑀦𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀁𑀲𑀼, 𑀲𑀩𑁆𑀩𑁂 𑀢𑁂 𑀇𑀫𑀁𑀬𑁂𑀯 𑀧𑀭𑀺𑀲𑀼𑀤𑁆𑀥𑀁 𑀧𑀭𑀫𑀸𑀦𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀁𑀲𑀼. 𑀬𑁂𑀧𑀺 [𑀬𑁂 (𑀲𑀻. 𑀧𑀻.)] 𑀳𑀺 𑀓𑁂𑀘𑀺, 𑀆𑀦𑀦𑁆𑀤, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀭𑀺𑀲𑀼𑀤𑁆𑀥𑀁 𑀧𑀭𑀫𑀸𑀦𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑀁𑀬𑁂𑀯 𑀧𑀭𑀺𑀲𑀼𑀤𑁆𑀥𑀁 𑀧𑀭𑀫𑀸𑀦𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀬𑁂𑀧𑀺 [𑀬𑁂 (𑀲𑀻. 𑀧𑀻.)] 𑀳𑀺 𑀓𑁂𑀘𑀺, 𑀆𑀦𑀦𑁆𑀤, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀭𑀺𑀲𑀼𑀤𑁆𑀥𑀁 𑀧𑀭𑀫𑀸𑀦𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑀁𑀬𑁂𑀯 𑀧𑀭𑀺𑀲𑀼𑀤𑁆𑀥𑀁 𑀧𑀭𑀫𑀸𑀦𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺. 𑀢𑀲𑁆𑀫𑀸𑀢𑀺𑀳, 𑀆𑀦𑀦𑁆𑀤, ‘𑀧𑀭𑀺𑀲𑀼𑀤𑁆𑀥𑀁 𑀧𑀭𑀫𑀸𑀦𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺 [𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺 (𑀧𑀻. 𑀓.)] 𑁋 𑀏𑀯𑀜𑁆𑀳𑀺 𑀯𑁄 [𑀢𑁂 (𑀓.)], 𑀆𑀦𑀦𑁆𑀤, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀘𑀽𑀴𑀲𑀼𑀜𑁆𑀜𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.

𑁨. 𑀫𑀳𑀸𑀲𑀼𑀜𑁆𑀜𑀢𑀲𑀼𑀢𑁆𑀢𑀁

𑁧𑁮𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀧𑀺𑀮𑀯𑀢𑁆𑀣𑀼𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀓𑀸𑀴𑀔𑁂𑀫𑀓𑀲𑁆𑀲 𑀲𑀓𑁆𑀓𑀲𑁆𑀲 𑀯𑀺𑀳𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀸𑀴𑀔𑁂𑀫𑀓𑀲𑁆𑀲 𑀲𑀓𑁆𑀓𑀲𑁆𑀲 𑀯𑀺𑀳𑀸𑀭𑁂 𑀲𑀫𑁆𑀩𑀳𑀼𑀮𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀓𑀸𑀴𑀔𑁂𑀫𑀓𑀲𑁆𑀲 𑀲𑀓𑁆𑀓𑀲𑁆𑀲 𑀯𑀺𑀳𑀸𑀭𑁂 𑀲𑀫𑁆𑀩𑀳𑀼𑀮𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺. 𑀤𑀺𑀲𑁆𑀯𑀸𑀦 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀲𑀫𑁆𑀩𑀳𑀼𑀮𑀸𑀦𑀺 𑀔𑁄 𑀓𑀸𑀴𑀔𑁂𑀫𑀓𑀲𑁆𑀲 𑀲𑀓𑁆𑀓𑀲𑁆𑀲 𑀯𑀺𑀳𑀸𑀭𑁂 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺. 𑀲𑀫𑁆𑀩𑀳𑀼𑀮𑀸 𑀦𑀼 𑀔𑁄 𑀇𑀥 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺.

𑁧𑁮𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀖𑀝𑀸𑀬 𑀲𑀓𑁆𑀓𑀲𑁆𑀲 𑀯𑀺𑀳𑀸𑀭𑁂 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀖𑀝𑀸𑀬 𑀲𑀓𑁆𑀓𑀲𑁆𑀲 𑀯𑀺𑀳𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀫𑁆𑀩𑀳𑀼𑀮𑀸𑀦𑀺 𑀔𑁄, 𑀆𑀦𑀦𑁆𑀤, 𑀓𑀸𑀴𑀔𑁂𑀫𑀓𑀲𑁆𑀲 𑀲𑀓𑁆𑀓𑀲𑁆𑀲 𑀯𑀺𑀳𑀸𑀭𑁂 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺. 𑀲𑀫𑁆𑀩𑀳𑀼𑀮𑀸 𑀦𑀼 𑀔𑁄 𑀏𑀢𑁆𑀣 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺? ‘‘𑀲𑀫𑁆𑀩𑀳𑀼𑀮𑀸𑀦𑀺, 𑀪𑀦𑁆𑀢𑁂, 𑀓𑀸𑀴𑀔𑁂𑀫𑀓𑀲𑁆𑀲 𑀲𑀓𑁆𑀓𑀲𑁆𑀲 𑀯𑀺𑀳𑀸𑀭𑁂 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀏𑀢𑁆𑀣 𑀯𑀺𑀳𑀭𑀦𑁆𑀢𑀺. 𑀘𑀻𑀯𑀭𑀓𑀸𑀭𑀲𑀫𑀬𑁄 𑀦𑁄, 𑀪𑀦𑁆𑀢𑁂, 𑀯𑀢𑁆𑀢𑀢𑀻’’𑀢𑀺.

‘‘𑀦 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀲𑁄𑀪𑀢𑀺 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀲𑀗𑁆𑀕𑀡𑀺𑀓𑀭𑀢𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄 𑀕𑀡𑀸𑀭𑀸𑀫𑁄 𑀕𑀡𑀭𑀢𑁄 𑀕𑀡𑀲𑀫𑁆𑀫𑀼𑀤𑀺𑀢𑁄. 𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀲𑀗𑁆𑀕𑀡𑀺𑀓𑀭𑀢𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄 𑀕𑀡𑀸𑀭𑀸𑀫𑁄 𑀕𑀡𑀭𑀢𑁄 𑀕𑀡𑀲𑀫𑁆𑀫𑀼𑀤𑀺𑀢𑁄 𑀬𑀁 𑀢𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀧𑀯𑀺𑀯𑁂𑀓𑀲𑀼𑀔𑀁 𑀉𑀧𑀲𑀫𑀲𑀼𑀔𑀁 𑀲𑀫𑁆𑀩𑁄𑀥𑀺𑀲𑀼𑀔𑀁 [𑀲𑀫𑁆𑀩𑁄𑀥𑀲𑀼𑀔𑀁 (𑀲𑀻. 𑀧𑀻.), 𑀲𑀫𑁆𑀩𑁄𑀥𑀲𑀼𑀔𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀼𑀔𑀁 (𑀓.) 𑀉𑀧𑀭𑀺 𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑁂 𑀧𑀦 𑀲𑀫𑁆𑀩𑁄𑀥𑀺𑀲𑀼𑀔𑀦𑁆𑀢𑁆𑀯𑁂𑀯 𑀤𑀺𑀲𑁆𑀲𑀢𑀺] 𑀢𑀲𑁆𑀲 𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀘 𑀔𑁄 𑀲𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀓𑁄 𑀕𑀡𑀲𑁆𑀫𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑀢𑀺 𑀢𑀲𑁆𑀲𑁂𑀢𑀁 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀬𑀁 𑀢𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀧𑀯𑀺𑀯𑁂𑀓𑀲𑀼𑀔𑀁 𑀉𑀧𑀲𑀫𑀲𑀼𑀔𑀁 𑀲𑀫𑁆𑀩𑁄𑀥𑀺𑀲𑀼𑀔𑀁 𑀢𑀲𑁆𑀲 𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀲𑀗𑁆𑀕𑀡𑀺𑀓𑀭𑀢𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄 𑀕𑀡𑀸𑀭𑀸𑀫𑁄 𑀕𑀡𑀭𑀢𑁄 𑀕𑀡𑀲𑀫𑁆𑀫𑀼𑀤𑀺𑀢𑁄 𑀲𑀸𑀫𑀸𑀬𑀺𑀓𑀁 𑀯𑀸 𑀓𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺 𑀅𑀲𑀸𑀫𑀸𑀬𑀺𑀓𑀁 𑀯𑀸 𑀅𑀓𑀼𑀧𑁆𑀧𑀦𑁆𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀘 𑀔𑁄 𑀲𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀓𑁄 𑀕𑀡𑀲𑁆𑀫𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑀢𑀺 𑀢𑀲𑁆𑀲𑁂𑀢𑀁 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀲𑀸𑀫𑀸𑀬𑀺𑀓𑀁 𑀯𑀸 𑀓𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺 𑀅𑀲𑀸𑀫𑀸𑀬𑀺𑀓𑀁 𑀯𑀸 𑀅𑀓𑀼𑀧𑁆𑀧𑀦𑁆𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀦𑀸𑀳𑀁, 𑀆𑀦𑀦𑁆𑀤, 𑀏𑀓𑀁 𑀭𑀽𑀧𑀫𑁆𑀧𑀺 [𑀏𑀓𑀭𑀽𑀧𑀫𑁆𑀧𑀺 (𑀲𑀻.)] 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑀢𑁆𑀣 𑀭𑀢𑁆𑀢𑀲𑁆𑀲 𑀬𑀣𑀸𑀪𑀺𑀭𑀢𑀲𑁆𑀲 𑀭𑀽𑀧𑀲𑁆𑀲 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀽𑀧𑀸𑀬𑀸𑀲𑀸.

𑁧𑁮𑁭. ‘‘𑀅𑀬𑀁 𑀔𑁄 𑀧𑀦𑀸𑀦𑀦𑁆𑀤, 𑀯𑀺𑀳𑀸𑀭𑁄 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀬𑀤𑀺𑀤𑀁 𑁋 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁 [𑀯𑀺𑀳𑀭𑀢𑀁 (𑀓. 𑀲𑀻.), 𑀯𑀺𑀳𑀭𑀢𑀺 (𑀲𑁆𑀬𑀸. 𑀓𑀁. 𑀓.)]. 𑀢𑀢𑁆𑀭 𑀘𑁂, 𑀆𑀦𑀦𑁆𑀤, 𑀢𑀣𑀸𑀕𑀢𑀁 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀁 𑀪𑀯𑀦𑁆𑀢𑀺 [𑀪𑀕𑀯𑀦𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀓.)] 𑀉𑀧𑀲𑀗𑁆𑀓𑀫𑀺𑀢𑀸𑀭𑁄 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀭𑀸𑀚𑀸𑀦𑁄 𑀭𑀸𑀚𑀫𑀳𑀸𑀫𑀢𑁆𑀢𑀸 𑀢𑀺𑀢𑁆𑀣𑀺𑀬𑀸 𑀢𑀺𑀢𑁆𑀣𑀺𑀬𑀲𑀸𑀯𑀓𑀸. 𑀢𑀢𑁆𑀭𑀸𑀦𑀦𑁆𑀤, 𑀢𑀣𑀸𑀕𑀢𑁄 𑀯𑀺𑀯𑁂𑀓𑀦𑀺𑀦𑁆𑀦𑁂𑀦𑁂𑀯 𑀘𑀺𑀢𑁆𑀢𑁂𑀦 𑀯𑀺𑀯𑁂𑀓𑀧𑁄𑀡𑁂𑀦 𑀯𑀺𑀯𑁂𑀓𑀧𑀩𑁆𑀪𑀸𑀭𑁂𑀦 𑀯𑀽𑀧𑀓𑀝𑁆𑀞𑁂𑀦 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑁂𑀦 𑀩𑁆𑀬𑀦𑁆𑀢𑀻𑀪𑀽𑀢𑁂𑀦 𑀲𑀩𑁆𑀩𑀲𑁄 𑀆𑀲𑀯𑀝𑁆𑀞𑀸𑀦𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀅𑀜𑁆𑀜𑀤𑀢𑁆𑀣𑀼 𑀉𑀬𑁆𑀬𑁄𑀚𑀦𑀺𑀓𑀧𑀝𑀺𑀲𑀁𑀬𑀼𑀢𑁆𑀢𑀁𑀬𑁂𑀯 𑀓𑀣𑀁 𑀓𑀢𑁆𑀢𑀸 𑀳𑁄𑀢𑀺. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀘𑁂𑀧𑀺 𑀆𑀓𑀗𑁆𑀔𑁂𑀬𑁆𑀬 𑁋 ‘𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀢𑁂𑀦𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀁 𑀲𑀦𑁆𑀦𑀺𑀲𑀸𑀤𑁂𑀢𑀩𑁆𑀩𑀁 𑀏𑀓𑁄𑀤𑀺 𑀓𑀸𑀢𑀩𑁆𑀩𑀁 𑀲𑀫𑀸𑀤𑀳𑀸𑀢𑀩𑁆𑀩𑀁.

𑁧𑁮𑁮. ‘‘𑀓𑀣𑀜𑁆𑀘𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀺 𑀲𑀦𑁆𑀦𑀺𑀲𑀸𑀤𑁂𑀢𑀺 𑀏𑀓𑁄𑀤𑀺𑀁 𑀓𑀭𑁄𑀢𑀺 [𑀏𑀓𑁄𑀤𑀺𑀓𑀭𑁄𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀸𑀤𑀳𑀢𑀺? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀺 𑀲𑀦𑁆𑀦𑀺𑀲𑀸𑀤𑁂𑀢𑀺 𑀏𑀓𑁄𑀤𑀺𑀁 𑀓𑀭𑁄𑀢𑀺 𑀲𑀫𑀸𑀤𑀳𑀢𑀺. 𑀲𑁄 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺𑀓𑀭𑁄𑀢𑁄 𑀲𑀼𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦 𑀯𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀲𑀦𑁆𑀢𑀫𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀔𑁄 𑀫𑁂 𑀫𑀦𑀲𑀺𑀓𑀭𑁄𑀢𑁄 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦 𑀯𑀺𑀫𑀼𑀘𑁆𑀘𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑁄 𑀩𑀳𑀺𑀤𑁆𑀥𑀸 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀺…𑀧𑁂… 𑀲𑁄 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀺 …𑀧𑁂… 𑀲𑁄 𑀆𑀦𑁂𑀜𑁆𑀚𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀆𑀦𑁂𑀜𑁆𑀚𑀁 𑀫𑀦𑀲𑀺𑀓𑀭𑁄𑀢𑁄 𑀆𑀦𑁂𑀜𑁆𑀚𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦 𑀯𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀲𑀦𑁆𑀢𑀫𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀆𑀦𑁂𑀜𑁆𑀚𑀁 𑀔𑁄 𑀫𑁂 𑀫𑀦𑀲𑀺𑀓𑀭𑁄𑀢𑁄 𑀆𑀦𑁂𑀜𑁆𑀚𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦 𑀯𑀺𑀫𑀼𑀘𑁆𑀘𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺.

‘‘𑀢𑁂𑀦𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀁 𑀲𑀦𑁆𑀦𑀺𑀲𑀸𑀤𑁂𑀢𑀩𑁆𑀩𑀁 𑀏𑀓𑁄𑀤𑀺 𑀓𑀸𑀢𑀩𑁆𑀩𑀁 𑀲𑀫𑀸𑀤𑀳𑀸𑀢𑀩𑁆𑀩𑀁. 𑀲𑁄 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺𑀓𑀭𑁄𑀢𑁄 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀲𑀦𑁆𑀢𑀫𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀔𑁄 𑀫𑁂 𑀫𑀦𑀲𑀺𑀓𑀭𑁄𑀢𑁄 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑁄 𑀩𑀳𑀺𑀤𑁆𑀥𑀸 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀺…𑀧𑁂… 𑀲𑁄 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀺…𑀧𑁂… 𑀲𑁄 𑀆𑀦𑁂𑀜𑁆𑀚𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀆𑀦𑁂𑀜𑁆𑀚𑀁 𑀫𑀦𑀲𑀺𑀓𑀭𑁄𑀢𑁄 𑀆𑀦𑁂𑀜𑁆𑀚𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀲𑀦𑁆𑀢𑀫𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀆𑀦𑁂𑀜𑁆𑀚𑀁 𑀔𑁄 𑀫𑁂 𑀫𑀦𑀲𑀺𑀓𑀭𑁄𑀢𑁄 𑀆𑀦𑁂𑀜𑁆𑀚𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺.

𑁧𑁮𑁯. ‘‘𑀢𑀲𑁆𑀲 𑀘𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑁄 𑀘𑀗𑁆𑀓𑀫𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀲𑁄 𑀘𑀗𑁆𑀓𑀫𑀢𑀺 𑁋 ‘𑀏𑀯𑀁 𑀫𑀁 𑀘𑀗𑁆𑀓𑀫𑀦𑁆𑀢𑀁 𑀦𑀸𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀘𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑁄 𑀞𑀸𑀦𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀲𑁄 𑀢𑀺𑀝𑁆𑀞𑀢𑀺 𑁋 ‘𑀏𑀯𑀁 𑀫𑀁 𑀞𑀺𑀢𑀁 𑀦𑀸𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀘𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑁄 𑀦𑀺𑀲𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀲𑁄 𑀦𑀺𑀲𑀻𑀤𑀢𑀺 𑁋 ‘𑀏𑀯𑀁 𑀫𑀁 𑀦𑀺𑀲𑀺𑀦𑁆𑀦𑀁 𑀦𑀸𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀘𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑁄 𑀲𑀬𑀦𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀲𑁄 𑀲𑀬𑀢𑀺 𑁋 ‘𑀏𑀯𑀁 𑀫𑀁 𑀲𑀬𑀦𑁆𑀢𑀁 𑀦𑀸𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺.

‘‘𑀢𑀲𑁆𑀲 𑀘𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑁄 𑀓𑀣𑀸𑀬 [𑀪𑀲𑁆𑀲𑀸𑀬 (𑀲𑀻.), 𑀪𑀸𑀲𑀸𑀬 (𑀲𑁆𑀬𑀸. 𑀓𑀁. 𑀧𑀻.)] 𑀘𑀺𑀢𑁆𑀢𑀁 𑀦𑀫𑀢𑀺, 𑀲𑁄 𑁋 ‘𑀬𑀸𑀬𑀁 𑀓𑀣𑀸 𑀳𑀻𑀦𑀸 𑀕𑀫𑁆𑀫𑀸 𑀧𑁄𑀣𑀼𑀚𑁆𑀚𑀦𑀺𑀓𑀸 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀸 𑀘𑁄𑀭𑀓𑀣𑀸 𑀫𑀳𑀸𑀫𑀢𑁆𑀢𑀓𑀣𑀸 𑀲𑁂𑀦𑀸𑀓𑀣𑀸 𑀪𑀬𑀓𑀣𑀸 𑀬𑀼𑀤𑁆𑀥𑀓𑀣𑀸 𑀅𑀦𑁆𑀦𑀓𑀣𑀸 𑀧𑀸𑀦𑀓𑀣𑀸 𑀯𑀢𑁆𑀣𑀓𑀣𑀸 𑀲𑀬𑀦𑀓𑀣𑀸 𑀫𑀸𑀮𑀸𑀓𑀣𑀸 𑀕𑀦𑁆𑀥𑀓𑀣𑀸 𑀜𑀸𑀢𑀺𑀓𑀣𑀸 𑀬𑀸𑀦𑀓𑀣𑀸 𑀕𑀸𑀫𑀓𑀣𑀸 𑀦𑀺𑀕𑀫𑀓𑀣𑀸 𑀦𑀕𑀭𑀓𑀣𑀸 𑀚𑀦𑀧𑀤𑀓𑀣𑀸 𑀇𑀢𑁆𑀣𑀺𑀓𑀣𑀸 𑀲𑀼𑀭𑀸𑀓𑀣𑀸 𑀯𑀺𑀲𑀺𑀔𑀸𑀓𑀣𑀸 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀸 𑀧𑀼𑀩𑁆𑀩𑀧𑁂𑀢𑀓𑀣𑀸 𑀦𑀸𑀦𑀢𑁆𑀢𑀓𑀣𑀸 𑀮𑁄𑀓𑀓𑁆𑀔𑀸𑀬𑀺𑀓𑀸 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀸 𑀇𑀢𑀺𑀪𑀯𑀸𑀪𑀯𑀓𑀣𑀸 𑀇𑀢𑀺 𑀯𑀸 𑀇𑀢𑀺 𑁋 𑀏𑀯𑀭𑀽𑀧𑀺𑀁 𑀓𑀣𑀁 𑀦 𑀓𑀣𑁂𑀲𑁆𑀲𑀸𑀫𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀬𑀸 𑀘 𑀔𑁄 𑀅𑀬𑀁, 𑀆𑀦𑀦𑁆𑀤, 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀦𑀻𑀯𑀭𑀡𑀲𑀧𑁆𑀧𑀸𑀬𑀸 [𑀘𑁂𑀢𑁄𑀯𑀺𑀘𑀸𑀭𑀡𑀲𑀧𑁆𑀧𑀸𑀬𑀸 (𑀲𑀻. 𑀲𑁆𑀬𑀸. 𑀓𑀁.), 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸 (𑀧𑀻.)] 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸 𑀇𑀢𑀺 𑁋 ‘𑀏𑀯𑀭𑀽𑀧𑀺𑀁 𑀓𑀣𑀁 𑀓𑀣𑁂𑀲𑁆𑀲𑀸𑀫𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺.

‘‘𑀢𑀲𑁆𑀲 𑀘𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑁄 𑀯𑀺𑀢𑀓𑁆𑀓𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀲𑁄 𑁋 ‘𑀬𑁂 𑀢𑁂 𑀯𑀺𑀢𑀓𑁆𑀓𑀸 𑀳𑀻𑀦𑀸 𑀕𑀫𑁆𑀫𑀸 𑀧𑁄𑀣𑀼𑀚𑁆𑀚𑀦𑀺𑀓𑀸 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀇𑀢𑀺 𑀏𑀯𑀭𑀽𑀧𑁂 𑀯𑀺𑀢𑀓𑁆𑀓𑁂 [𑀏𑀯𑀭𑀽𑀧𑁂𑀦 𑀯𑀺𑀢𑀓𑁆𑀓𑁂𑀦 (𑀲𑀻. 𑀲𑁆𑀬𑀸. 𑀓𑀁. 𑀓.)] 𑀦 𑀯𑀺𑀢𑀓𑁆𑀓𑁂𑀲𑁆𑀲𑀸𑀫𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀬𑁂 𑀘 𑀔𑁄 𑀇𑀫𑁂, 𑀆𑀦𑀦𑁆𑀤, 𑀯𑀺𑀢𑀓𑁆𑀓𑀸 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀦𑁆𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸𑀤𑀼𑀓𑁆𑀔𑀓𑁆𑀔𑀬𑀸𑀬, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀇𑀢𑀺 𑁋 ‘𑀏𑀯𑀭𑀽𑀧𑁂 𑀯𑀺𑀢𑀓𑁆𑀓𑁂 [𑀏𑀯𑀭𑀽𑀧𑁂𑀦 𑀯𑀺𑀢𑀓𑁆𑀓𑁂𑀦 (𑀓.)] 𑀯𑀺𑀢𑀓𑁆𑀓𑁂𑀲𑁆𑀲𑀸𑀫𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺.

𑁧𑁯𑁦. ‘‘𑀧𑀜𑁆𑀘 𑀔𑁄 𑀇𑀫𑁂, 𑀆𑀦𑀦𑁆𑀤, 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸 𑁋 𑀇𑀫𑁂 𑀔𑁄, 𑀆𑀦𑀦𑁆𑀤, 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀬𑀢𑁆𑀣 𑀪𑀺𑀓𑁆𑀔𑀼𑀦𑀸 𑀅𑀪𑀺𑀓𑁆𑀔𑀡𑀁 𑀲𑀓𑀁 𑀘𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀆𑀬𑀢𑀦𑁂 𑀉𑀧𑁆𑀧𑀚𑁆𑀚𑀢𑀺 𑀘𑁂𑀢𑀲𑁄 𑀲𑀫𑀼𑀤𑀸𑀘𑀸𑀭𑁄’𑀢𑀺? 𑀲𑀘𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀢𑁆𑀣𑀺 𑀔𑁄 𑀫𑁂 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀆𑀬𑀢𑀦𑁂 𑀉𑀧𑁆𑀧𑀚𑁆𑀚𑀢𑀺 𑀘𑁂𑀢𑀲𑁄 𑀲𑀫𑀼𑀤𑀸𑀘𑀸𑀭𑁄’𑀢𑀺, 𑀏𑀯𑀁 𑀲𑀦𑁆𑀢𑀫𑁂𑀢𑀁 [𑀏𑀯𑀁 𑀲𑀦𑁆𑀢𑀁 (𑀅𑀝𑁆𑀞.)], 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁄 𑀔𑁄 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀲𑁄 𑀫𑁂 𑀦𑀧𑁆𑀧𑀳𑀻𑀦𑁄’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀘𑁂 𑀧𑀦𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀦𑀢𑁆𑀣𑀺 𑀔𑁄 𑀫𑁂 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀆𑀬𑀢𑀦𑁂 𑀉𑀧𑁆𑀧𑀚𑁆𑀚𑀢𑀺 𑀘𑁂𑀢𑀲𑁄 𑀲𑀫𑀼𑀤𑀸𑀘𑀸𑀭𑁄’𑀢𑀺, 𑀏𑀯𑀁 𑀲𑀦𑁆𑀢𑀫𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁄 𑀔𑁄 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀲𑁄 𑀫𑁂 𑀧𑀳𑀻𑀦𑁄’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺.

𑁧𑁯𑁧. ‘‘𑀧𑀜𑁆𑀘 𑀔𑁄 𑀇𑀫𑁂, 𑀆𑀦𑀦𑁆𑀤, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀬𑀢𑁆𑀣 𑀪𑀺𑀓𑁆𑀔𑀼𑀦𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑀸 𑀯𑀺𑀳𑀸𑀢𑀩𑁆𑀩𑀁 𑁋 ‘𑀇𑀢𑀺 𑀭𑀽𑀧𑀁 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑁂𑀤𑀦𑀸… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺. 𑀢𑀲𑁆𑀲 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀬𑁄 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀲𑁆𑀫𑀺𑀫𑀸𑀦𑁄 𑀲𑁄 𑀧𑀳𑀻𑀬𑀢𑀺. 𑀏𑀯𑀁 𑀲𑀦𑁆𑀢𑀫𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑁄 𑀔𑁄 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀲𑁆𑀫𑀺𑀫𑀸𑀦𑁄 𑀲𑁄 𑀫𑁂 𑀧𑀳𑀻𑀦𑁄’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀇𑀫𑁂 𑀔𑁄 𑀢𑁂, 𑀆𑀦𑀦𑁆𑀤, 𑀥𑀫𑁆𑀫𑀸 𑀏𑀓𑀦𑁆𑀢𑀓𑀼𑀲𑀮𑀸 𑀓𑀼𑀲𑀮𑀸𑀬𑀸𑀢𑀺𑀓𑀸 [𑀥𑀫𑁆𑀫𑀸 𑀏𑀓𑀦𑁆𑀢𑀓𑀼𑀲𑀮𑀸𑀬𑀢𑀺𑀓𑀸 (𑀲𑀩𑁆𑀩𑀢𑁆𑀣) 𑀅𑀝𑁆𑀞𑀓𑀣𑀸𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀅𑀭𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀅𑀦𑀯𑀓𑁆𑀓𑀦𑁆𑀢𑀸 𑀧𑀸𑀧𑀺𑀫𑀢𑀸. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀦𑀦𑁆𑀤, 𑀓𑀁 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀭𑀳𑀢𑀺 𑀲𑀸𑀯𑀓𑁄 𑀲𑀢𑁆𑀣𑀸𑀭𑀁 𑀅𑀦𑀼𑀩𑀦𑁆𑀥𑀺𑀢𑀼𑀁 𑀅𑀧𑀺 𑀧𑀡𑀼𑀚𑁆𑀚𑀫𑀸𑀦𑁄’’𑀢𑀺 [𑀅𑀧𑀺 𑀧𑀦𑀼𑀚𑁆𑀚𑀫𑀸𑀦𑁄𑀧𑀻𑀢𑀺 (𑀓. 𑀲𑀻.), 𑀅𑀧𑀺 𑀧𑀬𑀼𑀚𑁆𑀚𑀫𑀸𑀦𑁄𑀢𑀺 (𑀲𑁆𑀬𑀸. 𑀓𑀁. 𑀧𑀻.)]? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀲𑀸𑀥𑀼 𑀯𑀢, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁𑀬𑁂𑀯 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺.

𑁧𑁯𑁨. ‘‘𑀦 𑀔𑁄, 𑀆𑀦𑀦𑁆𑀤, 𑀅𑀭𑀳𑀢𑀺 𑀲𑀸𑀯𑀓𑁄 𑀲𑀢𑁆𑀣𑀸𑀭𑀁 𑀅𑀦𑀼𑀩𑀦𑁆𑀥𑀺𑀢𑀼𑀁, 𑀬𑀤𑀺𑀤𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀢𑀲𑁆𑀲 𑀳𑁂𑀢𑀼 [𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀳𑁂𑀢𑀼 (𑀓.)]. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀻𑀖𑀭𑀢𑁆𑀢𑀲𑁆𑀲 [𑀤𑀻𑀖𑀭𑀢𑁆𑀢𑀁 + 𑀅𑀲𑁆𑀲𑀸𑀢𑀺 𑀧𑀤𑀘𑁆𑀙𑁂𑀤𑁄] 𑀳𑀺 𑀢𑁂, 𑀆𑀦𑀦𑁆𑀤, 𑀥𑀫𑁆𑀫𑀸 𑀲𑀼𑀢𑀸 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀬𑀸 𑀘 𑀔𑁄 𑀅𑀬𑀁, 𑀆𑀦𑀦𑁆𑀤, 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀦𑀻𑀯𑀭𑀡𑀲𑀧𑁆𑀧𑀸𑀬𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸 𑁋 𑀏𑀯𑀭𑀽𑀧𑀺𑀬𑀸 𑀔𑁄, 𑀆𑀦𑀦𑁆𑀤, 𑀓𑀣𑀸𑀬 𑀳𑁂𑀢𑀼 𑀅𑀭𑀳𑀢𑀺 𑀲𑀸𑀯𑀓𑁄 𑀲𑀢𑁆𑀣𑀸𑀭𑀁 𑀅𑀦𑀼𑀩𑀦𑁆𑀥𑀺𑀢𑀼𑀁 𑀅𑀧𑀺 𑀧𑀡𑀼𑀚𑁆𑀚𑀫𑀸𑀦𑁄.

‘‘𑀏𑀯𑀁 𑀲𑀦𑁆𑀢𑁂 𑀔𑁄, 𑀆𑀦𑀦𑁆𑀤, 𑀆𑀘𑀭𑀺𑀬𑀽𑀧𑀤𑁆𑀤𑀯𑁄 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀅𑀦𑁆𑀢𑁂𑀯𑀸𑀲𑀽𑀧𑀤𑁆𑀤𑀯𑁄 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀩𑁆𑀭𑀳𑁆𑀫𑀘𑀸𑀭𑀽𑀧𑀤𑁆𑀤𑀯𑁄 𑀳𑁄𑀢𑀺.

𑁧𑁯𑁩. ‘‘𑀓𑀣𑀜𑁆𑀘𑀸𑀦𑀦𑁆𑀤, 𑀆𑀘𑀭𑀺𑀬𑀽𑀧𑀤𑁆𑀤𑀯𑁄 𑀳𑁄𑀢𑀺? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀢𑀲𑁆𑀲 𑀢𑀣𑀸𑀯𑀽𑀧𑀓𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀅𑀦𑁆𑀯𑀸𑀯𑀢𑁆𑀢𑀦𑁆𑀢𑀺 [𑀅𑀦𑁆𑀯𑀸𑀯𑀝𑁆𑀝𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀲𑁄 𑀅𑀦𑁆𑀯𑀸𑀯𑀢𑁆𑀢𑀦𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑁂𑀲𑀼 𑀘𑁂𑀯 𑀚𑀸𑀦𑀧𑀤𑁂𑀲𑀼 𑀘 𑀫𑀼𑀘𑁆𑀙𑀁 𑀦𑀺𑀓𑀸𑀫𑀬𑀢𑀺 [𑀫𑀼𑀘𑁆𑀙𑀢𑀺 𑀓𑀸𑀫𑀬𑀢𑀺 (𑀲𑀻. 𑀧𑀻.) 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦 𑀢𑀣𑀸 𑀤𑀺𑀲𑁆𑀲𑀢𑀺], 𑀕𑁂𑀥𑀁 𑀆𑀧𑀚𑁆𑀚𑀢𑀺, 𑀆𑀯𑀢𑁆𑀢𑀢𑀺 𑀩𑀸𑀳𑀼𑀮𑁆𑀮𑀸𑀬. 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀉𑀧𑀤𑁆𑀤𑀯𑁄 [𑀉𑀧𑀤𑁆𑀤𑀼𑀢𑁄 (𑀲𑀻. 𑀧𑀻.)] 𑀆𑀘𑀭𑀺𑀬𑁄. 𑀆𑀘𑀭𑀺𑀬𑀽𑀧𑀤𑁆𑀤𑀯𑁂𑀦 𑀅𑀯𑀥𑀺𑀁𑀲𑀼 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 [𑀧𑁄𑀦𑁄𑀪𑀯𑀺𑀓𑀸 (𑀲𑀻. 𑀧𑀻.)] 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀆𑀘𑀭𑀺𑀬𑀽𑀧𑀤𑁆𑀤𑀯𑁄 𑀳𑁄𑀢𑀺.

𑁧𑁯𑁪. ‘‘𑀓𑀣𑀜𑁆𑀘𑀸𑀦𑀦𑁆𑀤, 𑀅𑀦𑁆𑀢𑁂𑀯𑀸𑀲𑀽𑀧𑀤𑁆𑀤𑀯𑁄 𑀳𑁄𑀢𑀺? 𑀢𑀲𑁆𑀲𑁂𑀯 𑀔𑁄 𑀧𑀦𑀸𑀦𑀦𑁆𑀤, 𑀲𑀢𑁆𑀣𑀼 𑀲𑀸𑀯𑀓𑁄 𑀢𑀲𑁆𑀲 𑀲𑀢𑁆𑀣𑀼 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬𑀫𑀸𑀦𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀢𑀲𑁆𑀲 𑀢𑀣𑀸𑀯𑀽𑀧𑀓𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀅𑀦𑁆𑀯𑀸𑀯𑀢𑁆𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀲𑁄 𑀅𑀦𑁆𑀯𑀸𑀯𑀢𑁆𑀢𑀦𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑁂𑀲𑀼 𑀘𑁂𑀯 𑀚𑀸𑀦𑀧𑀤𑁂𑀲𑀼 𑀘 𑀫𑀼𑀘𑁆𑀙𑀁 𑀦𑀺𑀓𑀸𑀫𑀬𑀢𑀺, 𑀕𑁂𑀥𑀁 𑀆𑀧𑀚𑁆𑀚𑀢𑀺, 𑀆𑀯𑀢𑁆𑀢𑀢𑀺 𑀩𑀸𑀳𑀼𑀮𑁆𑀮𑀸𑀬. 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀉𑀧𑀤𑁆𑀤𑀯𑁄 𑀅𑀦𑁆𑀢𑁂𑀯𑀸𑀲𑀻. 𑀅𑀦𑁆𑀢𑁂𑀯𑀸𑀲𑀽𑀧𑀤𑁆𑀤𑀯𑁂𑀦 𑀅𑀯𑀥𑀺𑀁𑀲𑀼 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀅𑀦𑁆𑀢𑁂𑀯𑀸𑀲𑀽𑀧𑀤𑁆𑀤𑀯𑁄 𑀳𑁄𑀢𑀺.

𑁧𑁯𑁫. ‘‘𑀓𑀣𑀜𑁆𑀘𑀸𑀦𑀦𑁆𑀤, 𑀩𑁆𑀭𑀳𑁆𑀫𑀘𑀸𑀭𑀽𑀧𑀤𑁆𑀤𑀯𑁄 𑀳𑁄𑀢𑀺? 𑀇𑀥𑀸𑀦𑀦𑁆𑀤, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀢𑀲𑁆𑀲 𑀢𑀣𑀸𑀯𑀽𑀧𑀓𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀅𑀦𑁆𑀯𑀸𑀯𑀢𑁆𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀲𑁄 𑀅𑀦𑁆𑀯𑀸𑀯𑀢𑁆𑀢𑀦𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑁂𑀲𑀼 𑀘𑁂𑀯 𑀚𑀸𑀦𑀧𑀤𑁂𑀲𑀼 𑀘 𑀦 𑀫𑀼𑀘𑁆𑀙𑀁 𑀦𑀺𑀓𑀸𑀫𑀬𑀢𑀺, 𑀦 𑀕𑁂𑀥𑀁 𑀆𑀧𑀚𑁆𑀚𑀢𑀺, 𑀦 𑀆𑀯𑀢𑁆𑀢𑀢𑀺 𑀩𑀸𑀳𑀼𑀮𑁆𑀮𑀸𑀬. 𑀢𑀲𑁆𑀲𑁂𑀯 𑀔𑁄 𑀧𑀦𑀸𑀦𑀦𑁆𑀤, 𑀲𑀢𑁆𑀣𑀼 𑀲𑀸𑀯𑀓𑁄 𑀢𑀲𑁆𑀲 𑀲𑀢𑁆𑀣𑀼 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬𑀫𑀸𑀦𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀢𑀲𑁆𑀲 𑀢𑀣𑀸𑀯𑀽𑀧𑀓𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀅𑀦𑁆𑀯𑀸𑀯𑀢𑁆𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀲𑁄 𑀅𑀦𑁆𑀯𑀸𑀯𑀢𑁆𑀢𑀦𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑁂𑀲𑀼 𑀘𑁂𑀯 𑀚𑀸𑀦𑀧𑀤𑁂𑀲𑀼 𑀘 𑀫𑀼𑀘𑁆𑀙𑀁 𑀦𑀺𑀓𑀸𑀫𑀬𑀢𑀺, 𑀕𑁂𑀥𑀁 𑀆𑀧𑀚𑁆𑀚𑀢𑀺, 𑀆𑀯𑀢𑁆𑀢𑀢𑀺 𑀩𑀸𑀳𑀼𑀮𑁆𑀮𑀸𑀬. 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀉𑀧𑀤𑁆𑀤𑀯𑁄 𑀩𑁆𑀭𑀳𑁆𑀫𑀘𑀸𑀭𑀻. 𑀩𑁆𑀭𑀳𑁆𑀫𑀘𑀸𑀭𑀽𑀧𑀤𑁆𑀤𑀯𑁂𑀦 𑀅𑀯𑀥𑀺𑀁𑀲𑀼 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀸𑀭𑀽𑀧𑀤𑁆𑀤𑀯𑁄 𑀳𑁄𑀢𑀺.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀘𑁂𑀯𑀸𑀬𑀁 𑀆𑀘𑀭𑀺𑀬𑀽𑀧𑀤𑁆𑀤𑀯𑁄, 𑀬𑁄 𑀘 𑀅𑀦𑁆𑀢𑁂𑀯𑀸𑀲𑀽𑀧𑀤𑁆𑀤𑀯𑁄 𑀅𑀬𑀁 𑀢𑁂𑀳𑀺 𑀩𑁆𑀭𑀳𑁆𑀫𑀘𑀸𑀭𑀽𑀧𑀤𑁆𑀤𑀯𑁄 𑀤𑀼𑀓𑁆𑀔𑀯𑀺𑀧𑀸𑀓𑀢𑀭𑁄 𑀘𑁂𑀯 𑀓𑀝𑀼𑀓𑀯𑀺𑀧𑀸𑀓𑀢𑀭𑁄 𑀘, 𑀅𑀧𑀺 𑀘 𑀯𑀺𑀦𑀺𑀧𑀸𑀢𑀸𑀬 𑀲𑀁𑀯𑀢𑁆𑀢𑀢𑀺.

𑁧𑁯𑁬. ‘‘𑀢𑀲𑁆𑀫𑀸𑀢𑀺𑀳 𑀫𑀁, 𑀆𑀦𑀦𑁆𑀤, 𑀫𑀺𑀢𑁆𑀢𑀯𑀢𑀸𑀬 𑀲𑀫𑀼𑀤𑀸𑀘𑀭𑀣, 𑀫𑀸 𑀲𑀧𑀢𑁆𑀢𑀯𑀢𑀸𑀬. 𑀢𑀁 𑀯𑁄 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀲𑀧𑀢𑁆𑀢𑀯𑀢𑀸𑀬 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀦𑁄 𑀫𑀺𑀢𑁆𑀢𑀯𑀢𑀸𑀬? 𑀇𑀥𑀸𑀦𑀦𑁆𑀤, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑁋 ‘𑀇𑀤𑀁 𑀯𑁄 𑀳𑀺𑀢𑀸𑀬, 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀲𑀧𑀢𑁆𑀢𑀯𑀢𑀸𑀬 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀦𑁄 𑀫𑀺𑀢𑁆𑀢𑀯𑀢𑀸𑀬.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀫𑀺𑀢𑁆𑀢𑀯𑀢𑀸𑀬 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀦𑁄 𑀲𑀧𑀢𑁆𑀢𑀯𑀢𑀸𑀬? 𑀇𑀥𑀸𑀦𑀦𑁆𑀤, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑁋 ‘𑀇𑀤𑀁 𑀯𑁄 𑀳𑀺𑀢𑀸𑀬, 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀦 𑀘 𑀯𑁄𑀓𑁆𑀓𑀫 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀫𑀺𑀢𑁆𑀢𑀯𑀢𑀸𑀬 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀦𑁄 𑀲𑀧𑀢𑁆𑀢𑀯𑀢𑀸𑀬.

‘‘𑀢𑀲𑁆𑀫𑀸𑀢𑀺𑀳 𑀫𑀁, 𑀆𑀦𑀦𑁆𑀤, 𑀫𑀺𑀢𑁆𑀢𑀯𑀢𑀸𑀬 𑀲𑀫𑀼𑀤𑀸𑀘𑀭𑀣, 𑀫𑀸 𑀲𑀧𑀢𑁆𑀢𑀯𑀢𑀸𑀬. 𑀢𑀁 𑀯𑁄 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀦 𑀯𑁄 𑀅𑀳𑀁, 𑀆𑀦𑀦𑁆𑀤, 𑀢𑀣𑀸 𑀧𑀭𑀓𑁆𑀓𑀫𑀺𑀲𑁆𑀲𑀸𑀫𑀺 𑀬𑀣𑀸 𑀓𑀼𑀫𑁆𑀪𑀓𑀸𑀭𑁄 𑀆𑀫𑀓𑁂 𑀆𑀫𑀓𑀫𑀢𑁆𑀢𑁂. 𑀦𑀺𑀕𑁆𑀕𑀬𑁆𑀳 𑀦𑀺𑀕𑁆𑀕𑀬𑁆𑀳𑀸𑀳𑀁, 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺; 𑀧𑀯𑀬𑁆𑀳 𑀧𑀯𑀬𑁆𑀳, 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺 [𑀧𑀯𑀬𑁆𑀳 𑀧𑀯𑀬𑁆𑀳 (𑀲𑀻. 𑀧𑀻.), 𑀧𑀕𑁆𑀕𑀬𑁆𑀳 𑀧𑀕𑁆𑀕𑀬𑁆𑀳 𑀆𑀦𑀦𑁆𑀤 𑀯𑀓𑁆𑀔𑀸𑀫𑀺 (𑀓.)]. 𑀬𑁄 𑀲𑀸𑀭𑁄 𑀲𑁄 𑀞𑀲𑁆𑀲𑀢𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀫𑀳𑀸𑀲𑀼𑀜𑁆𑀜𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.

𑁩. 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀲𑀼𑀢𑁆𑀢𑀁

𑁧𑁯𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀦𑀺𑀲𑁆𑀲𑀢𑀺 [𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺 𑀚𑀸𑀦𑀺𑀲𑁆𑀲𑀢𑀺 (𑀓.)] 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀺, ‘𑀏𑀯𑀁𑀦𑀸𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀺, ‘𑀏𑀯𑀁𑀕𑁄𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀺, ‘𑀏𑀯𑀁𑀲𑀻𑀮𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀺, ‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀺, ‘𑀏𑀯𑀁𑀧𑀜𑁆𑀜𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀺, ‘𑀏𑀯𑀁𑀯𑀺𑀳𑀸𑀭𑀻 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀺, ‘𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀻’’𑀢𑀺! 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀸 𑀘𑁂𑀯, 𑀆𑀯𑀼𑀲𑁄, 𑀢𑀣𑀸𑀕𑀢𑀸 𑀅𑀘𑁆𑀙𑀭𑀺𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀸 𑀘; 𑀅𑀩𑁆𑀪𑀼𑀢𑀸 𑀘𑁂𑀯, 𑀆𑀯𑀼𑀲𑁄, 𑀢𑀣𑀸𑀕𑀢𑀸 𑀅𑀩𑁆𑀪𑀼𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀸 𑀘𑀸’’𑀢𑀺. 𑀅𑀬𑀜𑁆𑀘 𑀳𑀺𑀤𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺.

𑁧𑁯𑁮. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀦𑀺𑀲𑁆𑀲𑀢𑀺 𑁋 𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸… 𑀏𑀯𑀁𑀕𑁄𑀢𑁆𑀢𑀸… 𑀏𑀯𑀁𑀲𑀻𑀮𑀸… 𑀏𑀯𑀁𑀥𑀫𑁆𑀫𑀸.. 𑀏𑀯𑀁𑀧𑀜𑁆𑀜𑀸… 𑀏𑀯𑀁𑀯𑀺𑀳𑀸𑀭𑀻… 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’𑀢𑀺! 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀫𑁆𑀳𑁂 𑀏𑀢𑀤𑀯𑁄𑀘 𑁋 ‘𑀅𑀘𑁆𑀙𑀭𑀺𑀬𑀸 𑀘𑁂𑀯, 𑀆𑀯𑀼𑀲𑁄, 𑀢𑀣𑀸𑀕𑀢𑀸 𑀅𑀘𑁆𑀙𑀭𑀺𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀸 𑀘, 𑀅𑀩𑁆𑀪𑀼𑀢𑀸 𑀘𑁂𑀯, 𑀆𑀯𑀼𑀲𑁄, 𑀢𑀣𑀸𑀕𑀢𑀸 𑀅𑀩𑁆𑀪𑀼𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀸 𑀘𑀸’𑀢𑀺. 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸; 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑁧𑁯𑁯. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀲𑁆𑀫𑀸𑀢𑀺𑀳 𑀢𑀁, 𑀆𑀦𑀦𑁆𑀤, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀝𑀺𑀪𑀦𑁆𑀢𑀼 𑀢𑀣𑀸𑀕𑀢𑀲𑁆𑀲 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀥𑀫𑁆𑀫𑀸’’𑀢𑀺 [𑀅𑀩𑁆𑀪𑀼𑀢𑀸 𑀥𑀫𑁆𑀫𑀸𑀢𑀺 (?)].

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀚𑁆𑀚𑀻’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀚𑁆𑀚𑀺 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑁂 𑀓𑀸𑀬𑁂 𑀅𑀝𑁆𑀞𑀸𑀲𑀻’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑁂 𑀓𑀸𑀬𑁂 𑀅𑀝𑁆𑀞𑀸𑀲𑀺 𑀇𑀤𑀁𑀧𑀸𑀳𑀁 [𑀇𑀤𑀁𑀧𑀳𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

𑁨𑁦𑁦. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀸𑀯𑀢𑀸𑀬𑀼𑀓𑀁, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑁂 𑀓𑀸𑀬𑁂 𑀅𑀝𑁆𑀞𑀸𑀲𑀻’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀬𑀸𑀯𑀢𑀸𑀬𑀼𑀓𑀁 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑁂 𑀓𑀸𑀬𑁂 𑀅𑀝𑁆𑀞𑀸𑀲𑀺 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸, 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀻’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀺 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

𑁨𑁦𑁧. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺, 𑀅𑀣 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑀸𑀧𑀺 𑀢𑀸 𑀮𑁄𑀓𑀦𑁆𑀢𑀭𑀺𑀓𑀸 𑀅𑀖𑀸 𑀅𑀲𑀁𑀯𑀼𑀢𑀸 𑀅𑀦𑁆𑀥𑀓𑀸𑀭𑀸 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸, 𑀬𑀢𑁆𑀣𑀧𑀺𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸 𑀆𑀪𑀸𑀬 𑀦𑀸𑀦𑀼𑀪𑁄𑀦𑁆𑀢𑀺 𑀢𑀢𑁆𑀣𑀧𑀺 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑁂𑀧𑀺 𑀢𑀢𑁆𑀣 𑀲𑀢𑁆𑀢𑀸 𑀉𑀧𑀧𑀦𑁆𑀦𑀸 𑀢𑁂𑀧𑀺 𑀢𑁂𑀦𑁄𑀪𑀸𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀦𑁆𑀢𑀺 𑁋 𑀅𑀜𑁆𑀜𑁂𑀧𑀺 𑀓𑀺𑀭, 𑀪𑁄, 𑀲𑀦𑁆𑀢𑀺 𑀲𑀢𑁆𑀢𑀸 𑀇𑀥𑀽𑀧𑀧𑀦𑁆𑀦𑀸𑀢𑀺. 𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺 𑀅𑀧𑁆𑀧𑀫𑀸𑀡𑁄 𑀘 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯’𑀦𑁆𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

𑁨𑁦𑁨. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀸 𑀘𑀢𑀼𑀤𑁆𑀤𑀺𑀲𑀁 𑀆𑀭𑀓𑁆𑀔𑀸𑀬 𑀉𑀧𑀕𑀘𑁆𑀙𑀦𑁆𑀢𑀺 𑁋 𑀫𑀸 𑀦𑀁 𑀩𑁄𑀥𑀺𑀲𑀢𑁆𑀢𑀁 𑀯𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀭𑀁 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀓𑁄𑀘𑀺 𑀯𑀸 𑀯𑀺𑀳𑁂𑀞𑁂𑀲𑀻’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

𑁨𑁦𑁩. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀧𑀓𑀢𑀺𑀬𑀸 𑀲𑀻𑀮𑀯𑀢𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀯𑀺𑀭𑀢𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀼𑀭𑀺𑀲𑁂𑀲𑀼 𑀫𑀸𑀦𑀲𑀁 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀕𑀼𑀡𑀽𑀧𑀲𑀁𑀳𑀺𑀢𑀁, 𑀅𑀦𑀢𑀺𑀓𑁆𑀓𑀫𑀦𑀻𑀬𑀸 𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀭𑀢𑁆𑀢𑀘𑀺𑀢𑁆𑀢𑁂𑀦𑀸’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀮𑀸𑀪𑀺𑀦𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀁. 𑀲𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀢𑀻’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

𑁨𑁦𑁪. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀓𑁄𑀘𑀺𑀤𑁂𑀯 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀢𑀺; 𑀲𑀼𑀔𑀺𑀦𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀅𑀓𑀺𑀮𑀦𑁆𑀢𑀓𑀸𑀬𑀸; 𑀩𑁄𑀥𑀺𑀲𑀢𑁆𑀢𑀜𑁆𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄. 𑀢𑀢𑁆𑀭𑀸𑀲𑁆𑀲 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸. 𑀢𑀫𑁂𑀦𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀳𑀢𑁆𑀣𑁂 𑀓𑀭𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬 𑁋 𑀅𑀬𑀁 𑀔𑁄 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄, 𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸𑀢𑀺. 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀓𑁄𑀘𑀺𑀤𑁂𑀯 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀢𑀺; 𑀲𑀼𑀔𑀺𑀦𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀅𑀓𑀺𑀮𑀦𑁆𑀢𑀓𑀸𑀬𑀸; 𑀩𑁄𑀥𑀺𑀲𑀢𑁆𑀢𑀜𑁆𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬’𑀦𑁆𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

𑁨𑁦𑁫. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀲𑀢𑁆𑀢𑀸𑀳𑀚𑀸𑀢𑁂, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀓𑀸𑀮𑀁 𑀓𑀭𑁄𑀢𑀺, 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀚𑁆𑀚𑀢𑀻’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀣𑀸 𑀔𑁄 𑀧𑀦𑀸𑀦𑀦𑁆𑀤, 𑀅𑀜𑁆𑀜𑀸 𑀇𑀢𑁆𑀣𑀺𑀓𑀸 𑀦𑀯 𑀯𑀸 𑀤𑀲 𑀯𑀸 𑀫𑀸𑀲𑁂 𑀕𑀩𑁆𑀪𑀁 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀯𑀺𑀚𑀸𑀬𑀦𑁆𑀢𑀺, 𑀦 𑀳𑁂𑀯𑀁 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀺. 𑀤𑀲𑁂𑀯 𑀫𑀸𑀲𑀸𑀦𑀺 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀯𑀺𑀚𑀸𑀬𑀢𑀻’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀣𑀸 𑀔𑁄 𑀧𑀦𑀸𑀦𑀦𑁆𑀤, 𑀅𑀜𑁆𑀜𑀸 𑀇𑀢𑁆𑀣𑀺𑀓𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀦𑀺𑀧𑀦𑁆𑀦𑀸 𑀯𑀸 𑀯𑀺𑀚𑀸𑀬𑀦𑁆𑀢𑀺, 𑀦 𑀳𑁂𑀯𑀁 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀺. 𑀞𑀺𑀢𑀸𑀯 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀻’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀤𑁂𑀯𑀸 𑀦𑀁 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

𑁨𑁦𑁬. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀧𑁆𑀧𑀢𑁆𑀢𑁄𑀯 𑀩𑁄𑀥𑀺𑀲𑀢𑁆𑀢𑁄 𑀧𑀣𑀯𑀺𑀁 𑀳𑁄𑀢𑀺, 𑀘𑀢𑁆𑀢𑀸𑀭𑁄 𑀦𑀁 𑀤𑁂𑀯𑀧𑀼𑀢𑁆𑀢𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀫𑀸𑀢𑀼 𑀧𑀼𑀭𑀢𑁄 𑀞𑀧𑁂𑀦𑁆𑀢𑀺 𑁋 𑀅𑀢𑁆𑀢𑀫𑀦𑀸, 𑀤𑁂𑀯𑀺, 𑀳𑁄𑀳𑀺; 𑀫𑀳𑁂𑀲𑀓𑁆𑀔𑁄 𑀢𑁂 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀯𑀺𑀲𑀤𑁄𑀯 𑀦𑀺𑀓𑁆𑀔𑀫𑀢𑀺 𑀅𑀫𑀓𑁆𑀔𑀺𑀢𑁄 𑀉𑀤𑁂𑀦 [𑀉𑀤𑁆𑀤𑁂𑀦 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀫𑀓𑁆𑀔𑀺𑀢𑁄 𑀲𑁂𑀫𑁆𑀳𑁂𑀦 𑀅𑀫𑀓𑁆𑀔𑀺𑀢𑁄 𑀭𑀼𑀳𑀺𑀭𑁂𑀦 𑀅𑀫𑀓𑁆𑀔𑀺𑀢𑁄 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀲𑀼𑀤𑁆𑀥𑁄 𑀯𑀺𑀲𑀤𑁄 [𑀯𑀺𑀲𑀼𑀤𑁆𑀥𑁄 (𑀲𑁆𑀬𑀸.)]. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀫𑀡𑀺𑀭𑀢𑀦𑀁 𑀓𑀸𑀲𑀺𑀓𑁂 𑀯𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀁 𑀦𑁂𑀯 𑀫𑀡𑀺𑀭𑀢𑀦𑀁 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀫𑀓𑁆𑀔𑁂𑀢𑀺 𑀦𑀸𑀧𑀺 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀫𑀡𑀺𑀭𑀢𑀦𑀁 𑀫𑀓𑁆𑀔𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀪𑀺𑀦𑁆𑀦𑀁 𑀲𑀼𑀤𑁆𑀥𑀢𑁆𑀢𑀸. 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀯𑀺𑀲𑀤𑁄𑀯 𑀦𑀺𑀓𑁆𑀔𑀫𑀢𑀺 𑀅𑀫𑀓𑁆𑀔𑀺𑀢𑁄 𑀉𑀤𑁂𑀦 𑀅𑀫𑀓𑁆𑀔𑀺𑀢𑁄 𑀲𑁂𑀫𑁆𑀳𑁂𑀦 𑀅𑀫𑀓𑁆𑀔𑀺𑀢𑁄 𑀭𑀼𑀳𑀺𑀭𑁂𑀦 𑀅𑀫𑀓𑁆𑀔𑀺𑀢𑁄 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀲𑀼𑀤𑁆𑀥𑁄 𑀯𑀺𑀲𑀤𑁄’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀤𑁆𑀯𑁂 𑀉𑀤𑀓𑀲𑁆𑀲 𑀥𑀸𑀭𑀸 𑀅𑀦𑁆𑀢𑀮𑀺𑀓𑁆𑀔𑀸 𑀧𑀸𑀢𑀼𑀪𑀯𑀦𑁆𑀢𑀺 𑁋 𑀏𑀓𑀸 𑀲𑀻𑀢𑀲𑁆𑀲, 𑀏𑀓𑀸 𑀉𑀡𑁆𑀳𑀲𑁆𑀲; 𑀬𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀤𑀓𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺 𑀫𑀸𑀢𑀼 𑀘𑀸’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

𑁨𑁦𑁭. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀲𑀫𑁆𑀧𑀢𑀺𑀚𑀸𑀢𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀘𑁆𑀙𑀢𑀺, 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑁂, 𑀲𑀩𑁆𑀩𑀸 𑀘 𑀤𑀺𑀲𑀸 𑀯𑀺𑀮𑁄𑀓𑁂𑀢𑀺, 𑀆𑀲𑀪𑀺𑀜𑁆𑀘 𑀯𑀸𑀘𑀁 𑀪𑀸𑀲𑀢𑀺 𑁋 𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀣 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑀸𑀧𑀺 𑀢𑀸 𑀮𑁄𑀓𑀦𑁆𑀢𑀭𑀺𑀓𑀸 𑀅𑀖𑀸 𑀅𑀲𑀁𑀯𑀼𑀢𑀸 𑀅𑀦𑁆𑀥𑀓𑀸𑀭𑀸 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸 𑀬𑀢𑁆𑀣𑀧𑀺𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸 𑀆𑀪𑀸𑀬 𑀦𑀸𑀦𑀼𑀪𑁄𑀦𑁆𑀢𑀺 𑀢𑀢𑁆𑀣𑀧𑀺 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑁂𑀧𑀺 𑀢𑀢𑁆𑀣 𑀲𑀢𑁆𑀢𑀸 𑀉𑀧𑀧𑀦𑁆𑀦𑀸 𑀢𑁂𑀧𑀺 𑀢𑁂𑀦𑁄𑀪𑀸𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀦𑁆𑀢𑀺 𑁋 𑀅𑀜𑁆𑀜𑁂𑀧𑀺 𑀓𑀺𑀭, 𑀪𑁄, 𑀲𑀦𑁆𑀢𑀺 𑀲𑀢𑁆𑀢𑀸 𑀇𑀥𑀽𑀧𑀧𑀦𑁆𑀦𑀸𑀢𑀺. 𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺, 𑀅𑀧𑁆𑀧𑀫𑀸𑀡𑁄 𑀘 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯’𑀦𑁆𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂…𑀧𑁂… 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀻’’𑀢𑀺.

𑁨𑁦𑁮. ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀆𑀦𑀦𑁆𑀤, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀳𑀺. 𑀇𑀥𑀸𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀯𑀺𑀤𑀺𑀢𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀤𑀺𑀢𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺; 𑀯𑀺𑀤𑀺𑀢𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀤𑀺𑀢𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺; 𑀯𑀺𑀤𑀺𑀢𑀸 𑀯𑀺𑀢𑀓𑁆𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀤𑀺𑀢𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀇𑀤𑀫𑁆𑀧𑀺 𑀔𑁄, 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀳𑀻’’𑀢𑀺. ‘‘𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀯𑀺𑀤𑀺𑀢𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀤𑀺𑀢𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺; 𑀯𑀺𑀤𑀺𑀢𑀸 𑀲𑀜𑁆𑀜𑀸… 𑀯𑀺𑀤𑀺𑀢𑀸 𑀯𑀺𑀢𑀓𑁆𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀤𑀺𑀢𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀇𑀤𑀁𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀻’’𑀢𑀺.

𑀇𑀤𑀫𑀯𑁄𑀘 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄. 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺; 𑀅𑀢𑁆𑀢𑀫𑀦𑀸 𑀘 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.

𑁪. 𑀩𑀸𑀓𑀼𑀮𑀲𑀼𑀢𑁆𑀢𑀁

𑁨𑁦𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀩𑀸𑀓𑀼𑀮𑁄 [𑀩𑀓𑁆𑀓𑀼𑀮𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀅𑀘𑁂𑀮𑀓𑀲𑁆𑀲𑀧𑁄 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀧𑀼𑀭𑀸𑀡𑀕𑀺𑀳𑀺𑀲𑀳𑀸𑀬𑁄 𑀬𑁂𑀦𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀩𑀸𑀓𑀼𑀮𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀘𑁂𑀮𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀩𑀸𑀓𑀼𑀮𑀁 𑀏𑀢𑀤𑀯𑁄𑀘 𑁋

‘‘𑀓𑀻𑀯𑀘𑀺𑀭𑀁 𑀧𑀩𑁆𑀩𑀚𑀺𑀢𑁄𑀲𑀺, 𑀆𑀯𑀼𑀲𑁄 𑀩𑀸𑀓𑀼𑀮𑀸’’𑀢𑀺? ‘‘𑀅𑀲𑀻𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲𑀸’’𑀢𑀺. ‘‘𑀇𑀫𑁂𑀳𑀺 𑀧𑀦 𑀢𑁂, 𑀆𑀯𑀼𑀲𑁄 𑀩𑀸𑀓𑀼𑀮, 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀓𑀢𑀺𑀓𑁆𑀔𑀢𑁆𑀢𑀼𑀁 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑁄’’𑀢𑀺? ‘‘𑀦 𑀔𑁄 𑀫𑀁, 𑀆𑀯𑀼𑀲𑁄 𑀓𑀲𑁆𑀲𑀧, 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑁋 ‘𑀇𑀫𑁂𑀳𑀺 𑀧𑀦 𑀢𑁂, 𑀆𑀯𑀼𑀲𑁄 𑀩𑀸𑀓𑀼𑀮, 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀓𑀢𑀺𑀓𑁆𑀔𑀢𑁆𑀢𑀼𑀁 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑁄’𑀢𑀺. 𑀏𑀯𑀜𑁆𑀘 𑀔𑁄 𑀫𑀁, 𑀆𑀯𑀼𑀲𑁄 𑀓𑀲𑁆𑀲𑀧, 𑀧𑀼𑀘𑁆𑀙𑀺𑀢𑀩𑁆𑀩𑀁 𑁋 ‘𑀇𑀫𑁂𑀳𑀺 𑀧𑀦 𑀢𑁂, 𑀆𑀯𑀼𑀲𑁄 𑀩𑀸𑀓𑀼𑀮, 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀓𑀢𑀺𑀓𑁆𑀔𑀢𑁆𑀢𑀼𑀁 𑀓𑀸𑀫𑀲𑀜𑁆𑀜𑀸 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸’’’𑀢𑀺? ( ) [(𑀇𑀫𑁂𑀳𑀺 𑀧𑀦 𑀢𑁂 𑀆𑀯𑀼𑀲𑁄 𑀩𑀓𑁆𑀓𑀼𑀮 𑀅𑀲𑀻𑀢𑀺𑀬𑁄 𑀯𑀲𑁆𑀲𑁂𑀳𑀺 𑀓𑀢𑀺𑀓𑁆𑀔𑀢𑁆𑀢𑀼𑀁 𑀓𑀸𑀫𑀲𑀜𑁆𑀜𑀸 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸𑀢𑀺.) (𑀲𑀻. 𑀧𑀻.)]

𑁨𑁧𑁦. ‘‘𑀅𑀲𑀻𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀪𑀺𑀚𑀸𑀦𑀸𑀫𑀺 𑀓𑀸𑀫𑀲𑀜𑁆𑀜𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁. 𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀦𑀸𑀪𑀺𑀚𑀸𑀦𑀸𑀢𑀺 𑀓𑀸𑀫𑀲𑀜𑁆𑀜𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁 𑀇𑀤𑀫𑁆𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫.

‘‘𑀅𑀲𑀻𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀪𑀺𑀚𑀸𑀦𑀸𑀫𑀺 𑀩𑁆𑀬𑀸𑀧𑀸𑀤𑀲𑀜𑁆𑀜𑀁…𑀧𑁂… 𑀯𑀺𑀳𑀺𑀁𑀲𑀸𑀲𑀜𑁆𑀜𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁. 𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀦𑀸𑀪𑀺𑀚𑀸𑀦𑀸𑀢𑀺 𑀯𑀺𑀳𑀺𑀁𑀲𑀸𑀲𑀜𑁆𑀜𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀇𑀤𑀫𑁆𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫.

‘‘𑀅𑀲𑀻𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀪𑀺𑀚𑀸𑀦𑀸𑀫𑀺 𑀓𑀸𑀫𑀯𑀺𑀢𑀓𑁆𑀓𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁. 𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀦𑀸𑀪𑀺𑀚𑀸𑀦𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀇𑀤𑀫𑁆𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫.

‘‘𑀅𑀲𑀻𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀪𑀺𑀚𑀸𑀦𑀸𑀫𑀺 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁…𑀧𑁂… 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁. 𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀦𑀸𑀪𑀺𑀚𑀸𑀦𑀸𑀢𑀺 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀇𑀤𑀫𑁆𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫.

𑁨𑁧𑁧. ‘‘𑀅𑀲𑀻𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀪𑀺𑀚𑀸𑀦𑀸𑀫𑀺 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀢𑀸. 𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀦𑀸𑀪𑀺𑀚𑀸𑀦𑀸𑀢𑀺 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀢𑀸, 𑀇𑀤𑀫𑁆𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫.

‘‘𑀅𑀲𑀻𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀪𑀺𑀚𑀸𑀦𑀸𑀫𑀺 𑀲𑀢𑁆𑀣𑁂𑀦 𑀘𑀻𑀯𑀭𑀁 𑀙𑀺𑀦𑁆𑀤𑀺𑀢𑀸. 𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀦𑀸𑀪𑀺𑀚𑀸𑀦𑀸𑀢𑀺 𑀲𑀢𑁆𑀣𑁂𑀦 𑀘𑀻𑀯𑀭𑀁 𑀙𑀺𑀦𑁆𑀤𑀺𑀢𑀸…𑀧𑁂… 𑀥𑀸𑀭𑁂𑀫.

‘‘𑀅𑀲𑀻𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀪𑀺𑀚𑀸𑀦𑀸𑀫𑀺 𑀲𑀽𑀘𑀺𑀬𑀸 𑀘𑀻𑀯𑀭𑀁 𑀲𑀺𑀩𑁆𑀩𑀺𑀢𑀸…𑀧𑁂… 𑀦𑀸𑀪𑀺𑀚𑀸𑀦𑀸𑀫𑀺 𑀭𑀚𑀦𑁂𑀦 𑀘𑀻𑀯𑀭𑀁 𑀭𑀚𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀓𑀣𑀺𑀦𑁂 [𑀓𑀞𑀺𑀦𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘𑀻𑀯𑀭𑀁 𑀲𑀺𑀩𑁆𑀩𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀘𑀻𑀯𑀭𑀓𑀫𑁆𑀫𑁂 𑀯𑀺𑀘𑀸𑀭𑀺𑀢𑀸 [𑀲𑀩𑁆𑀭𑀳𑁆𑀫𑀘𑀸𑀭𑀻 𑀘𑀻𑀯𑀭𑀓𑀫𑁆𑀫𑁂 𑀩𑁆𑀬𑀸𑀧𑀸𑀭𑀺𑀢𑀸 (𑀲𑀻. 𑀧𑀻.)] … 𑀦𑀸𑀪𑀺𑀚𑀸𑀦𑀸𑀫𑀺 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁 𑁋 ‘𑀅𑀳𑁄 𑀯𑀢 𑀫𑀁 𑀓𑁄𑀘𑀺 𑀦𑀺𑀫𑀦𑁆𑀢𑁂𑀬𑁆𑀬𑀸’𑀢𑀺… 𑀦𑀸𑀪𑀺𑀚𑀸𑀦𑀸𑀫𑀺 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀅𑀦𑁆𑀢𑀭𑀖𑀭𑁂 𑀪𑀼𑀜𑁆𑀚𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀫𑀸𑀢𑀼𑀕𑀸𑀫𑀲𑁆𑀲 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀫𑀸𑀢𑀼𑀕𑀸𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑀺𑀢𑀸 𑀅𑀦𑁆𑀢𑀫𑀲𑁄 𑀘𑀢𑀼𑀧𑁆𑀧𑀤𑀫𑁆𑀧𑀺 𑀕𑀸𑀣𑀁… 𑀦𑀸𑀪𑀺𑀚𑀸𑀦𑀸𑀫𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀲𑀗𑁆𑀓𑀫𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀪𑀺𑀓𑁆𑀔𑀼𑀦𑀺𑀬𑀸 𑀥𑀫𑁆𑀫𑀁 𑀤𑁂𑀲𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀲𑀺𑀓𑁆𑀔𑀫𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀲𑀸𑀫𑀡𑁂𑀭𑀺𑀬𑀸 𑀥𑀫𑁆𑀫𑀁 𑀤𑁂𑀲𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀧𑀩𑁆𑀩𑀸𑀚𑁂𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀉𑀧𑀲𑀫𑁆𑀧𑀸𑀤𑁂𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀦𑀺𑀲𑁆𑀲𑀬𑀁 𑀤𑀸𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀚𑀦𑁆𑀢𑀸𑀖𑀭𑁂 𑀦𑁆𑀳𑀸𑀬𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀘𑀼𑀡𑁆𑀡𑁂𑀦 𑀦𑁆𑀳𑀸𑀬𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀕𑀢𑁆𑀢𑀧𑀭𑀺𑀓𑀫𑁆𑀫𑁂 𑀯𑀺𑀘𑀸𑀭𑀺𑀢𑀸 [𑀩𑁆𑀬𑀸𑀧𑀸𑀭𑀺𑀢𑀸 (𑀲𑀻. 𑀧𑀻.)] … 𑀦𑀸𑀪𑀺𑀚𑀸𑀦𑀸𑀫𑀺 𑀆𑀩𑀸𑀥𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀅𑀦𑁆𑀢𑀫𑀲𑁄 𑀕𑀤𑁆𑀤𑀽𑀳𑀦𑀫𑀢𑁆𑀢𑀫𑁆𑀧𑀺… 𑀦𑀸𑀪𑀺𑀚𑀸𑀦𑀸𑀫𑀺 𑀪𑁂𑀲𑀚𑁆𑀚𑀁 𑀉𑀧𑀳𑀭𑀺𑀢𑀸, 𑀅𑀦𑁆𑀢𑀫𑀲𑁄 𑀳𑀭𑀺𑀢𑀓𑀺𑀔𑀡𑁆𑀟𑀫𑁆𑀧𑀺… 𑀦𑀸𑀪𑀺𑀚𑀸𑀦𑀸𑀫𑀺 𑀅𑀧𑀲𑁆𑀲𑁂𑀦𑀓𑀁 𑀅𑀧𑀲𑁆𑀲𑀬𑀺𑀢𑀸… 𑀦𑀸𑀪𑀺𑀚𑀸𑀦𑀸𑀫𑀺 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀸. 𑀬𑀁𑀧𑀸𑀬𑀲𑁆𑀫𑀸…𑀧𑁂… 𑀥𑀸𑀭𑁂𑀫.

‘‘𑀅𑀲𑀻𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀪𑀺𑀚𑀸𑀦𑀸𑀫𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀸. 𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀲𑀻𑀢𑀺𑀬𑀸 𑀯𑀲𑁆𑀲𑁂𑀳𑀺 𑀦𑀸𑀪𑀺𑀚𑀸𑀦𑀸𑀢𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀸, 𑀇𑀤𑀫𑁆𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫.

‘‘𑀲𑀢𑁆𑀢𑀸𑀳𑀫𑁂𑀯 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀭𑀡𑁄 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀺𑀁; 𑀅𑀣 𑀅𑀝𑁆𑀞𑀫𑀺𑀬𑀁 𑀅𑀜𑁆𑀜𑀸 𑀉𑀤𑀧𑀸𑀤𑀺. 𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀲𑀢𑁆𑀢𑀸𑀳𑀫𑁂𑀯 𑀲𑀭𑀡𑁄 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀺; 𑀅𑀣 𑀅𑀝𑁆𑀞𑀫𑀺𑀬𑀁 𑀅𑀜𑁆𑀜𑀸 𑀉𑀤𑀧𑀸𑀤𑀺 𑀇𑀤𑀫𑁆𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫.

𑁨𑁧𑁨. ‘‘𑀮𑀪𑁂𑀬𑁆𑀬𑀸𑀳𑀁, 𑀆𑀯𑀼𑀲𑁄 𑀩𑀸𑀓𑀼𑀮, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. 𑀅𑀮𑀢𑁆𑀣 𑀔𑁄 𑀅𑀘𑁂𑀮𑀓𑀲𑁆𑀲𑀧𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀧𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑁄 𑀅𑀭𑀳𑀢𑀁 𑀅𑀳𑁄𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀯𑀸𑀧𑀼𑀭𑀡𑀁 [𑀅𑀧𑀸𑀧𑀼𑀭𑀡𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀆𑀤𑀸𑀬 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄. 𑀅𑀚𑁆𑀚 𑀫𑁂 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀯𑀸𑀧𑀼𑀭𑀡𑀁 𑀆𑀤𑀸𑀬 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄; 𑀅𑀚𑁆𑀚 𑀫𑁂 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀻’𑀢𑀺, 𑀇𑀤𑀫𑁆𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫’’.

𑀆𑀬𑀲𑁆𑀫𑀸 𑀩𑀸𑀓𑀼𑀮𑁄 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑀓𑁄𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. ‘‘𑀬𑀁𑀧𑀸𑀬𑀲𑁆𑀫𑀸 𑀩𑀸𑀓𑀼𑀮𑁄 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑀓𑁄𑀯 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀇𑀤𑀫𑁆𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀥𑀸𑀭𑁂𑀫𑀸’’𑀢𑀺.

𑀩𑀸𑀓𑀼𑀮𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.

𑁫. 𑀤𑀦𑁆𑀢𑀪𑀽𑀫𑀺𑀲𑀼𑀢𑁆𑀢𑀁

𑁨𑁧𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀘𑀺𑀭𑀯𑀢𑁄 𑀲𑀫𑀡𑀼𑀤𑁆𑀤𑁂𑀲𑁄 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄 𑀬𑁂𑀦 𑀅𑀘𑀺𑀭𑀯𑀢𑁄 𑀲𑀫𑀡𑀼𑀤𑁆𑀤𑁂𑀲𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑀺𑀭𑀯𑀢𑁂𑀦 𑀲𑀫𑀡𑀼𑀤𑁆𑀤𑁂𑀲𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀅𑀘𑀺𑀭𑀯𑀢𑀁 𑀲𑀫𑀡𑀼𑀤𑁆𑀤𑁂𑀲𑀁 𑀏𑀢𑀤𑀯𑁄𑀘 𑁋

‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀅𑀕𑁆𑀕𑀺𑀯𑁂𑀲𑁆𑀲𑀦 𑁋 ‘𑀇𑀥 𑀪𑀺𑀓𑁆𑀔𑀼 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀨𑀼𑀲𑁂𑀬𑁆𑀬 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢’𑀦𑁆𑀢𑀺. ‘𑀏𑀯𑀫𑁂𑀢𑀁, 𑀭𑀸𑀚𑀓𑀼𑀫𑀸𑀭, 𑀏𑀯𑀫𑁂𑀢𑀁, 𑀭𑀸𑀚𑀓𑀼𑀫𑀸𑀭. 𑀇𑀥 𑀪𑀺𑀓𑁆𑀔𑀼 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀨𑀼𑀲𑁂𑀬𑁆𑀬 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢’𑀦𑁆𑀢𑀺. ‘𑀲𑀸𑀥𑀼 𑀫𑁂 𑀪𑀯𑀁 𑀅𑀕𑁆𑀕𑀺𑀯𑁂𑀲𑁆𑀲𑀦𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀽’𑀢𑀺. ‘𑀦 𑀔𑁄 𑀢𑁂 𑀅𑀳𑀁, 𑀭𑀸𑀚𑀓𑀼𑀫𑀸𑀭, 𑀲𑀓𑁆𑀓𑁄𑀫𑀺 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀅𑀳𑀜𑁆𑀘 𑀳𑀺 𑀢𑁂, 𑀭𑀸𑀚𑀓𑀼𑀫𑀸𑀭, 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀢𑁆𑀯𑀜𑁆𑀘 𑀫𑁂 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀆𑀚𑀸𑀦𑁂𑀬𑁆𑀬𑀸𑀲𑀺; 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’𑀢𑀺. ‘𑀤𑁂𑀲𑁂𑀢𑀼 𑀫𑁂 𑀪𑀯𑀁 𑀅𑀕𑁆𑀕𑀺𑀯𑁂𑀲𑁆𑀲𑀦𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁. 𑀅𑀧𑁆𑀧𑁂𑀯𑀦𑀸𑀫𑀸𑀳𑀁 𑀪𑁄𑀢𑁄 𑀅𑀕𑁆𑀕𑀺𑀯𑁂𑀲𑁆𑀲𑀦𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬’𑀦𑁆𑀢𑀺. ‘𑀤𑁂𑀲𑁂𑀬𑁆𑀬𑀁 𑀔𑁄 𑀢𑁂 𑀅𑀳𑀁, 𑀭𑀸𑀚𑀓𑀼𑀫𑀸𑀭, 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁. 𑀲𑀘𑁂 𑀫𑁂 𑀢𑁆𑀯𑀁 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬𑀸𑀲𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀫𑁂 𑀢𑁆𑀯𑀁 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬𑀸𑀲𑀺, 𑀬𑀣𑀸𑀲𑀓𑁂 𑀢𑀺𑀝𑁆𑀞𑁂𑀬𑁆𑀬𑀸𑀲𑀺, 𑀦 𑀫𑀁 𑀢𑀢𑁆𑀣 𑀉𑀢𑁆𑀢𑀭𑀺𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀲𑀻’𑀢𑀺. ‘𑀤𑁂𑀲𑁂𑀢𑀼 𑀫𑁂 𑀪𑀯𑀁 𑀅𑀕𑁆𑀕𑀺𑀯𑁂𑀲𑁆𑀲𑀦𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁. 𑀲𑀘𑁂 𑀅𑀳𑀁 𑀪𑁄𑀢𑁄 𑀅𑀕𑁆𑀕𑀺𑀯𑁂𑀲𑁆𑀲𑀦𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀺 [𑀆𑀚𑀸𑀦𑁂𑀬𑁆𑀬𑀸𑀫𑀺 (𑀓.)], 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀅𑀳𑀁 𑀪𑁄𑀢𑁄 𑀅𑀕𑁆𑀕𑀺𑀯𑁂𑀲𑁆𑀲𑀦𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀺, 𑀬𑀣𑀸𑀲𑀓𑁂 𑀢𑀺𑀝𑁆𑀞𑀺𑀲𑁆𑀲𑀸𑀫𑀺 [𑀢𑀺𑀝𑁆𑀞𑁂𑀬𑁆𑀬𑀸𑀫𑀺 (𑀓.)], 𑀦𑀸𑀳𑀁 𑀢𑀢𑁆𑀣 𑀪𑀯𑀦𑁆𑀢𑀁 𑀅𑀕𑁆𑀕𑀺𑀯𑁂𑀲𑁆𑀲𑀦𑀁 𑀉𑀢𑁆𑀢𑀭𑀺𑀁 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’’𑀢𑀺.

𑁨𑁧𑁪. 𑀅𑀣 𑀔𑁄 𑀅𑀘𑀺𑀭𑀯𑀢𑁄 𑀲𑀫𑀡𑀼𑀤𑁆𑀤𑁂𑀲𑁄 𑀚𑀬𑀲𑁂𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀏𑀯𑀁 𑀯𑀼𑀢𑁆𑀢𑁂, 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀅𑀘𑀺𑀭𑀯𑀢𑀁 𑀲𑀫𑀡𑀼𑀤𑁆𑀤𑁂𑀲𑀁 𑀏𑀢𑀤𑀯𑁄𑀘 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑁄 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀦𑀯𑀓𑀸𑀲𑁄 𑀬𑀁 𑀪𑀺𑀓𑁆𑀔𑀼 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀨𑀼𑀲𑁂𑀬𑁆𑀬 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢’’𑀦𑁆𑀢𑀺. 𑀅𑀣 𑀔𑁄 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀅𑀘𑀺𑀭𑀯𑀢𑀲𑁆𑀲 𑀲𑀫𑀡𑀼𑀤𑁆𑀤𑁂𑀲𑀲𑁆𑀲 𑀅𑀝𑁆𑀞𑀸𑀦𑀢𑀜𑁆𑀘 𑀅𑀦𑀯𑀓𑀸𑀲𑀢𑀜𑁆𑀘 𑀧𑀯𑁂𑀤𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀅𑀘𑀺𑀭𑀯𑀢𑁄 𑀲𑀫𑀡𑀼𑀤𑁆𑀤𑁂𑀲𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀚𑀬𑀲𑁂𑀦𑁂 𑀭𑀸𑀚𑀓𑀼𑀫𑀸𑀭𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀘𑀺𑀭𑀯𑀢𑁄 𑀲𑀫𑀡𑀼𑀤𑁆𑀤𑁂𑀲𑁄 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀚𑀬𑀲𑁂𑀦𑁂𑀦 𑀭𑀸𑀚𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀅𑀘𑀺𑀭𑀯𑀢𑀁 𑀲𑀫𑀡𑀼𑀤𑁆𑀤𑁂𑀲𑀁 𑀏𑀢𑀤𑀯𑁄𑀘 𑁋 ‘‘𑀢𑀁 𑀓𑀼𑀢𑁂𑀢𑁆𑀣, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀮𑀩𑁆𑀪𑀸. 𑀬𑀁 𑀢𑀁 𑀦𑁂𑀓𑁆𑀔𑀫𑁆𑀫𑁂𑀦 𑀜𑀸𑀢𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑁂𑀦 𑀤𑀝𑁆𑀞𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑁂𑀦 𑀧𑀢𑁆𑀢𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀢𑀁 𑀯𑀢 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀓𑀸𑀫𑀫𑀚𑁆𑀛𑁂 𑀯𑀲𑀦𑁆𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀓𑀸𑀫𑀯𑀺𑀢𑀓𑁆𑀓𑁂𑀳𑀺 𑀔𑀚𑁆𑀚𑀫𑀸𑀦𑁄 𑀓𑀸𑀫𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀫𑀸𑀦𑁄 𑀓𑀸𑀫𑀧𑀭𑀺𑀬𑁂𑀲𑀦𑀸𑀬 𑀉𑀲𑁆𑀲𑀼𑀓𑁄 [𑀉𑀲𑁆𑀲𑀼𑀓𑁆𑀓𑁄 (𑀲𑀩𑁆𑀩𑀢𑁆𑀣)] 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀘𑁆𑀙𑀺 𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁨𑁧𑁫. ‘‘𑀲𑁂𑀬𑁆𑀬𑀣𑀸𑀧𑀺𑀲𑁆𑀲𑀼, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑁆𑀯𑁂 𑀳𑀢𑁆𑀣𑀺𑀤𑀫𑁆𑀫𑀸 𑀯𑀸 𑀅𑀲𑁆𑀲𑀤𑀫𑁆𑀫𑀸 𑀯𑀸 𑀕𑁄𑀤𑀫𑁆𑀫𑀸 𑀯𑀸 𑀲𑀼𑀤𑀦𑁆𑀢𑀸 𑀲𑀼𑀯𑀺𑀦𑀻𑀢𑀸, 𑀤𑁆𑀯𑁂 𑀳𑀢𑁆𑀣𑀺𑀤𑀫𑁆𑀫𑀸 𑀯𑀸 𑀅𑀲𑁆𑀲𑀤𑀫𑁆𑀫𑀸 𑀯𑀸 𑀕𑁄𑀤𑀫𑁆𑀫𑀸 𑀯𑀸 𑀅𑀤𑀦𑁆𑀢𑀸 𑀅𑀯𑀺𑀦𑀻𑀢𑀸. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑁂 𑀢𑁂 𑀤𑁆𑀯𑁂 𑀳𑀢𑁆𑀣𑀺𑀤𑀫𑁆𑀫𑀸 𑀯𑀸 𑀅𑀲𑁆𑀲𑀤𑀫𑁆𑀫𑀸 𑀯𑀸 𑀕𑁄𑀤𑀫𑁆𑀫𑀸 𑀯𑀸 𑀲𑀼𑀤𑀦𑁆𑀢𑀸 𑀲𑀼𑀯𑀺𑀦𑀻𑀢𑀸, 𑀅𑀧𑀺 𑀦𑀼 𑀢𑁂 𑀤𑀦𑁆𑀢𑀸𑀯 𑀤𑀦𑁆𑀢𑀓𑀸𑀭𑀡𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀤𑀦𑁆𑀢𑀸𑀯 𑀤𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑀼𑀡𑁂𑀬𑁆𑀬𑀼’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑁂 𑀧𑀦 𑀢𑁂 𑀤𑁆𑀯𑁂 𑀳𑀢𑁆𑀣𑀺𑀤𑀫𑁆𑀫𑀸 𑀯𑀸 𑀅𑀲𑁆𑀲𑀤𑀫𑁆𑀫𑀸 𑀯𑀸 𑀕𑁄𑀤𑀫𑁆𑀫𑀸 𑀯𑀸 𑀅𑀤𑀦𑁆𑀢𑀸 𑀅𑀯𑀺𑀦𑀻𑀢𑀸, 𑀅𑀧𑀺 𑀦𑀼 𑀢𑁂 𑀅𑀤𑀦𑁆𑀢𑀸𑀯 𑀤𑀦𑁆𑀢𑀓𑀸𑀭𑀡𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀅𑀤𑀦𑁆𑀢𑀸𑀯 𑀤𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑀼𑀡𑁂𑀬𑁆𑀬𑀼𑀁, 𑀲𑁂𑀬𑁆𑀬𑀣𑀸𑀧𑀺 𑀢𑁂 𑀤𑁆𑀯𑁂 𑀳𑀢𑁆𑀣𑀺𑀤𑀫𑁆𑀫𑀸 𑀯𑀸 𑀅𑀲𑁆𑀲𑀤𑀫𑁆𑀫𑀸 𑀯𑀸 𑀕𑁄𑀤𑀫𑁆𑀫𑀸 𑀯𑀸 𑀲𑀼𑀤𑀦𑁆𑀢𑀸 𑀲𑀼𑀯𑀺𑀦𑀻𑀢𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀁 𑀢𑀁 𑀦𑁂𑀓𑁆𑀔𑀫𑁆𑀫𑁂𑀦 𑀜𑀸𑀢𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑁂𑀦 𑀤𑀝𑁆𑀞𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑁂𑀦 𑀧𑀢𑁆𑀢𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀢𑀁 𑀯𑀢 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀓𑀸𑀫𑀫𑀚𑁆𑀛𑁂 𑀯𑀲𑀦𑁆𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀓𑀸𑀫𑀯𑀺𑀢𑀓𑁆𑀓𑁂𑀳𑀺 𑀔𑀚𑁆𑀚𑀫𑀸𑀦𑁄 𑀓𑀸𑀫𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀫𑀸𑀦𑁄 𑀓𑀸𑀫𑀧𑀭𑀺𑀬𑁂𑀲𑀦𑀸𑀬 𑀉𑀲𑁆𑀲𑀼𑀓𑁄 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀘𑁆𑀙𑀺 𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁨𑁧𑁬. ‘‘𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀫𑀳𑀸𑀧𑀩𑁆𑀩𑀢𑁄. 𑀢𑀫𑁂𑀦𑀁 𑀤𑁆𑀯𑁂 𑀲𑀳𑀸𑀬𑀓𑀸 𑀢𑀫𑁆𑀳𑀸 𑀕𑀸𑀫𑀸 𑀯𑀸 𑀦𑀺𑀕𑀫𑀸 𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀬𑁂𑀦 𑀲𑁄 𑀧𑀩𑁆𑀩𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀼𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑁄 𑀲𑀳𑀸𑀬𑀓𑁄 𑀳𑁂𑀝𑁆𑀞𑀸 𑀧𑀩𑁆𑀩𑀢𑀧𑀸𑀤𑁂 𑀢𑀺𑀝𑁆𑀞𑁂𑀬𑁆𑀬, 𑀏𑀓𑁄 𑀲𑀳𑀸𑀬𑀓𑁄 𑀉𑀧𑀭𑀺𑀧𑀩𑁆𑀩𑀢𑀁 𑀆𑀭𑁄𑀳𑁂𑀬𑁆𑀬. 𑀢𑀫𑁂𑀦𑀁 𑀳𑁂𑀝𑁆𑀞𑀸 𑀧𑀩𑁆𑀩𑀢𑀧𑀸𑀤𑁂 𑀞𑀺𑀢𑁄 𑀲𑀳𑀸𑀬𑀓𑁄 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑀁 𑀲𑀳𑀸𑀬𑀓𑀁 𑀏𑀯𑀁 𑀯𑁂𑀤𑀬𑁆𑀬 𑁋 ‘𑀬𑀁, 𑀲𑀫𑁆𑀫, 𑀓𑀺𑀁 𑀢𑁆𑀯𑀁 𑀧𑀲𑁆𑀲𑀲𑀺 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀧𑀲𑁆𑀲𑀸𑀫𑀺 𑀔𑁄 𑀅𑀳𑀁, 𑀲𑀫𑁆𑀫, 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑁄 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓’’’𑀦𑁆𑀢𑀺.

‘‘𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁, 𑀲𑀫𑁆𑀫, 𑀅𑀦𑀯𑀓𑀸𑀲𑁄 𑀬𑀁 𑀢𑁆𑀯𑀁 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬𑀸𑀲𑀺 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓’𑀦𑁆𑀢𑀺. 𑀢𑀫𑁂𑀦𑀁 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑁄 𑀲𑀳𑀸𑀬𑀓𑁄 𑀳𑁂𑀝𑁆𑀞𑀺𑀫𑀧𑀩𑁆𑀩𑀢𑀧𑀸𑀤𑀁 𑀑𑀭𑁄𑀳𑀺𑀢𑁆𑀯𑀸 𑀢𑀁 𑀲𑀳𑀸𑀬𑀓𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀉𑀧𑀭𑀺𑀧𑀩𑁆𑀩𑀢𑀁 𑀆𑀭𑁄𑀧𑁂𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀁, 𑀲𑀫𑁆𑀫, 𑀓𑀺𑀁 𑀢𑁆𑀯𑀁 𑀧𑀲𑁆𑀲𑀲𑀺 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀧𑀲𑁆𑀲𑀸𑀫𑀺 𑀔𑁄 𑀅𑀳𑀁, 𑀲𑀫𑁆𑀫, 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑁄 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓’’’𑀦𑁆𑀢𑀺.

‘‘𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀇𑀤𑀸𑀦𑁂𑀯 𑀔𑁄 𑀢𑁂, 𑀲𑀫𑁆𑀫, 𑀪𑀸𑀲𑀺𑀢𑀁 𑁋 𑀫𑀬𑀁 𑀏𑀯𑀁 𑀆𑀚𑀸𑀦𑀸𑀫 𑁋 𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁 𑀲𑀫𑁆𑀫, 𑀅𑀦𑀯𑀓𑀸𑀲𑁄 𑀬𑀁 𑀢𑁆𑀯𑀁 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬𑀸𑀲𑀺 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓’𑀦𑁆𑀢𑀺. 𑀇𑀤𑀸𑀦𑁂𑀯 𑀘 𑀧𑀦 𑀢𑁂 𑀪𑀸𑀲𑀺𑀢𑀁 𑀫𑀬𑀁 𑀏𑀯𑀁 𑀆𑀚𑀸𑀦𑀸𑀫 𑁋 ‘𑀧𑀲𑁆𑀲𑀸𑀫𑀺 𑀔𑁄 𑀅𑀳𑀁, 𑀲𑀫𑁆𑀫, 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑁄 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀢𑀣𑀸 𑀳𑀺 𑀧𑀦𑀸𑀳𑀁, 𑀲𑀫𑁆𑀫, 𑀇𑀫𑀺𑀦𑀸 𑀫𑀳𑀢𑀸 𑀧𑀩𑁆𑀩𑀢𑁂𑀦 𑀆𑀯𑀼𑀢𑁄 [𑀆𑀯𑀝𑁄 (𑀲𑀻. 𑀅𑀝𑁆𑀞. 𑀧𑀻.), 𑀆𑀯𑀼𑀝𑁄 (𑀲𑁆𑀬𑀸. 𑀓𑀁. 𑀓.)] 𑀤𑀝𑁆𑀞𑁂𑀬𑁆𑀬𑀁 𑀦𑀸𑀤𑁆𑀤𑀲’’’𑀦𑁆𑀢𑀺.

‘‘𑀅𑀢𑁄 𑀫𑀳𑀦𑁆𑀢𑀢𑀭𑁂𑀦, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀯𑀺𑀚𑁆𑀚𑀸𑀔𑀦𑁆𑀥𑁂𑀦 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀆𑀯𑀼𑀢𑁄 𑀦𑀺𑀯𑀼𑀢𑁄 [𑀦𑀺𑀯𑀼𑀝𑁄 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀑𑀨𑀼𑀝𑁄 [𑀑𑀯𑀼𑀢𑁄 (𑀲𑀻.), 𑀑𑀯𑀼𑀝𑁄 (𑀲𑁆𑀬𑀸. 𑀓𑀁. 𑀧𑀻.)] 𑀧𑀭𑀺𑀬𑁄𑀦𑀤𑁆𑀥𑁄. 𑀲𑁄 𑀯𑀢 𑀬𑀁 𑀢𑀁 𑀦𑁂𑀓𑁆𑀔𑀫𑁆𑀫𑁂𑀦 𑀜𑀸𑀢𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑁂𑀦 𑀤𑀝𑁆𑀞𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑁂𑀦 𑀧𑀢𑁆𑀢𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀢𑀁 𑀯𑀢 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀓𑀸𑀫𑀫𑀚𑁆𑀛𑁂 𑀯𑀲𑀦𑁆𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀓𑀸𑀫𑀯𑀺𑀢𑀓𑁆𑀓𑁂𑀳𑀺 𑀔𑀚𑁆𑀚𑀫𑀸𑀦𑁄 𑀓𑀸𑀫𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀫𑀸𑀦𑁄 𑀓𑀸𑀫𑀧𑀭𑀺𑀬𑁂𑀲𑀦𑀸𑀬 𑀉𑀲𑁆𑀲𑀼𑀓𑁄 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀘𑁆𑀙𑀺 𑀯𑀸 𑀓𑀭𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑀘𑁂 𑀔𑁄 𑀢𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀚𑀬𑀲𑁂𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀇𑀫𑀸 𑀤𑁆𑀯𑁂 𑀉𑀧𑀫𑀸 𑀧𑀝𑀺𑀪𑀸𑀬𑁂𑀬𑁆𑀬𑀼𑀁 [𑀧𑀝𑀺𑀪𑀸𑀲𑁂𑀬𑁆𑀬𑀼𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀅𑀦𑀘𑁆𑀙𑀭𑀺𑀬𑀁 𑀢𑁂 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀧𑀲𑀻𑀤𑁂𑀬𑁆𑀬, 𑀧𑀲𑀦𑁆𑀦𑁄 𑀘 𑀢𑁂 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁂𑀬𑁆𑀬𑀸’’𑀢𑀺. ‘‘𑀓𑀼𑀢𑁄 𑀧𑀦 𑀫𑀁, 𑀪𑀦𑁆𑀢𑁂, 𑀚𑀬𑀲𑁂𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀇𑀫𑀸 𑀤𑁆𑀯𑁂 𑀉𑀧𑀫𑀸 𑀧𑀝𑀺𑀪𑀸𑀬𑀺𑀲𑁆𑀲𑀦𑁆𑀢𑀺 [𑀧𑀝𑀺𑀪𑀸𑀲𑀺𑀲𑁆𑀲𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀦𑀘𑁆𑀙𑀭𑀺𑀬𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸, 𑀲𑁂𑀬𑁆𑀬𑀣𑀸𑀧𑀺 𑀪𑀕𑀯𑀦𑁆𑀢’’𑀦𑁆𑀢𑀺?

𑁨𑁧𑁭. ‘‘𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀦𑀸𑀕𑀯𑀦𑀺𑀓𑀁 𑀆𑀫𑀦𑁆𑀢𑁂𑀢𑀺 𑁋 ‘𑀏𑀳𑀺 𑀢𑁆𑀯𑀁, 𑀲𑀫𑁆𑀫 𑀦𑀸𑀕𑀯𑀦𑀺𑀓, 𑀭𑀜𑁆𑀜𑁄 𑀦𑀸𑀕𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀸𑀕𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀆𑀭𑀜𑁆𑀜𑀓𑀁 𑀦𑀸𑀕𑀁 𑀅𑀢𑀺𑀧𑀲𑁆𑀲𑀺𑀢𑁆𑀯𑀸 𑀭𑀜𑁆𑀜𑁄 𑀦𑀸𑀕𑀲𑁆𑀲 𑀕𑀻𑀯𑀸𑀬𑀁 𑀉𑀧𑀦𑀺𑀩𑀦𑁆𑀥𑀸𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦𑀸𑀕𑀯𑀦𑀺𑀓𑁄 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀜𑁆𑀜𑁄 𑀦𑀸𑀕𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀸𑀕𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀆𑀭𑀜𑁆𑀜𑀓𑀁 𑀦𑀸𑀕𑀁 𑀅𑀢𑀺𑀧𑀲𑁆𑀲𑀺𑀢𑁆𑀯𑀸 𑀭𑀜𑁆𑀜𑁄 𑀦𑀸𑀕𑀲𑁆𑀲 𑀕𑀻𑀯𑀸𑀬𑀁 𑀉𑀧𑀦𑀺𑀩𑀦𑁆𑀥𑀢𑀺. 𑀢𑀫𑁂𑀦𑀁 𑀭𑀜𑁆𑀜𑁄 𑀦𑀸𑀕𑁄 𑀅𑀩𑁆𑀪𑁄𑀓𑀸𑀲𑀁 𑀦𑀻𑀳𑀭𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀭𑀜𑁆𑀜𑀓𑁄 𑀦𑀸𑀕𑁄 𑀅𑀩𑁆𑀪𑁄𑀓𑀸𑀲𑀁 𑀕𑀢𑁄 𑀳𑁄𑀢𑀺. 𑀏𑀢𑁆𑀣𑀕𑁂𑀥𑀸 [𑀏𑀢𑀕𑁂𑀥𑀸 (𑀲𑀻. 𑀧𑀻.)] 𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀭𑀜𑁆𑀜𑀓𑀸 𑀦𑀸𑀕𑀸 𑀬𑀤𑀺𑀤𑀁 𑁋 𑀦𑀸𑀕𑀯𑀦𑀁. 𑀢𑀫𑁂𑀦𑀁 𑀦𑀸𑀕𑀯𑀦𑀺𑀓𑁄 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘𑀅𑀩𑁆𑀪𑁄𑀓𑀸𑀲𑀕𑀢𑁄 𑀔𑁄 [𑀔𑁄 𑀢𑁂 (𑀲𑁆𑀬𑀸. 𑀓𑀁. 𑀓.)], 𑀤𑁂𑀯, 𑀆𑀭𑀜𑁆𑀜𑀓𑁄 𑀦𑀸𑀕𑁄’𑀢𑀺. 𑀅𑀣 𑀔𑁄 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀫𑁂𑀦𑀁 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀳𑀢𑁆𑀣𑀺𑀤𑀫𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘𑀏𑀳𑀺 𑀢𑁆𑀯𑀁, 𑀲𑀫𑁆𑀫 𑀳𑀢𑁆𑀣𑀺𑀤𑀫𑀓, 𑀆𑀭𑀜𑁆𑀜𑀓𑀁 𑀦𑀸𑀕𑀁 𑀤𑀫𑀬𑀸𑀳𑀺 𑀆𑀭𑀜𑁆𑀜𑀓𑀸𑀦𑀜𑁆𑀘𑁂𑀯 𑀲𑀻𑀮𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀆𑀭𑀜𑁆𑀜𑀓𑀸𑀦𑀜𑁆𑀘𑁂𑀯 𑀲𑀭𑀲𑀗𑁆𑀓𑀧𑁆𑀧𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀆𑀭𑀜𑁆𑀜𑀓𑀸𑀦𑀜𑁆𑀘𑁂𑀯 𑀤𑀭𑀣𑀓𑀺𑀮𑀫𑀣𑀧𑀭𑀺𑀴𑀸𑀳𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀕𑀸𑀫𑀦𑁆𑀢𑁂 𑀅𑀪𑀺𑀭𑀫𑀸𑀧𑀦𑀸𑀬 𑀫𑀦𑀼𑀲𑁆𑀲𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀲𑀫𑀸𑀤𑀧𑀦𑀸𑀬𑀸’’’𑀢𑀺 [𑀲𑀫𑀸𑀤𑀸𑀧𑀦𑀸𑀬𑀸𑀢𑀺 (?)].

‘‘‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀳𑀢𑁆𑀣𑀺𑀤𑀫𑀓𑁄 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀫𑀳𑀦𑁆𑀢𑀁 𑀣𑀫𑁆𑀪𑀁 𑀧𑀣𑀯𑀺𑀬𑀁 𑀦𑀺𑀔𑀡𑀺𑀢𑁆𑀯𑀸 𑀆𑀭𑀜𑁆𑀜𑀓𑀲𑁆𑀲 𑀦𑀸𑀕𑀲𑁆𑀲 𑀕𑀻𑀯𑀸𑀬𑀁 𑀉𑀧𑀦𑀺𑀩𑀦𑁆𑀥𑀢𑀺 𑀆𑀭𑀜𑁆𑀜𑀓𑀸𑀦𑀜𑁆𑀘𑁂𑀯 𑀲𑀻𑀮𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀆𑀭𑀜𑁆𑀜𑀓𑀸𑀦𑀜𑁆𑀘𑁂𑀯 𑀲𑀭𑀲𑀗𑁆𑀓𑀧𑁆𑀧𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀆𑀭𑀜𑁆𑀜𑀓𑀸𑀦𑀜𑁆𑀘𑁂𑀯 𑀤𑀭𑀣𑀓𑀺𑀮𑀫𑀣𑀧𑀭𑀺𑀴𑀸𑀳𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀕𑀸𑀫𑀦𑁆𑀢𑁂 𑀅𑀪𑀺𑀭𑀫𑀸𑀧𑀦𑀸𑀬 𑀫𑀦𑀼𑀲𑁆𑀲𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀲𑀫𑀸𑀤𑀧𑀦𑀸𑀬. 𑀢𑀫𑁂𑀦𑀁 𑀳𑀢𑁆𑀣𑀺𑀤𑀫𑀓𑁄 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀸𑀳𑀺 𑀯𑀸𑀘𑀸𑀳𑀺 𑀲𑀫𑀼𑀤𑀸𑀘𑀭𑀢𑀺. 𑀬𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀭𑀜𑁆𑀜𑀓𑁄 𑀦𑀸𑀕𑁄 𑀳𑀢𑁆𑀣𑀺𑀤𑀫𑀓𑀲𑁆𑀲 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀸𑀳𑀺 𑀯𑀸𑀘𑀸𑀳𑀺 𑀲𑀫𑀼𑀤𑀸𑀘𑀭𑀺𑀬𑀫𑀸𑀦𑁄 𑀲𑀼𑀲𑁆𑀲𑀽𑀲𑀢𑀺, 𑀲𑁄𑀢𑀁 𑀑𑀤𑀳𑀢𑀺, 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑀺; 𑀢𑀫𑁂𑀦𑀁 𑀳𑀢𑁆𑀣𑀺𑀤𑀫𑀓𑁄 𑀉𑀢𑁆𑀢𑀭𑀺 𑀢𑀺𑀡𑀖𑀸𑀲𑁄𑀤𑀓𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀺.

‘‘𑀬𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀭𑀜𑁆𑀜𑀓𑁄 𑀦𑀸𑀕𑁄 𑀳𑀢𑁆𑀣𑀺𑀤𑀫𑀓𑀲𑁆𑀲 𑀢𑀺𑀡𑀖𑀸𑀲𑁄𑀤𑀓𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀢𑁆𑀭 𑀳𑀢𑁆𑀣𑀺𑀤𑀫𑀓𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀚𑀻𑀯𑀺𑀲𑁆𑀲𑀢𑀺 𑀔𑁄 [𑀦𑀼 𑀔𑁄 (𑀲𑀻. 𑀓.)] 𑀤𑀸𑀦𑀺 𑀆𑀭𑀜𑁆𑀜𑀓𑁄 [𑀭𑀜𑁆𑀜𑁄 (𑀲𑀻. 𑀧𑀻.)] 𑀦𑀸𑀕𑁄’𑀢𑀺. 𑀢𑀫𑁂𑀦𑀁 𑀳𑀢𑁆𑀣𑀺𑀤𑀫𑀓𑁄 𑀉𑀢𑁆𑀢𑀭𑀺 𑀓𑀸𑀭𑀡𑀁 𑀓𑀸𑀭𑁂𑀢𑀺 𑁋 ‘𑀆𑀤𑀺𑀬, 𑀪𑁄, 𑀦𑀺𑀓𑁆𑀔𑀺𑀧, 𑀪𑁄’𑀢𑀺. 𑀬𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀭𑀜𑁆𑀜𑀓𑁄 𑀦𑀸𑀕𑁄 𑀳𑀢𑁆𑀣𑀺𑀤𑀫𑀓𑀲𑁆𑀲 𑀆𑀤𑀸𑀦𑀦𑀺𑀓𑁆𑀔𑁂𑀧𑁂 𑀯𑀘𑀦𑀓𑀭𑁄 𑀳𑁄𑀢𑀺 𑀑𑀯𑀸𑀤𑀧𑁆𑀧𑀝𑀺𑀓𑀭𑁄, 𑀢𑀫𑁂𑀦𑀁 𑀳𑀢𑁆𑀣𑀺𑀤𑀫𑀓𑁄 𑀉𑀢𑁆𑀢𑀭𑀺 𑀓𑀸𑀭𑀡𑀁 𑀓𑀸𑀭𑁂𑀢𑀺 𑁋 ‘𑀅𑀪𑀺𑀓𑁆𑀓𑀫, 𑀪𑁄, 𑀧𑀝𑀺𑀓𑁆𑀓𑀫, 𑀪𑁄’𑀢𑀺. 𑀬𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀭𑀜𑁆𑀜𑀓𑁄 𑀦𑀸𑀕𑁄 𑀳𑀢𑁆𑀣𑀺𑀤𑀫𑀓𑀲𑁆𑀲 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀯𑀘𑀦𑀓𑀭𑁄 𑀳𑁄𑀢𑀺 𑀑𑀯𑀸𑀤𑀧𑁆𑀧𑀝𑀺𑀓𑀭𑁄, 𑀢𑀫𑁂𑀦𑀁 𑀳𑀢𑁆𑀣𑀺𑀤𑀫𑀓𑁄 𑀉𑀢𑁆𑀢𑀭𑀺 𑀓𑀸𑀭𑀡𑀁 𑀓𑀸𑀭𑁂𑀢𑀺 𑁋 ‘𑀉𑀝𑁆𑀞𑀳, 𑀪𑁄, 𑀦𑀺𑀲𑀻𑀤, 𑀪𑁄’𑀢𑀺. 𑀬𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀭𑀜𑁆𑀜𑀓𑁄 𑀦𑀸𑀕𑁄 𑀳𑀢𑁆𑀣𑀺𑀤𑀫𑀓𑀲𑁆𑀲 𑀉𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀬 𑀯𑀘𑀦𑀓𑀭𑁄 𑀳𑁄𑀢𑀺 𑀑𑀯𑀸𑀤𑀧𑁆𑀧𑀝𑀺𑀓𑀭𑁄, 𑀢𑀫𑁂𑀦𑀁 𑀳𑀢𑁆𑀣𑀺𑀤𑀫𑀓𑁄 𑀉𑀢𑁆𑀢𑀭𑀺 𑀆𑀦𑁂𑀜𑁆𑀚𑀁 𑀦𑀸𑀫 𑀓𑀸𑀭𑀡𑀁 𑀓𑀸𑀭𑁂𑀢𑀺, 𑀫𑀳𑀦𑁆𑀢𑀲𑁆𑀲 𑀨𑀮𑀓𑀁 𑀲𑁄𑀡𑁆𑀟𑀸𑀬 𑀉𑀧𑀦𑀺𑀩𑀦𑁆𑀥𑀢𑀺, 𑀢𑁄𑀫𑀭𑀳𑀢𑁆𑀣𑁄 𑀘 𑀧𑀼𑀭𑀺𑀲𑁄 𑀉𑀧𑀭𑀺𑀕𑀻𑀯𑀸𑀬 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑀫𑀦𑁆𑀢𑀢𑁄 𑀘 𑀢𑁄𑀫𑀭𑀳𑀢𑁆𑀣𑀸 𑀧𑀼𑀭𑀺𑀲𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀺𑀤𑀫𑀓𑁄 𑀘 𑀤𑀻𑀖𑀢𑁄𑀫𑀭𑀬𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀞𑀺𑀢𑁄 𑀳𑁄𑀢𑀺. 𑀲𑁄 𑀆𑀦𑁂𑀜𑁆𑀚𑀁 𑀓𑀸𑀭𑀡𑀁 𑀓𑀸𑀭𑀺𑀬𑀫𑀸𑀦𑁄 𑀦𑁂𑀯 𑀧𑀼𑀭𑀺𑀫𑁂 𑀧𑀸𑀤𑁂 𑀘𑁄𑀧𑁂𑀢𑀺 𑀦 𑀧𑀘𑁆𑀙𑀺𑀫𑁂 𑀧𑀸𑀤𑁂 𑀘𑁄𑀧𑁂𑀢𑀺, 𑀦 𑀧𑀼𑀭𑀺𑀫𑀓𑀸𑀬𑀁 𑀘𑁄𑀧𑁂𑀢𑀺 𑀦 𑀧𑀘𑁆𑀙𑀺𑀫𑀓𑀸𑀬𑀁 𑀘𑁄𑀧𑁂𑀢𑀺, 𑀦 𑀲𑀻𑀲𑀁 𑀘𑁄𑀧𑁂𑀢𑀺, 𑀦 𑀓𑀡𑁆𑀡𑁂 𑀘𑁄𑀧𑁂𑀢𑀺, 𑀦 𑀤𑀦𑁆𑀢𑁂 𑀘𑁄𑀧𑁂𑀢𑀺, 𑀦 𑀦𑀗𑁆𑀕𑀼𑀝𑁆𑀞𑀁 𑀘𑁄𑀧𑁂𑀢𑀺, 𑀦 𑀲𑁄𑀡𑁆𑀟𑀁 𑀘𑁄𑀧𑁂𑀢𑀺. 𑀲𑁄 𑀳𑁄𑀢𑀺 𑀆𑀭𑀜𑁆𑀜𑀓𑁄 𑀦𑀸𑀕𑁄 𑀔𑀫𑁄 𑀲𑀢𑁆𑀢𑀺𑀧𑁆𑀧𑀳𑀸𑀭𑀸𑀦𑀁 𑀅𑀲𑀺𑀧𑁆𑀧𑀳𑀸𑀭𑀸𑀦𑀁 𑀉𑀲𑀼𑀧𑁆𑀧𑀳𑀸𑀭𑀸𑀦𑀁 𑀲𑀭𑀧𑀢𑁆𑀢𑀧𑁆𑀧𑀳𑀸𑀭𑀸𑀦𑀁 [𑀧𑀭𑀲𑀢𑁆𑀣𑀧𑁆𑀧𑀳𑀸𑀭𑀸𑀦𑀁 (𑀲𑀻.), 𑀧𑀭𑀲𑀢𑁆𑀢𑀼𑀧𑁆𑀧𑀳𑀸𑀭𑀸𑀦𑀁 (𑀲𑁆𑀬𑀸. 𑀓𑀁. 𑀧𑀻.)] 𑀪𑁂𑀭𑀺𑀧𑀡𑀯𑀯𑀁𑀲𑀲𑀗𑁆𑀔𑀟𑀺𑀡𑁆𑀟𑀺𑀫𑀦𑀺𑀦𑁆𑀦𑀸𑀤𑀲𑀤𑁆𑀤𑀸𑀦𑀁 [𑀪𑁂𑀭𑀺𑀧𑀡𑀯𑀲𑀗𑁆𑀔𑀢𑀺𑀡𑀯𑀦𑀺𑀦𑁆𑀦𑀸𑀤𑀲𑀤𑁆𑀤𑀸𑀦𑀁 (𑀧𑀻.)] 𑀲𑀩𑁆𑀩𑀯𑀗𑁆𑀓𑀤𑁄𑀲𑀦𑀺𑀳𑀺𑀢𑀦𑀺𑀦𑁆𑀦𑀻𑀢𑀓𑀲𑀸𑀯𑁄 𑀭𑀸𑀚𑀸𑀭𑀳𑁄 𑀭𑀸𑀚𑀪𑁄𑀕𑁆𑀕𑁄 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑁨𑁧𑁮. ‘‘𑀏𑀯𑀫𑁂𑀯 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄. 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑀸𑀧𑀣𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸. 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺.

‘‘𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀭𑀺𑀬𑀲𑀸𑀯𑀓𑁄 𑀅𑀩𑁆𑀪𑁄𑀓𑀸𑀲𑀕𑀢𑁄 𑀳𑁄𑀢𑀺. 𑀏𑀢𑁆𑀣𑀕𑁂𑀥𑀸 𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑁂𑀯𑀫𑀦𑀼𑀲𑁆𑀲𑀸 𑀬𑀤𑀺𑀤𑀁 𑁋 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀢𑀫𑁂𑀦𑀁 𑀢𑀣𑀸𑀕𑀢𑁄 𑀉𑀢𑁆𑀢𑀭𑀺𑀁 𑀯𑀺𑀦𑁂𑀢𑀺 𑁋 ‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀻𑀮𑀯𑀸 𑀳𑁄𑀳𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀸𑀳𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀲𑁆𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀽’’’𑀢𑀺.

‘‘𑀬𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀢𑀫𑁂𑀦𑀁 𑀢𑀣𑀸𑀕𑀢𑁄 𑀉𑀢𑁆𑀢𑀭𑀺𑀁 𑀯𑀺𑀦𑁂𑀢𑀺 𑁋 ‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀳𑀺, 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀫𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻…𑀧𑁂… (𑀬𑀣𑀸 𑀕𑀡𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀦𑁆𑀢𑁂, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺.)

𑁨𑁧𑁯. ‘‘𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀳𑀢𑁆𑀣𑀺𑀤𑀫𑀓𑁄 𑀫𑀳𑀦𑁆𑀢𑀁 𑀣𑀫𑁆𑀪𑀁 𑀧𑀣𑀯𑀺𑀬𑀁 𑀦𑀺𑀔𑀡𑀺𑀢𑁆𑀯𑀸 𑀆𑀭𑀜𑁆𑀜𑀓𑀲𑁆𑀲 𑀦𑀸𑀕𑀲𑁆𑀲 𑀕𑀻𑀯𑀸𑀬𑀁 𑀉𑀧𑀦𑀺𑀩𑀦𑁆𑀥𑀢𑀺 𑀆𑀭𑀜𑁆𑀜𑀓𑀸𑀦𑀜𑁆𑀘𑁂𑀯 𑀲𑀻𑀮𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀆𑀭𑀜𑁆𑀜𑀓𑀸𑀦𑀜𑁆𑀘𑁂𑀯 𑀲𑀭𑀲𑀗𑁆𑀓𑀧𑁆𑀧𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀆𑀭𑀜𑁆𑀜𑀓𑀸𑀦𑀜𑁆𑀘𑁂𑀯 𑀤𑀭𑀣𑀓𑀺𑀮𑀫𑀣𑀧𑀭𑀺𑀴𑀸𑀳𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀕𑀸𑀫𑀦𑁆𑀢𑁂 𑀅𑀪𑀺𑀭𑀫𑀸𑀧𑀦𑀸𑀬 𑀫𑀦𑀼𑀲𑁆𑀲𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀲𑀫𑀸𑀤𑀧𑀦𑀸𑀬; 𑀏𑀯𑀫𑁂𑀯 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑁂𑀢𑀲𑁄 𑀉𑀧𑀦𑀺𑀩𑀦𑁆𑀥𑀦𑀸 𑀳𑁄𑀦𑁆𑀢𑀺 𑀕𑁂𑀳𑀲𑀺𑀢𑀸𑀦𑀜𑁆𑀘𑁂𑀯 𑀲𑀻𑀮𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀕𑁂𑀳𑀲𑀺𑀢𑀸𑀦𑀜𑁆𑀘𑁂𑀯 𑀲𑀭𑀲𑀗𑁆𑀓𑀧𑁆𑀧𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀕𑁂𑀳𑀲𑀺𑀢𑀸𑀦𑀜𑁆𑀘𑁂𑀯 𑀤𑀭𑀣𑀓𑀺𑀮𑀫𑀣𑀧𑀭𑀺𑀴𑀸𑀳𑀸𑀦𑀁 𑀅𑀪𑀺𑀦𑀺𑀫𑁆𑀫𑀤𑀦𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

𑁨𑁨𑁦. ‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀉𑀢𑁆𑀢𑀭𑀺𑀁 𑀯𑀺𑀦𑁂𑀢𑀺 𑁋 ‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺, 𑀫𑀸 𑀘 𑀓𑀸𑀫𑀽𑀧𑀲𑀁𑀳𑀺𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑀺. 𑀯𑁂𑀤𑀦𑀸𑀲𑀼… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺, 𑀫𑀸 𑀘 𑀓𑀸𑀫𑀽𑀧𑀲𑀁𑀳𑀺𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑀻’’’𑀢𑀺.

‘‘𑀲𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

𑁨𑁨𑁧. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺.

‘‘𑀲𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀔𑀫𑁄 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺 𑀲𑀩𑁆𑀩𑀭𑀸𑀕𑀤𑁄𑀲𑀫𑁄𑀳𑀦𑀺𑀳𑀺𑀢𑀦𑀺𑀦𑁆𑀦𑀻𑀢𑀓𑀲𑀸𑀯𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

𑁨𑁨𑁨. ‘‘𑀫𑀳𑀮𑁆𑀮𑀓𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀜𑁆𑀜𑁄 𑀦𑀸𑀕𑁄 𑀅𑀤𑀦𑁆𑀢𑁄 𑀅𑀯𑀺𑀦𑀻𑀢𑁄 𑀓𑀸𑀮𑀗𑁆𑀓𑀭𑁄𑀢𑀺, ‘𑀅𑀤𑀦𑁆𑀢𑀫𑀭𑀡𑀁 [𑀅𑀤𑀦𑁆𑀢𑀁 𑀫𑀭𑀡𑀁 (𑀓.)] 𑀫𑀳𑀮𑁆𑀮𑀓𑁄 𑀭𑀜𑁆𑀜𑁄 𑀦𑀸𑀕𑁄 𑀓𑀸𑀮𑀗𑁆𑀓𑀢𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀫𑀚𑁆𑀛𑀺𑀫𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀜𑁆𑀜𑁄 𑀦𑀸𑀕𑁄. 𑀤𑀳𑀭𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀜𑁆𑀜𑁄 𑀦𑀸𑀕𑁄 𑀅𑀤𑀦𑁆𑀢𑁄 𑀅𑀯𑀺𑀦𑀻𑀢𑁄 𑀓𑀸𑀮𑀗𑁆𑀓𑀭𑁄𑀢𑀺, ‘𑀅𑀤𑀦𑁆𑀢𑀫𑀭𑀡𑀁 𑀤𑀳𑀭𑁄 𑀭𑀜𑁆𑀜𑁄 𑀦𑀸𑀕𑁄 𑀓𑀸𑀮𑀗𑁆𑀓𑀢𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀏𑀯𑀫𑁂𑀯 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀣𑁂𑀭𑁄 𑀘𑁂𑀧𑀺 𑀪𑀺𑀓𑁆𑀔𑀼 𑀅𑀔𑀻𑀡𑀸𑀲𑀯𑁄 𑀓𑀸𑀮𑀗𑁆𑀓𑀭𑁄𑀢𑀺, ‘𑀅𑀤𑀦𑁆𑀢𑀫𑀭𑀡𑀁 𑀣𑁂𑀭𑁄 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀫𑀚𑁆𑀛𑀺𑀫𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼. 𑀦𑀯𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼 𑀅𑀔𑀻𑀡𑀸𑀲𑀯𑁄 𑀓𑀸𑀮𑀗𑁆𑀓𑀭𑁄𑀢𑀺, ‘𑀅𑀤𑀦𑁆𑀢𑀫𑀭𑀡𑀁 𑀦𑀯𑁄 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀫𑀳𑀮𑁆𑀮𑀓𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀜𑁆𑀜𑁄 𑀦𑀸𑀕𑁄 𑀲𑀼𑀤𑀦𑁆𑀢𑁄 𑀲𑀼𑀯𑀺𑀦𑀻𑀢𑁄 𑀓𑀸𑀮𑀗𑁆𑀓𑀭𑁄𑀢𑀺, ‘𑀤𑀦𑁆𑀢𑀫𑀭𑀡𑀁 𑀫𑀳𑀮𑁆𑀮𑀓𑁄 𑀭𑀜𑁆𑀜𑁄 𑀦𑀸𑀕𑁄 𑀓𑀸𑀮𑀗𑁆𑀓𑀢𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀫𑀚𑁆𑀛𑀺𑀫𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀜𑁆𑀜𑁄 𑀦𑀸𑀕𑁄… 𑀤𑀳𑀭𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀜𑁆𑀜𑁄 𑀦𑀸𑀕𑁄 𑀲𑀼𑀤𑀦𑁆𑀢𑁄 𑀲𑀼𑀯𑀺𑀦𑀻𑀢𑁄 𑀓𑀸𑀮𑀗𑁆𑀓𑀭𑁄𑀢𑀺, ‘𑀤𑀦𑁆𑀢𑀫𑀭𑀡𑀁 𑀤𑀳𑀭𑁄 𑀭𑀜𑁆𑀜𑁄 𑀦𑀸𑀕𑁄 𑀓𑀸𑀮𑀗𑁆𑀓𑀢𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀏𑀯𑀫𑁂𑀯 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀣𑁂𑀭𑁄 𑀘𑁂𑀧𑀺 𑀪𑀺𑀓𑁆𑀔𑀼 𑀔𑀻𑀡𑀸𑀲𑀯𑁄 𑀓𑀸𑀮𑀗𑁆𑀓𑀭𑁄𑀢𑀺, ‘𑀤𑀦𑁆𑀢𑀫𑀭𑀡𑀁 𑀣𑁂𑀭𑁄 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀫𑀚𑁆𑀛𑀺𑀫𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼. 𑀦𑀯𑁄 𑀘𑁂𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼 𑀔𑀻𑀡𑀸𑀲𑀯𑁄 𑀓𑀸𑀮𑀗𑁆𑀓𑀭𑁄𑀢𑀺, ‘𑀤𑀦𑁆𑀢𑀫𑀭𑀡𑀁 𑀦𑀯𑁄 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀅𑀘𑀺𑀭𑀯𑀢𑁄 𑀲𑀫𑀡𑀼𑀤𑁆𑀤𑁂𑀲𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀤𑀦𑁆𑀢𑀪𑀽𑀫𑀺𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀜𑁆𑀘𑀫𑀁.

𑁬. 𑀪𑀽𑀫𑀺𑀚𑀲𑀼𑀢𑁆𑀢𑀁

𑁨𑁨𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀪𑀽𑀫𑀺𑀚𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀚𑀬𑀲𑁂𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀬𑁂𑀦𑀸𑀬𑀲𑁆𑀫𑀸 𑀪𑀽𑀫𑀺𑀚𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀪𑀽𑀫𑀺𑀚𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀆𑀬𑀲𑁆𑀫𑀦𑁆𑀢𑀁 𑀪𑀽𑀫𑀺𑀚𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀢𑀺, 𑀪𑁄 𑀪𑀽𑀫𑀺𑀚, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 [𑀘𑀭𑀢𑀺, 𑀅𑀪𑀩𑁆𑀩𑁄 (𑀲𑀻. 𑀧𑀻.) 𑀏𑀯𑀫𑀼𑀧𑀭𑀺𑀧𑀺 𑀏𑀓𑀯𑀘𑀦𑁂𑀦𑁂𑀯 𑀤𑀺𑀲𑁆𑀲𑀢𑀺] 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 [𑀆𑀲𑀜𑁆𑀘 𑀅𑀦𑀸𑀲𑀜𑁆𑀘 𑀘𑁂𑀧𑀺 (𑀅𑀝𑁆𑀞.)] 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬𑀸’𑀢𑀺. 𑀇𑀥 𑀪𑁄𑀢𑁄 𑀪𑀽𑀫𑀺𑀚𑀲𑁆𑀲 𑀲𑀢𑁆𑀣𑀸 𑀓𑀺𑀁𑀯𑀸𑀤𑀻 [𑀓𑀺𑀁𑀯𑀸𑀤𑀻 𑀓𑀺𑀁𑀤𑀺𑀝𑁆𑀞𑀻 (𑀲𑁆𑀬𑀸. 𑀓𑀁. 𑀓.)] 𑀓𑀺𑀫𑀓𑁆𑀔𑀸𑀬𑀻’’𑀢𑀺? ‘‘𑀦 𑀔𑁄 𑀫𑁂𑀢𑀁, 𑀭𑀸𑀚𑀓𑀼𑀫𑀸𑀭, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁. 𑀞𑀸𑀦𑀜𑁆𑀘 𑀔𑁄 𑀏𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀪𑀕𑀯𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬𑀸’𑀢𑀺. 𑀦 𑀔𑁄 𑀫𑁂 𑀢𑀁, 𑀭𑀸𑀚𑀓𑀼𑀫𑀸𑀭, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁. 𑀞𑀸𑀦𑀜𑁆𑀘 𑀔𑁄 𑀏𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀪𑀕𑀯𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺. ‘‘𑀲𑀘𑁂 𑀔𑁄 𑀪𑁄𑀢𑁄 𑀪𑀽𑀫𑀺𑀚𑀲𑁆𑀲 𑀲𑀢𑁆𑀣𑀸 𑀏𑀯𑀁𑀯𑀸𑀤𑀻 [𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀻 (𑀲𑁆𑀬𑀸. 𑀓𑀁. 𑀓.)] 𑀏𑀯𑀫𑀓𑁆𑀔𑀸𑀬𑀻, 𑀅𑀤𑁆𑀥𑀸 𑀪𑁄𑀢𑁄 𑀪𑀽𑀫𑀺𑀚𑀲𑁆𑀲 𑀲𑀢𑁆𑀣𑀸 𑀲𑀩𑁆𑀩𑁂𑀲𑀁𑀬𑁂𑀯 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀼𑀤𑁆𑀥𑀸𑀦𑀁 [𑀩𑀼𑀤𑁆𑀥𑀸𑀦𑀁 (𑀓.) 𑀫𑀼𑀤𑁆𑀥𑀸𑀦𑀦𑁆𑀢𑀺𑀫𑀼𑀤𑁆𑀥𑀁, 𑀫𑀢𑁆𑀣𑀓𑀦𑁆𑀢𑀺 𑀅𑀢𑁆𑀣𑁄] 𑀫𑀜𑁆𑀜𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺. 𑀅𑀣 𑀔𑁄 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀆𑀬𑀲𑁆𑀫𑀦𑁆𑀢𑀁 𑀪𑀽𑀫𑀺𑀚𑀁 𑀲𑀓𑁂𑀦𑁂𑀯 𑀣𑀸𑀮𑀺𑀧𑀸𑀓𑁂𑀦 𑀧𑀭𑀺𑀯𑀺𑀲𑀺.

𑁨𑁨𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀪𑀽𑀫𑀺𑀚𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀪𑀽𑀫𑀺𑀚𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀚𑀬𑀲𑁂𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄, 𑀪𑀦𑁆𑀢𑁂, 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀲𑀦𑁆𑀢𑀺, 𑀪𑁄 𑀪𑀽𑀫𑀺𑀚, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬𑀸’𑀢𑀺. ‘𑀇𑀥 𑀪𑁄𑀢𑁄 𑀪𑀽𑀫𑀺𑀚𑀲𑁆𑀲 𑀲𑀢𑁆𑀣𑀸 𑀓𑀺𑀁𑀯𑀸𑀤𑀻 𑀓𑀺𑀫𑀓𑁆𑀔𑀸𑀬𑀻’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀪𑀦𑁆𑀢𑁂, 𑀚𑀬𑀲𑁂𑀦𑀁 𑀭𑀸𑀚𑀓𑀼𑀫𑀸𑀭𑀁 𑀏𑀢𑀤𑀯𑁄𑀘𑀁 𑁋 ‘𑀦 𑀔𑁄 𑀫𑁂 𑀢𑀁, 𑀭𑀸𑀚𑀓𑀼𑀫𑀸𑀭, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁. 𑀞𑀸𑀦𑀜𑁆𑀘 𑀔𑁄 𑀏𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀪𑀕𑀯𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬𑀸𑀢𑀺. 𑀦 𑀔𑁄 𑀫𑁂 𑀢𑀁, 𑀭𑀸𑀚𑀓𑀼𑀫𑀸𑀭, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁. 𑀞𑀸𑀦𑀜𑁆𑀘 𑀔𑁄 𑀏𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀪𑀕𑀯𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸’𑀢𑀺. ‘𑀲𑀘𑁂 𑀪𑁄𑀢𑁄 𑀪𑀽𑀫𑀺𑀚𑀲𑁆𑀲 𑀲𑀢𑁆𑀣𑀸 𑀏𑀯𑀁𑀯𑀸𑀤𑀻 𑀏𑀯𑀫𑀓𑁆𑀔𑀸𑀬𑀻, 𑀅𑀤𑁆𑀥𑀸 𑀪𑁄𑀢𑁄 𑀪𑀽𑀫𑀺𑀚𑀲𑁆𑀲 𑀲𑀢𑁆𑀣𑀸 𑀲𑀩𑁆𑀩𑁂𑀲𑀁𑀬𑁂𑀯 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀼𑀤𑁆𑀥𑀸𑀦𑀁 𑀫𑀜𑁆𑀜𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻’𑀢𑀺. ‘𑀓𑀘𑁆𑀘𑀸𑀳𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀝𑁆𑀞𑁄 𑀏𑀯𑀁 𑀩𑁆𑀬𑀸𑀓𑀭𑀫𑀸𑀦𑁄 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀪𑀕𑀯𑀢𑁄 𑀳𑁄𑀫𑀺, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀸𑀫𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀫𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀻’’’𑀢𑀺?

‘‘𑀢𑀕𑁆𑀖 𑀢𑁆𑀯𑀁, 𑀪𑀽𑀫𑀺𑀚, 𑀏𑀯𑀁 𑀧𑀼𑀝𑁆𑀞𑁄 𑀏𑀯𑀁 𑀩𑁆𑀬𑀸𑀓𑀭𑀫𑀸𑀦𑁄 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀫𑁂 𑀳𑁄𑀲𑀺, 𑀦 𑀘 𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀲𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀲𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀺. 𑀬𑁂 𑀳𑀺 𑀓𑁂𑀘𑀺, 𑀪𑀽𑀫𑀺𑀚, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸 𑀫𑀺𑀘𑁆𑀙𑀸𑀆𑀚𑀻𑀯𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀸 𑀫𑀺𑀘𑁆𑀙𑀸𑀲𑀢𑀻 𑀫𑀺𑀘𑁆𑀙𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬.

𑁨𑁨𑁫. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀽𑀫𑀺𑀚, 𑀧𑀼𑀭𑀺𑀲𑁄 𑀢𑁂𑀮𑀢𑁆𑀣𑀺𑀓𑁄 𑀢𑁂𑀮𑀕𑀯𑁂𑀲𑀻 𑀢𑁂𑀮𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀯𑀸𑀮𑀺𑀓𑀁 𑀤𑁄𑀡𑀺𑀬𑀸 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀧𑀻𑀴𑁂𑀬𑁆𑀬. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀯𑀸𑀮𑀺𑀓𑀁 𑀤𑁄𑀡𑀺𑀬𑀸 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀧𑀻𑀴𑁂𑀬𑁆𑀬, 𑀅𑀪𑀩𑁆𑀩𑁄 𑀢𑁂𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀯𑀸𑀮𑀺𑀓𑀁 𑀤𑁄𑀡𑀺𑀬𑀸 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀧𑀻𑀴𑁂𑀬𑁆𑀬, 𑀅𑀪𑀩𑁆𑀩𑁄 𑀢𑁂𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀯𑀸𑀮𑀺𑀓𑀁 𑀤𑁄𑀡𑀺𑀬𑀸 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀧𑀻𑀴𑁂𑀬𑁆𑀬, 𑀅𑀪𑀩𑁆𑀩𑁄 𑀢𑁂𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀯𑀸𑀮𑀺𑀓𑀁 𑀤𑁄𑀡𑀺𑀬𑀸 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀧𑀻𑀴𑁂𑀬𑁆𑀬, 𑀅𑀪𑀩𑁆𑀩𑁄 𑀢𑁂𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀢𑁂𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀏𑀯𑀫𑁂𑀯 𑀔𑁄, 𑀪𑀽𑀫𑀺𑀚, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸 𑀫𑀺𑀘𑁆𑀙𑀸𑀆𑀚𑀻𑀯𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀸 𑀫𑀺𑀘𑁆𑀙𑀸𑀲𑀢𑀻 𑀫𑀺𑀘𑁆𑀙𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀽𑀫𑀺𑀚, 𑀧𑀼𑀭𑀺𑀲𑁄 𑀔𑀻𑀭𑀢𑁆𑀣𑀺𑀓𑁄 𑀔𑀻𑀭𑀕𑀯𑁂𑀲𑀻 𑀔𑀻𑀭𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀕𑀸𑀯𑀺𑀁 𑀢𑀭𑀼𑀡𑀯𑀘𑁆𑀙𑀁 𑀯𑀺𑀲𑀸𑀡𑀢𑁄 𑀆𑀯𑀺𑀜𑁆𑀙𑁂𑀬𑁆𑀬 [𑀆𑀯𑀺𑀜𑁆𑀚𑁂𑀬𑁆𑀬 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀕𑀸𑀯𑀺𑀁 𑀢𑀭𑀼𑀡𑀯𑀘𑁆𑀙𑀁 𑀯𑀺𑀲𑀸𑀡𑀢𑁄 𑀆𑀯𑀺𑀜𑁆𑀙𑁂𑀬𑁆𑀬, 𑀅𑀪𑀩𑁆𑀩𑁄 𑀔𑀻𑀭𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀕𑀸𑀯𑀺𑀁 𑀢𑀭𑀼𑀡𑀯𑀘𑁆𑀙𑀁 𑀯𑀺𑀲𑀸𑀡𑀢𑁄 𑀆𑀯𑀺𑀜𑁆𑀙𑁂𑀬𑁆𑀬, 𑀅𑀪𑀩𑁆𑀩𑁄 𑀔𑀻𑀭𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀔𑀻𑀭𑀲𑁆𑀲 𑀅𑀥𑀺𑀕𑀫𑀸𑀬. 𑀏𑀯𑀫𑁂𑀯 𑀔𑁄, 𑀪𑀽𑀫𑀺𑀚, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄…𑀧𑁂… 𑀫𑀺𑀘𑁆𑀙𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬.

𑁨𑁨𑁬. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀽𑀫𑀺𑀚, 𑀧𑀼𑀭𑀺𑀲𑁄 𑀦𑀯𑀦𑀻𑀢𑀢𑁆𑀣𑀺𑀓𑁄 𑀦𑀯𑀦𑀻𑀢𑀕𑀯𑁂𑀲𑀻 𑀦𑀯𑀦𑀻𑀢𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀉𑀤𑀓𑀁 𑀓𑀮𑀲𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀫𑀢𑁆𑀣𑁂𑀦 [𑀫𑀦𑁆𑀣𑁂𑀦 (𑀲𑀻.), 𑀫𑀢𑁆𑀢𑁂𑀦 (𑀓.)] 𑀆𑀯𑀺𑀜𑁆𑀙𑁂𑀬𑁆𑀬. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀉𑀤𑀓𑀁 𑀓𑀮𑀲𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀫𑀢𑁆𑀣𑁂𑀦 𑀆𑀯𑀺𑀜𑁆𑀙𑁂𑀬𑁆𑀬, 𑀅𑀪𑀩𑁆𑀩𑁄 𑀦𑀯𑀦𑀻𑀢𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀉𑀤𑀓𑀁 𑀓𑀮𑀲𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀫𑀢𑁆𑀣𑁂𑀦 𑀆𑀯𑀺𑀜𑁆𑀙𑁂𑀬𑁆𑀬, 𑀅𑀪𑀩𑁆𑀩𑁄 𑀦𑀯𑀦𑀻𑀢𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀦𑀯𑀦𑀻𑀢𑀲𑁆𑀲 𑀅𑀥𑀺𑀕𑀫𑀸𑀬. 𑀏𑀯𑀫𑁂𑀯 𑀔𑁄, 𑀪𑀽𑀫𑀺𑀚, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄…𑀧𑁂… 𑀫𑀺𑀘𑁆𑀙𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀽𑀫𑀺𑀚, 𑀧𑀼𑀭𑀺𑀲𑁄 𑀅𑀕𑁆𑀕𑀺𑀢𑁆𑀣𑀺𑀓𑁄 [𑀅𑀕𑁆𑀕𑀢𑁆𑀣𑀺𑀓𑁄 (𑀲𑀻.)] 𑀅𑀕𑁆𑀕𑀺𑀕𑀯𑁂𑀲𑀻 𑀅𑀕𑁆𑀕𑀺𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀅𑀮𑁆𑀮𑀁 𑀓𑀝𑁆𑀞𑀁 𑀲𑀲𑁆𑀦𑁂𑀳𑀁 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑀅𑀪𑀺𑀫𑀦𑁆𑀣𑁂𑀬𑁆𑀬 [𑀅𑀪𑀺𑀫𑀢𑁆𑀣𑁂𑀬𑁆𑀬 (𑀲𑁆𑀬𑀸. 𑀓𑀁. 𑀧𑀻. 𑀓.)]. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀮𑁆𑀮𑀁 𑀓𑀝𑁆𑀞𑀁 𑀲𑀲𑁆𑀦𑁂𑀳𑀁 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑀅𑀪𑀺𑀫𑀦𑁆𑀣𑁂𑀬𑁆𑀬, 𑀅𑀪𑀩𑁆𑀩𑁄 𑀅𑀕𑁆𑀕𑀺𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀮𑁆𑀮𑀁 𑀓𑀝𑁆𑀞𑀁 𑀲𑀲𑁆𑀦𑁂𑀳𑀁 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑀅𑀪𑀺𑀫𑀦𑁆𑀣𑁂𑀬𑁆𑀬, 𑀅𑀪𑀩𑁆𑀩𑁄 𑀅𑀕𑁆𑀕𑀺𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀅𑀕𑁆𑀕𑀺𑀲𑁆𑀲 𑀅𑀥𑀺𑀕𑀫𑀸𑀬. 𑀏𑀯𑀫𑁂𑀯 𑀔𑁄, 𑀪𑀽𑀫𑀺𑀚, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄…𑀧𑁂… 𑀫𑀺𑀘𑁆𑀙𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂…𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀬𑁂 𑀳𑀺 𑀓𑁂𑀘𑀺, 𑀪𑀽𑀫𑀺𑀚, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸 𑀲𑀫𑁆𑀫𑀸𑀆𑀚𑀻𑀯𑀸 𑀲𑀫𑁆𑀫𑀸𑀯𑀸𑀬𑀸𑀫𑀸 𑀲𑀫𑁆𑀫𑀸𑀲𑀢𑀻 𑀲𑀫𑁆𑀫𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬.

𑁨𑁨𑁭. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀽𑀫𑀺𑀚, 𑀧𑀼𑀭𑀺𑀲𑁄 𑀢𑁂𑀮𑀢𑁆𑀣𑀺𑀓𑁄 𑀢𑁂𑀮𑀕𑀯𑁂𑀲𑀻 𑀢𑁂𑀮𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀢𑀺𑀮𑀧𑀺𑀝𑁆𑀞𑀁 𑀤𑁄𑀡𑀺𑀬𑀸 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀧𑀻𑀴𑁂𑀬𑁆𑀬. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀢𑀺𑀮𑀧𑀺𑀝𑁆𑀞𑀁 𑀤𑁄𑀡𑀺𑀬𑀸 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀧𑀻𑀴𑁂𑀬𑁆𑀬, 𑀪𑀩𑁆𑀩𑁄 𑀢𑁂𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀢𑀺𑀮𑀧𑀺𑀝𑁆𑀞𑀁 𑀤𑁄𑀡𑀺𑀬𑀸 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀧𑀻𑀴𑁂𑀬𑁆𑀬, 𑀪𑀩𑁆𑀩𑁄 𑀢𑁂𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀢𑁂𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀏𑀯𑀫𑁂𑀯 𑀔𑁄, 𑀪𑀽𑀫𑀺𑀚, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑁄…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀽𑀫𑀺𑀚, 𑀧𑀼𑀭𑀺𑀲𑁄 𑀔𑀻𑀭𑀢𑁆𑀣𑀺𑀓𑁄 𑀔𑀻𑀭𑀕𑀯𑁂𑀲𑀻 𑀔𑀻𑀭𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀕𑀸𑀯𑀺𑀁 𑀢𑀭𑀼𑀡𑀯𑀘𑁆𑀙𑀁 𑀣𑀦𑀢𑁄 𑀆𑀯𑀺𑀜𑁆𑀙𑁂𑀬𑁆𑀬. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀕𑀸𑀯𑀺𑀁 𑀢𑀭𑀼𑀡𑀯𑀘𑁆𑀙𑀁 𑀣𑀦𑀢𑁄 𑀆𑀯𑀺𑀜𑁆𑀙𑁂𑀬𑁆𑀬, 𑀪𑀩𑁆𑀩𑁄 𑀔𑀻𑀭𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀕𑀸𑀯𑀺𑀁 𑀢𑀭𑀼𑀡𑀯𑀘𑁆𑀙𑀁 𑀣𑀦𑀢𑁄 𑀆𑀯𑀺𑀜𑁆𑀙𑁂𑀬𑁆𑀬, 𑀪𑀩𑁆𑀩𑁄 𑀔𑀻𑀭𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀔𑀻𑀭𑀲𑁆𑀲 𑀅𑀥𑀺𑀕𑀫𑀸𑀬. 𑀏𑀯𑀫𑁂𑀯 𑀔𑁄, 𑀪𑀽𑀫𑀺𑀚, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑁄…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸…𑀧𑁂… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬.

𑁨𑁨𑁮. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀽𑀫𑀺𑀚, 𑀧𑀼𑀭𑀺𑀲𑁄 𑀦𑀯𑀦𑀻𑀢𑀢𑁆𑀣𑀺𑀓𑁄 𑀦𑀯𑀦𑀻𑀢𑀕𑀯𑁂𑀲𑀻 𑀦𑀯𑀦𑀻𑀢𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀤𑀥𑀺𑀁 𑀓𑀮𑀲𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀫𑀢𑁆𑀣𑁂𑀦 𑀆𑀯𑀺𑀜𑁆𑀙𑁂𑀬𑁆𑀬. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀤𑀥𑀺𑀁 𑀓𑀮𑀲𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀫𑀢𑁆𑀣𑁂𑀦 𑀆𑀯𑀺𑀜𑁆𑀙𑁂𑀬𑁆𑀬, 𑀪𑀩𑁆𑀩𑁄 𑀦𑀯𑀦𑀻𑀢𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀤𑀥𑀺𑀁 𑀓𑀮𑀲𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀫𑀢𑁆𑀣𑁂𑀦 𑀆𑀯𑀺𑀜𑁆𑀙𑁂𑀬𑁆𑀬, 𑀪𑀩𑁆𑀩𑁄 𑀦𑀯𑀦𑀻𑀢𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀦𑀯𑀦𑀻𑀢𑀲𑁆𑀲 𑀅𑀥𑀺𑀕𑀫𑀸𑀬. 𑀏𑀯𑀫𑁂𑀯 𑀔𑁄, 𑀪𑀽𑀫𑀺𑀚, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑁄…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸… 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 … 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀽𑀫𑀺𑀚, 𑀧𑀼𑀭𑀺𑀲𑁄 𑀅𑀕𑁆𑀕𑀺𑀢𑁆𑀣𑀺𑀓𑁄 𑀅𑀕𑁆𑀕𑀺𑀕𑀯𑁂𑀲𑀻 𑀅𑀕𑁆𑀕𑀺𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀲𑀼𑀓𑁆𑀔𑀁 𑀓𑀝𑁆𑀞𑀁 𑀓𑁄𑀴𑀸𑀧𑀁 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑀅𑀪𑀺𑀫𑀦𑁆𑀣𑁂𑀬𑁆𑀬; ( ) [(𑀪𑀩𑁆𑀩𑁄 𑀅𑀕𑁆𑀕𑀺𑀲𑁆𑀲 𑀅𑀥𑀺𑀕𑀫𑀸𑀬) (𑀲𑀩𑁆𑀩𑀢𑁆𑀣)] 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸… 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸.. 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸… 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀲𑀼𑀓𑁆𑀔 𑀓𑀝𑁆𑀞𑀁 𑀓𑁄𑀴𑀸𑀧𑀁 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑀅𑀪𑀺𑀫𑀦𑁆𑀣𑁂𑀬𑁆𑀬, 𑀪𑀩𑁆𑀩𑁄 𑀅𑀕𑁆𑀕𑀺𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀅𑀕𑁆𑀕𑀺𑀲𑁆𑀲 𑀅𑀥𑀺𑀕𑀫𑀸𑀬. 𑀏𑀯𑀫𑁂𑀯 𑀔𑁄, 𑀪𑀽𑀫𑀺𑀚, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑁄…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀦𑁄 𑀢𑁂 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬; 𑀦𑁂𑀯𑀸𑀲𑀁 𑀦𑀸𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬.

‘‘𑀲𑀘𑁂 𑀔𑁄 𑀢𑀁, 𑀪𑀽𑀫𑀺𑀚, 𑀚𑀬𑀲𑁂𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀇𑀫𑀸 𑀘𑀢𑀲𑁆𑀲𑁄 𑀉𑀧𑀫𑀸 𑀧𑀝𑀺𑀪𑀸𑀬𑁂𑀬𑁆𑀬𑀼𑀁 𑀅𑀦𑀘𑁆𑀙𑀭𑀺𑀬𑀁 𑀢𑁂 𑀚𑀬𑀲𑁂𑀦𑁄 𑀭𑀸𑀚𑀓𑀼𑀫𑀸𑀭𑁄 𑀧𑀲𑀻𑀤𑁂𑀬𑁆𑀬, 𑀧𑀲𑀦𑁆𑀦𑁄 𑀘 𑀢𑁂 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁂𑀬𑁆𑀬𑀸’’𑀢𑀺. ‘‘𑀓𑀼𑀢𑁄 𑀧𑀦 𑀫𑀁, 𑀪𑀦𑁆𑀢𑁂, 𑀚𑀬𑀲𑁂𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀇𑀫𑀸 𑀘𑀢𑀲𑁆𑀲𑁄 𑀉𑀧𑀫𑀸 𑀧𑀝𑀺𑀪𑀸𑀬𑀺𑀲𑁆𑀲𑀦𑁆𑀢𑀺 𑀅𑀦𑀘𑁆𑀙𑀭𑀺𑀬𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸, 𑀲𑁂𑀬𑁆𑀬𑀣𑀸𑀧𑀺 𑀪𑀕𑀯𑀦𑁆𑀢’’𑀦𑁆𑀢𑀺?

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀪𑀽𑀫𑀺𑀚𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀪𑀽𑀫𑀺𑀚𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.

𑁭. 𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀁

𑁨𑁨𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀬𑁂𑀦𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀸𑀳𑀺 [𑀯𑀦𑁆𑀤𑀸𑀳𑀺, 𑀏𑀯𑀜𑁆𑀘 𑀯𑀤𑁂𑀳𑀺 (𑀲𑀻. 𑀧𑀻.)] 𑁋 ‘𑀧𑀜𑁆𑀘𑀓𑀗𑁆𑀕𑁄, 𑀪𑀦𑁆𑀢𑁂, 𑀣𑀧𑀢𑀺 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’𑀢𑀺; 𑀏𑀯𑀜𑁆𑀘 𑀯𑀤𑁂𑀳𑀺 [𑀏𑀯𑀜𑁆𑀘 𑀯𑀤𑁂𑀢𑀺 (𑀲𑀻. 𑀧𑀻.)] 𑁋 ‘𑀅𑀥𑀺𑀯𑀸𑀲𑁂𑀢𑀼 𑀓𑀺𑀭, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀧𑀜𑁆𑀘𑀓𑀗𑁆𑀕𑀲𑁆𑀲 𑀣𑀧𑀢𑀺𑀲𑁆𑀲 𑀲𑁆𑀯𑀸𑀢𑀦𑀸𑀬 𑀅𑀢𑁆𑀢𑀘𑀢𑀼𑀢𑁆𑀣𑁄 𑀪𑀢𑁆𑀢𑀁; 𑀬𑁂𑀦 𑀘 𑀓𑀺𑀭, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀧𑀕𑁂𑀯𑀢𑀭𑀁 𑀆𑀕𑀘𑁆𑀙𑁂𑀬𑁆𑀬; 𑀧𑀜𑁆𑀘𑀓𑀗𑁆𑀕𑁄, 𑀪𑀦𑁆𑀢𑁂, 𑀣𑀧𑀢𑀺 [𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 (𑀲𑀻. 𑀧𑀻.)] 𑀩𑀳𑀼𑀓𑀺𑀘𑁆𑀘𑁄 𑀩𑀳𑀼𑀓𑀭𑀡𑀻𑀬𑁄 𑀭𑀸𑀚𑀓𑀭𑀡𑀻𑀬𑁂𑀦𑀸’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀜𑁆𑀘𑀓𑀗𑁆𑀕𑀲𑁆𑀲 𑀣𑀧𑀢𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀧𑀼𑀭𑀺𑀲𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀘𑀓𑀗𑁆𑀕𑁄, 𑀪𑀦𑁆𑀢𑁂, 𑀣𑀧𑀢𑀺 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 𑁋 ‘𑀅𑀥𑀺𑀯𑀸𑀲𑁂𑀢𑀼 𑀓𑀺𑀭, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀧𑀜𑁆𑀘𑀓𑀗𑁆𑀕𑀲𑁆𑀲 𑀣𑀧𑀢𑀺𑀲𑁆𑀲 𑀲𑁆𑀯𑀸𑀢𑀦𑀸𑀬 𑀅𑀢𑁆𑀢𑀘𑀢𑀼𑀢𑁆𑀣𑁄 𑀪𑀢𑁆𑀢𑀁; 𑀬𑁂𑀦 𑀘 𑀓𑀺𑀭, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀧𑀕𑁂𑀯𑀢𑀭𑀁 𑀆𑀕𑀘𑁆𑀙𑁂𑀬𑁆𑀬; 𑀧𑀜𑁆𑀘𑀓𑀗𑁆𑀕𑁄, 𑀪𑀦𑁆𑀢𑁂, 𑀣𑀧𑀢𑀺 𑀩𑀳𑀼𑀓𑀺𑀘𑁆𑀘𑁄 𑀩𑀳𑀼𑀓𑀭𑀡𑀻𑀬𑁄 𑀭𑀸𑀚𑀓𑀭𑀡𑀻𑀬𑁂𑀦𑀸’’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑀼𑀡𑁆𑀳𑀻𑀪𑀸𑀯𑁂𑀦.

𑁨𑁩𑁦. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀧𑀜𑁆𑀘𑀓𑀗𑁆𑀕𑀲𑁆𑀲 𑀣𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋

‘‘𑀇𑀥 𑀫𑀁, 𑀪𑀦𑁆𑀢𑁂, 𑀣𑁂𑀭𑀸 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀧𑁆𑀧𑀫𑀸𑀡𑀁, 𑀕𑀳𑀧𑀢𑀺, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀪𑀸𑀯𑁂𑀳𑀻’𑀢𑀺 [𑀅𑀧𑁆𑀧𑀫𑀸𑀡𑀸 𑀕𑀳𑀧𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑁂𑀢𑀩𑁆𑀩𑀸𑀢𑀺 (𑀓.)]. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘𑀫𑀳𑀕𑁆𑀕𑀢𑀁, 𑀕𑀳𑀧𑀢𑀺, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀪𑀸𑀯𑁂𑀳𑀻’𑀢𑀺. 𑀬𑀸 𑀘𑀸𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀬𑀸 𑀘 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘, 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀕𑀳𑀧𑀢𑀺, 𑀢𑀁 𑀬𑁂𑀯𑁂𑀢𑁆𑀣 𑀧𑀝𑀺𑀪𑀸𑀢𑀼. 𑀅𑀧𑀡𑁆𑀡𑀓𑀦𑁆𑀢𑁂 𑀇𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀫𑀬𑁆𑀳𑀁 𑀔𑁄, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀬𑀸 𑀘𑀸𑀬𑀁 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀬𑀸 𑀘 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’’𑀦𑁆𑀢𑀺. ‘‘𑀬𑀸 𑀘𑀸𑀬𑀁, 𑀕𑀳𑀧𑀢𑀺, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀬𑀸 𑀘 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘. 𑀢𑀤𑀫𑀺𑀦𑀸𑀧𑁂𑀢𑀁, 𑀕𑀳𑀧𑀢𑀺, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘’’.

‘‘𑀓𑀢𑀫𑀸 𑀘, 𑀕𑀳𑀧𑀢𑀺, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺? 𑀇𑀥, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁; 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁; 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑁨𑁩𑁧. ‘‘𑀓𑀢𑀫𑀸 𑀘, 𑀕𑀳𑀧𑀢𑀺, 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺? 𑀇𑀥, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀭𑀼𑀓𑁆𑀔𑀫𑀽𑀮𑀁 𑀫𑀳𑀕𑁆𑀕𑀢𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀇𑀥 𑀧𑀦, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀭𑀼𑀓𑁆𑀔𑀫𑀽𑀮𑀸𑀦𑀺 𑀫𑀳𑀕𑁆𑀕𑀢𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀫𑁆𑀧𑀺 [𑀅𑀬𑀁 (𑀲𑁆𑀬𑀸. 𑀓𑀁. 𑀓.)] 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀇𑀥 𑀧𑀦, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 𑀫𑀳𑀕𑁆𑀕𑀢𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀇𑀥 𑀧𑀦, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀫𑀳𑀕𑁆𑀕𑀢𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀇𑀥 𑀧𑀦, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀫𑀳𑀸𑀭𑀚𑁆𑀚𑀁 𑀫𑀳𑀕𑁆𑀕𑀢𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀇𑀥 𑀧𑀦, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀳𑀸𑀭𑀚𑁆𑀚𑀸𑀦𑀺 𑀫𑀳𑀕𑁆𑀕𑀢𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀇𑀥 𑀧𑀦, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀫𑀳𑀕𑁆𑀕𑀢𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀫𑀳𑀕𑁆𑀕𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀇𑀫𑀺𑀦𑀸 𑀔𑁄 𑀏𑀢𑀁, 𑀕𑀳𑀧𑀢𑀺, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘.

𑁨𑁩𑁨. ‘‘𑀘𑀢𑀲𑁆𑀲𑁄 𑀔𑁄 𑀇𑀫𑀸 𑀕𑀳𑀧𑀢𑀺, 𑀪𑀯𑀽𑀧𑀧𑀢𑁆𑀢𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄? 𑀇𑀥, 𑀕𑀳𑀧𑀢𑀺, 𑀏𑀓𑀘𑁆𑀘𑁄 ‘𑀧𑀭𑀺𑀢𑁆𑀢𑀸𑀪𑀸’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑀭𑀺𑀢𑁆𑀢𑀸𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀇𑀥 𑀧𑀦, 𑀕𑀳𑀧𑀢𑀺, 𑀏𑀓𑀘𑁆𑀘𑁄 ‘𑀅𑀧𑁆𑀧𑀫𑀸𑀡𑀸𑀪𑀸’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑁆𑀧𑀫𑀸𑀡𑀸𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀇𑀥 𑀧𑀦, 𑀕𑀳𑀧𑀢𑀺, 𑀏𑀓𑀘𑁆𑀘𑁄 ‘𑀲𑀁𑀓𑀺𑀮𑀺𑀝𑁆𑀞𑀸𑀪𑀸’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀇𑀥 𑀧𑀦, 𑀕𑀳𑀧𑀢𑀺, 𑀏𑀓𑀘𑁆𑀘𑁄 ‘𑀧𑀭𑀺𑀲𑀼𑀤𑁆𑀥𑀸𑀪𑀸’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑀭𑀺𑀲𑀼𑀤𑁆𑀥𑀸𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀇𑀫𑀸 𑀔𑁄, 𑀕𑀳𑀧𑀢𑀺, 𑀘𑀢𑀲𑁆𑀲𑁄 𑀪𑀯𑀽𑀧𑀧𑀢𑁆𑀢𑀺𑀬𑁄.

‘‘𑀳𑁄𑀢𑀺 𑀔𑁄 𑀲𑁄, 𑀕𑀳𑀧𑀢𑀺, 𑀲𑀫𑀬𑁄, 𑀬𑀸 𑀢𑀸 𑀤𑁂𑀯𑀢𑀸 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀸𑀲𑀁 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑀡𑁆𑀡𑀦𑀸𑀦𑀢𑁆𑀢𑀜𑁆𑀳𑀺 𑀔𑁄 𑀧𑀜𑁆𑀜𑀸𑀬𑀢𑀺 𑀦𑁄 𑀘 𑀆𑀪𑀸𑀦𑀸𑀦𑀢𑁆𑀢𑀁. 𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀧𑀼𑀭𑀺𑀲𑁄 𑀲𑀫𑁆𑀩𑀳𑀼𑀮𑀸𑀦𑀺 𑀢𑁂𑀮𑀧𑁆𑀧𑀤𑀻𑀧𑀸𑀦𑀺 𑀏𑀓𑀁 𑀖𑀭𑀁 𑀧𑀯𑁂𑀲𑁂𑀬𑁆𑀬. 𑀢𑁂𑀲𑀁 𑀏𑀓𑀁 𑀖𑀭𑀁 𑀧𑀯𑁂𑀲𑀺𑀢𑀸𑀦𑀁 𑀅𑀘𑁆𑀘𑀺𑀦𑀸𑀦𑀢𑁆𑀢𑀜𑁆𑀳𑀺 𑀔𑁄 𑀧𑀜𑁆𑀜𑀸𑀬𑁂𑀣, 𑀦𑁄 𑀘 𑀆𑀪𑀸𑀦𑀸𑀦𑀢𑁆𑀢𑀁; 𑀏𑀯𑀫𑁂𑀯 𑀔𑁄, 𑀕𑀳𑀧𑀢𑀺, 𑀳𑁄𑀢𑀺 𑀔𑁄 𑀲𑁄 𑀲𑀫𑀬𑁄, 𑀬𑀸 𑀢𑀸 𑀤𑁂𑀯𑀢𑀸 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀦𑁆𑀢𑀺 𑀢𑀸𑀲𑀁 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑀡𑁆𑀡𑀦𑀸𑀦𑀢𑁆𑀢𑀜𑁆𑀳𑀺 𑀔𑁄 𑀧𑀜𑁆𑀜𑀸𑀬𑀢𑀺, 𑀦𑁄 𑀘 𑀆𑀪𑀸𑀦𑀸𑀦𑀢𑁆𑀢𑀁.

‘‘𑀳𑁄𑀢𑀺 𑀔𑁄 𑀲𑁄, 𑀕𑀳𑀧𑀢𑀺, 𑀲𑀫𑀬𑁄, 𑀬𑀸 𑀢𑀸 𑀤𑁂𑀯𑀢𑀸 𑀢𑀢𑁄 𑀯𑀺𑀧𑀓𑁆𑀓𑀫𑀦𑁆𑀢𑀺, 𑀢𑀸𑀲𑀁 𑀢𑀢𑁄 𑀯𑀺𑀧𑀓𑁆𑀓𑀫𑀦𑁆𑀢𑀻𑀦𑀁 𑀯𑀡𑁆𑀡𑀦𑀸𑀦𑀢𑁆𑀢𑀜𑁆𑀘𑁂𑀯 𑀧𑀜𑁆𑀜𑀸𑀬𑀢𑀺 𑀆𑀪𑀸𑀦𑀸𑀦𑀢𑁆𑀢𑀜𑁆𑀘. 𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀧𑀼𑀭𑀺𑀲𑁄 𑀢𑀸𑀦𑀺 𑀲𑀫𑁆𑀩𑀳𑀼𑀮𑀸𑀦𑀺 𑀢𑁂𑀮𑀧𑁆𑀧𑀤𑀻𑀧𑀸𑀦𑀺 𑀢𑀫𑁆𑀳𑀸 𑀖𑀭𑀸 𑀦𑀻𑀳𑀭𑁂𑀬𑁆𑀬. 𑀢𑁂𑀲𑀁 𑀢𑀢𑁄 𑀦𑀻𑀳𑀢𑀸𑀦𑀁 [𑀦𑀻𑀳𑀭𑀦𑁆𑀢𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀘𑁆𑀘𑀺𑀦𑀸𑀦𑀢𑁆𑀢𑀜𑁆𑀘𑁂𑀯 𑀧𑀜𑁆𑀜𑀸𑀬𑁂𑀣 𑀆𑀪𑀸𑀦𑀸𑀦𑀢𑁆𑀢𑀜𑁆𑀘; 𑀏𑀯𑀫𑁂𑀯 𑀔𑁄, 𑀕𑀳𑀧𑀢𑀺, 𑀳𑁄𑀢𑀺 𑀔𑁄 𑀲𑁄 𑀲𑀫𑀬𑁄, 𑀬𑀸 𑀢𑀸 𑀤𑁂𑀯𑀢𑀸 𑀢𑀢𑁄 𑀯𑀺𑀧𑀓𑁆𑀓𑀫𑀦𑁆𑀢𑀺, 𑀢𑀸𑀲𑀁 𑀢𑀢𑁄 𑀯𑀺𑀧𑀓𑁆𑀓𑀫𑀦𑁆𑀢𑀻𑀦𑀁 𑀯𑀡𑁆𑀡𑀦𑀸𑀦𑀢𑁆𑀢𑀜𑁆𑀘𑁂𑀯 𑀧𑀜𑁆𑀜𑀸𑀬𑀢𑀺 𑀆𑀪𑀸𑀦𑀸𑀦𑀢𑁆𑀢𑀜𑁆𑀘.

‘‘𑀦 𑀔𑁄, 𑀕𑀳𑀧𑀢𑀺, 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀁 𑀅𑀫𑁆𑀳𑀸𑀓𑀁 𑀦𑀺𑀘𑁆𑀘𑀦𑁆𑀢𑀺 𑀯𑀸 𑀥𑀼𑀯𑀦𑁆𑀢𑀺 𑀯𑀸 𑀲𑀲𑁆𑀲𑀢’𑀦𑁆𑀢𑀺 𑀯𑀸, 𑀅𑀧𑀺 𑀘 𑀬𑀢𑁆𑀣 𑀬𑀢𑁆𑀣𑁂𑀯 𑀢𑀸 [𑀬𑀸 (𑀓.)] 𑀤𑁂𑀯𑀢𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀢𑀸 𑀤𑁂𑀯𑀢𑀸 𑀅𑀪𑀺𑀭𑀫𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀫𑀓𑁆𑀔𑀺𑀓𑀸𑀦𑀁 𑀓𑀸𑀚𑁂𑀦 𑀯𑀸 𑀧𑀺𑀝𑀓𑁂𑀦 𑀯𑀸 𑀳𑀭𑀻𑀬𑀫𑀸𑀦𑀸𑀦𑀁 𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀁 𑀅𑀫𑁆𑀳𑀸𑀓𑀁 𑀦𑀺𑀘𑁆𑀘𑀦𑁆𑀢𑀺 𑀯𑀸 𑀥𑀼𑀯𑀦𑁆𑀢𑀺 𑀯𑀸 𑀲𑀲𑁆𑀲𑀢’𑀦𑁆𑀢𑀺 𑀯𑀸, 𑀅𑀧𑀺 𑀘 𑀬𑀢𑁆𑀣 𑀬𑀢𑁆𑀣𑁂𑀯 𑀢𑀸 [𑀬𑀸 (𑀓.)] 𑀫𑀓𑁆𑀔𑀺𑀓𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀢𑀸 𑀫𑀓𑁆𑀔𑀺𑀓𑀸 𑀅𑀪𑀺𑀭𑀫𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀕𑀳𑀧𑀢𑀺, 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀁 𑀅𑀫𑁆𑀳𑀸𑀓𑀁 𑀦𑀺𑀘𑁆𑀘𑀦𑁆𑀢𑀺 𑀯𑀸 𑀥𑀼𑀯𑀦𑁆𑀢𑀺 𑀯𑀸 𑀲𑀲𑁆𑀲𑀢’𑀦𑁆𑀢𑀺 𑀯𑀸, 𑀅𑀧𑀺 𑀘 𑀬𑀢𑁆𑀣 𑀬𑀢𑁆𑀣𑁂𑀯 𑀢𑀸 𑀤𑁂𑀯𑀢𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀢𑀸 𑀤𑁂𑀯𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺.

𑁨𑁩𑁩. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀪𑀺𑀬𑁄 𑀓𑀘𑁆𑀘𑀸𑀦𑁄 [𑀓𑀘𑁆𑀘𑀸𑀬𑀦𑁄 (𑀲𑀻.)] 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥! 𑀅𑀢𑁆𑀣𑀺 𑀘 𑀫𑁂 𑀏𑀢𑁆𑀣 𑀉𑀢𑁆𑀢𑀭𑀺𑀁 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑀁. 𑀬𑀸 𑀢𑀸, 𑀪𑀦𑁆𑀢𑁂, 𑀤𑁂𑀯𑀢𑀸 𑀆𑀪𑀸 𑀲𑀩𑁆𑀩𑀸 𑀢𑀸 𑀧𑀭𑀺𑀢𑁆𑀢𑀸𑀪𑀸 𑀉𑀤𑀸𑀳𑀼 𑀲𑀦𑁆𑀢𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀅𑀧𑁆𑀧𑀫𑀸𑀡𑀸𑀪𑀸’’𑀢𑀺? ‘‘𑀢𑀤𑀗𑁆𑀕𑁂𑀦 𑀔𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀲𑀦𑁆𑀢𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀧𑀭𑀺𑀢𑁆𑀢𑀸𑀪𑀸, 𑀲𑀦𑁆𑀢𑀺 𑀧𑀦𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀅𑀧𑁆𑀧𑀫𑀸𑀡𑀸𑀪𑀸’’𑀢𑀺. ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀏𑀓𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀦𑁆𑀦𑀸𑀦𑀁 𑀲𑀦𑁆𑀢𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀧𑀭𑀺𑀢𑁆𑀢𑀸𑀪𑀸, 𑀲𑀦𑁆𑀢𑀺 𑀧𑀦𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀅𑀧𑁆𑀧𑀫𑀸𑀡𑀸𑀪𑀸’’𑀢𑀺?

‘‘𑀢𑁂𑀦 𑀳𑀸𑀯𑀼𑀲𑁄 𑀓𑀘𑁆𑀘𑀸𑀦, 𑀢𑀁𑀬𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀬𑁆𑀯𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀭𑀼𑀓𑁆𑀔𑀫𑀽𑀮𑀁 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀬𑁄𑀘𑀸𑀬𑀁 [𑀬𑁄𑀧𑀸𑀬𑀁 (𑀓.)] 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀭𑀼𑀓𑁆𑀔𑀫𑀽𑀮𑀸𑀦𑀺 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀓𑀢𑀫𑀸 𑀘𑀺𑀢𑁆𑀢𑀪𑀸𑀯𑀦𑀸 𑀫𑀳𑀕𑁆𑀕𑀢𑀢𑀭𑀸’’𑀢𑀺? ‘‘𑀬𑁆𑀯𑀸𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀭𑀼𑀓𑁆𑀔𑀫𑀽𑀮𑀸𑀦𑀺 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀅𑀬𑀁 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀫𑀳𑀕𑁆𑀕𑀢𑀢𑀭𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀬𑁆𑀯𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀭𑀼𑀓𑁆𑀔𑀫𑀽𑀮𑀸𑀦𑀺 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀬𑁄𑀘𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀓𑀢𑀫𑀸 𑀘𑀺𑀢𑁆𑀢𑀪𑀸𑀯𑀦𑀸 𑀫𑀳𑀕𑁆𑀕𑀢𑀢𑀭𑀸’’𑀢𑀺? ‘‘𑀬𑁆𑀯𑀸𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀅𑀬𑀁 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀫𑀳𑀕𑁆𑀕𑀢𑀢𑀭𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀬𑁆𑀯𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀬𑁄𑀘𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀓𑀢𑀫𑀸 𑀘𑀺𑀢𑁆𑀢𑀪𑀸𑀯𑀦𑀸 𑀫𑀳𑀕𑁆𑀕𑀢𑀢𑀭𑀸’’𑀢𑀺? ‘‘𑀬𑁆𑀯𑀸𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀅𑀬𑀁 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀫𑀳𑀕𑁆𑀕𑀢𑀢𑀭𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀬𑁆𑀯𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀬𑁄𑀘𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀫𑀳𑀸𑀭𑀚𑁆𑀚𑀁 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀓𑀢𑀫𑀸 𑀘𑀺𑀢𑁆𑀢𑀪𑀸𑀯𑀦𑀸 𑀫𑀳𑀕𑁆𑀕𑀢𑀢𑀭𑀸’’𑀢𑀺? ‘‘𑀬𑁆𑀯𑀸𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀫𑀳𑀸𑀭𑀚𑁆𑀚𑀁 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀅𑀬𑀁 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀫𑀳𑀕𑁆𑀕𑀢𑀢𑀭𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀬𑁆𑀯𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀏𑀓𑀁 𑀫𑀳𑀸𑀭𑀚𑁆𑀚𑀁 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀬𑁄𑀘𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀳𑀸𑀭𑀚𑁆𑀚𑀸𑀦𑀺 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀓𑀢𑀫𑀸 𑀘𑀺𑀢𑁆𑀢𑀪𑀸𑀯𑀦𑀸 𑀫𑀳𑀕𑁆𑀕𑀢𑀢𑀭𑀸’’𑀢𑀺? ‘‘𑀬𑁆𑀯𑀸𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀳𑀸𑀭𑀚𑁆𑀚𑀸𑀦𑀺 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀅𑀬𑀁 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀫𑀳𑀕𑁆𑀕𑀢𑀢𑀭𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀬𑁆𑀯𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀳𑀸𑀭𑀚𑁆𑀚𑀸𑀦𑀺 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀬𑁄𑀘𑀸𑀬𑀁 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀓𑀢𑀫𑀸 𑀘𑀺𑀢𑁆𑀢𑀪𑀸𑀯𑀦𑀸 𑀫𑀳𑀕𑁆𑀕𑀢𑀢𑀭𑀸’’𑀢𑀺? ‘‘𑀬𑁆𑀯𑀸𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀬𑀸𑀯𑀢𑀸 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 ‘𑀫𑀳𑀕𑁆𑀕𑀢’𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺 𑁋 𑀅𑀬𑀁 𑀇𑀫𑀸𑀲𑀁 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀪𑀸𑀯𑀦𑀸𑀦𑀁 𑀫𑀳𑀕𑁆𑀕𑀢𑀢𑀭𑀸’’𑀢𑀺? ‘‘𑀅𑀬𑀁 𑀔𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀏𑀓𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀦𑁆𑀦𑀸𑀦𑀁 𑀲𑀦𑁆𑀢𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀧𑀭𑀺𑀢𑁆𑀢𑀸𑀪𑀸, 𑀲𑀦𑁆𑀢𑀺 𑀧𑀦𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀅𑀧𑁆𑀧𑀫𑀸𑀡𑀸𑀪𑀸’’𑀢𑀺.

𑁨𑁩𑁪. ‘‘𑀲𑀸𑀥𑀼, 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥! 𑀅𑀢𑁆𑀣𑀺 𑀘 𑀫𑁂 𑀏𑀢𑁆𑀣 𑀉𑀢𑁆𑀢𑀭𑀺𑀁 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑀁. 𑀬𑀸𑀯𑀢𑀸 [𑀬𑀸 𑀢𑀸 (𑀓.)], 𑀪𑀦𑁆𑀢𑁂, 𑀤𑁂𑀯𑀢𑀸 𑀆𑀪𑀸 𑀲𑀩𑁆𑀩𑀸 𑀢𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸 𑀉𑀤𑀸𑀳𑀼 𑀲𑀦𑁆𑀢𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀧𑀭𑀺𑀲𑀼𑀤𑁆𑀥𑀸𑀪𑀸’’𑀢𑀺? ‘‘𑀢𑀤𑀗𑁆𑀕𑁂𑀦 𑀔𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀲𑀦𑁆𑀢𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸, 𑀲𑀦𑁆𑀢𑀺 𑀧𑀦𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀧𑀭𑀺𑀲𑀼𑀤𑁆𑀥𑀸𑀪𑀸’’𑀢𑀺. ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀅𑀦𑀼𑀭𑀼𑀤𑁆𑀥, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀏𑀓𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀦𑁆𑀦𑀸𑀦𑀁 𑀲𑀦𑁆𑀢𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸, 𑀲𑀦𑁆𑀢𑀺 𑀧𑀦𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀧𑀭𑀺𑀲𑀼𑀤𑁆𑀥𑀸𑀪𑀸’’𑀢𑀺?

‘‘𑀢𑁂𑀦, 𑀳𑀸𑀯𑀼𑀲𑁄 𑀓𑀘𑁆𑀘𑀸𑀦, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬𑀧𑀺𑀥𑁂𑀓𑀘𑁆𑀘𑁂 [𑀉𑀧𑀫𑀸𑀬𑀫𑀺𑀥𑁂𑀓𑀘𑁆𑀘𑁂 (𑀓.)] 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 𑀢𑁂𑀮𑀫𑁆𑀧𑀺 𑀅𑀧𑀭𑀺𑀲𑀼𑀤𑁆𑀥𑀁 𑀯𑀝𑁆𑀝𑀺𑀧𑀺 𑀅𑀧𑀭𑀺𑀲𑀼𑀤𑁆𑀥𑀸. 𑀲𑁄 𑀢𑁂𑀮𑀲𑁆𑀲𑀧𑀺 𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀯𑀝𑁆𑀝𑀺𑀬𑀸𑀧𑀺 𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀅𑀦𑁆𑀥𑀦𑁆𑀥𑀁 𑀯𑀺𑀬 𑀛𑀸𑀬𑀢𑀺; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 ‘𑀲𑀁𑀓𑀺𑀮𑀺𑀝𑁆𑀞𑀸𑀪𑀸’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀲𑁆𑀲 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀫𑁆𑀧𑀺 𑀦 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀫𑁆𑀧𑀺 𑀦 𑀲𑀼𑀲𑀫𑀽𑀳𑀢𑀁 𑀳𑁄𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀦 𑀲𑀼𑀧𑁆𑀧𑀝𑀺𑀯𑀺𑀦𑀻𑀢𑀁 𑀳𑁄𑀢𑀺. 𑀲𑁄 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀲𑁆𑀲𑀧𑀺 𑀦 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀣𑀺𑀦𑀫𑀺𑀤𑁆𑀥𑀲𑁆𑀲𑀧𑀺 𑀦 𑀲𑀼𑀲𑀫𑀽𑀳𑀢𑀢𑁆𑀢𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑀧𑀺 𑀦 𑀲𑀼𑀧𑁆𑀧𑀝𑀺𑀯𑀺𑀦𑀻𑀢𑀢𑁆𑀢𑀸 𑀅𑀦𑁆𑀥𑀦𑁆𑀥𑀁 𑀯𑀺𑀬 𑀛𑀸𑀬𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 𑀢𑁂𑀮𑀫𑁆𑀧𑀺 𑀧𑀭𑀺𑀲𑀼𑀤𑁆𑀥𑀁 𑀯𑀝𑁆𑀝𑀺𑀧𑀺 𑀧𑀭𑀺𑀲𑀼𑀤𑁆𑀥𑀸. 𑀲𑁄 𑀢𑁂𑀮𑀲𑁆𑀲𑀧𑀺 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀯𑀝𑁆𑀝𑀺𑀬𑀸𑀧𑀺 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀦 𑀅𑀦𑁆𑀥𑀦𑁆𑀥𑀁 𑀯𑀺𑀬 𑀛𑀸𑀬𑀢𑀺; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 ‘𑀧𑀭𑀺𑀲𑀼𑀤𑁆𑀥𑀸𑀪𑀸’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀲𑁆𑀲 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀫𑁆𑀧𑀺 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀫𑁆𑀧𑀺 𑀲𑀼𑀲𑀫𑀽𑀳𑀢𑀁 𑀳𑁄𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀲𑀼𑀧𑁆𑀧𑀝𑀺𑀯𑀺𑀦𑀻𑀢𑀁 𑀳𑁄𑀢𑀺. 𑀲𑁄 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀲𑁆𑀲𑀧𑀺 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀣𑀺𑀦𑀫𑀺𑀤𑁆𑀥𑀲𑁆𑀲𑀧𑀺 𑀲𑀼𑀲𑀫𑀽𑀳𑀢𑀢𑁆𑀢𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑀧𑀺 𑀲𑀼𑀧𑁆𑀧𑀝𑀺𑀯𑀺𑀦𑀻𑀢𑀢𑁆𑀢𑀸 𑀦 𑀅𑀦𑁆𑀥𑀦𑁆𑀥𑀁 𑀯𑀺𑀬 𑀛𑀸𑀬𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑀭𑀺𑀲𑀼𑀤𑁆𑀥𑀸𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀏𑀓𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀦𑁆𑀦𑀸𑀦𑀁 𑀲𑀦𑁆𑀢𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸, 𑀲𑀦𑁆𑀢𑀺 𑀧𑀦𑁂𑀢𑁆𑀣 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀧𑀭𑀺𑀲𑀼𑀤𑁆𑀥𑀸𑀪𑀸’’𑀢𑀺.

𑁨𑁩𑁫. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀪𑀺𑀬𑁄 𑀓𑀘𑁆𑀘𑀸𑀦𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥! 𑀦, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀏𑀯𑀫𑀸𑀳 𑁋 ‘𑀏𑀯𑀁 𑀫𑁂 𑀲𑀼𑀢’𑀦𑁆𑀢𑀺 𑀯𑀸 ‘𑀏𑀯𑀁 𑀅𑀭𑀳𑀢𑀺 𑀪𑀯𑀺𑀢𑀼’𑀦𑁆𑀢𑀺 𑀯𑀸; 𑀅𑀣 𑀘 𑀧𑀦, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 ‘𑀏𑀯𑀫𑁆𑀧𑀺 𑀢𑀸 𑀤𑁂𑀯𑀢𑀸, 𑀇𑀢𑀺𑀧𑀺 𑀢𑀸 𑀤𑁂𑀯𑀢𑀸’𑀢𑁆𑀯𑁂𑀯 𑀪𑀸𑀲𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀤𑁆𑀥𑀸 𑀆𑀬𑀲𑁆𑀫𑀢𑀸 𑀅𑀦𑀼𑀭𑀼𑀤𑁆𑀥𑁂𑀦 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀦𑁆𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀜𑁆𑀘𑁂𑀯 𑀲𑀮𑁆𑀮𑀧𑀺𑀢𑀧𑀼𑀩𑁆𑀩𑀜𑁆𑀘 𑀲𑀸𑀓𑀘𑁆𑀙𑀸 𑀘 𑀲𑀫𑀸𑀧𑀚𑁆𑀚𑀺𑀢𑀧𑀼𑀩𑁆𑀩𑀸’’’𑀢𑀺. ‘‘𑀅𑀤𑁆𑀥𑀸 𑀔𑁄 𑀅𑀬𑀁, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀆𑀲𑀚𑁆𑀚 𑀉𑀧𑀦𑀻𑀬 𑀯𑀸𑀘𑀸 𑀪𑀸𑀲𑀺𑀢𑀸, 𑀅𑀧𑀺 𑀘 𑀢𑁂 𑀅𑀳𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺 𑁋 ‘𑀤𑀻𑀖𑀭𑀢𑁆𑀢𑀁 𑀔𑁄 𑀫𑁂, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀦𑁆𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀜𑁆𑀘𑁂𑀯 𑀲𑀮𑁆𑀮𑀧𑀺𑀢𑀧𑀼𑀩𑁆𑀩𑀜𑁆𑀘 𑀲𑀸𑀓𑀘𑁆𑀙𑀸 𑀘 𑀲𑀫𑀸𑀧𑀚𑁆𑀚𑀺𑀢𑀧𑀼𑀩𑁆𑀩𑀸’’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀪𑀺𑀬𑁄 𑀓𑀘𑁆𑀘𑀸𑀦𑁄 𑀧𑀜𑁆𑀘𑀓𑀗𑁆𑀕𑀁 𑀣𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀮𑀸𑀪𑀸 𑀢𑁂, 𑀕𑀳𑀧𑀢𑀺, 𑀲𑀼𑀮𑀤𑁆𑀥𑀁 𑀢𑁂, 𑀕𑀳𑀧𑀢𑀺, 𑀬𑀁 𑀢𑁆𑀯𑀜𑁆𑀘𑁂𑀯 𑀢𑀁 𑀓𑀗𑁆𑀔𑀸𑀥𑀫𑁆𑀫𑀁 𑀧𑀳𑀸𑀲𑀺 [𑀧𑀚𑀳𑀲𑀺 (𑀓.)], 𑀫𑀬𑀜𑁆𑀘𑀺𑀫𑀁 [𑀬𑀫𑁆𑀧𑀺𑀫𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀥𑀫𑁆𑀫𑀧𑀭𑀺𑀬𑀸𑀬𑀁 𑀅𑀮𑀢𑁆𑀣𑀫𑁆𑀳𑀸 𑀲𑀯𑀦𑀸𑀬𑀸’’𑀢𑀺.

𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.

𑁮. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀁

𑁨𑁩𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀫𑁆𑀩𑀺𑀬𑀁 𑀪𑀺𑀓𑁆𑀔𑀽 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀺𑀬𑀁 𑀪𑀺𑀓𑁆𑀔𑀽 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂! 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼; 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂! 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼; 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼; 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑁄𑀲𑀫𑁆𑀩𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀞𑀺𑀢𑀓𑁄𑀯 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁩𑁭. ‘‘𑀧𑀼𑀣𑀼𑀲𑀤𑁆𑀤𑁄 𑀲𑀫𑀚𑀦𑁄, 𑀦 𑀩𑀸𑀮𑁄 𑀓𑁄𑀘𑀺 𑀫𑀜𑁆𑀜𑀣;