𑁧𑁦. 𑀤𑁂𑀯𑀤𑀽𑀢𑀲𑀼𑀢𑁆𑀢𑀁

𑁨𑁬𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀕𑀸𑀭𑀸 𑀲𑀤𑁆𑀯𑀸𑀭𑀸 [𑀲𑀦𑁆𑀥𑀺𑀤𑁆𑀯𑀸𑀭𑀸 (𑀓.)], 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀫𑀚𑁆𑀛𑁂 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬 𑀫𑀦𑀼𑀲𑁆𑀲𑁂 𑀕𑁂𑀳𑀁 𑀧𑀯𑀺𑀲𑀦𑁆𑀢𑁂𑀧𑀺 𑀦𑀺𑀓𑁆𑀔𑀫𑀦𑁆𑀢𑁂𑀧𑀺 𑀅𑀦𑀼𑀘𑀗𑁆𑀓𑀫𑀦𑁆𑀢𑁂𑀧𑀺 𑀅𑀦𑀼𑀯𑀺𑀘𑀭𑀦𑁆𑀢𑁂𑀧𑀺; 𑀏𑀯𑀫𑁂𑀯 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀦𑀼𑀲𑁆𑀲𑁂𑀲𑀼 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸’’’𑀢𑀺.

𑁨𑁬𑁨. ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀬𑀫𑀲𑁆𑀲 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑀺 𑁋 ‘𑀅𑀬𑀁, 𑀤𑁂𑀯, 𑀧𑀼𑀭𑀺𑀲𑁄 𑀅𑀫𑀢𑁆𑀢𑁂𑀬𑁆𑀬𑁄 𑀅𑀧𑁂𑀢𑁆𑀢𑁂𑀬𑁆𑀬𑁄 𑀅𑀲𑀸𑀫𑀜𑁆𑀜𑁄 𑀅𑀩𑁆𑀭𑀸𑀳𑁆𑀫𑀜𑁆𑀜𑁄, 𑀦 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀻. 𑀇𑀫𑀲𑁆𑀲 𑀤𑁂𑀯𑁄 𑀤𑀡𑁆𑀟𑀁 𑀧𑀡𑁂𑀢𑀽’𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀧𑀞𑀫𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀧𑀞𑀫𑀁 𑀤𑁂𑀯𑀤𑀽𑀢𑀁 𑀧𑀸𑀢𑀼𑀪𑀽𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀤𑁆𑀤𑀲𑀁, 𑀪𑀦𑁆𑀢𑁂’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀤𑀳𑀭𑀁 𑀓𑀼𑀫𑀸𑀭𑀁 𑀫𑀦𑁆𑀤𑀁 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀁 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑀁 𑀲𑁂𑀫𑀸𑀦’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀅𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀲𑁆𑀲 𑀢𑁂 𑀯𑀺𑀜𑁆𑀜𑀼𑀲𑁆𑀲 𑀲𑀢𑁄 𑀫𑀳𑀮𑁆𑀮𑀓𑀲𑁆𑀲 𑀦 𑀏𑀢𑀤𑀳𑁄𑀲𑀺 𑁋 𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀚𑀸𑀢𑀺𑀥𑀫𑁆𑀫𑁄, 𑀚𑀸𑀢𑀺𑀁 𑀅𑀦𑀢𑀻𑀢𑁄. 𑀳𑀦𑁆𑀤𑀸𑀳𑀁 𑀓𑀮𑁆𑀬𑀸𑀡𑀁 𑀓𑀭𑁄𑀫𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀲𑀓𑁆𑀔𑀺𑀲𑁆𑀲𑀁, 𑀪𑀦𑁆𑀢𑁂, 𑀧𑀫𑀸𑀤𑀲𑁆𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀫𑀸𑀤𑀯𑀢𑀸𑀬 𑀦 𑀓𑀮𑁆𑀬𑀸𑀡𑀫𑀓𑀸𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀕𑁆𑀖 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺 𑀬𑀣𑀸 𑀢𑀁 𑀧𑀫𑀢𑁆𑀢𑀁. 𑀢𑀁 𑀔𑁄 𑀧𑀦 𑀢𑁂 𑀏𑀢𑀁 𑀧𑀸𑀧𑀓𑀫𑁆𑀫𑀁 [𑀧𑀸𑀧𑀁 𑀓𑀫𑁆𑀫𑀁 (𑀲𑀻. 𑀧𑀻.)] 𑀦𑁂𑀯 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀢𑀬𑀸𑀯𑁂𑀢𑀁 𑀧𑀸𑀧𑀓𑀫𑁆𑀫𑀁 [𑀧𑀸𑀧𑀁 𑀓𑀫𑁆𑀫𑀁 (𑀲𑀻. 𑀧𑀻.)] 𑀓𑀢𑀁, 𑀢𑁆𑀯𑀜𑁆𑀜𑁂𑀯𑁂𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀲𑀻’’’𑀢𑀺.

𑁨𑁬𑁩. ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀧𑀞𑀫𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀲𑀫𑀦𑀼𑀪𑀸𑀲𑀺𑀢𑁆𑀯𑀸 𑀤𑀼𑀢𑀺𑀬𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀤𑀼𑀢𑀺𑀬𑀁 𑀤𑁂𑀯𑀤𑀽𑀢𑀁 𑀧𑀸𑀢𑀼𑀪𑀽𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 ( ) [(𑀆𑀲𑀻𑀢𑀺𑀓𑀁 𑀯𑀸 𑀦𑀸𑀯𑀼𑀢𑀺𑀓𑀁 𑀯𑀸 𑀯𑀲𑁆𑀲𑀲𑀢𑀺𑀓𑀁 𑀯𑀸 𑀚𑀸𑀢𑀺𑀬𑀸) (𑀓. 𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀢𑀺𑀓𑀗𑁆𑀕𑀼𑀢𑁆𑀢𑀭𑁂𑀧𑀺] 𑀚𑀺𑀡𑁆𑀡𑀁 𑀕𑁄𑀧𑀸𑀦𑀲𑀺𑀯𑀗𑁆𑀓𑀁 𑀪𑁄𑀕𑁆𑀕𑀁 𑀤𑀡𑁆𑀟𑀧𑀭𑀸𑀬𑀦𑀁 𑀧𑀯𑁂𑀥𑀫𑀸𑀦𑀁 𑀕𑀘𑁆𑀙𑀦𑁆𑀢𑀁 𑀆𑀢𑀼𑀭𑀁 𑀕𑀢𑀬𑁄𑀩𑁆𑀩𑀦𑀁 𑀔𑀡𑁆𑀟𑀤𑀦𑁆𑀢𑀁 𑀧𑀮𑀺𑀢𑀓𑁂𑀲𑀁 𑀯𑀺𑀮𑀽𑀦𑀁 𑀔𑀮𑀺𑀢𑀲𑀺𑀭𑀁 [𑀔𑀮𑀺𑀢𑀁𑀲𑀺𑀭𑁄 (𑀲𑀻.), 𑀔𑀮𑀺𑀢𑀁𑀲𑀺𑀭𑀁 (𑀲𑁆𑀬𑀸. 𑀓𑀁. 𑀧𑀻.)] 𑀯𑀮𑀺𑀦𑀁 𑀢𑀺𑀮𑀓𑀸𑀳𑀢𑀕𑀢𑁆𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀅𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀲𑁆𑀲 𑀢𑁂 𑀯𑀺𑀜𑁆𑀜𑀼𑀲𑁆𑀲 𑀲𑀢𑁄 𑀫𑀳𑀮𑁆𑀮𑀓𑀲𑁆𑀲 𑀦 𑀏𑀢𑀤𑀳𑁄𑀲𑀺 𑁋 𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀚𑀭𑀸𑀥𑀫𑁆𑀫𑁄, 𑀚𑀭𑀁 𑀅𑀦𑀢𑀻𑀢𑁄. 𑀳𑀦𑁆𑀤𑀸𑀳𑀁 𑀓𑀮𑁆𑀬𑀸𑀡𑀁 𑀓𑀭𑁄𑀫𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀲𑀓𑁆𑀔𑀺𑀲𑁆𑀲𑀁, 𑀪𑀦𑁆𑀢𑁂, 𑀧𑀫𑀸𑀤𑀲𑁆𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀫𑀸𑀤𑀯𑀢𑀸𑀬 𑀦 𑀓𑀮𑁆𑀬𑀸𑀡𑀫𑀓𑀸𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀕𑁆𑀖 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺 𑀬𑀣𑀸 𑀢𑀁 𑀧𑀫𑀢𑁆𑀢𑀁. 𑀢𑀁 𑀔𑁄 𑀧𑀦 𑀢𑁂 𑀏𑀢𑀁 𑀧𑀸𑀧𑀓𑀫𑁆𑀫𑀁 𑀦𑁂𑀯 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀢𑀬𑀸𑀯𑁂𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑁆𑀯𑀜𑁆𑀜𑁂𑀯𑁂𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀲𑀻’’’𑀢𑀺.

𑁨𑁬𑁪. ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀤𑀼𑀢𑀺𑀬𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀲𑀫𑀦𑀼𑀪𑀸𑀲𑀺𑀢𑁆𑀯𑀸 𑀢𑀢𑀺𑀬𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀢𑀢𑀺𑀬𑀁 𑀤𑁂𑀯𑀤𑀽𑀢𑀁 𑀧𑀸𑀢𑀼𑀪𑀽𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀆𑀩𑀸𑀥𑀺𑀓𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑀁 𑀲𑁂𑀫𑀸𑀦𑀁 𑀅𑀜𑁆𑀜𑁂𑀳𑀺 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑀁 𑀅𑀜𑁆𑀜𑁂𑀳𑀺 𑀲𑀁𑀯𑁂𑀲𑀺𑀬𑀫𑀸𑀦’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀅𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀲𑁆𑀲 𑀢𑁂 𑀯𑀺𑀜𑁆𑀜𑀼𑀲𑁆𑀲 𑀲𑀢𑁄 𑀫𑀳𑀮𑁆𑀮𑀓𑀲𑁆𑀲 𑀦 𑀏𑀢𑀤𑀳𑁄𑀲𑀺 𑁋 𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀩𑁆𑀬𑀸𑀥𑀺𑀥𑀫𑁆𑀫𑁄, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄. 𑀳𑀦𑁆𑀤𑀸𑀳𑀁 𑀓𑀮𑁆𑀬𑀸𑀡𑀁 𑀓𑀭𑁄𑀫𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀲𑀓𑁆𑀔𑀺𑀲𑁆𑀲𑀁, 𑀪𑀦𑁆𑀢𑁂, 𑀧𑀫𑀸𑀤𑀲𑁆𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀫𑀸𑀤𑀯𑀢𑀸𑀬 𑀦 𑀓𑀮𑁆𑀬𑀸𑀡𑀫𑀓𑀸𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀕𑁆𑀖 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺 𑀬𑀣𑀸 𑀢𑀁 𑀧𑀫𑀢𑁆𑀢𑀁. 𑀢𑀁 𑀔𑁄 𑀧𑀦 𑀢𑁂 𑀏𑀢𑀁 𑀧𑀸𑀧𑀓𑀫𑁆𑀫𑀁 𑀦𑁂𑀯 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀢𑀬𑀸𑀯𑁂𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑁆𑀯𑀜𑁆𑀜𑁂𑀯𑁂𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀲𑀻’’’𑀢𑀺.

𑁨𑁬𑁫. ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀢𑀢𑀺𑀬𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀲𑀫𑀦𑀼𑀪𑀸𑀲𑀺𑀢𑁆𑀯𑀸 𑀘𑀢𑀼𑀢𑁆𑀣𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀘𑀢𑀼𑀢𑁆𑀣𑀁 𑀤𑁂𑀯𑀤𑀽𑀢𑀁 𑀧𑀸𑀢𑀼𑀪𑀽𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀭𑀸𑀚𑀸𑀦𑁄 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑁂 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑁂 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑁂 𑀅𑀤𑁆𑀥𑀤𑀡𑁆𑀟𑀓𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑁂 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑁂 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀦𑁆𑀢𑁂 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀦𑁆𑀢𑁂 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑁆𑀢𑁂 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑁂 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑁂 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑁂’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀅𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀲𑁆𑀲 𑀢𑁂 𑀯𑀺𑀜𑁆𑀜𑀼𑀲𑁆𑀲 𑀲𑀢𑁄 𑀫𑀳𑀮𑁆𑀮𑀓𑀲𑁆𑀲 𑀦 𑀏𑀢𑀤𑀳𑁄𑀲𑀺 𑁋 𑀬𑁂 𑀓𑀺𑀭, 𑀪𑁄, 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑀢𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀏𑀯𑀭𑀽𑀧𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀭𑀻𑀬𑀦𑁆𑀢𑀺, 𑀓𑀺𑀫𑀗𑁆𑀕𑀁 [𑀓𑀺𑀫𑀗𑁆𑀕 (𑀲𑀻. 𑀧𑀻.)] 𑀧𑀦 𑀧𑀭𑀢𑁆𑀣! 𑀳𑀦𑁆𑀤𑀸𑀳𑀁 𑀓𑀮𑁆𑀬𑀸𑀡𑀁 𑀓𑀭𑁄𑀫𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀲𑀓𑁆𑀔𑀺𑀲𑁆𑀲𑀁, 𑀪𑀦𑁆𑀢𑁂, 𑀧𑀫𑀸𑀤𑀲𑁆𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀫𑀸𑀤𑀯𑀢𑀸𑀬 𑀦 𑀓𑀮𑁆𑀬𑀸𑀡𑀫𑀓𑀸𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀕𑁆𑀖 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺 𑀬𑀣𑀸 𑀢𑀁 𑀧𑀫𑀢𑁆𑀢𑀁. 𑀢𑀁 𑀔𑁄 𑀧𑀦 𑀢𑁂 𑀏𑀢𑀁 𑀧𑀸𑀧𑀓𑀫𑁆𑀫𑀁 𑀦𑁂𑀯 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀢𑀬𑀸𑀯𑁂𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑁆𑀯𑀜𑁆𑀜𑁂𑀯𑁂𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀲𑀻’’’𑀢𑀺.

𑁨𑁬𑁬. ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀘𑀢𑀼𑀢𑁆𑀣𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀲𑀫𑀦𑀼𑀪𑀸𑀲𑀺𑀢𑁆𑀯𑀸 𑀧𑀜𑁆𑀘𑀫𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀧𑀜𑁆𑀘𑀫𑀁 𑀤𑁂𑀯𑀤𑀽𑀢𑀁 𑀧𑀸𑀢𑀼𑀪𑀽𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀏𑀓𑀸𑀳𑀫𑀢𑀁 𑀯𑀸 𑀤𑁆𑀯𑀻𑀳𑀫𑀢𑀁 𑀯𑀸 𑀢𑀻𑀳𑀫𑀢𑀁 𑀯𑀸 𑀉𑀤𑁆𑀥𑀼𑀫𑀸𑀢𑀓𑀁 𑀯𑀺𑀦𑀻𑀮𑀓𑀁 𑀯𑀺𑀧𑀼𑀩𑁆𑀩𑀓𑀚𑀸𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀅𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀲𑁆𑀲 𑀢𑁂 𑀯𑀺𑀜𑁆𑀜𑀼𑀲𑁆𑀲 𑀲𑀢𑁄 𑀫𑀳𑀮𑁆𑀮𑀓𑀲𑁆𑀲 𑀦 𑀏𑀢𑀤𑀳𑁄𑀲𑀺 𑁋 𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀫𑀭𑀡𑀥𑀫𑁆𑀫𑁄, 𑀫𑀭𑀡𑀁 𑀅𑀦𑀢𑀻𑀢𑁄. 𑀳𑀦𑁆𑀤𑀸𑀳𑀁 𑀓𑀮𑁆𑀬𑀸𑀡𑀁 𑀓𑀭𑁄𑀫𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀲𑀓𑁆𑀔𑀺𑀲𑁆𑀲𑀁, 𑀪𑀦𑁆𑀢𑁂, 𑀧𑀫𑀸𑀤𑀲𑁆𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀫𑀸𑀤𑀯𑀢𑀸𑀬 𑀦 𑀓𑀮𑁆𑀬𑀸𑀡𑀫𑀓𑀸𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀕𑁆𑀖 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺 𑀬𑀣𑀸 𑀢𑀁 𑀧𑀫𑀢𑁆𑀢𑀁. 𑀢𑀁 𑀔𑁄 𑀧𑀦 𑀢𑁂 𑀏𑀢𑀁 𑀧𑀸𑀧𑀓𑀫𑁆𑀫𑀁 𑀦𑁂𑀯 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀢𑀬𑀸𑀯𑁂𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑁆𑀯𑀜𑁆𑀜𑁂𑀯𑁂𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀲𑀻’’’𑀢𑀺.

𑁨𑁬𑁭. ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀧𑀜𑁆𑀘𑀫𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀲𑀫𑀦𑀼𑀪𑀸𑀲𑀺𑀢𑁆𑀯𑀸 𑀢𑀼𑀡𑁆𑀳𑀻 𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀁 𑀦𑀸𑀫 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀦𑁆𑀢𑀺 𑁋 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀫𑀚𑁆𑀛𑁂𑀉𑀭𑀲𑁆𑀫𑀺𑀁 𑀕𑀫𑁂𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀲𑀁𑀯𑁂𑀲𑁂𑀢𑁆𑀯𑀸 𑀓𑀼𑀞𑀸𑀭𑀻𑀳𑀺 𑀢𑀘𑁆𑀙𑀦𑁆𑀢𑀺…𑀧𑁂… 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀯𑀸𑀲𑀻𑀳𑀺 𑀢𑀘𑁆𑀙𑀦𑁆𑀢𑀺…𑀧𑁂… 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀆𑀤𑀺𑀢𑁆𑀢𑀸𑀬 𑀧𑀣𑀯𑀺𑀬𑀸 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀲𑀸𑀭𑁂𑀦𑁆𑀢𑀺𑀧𑀺, 𑀧𑀘𑁆𑀘𑀸𑀲𑀸𑀭𑁂𑀦𑁆𑀢𑀺𑀧𑀺…𑀧𑁂… 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀫𑀳𑀦𑁆𑀢𑀁 𑀅𑀗𑁆𑀕𑀸𑀭𑀧𑀩𑁆𑀩𑀢𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀭𑁄𑀧𑁂𑀦𑁆𑀢𑀺𑀧𑀺 𑀑𑀭𑁄𑀧𑁂𑀦𑁆𑀢𑀺𑀧𑀺…𑀧𑁂… 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀢𑀢𑁆𑀢𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑀦𑁆𑀢𑀺 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀢𑀺. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑁄 𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀅𑀥𑁄 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀢𑀺𑀭𑀺𑀬𑀁 𑀕𑀘𑁆𑀙𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀲𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀦𑀺𑀭𑀬𑁄 𑁋

‘‘𑀘𑀢𑀼𑀓𑁆𑀓𑀡𑁆𑀡𑁄 𑀘𑀢𑀼𑀤𑁆𑀯𑀸𑀭𑁄, 𑀯𑀺𑀪𑀢𑁆𑀢𑁄 𑀪𑀸𑀕𑀲𑁄 𑀫𑀺𑀢𑁄;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑁄, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸’’.

𑁨𑁬𑁮. ‘‘𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀦𑀺𑀭𑀬𑀲𑁆𑀲 𑀧𑀼𑀭𑀢𑁆𑀣𑀺𑀫𑀸𑀬 𑀪𑀺𑀢𑁆𑀢𑀺𑀬𑀸 𑀅𑀘𑁆𑀘𑀺 𑀉𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀙𑀺𑀫𑀸𑀬 𑀪𑀺𑀢𑁆𑀢𑀺𑀬𑀸 𑀧𑀝𑀺𑀳𑀜𑁆𑀜𑀢𑀺, 𑀧𑀘𑁆𑀙𑀺𑀫𑀸𑀬 𑀪𑀺𑀢𑁆𑀢𑀺𑀬𑀸 𑀅𑀘𑁆𑀘𑀺 𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀸𑀬 𑀪𑀺𑀢𑁆𑀢𑀺𑀬𑀸 𑀧𑀝𑀺𑀳𑀜𑁆𑀜𑀢𑀺, 𑀉𑀢𑁆𑀢𑀭𑀸𑀬 𑀪𑀺𑀢𑁆𑀢𑀺𑀬𑀸 𑀅𑀘𑁆𑀘𑀺 𑀉𑀝𑁆𑀞𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀸𑀬 𑀪𑀺𑀢𑁆𑀢𑀺𑀬𑀸 𑀧𑀝𑀺𑀳𑀜𑁆𑀜𑀢𑀺, 𑀤𑀓𑁆𑀔𑀺𑀡𑀸𑀬 𑀪𑀺𑀢𑁆𑀢𑀺𑀬𑀸 𑀅𑀘𑁆𑀘𑀺 𑀉𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀸𑀬 𑀪𑀺𑀢𑁆𑀢𑀺𑀬𑀸 𑀧𑀝𑀺𑀳𑀜𑁆𑀜𑀢𑀺, 𑀳𑁂𑀝𑁆𑀞𑀸 𑀅𑀘𑁆𑀘𑀺 𑀉𑀝𑁆𑀞𑀳𑀺𑀢𑁆𑀯𑀸 𑀉𑀧𑀭𑀺 𑀧𑀝𑀺𑀳𑀜𑁆𑀜𑀢𑀺, 𑀉𑀧𑀭𑀺𑀢𑁄 𑀅𑀘𑁆𑀘𑀺 𑀉𑀝𑁆𑀞𑀳𑀺𑀢𑁆𑀯𑀸 𑀳𑁂𑀝𑁆𑀞𑀸 𑀧𑀝𑀺𑀳𑀜𑁆𑀜𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀲𑁆𑀲 𑀫𑀳𑀸𑀦𑀺𑀭𑀬𑀲𑁆𑀲 𑀧𑀼𑀭𑀢𑁆𑀣𑀺𑀫𑀁 𑀤𑁆𑀯𑀸𑀭𑀁 𑀅𑀧𑀸𑀧𑀼𑀭𑀻𑀬𑀢𑀺 [𑀅𑀯𑀸𑀧𑀼𑀭𑀻𑀬𑀢𑀺 (𑀲𑀻.)]. 𑀲𑁄 𑀢𑀢𑁆𑀣 𑀲𑀻𑀖𑁂𑀦 𑀚𑀯𑁂𑀦 𑀥𑀸𑀯𑀢𑀺. 𑀢𑀲𑁆𑀲 𑀲𑀻𑀖𑁂𑀦 𑀚𑀯𑁂𑀦 𑀥𑀸𑀯𑀢𑁄 𑀙𑀯𑀺𑀫𑁆𑀧𑀺 𑀟𑀬𑁆𑀳𑀢𑀺, 𑀘𑀫𑁆𑀫𑀫𑁆𑀧𑀺 𑀟𑀬𑁆𑀳𑀢𑀺, 𑀫𑀁𑀲𑀫𑁆𑀧𑀺 𑀟𑀬𑁆𑀳𑀢𑀺, 𑀦𑁆𑀳𑀸𑀭𑀼𑀫𑁆𑀧𑀺 𑀟𑀬𑁆𑀳𑀢𑀺, 𑀅𑀝𑁆𑀞𑀻𑀦𑀺𑀧𑀺 𑀲𑀫𑁆𑀧𑀥𑀽𑀧𑀸𑀬𑀦𑁆𑀢𑀺, 𑀉𑀩𑁆𑀪𑀢𑀁 𑀢𑀸𑀤𑀺𑀲𑀫𑁂𑀯 𑀳𑁄𑀢𑀺. 𑀬𑀢𑁄 𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀳𑀼𑀲𑀫𑁆𑀧𑀢𑁆𑀢𑁄 𑀳𑁄𑀢𑀺, 𑀅𑀣 𑀢𑀁 𑀤𑁆𑀯𑀸𑀭𑀁 𑀧𑀺𑀥𑀻𑀬𑀢𑀺 [𑀧𑀺𑀣𑀻𑀬𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀲𑁆𑀲 𑀫𑀳𑀸𑀦𑀺𑀭𑀬𑀲𑁆𑀲 𑀧𑀘𑁆𑀙𑀺𑀫𑀁 𑀤𑁆𑀯𑀸𑀭𑀁 𑀅𑀧𑀸𑀧𑀼𑀭𑀻𑀬𑀢𑀺…𑀧𑁂… 𑀉𑀢𑁆𑀢𑀭𑀁 𑀤𑁆𑀯𑀸𑀭𑀁 𑀅𑀧𑀸𑀧𑀼𑀭𑀻𑀬𑀢𑀺…𑀧𑁂… 𑀤𑀓𑁆𑀔𑀺𑀡𑀁 𑀤𑁆𑀯𑀸𑀭𑀁 𑀅𑀧𑀸𑀧𑀼𑀭𑀻𑀬𑀢𑀺. 𑀲𑁄 𑀢𑀢𑁆𑀣 𑀲𑀻𑀖𑁂𑀦 𑀚𑀯𑁂𑀦 𑀥𑀸𑀯𑀢𑀺. 𑀢𑀲𑁆𑀲 𑀲𑀻𑀖𑁂𑀦 𑀚𑀯𑁂𑀦 𑀥𑀸𑀯𑀢𑁄 𑀙𑀯𑀺𑀫𑁆𑀧𑀺 𑀟𑀬𑁆𑀳𑀢𑀺, 𑀘𑀫𑁆𑀫𑀫𑁆𑀧𑀺 𑀟𑀬𑁆𑀳𑀢𑀺, 𑀫𑀁𑀲𑀫𑁆𑀧𑀺 𑀟𑀬𑁆𑀳𑀢𑀺, 𑀦𑁆𑀳𑀸𑀭𑀼𑀫𑁆𑀧𑀺 𑀟𑀬𑁆𑀳𑀢𑀺, 𑀅𑀝𑁆𑀞𑀻𑀦𑀺𑀧𑀺 𑀲𑀫𑁆𑀧𑀥𑀽𑀧𑀸𑀬𑀦𑁆𑀢𑀺, 𑀉𑀩𑁆𑀪𑀢𑀁 𑀢𑀸𑀤𑀺𑀲𑀫𑁂𑀯 𑀳𑁄𑀢𑀺. 𑀬𑀢𑁄 𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀳𑀼𑀲𑀫𑁆𑀧𑀢𑁆𑀢𑁄 𑀳𑁄𑀢𑀺, 𑀅𑀣 𑀢𑀁 𑀤𑁆𑀯𑀸𑀭𑀁 𑀧𑀺𑀥𑀻𑀬𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀲𑁆𑀲 𑀫𑀳𑀸𑀦𑀺𑀭𑀬𑀲𑁆𑀲 𑀧𑀼𑀭𑀢𑁆𑀣𑀺𑀫𑀁 𑀤𑁆𑀯𑀸𑀭𑀁 𑀅𑀧𑀸𑀧𑀼𑀭𑀻𑀬𑀢𑀺. 𑀲𑁄 𑀢𑀢𑁆𑀣 𑀲𑀻𑀖𑁂𑀦 𑀚𑀯𑁂𑀦 𑀥𑀸𑀯𑀢𑀺. 𑀢𑀲𑁆𑀲 𑀲𑀻𑀖𑁂𑀦 𑀚𑀯𑁂𑀦 𑀥𑀸𑀯𑀢𑁄 𑀙𑀯𑀺𑀫𑁆𑀧𑀺 𑀟𑀬𑁆𑀳𑀢𑀺, 𑀘𑀫𑁆𑀫𑀫𑁆𑀧𑀺 𑀟𑀬𑁆𑀳𑀢𑀺, 𑀫𑀁𑀲𑀫𑁆𑀧𑀺 𑀟𑀬𑁆𑀳𑀢𑀺, 𑀦𑁆𑀳𑀸𑀭𑀼𑀫𑁆𑀧𑀺 𑀟𑀬𑁆𑀳𑀢𑀺, 𑀅𑀝𑁆𑀞𑀻𑀦𑀺𑀧𑀺 𑀲𑀫𑁆𑀧𑀥𑀽𑀧𑀸𑀬𑀦𑁆𑀢𑀺, 𑀉𑀩𑁆𑀪𑀢𑀁 𑀢𑀸𑀤𑀺𑀲𑀫𑁂𑀯 𑀳𑁄𑀢𑀺. 𑀲𑁄 𑀢𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀢𑀺.

𑁨𑁬𑁯. ‘‘𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀦𑀺𑀭𑀬𑀲𑁆𑀲 𑀲𑀫𑀦𑀦𑁆𑀢𑀭𑀸 𑀲𑀳𑀺𑀢𑀫𑁂𑀯 𑀫𑀳𑀦𑁆𑀢𑁄 𑀕𑀽𑀣𑀦𑀺𑀭𑀬𑁄. 𑀲𑁄 𑀢𑀢𑁆𑀣 𑀧𑀢𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀕𑀽𑀣𑀦𑀺𑀭𑀬𑁂 𑀲𑀽𑀘𑀺𑀫𑀼𑀔𑀸 𑀧𑀸𑀡𑀸 𑀙𑀯𑀺𑀁 𑀙𑀺𑀦𑁆𑀤𑀦𑁆𑀢𑀺, 𑀙𑀯𑀺𑀁 𑀙𑁂𑀢𑁆𑀯𑀸 𑀘𑀫𑁆𑀫𑀁 𑀙𑀺𑀦𑁆𑀤𑀦𑁆𑀢𑀺, 𑀘𑀫𑁆𑀫𑀁 𑀙𑁂𑀢𑁆𑀯𑀸 𑀫𑀁𑀲𑀁 𑀙𑀺𑀦𑁆𑀤𑀦𑁆𑀢𑀺, 𑀫𑀁𑀲𑀁 𑀙𑁂𑀢𑁆𑀯𑀸 𑀦𑁆𑀳𑀸𑀭𑀼𑀁 𑀙𑀺𑀦𑁆𑀤𑀦𑁆𑀢𑀺, 𑀦𑁆𑀳𑀸𑀭𑀼𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀁 𑀙𑀺𑀦𑁆𑀤𑀦𑁆𑀢𑀺, 𑀅𑀝𑁆𑀞𑀺𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀔𑀸𑀤𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀕𑀽𑀣𑀦𑀺𑀭𑀬𑀲𑁆𑀲 𑀲𑀫𑀦𑀦𑁆𑀢𑀭𑀸 𑀲𑀳𑀺𑀢𑀫𑁂𑀯 𑀫𑀳𑀦𑁆𑀢𑁄 𑀓𑀼𑀓𑁆𑀓𑀼𑀮𑀦𑀺𑀭𑀬𑁄. 𑀲𑁄 𑀢𑀢𑁆𑀣 𑀧𑀢𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀮𑀦𑀺𑀭𑀬𑀲𑁆𑀲 𑀲𑀫𑀦𑀦𑁆𑀢𑀭𑀸 𑀲𑀳𑀺𑀢𑀫𑁂𑀯 𑀫𑀳𑀦𑁆𑀢𑀁 𑀲𑀺𑀫𑁆𑀩𑀮𑀺𑀯𑀦𑀁 𑀉𑀤𑁆𑀥𑀁 [𑀉𑀘𑁆𑀘𑀁 (𑀲𑁆𑀬𑀸. 𑀓𑀁.), 𑀉𑀩𑁆𑀪𑀢𑁄 (𑀓.)] 𑀬𑁄𑀚𑀦𑀫𑀼𑀕𑁆𑀕𑀢𑀁 𑀲𑁄𑀴𑀲𑀗𑁆𑀕𑀼𑀮𑀓𑀡𑁆𑀝𑀓𑀁 [𑀲𑁄𑀴𑀲𑀗𑁆𑀕𑀼𑀮𑀓𑀡𑁆𑀟𑀓𑀁 (𑀲𑀻.)] 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁. 𑀢𑀢𑁆𑀣 𑀆𑀭𑁄𑀧𑁂𑀦𑁆𑀢𑀺𑀧𑀺 𑀑𑀭𑁄𑀧𑁂𑀦𑁆𑀢𑀺𑀧𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀺𑀫𑁆𑀩𑀮𑀺𑀯𑀦𑀲𑁆𑀲 𑀲𑀫𑀦𑀦𑁆𑀢𑀭𑀸 𑀲𑀳𑀺𑀢𑀫𑁂𑀯 𑀫𑀳𑀦𑁆𑀢𑀁 𑀅𑀲𑀺𑀧𑀢𑁆𑀢𑀯𑀦𑀁. 𑀲𑁄 𑀢𑀢𑁆𑀣 𑀧𑀯𑀺𑀲𑀢𑀺. 𑀢𑀲𑁆𑀲 𑀯𑀸𑀢𑁂𑀭𑀺𑀢𑀸𑀦𑀺 𑀧𑀢𑁆𑀢𑀸𑀦𑀺 𑀧𑀢𑀺𑀢𑀸𑀦𑀺 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀅𑀲𑀺𑀧𑀢𑁆𑀢𑀯𑀦𑀲𑁆𑀲 𑀲𑀫𑀦𑀦𑁆𑀢𑀭𑀸 𑀲𑀳𑀺𑀢𑀫𑁂𑀯 𑀫𑀳𑀢𑀻 𑀔𑀸𑀭𑁄𑀤𑀓𑀸 𑀦𑀤𑀻 [𑀔𑀸𑀭𑁄𑀤𑀺𑀓𑀸 𑀦𑀤𑀻 (𑀲𑀻.)]. 𑀲𑁄 𑀢𑀢𑁆𑀣 𑀧𑀢𑀢𑀺. 𑀲𑁄 𑀢𑀢𑁆𑀣 𑀅𑀦𑀼𑀲𑁄𑀢𑀫𑁆𑀧𑀺 𑀯𑀼𑀬𑁆𑀳𑀢𑀺, 𑀧𑀝𑀺𑀲𑁄𑀢𑀫𑁆𑀧𑀺 𑀯𑀼𑀬𑁆𑀳𑀢𑀺, 𑀅𑀦𑀼𑀲𑁄𑀢𑀧𑀝𑀺𑀲𑁄𑀢𑀫𑁆𑀧𑀺 𑀯𑀼𑀬𑁆𑀳𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

𑁨𑁭𑁦. ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀩𑀮𑀺𑀲𑁂𑀦 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀺𑀁 𑀇𑀘𑁆𑀙𑀲𑀻’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀚𑀺𑀖𑀘𑁆𑀙𑀺𑀢𑁄𑀲𑁆𑀫𑀺, 𑀪𑀦𑁆𑀢𑁂’𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀢𑀢𑁆𑀢𑁂𑀦 𑀅𑀬𑁄𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀢𑀢𑁆𑀢𑀁 𑀮𑁄𑀳𑀕𑀼𑀴𑀁 𑀫𑀼𑀔𑁂 𑀧𑀓𑁆𑀔𑀺𑀧𑀦𑁆𑀢𑀺 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁. 𑀲𑁄 𑀢𑀲𑁆𑀲 [𑀢𑀁 𑀢𑀲𑁆𑀲 (𑀓.), 𑀢𑀲𑁆𑀲 (𑀲𑀻. 𑀧𑀻.)] 𑀑𑀝𑁆𑀞𑀫𑁆𑀧𑀺 𑀤𑀳𑀢𑀺 [𑀟𑀬𑁆𑀳𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀫𑀼𑀔𑀫𑁆𑀧𑀺 𑀤𑀳𑀢𑀺, 𑀓𑀡𑁆𑀞𑀫𑁆𑀧𑀺 𑀤𑀳𑀢𑀺, 𑀉𑀭𑀫𑁆𑀧𑀺 [𑀉𑀤𑀭𑀫𑁆𑀧𑀺 (𑀲𑀻. 𑀲𑁆𑀬𑀸. 𑀓𑀁.)] 𑀤𑀳𑀢𑀺, 𑀅𑀦𑁆𑀢𑀫𑁆𑀧𑀺 𑀅𑀦𑁆𑀢𑀕𑀼𑀡𑀫𑁆𑀧𑀺 𑀆𑀤𑀸𑀬 𑀅𑀥𑁄𑀪𑀸𑀕𑀸 𑀦𑀺𑀓𑁆𑀔𑀫𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀺𑀁 𑀇𑀘𑁆𑀙𑀲𑀻’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀧𑀺𑀧𑀸𑀲𑀺𑀢𑁄𑀲𑁆𑀫𑀺, 𑀪𑀦𑁆𑀢𑁂’𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀢𑀢𑁆𑀢𑁂𑀦 𑀅𑀬𑁄𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀢𑀢𑁆𑀢𑀁 𑀢𑀫𑁆𑀩𑀮𑁄𑀳𑀁 𑀫𑀼𑀔𑁂 𑀆𑀲𑀺𑀜𑁆𑀘𑀦𑁆𑀢𑀺 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁. 𑀢𑀁 𑀢𑀲𑁆𑀲 [𑀏𑀢𑁆𑀣 𑀧𑀦 𑀧𑀸𑀞𑀪𑁂𑀤𑁄 𑀦𑀢𑁆𑀣𑀺] 𑀑𑀝𑁆𑀞𑀫𑁆𑀧𑀺 𑀤𑀳𑀢𑀺, 𑀫𑀼𑀔𑀫𑁆𑀧𑀺 𑀤𑀳𑀢𑀺, 𑀓𑀡𑁆𑀞𑀫𑁆𑀧𑀺 𑀤𑀳𑀢𑀺, 𑀉𑀭𑀫𑁆𑀧𑀺 𑀤𑀳𑀢𑀺, 𑀅𑀦𑁆𑀢𑀫𑁆𑀧𑀺 𑀅𑀦𑁆𑀢𑀕𑀼𑀡𑀫𑁆𑀧𑀺 𑀆𑀤𑀸𑀬 𑀅𑀥𑁄𑀪𑀸𑀕𑀸 𑀦𑀺𑀓𑁆𑀔𑀫𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺, 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀧𑀼𑀦 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺.

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀬𑀫𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀓𑀺𑀭, 𑀪𑁄, 𑀮𑁄𑀓𑁂 𑀧𑀸𑀧𑀓𑀸𑀦𑀺 𑀅𑀓𑀼𑀲𑀮𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑀢𑁂 𑀏𑀯𑀭𑀽𑀧𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀭𑀻𑀬𑀦𑁆𑀢𑀺. 𑀅𑀳𑁄 𑀯𑀢𑀸𑀳𑀁 𑀫𑀦𑀼𑀲𑁆𑀲𑀢𑁆𑀢𑀁 𑀮𑀪𑁂𑀬𑁆𑀬𑀁. 𑀢𑀣𑀸𑀕𑀢𑁄 𑀘 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀢𑀜𑁆𑀘𑀸𑀳𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀁. 𑀲𑁄 𑀘 𑀫𑁂 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬. 𑀢𑀲𑁆𑀲 𑀘𑀸𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀆𑀚𑀸𑀦𑁂𑀬𑁆𑀬’𑀦𑁆𑀢𑀺. 𑀢𑀁 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀦𑀸𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀲𑀼𑀢𑁆𑀯𑀸 𑀯𑀤𑀸𑀫𑀺, 𑀅𑀧𑀺 𑀘 𑀬𑀤𑁂𑀯 𑀲𑀸𑀫𑀁 𑀜𑀸𑀢𑀁 𑀲𑀸𑀫𑀁 𑀤𑀺𑀝𑁆𑀞𑀁 𑀲𑀸𑀫𑀁 𑀯𑀺𑀤𑀺𑀢𑀁 𑀢𑀤𑁂𑀯𑀸𑀳𑀁 𑀯𑀤𑀸𑀫𑀻’’𑀢𑀺.

𑁨𑁭𑁧. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 [𑀇𑀤𑀁 𑀯𑀢𑁆𑀯𑀸 (𑀲𑀻. 𑀧𑀻.) 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀘𑁄𑀤𑀺𑀢𑀸 𑀤𑁂𑀯𑀤𑀽𑀢𑁂𑀳𑀺, 𑀬𑁂 𑀧𑀫𑀚𑁆𑀚𑀦𑁆𑀢𑀺 𑀫𑀸𑀡𑀯𑀸;

𑀢𑁂 𑀤𑀻𑀖𑀭𑀢𑁆𑀢𑀁 𑀲𑁄𑀘𑀦𑁆𑀢𑀺, 𑀳𑀻𑀦𑀓𑀸𑀬𑀽𑀧𑀕𑀸 𑀦𑀭𑀸.

‘‘𑀬𑁂 𑀘 𑀔𑁄 𑀤𑁂𑀯𑀤𑀽𑀢𑁂𑀳𑀺, 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀇𑀥;

𑀘𑁄𑀤𑀺𑀢𑀸 𑀦𑀧𑁆𑀧𑀫𑀚𑁆𑀚𑀦𑁆𑀢𑀺, 𑀅𑀭𑀺𑀬𑀥𑀫𑁆𑀫𑁂 𑀓𑀼𑀤𑀸𑀘𑀦𑀁.

‘‘𑀉𑀧𑀸𑀤𑀸𑀦𑁂 𑀪𑀬𑀁 𑀤𑀺𑀲𑁆𑀯𑀸, 𑀚𑀸𑀢𑀺𑀫𑀭𑀡𑀲𑀫𑁆𑀪𑀯𑁂;

𑀅𑀦𑀼𑀧𑀸𑀤𑀸 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑁂.

‘‘𑀢𑁂 𑀔𑁂𑀫𑀧𑁆𑀧𑀢𑁆𑀢𑀸 𑀲𑀼𑀔𑀺𑀦𑁄, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢𑀸, 𑀲𑀩𑁆𑀩𑀤𑀼𑀓𑁆𑀔𑀁 [𑀲𑀩𑁆𑀩𑀤𑀼𑀓𑁆𑀔𑀸 (𑀓.)] 𑀉𑀧𑀘𑁆𑀘𑀕𑀼’’𑀦𑁆𑀢𑀺.

𑀤𑁂𑀯𑀤𑀽𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑀲𑀼𑀜𑁆𑀜𑀢𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀢𑀢𑀺𑀬𑁄.