𑁮. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀁

𑁨𑁩𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀫𑁆𑀩𑀺𑀬𑀁 𑀪𑀺𑀓𑁆𑀔𑀽 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀺𑀬𑀁 𑀪𑀺𑀓𑁆𑀔𑀽 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂! 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼; 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂! 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼; 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼; 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑁄𑀲𑀫𑁆𑀩𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀞𑀺𑀢𑀓𑁄𑀯 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁩𑁭. ‘‘𑀧𑀼𑀣𑀼𑀲𑀤𑁆𑀤𑁄 𑀲𑀫𑀚𑀦𑁄, 𑀦 𑀩𑀸𑀮𑁄 𑀓𑁄𑀘𑀺 𑀫𑀜𑁆𑀜𑀣;

𑀲𑀗𑁆𑀖𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀦𑀸𑀜𑁆𑀜𑀁 𑀪𑀺𑀬𑁆𑀬𑁄 𑀅𑀫𑀜𑁆𑀜𑀭𑀼𑀁.

‘‘𑀧𑀭𑀺𑀫𑀼𑀝𑁆𑀞𑀸 𑀧𑀡𑁆𑀟𑀺𑀢𑀸𑀪𑀸𑀲𑀸, 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄;

𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀁, 𑀬𑁂𑀦 𑀦𑀻𑀢𑀸 𑀦 𑀢𑀁 𑀯𑀺𑀤𑀽.

‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦 𑀲𑀫𑁆𑀫𑀢𑀺.

‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀽𑀧𑀲𑀫𑁆𑀫𑀢𑀺.

‘‘𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦𑀁;

𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀺, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

‘‘𑀅𑀝𑁆𑀞𑀺𑀘𑁆𑀙𑀺𑀦𑁆𑀦𑀸 𑀧𑀸𑀡𑀳𑀭𑀸, 𑀕𑀯𑀲𑁆𑀲𑀥𑀦𑀳𑀸𑀭𑀺𑀦𑁄;

𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀫𑀸𑀦𑀸𑀦𑀁, 𑀢𑁂𑀲𑀫𑁆𑀧𑀺 𑀳𑁄𑀢𑀺 𑀲𑀗𑁆𑀕𑀢𑀺;

𑀓𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀦𑁄 𑀲𑀺𑀬𑀸.

‘‘𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁,

𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺,

𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

‘‘𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁,

𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬,

𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

‘‘𑀏𑀓𑀲𑁆𑀲 𑀘𑀭𑀺𑀢𑀁 𑀲𑁂𑀬𑁆𑀬𑁄, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸;

𑀏𑀓𑁄 𑀘𑀭𑁂 𑀦 𑀘 𑀧𑀸𑀧𑀸𑀦𑀺 𑀓𑀬𑀺𑀭𑀸,

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄’’𑀢𑀺.

𑁨𑁩𑁮. 𑀅𑀣 𑀔𑁄 𑀪𑀕𑀯𑀸 𑀞𑀺𑀢𑀓𑁄𑀯 𑀇𑀫𑀸 𑀕𑀸𑀣𑀸 𑀪𑀸𑀲𑀺𑀢𑁆𑀯𑀸 𑀬𑁂𑀦 𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑁄 [𑀩𑀸𑀮𑀓𑀮𑁄𑀡𑀓𑀕𑀸𑀫𑁄 (𑀓.), 𑀢𑀣𑀸 𑀯𑀺𑀦𑀬𑁂𑀧𑀺] 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀪𑀕𑀼 𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑁂 𑀯𑀺𑀳𑀭𑀢𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀪𑀕𑀼 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺 𑀉𑀤𑀓𑀜𑁆𑀘 𑀧𑀸𑀤𑀸𑀦𑀁 𑀥𑁄𑀯𑀦𑀁 [𑀉𑀤𑀓𑀜𑁆𑀘 𑀧𑀸𑀤𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀪𑀕𑀼 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀪𑀕𑀼𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀲𑀻’’𑀢𑀺? ‘‘𑀔𑀫𑀦𑀻𑀬𑀁 𑀪𑀕𑀯𑀸, 𑀬𑀸𑀧𑀦𑀻𑀬𑀁 𑀪𑀕𑀯𑀸, 𑀦 𑀘𑀸𑀳𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀸𑀫𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀪𑀕𑀼𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀧𑀸𑀘𑀻𑀦𑀯𑀁𑀲𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 [𑀪𑀤𑁆𑀤𑀺𑀬𑁄 (𑀫. 𑀦𑀺. 𑁨.𑁧𑁬𑁬 𑀦𑀴𑀓𑀧𑀸𑀦𑁂] 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 [𑀓𑀺𑀫𑁆𑀩𑀺𑀮𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀯𑀺𑀳𑀭𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀤𑀸𑀬𑀧𑀸𑀮𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀫𑀳𑀸𑀲𑀫𑀡, 𑀏𑀢𑀁 𑀤𑀸𑀬𑀁 𑀧𑀸𑀯𑀺𑀲𑀺. 𑀲𑀦𑁆𑀢𑁂𑀢𑁆𑀣 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀢𑁆𑀢𑀓𑀸𑀫𑀭𑀽𑀧𑀸 𑀯𑀺𑀳𑀭𑀦𑁆𑀢𑀺. 𑀫𑀸 𑀢𑁂𑀲𑀁 𑀅𑀨𑀸𑀲𑀼𑀫𑀓𑀸𑀲𑀻’’𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑀸𑀬𑀧𑀸𑀮𑀲𑁆𑀲 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀲𑁆𑀲. 𑀲𑀼𑀢𑁆𑀯𑀸𑀦 𑀤𑀸𑀬𑀧𑀸𑀮𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀆𑀯𑀼𑀲𑁄 𑀤𑀸𑀬𑀧𑀸𑀮, 𑀪𑀕𑀯𑀦𑁆𑀢𑀁 𑀯𑀸𑀭𑁂𑀲𑀺. 𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑁨𑁩𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀬𑁂𑀦𑀸𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀬𑁂𑀦𑀸𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀜𑁆𑀘 𑀦𑀦𑁆𑀤𑀺𑀬𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀓𑀺𑀫𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀏𑀓𑁄 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀏𑀓𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀏𑀓𑁄 𑀧𑀸𑀤𑁄𑀤𑀓𑀁 𑀉𑀧𑀝𑁆𑀞𑀧𑁂𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺. 𑀢𑁂𑀧𑀺 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀣𑀸’’𑀢𑀺? ‘‘𑀔𑀫𑀦𑀻𑀬𑀁 𑀪𑀕𑀯𑀸, 𑀬𑀸𑀧𑀦𑀻𑀬𑀁 𑀪𑀕𑀯𑀸, 𑀦 𑀘 𑀫𑀬𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀸𑀫𑀸’’𑀢𑀺. ‘‘𑀓𑀘𑁆𑀘𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀢𑀕𑁆𑀖 𑀫𑀬𑀁, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀅𑀦𑀼𑀭𑀼𑀤𑁆𑀥𑀸, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂 𑀬𑁄𑀳𑀁 𑀏𑀯𑀭𑀽𑀧𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀻’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀼 𑀆𑀬𑀲𑁆𑀫𑀦𑁆𑀢𑁂𑀲𑀼 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘, 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘, 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘. 𑀢𑀲𑁆𑀲, 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦𑀸𑀳𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀸𑀫𑀺. 𑀦𑀸𑀦𑀸 𑀳𑀺 𑀔𑁄 𑀦𑁄, 𑀪𑀦𑁆𑀢𑁂, 𑀓𑀸𑀬𑀸, 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢’’𑀦𑁆𑀢𑀺.

𑀆𑀬𑀲𑁆𑀫𑀸𑀧𑀺 𑀔𑁄 𑀦𑀦𑁆𑀤𑀺𑀬𑁄…𑀧𑁂… 𑀆𑀬𑀲𑁆𑀫𑀸𑀧𑀺 𑀔𑁄 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂 𑀬𑁄𑀳𑀁 𑀏𑀯𑀭𑀽𑀧𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀻’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀼 𑀆𑀬𑀲𑁆𑀫𑀦𑁆𑀢𑁂𑀲𑀼 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘, 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘, 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦𑀸𑀳𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀸𑀫𑀺. 𑀦𑀸𑀦𑀸 𑀳𑀺 𑀔𑁄 𑀦𑁄, 𑀪𑀦𑁆𑀢𑁂, 𑀓𑀸𑀬𑀸, 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢𑀦𑁆𑀢𑀺. 𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺.

𑁨𑁪𑁦. ‘‘𑀲𑀸𑀥𑀼, 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀓𑀘𑁆𑀘𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀢𑀕𑁆𑀖 𑀫𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺, 𑀲𑁄 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀬𑁄 𑀧𑀘𑁆𑀙𑀸 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺 𑁋 𑀲𑀘𑁂 𑀳𑁄𑀢𑀺 𑀪𑀼𑀢𑁆𑀢𑀸𑀯𑀲𑁂𑀲𑁄, 𑀲𑀘𑁂 𑀆𑀓𑀗𑁆𑀔𑀢𑀺, 𑀪𑀼𑀜𑁆𑀚𑀢𑀺; 𑀦𑁄 𑀘𑁂 𑀆𑀓𑀗𑁆𑀔𑀢𑀺, 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀢𑀺 𑀅𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀢𑀺 𑁋 𑀲𑁄 𑀆𑀲𑀦𑀸𑀦𑀺 𑀧𑀝𑀺𑀲𑀸𑀫𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀝𑀺𑀲𑀸𑀫𑁂𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺, 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑀢𑀺. 𑀬𑁄 𑀧𑀲𑁆𑀲𑀢𑀺 𑀧𑀸𑀦𑀻𑀬𑀖𑀝𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑀁 𑀯𑀸 𑀯𑀘𑁆𑀘𑀖𑀝𑀁 𑀯𑀸 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀲𑁄 𑀉𑀧𑀝𑁆𑀞𑀸𑀧𑁂𑀢𑀺. 𑀲𑀘𑀲𑁆𑀲 𑀳𑁄𑀢𑀺 𑀅𑀯𑀺𑀲𑀬𑁆𑀳𑀁, 𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀫 [𑀉𑀧𑀝𑁆𑀞𑀧𑁂𑀢𑀺 (𑀲𑀻.)], 𑀦 𑀢𑁆𑀯𑁂𑀯 𑀫𑀬𑀁, 𑀪𑀦𑁆𑀢𑁂, 𑀢𑀧𑁆𑀧𑀘𑁆𑀘𑀬𑀸 𑀯𑀸𑀘𑀁 𑀪𑀺𑀦𑁆𑀤𑀸𑀫. 𑀧𑀜𑁆𑀘𑀸𑀳𑀺𑀓𑀁 𑀔𑁄 𑀧𑀦 𑀫𑀬𑀁, 𑀪𑀦𑁆𑀢𑁂, 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀦𑀺𑀲𑀻𑀤𑀸𑀫. 𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺.

𑁨𑁪𑁧. ‘‘𑀲𑀸𑀥𑀼, 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀅𑀢𑁆𑀣𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀏𑀯𑀁 𑀅𑀧𑁆𑀧𑀫𑀢𑁆𑀢𑀸𑀦𑀁 𑀆𑀢𑀸𑀧𑀻𑀦𑀁 𑀧𑀳𑀺𑀢𑀢𑁆𑀢𑀸𑀦𑀁 𑀯𑀺𑀳𑀭𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀦𑁆𑀢𑀸 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄 𑀔𑁄 𑀧𑀦 𑀦𑁄 𑀑𑀪𑀸𑀲𑁄 𑀦𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁; 𑀢𑀜𑁆𑀘 𑀦𑀺𑀫𑀺𑀢𑁆𑀢𑀁 𑀦𑀧𑁆𑀧𑀝𑀺𑀯𑀺𑀚𑁆𑀛𑀸𑀫𑀸’’𑀢𑀺.

‘‘𑀢𑀁 𑀔𑁄 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀦𑀺𑀫𑀺𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀁. 𑀅𑀳𑀫𑁆𑀧𑀺 𑀲𑀼𑀤𑀁, 𑀅𑀦𑀼𑀭𑀼𑀤𑁆𑀥𑀸, 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀺𑀲𑀢𑁆𑀢𑁄𑀯 𑀲𑀫𑀸𑀦𑁄 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄 𑀔𑁄 𑀧𑀦 𑀫𑁂 𑀑𑀪𑀸𑀲𑁄 𑀦𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀫𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦’𑀦𑁆𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀯𑀺𑀘𑀺𑀓𑀺𑀘𑁆𑀙𑀸 𑀔𑁄 𑀫𑁂 𑀉𑀤𑀧𑀸𑀤𑀺, 𑀯𑀺𑀘𑀺𑀓𑀺𑀘𑁆𑀙𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’’𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄 𑀔𑁄 𑀧𑀦 𑀫𑁂 𑀑𑀪𑀸𑀲𑁄 𑀦𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀫𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦’𑀦𑁆𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀅𑀫𑀦𑀲𑀺𑀓𑀸𑀭𑁄 𑀔𑁄 𑀫𑁂 𑀉𑀤𑀧𑀸𑀤𑀺, 𑀅𑀫𑀦𑀲𑀺𑀓𑀸𑀭𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦 𑀅𑀫𑀦𑀲𑀺𑀓𑀸𑀭𑁄’’’𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸…𑀧𑁂… 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀣𑀺𑀦𑀫𑀺𑀤𑁆𑀥𑀁 𑀔𑁄 𑀫𑁂 𑀉𑀤𑀧𑀸𑀤𑀺, 𑀣𑀺𑀦𑀫𑀺𑀤𑁆𑀥𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦 𑀅𑀫𑀦𑀲𑀺𑀓𑀸𑀭𑁄 𑀦 𑀣𑀺𑀦𑀫𑀺𑀤𑁆𑀥’’’𑀦𑁆𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸…𑀧𑁂… 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀙𑀫𑁆𑀪𑀺𑀢𑀢𑁆𑀢𑀁 𑀔𑁄 𑀫𑁂 𑀉𑀤𑀧𑀸𑀤𑀺, 𑀙𑀫𑁆𑀪𑀺𑀢𑀢𑁆𑀢𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀅𑀦𑀼𑀭𑀼𑀤𑁆𑀥𑀸, 𑀧𑀼𑀭𑀺𑀲𑁄 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄, 𑀢𑀲𑁆𑀲 𑀉𑀪𑀢𑁄𑀧𑀲𑁆𑀲𑁂 𑀯𑀝𑁆𑀝𑀓𑀸 [𑀯𑀥𑀓𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀉𑀧𑁆𑀧𑀢𑁂𑀬𑁆𑀬𑀼𑀁, 𑀢𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀙𑀫𑁆𑀪𑀺𑀢𑀢𑁆𑀢𑀁 𑀉𑀧𑁆𑀧𑀚𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀫𑁂, 𑀅𑀦𑀼𑀭𑀼𑀤𑁆𑀥𑀸, 𑀙𑀫𑁆𑀪𑀺𑀢𑀢𑁆𑀢𑀁 𑀉𑀤𑀧𑀸𑀤𑀺, 𑀙𑀫𑁆𑀪𑀺𑀢𑀢𑁆𑀢𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦 𑀅𑀫𑀦𑀲𑀺𑀓𑀸𑀭𑁄 𑀦 𑀣𑀺𑀦𑀫𑀺𑀤𑁆𑀥𑀁 𑀦 𑀙𑀫𑁆𑀪𑀺𑀢𑀢𑁆𑀢’’’𑀦𑁆𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸…𑀧𑁂… 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀉𑀧𑁆𑀧𑀺𑀮𑀁 [𑀉𑀩𑁆𑀩𑀺𑀮𑁆𑀮𑀁 (𑀲𑀻. 𑀧𑀻.), 𑀉𑀩𑁆𑀩𑀺𑀮𑀁 (𑀲𑁆𑀬𑀸. 𑀓𑀁.)] 𑀔𑁄 𑀫𑁂 𑀉𑀤𑀧𑀸𑀤𑀺, 𑀉𑀧𑁆𑀧𑀺𑀮𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀅𑀦𑀼𑀭𑀼𑀤𑁆𑀥𑀸, 𑀧𑀼𑀭𑀺𑀲𑁄 𑀏𑀓𑀁 𑀦𑀺𑀥𑀺𑀫𑀼𑀔𑀁 𑀕𑀯𑁂𑀲𑀦𑁆𑀢𑁄 𑀲𑀓𑀺𑀤𑁂𑀯 𑀧𑀜𑁆𑀘𑀦𑀺𑀥𑀺𑀫𑀼𑀔𑀸𑀦𑀺 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀉𑀧𑁆𑀧𑀺𑀮𑀁 𑀉𑀧𑁆𑀧𑀚𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀫𑁂, 𑀅𑀦𑀼𑀭𑀼𑀤𑁆𑀥𑀸, 𑀉𑀧𑁆𑀧𑀺𑀮𑀁 𑀉𑀤𑀧𑀸𑀤𑀺, 𑀉𑀧𑁆𑀧𑀺𑀮𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀅𑀫𑀦𑀲𑀺𑀓𑀸𑀭𑁄, 𑀦 𑀣𑀺𑀦𑀫𑀺𑀤𑁆𑀥𑀁, 𑀦 𑀙𑀫𑁆𑀪𑀺𑀢𑀢𑁆𑀢𑀁, 𑀦 𑀉𑀧𑁆𑀧𑀺𑀮’’’𑀦𑁆𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸…𑀧𑁂… 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀤𑀼𑀝𑁆𑀞𑀼𑀮𑁆𑀮𑀁 𑀔𑁄 𑀫𑁂 𑀉𑀤𑀧𑀸𑀤𑀺, 𑀤𑀼𑀝𑁆𑀞𑀼𑀮𑁆𑀮𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀅𑀫𑀦𑀲𑀺𑀓𑀸𑀭𑁄, 𑀦 𑀣𑀺𑀦𑀫𑀺𑀤𑁆𑀥𑀁, 𑀦 𑀙𑀫𑁆𑀪𑀺𑀢𑀢𑁆𑀢𑀁, 𑀦 𑀉𑀧𑁆𑀧𑀺𑀮𑀁, 𑀦 𑀤𑀼𑀝𑁆𑀞𑀼𑀮𑁆𑀮’’’𑀦𑁆𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸…𑀧𑁂… 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀔𑁄 𑀫𑁂 𑀉𑀤𑀧𑀸𑀤𑀺, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀅𑀦𑀼𑀭𑀼𑀤𑁆𑀥𑀸, 𑀧𑀼𑀭𑀺𑀲𑁄 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀯𑀝𑁆𑀝𑀓𑀁 𑀕𑀸𑀴𑁆𑀳𑀁 𑀕𑀡𑁆𑀳𑁂𑀬𑁆𑀬, 𑀲𑁄 𑀢𑀢𑁆𑀣𑁂𑀯 𑀧𑀢𑀫𑁂𑀬𑁆𑀬 [𑀫𑀢𑀫𑁂𑀬𑁆𑀬 (𑀩𑀳𑀽𑀲𑀼) 𑀧 + 𑀢𑀁 + 𑀏𑀬𑁆𑀬 = 𑀧𑀢𑀫𑁂𑀬𑁆𑀬-𑀇𑀢𑀺 𑀧𑀤𑀯𑀺𑀪𑀸𑀕𑁄]; 𑀏𑀯𑀫𑁂𑀯 𑀔𑁄 𑀫𑁂, 𑀅𑀦𑀼𑀭𑀼𑀤𑁆𑀥𑀸, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀉𑀤𑀧𑀸𑀤𑀺, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀅𑀫𑀦𑀲𑀺𑀓𑀸𑀭𑁄, 𑀦 𑀣𑀺𑀦𑀫𑀺𑀤𑁆𑀥𑀁, 𑀦 𑀙𑀫𑁆𑀪𑀺𑀢𑀢𑁆𑀢𑀁, 𑀦 𑀉𑀧𑁆𑀧𑀺𑀮𑀁, 𑀦 𑀤𑀼𑀝𑁆𑀞𑀼𑀮𑁆𑀮𑀁, 𑀦 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬’’’𑀦𑁆𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸…𑀧𑁂… 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀔𑁄 𑀫𑁂 𑀉𑀤𑀧𑀸𑀤𑀺, 𑀅𑀢𑀺𑀮𑀻𑀦𑀯𑀻𑀭𑀺𑀬𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀅𑀦𑀼𑀭𑀼𑀤𑁆𑀥𑀸, 𑀧𑀼𑀭𑀺𑀲𑁄 𑀯𑀝𑁆𑀝𑀓𑀁 𑀲𑀺𑀣𑀺𑀮𑀁 𑀕𑀡𑁆𑀳𑁂𑀬𑁆𑀬, 𑀲𑁄 𑀢𑀲𑁆𑀲 𑀳𑀢𑁆𑀣𑀢𑁄 𑀉𑀧𑁆𑀧𑀢𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀫𑁂, 𑀅𑀦𑀼𑀭𑀼𑀤𑁆𑀥𑀸, 𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀉𑀤𑀧𑀸𑀤𑀺, 𑀅𑀢𑀺𑀮𑀻𑀦𑀯𑀻𑀭𑀺𑀬𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀅𑀫𑀦𑀲𑀺𑀓𑀸𑀭𑁄, 𑀦 𑀣𑀺𑀦𑀫𑀺𑀤𑁆𑀥𑀁, 𑀦 𑀙𑀫𑁆𑀪𑀺𑀢𑀢𑁆𑀢𑀁, 𑀦 𑀉𑀧𑁆𑀧𑀺𑀮𑀁, 𑀦 𑀤𑀼𑀝𑁆𑀞𑀼𑀮𑁆𑀮𑀁, 𑀦 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁, 𑀦 𑀅𑀢𑀺𑀮𑀻𑀦𑀯𑀻𑀭𑀺𑀬’’’𑀦𑁆𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸…𑀧𑁂… 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀅𑀪𑀺𑀚𑀧𑁆𑀧𑀸 𑀔𑁄 𑀫𑁂 𑀉𑀤𑀧𑀸𑀤𑀺, 𑀅𑀪𑀺𑀚𑀧𑁆𑀧𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀅𑀫𑀦𑀲𑀺𑀓𑀸𑀭𑁄, 𑀦 𑀣𑀺𑀦𑀫𑀺𑀤𑁆𑀥𑀁, 𑀦 𑀙𑀫𑁆𑀪𑀺𑀢𑀢𑁆𑀢𑀁, 𑀦 𑀉𑀧𑁆𑀧𑀺𑀮𑀁, 𑀦 𑀤𑀼𑀝𑁆𑀞𑀼𑀮𑁆𑀮𑀁, 𑀦 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁, 𑀦 𑀅𑀢𑀺𑀮𑀻𑀦𑀯𑀻𑀭𑀺𑀬𑀁, 𑀦 𑀅𑀪𑀺𑀚𑀧𑁆𑀧𑀸’’’𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸…𑀧𑁂… 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀦𑀸𑀦𑀢𑁆𑀢𑀲𑀜𑁆𑀜𑀸 𑀔𑁄 𑀫𑁂 𑀉𑀤𑀧𑀸𑀤𑀺, 𑀦𑀸𑀦𑀢𑁆𑀢𑀲𑀜𑁆𑀜𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀅𑀫𑀦𑀲𑀺𑀓𑀸𑀭𑁄, 𑀦 𑀣𑀺𑀦𑀫𑀺𑀤𑁆𑀥𑀁, 𑀦 𑀙𑀫𑁆𑀪𑀺𑀢𑀢𑁆𑀢𑀁, 𑀦 𑀉𑀧𑁆𑀧𑀺𑀮𑀁, 𑀦 𑀤𑀼𑀝𑁆𑀞𑀼𑀮𑁆𑀮𑀁, 𑀦 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁, 𑀦 𑀅𑀢𑀺𑀮𑀻𑀦𑀯𑀻𑀭𑀺𑀬𑀁, 𑀦 𑀅𑀪𑀺𑀚𑀧𑁆𑀧𑀸, 𑀦 𑀦𑀸𑀦𑀢𑁆𑀢𑀲𑀜𑁆𑀜𑀸’’’𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄 𑀔𑁄 𑀧𑀦 𑀫𑁂 𑀑𑀪𑀸𑀲𑁄 𑀦𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀢𑀲𑁆𑀲 𑀫𑀬𑁆𑀳𑀁 𑀅𑀦𑀼𑀭𑀼𑀤𑁆𑀥𑀸 𑀏𑀢𑀤𑀳𑁄𑀲𑀺 𑁋 ‘𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀫𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀔𑁄 𑀫𑁂 𑀭𑀽𑀧𑀸𑀦𑀁 𑀉𑀤𑀧𑀸𑀤𑀺, 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀭𑀽𑀧𑀸𑀦𑀁 𑀲𑀫𑀸𑀥𑀺 𑀘𑀯𑀺. 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀅𑀫𑀦𑀲𑀺𑀓𑀸𑀭𑁄, 𑀦 𑀣𑀺𑀦𑀫𑀺𑀤𑁆𑀥𑀁, 𑀦 𑀙𑀫𑁆𑀪𑀺𑀢𑀢𑁆𑀢𑀁, 𑀦 𑀉𑀧𑁆𑀧𑀺𑀮𑀁, 𑀦 𑀤𑀼𑀝𑁆𑀞𑀼𑀮𑁆𑀮𑀁, 𑀦 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁, 𑀦 𑀅𑀢𑀺𑀮𑀻𑀦𑀯𑀻𑀭𑀺𑀬𑀁, 𑀦 𑀅𑀪𑀺𑀚𑀧𑁆𑀧𑀸, 𑀦 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀦 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦’’’𑀦𑁆𑀢𑀺.

𑁨𑁪𑁨. ‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸, ‘𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀅𑀫𑀦𑀲𑀺𑀓𑀸𑀭𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀫𑀦𑀲𑀺𑀓𑀸𑀭𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀣𑀺𑀦𑀫𑀺𑀤𑁆𑀥𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀉𑀧𑁆𑀧𑀺𑀮𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀉𑀧𑁆𑀧𑀺𑀮𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀤𑀼𑀝𑁆𑀞𑀼𑀮𑁆𑀮𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀤𑀼𑀝𑁆𑀞𑀼𑀮𑁆𑀮𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀅𑀪𑀺𑀚𑀧𑁆𑀧𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀪𑀺𑀚𑀧𑁆𑀧𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀦𑀸𑀦𑀢𑁆𑀢𑀲𑀜𑁆𑀜𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀦𑀸𑀦𑀢𑁆𑀢𑀲𑀜𑁆𑀜𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁, ‘𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁.

𑁨𑁪𑁩. ‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀜𑁆𑀳𑀺 𑀔𑁄 𑀲𑀜𑁆𑀚𑀸𑀦𑀸𑀫𑀺, 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺; 𑀭𑀽𑀧𑀸𑀦𑀺 𑀳𑀺 𑀔𑁄 𑀧𑀲𑁆𑀲𑀸𑀫𑀺, 𑀦 𑀘 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺 𑁋 ‘𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁, 𑀓𑁂𑀯𑀮𑀫𑁆𑀧𑀺 𑀤𑀺𑀯𑀁 [𑀤𑀺𑀯𑀲𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯𑀁’ [𑀭𑀢𑁆𑀢𑀺𑀤𑀺𑀯𑀁 (𑀓.)]. 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁆𑀯𑀸𑀳𑀁 𑀑𑀪𑀸𑀲𑀜𑁆𑀳𑀺 𑀔𑁄 𑀲𑀜𑁆𑀚𑀸𑀦𑀸𑀫𑀺 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺; 𑀭𑀽𑀧𑀸𑀦𑀺 𑀳𑀺 𑀔𑁄 [𑀔𑁄 𑀢𑀲𑁆𑀫𑀺𑀁 𑀲𑀫𑀬𑁂 (𑀲𑀻. 𑀓.)] 𑀧𑀲𑁆𑀲𑀸𑀫𑀺 𑀦 𑀘 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺 𑁋 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁, 𑀓𑁂𑀯𑀮𑀫𑁆𑀧𑀺 𑀤𑀺𑀯𑀁, 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀬𑀲𑁆𑀫𑀺𑀜𑁆𑀳𑀺 𑀔𑁄 𑀅𑀳𑀁 𑀲𑀫𑀬𑁂 𑀭𑀽𑀧𑀦𑀺𑀫𑀺𑀢𑁆𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀑𑀪𑀸𑀲𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀫𑀺, 𑀑𑀪𑀸𑀲𑀜𑁆𑀳𑀺 𑀔𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀚𑀸𑀦𑀸𑀫𑀺, 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺. 𑀬𑀲𑁆𑀫𑀺𑀁 𑀧𑀦𑀸𑀳𑀁 𑀲𑀫𑀬𑁂 𑀑𑀪𑀸𑀲𑀦𑀺𑀫𑀺𑀢𑁆𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀭𑀽𑀧𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀫𑀺, 𑀭𑀽𑀧𑀸𑀦𑀺 𑀳𑀺 𑀔𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀸𑀫𑀺 𑀦 𑀘 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺 𑁋 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁, 𑀓𑁂𑀯𑀮𑀫𑁆𑀧𑀺 𑀤𑀺𑀯𑀁, 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯’’’𑀦𑁆𑀢𑀺.

‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀧𑀭𑀺𑀢𑁆𑀢𑀜𑁆𑀘𑁂𑀯 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺, 𑀧𑀭𑀺𑀢𑁆𑀢𑀸𑀦𑀺 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺; 𑀅𑀧𑁆𑀧𑀫𑀸𑀡𑀜𑁆𑀘𑁂𑀯 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺, 𑀅𑀧𑁆𑀧𑀫𑀸𑀡𑀸𑀦𑀺 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺 𑁋 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁, 𑀓𑁂𑀯𑀮𑀫𑁆𑀧𑀺 𑀤𑀺𑀯𑀁, 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁆𑀯𑀸𑀳𑀁 𑀧𑀭𑀺𑀢𑁆𑀢𑀜𑁆𑀘𑁂𑀯 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺, 𑀧𑀭𑀺𑀢𑁆𑀢𑀸𑀦𑀺 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺; 𑀅𑀧𑁆𑀧𑀫𑀸𑀡𑀜𑁆𑀘𑁂𑀯 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺, 𑀅𑀧𑁆𑀧𑀫𑀸𑀡𑀸𑀦𑀺 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺 𑁋 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁, 𑀓𑁂𑀯𑀮𑀫𑁆𑀧𑀺 𑀤𑀺𑀯𑀁, 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀬𑀲𑁆𑀫𑀺𑀁 𑀔𑁄 𑀫𑁂 𑀲𑀫𑀬𑁂 𑀧𑀭𑀺𑀢𑁆𑀢𑁄 𑀲𑀫𑀸𑀥𑀺 𑀳𑁄𑀢𑀺, 𑀧𑀭𑀺𑀢𑁆𑀢𑀁 𑀫𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀓𑁆𑀔𑀼 𑀳𑁄𑀢𑀺. 𑀲𑁄𑀳𑀁 𑀧𑀭𑀺𑀢𑁆𑀢𑁂𑀦 𑀘𑀓𑁆𑀔𑀼𑀦𑀸 𑀧𑀭𑀺𑀢𑁆𑀢𑀜𑁆𑀘𑁂𑀯 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺, 𑀧𑀭𑀺𑀢𑁆𑀢𑀸𑀦𑀺 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺. 𑀬𑀲𑁆𑀫𑀺𑀁 𑀧𑀦 𑀫𑁂 𑀲𑀫𑀬𑁂 𑀅𑀧𑁆𑀧𑀫𑀸𑀡𑁄 𑀲𑀫𑀸𑀥𑀺 𑀳𑁄𑀢𑀺, 𑀅𑀧𑁆𑀧𑀫𑀸𑀡𑀁 𑀫𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀓𑁆𑀔𑀼 𑀳𑁄𑀢𑀺. 𑀲𑁄𑀳𑀁 𑀅𑀧𑁆𑀧𑀫𑀸𑀡𑁂𑀦 𑀘𑀓𑁆𑀔𑀼𑀦𑀸 𑀅𑀧𑁆𑀧𑀫𑀸𑀡𑀜𑁆𑀘𑁂𑀯 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺, 𑀅𑀧𑁆𑀧𑀫𑀸𑀡𑀸𑀦𑀺 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺 𑁋 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁, 𑀓𑁂𑀯𑀮𑀫𑁆𑀧𑀺 𑀤𑀺𑀯𑀁, 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯’’’𑀦𑁆𑀢𑀺.

𑁨𑁪𑁪. 𑀬𑀢𑁄 𑀔𑁄 𑀫𑁂, 𑀅𑀦𑀼𑀭𑀼𑀤𑁆𑀥𑀸, ‘𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀅𑀫𑀦𑀲𑀺𑀓𑀸𑀭𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀫𑀦𑀲𑀺𑀓𑀸𑀭𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀣𑀺𑀦𑀫𑀺𑀤𑁆𑀥𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀉𑀧𑁆𑀧𑀺𑀮𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀉𑀧𑁆𑀧𑀺𑀮𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀤𑀼𑀝𑁆𑀞𑀼𑀮𑁆𑀮𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀤𑀼𑀝𑁆𑀞𑀼𑀮𑁆𑀮𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀅𑀪𑀺𑀚𑀧𑁆𑀧𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀪𑀺𑀚𑀧𑁆𑀧𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀦𑀸𑀦𑀢𑁆𑀢𑀲𑀜𑁆𑀜𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀦𑀸𑀦𑀢𑁆𑀢𑀲𑀜𑁆𑀜𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺, ‘𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀅𑀳𑁄𑀲𑀺.

𑁨𑁪𑁫. ‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀫𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀫𑁂 𑀧𑀳𑀻𑀦𑀸. 𑀳𑀦𑁆𑀤, 𑀤𑀸𑀦𑀸𑀳𑀁 𑀢𑀺𑀯𑀺𑀥𑁂𑀦 𑀲𑀫𑀸𑀥𑀺𑀁 𑀪𑀸𑀯𑁂𑀫𑀻’𑀢𑀺 [𑀪𑀸𑀯𑁂𑀲𑀺𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁.)]. 𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥𑀸, 𑀲𑀯𑀺𑀢𑀓𑁆𑀓𑀫𑁆𑀧𑀺 𑀲𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀪𑀸𑀯𑁂𑀲𑀺𑀁 [𑀪𑀸𑀯𑁂𑀫𑀺 (𑀓.)], 𑀅𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀘𑀸𑀭𑀫𑀢𑁆𑀢𑀁 𑀲𑀫𑀸𑀥𑀺𑀁 𑀪𑀸𑀯𑁂𑀲𑀺𑀁, 𑀅𑀯𑀺𑀢𑀓𑁆𑀓𑀫𑁆𑀧𑀺 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀪𑀸𑀯𑁂𑀲𑀺𑀁, 𑀲𑀧𑁆𑀧𑀻𑀢𑀺𑀓𑀫𑁆𑀧𑀺 𑀲𑀫𑀸𑀥𑀺𑀁 𑀪𑀸𑀯𑁂𑀲𑀺𑀁, 𑀦𑀺𑀧𑁆𑀧𑀻𑀢𑀺𑀓𑀫𑁆𑀧𑀺 𑀲𑀫𑀸𑀥𑀺𑀁 𑀪𑀸𑀯𑁂𑀲𑀺𑀁, 𑀲𑀸𑀢𑀲𑀳𑀕𑀢𑀫𑁆𑀧𑀺 𑀲𑀫𑀸𑀥𑀺𑀁 𑀪𑀸𑀯𑁂𑀲𑀺𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁆𑀧𑀺 𑀲𑀫𑀸𑀥𑀺𑀁 𑀪𑀸𑀯𑁂𑀲𑀺𑀁. 𑀬𑀢𑁄 𑀔𑁄 𑀫𑁂, 𑀅𑀦𑀼𑀭𑀼𑀤𑁆𑀥𑀸, 𑀲𑀯𑀺𑀢𑀓𑁆𑀓𑁄𑀧𑀺 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺 𑀪𑀸𑀯𑀺𑀢𑁄 𑀅𑀳𑁄𑀲𑀺, 𑀅𑀯𑀺𑀢𑀓𑁆𑀓𑁄𑀧𑀺 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀪𑀸𑀯𑀺𑀢𑁄 𑀅𑀳𑁄𑀲𑀺, 𑀅𑀯𑀺𑀢𑀓𑁆𑀓𑁄𑀧𑀺 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀪𑀸𑀯𑀺𑀢𑁄 𑀅𑀳𑁄𑀲𑀺, 𑀲𑀧𑁆𑀧𑀻𑀢𑀺𑀓𑁄𑀧𑀺 𑀲𑀫𑀸𑀥𑀺 𑀪𑀸𑀯𑀺𑀢𑁄 𑀅𑀳𑁄𑀲𑀺, 𑀦𑀺𑀧𑁆𑀧𑀻𑀢𑀺𑀓𑁄𑀧𑀺 𑀲𑀫𑀸𑀥𑀺 𑀪𑀸𑀯𑀺𑀢𑁄 𑀅𑀳𑁄𑀲𑀺, 𑀲𑀸𑀢𑀲𑀳𑀕𑀢𑁄𑀧𑀺 𑀲𑀫𑀸𑀥𑀺 𑀪𑀸𑀯𑀺𑀢𑁄 𑀅𑀳𑁄𑀲𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑁄𑀧𑀺 𑀲𑀫𑀸𑀥𑀺 𑀪𑀸𑀯𑀺𑀢𑁄 𑀅𑀳𑁄𑀲𑀺. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺, 𑀅𑀓𑀼𑀧𑁆𑀧𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.