𑁯. 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀲𑀼𑀢𑁆𑀢𑀁

𑁫𑁦𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀏𑀓𑀫𑀺𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑀁 𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀸𑀫𑀺 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀩𑀓𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘𑀇𑀤𑀁 𑀦𑀺𑀘𑁆𑀘𑀁, 𑀇𑀤𑀁 𑀥𑀼𑀯𑀁, 𑀇𑀤𑀁 𑀲𑀲𑁆𑀲𑀢𑀁, 𑀇𑀤𑀁 𑀓𑁂𑀯𑀮𑀁, 𑀇𑀤𑀁 𑀅𑀘𑀯𑀦𑀥𑀫𑁆𑀫𑀁, 𑀇𑀤𑀜𑁆𑀳𑀺 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀇𑀢𑁄 𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀦𑀢𑁆𑀣𑀻’𑀢𑀺. 𑀅𑀣 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀩𑀓𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀉𑀓𑁆𑀓𑀝𑁆𑀞𑀸𑀬𑀁 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺𑀁. 𑀅𑀤𑁆𑀤𑀲𑀸 𑀔𑁄 𑀫𑀁, 𑀪𑀺𑀓𑁆𑀔𑀯𑁂, 𑀩𑀓𑁄 𑀩𑁆𑀭𑀳𑁆𑀫𑀸 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀫𑀁 𑀏𑀢𑀤𑀯𑁄𑀘 𑁋 ‘𑀏𑀳𑀺 𑀔𑁄, 𑀫𑀸𑀭𑀺𑀲, 𑀲𑁆𑀯𑀸𑀕𑀢𑀁, 𑀫𑀸𑀭𑀺𑀲! 𑀘𑀺𑀭𑀲𑁆𑀲𑀁 𑀔𑁄, 𑀫𑀸𑀭𑀺𑀲, 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬. 𑀇𑀤𑀜𑁆𑀳𑀺, 𑀫𑀸𑀭𑀺𑀲, 𑀦𑀺𑀘𑁆𑀘𑀁, 𑀇𑀤𑀁 𑀥𑀼𑀯𑀁, 𑀇𑀤𑀁 𑀲𑀲𑁆𑀲𑀢𑀁, 𑀇𑀤𑀁 𑀓𑁂𑀯𑀮𑀁, 𑀇𑀤𑀁 𑀅𑀘𑀯𑀦𑀥𑀫𑁆𑀫𑀁, 𑀇𑀤𑀜𑁆𑀳𑀺 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺. 𑀇𑀢𑁄 𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀦𑀢𑁆𑀣𑀻’’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀺𑀓𑁆𑀔𑀯𑁂, 𑀩𑀓𑀁 𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘𑀁 𑁋 ‘‘𑀅𑀯𑀺𑀚𑁆𑀚𑀸𑀕𑀢𑁄 𑀯𑀢, 𑀪𑁄, 𑀩𑀓𑁄 𑀩𑁆𑀭𑀳𑁆𑀫𑀸; 𑀅𑀯𑀺𑀚𑁆𑀚𑀸𑀕𑀢𑁄 𑀯𑀢, 𑀪𑁄, 𑀩𑀓𑁄 𑀩𑁆𑀭𑀳𑁆𑀫𑀸; 𑀬𑀢𑁆𑀭 𑀳𑀺 𑀦𑀸𑀫 𑀅𑀦𑀺𑀘𑁆𑀘𑀁𑀬𑁂𑀯 𑀲𑀫𑀸𑀦𑀁 𑀦𑀺𑀘𑁆𑀘𑀦𑁆𑀢𑀺 𑀯𑀓𑁆𑀔𑀢𑀺, 𑀅𑀤𑁆𑀥𑀼𑀯𑀁𑀬𑁂𑀯 𑀲𑀫𑀸𑀦𑀁 𑀥𑀼𑀯𑀦𑁆𑀢𑀺 𑀯𑀓𑁆𑀔𑀢𑀺, 𑀅𑀲𑀲𑁆𑀲𑀢𑀁𑀬𑁂𑀯 𑀲𑀫𑀸𑀦𑀁 𑀲𑀲𑁆𑀲𑀢𑀦𑁆𑀢𑀺 𑀯𑀓𑁆𑀔𑀢𑀺, 𑀅𑀓𑁂𑀯𑀮𑀁𑀬𑁂𑀯 𑀲𑀫𑀸𑀦𑀁 𑀓𑁂𑀯𑀮𑀦𑁆𑀢𑀺 𑀯𑀓𑁆𑀔𑀢𑀺, 𑀘𑀯𑀦𑀥𑀫𑁆𑀫𑀁𑀬𑁂𑀯 𑀲𑀫𑀸𑀦𑀁 𑀅𑀘𑀯𑀦𑀥𑀫𑁆𑀫𑀦𑁆𑀢𑀺 𑀯𑀓𑁆𑀔𑀢𑀺; 𑀬𑀢𑁆𑀣 𑀘 𑀧𑀦 𑀚𑀸𑀬𑀢𑀺 𑀚𑀻𑀬𑀢𑀺 𑀫𑀻𑀬𑀢𑀺 𑀘𑀯𑀢𑀺 𑀉𑀧𑀧𑀚𑁆𑀚𑀢𑀺 𑀢𑀜𑁆𑀘 𑀯𑀓𑁆𑀔𑀢𑀺 𑁋 ‘𑀇𑀤𑀜𑁆𑀳𑀺 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀻’𑀢𑀺; 𑀲𑀦𑁆𑀢𑀜𑁆𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 ‘𑀦𑀢𑁆𑀣𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡’𑀦𑁆𑀢𑀺 𑀯𑀓𑁆𑀔𑀢𑀻’’𑀢𑀺.

𑁫𑁦𑁨. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑁄 𑀧𑀸𑀧𑀺𑀫𑀸 𑀅𑀜𑁆𑀜𑀢𑀭𑀁 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀁 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼, 𑀫𑁂𑀢𑀫𑀸𑀲𑀤𑁄 𑀫𑁂𑀢𑀫𑀸𑀲𑀤𑁄, 𑀏𑀲𑁄 𑀳𑀺, 𑀪𑀺𑀓𑁆𑀔𑀼, 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 [𑀲𑀚𑁆𑀚𑀺𑀢𑀸 (𑀲𑁆𑀬𑀸. 𑀓𑀁. 𑀓.), 𑀲𑀜𑁆𑀚𑀺𑀢𑀸 (𑀲𑀻. 𑀧𑀻.)] 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀁. 𑀅𑀳𑁂𑀲𑀼𑀁 𑀔𑁄 𑀬𑁂, 𑀪𑀺𑀓𑁆𑀔𑀼, 𑀢𑀬𑀸 𑀧𑀼𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀮𑁄𑀓𑀲𑁆𑀫𑀺𑀁 𑀧𑀣𑀯𑀻𑀕𑀭𑀳𑀓𑀸 𑀧𑀣𑀯𑀻𑀚𑀺𑀕𑀼𑀘𑁆𑀙𑀓𑀸, 𑀆𑀧𑀕𑀭𑀳𑀓𑀸 𑀆𑀧𑀚𑀺𑀕𑀼𑀘𑁆𑀙𑀓𑀸, 𑀢𑁂𑀚𑀕𑀭𑀳𑀓𑀸 𑀢𑁂𑀚𑀚𑀺𑀕𑀼𑀘𑁆𑀙𑀓𑀸, 𑀯𑀸𑀬𑀕𑀭𑀳𑀓𑀸 𑀯𑀸𑀬𑀚𑀺𑀕𑀼𑀘𑁆𑀙𑀓𑀸, 𑀪𑀽𑀢𑀕𑀭𑀳𑀓𑀸 𑀪𑀽𑀢𑀚𑀺𑀕𑀼𑀘𑁆𑀙𑀓𑀸, 𑀤𑁂𑀯𑀕𑀭𑀳𑀓𑀸 𑀤𑁂𑀯𑀚𑀺𑀕𑀼𑀘𑁆𑀙𑀓𑀸, 𑀧𑀚𑀸𑀧𑀢𑀺𑀕𑀭𑀳𑀓𑀸 𑀧𑀚𑀸𑀧𑀢𑀺𑀚𑀺𑀕𑀼𑀘𑁆𑀙𑀓𑀸, 𑀩𑁆𑀭𑀳𑁆𑀫𑀕𑀭𑀳𑀓𑀸 𑀩𑁆𑀭𑀳𑁆𑀫𑀚𑀺𑀕𑀼𑀘𑁆𑀙𑀓𑀸 𑁋 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀸𑀡𑀼𑀧𑀘𑁆𑀙𑁂𑀤𑀸 𑀳𑀻𑀦𑁂 𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀸 𑀅𑀳𑁂𑀲𑀼𑀁. 𑀬𑁂 𑀧𑀦, 𑀪𑀺𑀓𑁆𑀔𑀼, 𑀢𑀬𑀸 𑀧𑀼𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀮𑁄𑀓𑀲𑁆𑀫𑀺𑀁 𑀧𑀣𑀯𑀻𑀧𑀲𑀁𑀲𑀓𑀸 𑀧𑀣𑀯𑀸𑀪𑀺𑀦𑀦𑁆𑀤𑀺𑀦𑁄, 𑀆𑀧𑀧𑀲𑀁𑀲𑀓𑀸 𑀆𑀧𑀸𑀪𑀺𑀦𑀦𑁆𑀤𑀺𑀦𑁄, 𑀢𑁂𑀚𑀧𑀲𑀁𑀲𑀓𑀸 𑀢𑁂𑀚𑀸𑀪𑀺𑀦𑀦𑁆𑀤𑀺𑀦𑁄, 𑀯𑀸𑀬𑀧𑀲𑀁𑀲𑀓𑀸 𑀯𑀸𑀬𑀸𑀪𑀺𑀦𑀦𑁆𑀤𑀺𑀦𑁄, 𑀪𑀽𑀢𑀧𑀲𑀁𑀲𑀓𑀸 𑀪𑀽𑀢𑀸𑀪𑀺𑀦𑀦𑁆𑀤𑀺𑀦𑁄, 𑀤𑁂𑀯𑀧𑀲𑀁𑀲𑀓𑀸 𑀤𑁂𑀯𑀸𑀪𑀺𑀦𑀦𑁆𑀤𑀺𑀦𑁄, 𑀧𑀚𑀸𑀧𑀢𑀺𑀧𑀲𑀁𑀲𑀓𑀸 𑀧𑀚𑀸𑀧𑀢𑀸𑀪𑀺𑀦𑀦𑁆𑀤𑀺𑀦𑁄, 𑀩𑁆𑀭𑀳𑁆𑀫𑀧𑀲𑀁𑀲𑀓𑀸 𑀩𑁆𑀭𑀳𑁆𑀫𑀸𑀪𑀺𑀦𑀦𑁆𑀤𑀺𑀦𑁄 𑁋 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀸𑀡𑀼𑀧𑀘𑁆𑀙𑁂𑀤𑀸 𑀧𑀡𑀻𑀢𑁂 𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀸. 𑀢𑀁 𑀢𑀸𑀳𑀁, 𑀪𑀺𑀓𑁆𑀔𑀼, 𑀏𑀯𑀁 𑀯𑀤𑀸𑀫𑀺 𑁋 ‘𑀇𑀗𑁆𑀖 𑀢𑁆𑀯𑀁, 𑀫𑀸𑀭𑀺𑀲, 𑀬𑀤𑁂𑀯 𑀢𑁂 𑀩𑁆𑀭𑀳𑁆𑀫𑀸 𑀆𑀳 𑀢𑀤𑁂𑀯 𑀢𑁆𑀯𑀁 𑀓𑀭𑁄𑀳𑀺, 𑀫𑀸 𑀢𑁆𑀯𑀁 𑀩𑁆𑀭𑀳𑁆𑀫𑀼𑀦𑁄 𑀯𑀘𑀦𑀁 𑀉𑀧𑀸𑀢𑀺𑀯𑀢𑁆𑀢𑀺𑀢𑁆𑀣𑁄’. 𑀲𑀘𑁂 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀩𑁆𑀭𑀳𑁆𑀫𑀼𑀦𑁄 𑀯𑀘𑀦𑀁 𑀉𑀧𑀸𑀢𑀺𑀯𑀢𑁆𑀢𑀺𑀲𑁆𑀲𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀺𑀲𑁄 𑀲𑀺𑀭𑀺𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀡𑁆𑀟𑁂𑀦 𑀧𑀝𑀺𑀧𑁆𑀧𑀡𑀸𑀫𑁂𑀬𑁆𑀬, 𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦, 𑀪𑀺𑀓𑁆𑀔𑀼, 𑀧𑀼𑀭𑀺𑀲𑁄 𑀦𑀭𑀓𑀧𑁆𑀧𑀧𑀸𑀢𑁂 𑀧𑀧𑀢𑀦𑁆𑀢𑁄 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀧𑀣𑀯𑀺𑀁 𑀯𑀺𑀭𑀸𑀥𑁂𑀬𑁆𑀬, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁, 𑀪𑀺𑀓𑁆𑀔𑀼, 𑀢𑀼𑀬𑁆𑀳𑀁 𑀪𑀯𑀺𑀲𑁆𑀲𑀢𑀺. ‘𑀇𑀗𑁆𑀖𑀁 𑀢𑁆𑀯𑀁, 𑀫𑀸𑀭𑀺𑀲, 𑀬𑀤𑁂𑀯 𑀢𑁂 𑀩𑁆𑀭𑀳𑁆𑀫𑀸 𑀆𑀳 𑀢𑀤𑁂𑀯 𑀢𑁆𑀯𑀁 𑀓𑀭𑁄𑀳𑀺, 𑀫𑀸 𑀢𑁆𑀯𑀁 𑀩𑁆𑀭𑀳𑁆𑀫𑀼𑀦𑁄 𑀯𑀘𑀦𑀁 𑀉𑀧𑀸𑀢𑀺𑀯𑀢𑁆𑀢𑀺𑀢𑁆𑀣𑁄. 𑀦𑀦𑀼 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀲𑁆𑀲𑀲𑀺 𑀩𑁆𑀭𑀳𑁆𑀫𑀧𑀭𑀺𑀲𑀁 𑀲𑀦𑁆𑀦𑀺𑀧𑀢𑀺𑀢’𑀦𑁆𑀢𑀺? 𑀇𑀢𑀺 𑀔𑁄 𑀫𑀁, 𑀪𑀺𑀓𑁆𑀔𑀯𑁂, 𑀫𑀸𑀭𑁄 𑀧𑀸𑀧𑀺𑀫𑀸 𑀩𑁆𑀭𑀳𑁆𑀫𑀧𑀭𑀺𑀲𑀁 𑀉𑀧𑀦𑁂𑀲𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀺𑀓𑁆𑀔𑀯𑁂, 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀚𑀸𑀦𑀸𑀫𑀺 𑀔𑁄 𑀢𑀸𑀳𑀁, 𑀧𑀸𑀧𑀺𑀫; 𑀫𑀸 𑀢𑁆𑀯𑀁 𑀫𑀜𑁆𑀜𑀺𑀢𑁆𑀣𑁄 𑁋 𑀦 𑀫𑀁 𑀚𑀸𑀦𑀸𑀢𑀻’𑀢𑀺. 𑀫𑀸𑀭𑁄 𑀢𑁆𑀯𑀫𑀲𑀺, 𑀧𑀸𑀧𑀺𑀫. 𑀬𑁄 𑀘𑁂𑀯, 𑀧𑀸𑀧𑀺𑀫, 𑀩𑁆𑀭𑀳𑁆𑀫𑀸, 𑀬𑀸 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸, 𑀬𑁂 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸, 𑀲𑀩𑁆𑀩𑁂𑀯 𑀢𑀯 𑀳𑀢𑁆𑀣𑀕𑀢𑀸 𑀲𑀩𑁆𑀩𑁂𑀯 𑀢𑀯 𑀯𑀲𑀁𑀕𑀢𑀸. 𑀢𑀼𑀬𑁆𑀳𑀜𑁆𑀳𑀺, 𑀧𑀸𑀧𑀺𑀫, 𑀏𑀯𑀁 𑀳𑁄𑀢𑀺 𑁋 ‘𑀏𑀲𑁄𑀧𑀺 𑀫𑁂 𑀅𑀲𑁆𑀲 𑀳𑀢𑁆𑀣𑀕𑀢𑁄, 𑀏𑀲𑁄𑀧𑀺 𑀫𑁂 𑀅𑀲𑁆𑀲 𑀯𑀲𑀁𑀕𑀢𑁄’𑀢𑀺. 𑀅𑀳𑀁 𑀔𑁄 𑀧𑀦, 𑀧𑀸𑀧𑀺𑀫, 𑀦𑁂𑀯 𑀢𑀯 𑀳𑀢𑁆𑀣𑀕𑀢𑁄 𑀦𑁂𑀯 𑀢𑀯 𑀯𑀲𑀁𑀕𑀢𑁄’’𑀢𑀺.

𑁫𑁦𑁩. ‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀩𑀓𑁄 𑀩𑁆𑀭𑀳𑁆𑀫𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀅𑀳𑀜𑁆𑀳𑀺, 𑀫𑀸𑀭𑀺𑀲, 𑀦𑀺𑀘𑁆𑀘𑀁𑀬𑁂𑀯 𑀲𑀫𑀸𑀦𑀁 𑀦𑀺𑀘𑁆𑀘𑀦𑁆𑀢𑀺 𑀯𑀤𑀸𑀫𑀺, 𑀥𑀼𑀯𑀁𑀬𑁂𑀯 𑀲𑀫𑀸𑀦𑀁 𑀥𑀼𑀯𑀦𑁆𑀢𑀺 𑀯𑀤𑀸𑀫𑀺, 𑀲𑀲𑁆𑀲𑀢𑀁𑀬𑁂𑀯 𑀲𑀫𑀸𑀦𑀁 𑀲𑀲𑁆𑀲𑀢𑀦𑁆𑀢𑀺 𑀯𑀤𑀸𑀫𑀺, 𑀓𑁂𑀯𑀮𑀁𑀬𑁂𑀯 𑀲𑀫𑀸𑀦𑀁 𑀓𑁂𑀯𑀮𑀦𑁆𑀢𑀺 𑀯𑀤𑀸𑀫𑀺, 𑀅𑀘𑀯𑀦𑀥𑀫𑁆𑀫𑀁𑀬𑁂𑀯 𑀲𑀫𑀸𑀦𑀁 𑀅𑀘𑀯𑀦𑀥𑀫𑁆𑀫’𑀦𑁆𑀢𑀺 𑀯𑀤𑀸𑀫𑀺, 𑀬𑀢𑁆𑀣 𑀘 𑀧𑀦 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺 𑀢𑀤𑁂𑀯𑀸𑀳𑀁 𑀯𑀤𑀸𑀫𑀺 𑁋 ‘𑀇𑀤𑀜𑁆𑀳𑀺 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀻’𑀢𑀺. 𑀅𑀲𑀦𑁆𑀢𑀜𑁆𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 ‘𑀦𑀢𑁆𑀣𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡’𑀦𑁆𑀢𑀺 𑀯𑀤𑀸𑀫𑀺. 𑀅𑀳𑁂𑀲𑀼𑀁 𑀔𑁄, 𑀪𑀺𑀓𑁆𑀔𑀼, 𑀢𑀬𑀸 𑀧𑀼𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀮𑁄𑀓𑀲𑁆𑀫𑀺𑀁 𑀬𑀸𑀯𑀢𑀓𑀁 𑀢𑀼𑀬𑁆𑀳𑀁 𑀓𑀲𑀺𑀡𑀁 𑀆𑀬𑀼 𑀢𑀸𑀯𑀢𑀓𑀁 𑀢𑁂𑀲𑀁 𑀢𑀧𑁄𑀓𑀫𑁆𑀫𑀫𑁂𑀯 𑀅𑀳𑁄𑀲𑀺. 𑀢𑁂 𑀔𑁄 𑀏𑀯𑀁 𑀚𑀸𑀦𑁂𑀬𑁆𑀬𑀼𑀁 𑁋 ‘𑀲𑀦𑁆𑀢𑀜𑁆𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀅𑀢𑁆𑀣𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀦𑁆𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀦𑀢𑁆𑀣𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡’𑀦𑁆𑀢𑀺. 𑀢𑀁 𑀢𑀸𑀳𑀁, 𑀪𑀺𑀓𑁆𑀔𑀼, 𑀏𑀯𑀁 𑀯𑀤𑀸𑀫𑀺 𑁋 ‘𑀦 𑀘𑁂𑀯𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀤𑀓𑁆𑀔𑀺𑀲𑁆𑀲𑀲𑀺, 𑀬𑀸𑀯𑀤𑁂𑀯 𑀘 𑀧𑀦 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀪𑀯𑀺𑀲𑁆𑀲𑀲𑀺. 𑀲𑀘𑁂 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀣𑀯𑀺𑀁 𑀅𑀚𑁆𑀛𑁄𑀲𑀺𑀲𑁆𑀲𑀲𑀺, 𑀑𑀧𑀲𑀸𑀬𑀺𑀓𑁄 𑀫𑁂 𑀪𑀯𑀺𑀲𑁆𑀲𑀲𑀺 𑀯𑀢𑁆𑀣𑀼𑀲𑀸𑀬𑀺𑀓𑁄, 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀩𑀸𑀳𑀺𑀢𑁂𑀬𑁆𑀬𑁄. 𑀲𑀘𑁂 𑀆𑀧𑀁… 𑀢𑁂𑀚𑀁… 𑀯𑀸𑀬𑀁… 𑀪𑀽𑀢𑁂… 𑀤𑁂𑀯𑁂… 𑀧𑀚𑀸𑀧𑀢𑀺𑀁… 𑀩𑁆𑀭𑀳𑁆𑀫𑀁 𑀅𑀚𑁆𑀛𑁄𑀲𑀺𑀲𑁆𑀲𑀲𑀺, 𑀑𑀧𑀲𑀸𑀬𑀺𑀓𑁄 𑀫𑁂 𑀪𑀯𑀺𑀲𑁆𑀲𑀲𑀺 𑀯𑀢𑁆𑀣𑀼𑀲𑀸𑀬𑀺𑀓𑁄, 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀩𑀸𑀳𑀺𑀢𑁂𑀬𑁆𑀬𑁄’𑀢𑀺.

‘‘𑀅𑀳𑀫𑁆𑀧𑀺 𑀔𑁄 𑀏𑀯𑀁, 𑀩𑁆𑀭𑀳𑁆𑀫𑁂, 𑀚𑀸𑀦𑀸𑀫𑀺 𑁋 𑀲𑀘𑁂 𑀧𑀣𑀯𑀺𑀁 𑀅𑀚𑁆𑀛𑁄𑀲𑀺𑀲𑁆𑀲𑀸𑀫𑀺, 𑀑𑀧𑀲𑀸𑀬𑀺𑀓𑁄 𑀢𑁂 𑀪𑀯𑀺𑀲𑁆𑀲𑀸𑀫𑀺 𑀯𑀢𑁆𑀣𑀼𑀲𑀸𑀬𑀺𑀓𑁄, 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀩𑀸𑀳𑀺𑀢𑁂𑀬𑁆𑀬𑁄. ‘𑀲𑀘𑁂 𑀆𑀧𑀁… 𑀢𑁂𑀚𑀁… 𑀯𑀸𑀬𑀁… 𑀪𑀽𑀢𑁂… 𑀤𑁂𑀯𑁂… 𑀧𑀚𑀸𑀧𑀢𑀺𑀁… 𑀩𑁆𑀭𑀳𑁆𑀫𑀁 𑀅𑀚𑁆𑀛𑁄𑀲𑀺𑀲𑁆𑀲𑀸𑀫𑀺, 𑀑𑀧𑀲𑀸𑀬𑀺𑀓𑁄 𑀢𑁂 𑀪𑀯𑀺𑀲𑁆𑀲𑀸𑀫𑀺 𑀯𑀢𑁆𑀣𑀼𑀲𑀸𑀬𑀺𑀓𑁄, 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀩𑀸𑀳𑀺𑀢𑁂𑀬𑁆𑀬𑁄’𑀢𑀺 𑀅𑀧𑀺 𑀘 𑀢𑁂 𑀅𑀳𑀁, 𑀩𑁆𑀭𑀳𑁆𑀫𑁂, 𑀕𑀢𑀺𑀜𑁆𑀘 𑀧𑀚𑀸𑀦𑀸𑀫𑀺, 𑀚𑀼𑀢𑀺𑀜𑁆𑀘 𑀧𑀚𑀸𑀦𑀸𑀫𑀺 𑁋 𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀩𑀓𑁄 𑀩𑁆𑀭𑀳𑁆𑀫𑀸, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀩𑀓𑁄 𑀩𑁆𑀭𑀳𑁆𑀫𑀸, 𑀏𑀯𑀁 𑀫𑀳𑁂𑀲𑀓𑁆𑀔𑁄 𑀩𑀓𑁄 𑀩𑁆𑀭𑀳𑁆𑀫𑀸’’𑀢𑀺.

‘‘𑀬𑀣𑀸𑀓𑀣𑀁 𑀧𑀦 𑀫𑁂 𑀢𑁆𑀯𑀁, 𑀫𑀸𑀭𑀺𑀲, 𑀕𑀢𑀺𑀜𑁆𑀘 𑀧𑀚𑀸𑀦𑀸𑀲𑀺, 𑀚𑀼𑀢𑀺𑀜𑁆𑀘 𑀧𑀚𑀸𑀦𑀸𑀲𑀺 𑁋 ‘𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀩𑀓𑁄 𑀩𑁆𑀭𑀳𑁆𑀫𑀸, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀩𑀓𑁄 𑀩𑁆𑀭𑀳𑁆𑀫𑀸, 𑀏𑀯𑀁 𑀫𑀳𑁂𑀲𑀓𑁆𑀔𑁄 𑀩𑀓𑁄 𑀩𑁆𑀭𑀳𑁆𑀫𑀸’𑀢𑀺?

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀏𑀢𑁆𑀣 𑀢𑁂 𑀯𑀢𑁆𑀢𑀢𑁂 [𑀯𑀢𑁆𑀢𑀢𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀲𑁄.

‘‘𑀧𑀭𑁄𑀧𑀭𑀜𑁆𑀘 [𑀧𑀭𑁄𑀯𑀭𑀜𑁆𑀘 (𑀲𑀻. 𑀧𑀻.)] 𑀚𑀸𑀦𑀸𑀲𑀺, 𑀅𑀣𑁄 𑀭𑀸𑀕𑀯𑀺𑀭𑀸𑀕𑀺𑀦𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀢𑁆𑀢𑀸𑀦𑀁 𑀆𑀕𑀢𑀺𑀁 𑀕𑀢𑀺’’𑀦𑁆𑀢𑀺.

‘‘𑀏𑀯𑀁 𑀔𑁄 𑀢𑁂 𑀅𑀳𑀁, 𑀩𑁆𑀭𑀳𑁆𑀫𑁂, 𑀕𑀢𑀺𑀜𑁆𑀘 𑀧𑀚𑀸𑀦𑀸𑀫𑀺 𑀚𑀼𑀢𑀺𑀜𑁆𑀘 𑀧𑀚𑀸𑀦𑀸𑀫𑀺 𑁋 ‘𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀩𑀓𑁄 𑀩𑁆𑀭𑀳𑁆𑀫𑀸, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀩𑀓𑁄 𑀩𑁆𑀭𑀳𑁆𑀫𑀸, 𑀏𑀯𑀁 𑀫𑀳𑁂𑀲𑀓𑁆𑀔𑁄 𑀩𑀓𑁄 𑀩𑁆𑀭𑀳𑁆𑀫𑀸’𑀢𑀺.

𑁫𑁦𑁪. ‘‘𑀅𑀢𑁆𑀣𑀺 𑀔𑁄, 𑀩𑁆𑀭𑀳𑁆𑀫𑁂, 𑀅𑀜𑁆𑀜𑁄 𑀓𑀸𑀬𑁄, 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺; 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀅𑀢𑁆𑀣𑀺 𑀔𑁄, 𑀩𑁆𑀭𑀳𑁆𑀫𑁂, 𑀆𑀪𑀲𑁆𑀲𑀭𑀸 𑀦𑀸𑀫 𑀓𑀸𑀬𑁄 𑀬𑀢𑁄 𑀢𑁆𑀯𑀁 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄. 𑀢𑀲𑁆𑀲 𑀢𑁂 𑀅𑀢𑀺𑀘𑀺𑀭𑀦𑀺𑀯𑀸𑀲𑁂𑀦 𑀲𑀸 𑀲𑀢𑀺 𑀧𑀫𑀼𑀝𑁆𑀞𑀸, 𑀢𑁂𑀦 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺; 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀏𑀯𑀫𑁆𑀧𑀺 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂, 𑀦𑁂𑀯 𑀢𑁂 𑀲𑀫𑀲𑀫𑁄 𑀅𑀪𑀺𑀜𑁆𑀜𑀸𑀬, 𑀓𑀼𑀢𑁄 𑀦𑀻𑀘𑁂𑀬𑁆𑀬𑀁? 𑀅𑀣 𑀔𑁄 𑀅𑀳𑀫𑁂𑀯 𑀢𑀬𑀸 𑀪𑀺𑀬𑁆𑀬𑁄. 𑀅𑀢𑁆𑀣𑀺 𑀔𑁄, 𑀩𑁆𑀭𑀳𑁆𑀫𑁂, 𑀲𑀼𑀪𑀓𑀺𑀡𑁆𑀳𑁄 𑀦𑀸𑀫 𑀓𑀸𑀬𑁄, 𑀯𑁂𑀳𑀧𑁆𑀨𑀮𑁄 𑀦𑀸𑀫 𑀓𑀸𑀬𑁄, 𑀅𑀪𑀺𑀪𑀽 𑀦𑀸𑀫 𑀓𑀸𑀬𑁄, 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺; 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀏𑀯𑀫𑁆𑀧𑀺 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂, 𑀦𑁂𑀯 𑀢𑁂 𑀲𑀫𑀲𑀫𑁄 𑀅𑀪𑀺𑀜𑁆𑀜𑀸𑀬, 𑀓𑀼𑀢𑁄 𑀦𑀻𑀘𑁂𑀬𑁆𑀬𑀁? 𑀅𑀣 𑀔𑁄 𑀅𑀳𑀫𑁂𑀯 𑀢𑀬𑀸 𑀪𑀺𑀬𑁆𑀬𑁄. 𑀧𑀣𑀯𑀺𑀁 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂, 𑀧𑀣𑀯𑀺𑀢𑁄 𑀅𑀪𑀺𑀜𑁆𑀜𑀸𑀬 𑀬𑀸𑀯𑀢𑀸 𑀧𑀣𑀯𑀺𑀬𑀸 𑀧𑀣𑀯𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁 𑀢𑀤𑀪𑀺𑀜𑁆𑀜𑀸𑀬 𑀧𑀣𑀯𑀺𑀁 𑀦𑀸𑀧𑀳𑁄𑀲𑀺𑀁, 𑀧𑀣𑀯𑀺𑀬𑀸 𑀦𑀸𑀧𑀳𑁄𑀲𑀺𑀁, 𑀧𑀣𑀯𑀺𑀢𑁄 𑀦𑀸𑀧𑀳𑁄𑀲𑀺𑀁, 𑀧𑀣𑀯𑀺𑀁 𑀫𑁂𑀢𑀺 𑀦𑀸𑀧𑀳𑁄𑀲𑀺𑀁, 𑀧𑀣𑀯𑀺𑀁 𑀦𑀸𑀪𑀺𑀯𑀤𑀺𑀁. 𑀏𑀯𑀫𑁆𑀧𑀺 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂, 𑀦𑁂𑀯 𑀢𑁂 𑀲𑀫𑀲𑀫𑁄 𑀅𑀪𑀺𑀜𑁆𑀜𑀸𑀬, 𑀓𑀼𑀢𑁄 𑀦𑀻𑀘𑁂𑀬𑁆𑀬𑀁? 𑀅𑀣 𑀔𑁄 𑀅𑀳𑀫𑁂𑀯 𑀢𑀬𑀸 𑀪𑀺𑀬𑁆𑀬𑁄. 𑀆𑀧𑀁 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀢𑁂𑀚𑀁 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀯𑀸𑀬𑀁 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀪𑀽𑀢𑁂 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀤𑁂𑀯𑁂 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀧𑀚𑀸𑀧𑀢𑀺𑀁 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀩𑁆𑀭𑀳𑁆𑀫𑀁 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀆𑀪𑀲𑁆𑀲𑀭𑁂 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀲𑀼𑀪𑀓𑀺𑀡𑁆𑀳𑁂 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂… …𑀧𑁂… 𑀯𑁂𑀳𑀧𑁆𑀨𑀮𑁂 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀅𑀪𑀺𑀪𑀼𑀁 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂…𑀧𑁂… 𑀲𑀩𑁆𑀩𑀁 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂, 𑀲𑀩𑁆𑀩𑀢𑁄 𑀅𑀪𑀺𑀜𑁆𑀜𑀸𑀬 𑀬𑀸𑀯𑀢𑀸 𑀲𑀩𑁆𑀩𑀲𑁆𑀲 𑀲𑀩𑁆𑀩𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁 𑀢𑀤𑀪𑀺𑀜𑁆𑀜𑀸𑀬 𑀲𑀩𑁆𑀩𑀁 𑀦𑀸𑀧𑀳𑁄𑀲𑀺𑀁 𑀲𑀩𑁆𑀩𑀲𑁆𑀫𑀺𑀁 𑀦𑀸𑀧𑀳𑁄𑀲𑀺𑀁 𑀲𑀩𑁆𑀩𑀢𑁄 𑀦𑀸𑀧𑀳𑁄𑀲𑀺𑀁 𑀲𑀩𑁆𑀩𑀁 𑀫𑁂𑀢𑀺 𑀦𑀸𑀧𑀳𑁄𑀲𑀺𑀁, 𑀲𑀩𑁆𑀩𑀁 𑀦𑀸𑀪𑀺𑀯𑀤𑀺𑀁. 𑀏𑀯𑀫𑁆𑀧𑀺 𑀔𑁄 𑀅𑀳𑀁, 𑀩𑁆𑀭𑀳𑁆𑀫𑁂, 𑀦𑁂𑀯 𑀢𑁂 𑀲𑀫𑀲𑀫𑁄 𑀅𑀪𑀺𑀜𑁆𑀜𑀸𑀬, 𑀓𑀼𑀢𑁄 𑀦𑀻𑀘𑁂𑀬𑁆𑀬𑀁? 𑀅𑀣 𑀔𑁄 𑀅𑀳𑀫𑁂𑀯 𑀢𑀬𑀸 𑀪𑀺𑀬𑁆𑀬𑁄’’𑀢𑀺.

‘‘𑀲𑀘𑁂 𑀔𑁄, 𑀫𑀸𑀭𑀺𑀲, 𑀲𑀩𑁆𑀩𑀲𑁆𑀲 𑀲𑀩𑁆𑀩𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀢𑀤𑀪𑀺𑀜𑁆𑀜𑀸𑀬 𑀫𑀸 𑀳𑁂𑀯 𑀢𑁂 𑀭𑀺𑀢𑁆𑀢𑀓𑀫𑁂𑀯 𑀅𑀳𑁄𑀲𑀺, 𑀢𑀼𑀘𑁆𑀙𑀓𑀫𑁂𑀯 𑀅𑀳𑁄𑀲𑀻’’𑀢𑀺.

‘‘‘𑀯𑀺𑀜𑁆𑀜𑀸𑀡𑀁 𑀅𑀦𑀺𑀤𑀲𑁆𑀲𑀦𑀁 𑀅𑀦𑀦𑁆𑀢𑀁 𑀲𑀩𑁆𑀩𑀢𑁄 𑀧𑀪𑀁’, 𑀢𑀁 𑀧𑀣𑀯𑀺𑀬𑀸 𑀧𑀣𑀯𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀆𑀧𑀲𑁆𑀲 𑀆𑀧𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀢𑁂𑀚𑀲𑁆𑀲 𑀢𑁂𑀚𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀯𑀸𑀬𑀲𑁆𑀲 𑀯𑀸𑀬𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀪𑀽𑀢𑀸𑀦𑀁 𑀪𑀽𑀢𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀤𑁂𑀯𑀸𑀦𑀁 𑀤𑁂𑀯𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀧𑀚𑀸𑀧𑀢𑀺𑀲𑁆𑀲 𑀧𑀚𑀸𑀧𑀢𑀺𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀩𑁆𑀭𑀳𑁆𑀫𑀸𑀦𑀁 𑀩𑁆𑀭𑀳𑁆𑀫𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀆𑀪𑀲𑁆𑀲𑀭𑀸𑀦𑀁 𑀆𑀪𑀲𑁆𑀲𑀭𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀲𑀼𑀪𑀓𑀺𑀡𑁆𑀳𑀸𑀦𑀁 𑀲𑀼𑀪𑀓𑀺𑀡𑁆𑀳𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀯𑁂𑀳𑀧𑁆𑀨𑀮𑀸𑀦𑀁 𑀯𑁂𑀳𑀧𑁆𑀨𑀮𑀢𑁆𑀢𑁂 𑀅𑀦𑀦𑀼𑀪𑀽𑀢𑀁, 𑀅𑀪𑀺𑀪𑀼𑀲𑁆𑀲 𑀅𑀪𑀺𑀪𑀼𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁, 𑀲𑀩𑁆𑀩𑀲𑁆𑀲 𑀲𑀩𑁆𑀩𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁’’.

‘‘𑀳𑀦𑁆𑀤 𑀘𑀭𑀳𑀺 [𑀳𑀦𑁆𑀤 𑀘 𑀳𑀺 (𑀲𑀻. 𑀧𑀻.)] 𑀢𑁂, 𑀫𑀸𑀭𑀺𑀲, 𑀧𑀲𑁆𑀲 𑀅𑀦𑁆𑀢𑀭𑀥𑀸𑀬𑀸𑀫𑀻’’𑀢𑀺. ‘𑀳𑀦𑁆𑀤 𑀘𑀭𑀳𑀺 𑀫𑁂 𑀢𑁆𑀯𑀁, 𑀩𑁆𑀭𑀳𑁆𑀫𑁂, 𑀅𑀦𑁆𑀢𑀭𑀥𑀸𑀬𑀲𑁆𑀲𑀼, 𑀲𑀘𑁂 𑀯𑀺𑀲𑀳𑀲𑀻’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀓𑁄 𑀩𑁆𑀭𑀳𑁆𑀫𑀸 ‘𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀸𑀫𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲, 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀸𑀫𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲𑀸’𑀢𑀺 𑀦𑁂𑀯𑀲𑁆𑀲𑀼 𑀫𑁂 𑀲𑀓𑁆𑀓𑁄𑀢𑀺 𑀅𑀦𑁆𑀢𑀭𑀥𑀸𑀬𑀺𑀢𑀼𑀁.

‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀺𑀓𑁆𑀔𑀯𑁂, 𑀩𑀓𑀁 𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘𑀁 𑁋 ‘𑀳𑀦𑁆𑀤 𑀘𑀭𑀳𑀺 𑀢𑁂 𑀩𑁆𑀭𑀳𑁆𑀫𑁂 𑀅𑀦𑁆𑀢𑀭𑀥𑀸𑀬𑀸𑀫𑀻’𑀢𑀺. ‘𑀳𑀦𑁆𑀤 𑀘𑀭𑀳𑀺 𑀫𑁂 𑀢𑁆𑀯𑀁, 𑀫𑀸𑀭𑀺𑀲, 𑀅𑀦𑁆𑀢𑀭𑀥𑀸𑀬𑀲𑁆𑀲𑀼 𑀲𑀘𑁂 𑀯𑀺𑀲𑀳𑀲𑀻’𑀢𑀺. 𑀅𑀣 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺𑀁 𑁋 ‘𑀏𑀢𑁆𑀢𑀸𑀯𑀢𑀸 𑀩𑁆𑀭𑀳𑁆𑀫𑀸 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀘 𑀲𑀤𑁆𑀤𑀜𑁆𑀘 𑀫𑁂 𑀲𑁄𑀲𑁆𑀲𑀦𑁆𑀢𑀺 [𑀲𑀤𑁆𑀤𑀫𑁂𑀯 𑀲𑀼𑀬𑁆𑀬𑀦𑁆𑀢𑀺 (𑀓.)], 𑀦 𑀘 𑀫𑀁 𑀤𑀓𑁆𑀔𑀦𑁆𑀢𑀻’𑀢𑀺. 𑀅𑀦𑁆𑀢𑀭𑀳𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺𑀁 𑁋

‘‘𑀪𑀯𑁂𑀯𑀸𑀳𑀁 𑀪𑀬𑀁 𑀤𑀺𑀲𑁆𑀯𑀸, 𑀪𑀯𑀜𑁆𑀘 𑀯𑀺𑀪𑀯𑁂𑀲𑀺𑀦𑀁;

𑀪𑀯𑀁 𑀦𑀸𑀪𑀺𑀯𑀤𑀺𑀁 𑀓𑀺𑀜𑁆𑀘𑀺, 𑀦𑀦𑁆𑀤𑀺𑀜𑁆𑀘 𑀦 𑀉𑀧𑀸𑀤𑀺𑀬𑀺’’𑀦𑁆𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀘 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀅𑀳𑁂𑀲𑀼𑀁 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀦 𑀘 𑀯𑀢 𑀦𑁄 𑀇𑀢𑁄 𑀧𑀼𑀩𑁆𑀩𑁂 𑀤𑀺𑀝𑁆𑀞𑁄 𑀯𑀸, 𑀲𑀼𑀢𑁄 𑀯𑀸, 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀬𑀣𑀸𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄. 𑀪𑀯𑀭𑀸𑀫𑀸𑀬 𑀯𑀢, 𑀪𑁄, 𑀧𑀚𑀸𑀬 𑀪𑀯𑀭𑀢𑀸𑀬 𑀪𑀯𑀲𑀫𑁆𑀫𑀼𑀤𑀺𑀢𑀸𑀬 𑀲𑀫𑀽𑀮𑀁 𑀪𑀯𑀁 𑀉𑀤𑀩𑁆𑀩𑀳𑀻’𑀢𑀺.

𑁫𑁦𑁫. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑁄 𑀧𑀸𑀧𑀺𑀫𑀸 𑀅𑀜𑁆𑀜𑀢𑀭𑀁 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀁 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀲𑀘𑁂 𑀔𑁄 𑀢𑁆𑀯𑀁, 𑀫𑀸𑀭𑀺𑀲, 𑀏𑀯𑀁 𑀧𑀚𑀸𑀦𑀸𑀲𑀺, 𑀲𑀘𑁂 𑀢𑁆𑀯𑀁 𑀏𑀯𑀁 𑀅𑀦𑀼𑀩𑀼𑀤𑁆𑀥𑁄, 𑀫𑀸 𑀲𑀸𑀯𑀓𑁂 𑀉𑀧𑀦𑁂𑀲𑀺, 𑀫𑀸 𑀧𑀩𑁆𑀩𑀚𑀺𑀢𑁂; 𑀫𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀫𑀸 𑀧𑀩𑁆𑀩𑀚𑀺𑀢𑀸𑀦𑀁; 𑀫𑀸 𑀲𑀸𑀯𑀓𑁂𑀲𑀼 𑀕𑁂𑀥𑀺𑀫𑀓𑀸𑀲𑀺, 𑀫𑀸 𑀧𑀩𑁆𑀩𑀚𑀺𑀢𑁂𑀲𑀼. 𑀅𑀳𑁂𑀲𑀼𑀁 𑀔𑁄, 𑀪𑀺𑀓𑁆𑀔𑀼, 𑀢𑀬𑀸 𑀧𑀼𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀮𑁄𑀓𑀲𑁆𑀫𑀺𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀧𑀝𑀺𑀚𑀸𑀦𑀫𑀸𑀦𑀸. 𑀢𑁂 𑀲𑀸𑀯𑀓𑁂 𑀉𑀧𑀦𑁂𑀲𑀼𑀁 𑀧𑀩𑁆𑀩𑀚𑀺𑀢𑁂, 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀼𑀁 𑀧𑀩𑁆𑀩𑀚𑀺𑀢𑀸𑀦𑀁, 𑀲𑀸𑀯𑀓𑁂𑀲𑀼 𑀕𑁂𑀥𑀺𑀫𑀓𑀁𑀲𑀼 𑀧𑀩𑁆𑀩𑀚𑀺𑀢𑁂𑀲𑀼, 𑀢𑁂 𑀲𑀸𑀯𑀓𑁂 𑀉𑀧𑀦𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁂, 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀁, 𑀲𑀸𑀯𑀓𑁂𑀲𑀼 𑀕𑁂𑀥𑀺𑀢𑀘𑀺𑀢𑁆𑀢𑀸 𑀧𑀩𑁆𑀩𑀚𑀺𑀢𑁂𑀲𑀼, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀸𑀡𑀼𑀧𑀘𑁆𑀙𑁂𑀤𑀸 𑀳𑀻𑀦𑁂 𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀸. 𑀅𑀳𑁂𑀲𑀼𑀁 𑀬𑁂 𑀧𑀦, 𑀪𑀺𑀓𑁆𑀔𑀼, 𑀢𑀬𑀸 𑀧𑀼𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀮𑁄𑀓𑀲𑁆𑀫𑀺𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀧𑀝𑀺𑀚𑀸𑀦𑀫𑀸𑀦𑀸. 𑀢𑁂 𑀦 𑀲𑀸𑀯𑀓𑁂 𑀉𑀧𑀦𑁂𑀲𑀼𑀁 𑀦 𑀧𑀩𑁆𑀩𑀚𑀺𑀢𑁂, 𑀦 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀼𑀁 𑀦 𑀧𑀩𑁆𑀩𑀚𑀺𑀢𑀸𑀦𑀁, 𑀦 𑀲𑀸𑀯𑀓𑁂𑀲𑀼 𑀕𑁂𑀥𑀺𑀫𑀓𑀁𑀲𑀼 𑀦 𑀧𑀩𑁆𑀩𑀚𑀺𑀢𑁂𑀲𑀼, 𑀢𑁂 𑀦 𑀲𑀸𑀯𑀓𑁂 𑀉𑀧𑀦𑁂𑀢𑁆𑀯𑀸 𑀦 𑀧𑀩𑁆𑀩𑀚𑀺𑀢𑁂, 𑀦 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦 𑀧𑀩𑁆𑀩𑀚𑀺𑀢𑀸𑀦𑀁, 𑀦 𑀲𑀸𑀯𑀓𑁂𑀲𑀼 𑀕𑁂𑀥𑀺𑀢𑀘𑀺𑀢𑁆𑀢𑀸 𑀦 𑀧𑀩𑁆𑀩𑀚𑀺𑀢𑁂𑀲𑀼, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀸𑀡𑀼𑀧𑀘𑁆𑀙𑁂𑀤𑀸 𑀧𑀡𑀻𑀢𑁂 𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀸. 𑀢𑀁 𑀢𑀸𑀳𑀁, 𑀪𑀺𑀓𑁆𑀔𑀼, 𑀏𑀯𑀁 𑀯𑀤𑀸𑀫𑀺 𑁋 𑀇𑀗𑁆𑀖 𑀢𑁆𑀯𑀁, 𑀫𑀸𑀭𑀺𑀲, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀲𑁆𑀲𑀼, 𑀅𑀦𑀓𑁆𑀔𑀸𑀢𑀁 𑀓𑀼𑀲𑀮𑀜𑁆𑀳𑀺, 𑀫𑀸𑀭𑀺𑀲, 𑀫𑀸 𑀧𑀭𑀁 𑀑𑀯𑀤𑀸𑀳𑀻’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀺𑀓𑁆𑀔𑀯𑁂, 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀚𑀸𑀦𑀸𑀫𑀺 𑀔𑁄 𑀢𑀸𑀳𑀁, 𑀧𑀸𑀧𑀺𑀫, 𑀫𑀸 𑀢𑁆𑀯𑀁 𑀫𑀜𑁆𑀜𑀺𑀢𑁆𑀣𑁄 𑁋 𑀦 𑀫𑀁 𑀚𑀸𑀦𑀸𑀢𑀻’𑀢𑀺. 𑀫𑀸𑀭𑁄 𑀢𑁆𑀯𑀫𑀲𑀺, 𑀧𑀸𑀧𑀺𑀫. 𑀦 𑀫𑀁 𑀢𑁆𑀯𑀁, 𑀧𑀸𑀧𑀺𑀫, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀏𑀯𑀁 𑀯𑀤𑁂𑀲𑀺; 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀁 𑀢𑁆𑀯𑀁, 𑀧𑀸𑀧𑀺𑀫, 𑀏𑀯𑀁 𑀯𑀤𑁂𑀲𑀺. 𑀢𑀼𑀬𑁆𑀳𑀜𑁆𑀳𑀺, 𑀧𑀸𑀧𑀺𑀫, 𑀏𑀯𑀁 𑀳𑁄𑀢𑀺 𑁋 ‘𑀬𑁂𑀲𑀁 𑀲𑀫𑀡𑁄 𑀕𑁄𑀢𑀫𑁄 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀺, 𑀢𑁂 𑀫𑁂 𑀯𑀺𑀲𑀬𑀁 𑀉𑀧𑀸𑀢𑀺𑀯𑀢𑁆𑀢𑀺𑀲𑁆𑀲𑀦𑁆𑀢𑀻’𑀢𑀺. 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀯 𑀧𑀦 𑀢𑁂, 𑀧𑀸𑀧𑀺𑀫, 𑀲𑀫𑀸𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀫𑁆𑀳𑀸𑀢𑀺 𑀧𑀝𑀺𑀚𑀸𑀦𑀺𑀁𑀲𑀼. 𑀅𑀳𑀁 𑀔𑁄 𑀧𑀦, 𑀧𑀸𑀧𑀺𑀫, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀲𑀫𑀸𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀫𑁆𑀳𑀻𑀢𑀺 𑀧𑀝𑀺𑀚𑀸𑀦𑀸𑀫𑀺. 𑀤𑁂𑀲𑁂𑀦𑁆𑀢𑁄𑀧𑀺 𑀳𑀺, 𑀧𑀸𑀧𑀺𑀫, 𑀢𑀣𑀸𑀕𑀢𑁄 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀢𑀸𑀤𑀺𑀲𑁄𑀯 𑀅𑀤𑁂𑀲𑁂𑀦𑁆𑀢𑁄𑀧𑀺 𑀳𑀺, 𑀧𑀸𑀧𑀺𑀫, 𑀢𑀣𑀸𑀕𑀢𑁄 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀢𑀸𑀤𑀺𑀲𑁄𑀯. 𑀉𑀧𑀦𑁂𑀦𑁆𑀢𑁄𑀧𑀺 𑀳𑀺, 𑀧𑀸𑀧𑀺𑀫, 𑀢𑀣𑀸𑀕𑀢𑁄 𑀲𑀸𑀯𑀓𑁂 𑀢𑀸𑀤𑀺𑀲𑁄𑀯, 𑀅𑀦𑀼𑀧𑀦𑁂𑀦𑁆𑀢𑁄𑀧𑀺 𑀳𑀺, 𑀧𑀸𑀧𑀺𑀫, 𑀢𑀣𑀸𑀕𑀢𑁄 𑀲𑀸𑀯𑀓𑁂 𑀢𑀸𑀤𑀺𑀲𑁄𑀯. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀕𑀢𑀲𑁆𑀲, 𑀧𑀸𑀧𑀺𑀫, 𑀬𑁂 𑀆𑀲𑀯𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸 𑁋 𑀢𑁂 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀲𑁂𑀬𑁆𑀬𑀣𑀸𑀧𑀺, 𑀧𑀸𑀧𑀺𑀫, 𑀢𑀸𑀮𑁄 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑁄 𑀅𑀪𑀩𑁆𑀩𑁄 𑀧𑀼𑀦 𑀯𑀺𑀭𑀽𑀴𑁆𑀳𑀺𑀬𑀸; 𑀏𑀯𑀫𑁂𑀯 𑀔𑁄, 𑀧𑀸𑀧𑀺𑀫, 𑀢𑀣𑀸𑀕𑀢𑀲𑁆𑀲 𑀬𑁂 𑀆𑀲𑀯𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸 𑁋 𑀢𑁂 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺.

‘‘𑀇𑀢𑀺 𑀳𑀺𑀤𑀁 𑀫𑀸𑀭𑀲𑁆𑀲 𑀘 𑀅𑀦𑀸𑀮𑀧𑀦𑀢𑀸𑀬 𑀩𑁆𑀭𑀳𑁆𑀫𑀼𑀦𑁄 𑀘 𑀅𑀪𑀺𑀦𑀺𑀫𑀦𑁆𑀢𑀦𑀢𑀸𑀬, 𑀢𑀲𑁆𑀫𑀸 𑀇𑀫𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀁𑀢𑁂𑀯 𑀅𑀥𑀺𑀯𑀘𑀦’’𑀦𑁆𑀢𑀺.

𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.