𑁧𑁦. 𑀫𑀸𑀭𑀢𑀚𑁆𑀚𑀦𑀻𑀬𑀲𑀼𑀢𑁆𑀢𑀁

𑁫𑁦𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀸𑀭𑁄 𑀧𑀸𑀧𑀺𑀫𑀸 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀓𑀼𑀘𑁆𑀙𑀺𑀕𑀢𑁄 𑀳𑁄𑀢𑀺 𑀓𑁄𑀝𑁆𑀞𑀫𑀦𑀼𑀧𑀯𑀺𑀝𑁆𑀞𑁄. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀫𑁂 𑀓𑀼𑀘𑁆𑀙𑀺 𑀕𑀭𑀼𑀕𑀭𑁄 𑀯𑀺𑀬 [𑀕𑀭𑀼 𑀕𑀭𑀼 𑀯𑀺𑀬 (𑀲𑀻. 𑀧𑀻. 𑀝𑀻𑀓𑀸𑀬𑀁 𑀧𑀸𑀞𑀦𑁆𑀢𑀭𑀁)]? 𑀫𑀸𑀲𑀸𑀘𑀺𑀢𑀁 𑀫𑀜𑁆𑀜𑁂’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀘𑁆𑀘𑀢𑁆𑀢𑀁 𑀬𑁄𑀦𑀺𑀲𑁄 𑀫𑀦𑀲𑀸𑀓𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀓𑀼𑀘𑁆𑀙𑀺𑀕𑀢𑀁 𑀓𑁄𑀝𑁆𑀞𑀫𑀦𑀼𑀧𑀯𑀺𑀝𑁆𑀞𑀁. 𑀤𑀺𑀲𑁆𑀯𑀸𑀦 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀓𑁆𑀔𑀫, 𑀧𑀸𑀧𑀺𑀫; 𑀦𑀺𑀓𑁆𑀔𑀫, 𑀧𑀸𑀧𑀺𑀫! 𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀲𑁂𑀲𑀺, 𑀫𑀸 𑀢𑀣𑀸𑀕𑀢𑀲𑀸𑀯𑀓𑀁. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺. 𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀚𑀸𑀦𑀫𑁂𑀯 𑀔𑁄 𑀫𑀁 𑀅𑀬𑀁 𑀲𑀫𑀡𑁄 𑀅𑀧𑀲𑁆𑀲𑀁 𑀏𑀯𑀫𑀸𑀳 𑁋 ‘𑀦𑀺𑀓𑁆𑀔𑀫, 𑀧𑀸𑀧𑀺𑀫; 𑀦𑀺𑀓𑁆𑀔𑀫, 𑀧𑀸𑀧𑀺𑀫! 𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀲𑁂𑀲𑀺, 𑀫𑀸 𑀢𑀣𑀸𑀕𑀢𑀲𑀸𑀯𑀓𑀁. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’𑀢𑀺. 𑀬𑁄𑀧𑀺𑀲𑁆𑀲 𑀲𑁄 𑀲𑀢𑁆𑀣𑀸 𑀲𑁄𑀧𑀺 𑀫𑀁 𑀦𑁂𑀯 𑀔𑀺𑀧𑁆𑀧𑀁 𑀚𑀸𑀦𑁂𑀬𑁆𑀬, 𑀓𑀼𑀢𑁄 𑀧𑀦 [𑀓𑀼𑀢𑁄 𑀘 𑀧𑀦 (𑀲𑁆𑀬𑀸.)] 𑀫𑀁 𑀅𑀬𑀁 𑀲𑀸𑀯𑀓𑁄 𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀫𑁆𑀧𑀺 𑀔𑁄 𑀢𑀸𑀳𑀁, 𑀧𑀸𑀧𑀺𑀫, 𑀚𑀸𑀦𑀸𑀫𑀺, 𑀫𑀸 𑀢𑁆𑀯𑀁 𑀫𑀜𑁆𑀜𑀺𑀢𑁆𑀣𑁄 𑁋 ‘𑀦 𑀫𑀁 𑀚𑀸𑀦𑀸𑀢𑀻’𑀢𑀺. 𑀫𑀸𑀭𑁄 𑀢𑁆𑀯𑀫𑀲𑀺, 𑀧𑀸𑀧𑀺𑀫; 𑀢𑀼𑀬𑁆𑀳𑀜𑁆𑀳𑀺, 𑀧𑀸𑀧𑀺𑀫, 𑀏𑀯𑀁 𑀳𑁄𑀢𑀺 𑁋 ‘𑀅𑀚𑀸𑀦𑀫𑁂𑀯 𑀔𑁄 𑀫𑀁 𑀅𑀬𑀁 𑀲𑀫𑀡𑁄 𑀅𑀧𑀲𑁆𑀲𑀁 𑀏𑀯𑀫𑀸𑀳 𑁋 𑀦𑀺𑀓𑁆𑀔𑀫, 𑀧𑀸𑀧𑀺𑀫; 𑀦𑀺𑀓𑁆𑀔𑀫, 𑀧𑀸𑀧𑀺𑀫! 𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀲𑁂𑀲𑀺, 𑀫𑀸 𑀢𑀣𑀸𑀕𑀢𑀲𑀸𑀯𑀓𑀁. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸𑀢𑀺. 𑀬𑁄𑀧𑀺𑀲𑁆𑀲 𑀲𑁄 𑀲𑀢𑁆𑀣𑀸 𑀲𑁄𑀧𑀺 𑀫𑀁 𑀦𑁂𑀯 𑀔𑀺𑀧𑁆𑀧𑀁 𑀚𑀸𑀦𑁂𑀬𑁆𑀬, 𑀓𑀼𑀢𑁄 𑀧𑀦 𑀫𑀁 𑀅𑀬𑀁 𑀲𑀸𑀯𑀓𑁄 𑀚𑀸𑀦𑀺𑀲𑁆𑀲𑀢𑀻’’’𑀢𑀺?

𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀚𑀸𑀦𑀫𑁂 𑀔𑁄 𑀫𑀁 𑀅𑀬𑀁 𑀲𑀫𑀡𑁄 𑀧𑀲𑁆𑀲𑀁 𑀏𑀯𑀫𑀸𑀳 𑁋 ‘𑀦𑀺𑀓𑁆𑀔𑀫, 𑀧𑀸𑀧𑀺𑀫; 𑀦𑀺𑀓𑁆𑀔𑀫, 𑀧𑀸𑀧𑀺𑀫! 𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀲𑁂𑀲𑀺, 𑀫𑀸 𑀢𑀣𑀸𑀕𑀢𑀲𑀸𑀯𑀓𑀁. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀫𑀼𑀔𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀧𑀘𑁆𑀘𑀕𑁆𑀕𑀴𑁂 𑀅𑀝𑁆𑀞𑀸𑀲𑀺.

𑁫𑁦𑁭. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀧𑀘𑁆𑀘𑀕𑁆𑀕𑀴𑁂 𑀞𑀺𑀢𑀁; 𑀤𑀺𑀲𑁆𑀯𑀸𑀦 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘𑀏𑀢𑁆𑀣𑀸𑀧𑀺 𑀔𑁄 𑀢𑀸𑀳𑀁, 𑀧𑀸𑀧𑀺𑀫, 𑀧𑀲𑁆𑀲𑀸𑀫𑀺; 𑀫𑀸 𑀢𑁆𑀯𑀁 𑀫𑀜𑁆𑀜𑀺𑀢𑁆𑀣𑁄 ‘‘𑀦 𑀫𑀁 𑀧𑀲𑁆𑀲𑀢𑀻’’𑀢𑀺. 𑀏𑀲𑁄 𑀢𑁆𑀯𑀁, 𑀧𑀸𑀧𑀺𑀫, 𑀧𑀘𑁆𑀘𑀕𑁆𑀕𑀴𑁂 𑀞𑀺𑀢𑁄. 𑀪𑀽𑀢𑀧𑀼𑀩𑁆𑀩𑀸𑀳𑀁, 𑀧𑀸𑀧𑀺𑀫, 𑀤𑀽𑀲𑀻 𑀦𑀸𑀫 𑀫𑀸𑀭𑁄 𑀅𑀳𑁄𑀲𑀺𑀁, 𑀢𑀲𑁆𑀲 𑀫𑁂 𑀓𑀸𑀴𑀻 𑀦𑀸𑀫 𑀪𑀕𑀺𑀦𑀻. 𑀢𑀲𑁆𑀲𑀸 𑀢𑁆𑀯𑀁 𑀧𑀼𑀢𑁆𑀢𑁄. 𑀲𑁄 𑀫𑁂 𑀢𑁆𑀯𑀁 𑀪𑀸𑀕𑀺𑀦𑁂𑀬𑁆𑀬𑁄 𑀅𑀳𑁄𑀲𑀺. 𑀢𑁂𑀦 𑀔𑁄 𑀧𑀦, 𑀧𑀸𑀧𑀺𑀫, 𑀲𑀫𑀬𑁂𑀦 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀓𑀓𑀼𑀲𑀦𑁆𑀥𑀲𑁆𑀲 𑀔𑁄 𑀧𑀦, 𑀧𑀸𑀧𑀺𑀫, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀺𑀥𑀼𑀭𑀲𑀜𑁆𑀚𑀻𑀯𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀬𑀸𑀯𑀢𑀸 𑀔𑁄 𑀧𑀦, 𑀧𑀸𑀧𑀺𑀫, 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸. 𑀢𑁂𑀲𑀼 𑀦 𑀘 𑀓𑁄𑀘𑀺 𑀆𑀬𑀲𑁆𑀫𑀢𑀸 𑀯𑀺𑀥𑀼𑀭𑁂𑀦 𑀲𑀫𑀲𑀫𑁄 𑀳𑁄𑀢𑀺 𑀬𑀤𑀺𑀤𑀁 𑀥𑀫𑁆𑀫𑀤𑁂𑀲𑀦𑀸𑀬. 𑀇𑀫𑀺𑀦𑀸 𑀔𑁄 𑀏𑀯𑀁 [𑀏𑀢𑀁 (𑀲𑀻. 𑀲𑁆𑀬𑀸. 𑀧𑀻.)], 𑀧𑀸𑀧𑀺𑀫, 𑀧𑀭𑀺𑀬𑀸𑀬𑁂𑀦 𑀆𑀬𑀲𑁆𑀫𑀢𑁄 𑀯𑀺𑀥𑀼𑀭𑀲𑁆𑀲 𑀯𑀺𑀥𑀼𑀭𑁄𑀢𑁂𑀯 [𑀯𑀺𑀥𑀼𑀭𑀲𑁆𑀲 𑀯𑀺𑀥𑀼𑀭𑁄 𑀯𑀺𑀥𑀼𑀭𑁄𑀢𑁆𑀯𑁂𑀯 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.

‘‘𑀆𑀬𑀲𑁆𑀫𑀸 𑀧𑀦, 𑀧𑀸𑀧𑀺𑀫, 𑀲𑀜𑁆𑀚𑀻𑀯𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀧𑀸𑀧𑀺𑀫, 𑀆𑀬𑀲𑁆𑀫𑀸 𑀲𑀜𑁆𑀚𑀻𑀯𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀁𑀲𑀼 𑀔𑁄, 𑀧𑀸𑀧𑀺𑀫, 𑀕𑁄𑀧𑀸𑀮𑀓𑀸 𑀧𑀲𑀼𑀧𑀸𑀮𑀓𑀸 𑀓𑀲𑁆𑀲𑀓𑀸 𑀧𑀣𑀸𑀯𑀺𑀦𑁄 𑀆𑀬𑀲𑁆𑀫𑀦𑁆𑀢𑀁 𑀲𑀜𑁆𑀚𑀻𑀯𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀁 𑀦𑀺𑀲𑀺𑀦𑁆𑀦𑀁; 𑀤𑀺𑀲𑁆𑀯𑀸𑀦 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄! 𑀅𑀬𑀁 𑀲𑀫𑀡𑁄 𑀦𑀺𑀲𑀺𑀦𑁆𑀦𑀓𑁄𑀯 𑀓𑀸𑀮𑀗𑁆𑀓𑀢𑁄! 𑀳𑀦𑁆𑀤 𑀦𑀁 𑀤𑀳𑀸𑀫𑀸’𑀢𑀺. 𑀅𑀣 𑀔𑁄 𑀢𑁂, 𑀧𑀸𑀧𑀺𑀫, 𑀕𑁄𑀧𑀸𑀮𑀓𑀸 𑀧𑀲𑀼𑀧𑀸𑀮𑀓𑀸 𑀓𑀲𑁆𑀲𑀓𑀸 𑀧𑀣𑀸𑀯𑀺𑀦𑁄 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀕𑁄𑀫𑀬𑀜𑁆𑀘 𑀲𑀁𑀓𑀟𑁆𑀠𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲 𑀓𑀸𑀬𑁂 𑀉𑀧𑀘𑀺𑀦𑀺𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄, 𑀧𑀸𑀧𑀺𑀫, 𑀆𑀬𑀲𑁆𑀫𑀸 𑀲𑀜𑁆𑀚𑀻𑀯𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀻𑀯𑀭𑀸𑀦𑀺 𑀧𑀧𑁆𑀨𑁄𑀝𑁂𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀤𑁆𑀤𑀲𑀁𑀲𑀼 𑀔𑁄 𑀢𑁂, 𑀧𑀸𑀧𑀺𑀫, 𑀕𑁄𑀧𑀸𑀮𑀓𑀸 𑀧𑀲𑀼𑀧𑀸𑀮𑀓𑀸 𑀓𑀲𑁆𑀲𑀓𑀸 𑀧𑀣𑀸𑀯𑀺𑀦𑁄 𑀆𑀬𑀲𑁆𑀫𑀦𑁆𑀢𑀁 𑀲𑀜𑁆𑀚𑀻𑀯𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄! 𑀅𑀬𑀁 𑀲𑀫𑀡𑁄 𑀦𑀺𑀲𑀺𑀦𑁆𑀦𑀓𑁄𑀯 𑀓𑀸𑀮𑀗𑁆𑀓𑀢𑁄, 𑀲𑁆𑀯𑀸𑀬𑀁 𑀧𑀝𑀺𑀲𑀜𑁆𑀚𑀻𑀯𑀺𑀢𑁄’𑀢𑀺. 𑀇𑀫𑀺𑀦𑀸 𑀔𑁄 𑀏𑀯𑀁, 𑀧𑀸𑀧𑀺𑀫, 𑀧𑀭𑀺𑀬𑀸𑀬𑁂𑀦 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲 𑀲𑀜𑁆𑀚𑀻𑀯𑁄𑀢𑁂𑀯 [𑀲𑀜𑁆𑀚𑀻𑀯𑁄 𑀲𑀜𑁆𑀚𑀻𑀯𑁄𑀢𑁆𑀯𑁂𑀯 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.

𑁫𑁦𑁮. ‘‘𑀅𑀣 𑀔𑁄, 𑀧𑀸𑀧𑀺𑀫, 𑀤𑀽𑀲𑀺𑀲𑁆𑀲 𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀇𑀫𑁂𑀲𑀁 𑀔𑁄 𑀅𑀳𑀁 𑀪𑀺𑀓𑁆𑀔𑀽𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀓𑀮𑁆𑀬𑀸𑀡𑀥𑀫𑁆𑀫𑀸𑀦𑀁 𑀦𑁂𑀯 𑀚𑀸𑀦𑀸𑀫𑀺 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸. 𑀬𑀁𑀦𑀽𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑁂𑀬𑁆𑀬𑀁 𑁋 𑀏𑀣, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀅𑀓𑁆𑀓𑁄𑀲𑀣 𑀧𑀭𑀺𑀪𑀸𑀲𑀣 𑀭𑁄𑀲𑁂𑀣 𑀯𑀺𑀳𑁂𑀲𑁂𑀣. 𑀅𑀧𑁆𑀧𑁂𑀯 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀅𑀓𑁆𑀓𑁄𑀲𑀺𑀬𑀫𑀸𑀦𑀸𑀦𑀁 𑀧𑀭𑀺𑀪𑀸𑀲𑀺𑀬𑀫𑀸𑀦𑀸𑀦𑀁 𑀭𑁄𑀲𑀺𑀬𑀫𑀸𑀦𑀸𑀦𑀁 𑀯𑀺𑀳𑁂𑀲𑀺𑀬𑀫𑀸𑀦𑀸𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀬𑀣𑀸 𑀢𑀁 𑀤𑀽𑀲𑀻 𑀫𑀸𑀭𑁄 𑀮𑀪𑁂𑀣 𑀑𑀢𑀸𑀭’𑀦𑁆𑀢𑀺. 𑀅𑀣 𑀔𑁄 𑀢𑁂, 𑀧𑀸𑀧𑀺𑀫, 𑀤𑀽𑀲𑀻 𑀫𑀸𑀭𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑀺 𑁋 ‘𑀏𑀣, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀅𑀓𑁆𑀓𑁄𑀲𑀣 𑀧𑀭𑀺𑀪𑀸𑀲𑀣 𑀭𑁄𑀲𑁂𑀣 𑀯𑀺𑀳𑁂𑀲𑁂𑀣. 𑀅𑀧𑁆𑀧𑁂𑀯 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀅𑀓𑁆𑀓𑁄𑀲𑀺𑀬𑀫𑀸𑀦𑀸𑀦𑀁 𑀧𑀭𑀺𑀪𑀸𑀲𑀺𑀬𑀫𑀸𑀦𑀸𑀦𑀁 𑀭𑁄𑀲𑀺𑀬𑀫𑀸𑀦𑀸𑀦𑀁 𑀯𑀺𑀳𑁂𑀲𑀺𑀬𑀫𑀸𑀦𑀸𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀬𑀣𑀸 𑀢𑀁 𑀤𑀽𑀲𑀻 𑀫𑀸𑀭𑁄 𑀮𑀪𑁂𑀣 𑀑𑀢𑀸𑀭’𑀦𑁆𑀢𑀺.

‘‘𑀅𑀣 𑀔𑁄 𑀢𑁂, 𑀧𑀸𑀧𑀺𑀫, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀅𑀦𑁆𑀯𑀸𑀯𑀺𑀲𑀺𑀝𑁆𑀞𑀸 𑀤𑀽𑀲𑀺𑀦𑀸 𑀫𑀸𑀭𑁂𑀦 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀭𑁄𑀲𑁂𑀦𑁆𑀢𑀺 𑀯𑀺𑀳𑁂𑀲𑁂𑀦𑁆𑀢𑀺 𑁋 ‘𑀇𑀫𑁂 𑀧𑀦 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀇𑀩𑁆𑀪𑀸 𑀓𑀺𑀡𑁆𑀳𑀸 [𑀓𑀡𑁆𑀳𑀸 (𑀲𑁆𑀬𑀸. 𑀓𑀁. 𑀓.)] 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸 ‘‘𑀛𑀸𑀬𑀺𑀦𑁄𑀲𑁆𑀫𑀸 𑀛𑀸𑀬𑀺𑀦𑁄𑀲𑁆𑀫𑀸’’𑀢𑀺 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀫𑀥𑀼𑀭𑀓𑀚𑀸𑀢𑀸 𑀛𑀸𑀬𑀦𑁆𑀢𑀺 𑀧𑀚𑁆𑀛𑀸𑀬𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀅𑀧𑀚𑁆𑀛𑀸𑀬𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀮𑀽𑀓𑁄 𑀭𑀼𑀓𑁆𑀔𑀲𑀸𑀔𑀸𑀬𑀁 𑀫𑀽𑀲𑀺𑀓𑀁 𑀫𑀕𑁆𑀕𑀬𑀫𑀸𑀦𑁄 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺; 𑀏𑀯𑀫𑁂𑀯𑀺𑀫𑁂 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀇𑀩𑁆𑀪𑀸 𑀓𑀺𑀡𑁆𑀳𑀸 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸 ‘‘𑀛𑀸𑀬𑀺𑀦𑁄𑀲𑁆𑀫𑀸 𑀛𑀸𑀬𑀺𑀦𑁄𑀲𑁆𑀫𑀸’’𑀢𑀺 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀫𑀥𑀼𑀭𑀓𑀚𑀸𑀢𑀸 𑀛𑀸𑀬𑀦𑁆𑀢𑀺 𑀧𑀚𑁆𑀛𑀸𑀬𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀅𑀧𑀚𑁆𑀛𑀸𑀬𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀓𑁄𑀢𑁆𑀣𑀼 𑀦𑀤𑀻𑀢𑀻𑀭𑁂 𑀫𑀘𑁆𑀙𑁂 𑀫𑀕𑁆𑀕𑀬𑀫𑀸𑀦𑁄 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺; 𑀏𑀯𑀫𑁂𑀯𑀺𑀫𑁂 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀇𑀩𑁆𑀪𑀸 𑀓𑀺𑀡𑁆𑀳𑀸 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸 ‘‘𑀛𑀸𑀬𑀺𑀦𑁄𑀲𑁆𑀫𑀸 𑀛𑀸𑀬𑀺𑀦𑁄𑀲𑁆𑀫𑀸’’𑀢𑀺 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀫𑀥𑀼𑀭𑀓𑀚𑀸𑀢𑀸 𑀛𑀸𑀬𑀦𑁆𑀢𑀺 𑀧𑀚𑁆𑀛𑀸𑀬𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀅𑀧𑀚𑁆𑀛𑀸𑀬𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀺𑀴𑀸𑀭𑁄 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀻𑀭𑁂 𑀫𑀽𑀲𑀺𑀓𑀁 𑀫𑀕𑁆𑀕𑀬𑀫𑀸𑀦𑁄 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺; 𑀏𑀯𑀫𑁂𑀯𑀺𑀫𑁂 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀇𑀩𑁆𑀪𑀸 𑀓𑀺𑀡𑁆𑀳𑀸 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸 ‘‘𑀛𑀸𑀬𑀺𑀦𑁄𑀲𑁆𑀫𑀸 𑀛𑀸𑀬𑀺𑀦𑁄𑀲𑁆𑀫𑀸’’𑀢𑀺 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀫𑀥𑀼𑀭𑀓𑀚𑀸𑀢𑀸 𑀛𑀸𑀬𑀦𑁆𑀢𑀺 𑀧𑀚𑁆𑀛𑀸𑀬𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀅𑀧𑀚𑁆𑀛𑀸𑀬𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀤𑁆𑀭𑀪𑁄 𑀯𑀳𑀘𑁆𑀙𑀺𑀦𑁆𑀦𑁄 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀻𑀭𑁂 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺, 𑀏𑀯𑀫𑁂𑀯𑀺𑀫𑁂 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀇𑀩𑁆𑀪𑀸 𑀓𑀺𑀡𑁆𑀳𑀸 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸 ‘‘𑀛𑀸𑀬𑀺𑀦𑁄𑀲𑁆𑀫𑀸 𑀛𑀸𑀬𑀺𑀦𑁄𑀲𑁆𑀫𑀸’’𑀢𑀺 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀫𑀥𑀼𑀭𑀓𑀚𑀸𑀢𑀸 𑀛𑀸𑀬𑀦𑁆𑀢𑀺 𑀧𑀚𑁆𑀛𑀸𑀬𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀅𑀧𑀚𑁆𑀛𑀸𑀬𑀦𑁆𑀢𑀻’’𑀢𑀺.

‘‘𑀬𑁂 𑀔𑁄 𑀧𑀦, 𑀧𑀸𑀧𑀺𑀫, 𑀢𑁂𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀓𑀸𑀮𑀗𑁆𑀓𑀭𑁄𑀦𑁆𑀢𑀺 𑀬𑁂𑀪𑀼𑀬𑁆𑀬𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺.

𑁫𑁦𑁯. ‘‘𑀅𑀣 𑀔𑁄, 𑀧𑀸𑀧𑀺𑀫, 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘𑀅𑀦𑁆𑀯𑀸𑀯𑀺𑀝𑁆𑀞𑀸 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀤𑀽𑀲𑀺𑀦𑀸 𑀫𑀸𑀭𑁂𑀦 𑁋 𑀏𑀣, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀅𑀓𑁆𑀓𑁄𑀲𑀣 𑀧𑀭𑀺𑀪𑀸𑀲𑀣 𑀭𑁄𑀲𑁂𑀣 𑀯𑀺𑀳𑁂𑀲𑁂𑀣, 𑀅𑀧𑁆𑀧𑁂𑀯 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀅𑀓𑁆𑀓𑁄𑀲𑀺𑀬𑀫𑀸𑀦𑀸𑀦𑀁 𑀧𑀭𑀺𑀪𑀸𑀲𑀺𑀬𑀫𑀸𑀦𑀸𑀦𑀁 𑀭𑁄𑀲𑀺𑀬𑀫𑀸𑀦𑀸𑀦𑀁 𑀯𑀺𑀳𑁂𑀲𑀺𑀬𑀫𑀸𑀦𑀸𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀬𑀣𑀸 𑀢𑀁 𑀤𑀽𑀲𑀻 𑀫𑀸𑀭𑁄 𑀮𑀪𑁂𑀣 𑀑𑀢𑀸𑀭’𑀦𑁆𑀢𑀺. 𑀏𑀣, 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣𑀸’𑀢𑀺.

‘‘𑀅𑀣 𑀔𑁄 𑀢𑁂, 𑀧𑀸𑀧𑀺𑀫, 𑀪𑀺𑀓𑁆𑀔𑀽 𑀓𑀓𑀼𑀲𑀦𑁆𑀥𑁂𑀦 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸 𑀅𑀭𑀜𑁆𑀜𑀕𑀢𑀸𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑀸𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑀸𑀧𑀺 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀁𑀲𑀼, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀁𑀲𑀼. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀁𑀲𑀼, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀁𑀲𑀼.

𑁫𑁧𑁦. ‘‘𑀅𑀣 𑀔𑁄, 𑀧𑀸𑀧𑀺𑀫, 𑀤𑀽𑀲𑀺𑀲𑁆𑀲 𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀏𑀯𑀫𑁆𑀧𑀺 𑀔𑁄 𑀅𑀳𑀁 𑀓𑀭𑁄𑀦𑁆𑀢𑁄 𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀓𑀮𑁆𑀬𑀸𑀡𑀥𑀫𑁆𑀫𑀸𑀦𑀁 𑀦𑁂𑀯 𑀚𑀸𑀦𑀸𑀫𑀺 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸, 𑀬𑀁𑀦𑀽𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑁂𑀬𑁆𑀬𑀁 𑁋 𑀏𑀣, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀲𑀓𑁆𑀓𑀭𑁄𑀣 𑀕𑀭𑀼𑀁 𑀓𑀭𑁄𑀣 𑀫𑀸𑀦𑁂𑀣 𑀧𑀽𑀚𑁂𑀣, 𑀅𑀧𑁆𑀧𑁂𑀯 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀲𑀓𑁆𑀓𑀭𑀺𑀬𑀫𑀸𑀦𑀸𑀦𑀁 𑀕𑀭𑀼𑀓𑀭𑀺𑀬𑀫𑀸𑀦𑀸𑀦𑀁 𑀫𑀸𑀦𑀺𑀬𑀫𑀸𑀦𑀸𑀦𑀁 𑀧𑀽𑀚𑀺𑀬𑀫𑀸𑀦𑀸𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀬𑀣𑀸 𑀢𑀁 𑀤𑀽𑀲𑀻 𑀫𑀸𑀭𑁄 𑀮𑀪𑁂𑀣 𑀑𑀢𑀸𑀭’𑀦𑁆𑀢𑀺. 𑀅𑀣 𑀔𑁄 𑀢𑁂, 𑀧𑀸𑀧𑀺𑀫, 𑀤𑀽𑀲𑀻 𑀫𑀸𑀭𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑀺 𑁋 ‘𑀏𑀣, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀲𑀓𑁆𑀓𑀭𑁄𑀣 𑀕𑀭𑀼𑀁 𑀓𑀭𑁄𑀣 𑀫𑀸𑀦𑁂𑀣 𑀧𑀽𑀚𑁂𑀣, 𑀅𑀧𑁆𑀧𑁂𑀯 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀲𑀓𑁆𑀓𑀭𑀺𑀬𑀫𑀸𑀦𑀸𑀦𑀁 𑀕𑀭𑀼𑀓𑀭𑀺𑀬𑀫𑀸𑀦𑀸𑀦𑀁 𑀫𑀸𑀦𑀺𑀬𑀫𑀸𑀦𑀸𑀦𑀁 𑀧𑀽𑀚𑀺𑀬𑀫𑀸𑀦𑀸𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀬𑀣𑀸 𑀢𑀁 𑀤𑀽𑀲𑀻 𑀫𑀸𑀭𑁄 𑀮𑀪𑁂𑀣 𑀑𑀢𑀸𑀭’𑀦𑁆𑀢𑀺. 𑀅𑀣 𑀔𑁄 𑀢𑁂, 𑀧𑀸𑀧𑀺𑀫, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀅𑀦𑁆𑀯𑀸𑀯𑀺𑀝𑁆𑀞𑀸 𑀤𑀽𑀲𑀺𑀦𑀸 𑀫𑀸𑀭𑁂𑀦 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺.

‘‘𑀬𑁂 𑀔𑁄 𑀧𑀦, 𑀧𑀸𑀧𑀺𑀫, 𑀢𑁂𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀓𑀸𑀮𑀗𑁆𑀓𑀭𑁄𑀦𑁆𑀢𑀺 𑀬𑁂𑀪𑀼𑀬𑁆𑀬𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺.

𑁫𑁧𑁧. ‘‘𑀅𑀣 𑀔𑁄, 𑀧𑀸𑀧𑀺𑀫, 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘𑀅𑀦𑁆𑀯𑀸𑀯𑀺𑀝𑁆𑀞𑀸 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀤𑀽𑀲𑀺𑀦𑀸 𑀫𑀸𑀭𑁂𑀦 𑁋 𑀏𑀣, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀲𑀓𑁆𑀓𑀭𑁄𑀣 𑀕𑀭𑀼𑀁 𑀓𑀭𑁄𑀣 𑀫𑀸𑀦𑁂𑀣 𑀧𑀽𑀚𑁂𑀣, 𑀅𑀧𑁆𑀧𑁂𑀯 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀲𑀓𑁆𑀓𑀭𑀺𑀬𑀫𑀸𑀦𑀸𑀦𑀁 𑀕𑀭𑀼𑀓𑀭𑀺𑀬𑀫𑀸𑀦𑀸𑀦𑀁 𑀫𑀸𑀦𑀺𑀬𑀫𑀸𑀦𑀸𑀦𑀁 𑀧𑀽𑀚𑀺𑀬𑀫𑀸𑀦𑀸𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀬𑀣𑀸 𑀢𑀁 𑀤𑀽𑀲𑀻 𑀫𑀸𑀭𑁄 𑀮𑀪𑁂𑀣 𑀑𑀢𑀸𑀭𑀦𑁆𑀢𑀺. 𑀏𑀣, 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄 𑀓𑀸𑀬𑁂 𑀯𑀺𑀳𑀭𑀣, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀺𑀦𑁄, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀺𑀦𑁄 [𑀅𑀦𑀪𑀺𑀭𑀢𑀲𑀜𑁆𑀜𑀻𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀺𑀦𑁄’𑀢𑀺.

‘‘𑀅𑀣 𑀔𑁄 𑀢𑁂, 𑀧𑀸𑀧𑀺𑀫, 𑀪𑀺𑀓𑁆𑀔𑀽 𑀓𑀓𑀼𑀲𑀦𑁆𑀥𑁂𑀦 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸 𑀅𑀭𑀜𑁆𑀜𑀕𑀢𑀸𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑀸𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑀸𑀧𑀺 𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄 𑀓𑀸𑀬𑁂 𑀯𑀺𑀳𑀭𑀺𑀁𑀲𑀼, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀺𑀦𑁄, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀺𑀦𑁄, 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀺𑀦𑁄.

𑁫𑁧𑁨. ‘‘𑀅𑀣 𑀔𑁄, 𑀧𑀸𑀧𑀺𑀫, 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀬𑀲𑁆𑀫𑀢𑀸 𑀯𑀺𑀥𑀼𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀔𑁄, 𑀧𑀸𑀧𑀺𑀫, 𑀤𑀽𑀲𑀻 𑀫𑀸𑀭𑁄 𑀅𑀜𑁆𑀜𑀢𑀭𑀁 𑀓𑀼𑀫𑀸𑀭𑀓𑀁 [𑀓𑀼𑀫𑀸𑀭𑀁 (𑀲𑀻. 𑀧𑀻.)] 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸 𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀆𑀬𑀲𑁆𑀫𑀢𑁄 𑀯𑀺𑀥𑀼𑀭𑀲𑁆𑀲 𑀲𑀻𑀲𑁂 𑀧𑀳𑀸𑀭𑀫𑀤𑀸𑀲𑀺; 𑀲𑀻𑀲𑀁 𑀯𑁄𑀪𑀺𑀦𑁆𑀤𑀺 [𑀲𑀻𑀲𑀁 𑀢𑁂 𑀪𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 (𑀓.)]. 𑀅𑀣 𑀔𑁄, 𑀧𑀸𑀧𑀺𑀫, 𑀆𑀬𑀲𑁆𑀫𑀸 𑀯𑀺𑀥𑀼𑀭𑁄 𑀪𑀺𑀦𑁆𑀦𑁂𑀦 𑀲𑀻𑀲𑁂𑀦 𑀮𑁄𑀳𑀺𑀢𑁂𑀦 𑀕𑀴𑀦𑁆𑀢𑁂𑀦 𑀓𑀓𑀼𑀲𑀦𑁆𑀥𑀁𑀬𑁂𑀯 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀅𑀣 𑀔𑁄, 𑀧𑀸𑀧𑀺𑀫, 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀸𑀕𑀸𑀧𑀮𑁄𑀓𑀺𑀢𑀁 𑀅𑀧𑀮𑁄𑀓𑁂𑀲𑀺 𑁋 ‘𑀦 𑀯𑀸𑀬𑀁 𑀤𑀽𑀲𑀻 𑀫𑀸𑀭𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’𑀢𑀺. 𑀲𑀳𑀸𑀧𑀮𑁄𑀓𑀦𑀸𑀬 𑀘 𑀧𑀦, 𑀧𑀸𑀧𑀺𑀫, 𑀤𑀽𑀲𑀻 𑀫𑀸𑀭𑁄 𑀢𑀫𑁆𑀳𑀸 𑀘 𑀞𑀸𑀦𑀸 𑀘𑀯𑀺 𑀫𑀳𑀸𑀦𑀺𑀭𑀬𑀜𑁆𑀘 𑀉𑀧𑀧𑀚𑁆𑀚𑀺.

‘‘𑀢𑀲𑁆𑀲 𑀔𑁄 𑀧𑀦, 𑀧𑀸𑀧𑀺𑀫, 𑀫𑀳𑀸𑀦𑀺𑀭𑀬𑀲𑁆𑀲 𑀢𑀬𑁄 𑀦𑀸𑀫𑀥𑁂𑀬𑁆𑀬𑀸 𑀳𑁄𑀦𑁆𑀢𑀺 𑁋 𑀙𑀨𑀲𑁆𑀲𑀸𑀬𑀢𑀦𑀺𑀓𑁄 𑀇𑀢𑀺𑀧𑀺, 𑀲𑀗𑁆𑀓𑀼𑀲𑀫𑀸𑀳𑀢𑁄 𑀇𑀢𑀺𑀧𑀺, 𑀧𑀘𑁆𑀘𑀢𑁆𑀢𑀯𑁂𑀤𑀦𑀺𑀬𑁄 𑀇𑀢𑀺𑀧𑀺. 𑀅𑀣 𑀔𑁄 𑀫𑀁, 𑀧𑀸𑀧𑀺𑀫, 𑀦𑀺𑀭𑀬𑀧𑀸𑀮𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 𑀬𑀤𑀸 𑀔𑁄 𑀢𑁂 [𑀬𑀢𑁄 𑀢𑁂 (𑀓.)], 𑀫𑀸𑀭𑀺𑀲, 𑀲𑀗𑁆𑀓𑀼𑀦𑀸 𑀲𑀗𑁆𑀓𑀼 𑀳𑀤𑀬𑁂 𑀲𑀫𑀸𑀕𑀘𑁆𑀙𑁂𑀬𑁆𑀬. 𑀅𑀣 𑀦𑀁 𑀢𑁆𑀯𑀁 𑀚𑀸𑀦𑁂𑀬𑁆𑀬𑀸𑀲𑀺 𑁋 ‘𑀯𑀲𑁆𑀲𑀲𑀳𑀲𑁆𑀲𑀁 𑀫𑁂 𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀲𑁆𑀲𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀧𑀸𑀧𑀺𑀫, 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀢𑀲𑁆𑀫𑀺𑀁 𑀫𑀳𑀸𑀦𑀺𑀭𑀬𑁂 𑀅𑀧𑀘𑁆𑀘𑀺𑀁. 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀢𑀲𑁆𑀲𑁂𑀯 𑀫𑀳𑀸𑀦𑀺𑀭𑀬𑀲𑁆𑀲 𑀉𑀲𑁆𑀲𑀤𑁂 𑀅𑀧𑀘𑁆𑀘𑀺𑀁 𑀯𑀼𑀝𑁆𑀞𑀸𑀦𑀺𑀫𑀁 𑀦𑀸𑀫 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄. 𑀢𑀲𑁆𑀲 𑀫𑀬𑁆𑀳𑀁, 𑀧𑀸𑀧𑀺𑀫, 𑀏𑀯𑀭𑀽𑀧𑁄 𑀓𑀸𑀬𑁄 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀲𑁆𑀲. 𑀏𑀯𑀭𑀽𑀧𑀁 𑀲𑀻𑀲𑀁 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀘𑁆𑀙𑀲𑁆𑀲.

𑁫𑁧𑁩. ‘‘𑀓𑀻𑀤𑀺𑀲𑁄 𑀦𑀺𑀭𑀬𑁄 𑀆𑀲𑀺, 𑀬𑀢𑁆𑀣 𑀤𑀽𑀲𑀻 𑀅𑀧𑀘𑁆𑀘𑀣;

𑀯𑀺𑀥𑀼𑀭𑀁 𑀲𑀸𑀯𑀓𑀫𑀸𑀲𑀚𑁆𑀚, 𑀓𑀓𑀼𑀲𑀦𑁆𑀥𑀜𑁆𑀘 𑀩𑁆𑀭𑀸𑀳𑁆𑀫𑀡𑀁.

‘‘𑀲𑀢𑀁 𑀆𑀲𑀺 𑀅𑀬𑁄𑀲𑀗𑁆𑀓𑀽, 𑀲𑀩𑁆𑀩𑁂 𑀧𑀘𑁆𑀘𑀢𑁆𑀢𑀯𑁂𑀤𑀦𑀸;

𑀈𑀤𑀺𑀲𑁄 𑀦𑀺𑀭𑀬𑁄 𑀆𑀲𑀺, 𑀬𑀢𑁆𑀣 𑀤𑀽𑀲𑀻 𑀅𑀧𑀘𑁆𑀘𑀣;

𑀯𑀺𑀥𑀼𑀭𑀁 𑀲𑀸𑀯𑀓𑀫𑀸𑀲𑀚𑁆𑀚, 𑀓𑀓𑀼𑀲𑀦𑁆𑀥𑀜𑁆𑀘 𑀩𑁆𑀭𑀸𑀳𑁆𑀫𑀡𑀁.

‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

‘‘𑀫𑀚𑁆𑀛𑁂 𑀲𑀭𑀲𑁆𑀲 𑀢𑀺𑀝𑁆𑀞𑀦𑁆𑀢𑀺, 𑀯𑀺𑀫𑀸𑀦𑀸 𑀓𑀧𑁆𑀧𑀝𑁆𑀞𑀸𑀬𑀺𑀦𑁄;

𑀯𑁂𑀴𑀼𑀭𑀺𑀬𑀯𑀡𑁆𑀡𑀸 𑀭𑀼𑀘𑀺𑀭𑀸, 𑀅𑀘𑁆𑀘𑀺𑀫𑀦𑁆𑀢𑁄 𑀧𑀪𑀲𑁆𑀲𑀭𑀸;

𑀅𑀘𑁆𑀙𑀭𑀸 𑀢𑀢𑁆𑀣 𑀦𑀘𑁆𑀘𑀦𑁆𑀢𑀺, 𑀧𑀼𑀣𑀼 𑀦𑀸𑀦𑀢𑁆𑀢𑀯𑀡𑁆𑀡𑀺𑀬𑁄.

‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

‘‘𑀬𑁄 𑀯𑁂 𑀩𑀼𑀤𑁆𑀥𑁂𑀦 𑀘𑁄𑀤𑀺𑀢𑁄, 𑀪𑀺𑀓𑁆𑀔𑀼 𑀲𑀗𑁆𑀖𑀲𑁆𑀲 𑀧𑁂𑀓𑁆𑀔𑀢𑁄;

𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀁, 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑀬𑀺.

‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

‘‘𑀬𑁄 𑀯𑁂𑀚𑀬𑀦𑁆𑀢𑀁 𑀧𑀸𑀲𑀸𑀤𑀁, 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑀬𑀺;

𑀇𑀤𑁆𑀥𑀺𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀲𑀁𑀯𑁂𑀚𑁂𑀲𑀺 𑀘 𑀤𑁂𑀯𑀢𑀸.

‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

‘‘𑀬𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑁂, 𑀲𑀓𑁆𑀓𑀁 𑀲𑁄 𑀧𑀭𑀺𑀧𑀼𑀘𑁆𑀙𑀢𑀺;

𑀅𑀧𑀺 𑀯𑀸𑀲𑀯 𑀚𑀸𑀦𑀸𑀲𑀺, 𑀢𑀡𑁆𑀳𑀸𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀬𑁄;

𑀢𑀲𑁆𑀲 𑀲𑀓𑁆𑀓𑁄 𑀯𑀺𑀬𑀸𑀓𑀸𑀲𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁.

‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

‘‘𑀬𑁄 𑀩𑁆𑀭𑀳𑁆𑀫𑀁 𑀧𑀭𑀺𑀧𑀼𑀘𑁆𑀙𑀢𑀺, 𑀲𑀼𑀥𑀫𑁆𑀫𑀸𑀬𑀸𑀪𑀺𑀢𑁄 𑀲𑀪𑀁;

𑀅𑀚𑁆𑀚𑀸𑀧𑀺 𑀢𑁆𑀬𑀸𑀯𑀼𑀲𑁄 𑀤𑀺𑀝𑁆𑀞𑀺, 𑀬𑀸 𑀢𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁.

‘‘𑀢𑀲𑁆𑀲 𑀩𑁆𑀭𑀳𑁆𑀫𑀸 𑀯𑀺𑀬𑀸𑀓𑀸𑀲𑀺, 𑀅𑀦𑀼𑀧𑀼𑀩𑁆𑀩𑀁 𑀬𑀣𑀸𑀢𑀣𑀁;

𑀦 𑀫𑁂 𑀫𑀸𑀭𑀺𑀲 𑀲𑀸 𑀤𑀺𑀝𑁆𑀞𑀺, 𑀬𑀸 𑀫𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼.

‘‘𑀧𑀲𑁆𑀲𑀸𑀫𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁;

𑀲𑁄𑀳𑀁 𑀅𑀚𑁆𑀚 𑀓𑀣𑀁 𑀯𑀚𑁆𑀚𑀁, 𑀅𑀳𑀁 𑀦𑀺𑀘𑁆𑀘𑁄𑀫𑁆𑀳𑀺 𑀲𑀲𑁆𑀲𑀢𑁄.

‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

‘‘𑀬𑁄 𑀫𑀳𑀸𑀫𑁂𑀭𑀼𑀦𑁄 𑀓𑀽𑀝𑀁, 𑀯𑀺𑀫𑁄𑀓𑁆𑀔𑁂𑀦 𑀅𑀨𑀲𑁆𑀲𑀬𑀺;

𑀯𑀦𑀁 𑀧𑀼𑀩𑁆𑀩𑀯𑀺𑀤𑁂𑀳𑀸𑀦𑀁, 𑀬𑁂 𑀘 𑀪𑀽𑀫𑀺𑀲𑀬𑀸 𑀦𑀭𑀸.

‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

‘‘𑀦 𑀯𑁂 𑀅𑀕𑁆𑀕𑀺 𑀘𑁂𑀢𑀬𑀢𑀺 [𑀯𑁂𑀞𑀬𑀢𑀺 (𑀲𑀻.)], ‘𑀅𑀳𑀁 𑀩𑀸𑀮𑀁 𑀟𑀳𑀸𑀫𑀻’𑀢𑀺;

𑀩𑀸𑀮𑁄 𑀘 𑀚𑀮𑀺𑀢𑀁 𑀅𑀕𑁆𑀕𑀺𑀁, 𑀆𑀲𑀚𑁆𑀚 𑀦𑀁 𑀲 𑀟𑀬𑁆𑀳𑀢𑀺.

‘‘𑀏𑀯𑀫𑁂𑀯 𑀢𑀼𑀯𑀁 𑀫𑀸𑀭, 𑀆𑀲𑀚𑁆𑀚 𑀦𑀁 𑀢𑀣𑀸𑀕𑀢𑀁;

𑀲𑀬𑀁 𑀟𑀳𑀺𑀲𑁆𑀲𑀲𑀺 𑀅𑀢𑁆𑀢𑀸𑀦𑀁, 𑀩𑀸𑀮𑁄 𑀅𑀕𑁆𑀕𑀺𑀁𑀯 𑀲𑀁𑀨𑀼𑀲𑀁.

‘‘𑀅𑀧𑀼𑀜𑁆𑀜𑀁 𑀧𑀲𑀯𑀻 𑀫𑀸𑀭𑁄, 𑀆𑀲𑀚𑁆𑀚 𑀦𑀁 𑀢𑀣𑀸𑀕𑀢𑀁;

𑀓𑀺𑀦𑁆𑀦𑀼 𑀫𑀜𑁆𑀜𑀲𑀺 𑀧𑀸𑀧𑀺𑀫, 𑀦 𑀫𑁂 𑀧𑀸𑀧𑀁 𑀯𑀺𑀧𑀘𑁆𑀘𑀢𑀺.

‘‘𑀓𑀭𑁄𑀢𑁄 𑀘𑀻𑀬𑀢𑀺 𑀧𑀸𑀧𑀁, 𑀘𑀺𑀭𑀭𑀢𑁆𑀢𑀸𑀬 𑀅𑀦𑁆𑀢𑀓;

𑀫𑀸𑀭 𑀦𑀺𑀩𑁆𑀩𑀺𑀦𑁆𑀤 𑀩𑀼𑀤𑁆𑀥𑀫𑁆𑀳𑀸, 𑀆𑀲𑀁 𑀫𑀸𑀓𑀸𑀲𑀺 𑀪𑀺𑀓𑁆𑀔𑀼𑀲𑀼.

‘‘𑀇𑀢𑀺 𑀫𑀸𑀭𑀁 𑀅𑀢𑀚𑁆𑀚𑁂𑀲𑀺, 𑀪𑀺𑀓𑁆𑀔𑀼 𑀪𑁂𑀲𑀓𑀴𑀸𑀯𑀦𑁂;

𑀢𑀢𑁄 𑀲𑁄 𑀤𑀼𑀫𑁆𑀫𑀦𑁄 𑀬𑀓𑁆𑀔𑁄, 𑀦𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀣𑀸’’𑀢𑀺.

𑀫𑀸𑀭𑀢𑀚𑁆𑀚𑀦𑀻𑀬𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑀘𑀽𑀴𑀬𑀫𑀓𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀸𑀮𑁂𑀬𑁆𑀬 𑀯𑁂𑀭𑀜𑁆𑀚𑀤𑀼𑀯𑁂 𑀘 𑀢𑀼𑀝𑁆𑀞𑀺, 𑀘𑀽𑀴𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀜𑁆𑀘;

𑀯𑀻𑀫𑀁𑀲𑀓𑀸 𑀓𑁄𑀲𑀫𑁆𑀩𑀺 𑀘 𑀩𑁆𑀭𑀸𑀳𑁆𑀫𑀡𑁄, 𑀤𑀽𑀲𑀻 𑀘 𑀫𑀸𑀭𑁄 𑀤𑀲𑀫𑁄 𑀘 𑀯𑀕𑁆𑀕𑁄.

𑀲𑀸𑀮𑁂𑀬𑁆𑀬𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀧𑀜𑁆𑀘𑀫𑁄.