𑁫. 𑀘𑀽𑀴𑀬𑀫𑀓𑀯𑀕𑁆𑀕𑁄

𑁧. 𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑀁

𑁪𑁩𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀲𑀸𑀮𑀸 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀲𑀸𑀮𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀲𑀸𑀮𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁; 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺’. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀲𑀸𑀮𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀲𑀸𑀮𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺? 𑀓𑁄 𑀧𑀦, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺?

‘‘𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀕𑀳𑀧𑀢𑀬𑁄, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀕𑀳𑀧𑀢𑀬𑁄, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀦 𑀔𑁄 𑀫𑀬𑀁 𑀇𑀫𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫. 𑀲𑀸𑀥𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀣𑀸 𑀫𑀬𑀁 𑀇𑀫𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬𑀸𑀫𑀸’’𑀢𑀺. ‘‘𑀢𑁂𑀦 𑀳𑀺, 𑀕𑀳𑀧𑀢𑀬𑁄, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀲𑀸𑀮𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁪𑁪𑁦. ‘‘𑀢𑀺𑀯𑀺𑀥𑀁 𑀔𑁄, 𑀕𑀳𑀧𑀢𑀬𑁄, 𑀓𑀸𑀬𑁂𑀦 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺, 𑀢𑀺𑀯𑀺𑀥𑀁 𑀫𑀦𑀲𑀸 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀮𑀼𑀤𑁆𑀤𑁄 [𑀮𑀼𑀤𑁆𑀤𑁄 𑀤𑀸𑀭𑀼𑀡𑁄 (𑀓.) 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀮𑁄𑀳𑀺𑀢𑀧𑀸𑀡𑀺 𑀳𑀢𑀧𑁆𑀧𑀳𑀢𑁂 𑀦𑀺𑀯𑀺𑀝𑁆𑀞𑁄 𑀅𑀤𑀬𑀸𑀧𑀦𑁆𑀦𑁄 𑀧𑀸𑀡𑀪𑀽𑀢𑁂𑀲𑀼 [𑀲𑀩𑁆𑀩𑀧𑀸𑀡𑀪𑀽𑀢𑁂𑀲𑀼 (𑀲𑁆𑀬𑀸. 𑀓𑀁. 𑀓.)].

‘‘𑀅𑀤𑀺𑀦𑁆𑀦𑀸𑀤𑀸𑀬𑀻 𑀔𑁄 𑀧𑀦 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁, 𑀕𑀸𑀫𑀕𑀢𑀁 𑀯𑀸 𑀅𑀭𑀜𑁆𑀜𑀕𑀢𑀁 𑀯𑀸, 𑀢𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺.

‘‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀔𑁄 𑀧𑀦 𑀳𑁄𑀢𑀺. 𑀬𑀸 𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀲𑁆𑀲𑀸𑀫𑀺𑀓𑀸 𑀲𑀧𑀭𑀺𑀤𑀡𑁆𑀟𑀸 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺, 𑀢𑀣𑀸𑀭𑀽𑀧𑀸𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺. 𑀲𑀪𑀸𑀕𑀢𑁄 𑀯𑀸 𑀧𑀭𑀺𑀲𑀸𑀕𑀢𑁄 𑀯𑀸, 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸, 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 𑁋 ‘𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 𑁋 ‘𑀦 𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 𑁋 ‘𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 𑁋 ‘𑀦 𑀧𑀲𑁆𑀲𑀸𑀫𑀻’𑀢𑀺 [𑀲𑁄 𑀆𑀳 𑀅𑀚𑀸𑀦𑀁 𑀯𑀸 𑀅𑀳𑀁 𑀚𑀸𑀦𑀸𑀫𑀻𑀢𑀺 𑀚𑀸𑀦𑀁 𑀯𑀸 𑀅𑀳𑀁 𑀦 𑀚𑀸𑀦𑀸𑀫𑀻𑀢𑀺 𑀅𑀧𑀲𑁆𑀲𑀁 𑀯𑀸 𑀅𑀳𑀁 𑀧𑀲𑁆𑀲𑀸𑀫𑀻𑀢𑀺 𑀧𑀲𑁆𑀲𑀁 𑀯𑀸 𑀅𑀳𑀁 𑀦 𑀧𑀲𑁆𑀲𑀸𑀫𑀻𑀢𑀺 (𑀓.)]. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀧𑀺𑀲𑀼𑀡𑀯𑀸𑀘𑁄 𑀔𑁄 𑀧𑀦 𑀳𑁄𑀢𑀺. 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀲𑀫𑀕𑁆𑀕𑀸𑀦𑀁 𑀯𑀸 𑀪𑁂𑀢𑁆𑀢𑀸 [𑀪𑁂𑀤𑀓𑀸 (𑀓.), 𑀪𑁂𑀤𑁂𑀢𑀸 (𑀲𑁆𑀬𑀸. 𑀓𑀁.), 𑀢𑀤𑀝𑁆𑀞𑀓𑀣𑀸𑀬𑀁 𑀧𑀦 𑀪𑁂𑀢𑁆𑀢𑀸𑀢𑀺 𑀤𑀺𑀲𑁆𑀲𑀢𑀺], 𑀪𑀺𑀦𑁆𑀦𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀯𑀕𑁆𑀕𑀸𑀭𑀸𑀫𑁄 𑀯𑀕𑁆𑀕𑀭𑀢𑁄 𑀯𑀕𑁆𑀕𑀦𑀦𑁆𑀤𑀻 𑀯𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀯𑀸𑀘𑁄 𑀔𑁄 𑀧𑀦 𑀳𑁄𑀢𑀺. 𑀬𑀸 𑀲𑀸 𑀯𑀸𑀘𑀸 𑀅𑀡𑁆𑀟𑀓𑀸 [𑀓𑀡𑁆𑀟𑀓𑀸 (𑀓.)] 𑀓𑀓𑁆𑀓𑀲𑀸 𑀧𑀭𑀓𑀝𑀼𑀓𑀸 𑀧𑀭𑀸𑀪𑀺𑀲𑀚𑁆𑀚𑀦𑀻 𑀓𑁄𑀥𑀲𑀸𑀫𑀦𑁆𑀢𑀸 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀻 𑀔𑁄 𑀧𑀦 𑀳𑁄𑀢𑀺. 𑀅𑀓𑀸𑀮𑀯𑀸𑀤𑀻 𑀅𑀪𑀽𑀢𑀯𑀸𑀤𑀻 𑀅𑀦𑀢𑁆𑀣𑀯𑀸𑀤𑀻 𑀅𑀥𑀫𑁆𑀫𑀯𑀸𑀤𑀻 𑀅𑀯𑀺𑀦𑀬𑀯𑀸𑀤𑀻. 𑀅𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀅𑀓𑀸𑀮𑁂𑀦 𑀅𑀦𑀧𑀤𑁂𑀲𑀁 𑀅𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀫𑀦𑀲𑀸 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀁 𑀅𑀪𑀺𑀚𑁆𑀛𑀸𑀢𑀸 𑀳𑁄𑀢𑀺 𑁋 ‘𑀅𑀳𑁄 𑀯𑀢 𑀬𑀁 𑀧𑀭𑀲𑁆𑀲 𑀢𑀁 𑀫𑀫𑀲𑁆𑀲𑀸’’’𑀢𑀺!

‘‘𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀔𑁄 𑀧𑀦 𑀳𑁄𑀢𑀺 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 ‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀼 𑀯𑀸 𑀯𑀚𑁆𑀛𑀦𑁆𑀢𑀼 𑀯𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀼 𑀯𑀸 𑀯𑀺𑀦𑀲𑁆𑀲𑀦𑁆𑀢𑀼 𑀯𑀸 𑀫𑀸 𑀯𑀸 𑀅𑀳𑁂𑀲𑀼’’’𑀦𑁆𑀢𑀺 [𑀫𑀸 𑀯𑀸 𑀅𑀳𑁂𑀲𑀼𑀁 𑀇𑀢𑀺 𑀯𑀸𑀢𑀺 (𑀲𑀻. 𑀧𑀻. 𑀓.)].

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀔𑁄 𑀧𑀦 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀦𑀢𑁆𑀣𑀺 𑀤𑀺𑀦𑁆𑀦𑀁 𑀦𑀢𑁆𑀣𑀺 𑀬𑀺𑀝𑁆𑀞𑀁 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀫𑀦𑀲𑀸 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀏𑀯𑀁 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀕𑀳𑀧𑀢𑀬𑁄, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺.

𑁪𑁪𑁧. ‘‘𑀢𑀺𑀯𑀺𑀥𑀁 𑀔𑁄, 𑀕𑀳𑀧𑀢𑀬𑁄, 𑀓𑀸𑀬𑁂𑀦 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺, 𑀢𑀺𑀯𑀺𑀥𑀁 𑀫𑀦𑀲𑀸 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁, 𑀕𑀸𑀫𑀕𑀢𑀁 𑀯𑀸 𑀅𑀭𑀜𑁆𑀜𑀕𑀢𑀁 𑀯𑀸, 𑀢𑀁 𑀦𑀸𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺.

‘‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀳𑀸𑀬 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀸 𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀲𑁆𑀲𑀸𑀫𑀺𑀓𑀸 𑀲𑀧𑀭𑀺𑀤𑀡𑁆𑀟𑀸 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺, 𑀢𑀣𑀸𑀭𑀽𑀧𑀸𑀲𑀼 𑀦 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀲𑀪𑀸𑀕𑀢𑁄 𑀯𑀸 𑀧𑀭𑀺𑀲𑀸𑀕𑀢𑁄 𑀯𑀸, 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸, 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 𑁋 ‘𑀦 𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 𑁋 ‘𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 𑁋 ‘𑀦 𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 𑁋 ‘𑀧𑀲𑁆𑀲𑀸𑀫𑀻’𑀢𑀺. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀦 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀇𑀢𑁄 𑀲𑀼𑀢𑁆𑀯𑀸 𑀦 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀦 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑁋 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀫𑀦𑀲𑀸 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀁 𑀦𑀸𑀪𑀺𑀚𑁆𑀛𑀸𑀢𑀸 𑀳𑁄𑀢𑀺 𑁋 ‘𑀅𑀳𑁄 𑀯𑀢 𑀬𑀁 𑀧𑀭𑀲𑁆𑀲 𑀢𑀁 𑀫𑀫𑀲𑁆𑀲𑀸’𑀢𑀺!

‘‘𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀔𑁄 𑀧𑀦 𑀳𑁄𑀢𑀺 𑀅𑀧𑁆𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 ‘𑀇𑀫𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀅𑀩𑁆𑀬𑀸𑀩𑀚𑁆𑀛𑀸 𑀅𑀦𑀻𑀖𑀸 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’𑀢𑀺.

‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀔𑁄 𑀧𑀦 𑀳𑁄𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀅𑀢𑁆𑀣𑀺 𑀤𑀺𑀦𑁆𑀦𑀁 𑀅𑀢𑁆𑀣𑀺 𑀬𑀺𑀝𑁆𑀞𑀁 𑀅𑀢𑁆𑀣𑀺 𑀳𑀼𑀢𑀁, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀅𑀬𑀁 𑀮𑁄𑀓𑁄 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀫𑀸𑀢𑀸 𑀅𑀢𑁆𑀣𑀺 𑀧𑀺𑀢𑀸, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀫𑀦𑀲𑀸 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀏𑀯𑀁 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀕𑀳𑀧𑀢𑀬𑁄, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺.

𑁪𑁪𑁨. ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁…𑀧𑁂… 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁… 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁… 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀆𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀆𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑀭𑀺𑀢𑁆𑀢𑀸𑀪𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀅𑀧𑁆𑀧𑀫𑀸𑀡𑀸𑀪𑀸𑀦𑀁 𑀤𑁂𑀯𑀸𑀦𑀁… 𑀆𑀪𑀲𑁆𑀲𑀭𑀸𑀦𑀁 𑀤𑁂𑀯𑀸𑀦𑀁… 𑀧𑀭𑀺𑀢𑁆𑀢𑀲𑀼𑀪𑀸𑀦𑀁 𑀤𑁂𑀯𑀸𑀦𑀁… 𑀅𑀧𑁆𑀧𑀫𑀸𑀡𑀲𑀼𑀪𑀸𑀦𑀁 𑀤𑁂𑀯𑀸𑀦𑀁… 𑀲𑀼𑀪𑀓𑀺𑀡𑁆𑀳𑀸𑀦𑀁 𑀤𑁂𑀯𑀸𑀦𑀁… 𑀯𑁂𑀳𑀧𑁆𑀨𑀮𑀸𑀦𑀁 𑀤𑁂𑀯𑀸𑀦𑀁… 𑀅𑀯𑀺𑀳𑀸𑀦𑀁 𑀤𑁂𑀯𑀸𑀦𑀁… 𑀅𑀢𑀧𑁆𑀧𑀸𑀦𑀁 𑀤𑁂𑀯𑀸𑀦𑀁… 𑀲𑀼𑀤𑀲𑁆𑀲𑀸𑀦𑀁 𑀤𑁂𑀯𑀸𑀦𑀁… 𑀲𑀼𑀤𑀲𑁆𑀲𑀻𑀦𑀁 𑀤𑁂𑀯𑀸𑀦𑀁… 𑀅𑀓𑀦𑀺𑀝𑁆𑀞𑀸𑀦𑀁 𑀤𑁂𑀯𑀸𑀦𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 … 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻’’𑀢𑀺.

𑁪𑁪𑁩. 𑀏𑀯𑀁 𑀯𑀼𑀢𑁆𑀢𑁂, 𑀲𑀸𑀮𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺. 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑁂 𑀦𑁄 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 [𑀧𑀸𑀡𑀼𑀧𑁂𑀢𑀁 (𑀓.)] 𑀲𑀭𑀡𑀁 𑀕𑀢𑁂’’𑀢𑀺.

𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.

𑁨. 𑀯𑁂𑀭𑀜𑁆𑀚𑀓𑀲𑀼𑀢𑁆𑀢𑀁

𑁪𑁪𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀭𑀜𑁆𑀚𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀲𑀸𑀯𑀢𑁆𑀣𑀺𑀬𑀁 𑀧𑀝𑀺𑀯𑀲𑀦𑁆𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀲𑁆𑀲𑁄𑀲𑀼𑀁 𑀔𑁄 𑀯𑁂𑀭𑀜𑁆𑀚𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁; 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺’. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀯𑁂𑀭𑀜𑁆𑀚𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀯𑁂𑀭𑀜𑁆𑀚𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺? 𑀓𑁄 𑀧𑀦, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺?

‘‘𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀕𑀳𑀧𑀢𑀬𑁄, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀕𑀳𑀧𑀢𑀬𑁄, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀦 𑀔𑁄 𑀫𑀬𑀁 𑀇𑀫𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫. 𑀲𑀸𑀥𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑀣𑀸 𑀫𑀬𑀁 𑀇𑀫𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬𑀸𑀫𑀸’’𑀢𑀺. ‘‘𑀢𑁂𑀦 𑀳𑀺, 𑀕𑀳𑀧𑀢𑀬𑁄, 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁 𑀪𑁄’’𑀢𑀺 𑀔𑁄 𑀯𑁂𑀭𑀜𑁆𑀚𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁪𑁪𑁫. ‘‘𑀢𑀺𑀯𑀺𑀥𑀁 𑀔𑁄, 𑀕𑀳𑀧𑀢𑀬𑁄, 𑀓𑀸𑀬𑁂𑀦 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻 𑀳𑁄𑀢𑀺, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻 𑀳𑁄𑀢𑀺, 𑀢𑀺𑀯𑀺𑀥𑀁 𑀫𑀦𑀲𑀸 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺. 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀺 𑀳𑀢𑀧𑁆𑀧𑀳𑀢𑁂 𑀦𑀺𑀯𑀺𑀝𑁆𑀞𑁄 𑀅𑀤𑀬𑀸𑀧𑀦𑁆𑀦𑁄 𑀧𑀸𑀡𑀪𑀽𑀢𑁂𑀲𑀼. 𑀅𑀤𑀺𑀦𑁆𑀦𑀸𑀤𑀸𑀬𑀻 𑀔𑁄 𑀧𑀦 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁… 𑀢𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺. 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀔𑁄 𑀧𑀦 𑀳𑁄𑀢𑀺. 𑀬𑀸 𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸… 𑀢𑀣𑀸𑀭𑀽𑀧𑀸𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺. 𑀲𑀪𑀸𑀕𑀢𑁄 𑀯𑀸… 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺. 𑀧𑀺𑀲𑀼𑀡𑀯𑀸𑀘𑁄 𑀔𑁄 𑀧𑀦 𑀳𑁄𑀢𑀺. 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸… 𑀯𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀨𑀭𑀼𑀲𑀯𑀸𑀘𑁄 𑀔𑁄 𑀧𑀦 𑀳𑁄𑀢𑀺. 𑀬𑀸 𑀲𑀸 𑀯𑀸𑀘𑀸 𑀅𑀡𑁆𑀟𑀓𑀸 𑀓𑀓𑁆𑀓𑀲𑀸… 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑀻 𑀔𑁄 𑀧𑀦 𑀳𑁄𑀢𑀺. 𑀅𑀓𑀸𑀮𑀯𑀸𑀤𑀻… 𑀅𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀫𑀦𑀲𑀸 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺…𑀧𑁂… 𑀢𑀁 𑀫𑀫𑀲𑁆𑀲𑀸’𑀢𑀺. 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀔𑁄 𑀧𑀦 𑀳𑁄𑀢𑀺 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀼 𑀯𑀸… 𑀫𑀸 𑀯𑀸 𑀅𑀳𑁂𑀲𑀼’𑀦𑁆𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀔𑁄 𑀧𑀦 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁… 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀫𑀦𑀲𑀸 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻 𑀳𑁄𑀢𑀺.

‘‘𑀏𑀯𑀁 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀕𑀳𑀧𑀢𑀬𑁄, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺.

𑁪𑁪𑁬. ‘‘𑀢𑀺𑀯𑀺𑀥𑀁 𑀔𑁄, 𑀕𑀳𑀧𑀢𑀬𑁄, 𑀓𑀸𑀬𑁂𑀦 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀳𑁄𑀢𑀺, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀳𑁄𑀢𑀺, 𑀢𑀺𑀯𑀺𑀥𑀁 𑀫𑀦𑀲𑀸 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀬𑀁 𑀢𑀁 𑀧𑀭𑀲𑁆𑀲… 𑀢𑀁 𑀦𑀸𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺. 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀳𑀸𑀬… 𑀢𑀣𑀸𑀭𑀽𑀧𑀸𑀲𑀼 𑀦 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀲𑀪𑀸𑀕𑀢𑁄 𑀯𑀸…𑀧𑁂… 𑀦 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺. 𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬… 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬… 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬… 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀫𑀦𑀲𑀸 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀳𑁄𑀢𑀺? 𑀇𑀥, 𑀕𑀳𑀧𑀢𑀬𑁄, 𑀏𑀓𑀘𑁆𑀘𑁄 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀁 𑀦𑀸𑀪𑀺𑀚𑁆𑀛𑀸𑀢𑀸 𑀳𑁄𑀢𑀺 ‘𑀅𑀳𑁄 𑀯𑀢 𑀬𑀁 𑀧𑀭𑀲𑁆𑀲, 𑀢𑀁 𑀫𑀫𑀲𑁆𑀲𑀸’𑀢𑀺. 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀔𑁄 𑀧𑀦 𑀳𑁄𑀢𑀺 𑀅𑀧𑁆𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 ‘𑀇𑀫𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀅𑀩𑁆𑀬𑀸𑀩𑀚𑁆𑀛𑀸 𑀅𑀦𑀻𑀖𑀸 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀔𑁄 𑀧𑀦 𑀳𑁄𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞𑀁… 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀢𑀺𑀯𑀺𑀥𑀁 𑀫𑀦𑀲𑀸 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀳𑁄𑀢𑀺.

‘‘𑀏𑀯𑀁 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀕𑀳𑀧𑀢𑀬𑁄, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺.

𑁪𑁪𑁭. ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀓𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁… 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁… 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁… 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀆𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀆𑀪𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀕𑀳𑀧𑀢𑀬𑁄, 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑀭𑀺𑀢𑁆𑀢𑀸𑀪𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀅𑀧𑁆𑀧𑀫𑀸𑀡𑀸𑀪𑀸𑀦𑀁 𑀤𑁂𑀯𑀸𑀦𑀁… 𑀆𑀪𑀲𑁆𑀲𑀭𑀸𑀦𑀁 𑀤𑁂𑀯𑀸𑀦𑀁… 𑀧𑀭𑀺𑀢𑁆𑀢𑀲𑀼𑀪𑀸𑀦𑀁 𑀤𑁂𑀯𑀸𑀦𑀁… 𑀅𑀧𑁆𑀧𑀫𑀸𑀡𑀲𑀼𑀪𑀸𑀦𑀁 𑀤𑁂𑀯𑀸𑀦𑀁… 𑀲𑀼𑀪𑀓𑀺𑀡𑁆𑀳𑀸𑀦𑀁 𑀤𑁂𑀯𑀸𑀦𑀁 … 𑀯𑁂𑀳𑀧𑁆𑀨𑀮𑀸𑀦𑀁 𑀤𑁂𑀯𑀸𑀦𑀁… 𑀅𑀯𑀺𑀳𑀸𑀦𑀁 𑀤𑁂𑀯𑀸𑀦𑀁… 𑀅𑀢𑀧𑁆𑀧𑀸𑀦𑀁 𑀤𑁂𑀯𑀸𑀦𑀁… 𑀲𑀼𑀤𑀲𑁆𑀲𑀸𑀦𑀁 𑀤𑁂𑀯𑀸𑀦𑀁… 𑀲𑀼𑀤𑀲𑁆𑀲𑀻𑀦𑀁 𑀤𑁂𑀯𑀸𑀦𑀁… 𑀅𑀓𑀦𑀺𑀝𑁆𑀞𑀸𑀦𑀁 𑀤𑁂𑀯𑀸𑀦𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂 𑀕𑀳𑀧𑀢𑀬𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑁋 ‘𑀅𑀳𑁄 𑀯𑀢𑀸𑀳𑀁 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺; 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, ‘𑀬𑀁 𑀲𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻’’’𑀢𑀺.

𑁪𑁪𑁮. 𑀏𑀯𑀁 𑀯𑀼𑀢𑁆𑀢𑁂, 𑀯𑁂𑀭𑀜𑁆𑀚𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑁂 𑀦𑁄 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺.

𑀯𑁂𑀭𑀜𑁆𑀚𑀓𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.

𑁩. 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀁

𑁪𑁪𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘‘𑀤𑀼𑀧𑁆𑀧𑀜𑁆𑀜𑁄 𑀤𑀼𑀧𑁆𑀧𑀜𑁆𑀜𑁄’𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀧𑁆𑀧𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺?

‘‘‘𑀦𑀧𑁆𑀧𑀚𑀸𑀦𑀸𑀢𑀺 𑀦𑀧𑁆𑀧𑀚𑀸𑀦𑀸𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀤𑀼𑀧𑁆𑀧𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀜𑁆𑀘 𑀦𑀧𑁆𑀧𑀚𑀸𑀦𑀸𑀢𑀺? ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀦𑀧𑁆𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀦𑀧𑁆𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀦𑀧𑁆𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀦𑀧𑁆𑀧𑀚𑀸𑀦𑀸𑀢𑀺. ‘𑀦𑀧𑁆𑀧𑀚𑀸𑀦𑀸𑀢𑀺 𑀦𑀧𑁆𑀧𑀚𑀸𑀦𑀸𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀤𑀼𑀧𑁆𑀧𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘‘𑀲𑀸𑀥𑀸𑀯𑀼𑀲𑁄’𑀢𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘‘𑀧𑀜𑁆𑀜𑀯𑀸 𑀧𑀜𑁆𑀜𑀯𑀸’𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀧𑀜𑁆𑀜𑀯𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺?

‘‘‘𑀧𑀚𑀸𑀦𑀸𑀢𑀺 𑀧𑀚𑀸𑀦𑀸𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀧𑀜𑁆𑀜𑀯𑀸𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀜𑁆𑀘 𑀧𑀚𑀸𑀦𑀸𑀢𑀺? ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀧𑀚𑀸𑀦𑀸𑀢𑀺. ‘𑀧𑀚𑀸𑀦𑀸𑀢𑀺 𑀧𑀚𑀸𑀦𑀸𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀧𑀜𑁆𑀜𑀯𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘‘𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺?

‘‘‘𑀯𑀺𑀚𑀸𑀦𑀸𑀢𑀺 𑀯𑀺𑀚𑀸𑀦𑀸𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀜𑁆𑀘 𑀯𑀺𑀚𑀸𑀦𑀸𑀢𑀺? 𑀲𑀼𑀔𑀦𑁆𑀢𑀺𑀧𑀺 𑀯𑀺𑀚𑀸𑀦𑀸𑀢𑀺, 𑀤𑀼𑀓𑁆𑀔𑀦𑁆𑀢𑀺𑀧𑀺 𑀯𑀺𑀚𑀸𑀦𑀸𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺𑀧𑀺 𑀯𑀺𑀚𑀸𑀦𑀸𑀢𑀺. ‘𑀯𑀺𑀚𑀸𑀦𑀸𑀢𑀺 𑀯𑀺𑀚𑀸𑀦𑀸𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘𑀬𑀸 𑀘𑀸𑀯𑀼𑀲𑁄, 𑀧𑀜𑁆𑀜𑀸 𑀬𑀜𑁆𑀘 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸 𑀉𑀤𑀸𑀳𑀼 𑀯𑀺𑀲𑀁𑀲𑀝𑁆𑀞𑀸? 𑀮𑀩𑁆𑀪𑀸 𑀘 𑀧𑀦𑀺𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 [𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 (𑀓.)] 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺? ‘‘𑀬𑀸 𑀘𑀸𑀯𑀼𑀲𑁄, 𑀧𑀜𑁆𑀜𑀸 𑀬𑀜𑁆𑀘 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸, 𑀦𑁄 𑀯𑀺𑀲𑀁𑀲𑀝𑁆𑀞𑀸. 𑀦 𑀘 𑀮𑀩𑁆𑀪𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁. 𑀬𑀁 𑀳𑀸𑀯𑀼𑀲𑁄 [𑀬𑀜𑁆𑀘𑀸𑀯𑀼𑀲𑁄 (𑀲𑁆𑀬𑀸. 𑀓𑀁. 𑀓.)], 𑀧𑀚𑀸𑀦𑀸𑀢𑀺 𑀢𑀁 𑀯𑀺𑀚𑀸𑀦𑀸𑀢𑀺, 𑀬𑀁 𑀯𑀺𑀚𑀸𑀦𑀸𑀢𑀺 𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀫𑀸 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸, 𑀦𑁄 𑀯𑀺𑀲𑀁𑀲𑀝𑁆𑀞𑀸. 𑀦 𑀘 𑀮𑀩𑁆𑀪𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺.

‘‘𑀬𑀸 𑀘𑀸𑀯𑀼𑀲𑁄, 𑀧𑀜𑁆𑀜𑀸 𑀬𑀜𑁆𑀘 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀁𑀲𑀝𑁆𑀞𑀸𑀦𑀁 𑀦𑁄 𑀯𑀺𑀲𑀁𑀲𑀝𑁆𑀞𑀸𑀦𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺? ‘‘𑀬𑀸 𑀘𑀸𑀯𑀼𑀲𑁄, 𑀧𑀜𑁆𑀜𑀸 𑀬𑀜𑁆𑀘 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀁𑀲𑀝𑁆𑀞𑀸𑀦𑀁 𑀦𑁄 𑀯𑀺𑀲𑀁𑀲𑀝𑁆𑀞𑀸𑀦𑀁 𑀧𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸, 𑀯𑀺𑀜𑁆𑀜𑀸𑀡𑀁 𑀧𑀭𑀺𑀜𑁆𑀜𑁂𑀬𑁆𑀬𑀁. 𑀇𑀤𑀁 𑀦𑁂𑀲𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺.

𑁪𑁫𑁦. ‘‘‘𑀯𑁂𑀤𑀦𑀸 𑀯𑁂𑀤𑀦𑀸’𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺?

‘‘‘𑀯𑁂𑀤𑁂𑀢𑀺 𑀯𑁂𑀤𑁂𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀜𑁆𑀘 𑀯𑁂𑀤𑁂𑀢𑀺? 𑀲𑀼𑀔𑀫𑁆𑀧𑀺 𑀯𑁂𑀤𑁂𑀢𑀺, 𑀤𑀼𑀓𑁆𑀔𑀫𑁆𑀧𑀺 𑀯𑁂𑀤𑁂𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺 𑀯𑁂𑀤𑁂𑀢𑀺. ‘𑀯𑁂𑀤𑁂𑀢𑀺 𑀯𑁂𑀤𑁂𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘‘𑀲𑀜𑁆𑀜𑀸 𑀲𑀜𑁆𑀜𑀸’𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀲𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺?

‘‘‘𑀲𑀜𑁆𑀚𑀸𑀦𑀸𑀢𑀺 𑀲𑀜𑁆𑀚𑀸𑀦𑀸𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀲𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀜𑁆𑀘 𑀲𑀜𑁆𑀚𑀸𑀦𑀸𑀢𑀺? 𑀦𑀻𑀮𑀓𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀧𑀻𑀢𑀓𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀮𑁄𑀳𑀺𑀢𑀓𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀑𑀤𑀸𑀢𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺. ‘𑀲𑀜𑁆𑀚𑀸𑀦𑀸𑀢𑀺 𑀲𑀜𑁆𑀚𑀸𑀦𑀸𑀢𑀻’𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀲𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘𑀬𑀸 𑀘𑀸𑀯𑀼𑀲𑁄, 𑀯𑁂𑀤𑀦𑀸 𑀬𑀸 𑀘 𑀲𑀜𑁆𑀜𑀸 𑀬𑀜𑁆𑀘 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸 𑀉𑀤𑀸𑀳𑀼 𑀯𑀺𑀲𑀁𑀲𑀝𑁆𑀞𑀸? 𑀮𑀩𑁆𑀪𑀸 𑀘 𑀧𑀦𑀺𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺? ‘‘𑀬𑀸 𑀘𑀸𑀯𑀼𑀲𑁄, 𑀯𑁂𑀤𑀦𑀸 𑀬𑀸 𑀘 𑀲𑀜𑁆𑀜𑀸 𑀬𑀜𑁆𑀘 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸, 𑀦𑁄 𑀯𑀺𑀲𑀁𑀲𑀝𑁆𑀞𑀸. 𑀦 𑀘 𑀮𑀩𑁆𑀪𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁. 𑀬𑀁 𑀳𑀸𑀯𑀼𑀲𑁄 [𑀬𑀜𑁆𑀘𑀸𑀯𑀼𑀲𑁄 (𑀲𑁆𑀬𑀸. 𑀓𑀁. 𑀓.)], 𑀯𑁂𑀤𑁂𑀢𑀺 𑀢𑀁 𑀲𑀜𑁆𑀚𑀸𑀦𑀸𑀢𑀺, 𑀬𑀁 𑀲𑀜𑁆𑀚𑀸𑀦𑀸𑀢𑀺 𑀢𑀁 𑀯𑀺𑀚𑀸𑀦𑀸𑀢𑀺. 𑀢𑀲𑁆𑀫𑀸 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸 𑀦𑁄 𑀯𑀺𑀲𑀁𑀲𑀝𑁆𑀞𑀸. 𑀦 𑀘 𑀮𑀩𑁆𑀪𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺.

𑁪𑁫𑁧. ‘‘𑀦𑀺𑀲𑁆𑀲𑀝𑁆𑀞𑁂𑀦 𑀳𑀸𑀯𑀼𑀲𑁄 [𑀦𑀺𑀲𑁆𑀲𑀝𑁆𑀞𑁂𑀦 𑀧𑀦𑀸𑀯𑀼𑀲𑁄 (?)], 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀧𑀭𑀺𑀲𑀼𑀤𑁆𑀥𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀓𑀺𑀁 𑀦𑁂𑀬𑁆𑀬’’𑀦𑁆𑀢𑀺?

‘‘𑀦𑀺𑀲𑁆𑀲𑀝𑁆𑀞𑁂𑀦 𑀆𑀯𑀼𑀲𑁄, 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀧𑀭𑀺𑀲𑀼𑀤𑁆𑀥𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑁂𑀬𑁆𑀬𑀁, ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀦𑁂𑀬𑁆𑀬𑀁, ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑁂𑀬𑁆𑀬’’𑀦𑁆𑀢𑀺.

‘‘𑀦𑁂𑀬𑁆𑀬𑀁 𑀧𑀦𑀸𑀯𑀼𑀲𑁄, 𑀥𑀫𑁆𑀫𑀁 𑀓𑁂𑀦 𑀧𑀚𑀸𑀦𑀸𑀢𑀻’’𑀢𑀺?

‘‘𑀦𑁂𑀬𑁆𑀬𑀁 𑀔𑁄, 𑀆𑀯𑀼𑀲𑁄, 𑀥𑀫𑁆𑀫𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀚𑀸𑀦𑀸𑀢𑀻’’𑀢𑀺.

‘‘𑀧𑀜𑁆𑀜𑀸 𑀧𑀦𑀸𑀯𑀼𑀲𑁄, 𑀓𑀺𑀫𑀢𑁆𑀣𑀺𑀬𑀸’’𑀢𑀺?

‘‘𑀧𑀜𑁆𑀜𑀸 𑀔𑁄, 𑀆𑀯𑀼𑀲𑁄, 𑀅𑀪𑀺𑀜𑁆𑀜𑀢𑁆𑀣𑀸 𑀧𑀭𑀺𑀜𑁆𑀜𑀢𑁆𑀣𑀸 𑀧𑀳𑀸𑀦𑀢𑁆𑀣𑀸’’𑀢𑀺.

𑁪𑁫𑁨. ‘‘𑀓𑀢𑀺 𑀧𑀦𑀸𑀯𑀼𑀲𑁄, 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬𑀸’’𑀢𑀺?

‘‘𑀤𑁆𑀯𑁂 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬 𑁋 𑀧𑀭𑀢𑁄 𑀘 𑀖𑁄𑀲𑁄, 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀤𑁆𑀯𑁂 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬𑀸’’𑀢𑀺.

‘‘𑀓𑀢𑀺𑀳𑀺 𑀧𑀦𑀸𑀯𑀼𑀲𑁄, 𑀅𑀗𑁆𑀕𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘𑀸’’𑀢𑀺?

‘‘𑀧𑀜𑁆𑀘𑀳𑀺 𑀔𑁄, 𑀆𑀯𑀼𑀲𑁄, 𑀅𑀗𑁆𑀕𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘. 𑀇𑀥𑀸𑀯𑀼𑀲𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀻𑀮𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺, 𑀲𑀼𑀢𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺, 𑀲𑀸𑀓𑀘𑁆𑀙𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺, 𑀲𑀫𑀣𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀆𑀯𑀼𑀲𑁄, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘𑀸’’𑀢𑀺.

𑁪𑁫𑁩. ‘‘𑀓𑀢𑀺 𑀧𑀦𑀸𑀯𑀼𑀲𑁄, 𑀪𑀯𑀸’’𑀢𑀺?

‘‘𑀢𑀬𑁄𑀫𑁂, 𑀆𑀯𑀼𑀲𑁄, 𑀪𑀯𑀸 𑁋 𑀓𑀸𑀫𑀪𑀯𑁄, 𑀭𑀽𑀧𑀪𑀯𑁄, 𑀅𑀭𑀽𑀧𑀪𑀯𑁄’’𑀢𑀺.

‘‘𑀓𑀣𑀁 𑀧𑀦𑀸𑀯𑀼𑀲𑁄, 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻’’𑀢𑀺?

‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀔𑁄, 𑀆𑀯𑀼𑀲𑁄, 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀦𑀸 𑁋 𑀏𑀯𑀁 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻’’𑀢𑀺.

‘‘𑀓𑀣𑀁 𑀧𑀦𑀸𑀯𑀼𑀲𑁄, 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀦 𑀳𑁄𑀢𑀻’’𑀢𑀺?

‘‘𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀔𑁄, 𑀆𑀯𑀼𑀲𑁄, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀢𑀡𑁆𑀳𑀸𑀦𑀺𑀭𑁄𑀥𑀸 𑁋 𑀏𑀯𑀁 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀦 𑀳𑁄𑀢𑀻’’𑀢𑀺.

𑁪𑁫𑁪. ‘‘𑀓𑀢𑀫𑀁 𑀧𑀦𑀸𑀯𑀼𑀲𑁄, 𑀧𑀞𑀫𑀁 𑀛𑀸𑀦’’𑀦𑁆𑀢𑀺?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀆𑀯𑀼𑀲𑁄, 𑀧𑀞𑀫𑀁 𑀛𑀸𑀦’’𑀦𑁆𑀢𑀺.

‘‘𑀧𑀞𑀫𑀁 𑀧𑀦𑀸𑀯𑀼𑀲𑁄, 𑀛𑀸𑀦𑀁 𑀓𑀢𑀺𑀅𑀗𑁆𑀕𑀺𑀓’’𑀦𑁆𑀢𑀺?

‘‘𑀧𑀞𑀫𑀁 𑀔𑁄, 𑀆𑀯𑀼𑀲𑁄, 𑀛𑀸𑀦𑀁 𑀧𑀜𑁆𑀘𑀗𑁆𑀕𑀺𑀓𑀁. 𑀇𑀥𑀸𑀯𑀼𑀲𑁄, 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀢𑀓𑁆𑀓𑁄 𑀘 𑀯𑀢𑁆𑀢𑀢𑀺, 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘. 𑀧𑀞𑀫𑀁 𑀔𑁄, 𑀆𑀯𑀼𑀲𑁄, 𑀛𑀸𑀦𑀁 𑀏𑀯𑀁 𑀧𑀜𑁆𑀘𑀗𑁆𑀕𑀺𑀓’’𑀦𑁆𑀢𑀺.

‘‘𑀧𑀞𑀫𑀁 𑀧𑀦𑀸𑀯𑀼𑀲𑁄, 𑀛𑀸𑀦𑀁 𑀓𑀢𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀓𑀢𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺?

‘‘𑀧𑀞𑀫𑀁 𑀔𑁄, 𑀆𑀯𑀼𑀲𑁄, 𑀛𑀸𑀦𑀁 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁, 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁. 𑀇𑀥𑀸𑀯𑀼𑀲𑁄, 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀦𑁄 𑀳𑁄𑀢𑀺, 𑀩𑁆𑀬𑀸𑀧𑀸𑀤𑁄 𑀧𑀳𑀻𑀦𑁄 𑀳𑁄𑀢𑀺, 𑀣𑀻𑀦𑀫𑀺𑀤𑁆𑀥𑀁 𑀧𑀳𑀻𑀦𑀁 𑀳𑁄𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀦𑀁 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀦𑀸 𑀳𑁄𑀢𑀺; 𑀯𑀺𑀢𑀓𑁆𑀓𑁄 𑀘 𑀯𑀢𑁆𑀢𑀢𑀺, 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘. 𑀧𑀞𑀫𑀁 𑀔𑁄, 𑀆𑀯𑀼𑀲𑁄, 𑀛𑀸𑀦𑀁 𑀏𑀯𑀁 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺.

𑁪𑁫𑁫. ‘‘𑀧𑀜𑁆𑀘𑀺𑀫𑀸𑀦𑀺, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀦𑀸𑀯𑀺𑀲𑀬𑀸𑀦𑀺 𑀦𑀸𑀦𑀸𑀕𑁄𑀘𑀭𑀸𑀦𑀺, 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀁. 𑀇𑀫𑁂𑀲𑀁 𑀔𑁄, 𑀆𑀯𑀼𑀲𑁄, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀸𑀦𑀸𑀯𑀺𑀲𑀬𑀸𑀦𑀁 𑀦𑀸𑀦𑀸𑀕𑁄𑀘𑀭𑀸𑀦𑀁, 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁, 𑀓𑀺𑀁 𑀧𑀝𑀺𑀲𑀭𑀡𑀁, 𑀓𑁄 𑀘 𑀦𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺?

‘‘𑀧𑀜𑁆𑀘𑀺𑀫𑀸𑀦𑀺, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀦𑀸𑀯𑀺𑀲𑀬𑀸𑀦𑀺 𑀦𑀸𑀦𑀸𑀕𑁄𑀘𑀭𑀸𑀦𑀺, 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀁. 𑀇𑀫𑁂𑀲𑀁 𑀔𑁄, 𑀆𑀯𑀼𑀲𑁄, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀸𑀦𑀸𑀯𑀺𑀲𑀬𑀸𑀦𑀁 𑀦𑀸𑀦𑀸𑀕𑁄𑀘𑀭𑀸𑀦𑀁, 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁, 𑀫𑀦𑁄 𑀧𑀝𑀺𑀲𑀭𑀡𑀁, 𑀫𑀦𑁄 𑀘 𑀦𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺.

𑁪𑁫𑁬. ‘‘𑀧𑀜𑁆𑀘𑀺𑀫𑀸𑀦𑀺, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀁. 𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀺𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀦𑁆𑀢𑀻’’𑀢𑀺?

‘‘𑀧𑀜𑁆𑀘𑀺𑀫𑀸𑀦𑀺, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀁. 𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀆𑀬𑀼𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀦𑁆𑀢𑀻’’𑀢𑀺.

‘‘𑀆𑀬𑀼 𑀧𑀦𑀸𑀯𑀼𑀲𑁄, 𑀓𑀺𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺?

‘‘𑀆𑀬𑀼 𑀉𑀲𑁆𑀫𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺.

‘‘𑀉𑀲𑁆𑀫𑀸 𑀧𑀦𑀸𑀯𑀼𑀲𑁄, 𑀓𑀺𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺?

‘‘𑀉𑀲𑁆𑀫𑀸 𑀆𑀬𑀼𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺.

‘‘𑀇𑀤𑀸𑀦𑁂𑀯 𑀔𑁄 𑀫𑀬𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀏𑀯𑀁 𑀆𑀚𑀸𑀦𑀸𑀫 𑁋 ‘𑀆𑀬𑀼 𑀉𑀲𑁆𑀫𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’𑀢𑀺. 𑀇𑀤𑀸𑀦𑁂𑀯 𑀧𑀦 𑀫𑀬𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀏𑀯𑀁 𑀆𑀚𑀸𑀦𑀸𑀫 𑁋 ‘𑀉𑀲𑁆𑀫𑀸 𑀆𑀬𑀼𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’𑀢𑀺.

‘‘𑀬𑀣𑀸 𑀓𑀣𑀁 𑀧𑀦𑀸𑀯𑀼𑀲𑁄, 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺?

‘‘𑀢𑁂𑀦 𑀳𑀸𑀯𑀼𑀲𑁄, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺; 𑀉𑀧𑀫𑀸𑀬𑀧𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 𑀅𑀘𑁆𑀘𑀺𑀁 𑀧𑀝𑀺𑀘𑁆𑀘 𑀆𑀪𑀸 𑀧𑀜𑁆𑀜𑀸𑀬𑀢𑀺, 𑀆𑀪𑀁 𑀧𑀝𑀺𑀘𑁆𑀘 𑀅𑀘𑁆𑀘𑀺 𑀧𑀜𑁆𑀜𑀸𑀬𑀢𑀺; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀆𑀬𑀼 𑀉𑀲𑁆𑀫𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺, 𑀉𑀲𑁆𑀫𑀸 𑀆𑀬𑀼𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺.

𑁪𑁫𑁭. ‘‘𑀢𑁂𑀯 𑀦𑀼 𑀔𑁄, 𑀆𑀯𑀼𑀲𑁄, 𑀆𑀬𑀼𑀲𑀗𑁆𑀔𑀸𑀭𑀸, 𑀢𑁂 𑀯𑁂𑀤𑀦𑀺𑀬𑀸 𑀥𑀫𑁆𑀫𑀸 𑀉𑀤𑀸𑀳𑀼 𑀅𑀜𑁆𑀜𑁂 𑀆𑀬𑀼𑀲𑀗𑁆𑀔𑀸𑀭𑀸 𑀅𑀜𑁆𑀜𑁂 𑀯𑁂𑀤𑀦𑀺𑀬𑀸 𑀥𑀫𑁆𑀫𑀸’’𑀢𑀺? ‘‘𑀦 𑀔𑁄, 𑀆𑀯𑀼𑀲𑁄, 𑀢𑁂𑀯 𑀆𑀬𑀼𑀲𑀗𑁆𑀔𑀸𑀭𑀸 𑀢𑁂 𑀯𑁂𑀤𑀦𑀺𑀬𑀸 𑀥𑀫𑁆𑀫𑀸. 𑀢𑁂 𑀘 𑀳𑀸𑀯𑀼𑀲𑁄, 𑀆𑀬𑀼𑀲𑀗𑁆𑀔𑀸𑀭𑀸 𑀅𑀪𑀯𑀺𑀁𑀲𑀼 𑀢𑁂 𑀯𑁂𑀤𑀦𑀺𑀬𑀸 𑀥𑀫𑁆𑀫𑀸, 𑀦 𑀬𑀺𑀤𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑁂𑀣. 𑀬𑀲𑁆𑀫𑀸 𑀘 𑀔𑁄, 𑀆𑀯𑀼𑀲𑁄, 𑀅𑀜𑁆𑀜𑁂 𑀆𑀬𑀼𑀲𑀗𑁆𑀔𑀸𑀭𑀸 𑀅𑀜𑁆𑀜𑁂 𑀯𑁂𑀤𑀦𑀺𑀬𑀸 𑀥𑀫𑁆𑀫𑀸, 𑀢𑀲𑁆𑀫𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺.

‘‘𑀬𑀤𑀸 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑀁 𑀓𑀸𑀬𑀁 𑀓𑀢𑀺 𑀥𑀫𑁆𑀫𑀸 𑀚𑀳𑀦𑁆𑀢𑀺; 𑀅𑀣𑀸𑀬𑀁 𑀓𑀸𑀬𑁄 𑀉𑀚𑁆𑀛𑀺𑀢𑁄 𑀅𑀯𑀓𑁆𑀔𑀺𑀢𑁆𑀢𑁄 𑀲𑁂𑀢𑀺, 𑀬𑀣𑀸 𑀓𑀝𑁆𑀞𑀁 𑀅𑀘𑁂𑀢𑀦’’𑀦𑁆𑀢𑀺?

‘‘𑀬𑀤𑀸 𑀔𑁄, 𑀆𑀯𑀼𑀲𑁄, 𑀇𑀫𑀁 𑀓𑀸𑀬𑀁 𑀢𑀬𑁄 𑀥𑀫𑁆𑀫𑀸 𑀚𑀳𑀦𑁆𑀢𑀺 𑁋 𑀆𑀬𑀼 𑀉𑀲𑁆𑀫𑀸 𑀘 𑀯𑀺𑀜𑁆𑀜𑀸𑀡𑀁; 𑀅𑀣𑀸𑀬𑀁 𑀓𑀸𑀬𑁄 𑀉𑀚𑁆𑀛𑀺𑀢𑁄 𑀅𑀯𑀓𑁆𑀔𑀺𑀢𑁆𑀢𑁄 𑀲𑁂𑀢𑀺, 𑀬𑀣𑀸 𑀓𑀝𑁆𑀞𑀁 𑀅𑀘𑁂𑀢𑀦’’𑀦𑁆𑀢𑀺.

‘‘𑀬𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀢𑁄 𑀓𑀸𑀮𑀗𑁆𑀓𑀢𑁄, 𑀬𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑁋 𑀇𑀫𑁂𑀲𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺?

‘‘𑀬𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀢𑁄 𑀓𑀸𑀮𑀗𑁆𑀓𑀢𑁄 𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀯𑀘𑀻𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀆𑀬𑀼 𑀧𑀭𑀺𑀓𑁆𑀔𑀻𑀡𑁄, 𑀉𑀲𑁆𑀫𑀸 𑀯𑀽𑀧𑀲𑀦𑁆𑀢𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀪𑀺𑀦𑁆𑀦𑀸𑀦𑀺. 𑀬𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀢𑀲𑁆𑀲𑀧𑀺 𑀓𑀸𑀬𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀯𑀘𑀻𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀆𑀬𑀼 𑀦 𑀧𑀭𑀺𑀓𑁆𑀔𑀻𑀡𑁄, 𑀉𑀲𑁆𑀫𑀸 𑀅𑀯𑀽𑀧𑀲𑀦𑁆𑀢𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀺. 𑀬𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀢𑁄 𑀓𑀸𑀮𑀗𑁆𑀓𑀢𑁄, 𑀬𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑁋 𑀇𑀤𑀁 𑀦𑁂𑀲𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺.

𑁪𑁫𑁮. ‘‘𑀓𑀢𑀺 𑀧𑀦𑀸𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺?

‘‘𑀘𑀢𑁆𑀢𑀸𑀭𑁄 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸. 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺.

‘‘𑀓𑀢𑀺 𑀧𑀦𑀸𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺?

‘‘𑀤𑁆𑀯𑁂 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸 𑁋 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀅𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀤𑁆𑀯𑁂 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺.

‘‘𑀓𑀢𑀺 𑀧𑀦𑀸𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀺𑀬𑀸’’𑀢𑀺?

‘‘𑀢𑀬𑁄 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀺𑀬𑀸 𑁋 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀅𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄, 𑀧𑀼𑀩𑁆𑀩𑁂 𑀘 𑀅𑀪𑀺𑀲𑀗𑁆𑀔𑀸𑀭𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀢𑀬𑁄 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀺𑀬𑀸’’𑀢𑀺.

‘‘𑀓𑀢𑀺 𑀧𑀦𑀸𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀸𑀬𑀸’’𑀢𑀺?

‘‘𑀤𑁆𑀯𑁂 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀸𑀬 𑁋 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀅𑀫𑀦𑀲𑀺𑀓𑀸𑀭𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀤𑁆𑀯𑁂 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀸𑀬𑀸’’𑀢𑀺.

𑁪𑁫𑁯. ‘‘𑀬𑀸 𑀘𑀸𑀬𑀁, 𑀆𑀯𑀼𑀲𑁄, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀬𑀸 𑀘 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀬𑀸 𑀘 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀬𑀸 𑀘 𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀸𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺?

‘‘𑀬𑀸 𑀘𑀸𑀬𑀁, 𑀆𑀯𑀼𑀲𑁄, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀬𑀸 𑀘 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀬𑀸 𑀘 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀬𑀸 𑀘 𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀢𑁆𑀣𑀺 𑀔𑁄, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀸𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘; 𑀅𑀢𑁆𑀣𑀺 𑀘 𑀔𑁄, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁’’.

‘‘𑀓𑀢𑀫𑁄 𑀘𑀸𑀯𑀼𑀲𑁄, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀸𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘’’?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺’’.

‘‘𑀓𑀢𑀫𑀸 𑀘𑀸𑀯𑀼𑀲𑁄, 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺’’?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺’’.

‘‘𑀓𑀢𑀫𑀸 𑀘𑀸𑀯𑀼𑀲𑁄, 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺’’?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀼𑀜𑁆𑀜𑀫𑀺𑀤𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺’’.

‘‘𑀓𑀢𑀫𑀸 𑀘𑀸𑀯𑀼𑀲𑁄, 𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺’’?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀅𑀬𑀁 𑀔𑁄, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀸𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘’’.

‘‘𑀓𑀢𑀫𑁄 𑀘𑀸𑀯𑀼𑀲𑁄, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁’’?

‘‘𑀭𑀸𑀕𑁄 𑀔𑁄, 𑀆𑀯𑀼𑀲𑁄, 𑀧𑀫𑀸𑀡𑀓𑀭𑀡𑁄, 𑀤𑁄𑀲𑁄 𑀧𑀫𑀸𑀡𑀓𑀭𑀡𑁄, 𑀫𑁄𑀳𑁄 𑀧𑀫𑀸𑀡𑀓𑀭𑀡𑁄. 𑀢𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀬𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄, 𑀅𑀓𑀼𑀧𑁆𑀧𑀸 𑀢𑀸𑀲𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑀸 𑀔𑁄 𑀧𑀦𑀸𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀜𑁆𑀜𑀸 𑀭𑀸𑀕𑁂𑀦, 𑀲𑀼𑀜𑁆𑀜𑀸 𑀤𑁄𑀲𑁂𑀦, 𑀲𑀼𑀜𑁆𑀜𑀸 𑀫𑁄𑀳𑁂𑀦. 𑀭𑀸𑀕𑁄 𑀔𑁄, 𑀆𑀯𑀼𑀲𑁄, 𑀓𑀺𑀜𑁆𑀘𑀦𑁄, 𑀤𑁄𑀲𑁄 𑀓𑀺𑀜𑁆𑀘𑀦𑁄, 𑀫𑁄𑀳𑁄 𑀓𑀺𑀜𑁆𑀘𑀦𑁄. 𑀢𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀬𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄, 𑀅𑀓𑀼𑀧𑁆𑀧𑀸 𑀢𑀸𑀲𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑀸 𑀔𑁄 𑀧𑀦𑀸𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀜𑁆𑀜𑀸 𑀭𑀸𑀕𑁂𑀦, 𑀲𑀼𑀜𑁆𑀜𑀸 𑀤𑁄𑀲𑁂𑀦, 𑀲𑀼𑀜𑁆𑀜𑀸 𑀫𑁄𑀳𑁂𑀦. 𑀭𑀸𑀕𑁄 𑀔𑁄, 𑀆𑀯𑀼𑀲𑁄, 𑀦𑀺𑀫𑀺𑀢𑁆𑀢𑀓𑀭𑀡𑁄, 𑀤𑁄𑀲𑁄 𑀦𑀺𑀫𑀺𑀢𑁆𑀢𑀓𑀭𑀡𑁄, 𑀫𑁄𑀳𑁄 𑀦𑀺𑀫𑀺𑀢𑁆𑀢𑀓𑀭𑀡𑁄. 𑀢𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀬𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄, 𑀅𑀓𑀼𑀧𑁆𑀧𑀸 𑀢𑀸𑀲𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑀸 𑀔𑁄 𑀧𑀦𑀸𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀜𑁆𑀜𑀸 𑀭𑀸𑀕𑁂𑀦, 𑀲𑀼𑀜𑁆𑀜𑀸 𑀤𑁄𑀲𑁂𑀦, 𑀲𑀼𑀜𑁆𑀜𑀸 𑀫𑁄𑀳𑁂𑀦. 𑀅𑀬𑀁 𑀔𑁄, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺.

𑀇𑀤𑀫𑀯𑁄𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.

𑁪. 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀁

𑁪𑁬𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄 𑀬𑁂𑀦 𑀥𑀫𑁆𑀫𑀤𑀺𑀦𑁆𑀦𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀤𑀺𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄 𑀥𑀫𑁆𑀫𑀤𑀺𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 𑁋 ‘‘‘𑀲𑀓𑁆𑀓𑀸𑀬𑁄 𑀲𑀓𑁆𑀓𑀸𑀬𑁄’𑀢𑀺, 𑀅𑀬𑁆𑀬𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀅𑀬𑁆𑀬𑁂, 𑀲𑀓𑁆𑀓𑀸𑀬𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸’’𑀢𑀺? ‘‘𑀧𑀜𑁆𑀘 𑀔𑁄 𑀇𑀫𑁂, 𑀆𑀯𑀼𑀲𑁄 𑀯𑀺𑀲𑀸𑀔, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀓𑁆𑀓𑀸𑀬𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀓𑁆𑀓𑀸𑀬𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸’’𑀢𑀺.

‘‘𑀲𑀸𑀥𑀬𑁆𑀬𑁂’’𑀢𑀺 𑀔𑁄 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄 𑀥𑀫𑁆𑀫𑀤𑀺𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀥𑀫𑁆𑀫𑀤𑀺𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘‘𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀲𑀓𑁆𑀓𑀸𑀬𑀲𑀫𑀼𑀤𑀬𑁄’𑀢𑀺, 𑀅𑀬𑁆𑀬𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀅𑀬𑁆𑀬𑁂, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸’’𑀢𑀺? ‘‘𑀬𑀸𑀬𑀁, 𑀆𑀯𑀼𑀲𑁄 𑀯𑀺𑀲𑀸𑀔, 𑀢𑀡𑁆𑀳𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸; 𑀅𑀬𑀁 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸’’𑀢𑀺.

‘‘‘𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑁄’𑀢𑀺, 𑀅𑀬𑁆𑀬𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀅𑀬𑁆𑀬𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸’’𑀢𑀺?

‘‘𑀬𑁄 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄; 𑀅𑀬𑀁 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸’’𑀢𑀺.

‘‘‘𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺, 𑀅𑀬𑁆𑀬𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑀸 𑀦𑀼 𑀔𑁄, 𑀅𑀬𑁆𑀬𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺?