𑁭. 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀁

𑁩𑁯𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺?

‘‘𑀇𑀥, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 𑁋 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺. 𑀏𑀯𑀜𑁆𑀘𑁂𑀢𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 𑁋 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺. 𑀲𑁄 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀢𑀺; 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀚𑀸𑀦𑀸𑀢𑀺; 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀜𑁆𑀜𑀸𑀬 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑁋 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑁩𑁯𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀲𑁄 𑀬𑀓𑁆𑀔𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀲𑀫𑁂𑀘𑁆𑀘 𑀅𑀦𑀼𑀫𑁄𑀤𑀺 𑀉𑀤𑀸𑀳𑀼 𑀦𑁄; 𑀬𑀁𑀦𑀽𑀦𑀸𑀳𑀁 𑀢𑀁 𑀬𑀓𑁆𑀔𑀁 𑀚𑀸𑀦𑁂𑀬𑁆𑀬𑀁 𑁋 𑀬𑀤𑀺 𑀯𑀸 𑀲𑁄 𑀬𑀓𑁆𑀔𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀲𑀫𑁂𑀘𑁆𑀘 𑀅𑀦𑀼𑀫𑁄𑀤𑀺 𑀬𑀤𑀺 𑀯𑀸 𑀦𑁄’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀅𑀦𑁆𑀢𑀭𑀳𑀺𑀢𑁄 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼 𑀧𑀸𑀢𑀼𑀭𑀳𑁄𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀏𑀓𑀧𑀼𑀡𑁆𑀟𑀭𑀻𑀓𑁂 𑀉𑀬𑁆𑀬𑀸𑀦𑁂 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀢𑀽𑀭𑀺𑀬𑀲𑀢𑁂𑀳𑀺 [𑀢𑀼𑀭𑀺𑀬𑀲𑀢𑁂𑀳𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀤𑁆𑀤𑀲𑀸 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀢𑀸𑀦𑀺 𑀤𑀺𑀩𑁆𑀩𑀸𑀦𑀺 𑀧𑀜𑁆𑀘 𑀢𑀽𑀭𑀺𑀬𑀲𑀢𑀸𑀦𑀺 𑀧𑀝𑀺𑀧𑁆𑀧𑀡𑀸𑀫𑁂𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀏𑀳𑀺 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀲𑁆𑀯𑀸𑀕𑀢𑀁, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦! 𑀘𑀺𑀭𑀲𑁆𑀲𑀁 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀫𑀁 𑀧𑀭𑀺𑀬𑀸𑀬𑀁 𑀅𑀓𑀸𑀲𑀺 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬. 𑀦𑀺𑀲𑀻𑀤, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. 𑀦𑀺𑀲𑀻𑀤𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀲𑀓𑁆𑀓𑁄𑀧𑀺 𑀔𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀓𑀣𑀁 𑀧𑀦 𑀔𑁄, 𑀓𑁄𑀲𑀺𑀬, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀅𑀪𑀸𑀲𑀺? 𑀲𑀸𑀥𑀼 𑀫𑀬𑀫𑁆𑀧𑀺 𑀏𑀢𑀺𑀲𑁆𑀲𑀸 𑀓𑀣𑀸𑀬 𑀪𑀸𑀕𑀺𑀦𑁄 𑀅𑀲𑁆𑀲𑀸𑀫 𑀲𑀯𑀦𑀸𑀬𑀸’’𑀢𑀺.

𑁩𑁯𑁨. ‘‘𑀫𑀬𑀁 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀩𑀳𑀼𑀓𑀺𑀘𑁆𑀘𑀸 𑀩𑀳𑀼𑀓𑀭𑀡𑀻𑀬𑀸 𑁋 𑀅𑀧𑁆𑀧𑁂𑀯 𑀲𑀓𑁂𑀦 𑀓𑀭𑀡𑀻𑀬𑁂𑀦, 𑀅𑀧𑀺 𑀘 𑀤𑁂𑀯𑀸𑀦𑀁𑀬𑁂𑀯 𑀢𑀸𑀯𑀢𑀺𑀁𑀲𑀸𑀦𑀁 𑀓𑀭𑀡𑀻𑀬𑁂𑀦. 𑀅𑀧𑀺 𑀘, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀼𑀲𑁆𑀲𑀼𑀢𑀁𑀬𑁂𑀯 𑀳𑁄𑀢𑀺 𑀲𑀼𑀕𑁆𑀕𑀳𑀺𑀢𑀁 𑀲𑀼𑀫𑀦𑀲𑀺𑀓𑀢𑀁 𑀲𑀽𑀧𑀥𑀸𑀭𑀺𑀢𑀁, 𑀬𑀁 𑀦𑁄 𑀔𑀺𑀧𑁆𑀧𑀫𑁂𑀯 𑀅𑀦𑁆𑀢𑀭𑀥𑀸𑀬𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 [𑀲𑀫𑀽𑀧𑀩𑁆𑀬𑀼𑀴𑁆𑀳𑁄 (𑀲𑁆𑀬𑀸. 𑀓𑀁.), 𑀲𑀫𑀽𑀧𑀩𑁆𑀩𑀽𑀴𑁆𑀳𑁄 (𑀲𑀻.)] 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀔𑁄 𑀧𑀦, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀗𑁆𑀕𑀸𑀫𑁂 𑀤𑁂𑀯𑀸 𑀚𑀺𑀦𑀺𑀁𑀲𑀼, 𑀅𑀲𑀼𑀭𑀸 𑀧𑀭𑀸𑀚𑀺𑀦𑀺𑀁𑀲𑀼. 𑀲𑁄 𑀔𑁄 𑀅𑀳𑀁, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀢𑀁 𑀲𑀗𑁆𑀕𑀸𑀫𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑁂𑀚𑀬𑀦𑁆𑀢𑀁 𑀦𑀸𑀫 𑀧𑀸𑀲𑀸𑀤𑀁 𑀫𑀸𑀧𑁂𑀲𑀺𑀁. 𑀯𑁂𑀚𑀬𑀦𑁆𑀢𑀲𑁆𑀲 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀸𑀲𑀸𑀤𑀲𑁆𑀲 𑀏𑀓𑀲𑀢𑀁 𑀦𑀺𑀬𑁆𑀬𑀽𑀳𑀁. 𑀏𑀓𑁂𑀓𑀲𑁆𑀫𑀺𑀁 𑀦𑀺𑀬𑁆𑀬𑀽𑀳𑁂 𑀲𑀢𑁆𑀢 𑀲𑀢𑁆𑀢 𑀓𑀽𑀝𑀸𑀕𑀸𑀭𑀲𑀢𑀸𑀦𑀺. 𑀏𑀓𑀫𑁂𑀓𑀲𑁆𑀫𑀺𑀁 𑀓𑀽𑀝𑀸𑀕𑀸𑀭𑁂 𑀲𑀢𑁆𑀢 𑀲𑀢𑁆𑀢 𑀅𑀘𑁆𑀙𑀭𑀸𑀬𑁄. 𑀏𑀓𑀫𑁂𑀓𑀺𑀲𑁆𑀲𑀸 𑀅𑀘𑁆𑀙𑀭𑀸𑀬 𑀲𑀢𑁆𑀢 𑀲𑀢𑁆𑀢 𑀧𑀭𑀺𑀘𑀸𑀭𑀺𑀓𑀸𑀬𑁄. 𑀇𑀘𑁆𑀙𑁂𑀬𑁆𑀬𑀸𑀲𑀺 𑀦𑁄 𑀢𑁆𑀯𑀁, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀭𑀸𑀫𑀡𑁂𑀬𑁆𑀬𑀓𑀁 𑀤𑀝𑁆𑀞𑀼’’𑀦𑁆𑀢𑀺? 𑀅𑀥𑀺𑀯𑀸𑀲𑁂𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀼𑀡𑁆𑀳𑀻𑀪𑀸𑀯𑁂𑀦.

𑁩𑁯𑁩. 𑀅𑀣 𑀔𑁄 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀲𑁆𑀲𑀯𑀡𑁄 𑀘 𑀫𑀳𑀸𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀬𑁂𑀦 𑀯𑁂𑀚𑀬𑀦𑁆𑀢𑁄 𑀧𑀸𑀲𑀸𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀤𑁆𑀤𑀲𑀁𑀲𑀼 𑀔𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀭𑀺𑀘𑀸𑀭𑀺𑀓𑀸𑀬𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸 𑀑𑀢𑁆𑀢𑀧𑁆𑀧𑀫𑀸𑀦𑀸 𑀳𑀺𑀭𑀻𑀬𑀫𑀸𑀦𑀸 𑀲𑀓𑀁 𑀲𑀓𑀁 𑀑𑀯𑀭𑀓𑀁 𑀧𑀯𑀺𑀲𑀺𑀁𑀲𑀼. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀡𑀺𑀲𑀸 𑀲𑀲𑀼𑀭𑀁 𑀤𑀺𑀲𑁆𑀯𑀸 𑀑𑀢𑁆𑀢𑀧𑁆𑀧𑀢𑀺 𑀳𑀺𑀭𑀻𑀬𑀢𑀺, 𑀏𑀯𑀫𑁂𑀯 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀭𑀺𑀘𑀸𑀭𑀺𑀓𑀸𑀬𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀤𑀺𑀲𑁆𑀯𑀸 𑀑𑀢𑁆𑀢𑀧𑁆𑀧𑀫𑀸𑀦𑀸 𑀳𑀺𑀭𑀻𑀬𑀫𑀸𑀦𑀸 𑀲𑀓𑀁 𑀲𑀓𑀁 𑀑𑀯𑀭𑀓𑀁 𑀧𑀯𑀺𑀲𑀺𑀁𑀲𑀼. 𑀅𑀣 𑀔𑁄 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀲𑁆𑀲𑀯𑀡𑁄 𑀘 𑀫𑀳𑀸𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀯𑁂𑀚𑀬𑀦𑁆𑀢𑁂 𑀧𑀸𑀲𑀸𑀤𑁂 𑀅𑀦𑀼𑀘𑀗𑁆𑀓𑀫𑀸𑀧𑁂𑀦𑁆𑀢𑀺 𑀅𑀦𑀼𑀯𑀺𑀘𑀭𑀸𑀧𑁂𑀦𑁆𑀢𑀺 𑁋 ‘‘𑀇𑀤𑀫𑁆𑀧𑀺, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀲𑁆𑀲 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀭𑀸𑀫𑀡𑁂𑀬𑁆𑀬𑀓𑀁; 𑀇𑀤𑀫𑁆𑀧𑀺, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀲𑁆𑀲 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺. ‘‘𑀲𑁄𑀪𑀢𑀺 𑀇𑀤𑀁 𑀆𑀬𑀲𑁆𑀫𑀢𑁄 𑀓𑁄𑀲𑀺𑀬𑀲𑁆𑀲, 𑀬𑀣𑀸 𑀢𑀁 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀲𑁆𑀲. 𑀫𑀦𑀼𑀲𑁆𑀲𑀸𑀧𑀺 𑀓𑀺𑀜𑁆𑀘𑀺𑀤𑁂𑀯 𑀭𑀸𑀫𑀡𑁂𑀬𑁆𑀬𑀓𑀁 𑀤𑀺𑀲𑁆𑀯𑀸 [𑀤𑀺𑀝𑁆𑀞𑀸 (𑀲𑀻. 𑀧𑀻. 𑀓.)] 𑀏𑀯𑀫𑀸𑀳𑀁𑀲𑀼 𑁋 ‘𑀲𑁄𑀪𑀢𑀺 𑀯𑀢 𑀪𑁄 𑀬𑀣𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦’𑀦𑁆𑀢𑀺. 𑀢𑀬𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀲𑀺𑀬𑀲𑁆𑀲 𑀲𑁄𑀪𑀢𑀺, 𑀬𑀣𑀸 𑀢𑀁 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀲𑁆𑀲𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀩𑀸𑀴𑁆𑀳𑀁 𑀔𑁄 𑀅𑀬𑀁 𑀬𑀓𑁆𑀔𑁄 𑀧𑀫𑀢𑁆𑀢𑁄 𑀯𑀺𑀳𑀭𑀢𑀺. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀬𑀓𑁆𑀔𑀁 𑀲𑀁𑀯𑁂𑀚𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺 [𑀅𑀪𑀺𑀲𑀗𑁆𑀔𑀸𑀭𑁂𑀲𑀺 (𑀓.), 𑀅𑀪𑀺𑀲𑀗𑁆𑀔𑀸𑀭𑁂𑀢𑀺 (𑀲𑁆𑀬𑀸. 𑀓𑀁.)] 𑀬𑀣𑀸 𑀯𑁂𑀚𑀬𑀦𑁆𑀢𑀁 𑀧𑀸𑀲𑀸𑀤𑀁 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀲𑀗𑁆𑀓𑀫𑁆𑀧𑁂𑀲𑀺 𑀲𑀫𑁆𑀧𑀓𑀫𑁆𑀧𑁂𑀲𑀺 𑀲𑀫𑁆𑀧𑀯𑁂𑀥𑁂𑀲𑀺. 𑀅𑀣 𑀔𑁄 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀯𑁂𑀲𑁆𑀲𑀯𑀡𑁄 𑀘 𑀫𑀳𑀸𑀭𑀸𑀚𑀸, 𑀤𑁂𑀯𑀸 𑀘 𑀢𑀸𑀯𑀢𑀺𑀁𑀲𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀅𑀳𑁂𑀲𑀼𑀁 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄, 𑀲𑀫𑀡𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀤𑀺𑀩𑁆𑀩𑀪𑀯𑀦𑀁 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀲𑀗𑁆𑀓𑀫𑁆𑀧𑁂𑀲𑁆𑀲𑀢𑀺 𑀲𑀫𑁆𑀧𑀓𑀫𑁆𑀧𑁂𑀲𑁆𑀲𑀢𑀺 𑀲𑀫𑁆𑀧𑀯𑁂𑀥𑁂𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀲𑀁𑀯𑀺𑀕𑁆𑀕𑀁 𑀮𑁄𑀫𑀳𑀝𑁆𑀞𑀚𑀸𑀢𑀁 𑀯𑀺𑀤𑀺𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀓𑀣𑀁 𑀧𑀦 𑀔𑁄, 𑀓𑁄𑀲𑀺𑀬, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀅𑀪𑀸𑀲𑀺? 𑀲𑀸𑀥𑀼 𑀫𑀬𑀫𑁆𑀧𑀺 𑀏𑀢𑀺𑀲𑁆𑀲𑀸 𑀓𑀣𑀸𑀬 𑀪𑀸𑀕𑀺𑀦𑁄 𑀅𑀲𑁆𑀲𑀸𑀫 𑀲𑀯𑀦𑀸𑀬𑀸’’𑀢𑀺.

𑁩𑁯𑁪. ‘‘𑀇𑀥𑀸𑀳𑀁, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺𑀁. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀅𑀳𑀁, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦’’’𑀦𑁆𑀢𑀺?

‘‘𑀏𑀯𑀁 𑀯𑀼𑀢𑁆𑀢𑁂, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀕𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀥, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 𑁋 𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺. 𑀏𑀯𑀁 𑀘𑁂𑀢𑀁 𑀤𑁂𑀯𑀸𑀦𑀫𑀺𑀦𑁆𑀤 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺. 𑀲𑁄 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀢𑀺, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀚𑀸𑀦𑀸𑀢𑀺, 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀜𑁆𑀜𑀸𑀬 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸. 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺, 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺. 𑀏𑀯𑀁 𑀔𑁄 𑀫𑁂, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀅𑀪𑀸𑀲𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼 𑀅𑀦𑁆𑀢𑀭𑀳𑀺𑀢𑁄 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀭𑀺𑀘𑀸𑀭𑀺𑀓𑀸𑀬𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀏𑀲𑁄 𑀦𑀼 𑀢𑁂, 𑀫𑀸𑀭𑀺𑀲, 𑀲𑁄 𑀪𑀕𑀯𑀸 𑀲𑀢𑁆𑀣𑀸’’𑀢𑀺? ‘‘𑀦 𑀔𑁄 𑀫𑁂, 𑀫𑀸𑀭𑀺𑀲, 𑀲𑁄 𑀪𑀕𑀯𑀸 𑀲𑀢𑁆𑀣𑀸. 𑀲𑀩𑁆𑀭𑀳𑁆𑀫𑀘𑀸𑀭𑀻 𑀫𑁂 𑀏𑀲𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺. ‘‘𑀮𑀸𑀪𑀸 𑀢𑁂, 𑀫𑀸𑀭𑀺𑀲, (𑀲𑀼𑀮𑀤𑁆𑀥𑀁 𑀢𑁂, 𑀫𑀸𑀭𑀺𑀲) [( ) 𑀦𑀢𑁆𑀣𑀺 (𑀲𑀻. 𑀧𑀻.)] 𑀬𑀲𑁆𑀲 𑀢𑁂 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄! 𑀅𑀳𑁄 𑀦𑀽𑀦 𑀢𑁂 𑀲𑁄 𑀪𑀕𑀯𑀸 𑀲𑀢𑁆𑀣𑀸’’𑀢𑀺.

𑁩𑁯𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀚𑀸𑀦𑀸𑀢𑀺 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀳𑀼 [𑀅𑀳𑀼𑀦𑀜𑁆𑀜𑁂𑀯 (𑀲𑀻. 𑀲𑁆𑀬𑀸. 𑀓𑀁.)] 𑀜𑀸𑀢𑀜𑁆𑀜𑀢𑀭𑀲𑁆𑀲 𑀫𑀳𑁂𑀲𑀓𑁆𑀔𑀲𑁆𑀲 𑀬𑀓𑁆𑀔𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀪𑀸𑀲𑀺𑀢𑀸’’𑀢𑀺 [𑀅𑀪𑀸𑀲𑀺𑀢𑁆𑀣𑀸𑀢𑀺 (𑀓.)]? ‘‘𑀅𑀪𑀺𑀚𑀸𑀦𑀸𑀫𑀳𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀥 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘𑀁 ‘‘𑀇𑀥 𑀤𑁂𑀯𑀸𑀦𑀫𑀺𑀦𑁆𑀤 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺. 𑀏𑀯𑀁 𑀘𑁂𑀢𑀁 𑀤𑁂𑀯𑀸𑀦𑀫𑀺𑀦𑁆𑀤 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺. 𑀲𑁄 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀢𑀺, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀚𑀸𑀦𑀸𑀢𑀺, 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀜𑁆𑀜𑀸𑀬 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸. 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺, 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺. 𑀏𑀯𑀁 𑀔𑁄 𑀅𑀳𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀪𑀺𑀚𑀸𑀦𑀸𑀫𑀺 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀪𑀸𑀲𑀺𑀢𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.