𑁪. 𑀫𑀳𑀸𑀬𑀫𑀓𑀯𑀕𑁆𑀕𑁄

𑁧. 𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀁

𑁩𑁨𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀢𑀺𑀓𑁂 [𑀦𑀸𑀤𑀺𑀓𑁂 (𑀲𑀻. 𑀲𑁆𑀬𑀸. 𑀧𑀻.), 𑀜𑀸𑀢𑀺𑀓𑁂 (𑀓.)] 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 [𑀓𑀺𑀫𑁆𑀩𑀺𑀮𑁄 (𑀲𑀻. 𑀧𑀻. 𑀓.)] 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁂 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀤𑀸𑀬𑀧𑀸𑀮𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀲𑀫𑀡, 𑀏𑀢𑀁 𑀤𑀸𑀬𑀁 𑀧𑀸𑀯𑀺𑀲𑀺. 𑀲𑀦𑁆𑀢𑁂𑀢𑁆𑀣 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀢𑁆𑀢𑀓𑀸𑀫𑀭𑀽𑀧𑀸 𑀯𑀺𑀳𑀭𑀦𑁆𑀢𑀺. 𑀫𑀸 𑀢𑁂𑀲𑀁 𑀅𑀨𑀸𑀲𑀼𑀫𑀓𑀸𑀲𑀻’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑀸𑀬𑀧𑀸𑀮𑀲𑁆𑀲 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀲𑁆𑀲. 𑀲𑀼𑀢𑁆𑀯𑀸𑀦 𑀤𑀸𑀬𑀧𑀸𑀮𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀆𑀯𑀼𑀲𑁄 𑀤𑀸𑀬𑀧𑀸𑀮, 𑀪𑀕𑀯𑀦𑁆𑀢𑀁 𑀯𑀸𑀭𑁂𑀲𑀺. 𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀬𑁂𑀦𑀸𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀜𑁆𑀘 𑀦𑀦𑁆𑀤𑀺𑀬𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀓𑀺𑀫𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑁋 𑀏𑀓𑁄 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀏𑀓𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀏𑀓𑁄 𑀧𑀸𑀤𑁄𑀤𑀓𑀁 𑀉𑀧𑀝𑁆𑀞𑀸𑀧𑁂𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺. 𑀢𑁂𑀧𑀺 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁩𑁨𑁬. ‘‘𑀓𑀘𑁆𑀘𑀺 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀣𑀸’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸, 𑀬𑀸𑀧𑀦𑀻𑀬𑀁, 𑀪𑀕𑀯𑀸; 𑀦 𑀘 𑀫𑀬𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀸𑀫𑀸’’𑀢𑀺. ‘‘𑀓𑀘𑁆𑀘𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀢𑀕𑁆𑀖 𑀫𑀬𑀁, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀅𑀦𑀼𑀭𑀼𑀤𑁆𑀥𑀸, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑁄𑀳𑀁 𑀏𑀯𑀭𑀽𑀧𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀻’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀼 𑀆𑀬𑀲𑁆𑀫𑀦𑁆𑀢𑁂𑀲𑀼 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘; 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘; 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦𑀸𑀳𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀸𑀫𑀺. 𑀦𑀸𑀦𑀸 𑀳𑀺 𑀔𑁄 𑀦𑁄, 𑀪𑀦𑁆𑀢𑁂, 𑀓𑀸𑀬𑀸 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢’’𑀦𑁆𑀢𑀺.

𑀆𑀬𑀲𑁆𑀫𑀸𑀧𑀺 𑀔𑁄 𑀦𑀦𑁆𑀤𑀺𑀬𑁄…𑀧𑁂… 𑀆𑀬𑀲𑁆𑀫𑀸𑀧𑀺 𑀔𑁄 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀫𑁆𑀧𑀺, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑁄𑀳𑀁 𑀏𑀯𑀭𑀽𑀧𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀻’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀼 𑀆𑀬𑀲𑁆𑀫𑀦𑁆𑀢𑁂𑀲𑀼 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘, 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘, 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦𑀸𑀳𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀸𑀫𑀺. 𑀦𑀸𑀦𑀸 𑀳𑀺 𑀔𑁄 𑀦𑁄, 𑀪𑀦𑁆𑀢𑁂, 𑀓𑀸𑀬𑀸 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢𑀦𑁆𑀢𑀺.

‘‘𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺.

𑁩𑁨𑁭. ‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀓𑀘𑁆𑀘𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀢𑀕𑁆𑀖 𑀫𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺 𑀲𑁄 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀬𑁄 𑀧𑀘𑁆𑀙𑀸 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺, 𑀲𑀘𑁂 𑀳𑁄𑀢𑀺 𑀪𑀼𑀢𑁆𑀢𑀸𑀯𑀲𑁂𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑀪𑀼𑀜𑁆𑀚𑀢𑀺, 𑀦𑁄 𑀘𑁂 𑀆𑀓𑀗𑁆𑀔𑀢𑀺 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀢𑀺, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀢𑀺. 𑀲𑁄 𑀆𑀲𑀦𑀸𑀦𑀺 𑀧𑀝𑀺𑀲𑀸𑀫𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀝𑀺𑀲𑀸𑀫𑁂𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀧𑀝𑀺𑀲𑀸𑀫𑁂𑀢𑀺, 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑀢𑀺. 𑀬𑁄 𑀧𑀲𑁆𑀲𑀢𑀺 𑀧𑀸𑀦𑀻𑀬𑀖𑀝𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑀁 𑀯𑀸 𑀯𑀘𑁆𑀘𑀖𑀝𑀁 𑀯𑀸 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀲𑁄 𑀉𑀧𑀝𑁆𑀞𑀸𑀧𑁂𑀢𑀺. 𑀲𑀘𑀲𑁆𑀲 𑀳𑁄𑀢𑀺 𑀅𑀯𑀺𑀲𑀬𑁆𑀳𑀁, 𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀫, 𑀦 𑀢𑁆𑀯𑁂𑀯 𑀫𑀬𑀁, 𑀪𑀦𑁆𑀢𑁂, 𑀢𑀧𑁆𑀧𑀘𑁆𑀘𑀬𑀸 𑀯𑀸𑀘𑀁 𑀪𑀺𑀦𑁆𑀤𑀸𑀫. 𑀧𑀜𑁆𑀘𑀸𑀳𑀺𑀓𑀁 𑀔𑁄 𑀧𑀦 𑀫𑀬𑀁, 𑀪𑀦𑁆𑀢𑁂, 𑀲𑀩𑁆𑀩𑀭𑀢𑁆𑀢𑀺𑀓𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀦𑀺𑀲𑀻𑀤𑀸𑀫. 𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺.

𑁩𑁨𑁮. ‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀅𑀢𑁆𑀣𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀏𑀯𑀁 𑀅𑀧𑁆𑀧𑀫𑀢𑁆𑀢𑀸𑀦𑀁 𑀆𑀢𑀸𑀧𑀻𑀦𑀁 𑀧𑀳𑀺𑀢𑀢𑁆𑀢𑀸𑀦𑀁 𑀯𑀺𑀳𑀭𑀦𑁆𑀢𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂! 𑀇𑀥 𑀫𑀬𑀁, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫. 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀧𑁆𑀧𑀫𑀢𑁆𑀢𑀸𑀦𑀁 𑀆𑀢𑀸𑀧𑀻𑀦𑀁 𑀧𑀳𑀺𑀢𑀢𑁆𑀢𑀸𑀦𑀁 𑀯𑀺𑀳𑀭𑀦𑁆𑀢𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀏𑀢𑀲𑁆𑀲 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀢𑁆𑀣𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂! 𑀇𑀥 𑀫𑀬𑀁, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫. 𑀏𑀢𑀲𑁆𑀲, 𑀪𑀦𑁆𑀢𑁂, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀏𑀢𑀲𑁆𑀲 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀢𑁆𑀣𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂! 𑀇𑀥 𑀫𑀬𑀁, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑀸 𑀘 𑀯𑀺𑀳𑀭𑀸𑀫, 𑀲𑀢𑀸 𑀘 𑀲𑀫𑁆𑀧𑀚𑀸𑀦𑀸, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀫, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫. 𑀏𑀢𑀲𑁆𑀲, 𑀪𑀦𑁆𑀢𑁂, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀏𑀢𑀲𑁆𑀲 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀢𑁆𑀣𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂! 𑀇𑀥 𑀫𑀬𑀁, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫. 𑀏𑀢𑀲𑁆𑀲, 𑀪𑀦𑁆𑀢𑁂, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀏𑀢𑀲𑁆𑀲 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀢𑁆𑀣𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂! 𑀇𑀥 𑀫𑀬𑀁, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫. 𑀏𑀢𑀲𑁆𑀲, 𑀪𑀦𑁆𑀢𑁂, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀏𑀢𑀲𑁆𑀲 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀢𑁆𑀣𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂! 𑀇𑀥 𑀫𑀬𑀁, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫…𑀧𑁂… 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫…𑀧𑁂… 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫. 𑀏𑀢𑀲𑁆𑀲, 𑀪𑀦𑁆𑀢𑁂, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺.

𑁩𑁨𑁯. ‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀏𑀢𑀲𑁆𑀲 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀢𑁆𑀣𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂! 𑀇𑀥 𑀫𑀬𑀁, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫, 𑀧𑀜𑁆𑀜𑀸𑀬 𑀘 𑀦𑁄 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸. 𑀏𑀢𑀲𑁆𑀲, 𑀪𑀦𑁆𑀢𑁂, 𑀯𑀺𑀳𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀏𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄. 𑀇𑀫𑀫𑁆𑀳𑀸 𑀘 𑀫𑀬𑀁, 𑀪𑀦𑁆𑀢𑁂, 𑀨𑀸𑀲𑀼𑀯𑀺𑀳𑀸𑀭𑀸 𑀅𑀜𑁆𑀜𑀁 𑀨𑀸𑀲𑀼𑀯𑀺𑀳𑀸𑀭𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀲𑀫𑀦𑀼𑀧𑀲𑁆𑀲𑀸𑀫𑀸’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸! 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀉𑀢𑁆𑀢𑀭𑀺𑀢𑀭𑁄 𑀯𑀸 𑀧𑀡𑀻𑀢𑀢𑀭𑁄 𑀯𑀸 𑀨𑀸𑀲𑀼𑀯𑀺𑀳𑀸𑀭𑁄 𑀦𑀢𑁆𑀣𑀻’’𑀢𑀺.

𑁩𑁩𑁦. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀜𑁆𑀘 𑀅𑀦𑀼𑀭𑀼𑀤𑁆𑀥𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀦𑀦𑁆𑀤𑀺𑀬𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀓𑀺𑀫𑀺𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 [𑀅𑀦𑀼𑀲𑀁𑀲𑀸𑀯𑁂𑀢𑁆𑀯𑀸 (𑀲𑀻.), 𑀅𑀦𑀼𑀲𑀸𑀯𑁂𑀢𑁆𑀯𑀸 (𑀝𑀻𑀓𑀸)] 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀁 𑀦𑀼 𑀔𑁄 𑀫𑀬𑀁 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀏𑀯𑀫𑀸𑀭𑁄𑀘𑀺𑀫𑁆𑀳 𑁋 ‘𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀫𑀬𑀁 𑀮𑀸𑀪𑀺𑀦𑁄’𑀢𑀺, 𑀬𑀁 𑀦𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀬𑀸𑀯 𑀆𑀲𑀯𑀸𑀦𑀁 𑀔𑀬𑀸 𑀧𑀓𑀸𑀲𑁂𑀢𑀻’’𑀢𑀺? ‘‘𑀦 𑀔𑁄 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀫𑀸𑀭𑁄𑀘𑁂𑀲𑀼𑀁 𑁋 ‘𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀫𑀬𑀁 𑀮𑀸𑀪𑀺𑀦𑁄’𑀢𑀺, 𑀅𑀧𑀺 𑀘 𑀫𑁂 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑁋 ‘𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀇𑀫𑁂 𑀆𑀬𑀲𑁆𑀫𑀦𑁆𑀢𑁄 𑀮𑀸𑀪𑀺𑀦𑁄’𑀢𑀺. 𑀤𑁂𑀯𑀢𑀸𑀧𑀺 𑀫𑁂 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀇𑀫𑁂 𑀆𑀬𑀲𑁆𑀫𑀦𑁆𑀢𑁄 𑀮𑀸𑀪𑀺𑀦𑁄’𑀢𑀺. 𑀢𑀫𑁂𑀦𑀁 𑀪𑀕𑀯𑀢𑀸 𑀧𑀜𑁆𑀳𑀸𑀪𑀺𑀧𑀼𑀝𑁆𑀞𑁂𑀦 𑀩𑁆𑀬𑀸𑀓𑀢’’𑀦𑁆𑀢𑀺.

𑁩𑁩𑁧. 𑀅𑀣 𑀔𑁄 𑀤𑀻𑀖𑁄 𑀧𑀭𑀚𑀦𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀤𑀻𑀖𑁄 𑀧𑀭𑀚𑀦𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑀸𑀪𑀸 𑀯𑀢, 𑀪𑀦𑁆𑀢𑁂, 𑀯𑀚𑁆𑀚𑀻𑀦𑀁, 𑀲𑀼𑀮𑀤𑁆𑀥𑀮𑀸𑀪𑀸 𑀯𑀚𑁆𑀚𑀺𑀧𑀚𑀸𑀬, 𑀬𑀢𑁆𑀣 𑀢𑀣𑀸𑀕𑀢𑁄 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀇𑀫𑁂 𑀘 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑁋 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄, 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄, 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄’’𑀢𑀺. 𑀤𑀻𑀖𑀲𑁆𑀲 𑀧𑀭𑀚𑀦𑀲𑁆𑀲 𑀬𑀓𑁆𑀔𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀼𑀫𑁆𑀫𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘𑀮𑀸𑀪𑀸 𑀯𑀢, 𑀪𑁄, 𑀯𑀚𑁆𑀚𑀻𑀦𑀁, 𑀲𑀼𑀮𑀤𑁆𑀥𑀮𑀸𑀪𑀸 𑀯𑀚𑁆𑀚𑀺𑀧𑀚𑀸𑀬, 𑀬𑀢𑁆𑀣 𑀢𑀣𑀸𑀕𑀢𑁄 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀇𑀫𑁂 𑀘 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑁋 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄, 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄, 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄’𑀢𑀺. 𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸…𑀧𑁂… 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸…𑀧𑁂… 𑀬𑀸𑀫𑀸 𑀤𑁂𑀯𑀸…𑀧𑁂… 𑀢𑀼𑀲𑀺𑀢𑀸 𑀤𑁂𑀯𑀸…𑀧𑁂… 𑀦𑀺𑀫𑁆𑀫𑀸𑀦𑀭𑀢𑀻 𑀤𑁂𑀯𑀸…𑀧𑁂… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑀸…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘‘𑀮𑀸𑀪𑀸 𑀯𑀢, 𑀪𑁄, 𑀯𑀚𑁆𑀚𑀻𑀦𑀁, 𑀲𑀼𑀮𑀤𑁆𑀥𑀮𑀸𑀪𑀸 𑀯𑀚𑁆𑀚𑀺𑀧𑀚𑀸𑀬, 𑀬𑀢𑁆𑀣 𑀢𑀣𑀸𑀕𑀢𑁄 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀇𑀫𑁂 𑀘 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑁋 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄, 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄, 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄’’𑀢𑀺. 𑀇𑀢𑀺𑀳 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀢𑁂𑀦 𑀔𑀡𑁂𑀦 (𑀢𑁂𑀦 𑀮𑀬𑁂𑀦) [( ) 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦 𑀬𑀸𑀯𑀩𑁆𑀭𑀳𑁆𑀫𑀮𑁄𑀓𑀸 𑀯𑀺𑀤𑀺𑀢𑀸 [𑀲𑀁𑀯𑀺𑀤𑀺𑀢𑀸 (𑀓.)] 𑀅𑀳𑁂𑀲𑀼𑀁.

‘‘𑀏𑀯𑀫𑁂𑀢𑀁, 𑀤𑀻𑀖, 𑀏𑀯𑀫𑁂𑀢𑀁, 𑀤𑀻𑀖! 𑀬𑀲𑁆𑀫𑀸𑀧𑀺, 𑀤𑀻𑀖, 𑀓𑀼𑀮𑀸 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀢𑀜𑁆𑀘𑁂𑀧𑀺 𑀓𑀼𑀮𑀁 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑀁 𑀅𑀦𑀼𑀲𑁆𑀲𑀭𑁂𑀬𑁆𑀬, 𑀢𑀲𑁆𑀲𑀧𑀸𑀲𑁆𑀲 𑀓𑀼𑀮𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀬𑀲𑁆𑀫𑀸𑀧𑀺, 𑀤𑀻𑀖, 𑀓𑀼𑀮𑀧𑀭𑀺𑀯𑀝𑁆𑀝𑀸 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀲𑁄 𑀘𑁂𑀧𑀺 𑀓𑀼𑀮𑀧𑀭𑀺𑀯𑀝𑁆𑀝𑁄 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀲𑁆𑀲𑀭𑁂𑀬𑁆𑀬, 𑀢𑀲𑁆𑀲𑀧𑀸𑀲𑁆𑀲 𑀓𑀼𑀮𑀧𑀭𑀺𑀯𑀝𑁆𑀝𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀬𑀲𑁆𑀫𑀸𑀧𑀺, 𑀤𑀻𑀖, 𑀕𑀸𑀫𑀸 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀲𑁄 𑀘𑁂𑀧𑀺 𑀕𑀸𑀫𑁄 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀲𑁆𑀲𑀭𑁂𑀬𑁆𑀬, 𑀢𑀲𑁆𑀲𑀧𑀸𑀲𑁆𑀲 𑀕𑀸𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀬𑀲𑁆𑀫𑀸𑀧𑀺, 𑀤𑀻𑀖, 𑀦𑀺𑀕𑀫𑀸 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀲𑁄 𑀘𑁂𑀧𑀺 𑀦𑀺𑀕𑀫𑁄 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀲𑁆𑀲𑀭𑁂𑀬𑁆𑀬, 𑀢𑀲𑁆𑀲𑀧𑀸𑀲𑁆𑀲 𑀦𑀺𑀕𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀬𑀲𑁆𑀫𑀸𑀧𑀺, 𑀤𑀻𑀖, 𑀦𑀕𑀭𑀸 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀢𑀜𑁆𑀘𑁂𑀧𑀺 𑀦𑀕𑀭𑀁 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑀁 𑀅𑀦𑀼𑀲𑁆𑀲𑀭𑁂𑀬𑁆𑀬, 𑀢𑀲𑁆𑀲𑀧𑀸𑀲𑁆𑀲 𑀦𑀕𑀭𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀬𑀲𑁆𑀫𑀸𑀧𑀺, 𑀤𑀻𑀖, 𑀚𑀦𑀧𑀤𑀸 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀲𑁄 𑀘𑁂𑀧𑀺 𑀚𑀦𑀧𑀤𑁄 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀲𑁆𑀲𑀭𑁂𑀬𑁆𑀬, 𑀢𑀲𑁆𑀲𑀧𑀸𑀲𑁆𑀲 𑀚𑀦𑀧𑀤𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀲𑀩𑁆𑀩𑁂 𑀘𑁂𑀧𑀺, 𑀤𑀻𑀖, 𑀔𑀢𑁆𑀢𑀺𑀬𑀸 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀦𑀼𑀲𑁆𑀲𑀭𑁂𑀬𑁆𑀬𑀼𑀁, 𑀲𑀩𑁆𑀩𑁂𑀲𑀸𑀦𑀁𑀧𑀸𑀲𑁆𑀲 𑀔𑀢𑁆𑀢𑀺𑀬𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀲𑀩𑁆𑀩𑁂 𑀘𑁂𑀧𑀺, 𑀤𑀻𑀖, 𑀩𑁆𑀭𑀸𑀳𑁆𑀫𑀡𑀸…𑀧𑁂… 𑀲𑀩𑁆𑀩𑁂 𑀘𑁂𑀧𑀺, 𑀤𑀻𑀖, 𑀯𑁂𑀲𑁆𑀲𑀸…𑀧𑁂… 𑀲𑀩𑁆𑀩𑁂 𑀘𑁂𑀧𑀺, 𑀤𑀻𑀖, 𑀲𑀼𑀤𑁆𑀤𑀸 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀦𑀼𑀲𑁆𑀲𑀭𑁂𑀬𑁆𑀬𑀼𑀁, 𑀲𑀩𑁆𑀩𑁂𑀲𑀸𑀦𑀁𑀧𑀸𑀲𑁆𑀲 𑀲𑀼𑀤𑁆𑀤𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀲𑀤𑁂𑀯𑀓𑁄 𑀘𑁂𑀧𑀺, 𑀤𑀻𑀖, 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀦𑀼𑀲𑁆𑀲𑀭𑁂𑀬𑁆𑀬, 𑀲𑀤𑁂𑀯𑀓𑀲𑁆𑀲𑀧𑀸𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀧𑀲𑁆𑀲, 𑀤𑀻𑀖, 𑀬𑀸𑀯 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬, 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀤𑀻𑀖𑁄 𑀧𑀭𑀚𑀦𑁄 𑀬𑀓𑁆𑀔𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.

𑁨. 𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀁

𑁩𑁩𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁂 𑀯𑀺𑀳𑀭𑀢𑀺 𑀲𑀫𑁆𑀩𑀳𑀼𑀮𑁂𑀳𑀺 𑀅𑀪𑀺𑀜𑁆𑀜𑀸𑀢𑁂𑀳𑀺 𑀅𑀪𑀺𑀜𑁆𑀜𑀸𑀢𑁂𑀳𑀺 𑀣𑁂𑀭𑁂𑀳𑀺 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑁋 𑀆𑀬𑀲𑁆𑀫𑀢𑀸 𑀘 𑀲𑀸𑀭𑀺𑀧𑀼𑀢𑁆𑀢𑁂𑀦 𑀆𑀬𑀲𑁆𑀫𑀢𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀆𑀬𑀲𑁆𑀫𑀢𑀸 𑀘 𑀫𑀳𑀸𑀓𑀲𑁆𑀲𑀧𑁂𑀦 𑀆𑀬𑀲𑁆𑀫𑀢𑀸 𑀘 𑀅𑀦𑀼𑀭𑀼𑀤𑁆𑀥𑁂𑀦 𑀆𑀬𑀲𑁆𑀫𑀢𑀸 𑀘 𑀭𑁂𑀯𑀢𑁂𑀦 𑀆𑀬𑀲𑁆𑀫𑀢𑀸 𑀘 𑀆𑀦𑀦𑁆𑀤𑁂𑀦, 𑀅𑀜𑁆𑀜𑁂𑀳𑀺 𑀘 𑀅𑀪𑀺𑀜𑁆𑀜𑀸𑀢𑁂𑀳𑀺 𑀅𑀪𑀺𑀜𑁆𑀜𑀸𑀢𑁂𑀳𑀺 𑀣𑁂𑀭𑁂𑀳𑀺 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀸𑀫𑀸𑀯𑀼𑀲𑁄, 𑀓𑀲𑁆𑀲𑀧, 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀜𑁆𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀫𑀳𑀸𑀓𑀲𑁆𑀲𑀧𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀅𑀦𑀼𑀭𑀼𑀤𑁆𑀥𑀁 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑁂 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀤𑀺𑀲𑁆𑀯𑀸𑀦 𑀬𑁂𑀦𑀸𑀬𑀲𑁆𑀫𑀸 𑀭𑁂𑀯𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀏𑀢𑀤𑀯𑁄𑀘 𑁋 ‘‘𑀉𑀧𑀲𑀗𑁆𑀓𑀫𑀦𑁆𑀢𑀸 𑀔𑁄 𑀅𑀫𑀽, 𑀆𑀯𑀼𑀲𑁄 [𑀆𑀬𑀲𑁆𑀫𑀦𑁆𑀢𑀸𑀯𑀼𑀲𑁄 (𑀓.)] 𑀭𑁂𑀯𑀢, 𑀲𑀧𑁆𑀧𑀼𑀭𑀺𑀲𑀸 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀆𑀬𑀸𑀫𑀸𑀯𑀼𑀲𑁄 𑀭𑁂𑀯𑀢, 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀭𑁂𑀯𑀢𑁄 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 𑀥𑀫𑁆𑀫𑀲𑁆𑀲𑀯𑀦𑀸𑀬.

𑁩𑁩𑁩. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀜𑁆𑀘 𑀭𑁂𑀯𑀢𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀆𑀦𑀦𑁆𑀤𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀼 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄! 𑀲𑁆𑀯𑀸𑀕𑀢𑀁 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸𑀯𑀘𑀭𑀲𑁆𑀲! 𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁, 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 [𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀸 (𑀲𑀻.)] 𑀲𑀸𑀮𑀸, 𑀤𑀺𑀩𑁆𑀩𑀸, 𑀫𑀜𑁆𑀜𑁂, 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺; 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’𑀢𑀺? ‘‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄. 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀸 𑀲𑀩𑁆𑀬𑀜𑁆𑀚𑀦𑀸; 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, 𑀥𑀸𑀢𑀸 [𑀥𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑁄 𑀘𑀢𑀲𑁆𑀲𑀦𑁆𑀦𑀁 𑀧𑀭𑀺𑀲𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀅𑀦𑀼𑀧𑁆𑀧𑀩𑀦𑁆𑀥𑁂𑀳𑀺 [𑀅𑀧𑁆𑀧𑀩𑀤𑁆𑀥𑁂𑀳𑀺 (𑀲𑀻. 𑀧𑀻.)] 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀸𑀬. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’𑀢𑀺.

𑁩𑁩𑁪. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄 𑀭𑁂𑀯𑀢, 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀤𑀸𑀦𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀧𑀼𑀘𑁆𑀙𑀸𑀫 𑁋 ‘𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀭𑁂𑀯𑀢, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁, 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀲𑀸𑀮𑀸, 𑀤𑀺𑀩𑁆𑀩𑀸, 𑀫𑀜𑁆𑀜𑁂, 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺; 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀭𑁂𑀯𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺? ‘‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄 𑀳𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀭𑀢𑁄, 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄, 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’𑀢𑀺.

𑁩𑁩𑁫. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄 𑀅𑀦𑀼𑀭𑀼𑀤𑁆𑀥, 𑀆𑀬𑀲𑁆𑀫𑀢𑀸 𑀭𑁂𑀯𑀢𑁂𑀦 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀤𑀸𑀦𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀧𑀼𑀘𑁆𑀙𑀸𑀫 𑁋 ‘𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀅𑀦𑀼𑀭𑀼𑀤𑁆𑀥, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁, 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀲𑀸𑀮𑀸, 𑀤𑀺𑀩𑁆𑀩𑀸, 𑀫𑀜𑁆𑀜𑁂, 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺; 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀅𑀦𑀼𑀭𑀼𑀤𑁆𑀥, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺? ‘‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀳𑀲𑁆𑀲𑀁 𑀮𑁄𑀓𑀸𑀦𑀁 𑀯𑁄𑀮𑁄𑀓𑁂𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀲𑀳𑀲𑁆𑀲𑀁 𑀦𑁂𑀫𑀺𑀫𑀡𑁆𑀟𑀮𑀸𑀦𑀁 𑀯𑁄𑀮𑁄𑀓𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀳𑀲𑁆𑀲𑀁 𑀮𑁄𑀓𑀸𑀦𑀁 𑀯𑁄𑀮𑁄𑀓𑁂𑀢𑀺. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’𑀢𑀺.

𑁩𑁩𑁬. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄 𑀓𑀲𑁆𑀲𑀧, 𑀆𑀬𑀲𑁆𑀫𑀢𑀸 𑀅𑀦𑀼𑀭𑀼𑀤𑁆𑀥𑁂𑀦 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀤𑀸𑀦𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀧𑀼𑀘𑁆𑀙𑀸𑀫 𑁋 ‘𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀓𑀲𑁆𑀲𑀧, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁, 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀲𑀸𑀮𑀸, 𑀤𑀺𑀩𑁆𑀩𑀸, 𑀫𑀜𑁆𑀜𑁂, 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺; 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀓𑀲𑁆𑀲𑀧, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺? ‘‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀘 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀺 𑀧𑀁𑀲𑀼𑀓𑀽𑀮𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀢𑁂𑀘𑀻𑀯𑀭𑀺𑀓𑁄 𑀳𑁄𑀢𑀺 𑀢𑁂𑀘𑀻𑀯𑀭𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀧𑀯𑀺𑀯𑀺𑀢𑁆𑀢𑁄 𑀳𑁄𑀢𑀺 𑀧𑀯𑀺𑀯𑁂𑀓𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀅𑀲𑀁𑀲𑀝𑁆𑀞𑁄 𑀳𑁄𑀢𑀺 𑀅𑀲𑀁𑀲𑀕𑁆𑀕𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀻𑀮𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀫𑀸𑀥𑀺𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’𑀢𑀺.

𑁩𑁩𑁭. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀤𑀸𑀦𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀧𑀼𑀘𑁆𑀙𑀸𑀫 𑁋 ‘𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁, 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀲𑀸𑀮𑀸, 𑀤𑀺𑀩𑁆𑀩𑀸, 𑀫𑀜𑁆𑀜𑁂, 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺; 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺? ‘‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀤𑁆𑀯𑁂 𑀪𑀺𑀓𑁆𑀔𑀽 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀺, 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀦𑁄 𑀘 𑀲𑀁𑀲𑀸𑀤𑁂𑀦𑁆𑀢𑀺 [𑀲𑀁𑀲𑀸𑀭𑁂𑀦𑁆𑀢𑀺 (𑀓.)], 𑀥𑀫𑁆𑀫𑀻 𑀘 𑀦𑁂𑀲𑀁 𑀓𑀣𑀸 𑀧𑀯𑀢𑁆𑀢𑀺𑀦𑀻 𑀳𑁄𑀢𑀺. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’𑀢𑀺.

𑁩𑁩𑁮. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀫𑁆𑀳𑁂𑀳𑀺 𑀲𑀩𑁆𑀩𑁂𑀳𑁂𑀯 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀤𑀸𑀦𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀧𑀼𑀘𑁆𑀙𑀸𑀫 𑁋 ‘𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁, 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀲𑀸𑀮𑀸, 𑀤𑀺𑀩𑁆𑀩𑀸, 𑀫𑀜𑁆𑀜𑁂, 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺; 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺? ‘‘𑀇𑀥𑀸𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀯𑀲𑀁 𑀯𑀢𑁆𑀢𑁂𑀢𑀺, 𑀦𑁄 𑀘 𑀪𑀺𑀓𑁆𑀔𑀼 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺. 𑀲𑁄 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 [𑀫𑀚𑁆𑀛𑀦𑁆𑀢𑀺𑀓𑀲𑀫𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀓.)] 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀭𑀜𑁆𑀜𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀦𑀸𑀦𑀸𑀭𑀢𑁆𑀢𑀸𑀦𑀁 𑀤𑀼𑀲𑁆𑀲𑀸𑀦𑀁 𑀤𑀼𑀲𑁆𑀲𑀓𑀭𑀡𑁆𑀟𑀓𑁄 𑀧𑀽𑀭𑁄 𑀅𑀲𑁆𑀲. 𑀲𑁄 𑀬𑀜𑁆𑀜𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀆𑀓𑀗𑁆𑀔𑁂𑀬𑁆𑀬 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀧𑀸𑀭𑀼𑀧𑀺𑀢𑀼𑀁, 𑀢𑀁 𑀢𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀧𑀸𑀭𑀼𑀧𑁂𑀬𑁆𑀬; 𑀬𑀜𑁆𑀜𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀆𑀓𑀗𑁆𑀔𑁂𑀬𑁆𑀬 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀧𑀸𑀭𑀼𑀧𑀺𑀢𑀼𑀁, 𑀢𑀁 𑀢𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀧𑀸𑀭𑀼𑀧𑁂𑀬𑁆𑀬; 𑀬𑀜𑁆𑀜𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀆𑀓𑀗𑁆𑀔𑁂𑀬𑁆𑀬 𑀲𑀸𑀬𑀦𑁆𑀳𑀲𑀫𑀬𑀁 𑀧𑀸𑀭𑀼𑀧𑀺𑀢𑀼𑀁, 𑀢𑀁 𑀢𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀲𑀸𑀬𑀦𑁆𑀳𑀲𑀫𑀬𑀁 𑀧𑀸𑀭𑀼𑀧𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀯𑀲𑀁 𑀯𑀢𑁆𑀢𑁂𑀢𑀺, 𑀦𑁄 𑀘 𑀪𑀺𑀓𑁆𑀔𑀼 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺. 𑀲𑁄 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀢𑀺. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’𑀢𑀺.

𑁩𑁩𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂 𑀆𑀬𑀲𑁆𑀫𑀦𑁆𑀢𑁂 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄, 𑀅𑀫𑁆𑀳𑁂𑀳𑀺 𑀲𑀩𑁆𑀩𑁂𑀳𑁂𑀯 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀆𑀬𑀸𑀫𑀸𑀯𑀼𑀲𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑁆𑀲𑀸𑀫. 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀣 𑀔𑁄 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀜𑁆𑀘 𑀭𑁂𑀯𑀢𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀆𑀦𑀦𑁆𑀤𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀁 𑁋 ‘𑀏𑀢𑀼 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄! 𑀲𑁆𑀯𑀸𑀕𑀢𑀁 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸𑀯𑀘𑀭𑀲𑁆𑀲! 𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁, 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀲𑀸𑀮𑀸, 𑀤𑀺𑀩𑁆𑀩𑀸, 𑀫𑀜𑁆𑀜𑁂, 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺; 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀥𑀸𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄…𑀧𑁂… 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀸𑀬. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀬𑀣𑀸 𑀢𑀁 𑀆𑀦𑀦𑁆𑀤𑁄𑀯 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬. 𑀆𑀦𑀦𑁆𑀤𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄. 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀸 𑀲𑀩𑁆𑀬𑀜𑁆𑀚𑀦𑀸; 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, 𑀥𑀸𑀢𑀸, 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑁄 𑀘𑀢𑀲𑁆𑀲𑀦𑁆𑀦𑀁 𑀧𑀭𑀺𑀲𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀅𑀦𑀼𑀧𑁆𑀧𑀩𑀦𑁆𑀥𑁂𑀳𑀺 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀸𑀬𑀸’’𑀢𑀺.

𑁩𑁪𑁦. ‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀏𑀢𑀤𑀯𑁄𑀘𑀁 𑁋 ‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄 𑀭𑁂𑀯𑀢 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀤𑀸𑀦𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀧𑀼𑀘𑁆𑀙𑀸𑀫 𑁋 𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀭𑁂𑀯𑀢, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁, 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀲𑀸𑀮𑀸, 𑀤𑀺𑀩𑁆𑀩𑀸 𑀫𑀜𑁆𑀜𑁂 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺. 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀭𑁂𑀯𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢 𑀪𑀺𑀓𑁆𑀔𑀼 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄 𑀳𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀭𑀢𑁄, 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄, 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄, 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀬𑀣𑀸 𑀢𑀁 𑀭𑁂𑀯𑀢𑁄𑀯 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬. 𑀭𑁂𑀯𑀢𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄 𑀧𑀝𑀺𑀲𑀮𑁆𑀮𑀸𑀦𑀭𑀢𑁄, 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄, 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺.

𑁩𑁪𑁧. ‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘𑀁 𑁋 ‘𑀩𑁆𑀬𑀸𑀓𑀢𑀁 𑀔𑁄 𑀆𑀯𑀼𑀲𑁄 𑀅𑀦𑀼𑀭𑀼𑀤𑁆𑀥 𑀆𑀬𑀲𑁆𑀫𑀢𑀸 𑀭𑁂𑀯𑀢𑁂𑀦…𑀧𑁂… 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀅𑀦𑀼𑀭𑀼𑀤𑁆𑀥, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀳𑀲𑁆𑀲𑀁 𑀮𑁄𑀓𑀸𑀦𑀁 𑀯𑁄𑀮𑁄𑀓𑁂𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄…𑀧𑁂… 𑀏𑀯𑀭𑀽𑀧𑁂𑀦 𑀔𑁄 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢, 𑀬𑀣𑀸 𑀢𑀁 𑀅𑀦𑀼𑀭𑀼𑀤𑁆𑀥𑁄𑀯 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬. 𑀅𑀦𑀼𑀭𑀼𑀤𑁆𑀥𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀳𑀲𑁆𑀲𑀁 𑀮𑁄𑀓𑀸𑀦𑀁 𑀯𑁄𑀮𑁄𑀓𑁂𑀢𑀻’’𑀢𑀺.

𑁩𑁪𑁨. ‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘𑀁 𑁋 ‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄 𑀓𑀲𑁆𑀲𑀧 𑀆𑀬𑀲𑁆𑀫𑀢𑀸 𑀅𑀦𑀼𑀭𑀼𑀤𑁆𑀥𑁂𑀦 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀤𑀸𑀦𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀧𑀼𑀘𑁆𑀙𑀸𑀫…𑀧𑁂… 𑀓𑀣𑀁 𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀓𑀲𑁆𑀲𑀧, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀘 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀢𑁂𑀘𑀻𑀯𑀭𑀺𑀓𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀧𑀯𑀺𑀯𑀺𑀢𑁆𑀢𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀅𑀲𑀁𑀲𑀝𑁆𑀞𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺… 𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺… 𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀬𑀣𑀸 𑀢𑀁 𑀓𑀲𑁆𑀲𑀧𑁄𑀯 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬. 𑀓𑀲𑁆𑀲𑀧𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀅𑀢𑁆𑀢𑀦𑀸 𑀘 𑀆𑀭𑀜𑁆𑀜𑀺𑀓𑁄 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀧𑀺𑀡𑁆𑀟𑀧𑀸𑀢𑀺𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀧𑀁𑀲𑀼𑀓𑀽𑀮𑀺𑀓𑁄 𑀧𑀁𑀲𑀼𑀓𑀽𑀮𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀢𑁂𑀘𑀻𑀯𑀭𑀺𑀓𑁄 𑀢𑁂𑀘𑀻𑀯𑀭𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀅𑀧𑁆𑀧𑀺𑀘𑁆𑀙𑀢𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀲𑀦𑁆𑀢𑀼𑀝𑁆𑀞𑁄 𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀧𑀯𑀺𑀯𑀺𑀢𑁆𑀢𑁄 𑀧𑀯𑀺𑀯𑁂𑀓𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀅𑀲𑀁𑀲𑀝𑁆𑀞𑁄 𑀅𑀲𑀁𑀲𑀕𑁆𑀕𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀻𑀮𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀘 𑀯𑀡𑁆𑀡𑀯𑀸𑀤𑀻’’𑀢𑀺.

𑁩𑁪𑁩. ‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘𑀁 𑁋 ‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀤𑀸𑀦𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀧𑀼𑀘𑁆𑀙𑀸𑀫…𑀧𑁂… 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀤𑁆𑀯𑁂 𑀪𑀺𑀓𑁆𑀔𑀽 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀦𑁄 𑀘 𑀲𑀁𑀲𑀸𑀤𑁂𑀦𑁆𑀢𑀺, 𑀥𑀫𑁆𑀫𑀻 𑀘 𑀦𑁂𑀲𑀁 𑀓𑀣𑀸 𑀧𑀯𑀢𑁆𑀢𑀺𑀦𑀻 𑀳𑁄𑀢𑀺. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢, 𑀬𑀣𑀸 𑀢𑀁 𑀫𑁄𑀕𑁆𑀕𑀮𑁆𑀮𑀸𑀦𑁄𑀯 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬. 𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀓𑀣𑀺𑀓𑁄’’𑀢𑀺.

𑁩𑁪𑁪. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀫𑁆𑀳𑁂𑀳𑀺 𑀲𑀩𑁆𑀩𑁂𑀳𑁂𑀯 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀤𑀸𑀦𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀧𑀼𑀘𑁆𑀙𑀸𑀫 𑁋 𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁, 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀲𑀸𑀮𑀸, 𑀤𑀺𑀩𑁆𑀩𑀸, 𑀫𑀜𑁆𑀜𑁂, 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺. 𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀥𑀸𑀯𑀼𑀲𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀯𑀲𑀁 𑀯𑀢𑁆𑀢𑁂𑀢𑀺 𑀦𑁄 𑀘 𑀪𑀺𑀓𑁆𑀔𑀼 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺. 𑀲𑁄 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀭𑀜𑁆𑀜𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀦𑀸𑀦𑀸𑀭𑀢𑁆𑀢𑀸𑀦𑀁 𑀤𑀼𑀲𑁆𑀲𑀸𑀦𑀁 𑀤𑀼𑀲𑁆𑀲𑀓𑀭𑀡𑁆𑀟𑀓𑁄 𑀧𑀽𑀭𑁄 𑀅𑀲𑁆𑀲. 𑀲𑁄 𑀬𑀜𑁆𑀜𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀆𑀓𑀗𑁆𑀔𑁂𑀬𑁆𑀬 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀧𑀸𑀭𑀼𑀧𑀺𑀢𑀼𑀁, 𑀢𑀁 𑀢𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀧𑀸𑀭𑀼𑀧𑁂𑀬𑁆𑀬; 𑀬𑀜𑁆𑀜𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀆𑀓𑀗𑁆𑀔𑁂𑀬𑁆𑀬 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀧𑀸𑀭𑀼𑀧𑀺𑀢𑀼𑀁, 𑀢𑀁 𑀢𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀧𑀸𑀭𑀼𑀧𑁂𑀬𑁆𑀬; 𑀬𑀜𑁆𑀜𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀆𑀓𑀗𑁆𑀔𑁂𑀬𑁆𑀬 𑀲𑀸𑀬𑀦𑁆𑀳𑀲𑀫𑀬𑀁 𑀧𑀸𑀭𑀼𑀧𑀺𑀢𑀼𑀁, 𑀢𑀁 𑀢𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀲𑀸𑀬𑀦𑁆𑀳𑀲𑀫𑀬𑀁 𑀧𑀸𑀭𑀼𑀧𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀯𑀲𑀁 𑀯𑀢𑁆𑀢𑁂𑀢𑀺, 𑀦𑁄 𑀘 𑀪𑀺𑀓𑁆𑀔𑀼 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺. 𑀲𑁄 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀢𑀺. 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀫𑁄𑀕𑁆𑀕𑀮𑁆𑀮𑀸𑀦! 𑀬𑀣𑀸 𑀢𑀁 𑀲𑀸𑀭𑀺𑀧𑀼𑀢𑁆𑀢𑁄𑀯 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬. 𑀲𑀸𑀭𑀺𑀧𑀼𑀢𑁆𑀢𑁄 𑀳𑀺, 𑀫𑁄𑀕𑁆𑀕𑀮𑁆𑀮𑀸𑀦, 𑀘𑀺𑀢𑁆𑀢𑀁 𑀯𑀲𑀁 𑀯𑀢𑁆𑀢𑁂𑀢𑀺 𑀦𑁄 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺. 𑀲𑁄 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀯𑀺𑀳𑀭𑀢𑀺; 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀗𑁆𑀔𑀢𑀺 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀢𑀻’’𑀢𑀺.

𑁩𑁪𑁫. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀲𑀼𑀪𑀸𑀲𑀺𑀢’’𑀦𑁆𑀢𑀺? ‘‘𑀲𑀩𑁆𑀩𑁂𑀲𑀁 𑀯𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀪𑀸𑀲𑀺𑀢𑀁 𑀧𑀭𑀺𑀬𑀸𑀬𑁂𑀦. 𑀅𑀧𑀺 𑀘 𑀫𑀫𑀧𑀺 𑀲𑀼𑀡𑀸𑀣 𑀬𑀣𑀸𑀭𑀽𑀧𑁂𑀦 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬. 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑁋 ‘𑀦 𑀢𑀸𑀯𑀸𑀳𑀁 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦𑀸𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑁂𑀦 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀆𑀬𑀲𑁆𑀫𑀦𑁆𑀢𑁄 [𑀢𑁂 𑀪𑀺𑀓𑁆𑀔𑀽 (𑀓.)] 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.

𑁩. 𑀫𑀳𑀸𑀕𑁄𑀧𑀸𑀮𑀓𑀲𑀼𑀢𑁆𑀢𑀁

𑁩𑁪𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀏𑀓𑀸𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑁄𑀧𑀸𑀮𑀓𑁄 𑀅𑀪𑀩𑁆𑀩𑁄 𑀕𑁄𑀕𑀡𑀁 𑀧𑀭𑀺𑀳𑀭𑀺𑀢𑀼𑀁 𑀨𑀸𑀢𑀺𑀁 𑀓𑀸𑀢𑀼𑀁 [𑀨𑀸𑀢𑀺𑀓𑀢𑁆𑀢𑀼𑀁 (𑀲𑀻. 𑀧𑀻.), 𑀨𑀸𑀢𑀺𑀓𑀸𑀢𑀼𑀁 (𑀲𑁆𑀬𑀸. 𑀓𑀁.)]. 𑀓𑀢𑀫𑁂𑀳𑀺 𑀏𑀓𑀸𑀤𑀲𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀕𑁄𑀧𑀸𑀮𑀓𑁄 𑀦 𑀭𑀽𑀧𑀜𑁆𑀜𑀽 𑀳𑁄𑀢𑀺, 𑀦 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀺, 𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 [𑀲𑀸𑀝𑁂𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀳𑁄𑀢𑀺, 𑀦 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀺, 𑀦 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀺, 𑀦 𑀢𑀺𑀢𑁆𑀣𑀁 𑀚𑀸𑀦𑀸𑀢𑀺, 𑀦 𑀧𑀻𑀢𑀁 𑀚𑀸𑀦𑀸𑀢𑀺, 𑀦 𑀯𑀻𑀣𑀺𑀁 𑀚𑀸𑀦𑀸𑀢𑀺, 𑀦 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀺 𑀅𑀦𑀯𑀲𑁂𑀲𑀤𑁄𑀳𑀻 𑀘 𑀳𑁄𑀢𑀺. 𑀬𑁂 𑀢𑁂 𑀉𑀲𑀪𑀸 𑀕𑁄𑀧𑀺𑀢𑀭𑁄 𑀕𑁄𑀧𑀭𑀺𑀡𑀸𑀬𑀓𑀸 𑀢𑁂 𑀦 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀸𑀤𑀲𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑁄𑀧𑀸𑀮𑀓𑁄 𑀅𑀪𑀩𑁆𑀩𑁄 𑀕𑁄𑀕𑀡𑀁 𑀧𑀭𑀺𑀳𑀭𑀺𑀢𑀼𑀁 𑀨𑀸𑀢𑀺𑀁 𑀓𑀸𑀢𑀼𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀸𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀪𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀢𑀼𑀁. 𑀓𑀢𑀫𑁂𑀳𑀺 𑀏𑀓𑀸𑀤𑀲𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀭𑀽𑀧𑀜𑁆𑀜𑀽 𑀳𑁄𑀢𑀺, 𑀦 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀺, 𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀺, 𑀦 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀺, 𑀦 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀺, 𑀦 𑀢𑀺𑀢𑁆𑀣𑀁 𑀚𑀸𑀦𑀸𑀢𑀺, 𑀦 𑀧𑀻𑀢𑀁 𑀚𑀸𑀦𑀸𑀢𑀺, 𑀦 𑀯𑀻𑀣𑀺𑀁 𑀚𑀸𑀦𑀸𑀢𑀺, 𑀦 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀺, 𑀅𑀦𑀯𑀲𑁂𑀲𑀤𑁄𑀳𑀻 𑀘 𑀳𑁄𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸 𑀢𑁂 𑀦 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀺.

𑁩𑁪𑁭. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀭𑀽𑀧𑀜𑁆𑀜𑀽 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀲𑀩𑁆𑀩𑀁 𑀭𑀽𑀧𑀁 ‘𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀭𑀽𑀧𑀜𑁆𑀜𑀽 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀓𑀫𑁆𑀫𑀮𑀓𑁆𑀔𑀡𑁄 𑀩𑀸𑀮𑁄, 𑀓𑀫𑁆𑀫𑀮𑀓𑁆𑀔𑀡𑁄 𑀧𑀡𑁆𑀟𑀺𑀢𑁄’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀅𑀥𑀺𑀯𑀸𑀲𑁂𑀢𑀺, 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻 𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀅𑀥𑀺𑀯𑀸𑀲𑁂𑀢𑀺, 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻 𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀺, 𑀦 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀺, 𑀦 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀦 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀤𑁂𑀲𑁂𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀢𑀺𑀢𑁆𑀣𑀁 𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂 𑀢𑁂 𑀪𑀺𑀓𑁆𑀔𑀽 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸, 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦 𑀧𑀭𑀺𑀧𑀼𑀘𑁆𑀙𑀢𑀺, 𑀦 𑀧𑀭𑀺𑀧𑀜𑁆𑀳𑀢𑀺 𑁋 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁? 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺? 𑀢𑀲𑁆𑀲 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀦 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀦 𑀉𑀢𑁆𑀢𑀸𑀦𑀻 𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀦 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀢𑀺𑀢𑁆𑀣𑀁 𑀚𑀸𑀦𑀸𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀻𑀢𑀁 𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀤𑁂𑀲𑀺𑀬𑀫𑀸𑀦𑁂 𑀦 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀦 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀦 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀻𑀢𑀁 𑀚𑀸𑀦𑀸𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀯𑀻𑀣𑀺𑀁 𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀯𑀻𑀣𑀺𑀁 𑀚𑀸𑀦𑀸𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑀯𑀲𑁂𑀲𑀤𑁄𑀳𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀲𑀤𑁆𑀥𑀸 𑀕𑀳𑀧𑀢𑀺𑀓𑀸 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺, 𑀢𑀢𑁆𑀭 𑀪𑀺𑀓𑁆𑀔𑀼 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀺 𑀧𑀝𑀺𑀕𑁆𑀕𑀳𑀡𑀸𑀬. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑀯𑀲𑁂𑀲𑀤𑁄𑀳𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸 𑀢𑁂 𑀦 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸, 𑀢𑁂𑀲𑀼 𑀦 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀆𑀯𑀺 𑀘𑁂𑀯 𑀭𑀳𑁄 𑀘; 𑀦 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀆𑀯𑀺 𑀘𑁂𑀯 𑀭𑀳𑁄 𑀘; 𑀦 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀆𑀯𑀺 𑀘𑁂𑀯 𑀭𑀳𑁄 𑀘. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸 𑀢𑁂 𑀦 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀺.

‘‘𑀇𑀫𑁂𑀳𑀺 𑀔𑁄 𑀪𑀺𑀓𑁆𑀔𑀯𑁂 𑀏𑀓𑀸𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀪𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀢𑀼𑀁.

𑁩𑁪𑁮. ‘‘𑀏𑀓𑀸𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑁄𑀧𑀸𑀮𑀓𑁄 𑀪𑀩𑁆𑀩𑁄 𑀕𑁄𑀕𑀡𑀁 𑀧𑀭𑀺𑀳𑀭𑀺𑀢𑀼𑀁 𑀨𑀸𑀢𑀺𑀁 𑀓𑀸𑀢𑀼𑀁. 𑀓𑀢𑀫𑁂𑀳𑀺 𑀏𑀓𑀸𑀤𑀲𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀕𑁄𑀧𑀸𑀮𑀓𑁄 𑀭𑀽𑀧𑀜𑁆𑀜𑀽 𑀳𑁄𑀢𑀺, 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀺, 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀺, 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀺, 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀺, 𑀢𑀺𑀢𑁆𑀣𑀁 𑀚𑀸𑀦𑀸𑀢𑀺, 𑀧𑀻𑀢𑀁 𑀚𑀸𑀦𑀸𑀢𑀺, 𑀯𑀻𑀣𑀺𑀁 𑀚𑀸𑀦𑀸𑀢𑀺, 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀺, 𑀲𑀸𑀯𑀲𑁂𑀲𑀤𑁄𑀳𑀻 𑀘 𑀳𑁄𑀢𑀺. 𑀬𑁂 𑀢𑁂 𑀉𑀲𑀪𑀸 𑀕𑁄𑀧𑀺𑀢𑀭𑁄 𑀕𑁄𑀧𑀭𑀺𑀡𑀸𑀬𑀓𑀸 𑀢𑁂 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀸𑀤𑀲𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑁄𑀧𑀸𑀮𑀓𑁄 𑀪𑀩𑁆𑀩𑁄 𑀕𑁄𑀕𑀡𑀁 𑀧𑀭𑀺𑀳𑀭𑀺𑀢𑀼𑀁 𑀨𑀸𑀢𑀺𑀁 𑀓𑀸𑀢𑀼𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀸𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀢𑀼𑀁. 𑀓𑀢𑀫𑁂𑀳𑀺 𑀏𑀓𑀸𑀤𑀲𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀜𑁆𑀜𑀽 𑀳𑁄𑀢𑀺, 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀺, 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀺, 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀺, 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀺, 𑀢𑀺𑀢𑁆𑀣𑀁 𑀚𑀸𑀦𑀸𑀢𑀺, 𑀧𑀻𑀢𑀁 𑀚𑀸𑀦𑀸𑀢𑀺, 𑀯𑀻𑀣𑀺𑀁 𑀚𑀸𑀦𑀸𑀢𑀺, 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀺, 𑀲𑀸𑀯𑀲𑁂𑀲𑀤𑁄𑀳𑀻 𑀘 𑀳𑁄𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸 𑀢𑁂 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀺.

𑁩𑁪𑁯. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀜𑁆𑀜𑀽 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀲𑀩𑁆𑀩𑀁 𑀭𑀽𑀧𑀁 ‘𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀜𑁆𑀜𑀽 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀫𑁆𑀫𑀮𑀓𑁆𑀔𑀡𑁄 𑀩𑀸𑀮𑁄, 𑀓𑀫𑁆𑀫𑀮𑀓𑁆𑀔𑀡𑁄 𑀧𑀡𑁆𑀟𑀺𑀢𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺, 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀤𑁂𑀲𑁂𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀢𑁆𑀣𑀁 𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂 𑀢𑁂 𑀪𑀺𑀓𑁆𑀔𑀽 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺, 𑀧𑀭𑀺𑀧𑀜𑁆𑀳𑀢𑀺 𑁋 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁? 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺? 𑀢𑀲𑁆𑀲 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀻 𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀢𑁆𑀣𑀁 𑀚𑀸𑀦𑀸𑀢𑀺.

‘‘𑀓𑀣𑀜𑁆𑀘 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀻𑀢𑀁 𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀤𑁂𑀲𑀺𑀬𑀫𑀸𑀦𑁂 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀻𑀢𑀁 𑀚𑀸𑀦𑀸𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀻𑀣𑀺𑀁 𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀻𑀣𑀺𑀁 𑀚𑀸𑀦𑀸𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀯𑀲𑁂𑀲𑀤𑁄𑀳𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀲𑀤𑁆𑀥𑀸 𑀕𑀳𑀧𑀢𑀺𑀓𑀸 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺. 𑀢𑀢𑁆𑀭 𑀪𑀺𑀓𑁆𑀔𑀼 𑀫𑀢𑁆𑀢𑀁 𑀚𑀸𑀦𑀸𑀢𑀺 𑀧𑀝𑀺𑀕𑁆𑀕𑀳𑀡𑀸𑀬. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀯𑀲𑁂𑀲𑀤𑁄𑀳𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸, 𑀢𑁂 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸 𑀢𑁂𑀲𑀼 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀆𑀯𑀺 𑀘𑁂𑀯 𑀭𑀳𑁄 𑀘; 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀆𑀯𑀺 𑀘𑁂𑀯 𑀭𑀳𑁄 𑀘; 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀆𑀯𑀺 𑀘𑁂𑀯 𑀭𑀳𑁄 𑀘. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸 𑀢𑁂 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀸𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀢𑀼’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀫𑀳𑀸𑀕𑁄𑀧𑀸𑀮𑀓𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.

𑁪. 𑀘𑀽𑀴𑀕𑁄𑀧𑀸𑀮𑀓𑀲𑀼𑀢𑁆𑀢𑀁

𑁩𑁫𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑀚𑁆𑀚𑀻𑀲𑀼 𑀯𑀺𑀳𑀭𑀢𑀺 𑀉𑀓𑁆𑀓𑀘𑁂𑀮𑀸𑀬𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀫𑀸𑀕𑀥𑀓𑁄 𑀕𑁄𑀧𑀸𑀮𑀓𑁄 𑀤𑀼𑀧𑁆𑀧𑀜𑁆𑀜𑀚𑀸𑀢𑀺𑀓𑁄, 𑀯𑀲𑁆𑀲𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀲𑀭𑀤𑀲𑀫𑀬𑁂, 𑀅𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀑𑀭𑀺𑀫𑀁 𑀢𑀻𑀭𑀁, 𑀅𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀭𑀺𑀫𑀁 𑀢𑀻𑀭𑀁, 𑀅𑀢𑀺𑀢𑁆𑀣𑁂𑀦𑁂𑀯 𑀕𑀸𑀯𑁄 𑀧𑀢𑀸𑀭𑁂𑀲𑀺 𑀉𑀢𑁆𑀢𑀭𑀁 𑀢𑀻𑀭𑀁 𑀲𑀼𑀯𑀺𑀤𑁂𑀳𑀸𑀦𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀕𑀸𑀯𑁄 𑀫𑀚𑁆𑀛𑁂𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂 𑀆𑀫𑀡𑁆𑀟𑀮𑀺𑀬𑀁 𑀓𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀺𑀁𑀲𑀼. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀸𑀕𑀥𑀓𑁄 𑀕𑁄𑀧𑀸𑀮𑀓𑁄 𑀤𑀼𑀧𑁆𑀧𑀜𑁆𑀜𑀚𑀸𑀢𑀺𑀓𑁄, 𑀯𑀲𑁆𑀲𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀲𑀭𑀤𑀲𑀫𑀬𑁂, 𑀅𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀑𑀭𑀺𑀫𑀁 𑀢𑀻𑀭𑀁, 𑀅𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀭𑀺𑀫𑀁 𑀢𑀻𑀭𑀁, 𑀅𑀢𑀺𑀢𑁆𑀣𑁂𑀦𑁂𑀯 𑀕𑀸𑀯𑁄 𑀧𑀢𑀸𑀭𑁂𑀲𑀺 𑀉𑀢𑁆𑀢𑀭𑀁 𑀢𑀻𑀭𑀁 𑀲𑀼𑀯𑀺𑀤𑁂𑀳𑀸𑀦𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀳𑀺 𑀓𑁂𑀘𑀺 [𑀬𑁂 𑀓𑁂𑀘𑀺 (𑀲𑁆𑀬𑀸. 𑀓𑀁.)] 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀓𑀼𑀲𑀮𑀸 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀅𑀓𑀼𑀲𑀮𑀸 𑀧𑀭𑀲𑁆𑀲 𑀮𑁄𑀓𑀲𑁆𑀲, 𑀅𑀓𑀼𑀲𑀮𑀸 𑀫𑀸𑀭𑀥𑁂𑀬𑁆𑀬𑀲𑁆𑀲 𑀅𑀓𑀼𑀲𑀮𑀸 𑀅𑀫𑀸𑀭𑀥𑁂𑀬𑁆𑀬𑀲𑁆𑀲, 𑀅𑀓𑀼𑀲𑀮𑀸 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀅𑀓𑀼𑀲𑀮𑀸 𑀅𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲, 𑀢𑁂𑀲𑀁 𑀬𑁂 𑀲𑁄𑀢𑀩𑁆𑀩𑀁 𑀲𑀤𑁆𑀤𑀳𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀢𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬.

𑁩𑁫𑁧. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀫𑀸𑀕𑀥𑀓𑁄 𑀕𑁄𑀧𑀸𑀮𑀓𑁄 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑁄, 𑀯𑀲𑁆𑀲𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀲𑀭𑀤𑀲𑀫𑀬𑁂, 𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀭𑀺𑀫𑀁 𑀢𑀻𑀭𑀁, 𑀢𑀺𑀢𑁆𑀣𑁂𑀦𑁂𑀯 𑀕𑀸𑀯𑁄 𑀧𑀢𑀸𑀭𑁂𑀲𑀺 𑀉𑀢𑁆𑀢𑀭𑀁 𑀢𑀻𑀭𑀁 𑀲𑀼𑀯𑀺𑀤𑁂𑀳𑀸𑀦𑀁. 𑀲𑁄 𑀧𑀞𑀫𑀁 𑀧𑀢𑀸𑀭𑁂𑀲𑀺 𑀬𑁂 𑀢𑁂 𑀉𑀲𑀪𑀸 𑀕𑁄𑀧𑀺𑀢𑀭𑁄 𑀕𑁄𑀧𑀭𑀺𑀡𑀸𑀬𑀓𑀸. 𑀢𑁂 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀁𑀲𑀼. 𑀅𑀣𑀸𑀧𑀭𑁂 𑀧𑀢𑀸𑀭𑁂𑀲𑀺 𑀩𑀮𑀯𑀕𑀸𑀯𑁄 𑀤𑀫𑁆𑀫𑀕𑀸𑀯𑁄. 𑀢𑁂𑀧𑀺 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀁𑀲𑀼. 𑀅𑀣𑀸𑀧𑀭𑁂 𑀧𑀢𑀸𑀭𑁂𑀲𑀺 𑀯𑀘𑁆𑀙𑀢𑀭𑁂 𑀯𑀘𑁆𑀙𑀢𑀭𑀺𑀬𑁄. 𑀢𑁂𑀧𑀺 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀁𑀲𑀼. 𑀅𑀣𑀸𑀧𑀭𑁂 𑀧𑀢𑀸𑀭𑁂𑀲𑀺 𑀯𑀘𑁆𑀙𑀓𑁂 𑀓𑀺𑀲𑀸𑀩𑀮𑀓𑁂 [𑀓𑀺𑀲𑀩𑀮𑀓𑁂 (𑀲𑀻. 𑀲𑁆𑀬𑀸. 𑀧𑀻.)]. 𑀢𑁂𑀧𑀺 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀁𑀲𑀼. 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀯𑀘𑁆𑀙𑀓𑁄 𑀢𑀭𑀼𑀡𑀓𑁄 𑀢𑀸𑀯𑀤𑁂𑀯 𑀚𑀸𑀢𑀓𑁄 𑀫𑀸𑀢𑀼𑀕𑁄𑀭𑀯𑀓𑁂𑀦 𑀯𑀼𑀬𑁆𑀳𑀫𑀸𑀦𑁄, 𑀲𑁄𑀧𑀺 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀸𑀲𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀸𑀕𑀥𑀓𑁄 𑀕𑁄𑀧𑀸𑀮𑀓𑁄 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑁄, 𑀯𑀲𑁆𑀲𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀲𑀭𑀤𑀲𑀫𑀬𑁂, 𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀭𑀺𑀫𑀁 𑀢𑀻𑀭𑀁, 𑀢𑀺𑀢𑁆𑀣𑁂𑀦𑁂𑀯 𑀕𑀸𑀯𑁄 𑀧𑀢𑀸𑀭𑁂𑀲𑀺 𑀉𑀢𑁆𑀢𑀭𑀁 𑀢𑀻𑀭𑀁 𑀲𑀼𑀯𑀺𑀤𑁂𑀳𑀸𑀦𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀓𑀼𑀲𑀮𑀸 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀓𑀼𑀲𑀮𑀸 𑀧𑀭𑀲𑁆𑀲 𑀮𑁄𑀓𑀲𑁆𑀲, 𑀓𑀼𑀲𑀮𑀸 𑀫𑀸𑀭𑀥𑁂𑀬𑁆𑀬𑀲𑁆𑀲 𑀓𑀼𑀲𑀮𑀸 𑀅𑀫𑀸𑀭𑀥𑁂𑀬𑁆𑀬𑀲𑁆𑀲, 𑀓𑀼𑀲𑀮𑀸 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀓𑀼𑀲𑀮𑀸 𑀅𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲, 𑀢𑁂𑀲𑀁 𑀬𑁂 𑀲𑁄𑀢𑀩𑁆𑀩𑀁 𑀲𑀤𑁆𑀤𑀳𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀢𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬.

𑁩𑁫𑁨. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀉𑀲𑀪𑀸 𑀕𑁄𑀧𑀺𑀢𑀭𑁄 𑀕𑁄𑀧𑀭𑀺𑀡𑀸𑀬𑀓𑀸 𑀢𑁂 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀁𑀲𑀼, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀯𑀼𑀲𑀺𑀢𑀯𑀦𑁆𑀢𑁄 𑀓𑀢𑀓𑀭𑀡𑀻𑀬𑀸 𑀑𑀳𑀺𑀢𑀪𑀸𑀭𑀸 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑀸 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑀸 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸, 𑀢𑁂 𑀢𑀺𑀭𑀺𑀬𑀁 𑀫𑀸𑀭𑀲𑁆𑀲 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀕𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀩𑀮𑀯𑀕𑀸𑀯𑁄 𑀤𑀫𑁆𑀫𑀕𑀸𑀯𑁄 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀁𑀲𑀼, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸, 𑀢𑁂𑀧𑀺 𑀢𑀺𑀭𑀺𑀬𑀁 𑀫𑀸𑀭𑀲𑁆𑀲 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀯𑀘𑁆𑀙𑀢𑀭𑀸 𑀯𑀘𑁆𑀙𑀢𑀭𑀺𑀬𑁄 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀁𑀲𑀼, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄 𑀲𑀓𑀺𑀁𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀢𑀺𑀭𑀺𑀬𑀁 𑀫𑀸𑀭𑀲𑁆𑀲 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀯𑀘𑁆𑀙𑀓𑀸 𑀓𑀺𑀲𑀸𑀩𑀮𑀓𑀸 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀁𑀲𑀼, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑀸, 𑀢𑁂𑀧𑀺 𑀢𑀺𑀭𑀺𑀬𑀁 𑀫𑀸𑀭𑀲𑁆𑀲 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀯𑀘𑁆𑀙𑀓𑁄 𑀢𑀭𑀼𑀡𑀓𑁄 𑀢𑀸𑀯𑀤𑁂𑀯 𑀚𑀸𑀢𑀓𑁄 𑀫𑀸𑀢𑀼𑀕𑁄𑀭𑀯𑀓𑁂𑀦 𑀯𑀼𑀬𑁆𑀳𑀫𑀸𑀦𑁄 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀅𑀕𑀫𑀸𑀲𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄, 𑀢𑁂𑀧𑀺 𑀢𑀺𑀭𑀺𑀬𑀁 𑀫𑀸𑀭𑀲𑁆𑀲 𑀲𑁄𑀢𑀁 𑀙𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺.

‘‘𑀅𑀳𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑁄 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀓𑀼𑀲𑀮𑁄 𑀧𑀭𑀲𑁆𑀲 𑀮𑁄𑀓𑀲𑁆𑀲, 𑀓𑀼𑀲𑀮𑁄 𑀫𑀸𑀭𑀥𑁂𑀬𑁆𑀬𑀲𑁆𑀲 𑀓𑀼𑀲𑀮𑁄 𑀅𑀫𑀸𑀭𑀥𑁂𑀬𑁆𑀬𑀲𑁆𑀲, 𑀓𑀼𑀲𑀮𑁄 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀓𑀼𑀲𑀮𑁄 𑀅𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀬𑁂 𑀲𑁄𑀢𑀩𑁆𑀩𑀁 𑀲𑀤𑁆𑀤𑀳𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀢𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄, 𑀚𑀸𑀦𑀢𑀸 𑀲𑀼𑀧𑁆𑀧𑀓𑀸𑀲𑀺𑀢𑁄;

𑀬𑀜𑁆𑀘 𑀫𑀸𑀭𑁂𑀦 𑀲𑀫𑁆𑀧𑀢𑁆𑀢𑀁, 𑀅𑀧𑁆𑀧𑀢𑁆𑀢𑀁 𑀬𑀜𑁆𑀘 𑀫𑀘𑁆𑀘𑀼𑀦𑀸.

‘‘𑀲𑀩𑁆𑀩𑀁 𑀮𑁄𑀓𑀁 𑀅𑀪𑀺𑀜𑁆𑀜𑀸𑀬, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀚𑀸𑀦𑀢𑀸;

𑀯𑀺𑀯𑀝𑀁 𑀅𑀫𑀢𑀤𑁆𑀯𑀸𑀭𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸.

‘‘𑀙𑀺𑀦𑁆𑀦𑀁 𑀧𑀸𑀧𑀺𑀫𑀢𑁄 𑀲𑁄𑀢𑀁, 𑀯𑀺𑀤𑁆𑀥𑀲𑁆𑀢𑀁 𑀯𑀺𑀦𑀴𑀻𑀓𑀢𑀁;

𑀧𑀸𑀫𑁄𑀚𑁆𑀚𑀩𑀳𑀼𑀮𑀸 𑀳𑁄𑀣, 𑀔𑁂𑀫𑀁 𑀧𑀢𑁆𑀢𑀢𑁆𑀣 [𑀧𑀢𑁆𑀣𑁂𑀣 (𑀲𑁆𑀬𑀸. 𑀓𑀁. 𑀓. 𑀅𑀝𑁆𑀞𑀓𑀣𑀸𑀬𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀸𑀞𑁄)] 𑀪𑀺𑀓𑁆𑀔𑀯𑁄’’𑀢𑀺.

𑀘𑀽𑀴𑀕𑁄𑀧𑀸𑀮𑀓𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.

𑁫. 𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀁

𑁩𑁫𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀧𑀝𑀺𑀯𑀲𑀢𑀺 𑀪𑀲𑁆𑀲𑀧𑁆𑀧𑀯𑀸𑀤𑀓𑁄 𑀧𑀡𑁆𑀟𑀺𑀢𑀯𑀸𑀤𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲. 𑀲𑁄 𑀯𑁂𑀲𑀸𑀮𑀺𑀬𑀁 𑀧𑀭𑀺𑀲𑀢𑀺 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘‘𑀦𑀸𑀳𑀁 𑀢𑀁 𑀧𑀲𑁆𑀲𑀸𑀫𑀺 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀲𑀗𑁆𑀖𑀺𑀁 𑀕𑀡𑀺𑀁 𑀕𑀡𑀸𑀘𑀭𑀺𑀬𑀁, 𑀅𑀧𑀺 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀝𑀺𑀚𑀸𑀦𑀫𑀸𑀦𑀁, 𑀬𑁄 𑀫𑀬𑀸 𑀯𑀸𑀤𑁂𑀦 𑀯𑀸𑀤𑀁 𑀲𑀫𑀸𑀭𑀤𑁆𑀥𑁄 𑀦 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬, 𑀬𑀲𑁆𑀲 𑀦 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑁂𑀬𑁆𑀬𑀼𑀁. 𑀣𑀽𑀡𑀁 𑀘𑁂𑀧𑀸𑀳𑀁 𑀅𑀘𑁂𑀢𑀦𑀁 𑀯𑀸𑀤𑁂𑀦 𑀯𑀸𑀤𑀁 𑀲𑀫𑀸𑀭𑀪𑁂𑀬𑁆𑀬𑀁, 𑀲𑀸𑀧𑀺 𑀫𑀬𑀸 𑀯𑀸𑀤𑁂𑀦 𑀯𑀸𑀤𑀁 𑀲𑀫𑀸𑀭𑀤𑁆𑀥𑀸 𑀲𑀗𑁆𑀓𑀫𑁆𑀧𑁂𑀬𑁆𑀬 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀲𑀫𑁆𑀧𑀯𑁂𑀥𑁂𑀬𑁆𑀬. 𑀓𑁄 𑀧𑀦 𑀯𑀸𑀤𑁄 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑀸’’𑀢𑀺?

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀚𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀤𑁆𑀤𑀲𑀸 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀚𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀅𑀲𑁆𑀲𑀚𑀺𑀦𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀁 𑀧𑀦, 𑀪𑁄 𑀅𑀲𑁆𑀲𑀚𑀺, 𑀲𑀫𑀡𑁄 𑀕𑁄𑀢𑀫𑁄 𑀲𑀸𑀯𑀓𑁂 𑀯𑀺𑀦𑁂𑀢𑀺, 𑀓𑀣𑀁𑀪𑀸𑀕𑀸 𑀘 𑀧𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑁂𑀲𑀼 𑀅𑀦𑀼𑀲𑀸𑀲𑀦𑀻 𑀩𑀳𑀼𑀮𑀸 𑀧𑀯𑀢𑁆𑀢𑀢𑀻’’𑀢𑀺? ‘‘𑀏𑀯𑀁 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀕𑀯𑀸 𑀲𑀸𑀯𑀓𑁂 𑀯𑀺𑀦𑁂𑀢𑀺, 𑀏𑀯𑀁𑀪𑀸𑀕𑀸 𑀘 𑀧𑀦 𑀪𑀕𑀯𑀢𑁄 𑀲𑀸𑀯𑀓𑁂𑀲𑀼 𑀅𑀦𑀼𑀲𑀸𑀲𑀦𑀻 𑀩𑀳𑀼𑀮𑀸 𑀧𑀯𑀢𑁆𑀢𑀢𑀺 𑁋 ‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸, 𑀲𑀜𑁆𑀜𑀸 𑀅𑀦𑀺𑀘𑁆𑀘𑀸, 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀲𑀜𑁆𑀜𑀸 𑀅𑀦𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’𑀢𑀺. 𑀏𑀯𑀁 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀕𑀯𑀸 𑀲𑀸𑀯𑀓𑁂 𑀯𑀺𑀦𑁂𑀢𑀺, 𑀏𑀯𑀁𑀪𑀸𑀕𑀸 𑀘 𑀧𑀦 𑀪𑀕𑀯𑀢𑁄 𑀲𑀸𑀯𑀓𑁂𑀲𑀼 𑀅𑀦𑀼𑀲𑀸𑀲𑀦𑀻 𑀩𑀳𑀼𑀮𑀸 𑀧𑀯𑀢𑁆𑀢𑀢𑀻’’𑀢𑀺. ‘‘𑀤𑀼𑀲𑁆𑀲𑀼𑀢𑀁 𑀯𑀢, 𑀪𑁄 𑀅𑀲𑁆𑀲𑀚𑀺, 𑀅𑀲𑁆𑀲𑀼𑀫𑁆𑀳 𑀬𑁂 𑀫𑀬𑀁 𑀏𑀯𑀁𑀯𑀸𑀤𑀺𑀁 𑀲𑀫𑀡𑀁 𑀕𑁄𑀢𑀫𑀁 𑀅𑀲𑁆𑀲𑀼𑀫𑁆𑀳. 𑀅𑀧𑁆𑀧𑁂𑀯 𑀦𑀸𑀫 𑀫𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀢𑁂𑀦 𑀪𑁄𑀢𑀸 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀲𑀫𑀸𑀕𑀘𑁆𑀙𑁂𑀬𑁆𑀬𑀸𑀫, 𑀅𑀧𑁆𑀧𑁂𑀯 𑀦𑀸𑀫 𑀲𑀺𑀬𑀸 𑀓𑁄𑀘𑀺𑀤𑁂𑀯 𑀓𑀣𑀸𑀲𑀮𑁆𑀮𑀸𑀧𑁄, 𑀅𑀧𑁆𑀧𑁂𑀯 𑀦𑀸𑀫 𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀬𑁆𑀬𑀸𑀫𑀸’’𑀢𑀺.

𑁩𑁫𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀜𑁆𑀘𑀫𑀢𑁆𑀢𑀸𑀦𑀺 𑀮𑀺𑀘𑁆𑀙𑀯𑀺𑀲𑀢𑀸𑀦𑀺 𑀲𑀦𑁆𑀣𑀸𑀕𑀸𑀭𑁂 [𑀲𑀦𑁆𑀥𑀸𑀕𑀸𑀭𑁂 (𑀓.)] 𑀲𑀦𑁆𑀦𑀺𑀧𑀢𑀺𑀢𑀸𑀦𑀺 𑀳𑁄𑀦𑁆𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀬𑁂𑀦 𑀢𑁂 𑀮𑀺𑀘𑁆𑀙𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀫𑀦𑁆𑀢𑀼 𑀪𑁄𑀦𑁆𑀢𑁄 𑀮𑀺𑀘𑁆𑀙𑀯𑀻, 𑀅𑀪𑀺𑀓𑁆𑀓𑀫𑀦𑁆𑀢𑀼 𑀪𑁄𑀦𑁆𑀢𑁄 𑀮𑀺𑀘𑁆𑀙𑀯𑀻, 𑀅𑀚𑁆𑀚 𑀫𑁂 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀫𑁂 𑀲𑀫𑀡𑁄 𑀕𑁄𑀢𑀫𑁄 𑀢𑀣𑀸 𑀧𑀢𑀺𑀝𑁆𑀞𑀺𑀲𑁆𑀲𑀢𑀺 𑀬𑀣𑀸 𑀘 𑀫𑁂 [𑀬𑀣𑀸𑀲𑁆𑀲 𑀫𑁂 (𑀲𑀻. 𑀧𑀻.)] 𑀜𑀸𑀢𑀜𑁆𑀜𑀢𑀭𑁂𑀦 𑀲𑀸𑀯𑀓𑁂𑀦 𑀅𑀲𑁆𑀲𑀚𑀺𑀦𑀸 𑀦𑀸𑀫 𑀪𑀺𑀓𑁆𑀔𑀼𑀦𑀸 𑀧𑀢𑀺𑀝𑁆𑀞𑀺𑀢𑀁, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀻𑀖𑀮𑁄𑀫𑀺𑀓𑀁 𑀏𑀴𑀓𑀁 𑀮𑁄𑀫𑁂𑀲𑀼 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑁂𑀬𑁆𑀬 𑀧𑀭𑀺𑀓𑀟𑁆𑀠𑁂𑀬𑁆𑀬 𑀲𑀫𑁆𑀧𑀭𑀺𑀓𑀟𑁆𑀠𑁂𑀬𑁆𑀬, 𑀏𑀯𑀫𑁂𑀯𑀸𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀆𑀓𑀟𑁆𑀠𑀺𑀲𑁆𑀲𑀸𑀫𑀺 𑀧𑀭𑀺𑀓𑀟𑁆𑀠𑀺𑀲𑁆𑀲𑀸𑀫𑀺 𑀲𑀫𑁆𑀧𑀭𑀺𑀓𑀟𑁆𑀠𑀺𑀲𑁆𑀲𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀲𑁄𑀡𑁆𑀟𑀺𑀓𑀸𑀓𑀫𑁆𑀫𑀓𑀸𑀭𑁄 𑀫𑀳𑀦𑁆𑀢𑀁 𑀲𑁄𑀡𑁆𑀟𑀺𑀓𑀸𑀓𑀺𑀴𑀜𑁆𑀚𑀁 𑀕𑀫𑁆𑀪𑀻𑀭𑁂 𑀉𑀤𑀓𑀭𑀳𑀤𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑁂𑀬𑁆𑀬 𑀧𑀭𑀺𑀓𑀟𑁆𑀠𑁂𑀬𑁆𑀬 𑀲𑀫𑁆𑀧𑀭𑀺𑀓𑀟𑁆𑀠𑁂𑀬𑁆𑀬, 𑀏𑀯𑀫𑁂𑀯𑀸𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀆𑀓𑀟𑁆𑀠𑀺𑀲𑁆𑀲𑀸𑀫𑀺 𑀧𑀭𑀺𑀓𑀟𑁆𑀠𑀺𑀲𑁆𑀲𑀸𑀫𑀺 𑀲𑀫𑁆𑀧𑀭𑀺𑀓𑀟𑁆𑀠𑀺𑀲𑁆𑀲𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀲𑁄𑀡𑁆𑀟𑀺𑀓𑀸𑀥𑀼𑀢𑁆𑀢𑁄 𑀯𑀸𑀮𑀁 [𑀣𑀸𑀮𑀁 (𑀓.)] 𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 𑀑𑀥𑀼𑀦𑁂𑀬𑁆𑀬 𑀦𑀺𑀤𑁆𑀥𑀼𑀦𑁂𑀬𑁆𑀬 𑀦𑀺𑀧𑁆𑀨𑁄𑀝𑁂𑀬𑁆𑀬 [𑀦𑀺𑀘𑁆𑀙𑀸𑀤𑁂𑀬𑁆𑀬 (𑀲𑀻. 𑀧𑀻. 𑀓.), 𑀦𑀺𑀘𑁆𑀙𑁄𑀝𑁂𑀬𑁆𑀬 (𑀓.), 𑀦𑀺𑀧𑁆𑀧𑁄𑀞𑁂𑀬𑁆𑀬 (𑀲𑁆𑀬𑀸. 𑀓𑀁.)] 𑀏𑀯𑀫𑁂𑀯𑀸𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀑𑀥𑀼𑀦𑀺𑀲𑁆𑀲𑀸𑀫𑀺 𑀦𑀺𑀤𑁆𑀥𑀼𑀦𑀺𑀲𑁆𑀲𑀸𑀫𑀺 𑀦𑀺𑀧𑁆𑀨𑁄𑀝𑁂𑀲𑁆𑀲𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀓𑀼𑀜𑁆𑀚𑀭𑁄 𑀲𑀝𑁆𑀞𑀺𑀳𑀸𑀬𑀦𑁄 𑀕𑀫𑁆𑀪𑀻𑀭𑀁 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑁂𑀢𑁆𑀯𑀸 𑀲𑀸𑀡𑀥𑁄𑀯𑀺𑀓𑀁 𑀦𑀸𑀫 𑀓𑀻𑀴𑀺𑀢𑀚𑀸𑀢𑀁 𑀓𑀻𑀴𑀢𑀺, 𑀏𑀯𑀫𑁂𑀯𑀸𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀲𑀸𑀡𑀥𑁄𑀯𑀺𑀓𑀁 𑀫𑀜𑁆𑀜𑁂 𑀓𑀻𑀴𑀺𑀢𑀚𑀸𑀢𑀁 𑀓𑀻𑀴𑀺𑀲𑁆𑀲𑀸𑀫𑀺. 𑀅𑀪𑀺𑀓𑁆𑀓𑀫𑀦𑁆𑀢𑀼 𑀪𑁄𑀦𑁆𑀢𑁄 𑀮𑀺𑀘𑁆𑀙𑀯𑀻, 𑀅𑀪𑀺𑀓𑁆𑀓𑀫𑀦𑁆𑀢𑀼 𑀪𑁄𑀦𑁆𑀢𑁄 𑀮𑀺𑀘𑁆𑀙𑀯𑀻, 𑀅𑀚𑁆𑀚 𑀫𑁂 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁆𑀭𑁂𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀘𑁆𑀘𑀓𑀲𑁆𑀲 𑀦𑀺𑀕𑀡𑁆𑀞𑀧𑀼𑀢𑁆𑀢𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀺, 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀻’’𑀢𑀺? 𑀏𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀲𑁄 𑀪𑀯𑀫𑀸𑀦𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀬𑁄 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀺, 𑀅𑀣 𑀔𑁄 𑀪𑀕𑀯𑀸 𑀲𑀘𑁆𑀘𑀓𑀲𑁆𑀲 𑀦𑀺𑀕𑀡𑁆𑀞𑀧𑀼𑀢𑁆𑀢𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀻’’𑀢𑀺? 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀧𑀜𑁆𑀘𑀫𑀢𑁆𑀢𑁂𑀳𑀺 𑀮𑀺𑀘𑁆𑀙𑀯𑀺𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀬𑁂𑀦 𑀫𑀳𑀸𑀯𑀦𑀁 𑀓𑀽𑀝𑀸𑀕𑀸𑀭𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑁩𑁫𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀺. 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀳𑀁 𑀦𑀼 𑀔𑁄, 𑀪𑁄, 𑀏𑀢𑀭𑀳𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀯𑀺𑀳𑀭𑀢𑀺? 𑀤𑀲𑁆𑀲𑀦𑀓𑀸𑀫𑀸 𑀳𑀺 𑀫𑀬𑀁 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺. ‘‘𑀏𑀲, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀕𑀯𑀸 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄’’𑀢𑀺. 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀫𑀳𑀢𑀺𑀬𑀸 𑀮𑀺𑀘𑁆𑀙𑀯𑀺𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑁂𑀧𑀺 𑀔𑁄 𑀮𑀺𑀘𑁆𑀙𑀯𑀻 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑁩𑁫𑁬. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀘𑁆𑀙𑁂𑀬𑁆𑀬𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀓𑀺𑀜𑁆𑀘𑀺𑀤𑁂𑀯 𑀤𑁂𑀲𑀁, 𑀲𑀘𑁂 𑀫𑁂 𑀪𑀯𑀁 𑀕𑁄𑀢𑀫𑁄 𑀑𑀓𑀸𑀲𑀁 𑀓𑀭𑁄𑀢𑀺 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺. ‘‘𑀧𑀼𑀘𑁆𑀙, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀤𑀸𑀓𑀗𑁆𑀔𑀲𑀻’’𑀢𑀺. ‘‘𑀓𑀣𑀁 𑀧𑀦 𑀪𑀯𑀁 𑀕𑁄𑀢𑀫𑁄 𑀲𑀸𑀯𑀓𑁂 𑀯𑀺𑀦𑁂𑀢𑀺, 𑀓𑀣𑀁𑀪𑀸𑀕𑀸 𑀘 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀸𑀯𑀓𑁂𑀲𑀼 𑀅𑀦𑀼𑀲𑀸𑀲𑀦𑀻 𑀩𑀳𑀼𑀮𑀸 𑀧𑀯𑀢𑁆𑀢𑀢𑀻’’𑀢𑀺? ‘‘𑀏𑀯𑀁 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀸𑀯𑀓𑁂 𑀯𑀺𑀦𑁂𑀫𑀺, 𑀏𑀯𑀁𑀪𑀸𑀕𑀸 𑀘 𑀧𑀦 𑀫𑁂 𑀲𑀸𑀯𑀓𑁂𑀲𑀼 𑀅𑀦𑀼𑀲𑀸𑀲𑀦𑀻 𑀩𑀳𑀼𑀮𑀸 𑀧𑀯𑀢𑁆𑀢𑀢𑀺 𑁋 ‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸, 𑀲𑀜𑁆𑀜𑀸 𑀅𑀦𑀺𑀘𑁆𑀘𑀸, 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀲𑀜𑁆𑀜𑀸 𑀅𑀦𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀸𑀯𑀓𑁂 𑀯𑀺𑀦𑁂𑀫𑀺, 𑀏𑀯𑀁𑀪𑀸𑀕𑀸 𑀘 𑀧𑀦 𑀫𑁂 𑀲𑀸𑀯𑀓𑁂𑀲𑀼 𑀅𑀦𑀼𑀲𑀸𑀲𑀦𑀻 𑀩𑀳𑀼𑀮𑀸 𑀧𑀯𑀢𑁆𑀢𑀢𑀻’’𑀢𑀺.

‘‘𑀉𑀧𑀫𑀸 𑀫𑀁, 𑀪𑁄 𑀕𑁄𑀢𑀫, 𑀧𑀝𑀺𑀪𑀸𑀢𑀻’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀬𑁂 𑀓𑁂𑀘𑀺𑀫𑁂 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬. 𑀏𑀯𑀫𑁂𑀢𑁂 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦, 𑀪𑁄 𑀕𑁄𑀢𑀫, 𑀬𑁂 𑀓𑁂𑀘𑀺𑀫𑁂 𑀩𑀮𑀓𑀭𑀡𑀻𑀬𑀸 𑀓𑀫𑁆𑀫𑀦𑁆𑀢𑀸 𑀓𑀭𑀻𑀬𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬. 𑀏𑀯𑀫𑁂𑀢𑁂 𑀩𑀮𑀓𑀭𑀡𑀻𑀬𑀸 𑀓𑀫𑁆𑀫𑀦𑁆𑀢𑀸 𑀓𑀭𑀻𑀬𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑁄 𑀕𑁄𑀢𑀫, 𑀭𑀽𑀧𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀭𑀽𑀧𑁂 𑀧𑀢𑀺𑀝𑁆𑀞𑀸𑀬 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸 𑀧𑀲𑀯𑀢𑀺, 𑀯𑁂𑀤𑀦𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀯𑁂𑀤𑀦𑀸𑀬𑀁 𑀧𑀢𑀺𑀝𑁆𑀞𑀸𑀬 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸 𑀧𑀲𑀯𑀢𑀺, 𑀲𑀜𑁆𑀜𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀲𑀜𑁆𑀜𑀸𑀬𑀁 𑀧𑀢𑀺𑀝𑁆𑀞𑀸𑀬 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸 𑀧𑀲𑀯𑀢𑀺, 𑀲𑀗𑁆𑀔𑀸𑀭𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀲𑀗𑁆𑀔𑀸𑀭𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸 𑀧𑀲𑀯𑀢𑀺, 𑀯𑀺𑀜𑁆𑀜𑀸𑀡𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀯𑀺𑀜𑁆𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸 𑀧𑀲𑀯𑀢𑀻’’𑀢𑀺.

‘‘𑀦𑀦𑀼 𑀢𑁆𑀯𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀯𑀁 𑀯𑀤𑁂𑀲𑀺 𑁋 ‘𑀭𑀽𑀧𑀁 𑀫𑁂 𑀅𑀢𑁆𑀢𑀸, 𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸, 𑀲𑀜𑁆𑀜𑀸 𑀫𑁂 𑀅𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀫𑁂 𑀅𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫, 𑀏𑀯𑀁 𑀯𑀤𑀸𑀫𑀺 𑁋 ‘𑀭𑀽𑀧𑀁 𑀫𑁂 𑀅𑀢𑁆𑀢𑀸, 𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸, 𑀲𑀜𑁆𑀜𑀸 𑀫𑁂 𑀅𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀫𑁂 𑀅𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀫𑁂 𑀅𑀢𑁆𑀢𑀸’𑀢𑀺, 𑀅𑀬𑀜𑁆𑀘 𑀫𑀳𑀢𑀻 𑀚𑀦𑀢𑀸’’𑀢𑀺.

‘‘𑀓𑀺𑀜𑁆𑀳𑀺 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀳𑀢𑀻 𑀚𑀦𑀢𑀸 𑀓𑀭𑀺𑀲𑁆𑀲𑀢𑀺? 𑀇𑀗𑁆𑀖 𑀢𑁆𑀯𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀓𑀜𑁆𑀜𑁂𑀯 𑀯𑀸𑀤𑀁 𑀦𑀺𑀩𑁆𑀩𑁂𑀞𑁂𑀳𑀻’’𑀢𑀺. ‘‘𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫, 𑀏𑀯𑀁 𑀯𑀤𑀸𑀫𑀺 𑁋 ‘𑀭𑀽𑀧𑀁 𑀫𑁂 𑀅𑀢𑁆𑀢𑀸, 𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸, 𑀲𑀜𑁆𑀜𑀸 𑀫𑁂 𑀅𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀫𑁂 𑀅𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀫𑁂 𑀅𑀢𑁆𑀢𑀸’’’𑀢𑀺.

𑁩𑁫𑁭. ‘‘𑀢𑁂𑀦 𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 [𑀢𑀣𑀸 𑀢𑀁 (𑀓.)] 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑀢𑁆𑀢𑁂𑀬𑁆𑀬 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀲𑀓𑀲𑁆𑀫𑀺𑀁 𑀯𑀺𑀚𑀺𑀢𑁂 𑀯𑀲𑁄 𑁋 𑀖𑀸𑀢𑁂𑀢𑀸𑀬𑀁 𑀯𑀸 𑀖𑀸𑀢𑁂𑀢𑀼𑀁, 𑀚𑀸𑀧𑁂𑀢𑀸𑀬𑀁 𑀯𑀸 𑀚𑀸𑀧𑁂𑀢𑀼𑀁, 𑀧𑀩𑁆𑀩𑀸𑀚𑁂𑀢𑀸𑀬𑀁 𑀯𑀸 𑀧𑀩𑁆𑀩𑀸𑀚𑁂𑀢𑀼𑀁, 𑀲𑁂𑀬𑁆𑀬𑀣𑀸𑀧𑀺 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲, 𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲𑀸’’𑀢𑀺? ‘‘𑀯𑀢𑁆𑀢𑁂𑀬𑁆𑀬, 𑀪𑁄 𑀕𑁄𑀢𑀫, 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀲𑀓𑀲𑁆𑀫𑀺𑀁 𑀯𑀺𑀚𑀺𑀢𑁂 𑀯𑀲𑁄 𑁋 𑀖𑀸𑀢𑁂𑀢𑀸𑀬𑀁 𑀯𑀸 𑀖𑀸𑀢𑁂𑀢𑀼𑀁, 𑀚𑀸𑀧𑁂𑀢𑀸𑀬𑀁 𑀯𑀸 𑀚𑀸𑀧𑁂𑀢𑀼𑀁, 𑀧𑀩𑁆𑀩𑀸𑀚𑁂𑀢𑀸𑀬𑀁 𑀯𑀸 𑀧𑀩𑁆𑀩𑀸𑀚𑁂𑀢𑀼𑀁, 𑀲𑁂𑀬𑁆𑀬𑀣𑀸𑀧𑀺 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲, 𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲. 𑀇𑀫𑁂𑀲𑀫𑁆𑀧𑀺 𑀳𑀺, 𑀪𑁄 𑀕𑁄𑀢𑀫, 𑀲𑀗𑁆𑀖𑀸𑀦𑀁 𑀕𑀡𑀸𑀦𑀁 𑁋 𑀲𑁂𑀬𑁆𑀬𑀣𑀺𑀤𑀁, 𑀯𑀚𑁆𑀚𑀻𑀦𑀁 𑀫𑀮𑁆𑀮𑀸𑀦𑀁 𑁋 𑀯𑀢𑁆𑀢𑀢𑀺 𑀲𑀓𑀲𑁆𑀫𑀺𑀁 𑀯𑀺𑀚𑀺𑀢𑁂 𑀯𑀲𑁄 𑁋 𑀖𑀸𑀢𑁂𑀢𑀸𑀬𑀁 𑀯𑀸 𑀖𑀸𑀢𑁂𑀢𑀼𑀁, 𑀚𑀸𑀧𑁂𑀢𑀸𑀬𑀁 𑀯𑀸 𑀚𑀸𑀧𑁂𑀢𑀼𑀁, 𑀧𑀩𑁆𑀩𑀸𑀚𑁂𑀢𑀸𑀬𑀁 𑀯𑀸 𑀧𑀩𑁆𑀩𑀸𑀚𑁂𑀢𑀼𑀁. 𑀓𑀺𑀁 𑀧𑀦 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲, 𑀲𑁂𑀬𑁆𑀬𑀣𑀸𑀧𑀺 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲, 𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲? 𑀯𑀢𑁆𑀢𑁂𑀬𑁆𑀬, 𑀪𑁄 𑀕𑁄𑀢𑀫, 𑀯𑀢𑁆𑀢𑀺𑀢𑀼𑀜𑁆𑀘 𑀫𑀭𑀳𑀢𑀻’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 𑁋 ‘𑀭𑀽𑀧𑀁 𑀫𑁂 𑀅𑀢𑁆𑀢𑀸’𑀢𑀺, 𑀯𑀢𑁆𑀢𑀢𑀺 𑀢𑁂 𑀢𑀲𑁆𑀫𑀺𑀁 𑀭𑀽𑀧𑁂 𑀯𑀲𑁄 𑁋 𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀲𑀘𑁆𑀘𑀓𑀁 𑀦𑀺𑀕𑀡𑁆𑀞𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 𑁋 ‘𑀭𑀽𑀧𑀁 𑀫𑁂 𑀅𑀢𑁆𑀢𑀸’𑀢𑀺, 𑀯𑀢𑁆𑀢𑀢𑀺 𑀢𑁂 𑀢𑀲𑁆𑀫𑀺𑀁 𑀭𑀽𑀧𑁂 𑀯𑀲𑁄 𑁋 𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’’𑀢𑀺? 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀲𑀘𑁆𑀘𑀓𑀁 𑀦𑀺𑀕𑀡𑁆𑀞𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀭𑁄𑀳𑀺 𑀤𑀸𑀦𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦 𑀤𑀸𑀦𑀺 𑀢𑁂 𑀢𑀼𑀡𑁆𑀳𑀻𑀪𑀸𑀯𑀲𑁆𑀲 𑀓𑀸𑀮𑁄. 𑀬𑁄 𑀓𑁄𑀘𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦 𑀢𑀣𑀸𑀕𑀢𑁂𑀦 𑀬𑀸𑀯𑀢𑀢𑀺𑀬𑀁 𑀲𑀳𑀥𑀫𑁆𑀫𑀺𑀓𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀭𑁄𑀢𑀺, 𑀏𑀢𑁆𑀣𑁂𑀯𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀚𑀺𑀭𑀧𑀸𑀡𑀺 𑀬𑀓𑁆𑀔𑁄 𑀆𑀬𑀲𑀁 𑀯𑀚𑀺𑀭𑀁 𑀆𑀤𑀸𑀬 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀲𑀘𑁆𑀘𑀓𑀲𑁆𑀲 𑀦𑀺𑀕𑀡𑁆𑀞𑀧𑀼𑀢𑁆𑀢𑀲𑁆𑀲 𑀉𑀧𑀭𑀺𑀯𑁂𑀳𑀸𑀲𑀁 𑀞𑀺𑀢𑁄 𑀳𑁄𑀢𑀺 𑁋 ‘𑀲𑀘𑀸𑀬𑀁 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀢𑀸 𑀬𑀸𑀯𑀢𑀢𑀺𑀬𑀁 𑀲𑀳𑀥𑀫𑁆𑀫𑀺𑀓𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀏𑀢𑁆𑀣𑁂𑀯𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀁 𑀨𑀸𑀮𑁂𑀲𑁆𑀲𑀸𑀫𑀻’𑀢𑀺. 𑀢𑀁 𑀔𑁄 𑀧𑀦 𑀯𑀚𑀺𑀭𑀧𑀸𑀡𑀺𑀁 𑀬𑀓𑁆𑀔𑀁 𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺 𑀲𑀘𑁆𑀘𑀓𑁄 𑀘 𑀦𑀺𑀕𑀡𑁆𑀞𑀧𑀼𑀢𑁆𑀢𑁄. 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀪𑀕𑀯𑀦𑁆𑀢𑀁𑀬𑁂𑀯 𑀢𑀸𑀡𑀁 𑀕𑀯𑁂𑀲𑀻 𑀪𑀕𑀯𑀦𑁆𑀢𑀁𑀬𑁂𑀯 𑀮𑁂𑀡𑀁 𑀕𑀯𑁂𑀲𑀻 𑀪𑀕𑀯𑀦𑁆𑀢𑀁𑀬𑁂𑀯 𑀲𑀭𑀡𑀁 𑀕𑀯𑁂𑀲𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀘𑁆𑀙𑀢𑀼 𑀫𑀁 𑀪𑀯𑀁 𑀕𑁄𑀢𑀫𑁄, 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑁩𑁫𑁮. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 𑁋 ‘𑀭𑀽𑀧𑀁 𑀫𑁂 𑀅𑀢𑁆𑀢𑀸’𑀢𑀺, 𑀯𑀢𑁆𑀢𑀢𑀺 𑀢𑁂 𑀢𑀲𑁆𑀫𑀺𑀁 𑀭𑀽𑀧𑁂 𑀯𑀲𑁄 𑁋 𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀫𑀦𑀲𑀺 𑀓𑀭𑁄𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦; 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀩𑁆𑀬𑀸𑀓𑀭𑁄𑀳𑀺. 𑀦 𑀔𑁄 𑀢𑁂 𑀲𑀦𑁆𑀥𑀺𑀬𑀢𑀺 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 𑁋 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺, 𑀯𑀢𑁆𑀢𑀢𑀺 𑀢𑁂 𑀢𑀺𑀲𑁆𑀲𑀁 𑀯𑁂𑀤𑀦𑀸𑀬𑀁 [𑀢𑀸𑀬𑀁 𑀯𑁂𑀤𑀦𑀸𑀬𑀁 (𑀲𑀻. 𑀲𑁆𑀬𑀸.)] 𑀯𑀲𑁄 𑁋 𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀼, 𑀏𑀯𑀁 𑀫𑁂 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀫𑀦𑀲𑀺 𑀓𑀭𑁄𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦; 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀩𑁆𑀬𑀸𑀓𑀭𑁄𑀳𑀺. 𑀦 𑀔𑁄 𑀢𑁂 𑀲𑀦𑁆𑀥𑀺𑀬𑀢𑀺 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀁, 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 𑁋 ‘𑀲𑀜𑁆𑀜𑀸 𑀫𑁂 𑀅𑀢𑁆𑀢𑀸’𑀢𑀺, 𑀯𑀢𑁆𑀢𑀢𑀺 𑀢𑁂 𑀢𑀺𑀲𑁆𑀲𑀁 𑀲𑀜𑁆𑀜𑀸𑀬𑀁 𑀯𑀲𑁄 𑁋 𑀏𑀯𑀁 𑀫𑁂 𑀲𑀜𑁆𑀜𑀸 𑀳𑁄𑀢𑀼, 𑀏𑀯𑀁 𑀫𑁂 𑀲𑀜𑁆𑀜𑀸 𑀫𑀸 𑀅𑀳𑁄𑀲𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀫𑀦𑀲𑀺 𑀓𑀭𑁄𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦; 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀩𑁆𑀬𑀸𑀓𑀭𑁄𑀳𑀺. 𑀦 𑀔𑁄 𑀢𑁂 𑀲𑀦𑁆𑀥𑀺𑀬𑀢𑀺 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀁, 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 𑁋 ‘𑀲𑀗𑁆𑀔𑀸𑀭𑀸 𑀫𑁂 𑀅𑀢𑁆𑀢𑀸’𑀢𑀺, 𑀯𑀢𑁆𑀢𑀢𑀺 𑀢𑁂 𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀯𑀲𑁄 𑁋 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼, 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀫𑀸 𑀅𑀳𑁂𑀲𑀼’’𑀦𑁆𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀫𑀦𑀲𑀺 𑀓𑀭𑁄𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦; 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀩𑁆𑀬𑀸𑀓𑀭𑁄𑀳𑀺. 𑀦 𑀔𑁄 𑀢𑁂 𑀲𑀦𑁆𑀥𑀺𑀬𑀢𑀺 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀁, 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 𑁋 ‘𑀯𑀺𑀜𑁆𑀜𑀸𑀡𑀁 𑀫𑁂 𑀅𑀢𑁆𑀢𑀸’𑀢𑀺, 𑀯𑀢𑁆𑀢𑀢𑀺 𑀢𑁂 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑁂 𑀯𑀲𑁄 𑁋 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀳𑁄𑀢𑀼, 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀫𑀦𑀲𑀺 𑀓𑀭𑁄𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦; 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀩𑁆𑀬𑀸𑀓𑀭𑁄𑀳𑀺. 𑀦 𑀔𑁄 𑀢𑁂 𑀲𑀦𑁆𑀥𑀺𑀬𑀢𑀺 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀁, 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑁄 𑀕𑁄𑀢𑀫’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑁄 𑀕𑁄𑀢𑀫’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑁄 𑀕𑁄𑀢𑀫’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑁄 𑀕𑁄𑀢𑀫’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑁄 𑀦𑀼 𑀔𑁄 𑀤𑀼𑀓𑁆𑀔𑀁 𑀅𑀮𑁆𑀮𑀻𑀦𑁄 𑀤𑀼𑀓𑁆𑀔𑀁 𑀉𑀧𑀕𑀢𑁄 𑀤𑀼𑀓𑁆𑀔𑀁 𑀅𑀚𑁆𑀛𑁄𑀲𑀺𑀢𑁄, 𑀤𑀼𑀓𑁆𑀔𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀧𑀺 𑀦𑀼 𑀔𑁄 𑀲𑁄 𑀲𑀸𑀫𑀁 𑀯𑀸 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑁂𑀬𑁆𑀬, 𑀤𑀼𑀓𑁆𑀔𑀁 𑀯𑀸 𑀧𑀭𑀺𑀓𑁆𑀔𑁂𑀧𑁂𑀢𑁆𑀯𑀸 𑀯𑀺𑀳𑀭𑁂𑀬𑁆𑀬𑀸’’𑀢𑀺? ‘‘𑀓𑀺𑀜𑁆𑀳𑀺 𑀲𑀺𑀬𑀸, 𑀪𑁄 𑀕𑁄𑀢𑀫? 𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦𑀦𑀼 𑀢𑁆𑀯𑀁 𑀏𑀯𑀁 𑀲𑀦𑁆𑀢𑁂 𑀤𑀼𑀓𑁆𑀔𑀁 𑀅𑀮𑁆𑀮𑀻𑀦𑁄 𑀤𑀼𑀓𑁆𑀔𑀁 𑀉𑀧𑀕𑀢𑁄 𑀤𑀼𑀓𑁆𑀔𑀁 𑀅𑀚𑁆𑀛𑁄𑀲𑀺𑀢𑁄, 𑀤𑀼𑀓𑁆𑀔𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑁄 𑀕𑁄𑀢𑀫? 𑀏𑀯𑀫𑁂𑀢𑀁 𑀪𑁄 𑀕𑁄𑀢𑀫𑀸’’𑀢𑀺.

𑁩𑁫𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀧𑀼𑀭𑀺𑀲𑁄 𑀲𑀸𑀭𑀢𑁆𑀣𑀺𑀓𑁄 𑀲𑀸𑀭𑀕𑀯𑁂𑀲𑀻 𑀲𑀸𑀭𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀢𑀺𑀡𑁆𑀳𑀁 𑀓𑀼𑀞𑀸𑀭𑀺𑀁 [𑀓𑀼𑀥𑀸𑀭𑀺𑀁 (𑀲𑁆𑀬𑀸. 𑀓𑀁. 𑀓.)] 𑀆𑀤𑀸𑀬 𑀯𑀦𑀁 𑀧𑀯𑀺𑀲𑁂𑀬𑁆𑀬. 𑀲𑁄 𑀢𑀢𑁆𑀣 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀓𑀤𑀮𑀺𑀓𑁆𑀔𑀦𑁆𑀥𑀁 𑀉𑀚𑀼𑀁 𑀦𑀯𑀁 𑀅𑀓𑀼𑀓𑁆𑀓𑀼𑀓𑀚𑀸𑀢𑀁 [𑀅𑀓𑀼𑀓𑁆𑀓𑀼𑀝𑀚𑀸𑀢𑀁 (𑀲𑁆𑀬𑀸. 𑀓𑀁.)]. 𑀢𑀫𑁂𑀦𑀁 𑀫𑀽𑀮𑁂 𑀙𑀺𑀦𑁆𑀤𑁂𑀬𑁆𑀬, 𑀫𑀽𑀮𑁂 𑀙𑁂𑀢𑁆𑀯𑀸 𑀅𑀕𑁆𑀕𑁂 𑀙𑀺𑀦𑁆𑀤𑁂𑀬𑁆𑀬, 𑀅𑀕𑁆𑀕𑁂 𑀙𑁂𑀢𑁆𑀯𑀸 𑀧𑀢𑁆𑀢𑀯𑀝𑁆𑀝𑀺𑀁 𑀯𑀺𑀦𑀺𑀩𑁆𑀪𑀼𑀚𑁂𑀬𑁆𑀬 [𑀯𑀺𑀦𑀺𑀩𑁆𑀪𑀼𑀚𑁆𑀚𑁂𑀬𑁆𑀬 (𑀓.)]. 𑀲𑁄 𑀢𑀢𑁆𑀣 𑀧𑀢𑁆𑀢𑀯𑀝𑁆𑀝𑀺𑀁 𑀯𑀺𑀦𑀺𑀩𑁆𑀪𑀼𑀚𑀦𑁆𑀢𑁄 𑀨𑁂𑀕𑁆𑀕𑀼𑀫𑁆𑀧𑀺 𑀦𑀸𑀥𑀺𑀕𑀘𑁆𑀙𑁂𑀬𑁆𑀬, 𑀓𑀼𑀢𑁄 𑀲𑀸𑀭𑀁? 𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀬𑀸 𑀲𑀓𑀲𑁆𑀫𑀺𑀁 𑀯𑀸𑀤𑁂 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀭𑀺𑀢𑁆𑀢𑁄 𑀢𑀼𑀘𑁆𑀙𑁄 𑀅𑀧𑀭𑀤𑁆𑀥𑁄. 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂 𑀏𑀲𑀸, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑁂𑀲𑀸𑀮𑀺𑀬𑀁 𑀧𑀭𑀺𑀲𑀢𑀺 𑀯𑀸𑀘𑀸 𑁋 ‘𑀦𑀸𑀳𑀁 𑀢𑀁 𑀧𑀲𑁆𑀲𑀸𑀫𑀺 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀲𑀗𑁆𑀖𑀺𑀁 𑀕𑀡𑀺𑀁 𑀕𑀡𑀸𑀘𑀭𑀺𑀬𑀁, 𑀅𑀧𑀺 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀝𑀺𑀚𑀸𑀦𑀫𑀸𑀦𑀁, 𑀬𑁄 𑀫𑀬𑀸 𑀯𑀸𑀤𑁂𑀦 𑀯𑀸𑀤𑀁 𑀲𑀫𑀸𑀭𑀤𑁆𑀥𑁄 𑀦 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬, 𑀬𑀲𑁆𑀲 𑀦 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑁂𑀬𑁆𑀬𑀼𑀁. 𑀣𑀽𑀡𑀁 𑀘𑁂𑀧𑀸𑀳𑀁 𑀅𑀘𑁂𑀢𑀦𑀁 𑀯𑀸𑀤𑁂𑀦 𑀯𑀸𑀤𑀁 𑀲𑀫𑀸𑀭𑀪𑁂𑀬𑁆𑀬𑀁 𑀲𑀸𑀧𑀺 𑀫𑀬𑀸 𑀯𑀸𑀤𑁂𑀦 𑀯𑀸𑀤𑀁 𑀲𑀫𑀸𑀭𑀤𑁆𑀥𑀸 𑀲𑀗𑁆𑀓𑀫𑁆𑀧𑁂𑀬𑁆𑀬 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀲𑀫𑁆𑀧𑀯𑁂𑀥𑁂𑀬𑁆𑀬. 𑀓𑁄 𑀧𑀦 𑀯𑀸𑀤𑁄 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑀸’𑀢𑀺? 𑀢𑀼𑀬𑁆𑀳𑀁 𑀔𑁄 𑀧𑀦, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀲𑁂𑀤𑀨𑀼𑀲𑀺𑀢𑀸𑀦𑀺 𑀦𑀮𑀸𑀝𑀸 𑀫𑀼𑀢𑁆𑀢𑀸𑀦𑀺, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀯𑀺𑀦𑀺𑀪𑀺𑀦𑁆𑀤𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀸𑀦𑀺. 𑀫𑀬𑁆𑀳𑀁 𑀔𑁄 𑀧𑀦, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦𑀢𑁆𑀣𑀺 𑀏𑀢𑀭𑀳𑀺 𑀓𑀸𑀬𑀲𑁆𑀫𑀺𑀁 𑀲𑁂𑀤𑁄’’𑀢𑀺. 𑀇𑀢𑀺 𑀪𑀕𑀯𑀸 𑀢𑀲𑁆𑀫𑀺𑀁 [𑀢𑀲𑁆𑀲𑀁 (?)] 𑀧𑀭𑀺𑀲𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀁 𑀓𑀸𑀬𑀁 𑀯𑀺𑀯𑀭𑀺. 𑀏𑀯𑀁 𑀯𑀼𑀢𑁆𑀢𑁂, 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀻𑀤𑀺.

𑁩𑁬𑁦. 𑀅𑀣 𑀔𑁄 𑀤𑀼𑀫𑁆𑀫𑀼𑀔𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀲𑀘𑁆𑀘𑀓𑀁 𑀦𑀺𑀕𑀡𑁆𑀞𑀧𑀼𑀢𑁆𑀢𑀁 𑀢𑀼𑀡𑁆𑀳𑀻𑀪𑀽𑀢𑀁 𑀫𑀗𑁆𑀓𑀼𑀪𑀽𑀢𑀁 𑀧𑀢𑁆𑀢𑀓𑁆𑀔𑀦𑁆𑀥𑀁 𑀅𑀥𑁄𑀫𑀼𑀔𑀁 𑀧𑀚𑁆𑀛𑀸𑀬𑀦𑁆𑀢𑀁 𑀅𑀧𑁆𑀧𑀝𑀺𑀪𑀸𑀦𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀉𑀧𑀫𑀸 𑀫𑀁, 𑀪𑀕𑀯𑀸, 𑀧𑀝𑀺𑀪𑀸𑀢𑀻’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁, 𑀤𑀼𑀫𑁆𑀫𑀼𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀧𑁄𑀓𑁆𑀔𑀭𑀡𑀻. 𑀢𑀢𑁆𑀭𑀸𑀲𑁆𑀲 𑀓𑀓𑁆𑀓𑀝𑀓𑁄. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀓𑀼𑀫𑀸𑀭𑀓𑀸 𑀯𑀸 𑀓𑀼𑀫𑀸𑀭𑀺𑀓𑀸 𑀯𑀸 𑀢𑀫𑁆𑀳𑀸 𑀕𑀸𑀫𑀸 𑀯𑀸 𑀦𑀺𑀕𑀫𑀸 𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀲𑀸 𑀧𑁄𑀓𑁆𑀔𑀭𑀡𑀻 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀼𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑁂𑀢𑁆𑀯𑀸 𑀢𑀁 𑀓𑀓𑁆𑀓𑀝𑀓𑀁 𑀉𑀤𑀓𑀸 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀼𑀁. 𑀬𑀜𑁆𑀜𑀤𑁂𑀯 𑀳𑀺 𑀲𑁄, 𑀪𑀦𑁆𑀢𑁂, 𑀓𑀓𑁆𑀓𑀝𑀓𑁄 𑀅𑀴𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀬𑁆𑀬 𑀢𑀁 𑀢𑀤𑁂𑀯 𑀢𑁂 𑀓𑀼𑀫𑀸𑀭𑀓𑀸 𑀯𑀸 𑀓𑀼𑀫𑀸𑀭𑀺𑀓𑀸 𑀯𑀸 𑀓𑀝𑁆𑀞𑁂𑀦 𑀯𑀸 𑀓𑀣𑀮𑁂𑀦 𑀯𑀸 𑀲𑀜𑁆𑀙𑀺𑀦𑁆𑀤𑁂𑀬𑁆𑀬𑀼𑀁 𑀲𑀫𑁆𑀪𑀜𑁆𑀚𑁂𑀬𑁆𑀬𑀼𑀁 𑀲𑀫𑁆𑀧𑀮𑀺𑀪𑀜𑁆𑀚𑁂𑀬𑁆𑀬𑀼𑀁. 𑀏𑀯𑀜𑁆𑀳𑀺 𑀲𑁄, 𑀪𑀦𑁆𑀢𑁂, 𑀓𑀓𑁆𑀓𑀝𑀓𑁄 𑀲𑀩𑁆𑀩𑁂𑀳𑀺 𑀅𑀴𑁂𑀳𑀺 𑀲𑀜𑁆𑀙𑀺𑀦𑁆𑀦𑁂𑀳𑀺 𑀲𑀫𑁆𑀪𑀕𑁆𑀕𑁂𑀳𑀺 𑀲𑀫𑁆𑀧𑀮𑀺𑀪𑀕𑁆𑀕𑁂𑀳𑀺 𑀅𑀪𑀩𑁆𑀩𑁄 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀧𑀼𑀦 𑀑𑀢𑀭𑀺𑀢𑀼𑀁, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀸𑀦𑀺 𑀲𑀘𑁆𑀘𑀓𑀲𑁆𑀲 𑀦𑀺𑀕𑀡𑁆𑀞𑀧𑀼𑀢𑁆𑀢𑀲𑁆𑀲 𑀯𑀺𑀲𑀽𑀓𑀸𑀬𑀺𑀢𑀸𑀦𑀺 𑀯𑀺𑀲𑁂𑀯𑀺𑀢𑀸𑀦𑀺 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀢𑀸𑀦𑀺𑀧𑀺 𑀲𑀩𑁆𑀩𑀸𑀦𑀺 [𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀓𑀸𑀦𑀺𑀘𑀺 𑀓𑀸𑀦𑀺𑀘𑀺 𑀢𑀸𑀦𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀕𑀯𑀢𑀸 𑀲𑀜𑁆𑀙𑀺𑀦𑁆𑀦𑀸𑀦𑀺 𑀲𑀫𑁆𑀪𑀕𑁆𑀕𑀸𑀦𑀺 𑀲𑀫𑁆𑀧𑀮𑀺𑀪𑀕𑁆𑀕𑀸𑀦𑀺; 𑀅𑀪𑀩𑁆𑀩𑁄 𑀘 𑀤𑀸𑀦𑀺, 𑀪𑀦𑁆𑀢𑁂, 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀧𑀼𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀤𑀺𑀤𑀁 𑀯𑀸𑀤𑀸𑀥𑀺𑀧𑁆𑀧𑀸𑀬𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀤𑀼𑀫𑁆𑀫𑀼𑀔𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀳𑀺 𑀢𑁆𑀯𑀁, 𑀤𑀼𑀫𑁆𑀫𑀼𑀔, 𑀆𑀕𑀫𑁂𑀳𑀺 𑀢𑁆𑀯𑀁, 𑀤𑀼𑀫𑁆𑀫𑀼𑀔 ( ) [(𑀫𑀼𑀔𑀭𑁄𑀲𑀺 𑀢𑁆𑀯𑀁 𑀤𑀼𑀫𑁆𑀫𑀼𑀔) (𑀲𑁆𑀬𑀸. 𑀓𑀁.)] 𑀦 𑀫𑀬𑀁 𑀢𑀬𑀸 𑀲𑀤𑁆𑀥𑀺𑀁 𑀫𑀦𑁆𑀢𑁂𑀫, 𑀇𑀥 𑀫𑀬𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀫.

𑁩𑁬𑁧. ‘‘𑀢𑀺𑀝𑁆𑀞𑀢𑁂𑀲𑀸, 𑀪𑁄 𑀕𑁄𑀢𑀫, 𑀅𑀫𑁆𑀳𑀸𑀓𑀜𑁆𑀘𑁂𑀯 𑀅𑀜𑁆𑀜𑁂𑀲𑀜𑁆𑀘 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸𑀘𑀸. 𑀯𑀺𑀮𑀸𑀧𑀁 𑀯𑀺𑀮𑀧𑀺𑀢𑀁 𑀫𑀜𑁆𑀜𑁂. 𑀓𑀺𑀢𑁆𑀢𑀸𑀯𑀢𑀸 𑀘 𑀦𑀼 𑀔𑁄 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀸𑀯𑀓𑁄 𑀲𑀸𑀲𑀦𑀓𑀭𑁄 𑀳𑁄𑀢𑀺 𑀑𑀯𑀸𑀤𑀧𑀢𑀺𑀓𑀭𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀳𑀭𑀢𑀻’’𑀢𑀺? ‘‘𑀇𑀥, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀫 𑀲𑀸𑀯𑀓𑁄 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺; 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸…𑀧𑁂… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸…𑀧𑁂… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸, 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀫 𑀲𑀸𑀯𑀓𑁄 𑀲𑀸𑀲𑀦𑀓𑀭𑁄 𑀳𑁄𑀢𑀺 𑀑𑀯𑀸𑀤𑀧𑀢𑀺𑀓𑀭𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀳𑀭𑀢𑀻’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑁄 𑀕𑁄𑀢𑀫, 𑀪𑀺𑀓𑁆𑀔𑀼 𑀅𑀭𑀳𑀁 𑀳𑁄𑀢𑀺 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄’’𑀢𑀺? ‘‘𑀇𑀥, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸 𑀲𑀩𑁆𑀩𑀁 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺; 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸…𑀧𑁂… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸…𑀧𑁂… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼 𑀅𑀭𑀳𑀁 𑀳𑁄𑀢𑀺 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄. 𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼 𑀢𑀻𑀳𑀺 𑀅𑀦𑀼𑀢𑁆𑀢𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑁂𑀦, 𑀧𑀝𑀺𑀧𑀤𑀸𑀦𑀼𑀢𑁆𑀢𑀭𑀺𑀬𑁂𑀦, 𑀯𑀺𑀫𑀼𑀢𑁆𑀢𑀸𑀦𑀼𑀢𑁆𑀢𑀭𑀺𑀬𑁂𑀦. 𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼 𑀢𑀣𑀸𑀕𑀢𑀜𑁆𑀜𑁂𑀯 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺 𑁋 𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸 𑀩𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀤𑀦𑁆𑀢𑁄 𑀲𑁄 𑀪𑀕𑀯𑀸 𑀤𑀫𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀦𑁆𑀢𑁄 𑀲𑁄 𑀪𑀕𑀯𑀸 𑀲𑀫𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀺𑀡𑁆𑀡𑁄 𑀲𑁄 𑀪𑀕𑀯𑀸 𑀢𑀭𑀡𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺.

𑁩𑁬𑁨. 𑀏𑀯𑀁 𑀯𑀼𑀢𑁆𑀢𑁂, 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑀫𑁂𑀯, 𑀪𑁄 𑀕𑁄𑀢𑀫, 𑀥𑀁𑀲𑀻, 𑀫𑀬𑀁 𑀧𑀕𑀩𑁆𑀩𑀸, 𑀬𑁂 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀆𑀲𑀸𑀤𑁂𑀢𑀩𑁆𑀩𑀁 𑀅𑀫𑀜𑁆𑀜𑀺𑀫𑁆𑀳. 𑀲𑀺𑀬𑀸 𑀳𑀺, 𑀪𑁄 𑀕𑁄𑀢𑀫, 𑀳𑀢𑁆𑀣𑀺𑀁 𑀧𑀪𑀺𑀦𑁆𑀦𑀁 𑀆𑀲𑀚𑁆𑀚 𑀧𑀼𑀭𑀺𑀲𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑁄, 𑀦 𑀢𑁆𑀯𑁂𑀯 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀆𑀲𑀚𑁆𑀚 𑀲𑀺𑀬𑀸 𑀧𑀼𑀭𑀺𑀲𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑁄. 𑀲𑀺𑀬𑀸 𑀳𑀺, 𑀪𑁄 𑀕𑁄𑀢𑀫, 𑀧𑀚𑁆𑀚𑀮𑀺𑀢𑀁 [𑀚𑀮𑀦𑁆𑀢𑀁 (𑀲𑀻. 𑀧𑀻.)] 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀆𑀲𑀚𑁆𑀚 𑀧𑀼𑀭𑀺𑀲𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑁄, 𑀦 𑀢𑁆𑀯𑁂𑀯 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀆𑀲𑀚𑁆𑀚 𑀲𑀺𑀬𑀸 𑀧𑀼𑀭𑀺𑀲𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑁄. 𑀲𑀺𑀬𑀸 𑀳𑀺, 𑀪𑁄 𑀕𑁄𑀢𑀫, 𑀆𑀲𑀻𑀯𑀺𑀲𑀁 𑀖𑁄𑀭𑀯𑀺𑀲𑀁 𑀆𑀲𑀚𑁆𑀚 𑀧𑀼𑀭𑀺𑀲𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑁄, 𑀦 𑀢𑁆𑀯𑁂𑀯 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀆𑀲𑀚𑁆𑀚 𑀲𑀺𑀬𑀸 𑀧𑀼𑀭𑀺𑀲𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑁄. 𑀫𑀬𑀫𑁂𑀯, 𑀪𑁄 𑀕𑁄𑀢𑀫, 𑀥𑀁𑀲𑀻, 𑀫𑀬𑀁 𑀧𑀕𑀩𑁆𑀩𑀸, 𑀬𑁂 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀆𑀲𑀸𑀤𑁂𑀢𑀩𑁆𑀩𑀁 𑀅𑀫𑀜𑁆𑀜𑀺𑀫𑁆𑀳. 𑀅𑀥𑀺𑀯𑀸𑀲𑁂𑀢𑀼 [𑀅𑀥𑀺𑀯𑀸𑀲𑁂𑀢𑀼 𑀘 (𑀧𑀻. 𑀓.)] 𑀫𑁂 𑀪𑀯𑀁 𑀕𑁄𑀢𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑁩𑁬𑁩. 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀼𑀡𑀦𑁆𑀢𑀼 𑀫𑁂 𑀪𑁄𑀦𑁆𑀢𑁄 𑀮𑀺𑀘𑁆𑀙𑀯𑀻, 𑀲𑀫𑀡𑁄 𑀫𑁂 𑀕𑁄𑀢𑀫𑁄 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀢𑁂𑀦 𑀫𑁂 𑀅𑀪𑀺𑀳𑀭𑁂𑀬𑁆𑀬𑀸𑀣 𑀬𑀫𑀲𑁆𑀲 𑀧𑀢𑀺𑀭𑀽𑀧𑀁 𑀫𑀜𑁆𑀜𑁂𑀬𑁆𑀬𑀸𑀣𑀸’’𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀘𑁆𑀘𑀓𑀲𑁆𑀲 𑀦𑀺𑀕𑀡𑁆𑀞𑀧𑀼𑀢𑁆𑀢𑀲𑁆𑀲 𑀧𑀜𑁆𑀘𑀫𑀢𑁆𑀢𑀸𑀦𑀺 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀪𑀢𑁆𑀢𑀸𑀪𑀺𑀳𑀸𑀭𑀁 𑀅𑀪𑀺𑀳𑀭𑀺𑀁𑀲𑀼. 𑀅𑀣 𑀔𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀲𑀓𑁂 𑀆𑀭𑀸𑀫𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀘𑁆𑀘𑀓𑀲𑁆𑀲 𑀦𑀺𑀕𑀡𑁆𑀞𑀧𑀼𑀢𑁆𑀢𑀲𑁆𑀲 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀫𑀺𑀤𑀁, 𑀪𑁄 𑀕𑁄𑀢𑀫, 𑀤𑀸𑀦𑁂 𑀧𑀼𑀜𑁆𑀜𑀜𑁆𑀘 𑀧𑀼𑀜𑁆𑀜𑀫𑀳𑀻 𑀘 𑀢𑀁 𑀤𑀸𑀬𑀓𑀸𑀦𑀁 𑀲𑀼𑀔𑀸𑀬 𑀳𑁄𑀢𑀽’’𑀢𑀺. ‘‘𑀬𑀁 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀸𑀤𑀺𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀆𑀕𑀫𑁆𑀫 𑀅𑀯𑀻𑀢𑀭𑀸𑀕𑀁 𑀅𑀯𑀻𑀢𑀤𑁄𑀲𑀁 𑀅𑀯𑀻𑀢𑀫𑁄𑀳𑀁, 𑀢𑀁 𑀤𑀸𑀬𑀓𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀬𑀁 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀸𑀤𑀺𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀆𑀕𑀫𑁆𑀫 𑀯𑀻𑀢𑀭𑀸𑀕𑀁 𑀯𑀻𑀢𑀤𑁄𑀲𑀁 𑀯𑀻𑀢𑀫𑁄𑀳𑀁, 𑀢𑀁 𑀢𑀼𑀬𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀜𑁆𑀘𑀫𑀁.

𑁬. 𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑀁

𑁩𑁬𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀲𑀼𑀦𑀺𑀯𑀢𑁆𑀣𑁄 𑀳𑁄𑀢𑀺 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀓𑀸𑀫𑁄 [𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬… 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺 (𑀲𑀻.)]. 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄 𑀬𑁂𑀦 𑀫𑀳𑀸𑀯𑀦𑀁 𑀓𑀽𑀝𑀸𑀕𑀸𑀭𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀘𑁆𑀘𑀓𑀁 𑀦𑀺𑀕𑀡𑁆𑀞𑀧𑀼𑀢𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀆𑀕𑀘𑁆𑀙𑀢𑀺 𑀪𑀲𑁆𑀲𑀧𑁆𑀧𑀯𑀸𑀤𑀓𑁄 𑀧𑀡𑁆𑀟𑀺𑀢𑀯𑀸𑀤𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲. 𑀏𑀲𑁄 𑀔𑁄, 𑀪𑀦𑁆𑀢𑁂, 𑀅𑀯𑀡𑁆𑀡𑀓𑀸𑀫𑁄 𑀩𑀼𑀤𑁆𑀥𑀲𑁆𑀲, 𑀅𑀯𑀡𑁆𑀡𑀓𑀸𑀫𑁄 𑀥𑀫𑁆𑀫𑀲𑁆𑀲, 𑀅𑀯𑀡𑁆𑀡𑀓𑀸𑀫𑁄 𑀲𑀗𑁆𑀖𑀲𑁆𑀲. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀫𑀼𑀳𑀼𑀢𑁆𑀢𑀁 𑀦𑀺𑀲𑀻𑀤𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

𑁩𑁬𑁫. ‘‘𑀲𑀦𑁆𑀢𑀺, 𑀪𑁄 𑀕𑁄𑀢𑀫, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀸𑀬𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀦𑁄 𑀘𑀺𑀢𑁆𑀢𑀪𑀸𑀯𑀦𑀁. 𑀨𑀼𑀲𑀦𑁆𑀢𑀺 𑀳𑀺 𑀢𑁂, 𑀪𑁄 𑀕𑁄𑀢𑀫, 𑀲𑀸𑀭𑀻𑀭𑀺𑀓𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁. 𑀪𑀽𑀢𑀧𑀼𑀩𑁆𑀩𑀁, 𑀪𑁄 𑀕𑁄𑀢𑀫, 𑀲𑀸𑀭𑀻𑀭𑀺𑀓𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑀲𑁆𑀲 𑀲𑀢𑁄 𑀊𑀭𑀼𑀓𑁆𑀔𑀫𑁆𑀪𑁄𑀧𑀺 𑀦𑀸𑀫 𑀪𑀯𑀺𑀲𑁆𑀲𑀢𑀺, 𑀳𑀤𑀬𑀫𑁆𑀧𑀺 𑀦𑀸𑀫 𑀨𑀮𑀺𑀲𑁆𑀲𑀢𑀺, 𑀉𑀡𑁆𑀳𑀫𑁆𑀧𑀺 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀫𑀺𑀲𑁆𑀲𑀢𑀺, 𑀉𑀫𑁆𑀫𑀸𑀤𑀫𑁆𑀧𑀺 𑀧𑀸𑀧𑀼𑀡𑀺𑀲𑁆𑀲𑀢𑀺 [𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 (𑀲𑁆𑀬𑀸. 𑀓𑀁.)] 𑀘𑀺𑀢𑁆𑀢𑀓𑁆𑀔𑁂𑀧𑀁. 𑀢𑀲𑁆𑀲 𑀔𑁄 𑀏𑀢𑀁, 𑀪𑁄 𑀕𑁄𑀢𑀫, 𑀓𑀸𑀬𑀦𑁆𑀯𑀬𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀬𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲. 𑀲𑀦𑁆𑀢𑀺 𑀧𑀦, 𑀪𑁄 𑀕𑁄𑀢𑀫, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀺𑀢𑁆𑀢𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀦𑁄 𑀓𑀸𑀬𑀪𑀸𑀯𑀦𑀁. 𑀨𑀼𑀲𑀦𑁆𑀢𑀺 𑀳𑀺 𑀢𑁂, 𑀪𑁄 𑀕𑁄𑀢𑀫, 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁. 𑀪𑀽𑀢𑀧𑀼𑀩𑁆𑀩𑀁, 𑀪𑁄 𑀕𑁄𑀢𑀫, 𑀘𑁂𑀢𑀲𑀺𑀓𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑀲𑁆𑀲 𑀲𑀢𑁄 𑀊𑀭𑀼𑀓𑁆𑀔𑀫𑁆𑀪𑁄𑀧𑀺 𑀦𑀸𑀫 𑀪𑀯𑀺𑀲𑁆𑀲𑀢𑀺, 𑀳𑀤𑀬𑀫𑁆𑀧𑀺 𑀦𑀸𑀫 𑀨𑀮𑀺𑀲𑁆𑀲𑀢𑀺, 𑀉𑀡𑁆𑀳𑀫𑁆𑀧𑀺 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀫𑀺𑀲𑁆𑀲𑀢𑀺, 𑀉𑀫𑁆𑀫𑀸𑀤𑀫𑁆𑀧𑀺 𑀧𑀸𑀧𑀼𑀡𑀺𑀲𑁆𑀲𑀢𑀺 𑀘𑀺𑀢𑁆𑀢𑀓𑁆𑀔𑁂𑀧𑀁. 𑀢𑀲𑁆𑀲 𑀔𑁄 𑀏𑀲𑁄, 𑀪𑁄 𑀕𑁄𑀢𑀫, 𑀘𑀺𑀢𑁆𑀢𑀦𑁆𑀯𑀬𑁄 𑀓𑀸𑀬𑁄 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀪𑀸𑀯𑀺𑀢𑀢𑁆𑀢𑀸 𑀓𑀸𑀬𑀲𑁆𑀲. 𑀢𑀲𑁆𑀲 𑀫𑀬𑁆𑀳𑀁, 𑀪𑁄 𑀕𑁄𑀢𑀫, 𑀏𑀯𑀁 𑀳𑁄𑀢𑀺 𑁋 ‘𑀅𑀤𑁆𑀥𑀸 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀘𑀺𑀢𑁆𑀢𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀦𑁄 𑀓𑀸𑀬𑀪𑀸𑀯𑀦’’’𑀦𑁆𑀢𑀺.

𑁩𑁬𑁬. ‘‘𑀓𑀺𑀦𑁆𑀢𑀺 𑀧𑀦 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀓𑀸𑀬𑀪𑀸𑀯𑀦𑀸 𑀲𑀼𑀢𑀸’’𑀢𑀺? ‘‘𑀲𑁂𑀬𑁆𑀬𑀣𑀺𑀤𑀁 𑁋 𑀦𑀦𑁆𑀤𑁄 𑀯𑀘𑁆𑀙𑁄, 𑀓𑀺𑀲𑁄 𑀲𑀁𑀓𑀺𑀘𑁆𑀘𑁄, 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄 𑁋 𑀏𑀢𑁂𑀳𑀺, 𑀪𑁄 𑀕𑁄𑀢𑀫, 𑀅𑀘𑁂𑀮𑀓𑀸 𑀫𑀼𑀢𑁆𑀢𑀸𑀘𑀸𑀭𑀸 𑀳𑀢𑁆𑀣𑀸𑀧𑀮𑁂𑀔𑀦𑀸 𑀦𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑀸 𑀦𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑀸 [𑀦𑀏𑀳𑀺𑀪𑀤𑀦𑁆𑀢𑀺𑀓𑀸, 𑀦𑀢𑀺𑀝𑁆𑀞𑀪𑀤𑀦𑁆𑀢𑀺𑀓𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀓.)] 𑀦 𑀅𑀪𑀺𑀳𑀝𑀁 𑀦 𑀉𑀤𑁆𑀤𑀺𑀲𑁆𑀲𑀓𑀢𑀁 𑀦 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀦𑁆𑀢𑀺, 𑀢𑁂 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀦 𑀓𑀴𑁄𑀧𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀦 𑀏𑀴𑀓𑀫𑀦𑁆𑀢𑀭𑀁 𑀦 𑀤𑀡𑁆𑀟𑀫𑀦𑁆𑀢𑀭𑀁 𑀦 𑀫𑀼𑀲𑀮𑀫𑀦𑁆𑀢𑀭𑀁 𑀦 𑀤𑁆𑀯𑀺𑀦𑁆𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀦 𑀕𑀩𑁆𑀪𑀺𑀦𑀺𑀬𑀸 𑀦 𑀧𑀸𑀬𑀫𑀸𑀦𑀸𑀬 𑀦 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬 𑀦 𑀲𑀗𑁆𑀓𑀺𑀢𑁆𑀢𑀻𑀲𑀼 𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺 𑀦 𑀬𑀢𑁆𑀣 𑀫𑀓𑁆𑀔𑀺𑀓𑀸 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻, 𑀦 𑀫𑀘𑁆𑀙𑀁 𑀦 𑀫𑀁𑀲𑀁 𑀦 𑀲𑀼𑀭𑀁 𑀦 𑀫𑁂𑀭𑀬𑀁 𑀦 𑀣𑀼𑀲𑁄𑀤𑀓𑀁 𑀧𑀺𑀯𑀦𑁆𑀢𑀺. 𑀢𑁂 𑀏𑀓𑀸𑀕𑀸𑀭𑀺𑀓𑀸 𑀯𑀸 𑀳𑁄𑀦𑁆𑀢𑀺 𑀏𑀓𑀸𑀮𑁄𑀧𑀺𑀓𑀸, 𑀤𑁆𑀯𑀸𑀕𑀸𑀭𑀺𑀓𑀸 𑀯𑀸 𑀳𑁄𑀦𑁆𑀢𑀺 𑀤𑁆𑀯𑀸𑀮𑁄𑀧𑀺𑀓𑀸…𑀧𑁂… 𑀲𑀢𑁆𑀢𑀸𑀕𑀸𑀭𑀺𑀓𑀸 𑀯𑀸 𑀳𑁄𑀦𑁆𑀢𑀺 𑀲𑀢𑁆𑀢𑀸𑀮𑁄𑀧𑀺𑀓𑀸. 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸 𑀬𑀸𑀧𑁂𑀦𑁆𑀢𑀺, 𑀤𑁆𑀯𑀻𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀦𑁆𑀢𑀺…𑀧𑁂… 𑀲𑀢𑁆𑀢𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀦𑁆𑀢𑀺. 𑀏𑀓𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀦𑁆𑀢𑀺, 𑀤𑁆𑀯𑀻𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀦𑁆𑀢𑀺…𑀧𑁂… 𑀲𑀢𑁆𑀢𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀦𑁆𑀢𑀺. 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻’’𑀢𑀺.

‘‘𑀓𑀺𑀁 𑀧𑀦 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀸𑀯𑀢𑀓𑁂𑀦𑁂𑀯 𑀬𑀸𑀧𑁂𑀦𑁆𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫. 𑀅𑀧𑁆𑀧𑁂𑀓𑀤𑀸, 𑀪𑁄 𑀕𑁄𑀢𑀫, 𑀉𑀴𑀸𑀭𑀸𑀦𑀺 𑀉𑀴𑀸𑀭𑀸𑀦𑀺 𑀔𑀸𑀤𑀦𑀻𑀬𑀸𑀦𑀺 𑀔𑀸𑀤𑀦𑁆𑀢𑀺, 𑀉𑀴𑀸𑀭𑀸𑀦𑀺 𑀉𑀴𑀸𑀭𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀦𑁆𑀢𑀺, 𑀉𑀴𑀸𑀭𑀸𑀦𑀺 𑀉𑀴𑀸𑀭𑀸𑀦𑀺 𑀲𑀸𑀬𑀦𑀻𑀬𑀸𑀦𑀺 𑀲𑀸𑀬𑀦𑁆𑀢𑀺, 𑀉𑀴𑀸𑀭𑀸𑀦𑀺 𑀉𑀴𑀸𑀭𑀸𑀦𑀺 𑀧𑀸𑀦𑀸𑀦𑀺 𑀧𑀺𑀯𑀦𑁆𑀢𑀺. 𑀢𑁂 𑀇𑀫𑀁 𑀓𑀸𑀬𑀁 𑀩𑀮𑀁 𑀕𑀸𑀳𑁂𑀦𑁆𑀢𑀺 𑀦𑀸𑀫, 𑀩𑁆𑀭𑀽𑀳𑁂𑀦𑁆𑀢𑀺 𑀦𑀸𑀫, 𑀫𑁂𑀤𑁂𑀦𑁆𑀢𑀺 𑀦𑀸𑀫𑀸’’𑀢𑀺.

‘‘𑀬𑀁 𑀔𑁄 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀧𑀼𑀭𑀺𑀫𑀁 𑀧𑀳𑀸𑀬 𑀧𑀘𑁆𑀙𑀸 𑀉𑀧𑀘𑀺𑀦𑀦𑁆𑀢𑀺, 𑀏𑀯𑀁 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀆𑀘𑀬𑀸𑀧𑀘𑀬𑁄 𑀳𑁄𑀢𑀺. 𑀓𑀺𑀦𑁆𑀢𑀺 𑀧𑀦 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀘𑀺𑀢𑁆𑀢𑀪𑀸𑀯𑀦𑀸 𑀲𑀼𑀢𑀸’’𑀢𑀺? 𑀘𑀺𑀢𑁆𑀢𑀪𑀸𑀯𑀦𑀸𑀬 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀢𑀸 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀦 𑀲𑀫𑁆𑀧𑀸𑀬𑀸𑀲𑀺.

𑁩𑁬𑁭. 𑀅𑀣 𑀔𑁄 𑀪𑀕𑀯𑀸 𑀲𑀘𑁆𑀘𑀓𑀁 𑀦𑀺𑀕𑀡𑁆𑀞𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀸𑀧𑀺 𑀔𑁄 𑀢𑁂 𑀏𑀲𑀸, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀧𑀼𑀭𑀺𑀫𑀸 𑀓𑀸𑀬𑀪𑀸𑀯𑀦𑀸 𑀪𑀸𑀲𑀺𑀢𑀸 𑀲𑀸𑀧𑀺 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀦𑁄 𑀥𑀫𑁆𑀫𑀺𑀓𑀸 𑀓𑀸𑀬𑀪𑀸𑀯𑀦𑀸. 𑀓𑀸𑀬𑀪𑀸𑀯𑀦𑀫𑁆𑀧𑀺 [𑀓𑀸𑀬𑀪𑀸𑀯𑀦𑀁 𑀳𑀺 (𑀲𑀻. 𑀧𑀻. 𑀓.)] 𑀔𑁄 𑀢𑁆𑀯𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦 𑀅𑀜𑁆𑀜𑀸𑀲𑀺, 𑀓𑀼𑀢𑁄 𑀧𑀦 𑀢𑁆𑀯𑀁 𑀘𑀺𑀢𑁆𑀢𑀪𑀸𑀯𑀦𑀁 𑀚𑀸𑀦𑀺𑀲𑁆𑀲𑀲𑀺? 𑀅𑀧𑀺 𑀘, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀣𑀸 𑀅𑀪𑀸𑀯𑀺𑀢𑀓𑀸𑀬𑁄 𑀘 𑀳𑁄𑀢𑀺 𑀅𑀪𑀸𑀯𑀺𑀢𑀘𑀺𑀢𑁆𑀢𑁄 𑀘, 𑀪𑀸𑀯𑀺𑀢𑀓𑀸𑀬𑁄 𑀘 𑀳𑁄𑀢𑀺 𑀪𑀸𑀯𑀺𑀢𑀘𑀺𑀢𑁆𑀢𑁄 𑀘. 𑀢𑀁 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁩𑁬𑁮. ‘‘𑀓𑀣𑀜𑁆𑀘, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀪𑀸𑀯𑀺𑀢𑀓𑀸𑀬𑁄 𑀘 𑀳𑁄𑀢𑀺 𑀅𑀪𑀸𑀯𑀺𑀢𑀘𑀺𑀢𑁆𑀢𑁄 𑀘? 𑀇𑀥, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸. 𑀲𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑀼𑀔𑀲𑀸𑀭𑀸𑀕𑀻 𑀘 𑀳𑁄𑀢𑀺 𑀲𑀼𑀔𑀲𑀸𑀭𑀸𑀕𑀺𑀢𑀜𑁆𑀘 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀲𑀸 𑀲𑀼𑀔𑀸 𑀯𑁂𑀤𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀲𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀔𑁄 𑀏𑀲𑀸, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀅𑀪𑀸𑀯𑀺𑀢𑀢𑁆𑀢𑀸 𑀓𑀸𑀬𑀲𑁆𑀲, 𑀉𑀧𑁆𑀧𑀦𑁆𑀦𑀸𑀧𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀅𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲. 𑀬𑀲𑁆𑀲 𑀓𑀲𑁆𑀲𑀘𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀯𑀁 𑀉𑀪𑀢𑁄𑀧𑀓𑁆𑀔𑀁 𑀉𑀧𑁆𑀧𑀦𑁆𑀦𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀅𑀪𑀸𑀯𑀺𑀢𑀢𑁆𑀢𑀸 𑀓𑀸𑀬𑀲𑁆𑀲, 𑀉𑀧𑁆𑀧𑀦𑁆𑀦𑀸𑀧𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀅𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲, 𑀏𑀯𑀁 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀪𑀸𑀯𑀺𑀢𑀓𑀸𑀬𑁄 𑀘 𑀳𑁄𑀢𑀺 𑀅𑀪𑀸𑀯𑀺𑀢𑀘𑀺𑀢𑁆𑀢𑁄 𑀘.

𑁩𑁬𑁯. ‘‘𑀓𑀣𑀜𑁆𑀘, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀸𑀯𑀺𑀢𑀓𑀸𑀬𑁄 𑀘 𑀳𑁄𑀢𑀺 𑀪𑀸𑀯𑀺𑀢𑀘𑀺𑀢𑁆𑀢𑁄 𑀘? 𑀇𑀥, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸. 𑀲𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀦 𑀲𑀼𑀔𑀲𑀸𑀭𑀸𑀕𑀻 𑀘 𑀳𑁄𑀢𑀺, 𑀦 𑀲𑀼𑀔𑀲𑀸𑀭𑀸𑀕𑀺𑀢𑀜𑁆𑀘 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀲𑀸 𑀲𑀼𑀔𑀸 𑀯𑁂𑀤𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀲𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀔𑁄 𑀏𑀲𑀸, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀪𑀸𑀯𑀺𑀢𑀢𑁆𑀢𑀸 𑀓𑀸𑀬𑀲𑁆𑀲, 𑀉𑀧𑁆𑀧𑀦𑁆𑀦𑀸𑀧𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲. 𑀬𑀲𑁆𑀲 𑀓𑀲𑁆𑀲𑀘𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀯𑀁 𑀉𑀪𑀢𑁄𑀧𑀓𑁆𑀔𑀁 𑀉𑀧𑁆𑀧𑀦𑁆𑀦𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀪𑀸𑀯𑀺𑀢𑀢𑁆𑀢𑀸 𑀓𑀸𑀬𑀲𑁆𑀲, 𑀉𑀧𑁆𑀧𑀦𑁆𑀦𑀸𑀧𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲. 𑀏𑀯𑀁 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀸𑀯𑀺𑀢𑀓𑀸𑀬𑁄 𑀘 𑀳𑁄𑀢𑀺 𑀪𑀸𑀯𑀺𑀢𑀘𑀺𑀢𑁆𑀢𑁄 𑀘𑀸’’𑀢𑀺.

𑁩𑁭𑁦. ‘‘𑀏𑀯𑀁 𑀧𑀲𑀦𑁆𑀦𑁄 𑀅𑀳𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲! 𑀪𑀯𑀜𑁆𑀳𑀺 𑀕𑁄𑀢𑀫𑁄 𑀪𑀸𑀯𑀺𑀢𑀓𑀸𑀬𑁄 𑀘 𑀳𑁄𑀢𑀺 𑀪𑀸𑀯𑀺𑀢𑀘𑀺𑀢𑁆𑀢𑁄 𑀘𑀸’’𑀢𑀺. ‘‘𑀅𑀤𑁆𑀥𑀸 𑀔𑁄 𑀢𑁂 𑀅𑀬𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀲𑀚𑁆𑀚 𑀉𑀧𑀦𑀻𑀬 𑀯𑀸𑀘𑀸 𑀪𑀸𑀲𑀺𑀢𑀸, 𑀅𑀧𑀺 𑀘 𑀢𑁂 𑀅𑀳𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺. 𑀬𑀢𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀢𑀁 𑀯𑀢 𑀫𑁂 𑀉𑀧𑁆𑀧𑀦𑁆𑀦𑀸 𑀯𑀸 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀉𑀧𑁆𑀧𑀦𑁆𑀦𑀸 𑀯𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 [𑀦𑁂𑀢𑀁 𑀔𑁄𑀞𑀸𑀦𑀁 (𑀲𑀻. 𑀧𑀻.)] 𑀯𑀺𑀚𑁆𑀚𑀢𑀻’’𑀢𑀺.

‘‘𑀦 𑀳𑀺 𑀦𑀽𑀦 [𑀦 𑀳𑀦𑀽𑀦 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀢𑀣𑀸𑀭𑀽𑀧𑀸 𑀲𑀼𑀔𑀸 𑀯𑁂𑀤𑀦𑀸 𑀬𑀣𑀸𑀭𑀽𑀧𑀸 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑁂𑀬𑁆𑀬; 𑀦 𑀳𑀺 𑀦𑀽𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀢𑀣𑀸𑀭𑀽𑀧𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀬𑀣𑀸𑀭𑀽𑀧𑀸 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺.

𑁩𑁭𑁧. ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀅𑀕𑁆𑀕𑀺𑀯𑁂𑀲𑁆𑀲𑀦? 𑀇𑀥 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑀸𑀧𑀣𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸. 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀧𑀭𑁂𑀦 𑀲𑀫𑀬𑁂𑀦 𑀤𑀳𑀭𑁄𑀯 𑀲𑀫𑀸𑀦𑁄, 𑀲𑀼𑀲𑀼𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀞𑀫𑁂𑀦 𑀯𑀬𑀲𑀸, 𑀅𑀓𑀸𑀫𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀲𑁆𑀲𑀼𑀫𑀼𑀔𑀸𑀦𑀁 𑀭𑀼𑀤𑀦𑁆𑀢𑀸𑀦𑀁, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀁. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀓𑀺𑀁𑀓𑀼𑀲𑀮𑀕𑀯𑁂𑀲𑀻 𑀅𑀦𑀼𑀢𑁆𑀢𑀭𑀁 𑀲𑀦𑁆𑀢𑀺𑀯𑀭𑀧𑀤𑀁 𑀧𑀭𑀺𑀬𑁂𑀲𑀫𑀸𑀦𑁄 𑀬𑁂𑀦 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀴𑀸𑀭𑀁 𑀓𑀸𑀮𑀸𑀫𑀁 𑀏𑀢𑀤𑀯𑁄𑀘𑀁 𑁋 ‘𑀇𑀘𑁆𑀙𑀸𑀫𑀳𑀁, 𑀆𑀯𑀼𑀲𑁄 𑀓𑀸𑀮𑀸𑀫, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀯𑀺𑀳𑀭𑀢𑀸𑀬𑀲𑁆𑀫𑀸, 𑀢𑀸𑀤𑀺𑀲𑁄 𑀅𑀬𑀁 𑀥𑀫𑁆𑀫𑁄 𑀬𑀢𑁆𑀣 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀦𑀘𑀺𑀭𑀲𑁆𑀲𑁂𑀯 𑀲𑀓𑀁 𑀆𑀘𑀭𑀺𑀬𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦𑀘𑀺𑀭𑀲𑁆𑀲𑁂𑀯 𑀔𑀺𑀧𑁆𑀧𑀫𑁂𑀯 𑀢𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀁. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀸𑀯𑀢𑀓𑁂𑀦𑁂𑀯 𑀑𑀝𑁆𑀞𑀧𑀳𑀢𑀫𑀢𑁆𑀢𑁂𑀦 𑀮𑀧𑀺𑀢𑀮𑀸𑀧𑀦𑀫𑀢𑁆𑀢𑁂𑀦 𑀜𑀸𑀡𑀯𑀸𑀤𑀜𑁆𑀘 𑀯𑀤𑀸𑀫𑀺 𑀣𑁂𑀭𑀯𑀸𑀤𑀜𑁆𑀘, ‘𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀘 𑀧𑀝𑀺𑀚𑀸𑀦𑀸𑀫𑀺, 𑀅𑀳𑀜𑁆𑀘𑁂𑀯 𑀅𑀜𑁆𑀜𑁂 𑀘. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀦 𑀔𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀇𑀫𑀁 𑀥𑀫𑁆𑀫𑀁 𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑁂𑀦 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻𑀢𑀺 𑀧𑀯𑁂𑀤𑁂𑀢𑀺, 𑀅𑀤𑁆𑀥𑀸 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀇𑀫𑀁 𑀥𑀫𑁆𑀫𑀁 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀢𑀻’’’𑀢𑀺.

‘‘𑀅𑀣 𑀔𑁆𑀯𑀸𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑁂𑀦 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀴𑀸𑀭𑀁 𑀓𑀸𑀮𑀸𑀫𑀁 𑀏𑀢𑀤𑀯𑁄𑀘𑀁 𑁋 ‘𑀓𑀺𑀢𑁆𑀢𑀸𑀯𑀢𑀸 𑀦𑁄, 𑀆𑀯𑀼𑀲𑁄 𑀓𑀸𑀮𑀸𑀫, 𑀇𑀫𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻𑀢𑀺 𑀧𑀯𑁂𑀤𑁂𑀲𑀻’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀯𑁂𑀤𑁂𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀦 𑀔𑁄 𑀆𑀴𑀸𑀭𑀲𑁆𑀲𑁂𑀯 𑀓𑀸𑀮𑀸𑀫𑀲𑁆𑀲 𑀅𑀢𑁆𑀣𑀺 𑀲𑀤𑁆𑀥𑀸, 𑀫𑀬𑁆𑀳𑀁𑀧𑀢𑁆𑀣𑀺 𑀲𑀤𑁆𑀥𑀸; 𑀦 𑀔𑁄 𑀆𑀴𑀸𑀭𑀲𑁆𑀲𑁂𑀯 𑀓𑀸𑀮𑀸𑀫𑀲𑁆𑀲 𑀅𑀢𑁆𑀣𑀺 𑀯𑀻𑀭𑀺𑀬𑀁, 𑀫𑀬𑁆𑀳𑀁𑀧𑀢𑁆𑀣𑀺 𑀯𑀻𑀭𑀺𑀬𑀁; 𑀦 𑀔𑁄 𑀆𑀴𑀸𑀭𑀲𑁆𑀲𑁂𑀯 𑀓𑀸𑀮𑀸𑀫𑀲𑁆𑀲 𑀅𑀢𑁆𑀣𑀺 𑀲𑀢𑀺, 𑀫𑀬𑁆𑀳𑀁𑀧𑀢𑁆𑀣𑀺 𑀲𑀢𑀺; 𑀦 𑀔𑁄 𑀆𑀴𑀸𑀭𑀲𑁆𑀲𑁂𑀯 𑀓𑀸𑀮𑀸𑀫𑀲𑁆𑀲 𑀅𑀢𑁆𑀣𑀺 𑀲𑀫𑀸𑀥𑀺, 𑀫𑀬𑁆𑀳𑀁𑀧𑀢𑁆𑀣𑀺 𑀲𑀫𑀸𑀥𑀺; 𑀦 𑀔𑁄 𑀆𑀴𑀸𑀭𑀲𑁆𑀲𑁂𑀯 𑀓𑀸𑀮𑀸𑀫𑀲𑁆𑀲 𑀅𑀢𑁆𑀣𑀺 𑀧𑀜𑁆𑀜𑀸, 𑀫𑀬𑁆𑀳𑀁𑀧𑀢𑁆𑀣𑀺 𑀧𑀜𑁆𑀜𑀸; 𑀬𑀁𑀦𑀽𑀦𑀸𑀳𑀁 𑀬𑀁 𑀥𑀫𑁆𑀫𑀁 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻𑀢𑀺 𑀧𑀯𑁂𑀤𑁂𑀢𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀤𑀳𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦𑀘𑀺𑀭𑀲𑁆𑀲𑁂𑀯 𑀔𑀺𑀧𑁆𑀧𑀫𑁂𑀯 𑀢𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁.

‘‘𑀅𑀣 𑀔𑁆𑀯𑀸𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑁂𑀦 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀴𑀸𑀭𑀁 𑀓𑀸𑀮𑀸𑀫𑀁 𑀏𑀢𑀤𑀯𑁄𑀘𑀁 𑁋 ‘𑀏𑀢𑁆𑀢𑀸𑀯𑀢𑀸 𑀦𑁄, 𑀆𑀯𑀼𑀲𑁄 𑀓𑀸𑀮𑀸𑀫, 𑀇𑀫𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀧𑀯𑁂𑀤𑁂𑀲𑀻’𑀢𑀺? ‘𑀏𑀢𑁆𑀢𑀸𑀯𑀢𑀸 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀧𑀯𑁂𑀤𑁂𑀫𑀻’𑀢𑀺. ‘𑀅𑀳𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀏𑀢𑁆𑀢𑀸𑀯𑀢𑀸 𑀇𑀫𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻’𑀢𑀺. ‘𑀮𑀸𑀪𑀸 𑀦𑁄, 𑀆𑀯𑀼𑀲𑁄, 𑀲𑀼𑀮𑀤𑁆𑀥𑀁 𑀦𑁄, 𑀆𑀯𑀼𑀲𑁄, 𑀬𑁂 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀢𑀸𑀤𑀺𑀲𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀲𑁆𑀲𑀸𑀫. 𑀇𑀢𑀺 𑀬𑀸𑀳𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀧𑀯𑁂𑀤𑁂𑀫𑀺 𑀢𑀁 𑀢𑁆𑀯𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀲𑀺; 𑀬𑀁 𑀢𑁆𑀯𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀲𑀺 𑀢𑀫𑀳𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀧𑀯𑁂𑀤𑁂𑀫𑀺. 𑀇𑀢𑀺 𑀬𑀸𑀳𑀁 𑀥𑀫𑁆𑀫𑀁 𑀚𑀸𑀦𑀸𑀫𑀺 𑀢𑀁 𑀢𑁆𑀯𑀁 𑀥𑀫𑁆𑀫𑀁 𑀚𑀸𑀦𑀸𑀲𑀺; 𑀬𑀁 𑀢𑁆𑀯𑀁 𑀥𑀫𑁆𑀫𑀁 𑀚𑀸𑀦𑀸𑀲𑀺 𑀢𑀫𑀳𑀁 𑀥𑀫𑁆𑀫𑀁 𑀚𑀸𑀦𑀸𑀫𑀺. 𑀇𑀢𑀺 𑀬𑀸𑀤𑀺𑀲𑁄 𑀅𑀳𑀁 𑀢𑀸𑀤𑀺𑀲𑁄 𑀢𑀼𑀯𑀁, 𑀬𑀸𑀤𑀺𑀲𑁄 𑀢𑀼𑀯𑀁 𑀢𑀸𑀤𑀺𑀲𑁄 𑀅𑀳𑀁. 𑀏𑀳𑀺 𑀤𑀸𑀦𑀺, 𑀆𑀯𑀼𑀲𑁄, 𑀉𑀪𑁄𑀯 𑀲𑀦𑁆𑀢𑀸 𑀇𑀫𑀁 𑀕𑀡𑀁 𑀧𑀭𑀺𑀳𑀭𑀸𑀫𑀸’𑀢𑀺. 𑀇𑀢𑀺 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀆𑀘𑀭𑀺𑀬𑁄 𑀫𑁂 𑀲𑀫𑀸𑀦𑁄 (𑀅𑀢𑁆𑀢𑀦𑁄) [( ) 𑀦𑀢𑁆𑀣𑀺 (𑀲𑀻. 𑀧𑀻.)] 𑀅𑀦𑁆𑀢𑁂𑀯𑀸𑀲𑀺𑀁 𑀫𑀁 𑀲𑀫𑀸𑀦𑀁 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀞𑀧𑁂𑀲𑀺, 𑀉𑀴𑀸𑀭𑀸𑀬 𑀘 𑀫𑀁 𑀧𑀽𑀚𑀸𑀬 𑀧𑀽𑀚𑁂𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀦𑀸𑀬𑀁 𑀥𑀫𑁆𑀫𑁄 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀸𑀯𑀤𑁂𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀧𑀢𑁆𑀢𑀺𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀁 𑀥𑀫𑁆𑀫𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀢𑀲𑁆𑀫𑀸 𑀥𑀫𑁆𑀫𑀸 𑀦𑀺𑀩𑁆𑀩𑀺𑀚𑁆𑀚 𑀅𑀧𑀓𑁆𑀓𑀫𑀺𑀁.

𑁩𑁭𑁨. ‘‘𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀓𑀺𑀁𑀓𑀼𑀲𑀮𑀕𑀯𑁂𑀲𑀻 𑀅𑀦𑀼𑀢𑁆𑀢𑀭𑀁 𑀲𑀦𑁆𑀢𑀺𑀯𑀭𑀧𑀤𑀁 𑀧𑀭𑀺𑀬𑁂𑀲𑀫𑀸𑀦𑁄 𑀬𑁂𑀦 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀤𑀓𑀁 𑀭𑀸𑀫𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀇𑀘𑁆𑀙𑀸𑀫𑀳𑀁, 𑀆𑀯𑀼𑀲𑁄 [𑀧𑀲𑁆𑀲 𑀫. 𑀦𑀺. 𑁧.𑁨𑁭𑁮 𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑁂] 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀯𑀺𑀳𑀭𑀢𑀸𑀬𑀲𑁆𑀫𑀸, 𑀢𑀸𑀤𑀺𑀲𑁄 𑀅𑀬𑀁 𑀥𑀫𑁆𑀫𑁄 𑀬𑀢𑁆𑀣 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀦𑀘𑀺𑀭𑀲𑁆𑀲𑁂𑀯 𑀲𑀓𑀁 𑀆𑀘𑀭𑀺𑀬𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦𑀘𑀺𑀭𑀲𑁆𑀲𑁂𑀯 𑀔𑀺𑀧𑁆𑀧𑀫𑁂𑀯 𑀢𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀁. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀸𑀯𑀢𑀓𑁂𑀦𑁂𑀯 𑀑𑀝𑁆𑀞𑀧𑀳𑀢𑀫𑀢𑁆𑀢𑁂𑀦 𑀮𑀧𑀺𑀢𑀮𑀸𑀧𑀦𑀫𑀢𑁆𑀢𑁂𑀦 𑀜𑀸𑀡𑀯𑀸𑀤𑀜𑁆𑀘 𑀯𑀤𑀸𑀫𑀺 𑀣𑁂𑀭𑀯𑀸𑀤𑀜𑁆𑀘, ‘𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀘 𑀧𑀝𑀺𑀚𑀸𑀦𑀸𑀫𑀺, 𑀅𑀳𑀜𑁆𑀘𑁂𑀯 𑀅𑀜𑁆𑀜𑁂 𑀘. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀦 𑀔𑁄 𑀭𑀸𑀫𑁄 𑀇𑀫𑀁 𑀥𑀫𑁆𑀫𑀁 𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑁂𑀦 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻𑀢𑀺 𑀧𑀯𑁂𑀤𑁂𑀲𑀺. 𑀅𑀤𑁆𑀥𑀸 𑀭𑀸𑀫𑁄 𑀇𑀫𑀁 𑀥𑀫𑁆𑀫𑀁 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀸𑀲𑀻’𑀢𑀺. 𑀅𑀣 𑀔𑁆𑀯𑀸𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑁂𑀦 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀤𑀓𑀁 𑀭𑀸𑀫𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀓𑀺𑀢𑁆𑀢𑀸𑀯𑀢𑀸 𑀦𑁄, 𑀆𑀯𑀼𑀲𑁄 𑀭𑀸𑀫𑁄, 𑀇𑀫𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻𑀢𑀺 𑀧𑀯𑁂𑀤𑁂𑀲𑀻’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀯𑁂𑀤𑁂𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀦 𑀔𑁄 𑀭𑀸𑀫𑀲𑁆𑀲𑁂𑀯 𑀅𑀳𑁄𑀲𑀺 𑀲𑀤𑁆𑀥𑀸, 𑀫𑀬𑁆𑀳𑀁𑀧𑀢𑁆𑀣𑀺 𑀲𑀤𑁆𑀥𑀸; 𑀦 𑀔𑁄 𑀭𑀸𑀫𑀲𑁆𑀲𑁂𑀯 𑀅𑀳𑁄𑀲𑀺 𑀯𑀻𑀭𑀺𑀬𑀁, 𑀫𑀬𑁆𑀳𑀁𑀧𑀢𑁆𑀣𑀺 𑀯𑀻𑀭𑀺𑀬𑀁; 𑀦 𑀔𑁄 𑀭𑀸𑀫𑀲𑁆𑀲𑁂𑀯 𑀅𑀳𑁄𑀲𑀺 𑀲𑀢𑀺, 𑀫𑀬𑁆𑀳𑀁𑀧𑀢𑁆𑀣𑀺 𑀲𑀢𑀺; 𑀦 𑀔𑁄 𑀭𑀸𑀫𑀲𑁆𑀲𑁂𑀯 𑀅𑀳𑁄𑀲𑀺 𑀲𑀫𑀸𑀥𑀺, 𑀫𑀬𑁆𑀳𑀁𑀧𑀢𑁆𑀣𑀺 𑀲𑀫𑀸𑀥𑀺; 𑀦 𑀔𑁄 𑀭𑀸𑀫𑀲𑁆𑀲𑁂𑀯 𑀅𑀳𑁄𑀲𑀺 𑀧𑀜𑁆𑀜𑀸, 𑀫𑀬𑁆𑀳𑀁𑀧𑀢𑁆𑀣𑀺 𑀧𑀜𑁆𑀜𑀸; 𑀬𑀁𑀦𑀽𑀦𑀸𑀳𑀁 𑀬𑀁 𑀥𑀫𑁆𑀫𑀁 𑀭𑀸𑀫𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻𑀢𑀺 𑀧𑀯𑁂𑀤𑁂𑀲𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀤𑀳𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦𑀘𑀺𑀭𑀲𑁆𑀲𑁂𑀯 𑀔𑀺𑀧𑁆𑀧𑀫𑁂𑀯 𑀢𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁.

‘‘𑀅𑀣 𑀔𑁆𑀯𑀸𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑁂𑀦 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀤𑀓𑀁 𑀭𑀸𑀫𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀏𑀢𑁆𑀢𑀸𑀯𑀢𑀸 𑀦𑁄, 𑀆𑀯𑀼𑀲𑁄, 𑀭𑀸𑀫𑁄 𑀇𑀫𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀧𑀯𑁂𑀤𑁂𑀲𑀻’𑀢𑀺? ‘𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀭𑀸𑀫𑁄 𑀇𑀫𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀧𑀯𑁂𑀤𑁂𑀲𑀻’𑀢𑀺. ‘𑀅𑀳𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀏𑀢𑁆𑀢𑀸𑀯𑀢𑀸 𑀇𑀫𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻’𑀢𑀺. ‘𑀮𑀸𑀪𑀸 𑀦𑁄, 𑀆𑀯𑀼𑀲𑁄, 𑀲𑀼𑀮𑀤𑁆𑀥𑀁 𑀦𑁄, 𑀆𑀯𑀼𑀲𑁄, 𑀬𑁂 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀢𑀸𑀤𑀺𑀲𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀲𑁆𑀲𑀸𑀫. 𑀇𑀢𑀺 𑀬𑀁 𑀥𑀫𑁆𑀫𑀁 𑀭𑀸𑀫𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀧𑀯𑁂𑀤𑁂𑀲𑀺, 𑀢𑀁 𑀢𑁆𑀯𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀲𑀺; 𑀬𑀁 𑀢𑁆𑀯𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀲𑀺, 𑀢𑀁 𑀥𑀫𑁆𑀫𑀁 𑀭𑀸𑀫𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀧𑀯𑁂𑀤𑁂𑀲𑀺. 𑀇𑀢𑀺 𑀬𑀁 𑀥𑀫𑁆𑀫𑀁 𑀭𑀸𑀫𑁄 𑀅𑀪𑀺𑀜𑁆𑀜𑀸𑀲𑀺 𑀢𑀁 𑀢𑁆𑀯𑀁 𑀥𑀫𑁆𑀫𑀁 𑀚𑀸𑀦𑀸𑀲𑀺; 𑀬𑀁 𑀢𑁆𑀯𑀁 𑀥𑀫𑁆𑀫𑀁 𑀚𑀸𑀦𑀸𑀲𑀺 𑀢𑀁 𑀥𑀫𑁆𑀫𑀁 𑀭𑀸𑀫𑁄 𑀅𑀪𑀺𑀜𑁆𑀜𑀸𑀲𑀺. 𑀇𑀢𑀺 𑀬𑀸𑀤𑀺𑀲𑁄 𑀭𑀸𑀫𑁄 𑀅𑀳𑁄𑀲𑀺 𑀢𑀸𑀤𑀺𑀲𑁄 𑀢𑀼𑀯𑀁; 𑀬𑀸𑀤𑀺𑀲𑁄 𑀢𑀼𑀯𑀁 𑀢𑀸𑀤𑀺𑀲𑁄 𑀭𑀸𑀫𑁄 𑀅𑀳𑁄𑀲𑀺. 𑀏𑀳𑀺 𑀤𑀸𑀦𑀺, 𑀆𑀯𑀼𑀲𑁄, 𑀢𑀼𑀯𑀁 𑀇𑀫𑀁 𑀕𑀡𑀁 𑀧𑀭𑀺𑀳𑀭𑀸’𑀢𑀺. 𑀇𑀢𑀺 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀲𑀩𑁆𑀭𑀳𑁆𑀫𑀘𑀸𑀭𑀻 𑀫𑁂 𑀲𑀫𑀸𑀦𑁄 𑀆𑀘𑀭𑀺𑀬𑀝𑁆𑀞𑀸𑀦𑁂 𑀘 𑀫𑀁 𑀞𑀧𑁂𑀲𑀺, 𑀉𑀴𑀸𑀭𑀸𑀬 𑀘 𑀫𑀁 𑀧𑀽𑀚𑀸𑀬 𑀧𑀽𑀚𑁂𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀦𑀸𑀬𑀁 𑀥𑀫𑁆𑀫𑁄 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀸𑀯𑀤𑁂𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀧𑀢𑁆𑀢𑀺𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀁 𑀥𑀫𑁆𑀫𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀢𑀲𑁆𑀫𑀸 𑀥𑀫𑁆𑀫𑀸 𑀦𑀺𑀩𑁆𑀩𑀺𑀚𑁆𑀚 𑀅𑀧𑀓𑁆𑀓𑀫𑀺𑀁.

𑁩𑁭𑁩. ‘‘𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀓𑀺𑀁𑀓𑀼𑀲𑀮𑀕𑀯𑁂𑀲𑀻 𑀅𑀦𑀼𑀢𑁆𑀢𑀭𑀁 𑀲𑀦𑁆𑀢𑀺𑀯𑀭𑀧𑀤𑀁 𑀧𑀭𑀺𑀬𑁂𑀲𑀫𑀸𑀦𑁄 𑀫𑀕𑀥𑁂𑀲𑀼 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀉𑀭𑀼𑀯𑁂𑀮𑀸 𑀲𑁂𑀦𑀸𑀦𑀺𑀕𑀫𑁄 𑀢𑀤𑀯𑀲𑀭𑀺𑀁. 𑀢𑀢𑁆𑀣𑀤𑁆𑀤𑀲𑀁 𑀭𑀫𑀡𑀻𑀬𑀁 𑀪𑀽𑀫𑀺𑀪𑀸𑀕𑀁, 𑀧𑀸𑀲𑀸𑀤𑀺𑀓𑀜𑁆𑀘 𑀯𑀦𑀲𑀡𑁆𑀟𑀁, 𑀦𑀤𑀺𑀜𑁆𑀘 𑀲𑀦𑁆𑀤𑀦𑁆𑀢𑀺𑀁 𑀲𑁂𑀢𑀓𑀁 𑀲𑀼𑀧𑀢𑀺𑀢𑁆𑀣𑀁 𑀭𑀫𑀡𑀻𑀬𑀁, 𑀲𑀫𑀦𑁆𑀢𑀸 𑀘 𑀕𑁄𑀘𑀭𑀕𑀸𑀫𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀭𑀫𑀡𑀻𑀬𑁄 𑀯𑀢, 𑀪𑁄, 𑀪𑀽𑀫𑀺𑀪𑀸𑀕𑁄, 𑀧𑀸𑀲𑀸𑀤𑀺𑀓𑁄 𑀘 𑀯𑀦𑀲𑀡𑁆𑀟𑁄, 𑀦𑀤𑀻 𑀘 𑀲𑀦𑁆𑀤𑀢𑀺 𑀲𑁂𑀢𑀓𑀸 𑀲𑀼𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸, 𑀲𑀫𑀦𑁆𑀢𑀸 𑀘 𑀕𑁄𑀘𑀭𑀕𑀸𑀫𑁄. 𑀅𑀮𑀁 𑀯𑀢𑀺𑀤𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀥𑀸𑀦𑀢𑁆𑀣𑀺𑀓𑀲𑁆𑀲 𑀧𑀥𑀸𑀦𑀸𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀁 ‘𑀅𑀮𑀫𑀺𑀤𑀁 𑀧𑀥𑀸𑀦𑀸𑀬𑀸’𑀢𑀺.

𑁩𑁭𑁪. ‘‘𑀅𑀧𑀺𑀲𑁆𑀲𑀼𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀺𑀲𑁆𑀲𑁄 𑀉𑀧𑀫𑀸 𑀧𑀝𑀺𑀪𑀁𑀲𑀼 𑀅𑀦𑀘𑁆𑀙𑀭𑀺𑀬𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸. 𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀮𑁆𑀮𑀁 𑀓𑀝𑁆𑀞𑀁 𑀲𑀲𑁆𑀦𑁂𑀳𑀁 𑀉𑀤𑀓𑁂 𑀦𑀺𑀓𑁆𑀔𑀺𑀢𑁆𑀢𑀁. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑁋 ‘𑀅𑀕𑁆𑀕𑀺𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺, 𑀢𑁂𑀚𑁄 𑀧𑀸𑀢𑀼𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀅𑀫𑀼𑀁 𑀅𑀮𑁆𑀮𑀁 𑀓𑀝𑁆𑀞𑀁 𑀲𑀲𑁆𑀦𑁂𑀳𑀁, 𑀉𑀤𑀓𑁂 𑀦𑀺𑀓𑁆𑀔𑀺𑀢𑁆𑀢𑀁, 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑀅𑀪𑀺𑀫𑀦𑁆𑀣𑁂𑀦𑁆𑀢𑁄 𑀅𑀕𑁆𑀕𑀺𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀢𑁂𑀚𑁄 𑀧𑀸𑀢𑀼𑀓𑀭𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀤𑀼𑀜𑁆𑀳𑀺, 𑀪𑁄 𑀕𑁄𑀢𑀫, 𑀅𑀮𑁆𑀮𑀁 𑀓𑀝𑁆𑀞𑀁 𑀲𑀲𑁆𑀦𑁂𑀳𑀁, 𑀢𑀜𑁆𑀘 𑀧𑀦 𑀉𑀤𑀓𑁂 𑀦𑀺𑀓𑁆𑀔𑀺𑀢𑁆𑀢𑀁. 𑀬𑀸𑀯𑀤𑁂𑀯 𑀘 𑀧𑀦 𑀲𑁄 𑀧𑀼𑀭𑀺𑀲𑁄 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀓𑀸𑀬𑁂𑀦 𑀘𑁂𑀯 𑀘𑀺𑀢𑁆𑀢𑁂𑀦 𑀘 𑀓𑀸𑀫𑁂𑀳𑀺 𑀅𑀯𑀽𑀧𑀓𑀝𑁆𑀞𑀸 𑀯𑀺𑀳𑀭𑀦𑁆𑀢𑀺, 𑀬𑁄 𑀘 𑀦𑁂𑀲𑀁 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀧𑀺𑀧𑀸𑀲𑀸 𑀓𑀸𑀫𑀧𑀭𑀺𑀴𑀸𑀳𑁄, 𑀲𑁄 𑀘 𑀅𑀚𑁆𑀛𑀢𑁆𑀢𑀁 𑀦 𑀲𑀼𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀑𑀧𑀓𑁆𑀓𑀫𑀺𑀓𑀸 𑀘𑁂𑀧𑀺 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺, 𑀅𑀪𑀩𑁆𑀩𑀸𑀯 𑀢𑁂 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬. 𑀦𑁄 𑀘𑁂𑀧𑀺 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀑𑀧𑀓𑁆𑀓𑀫𑀺𑀓𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺, 𑀅𑀪𑀩𑁆𑀩𑀸𑀯 𑀢𑁂 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬. 𑀅𑀬𑀁 𑀔𑁄 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀧𑀞𑀫𑀸 𑀉𑀧𑀫𑀸 𑀧𑀝𑀺𑀪𑀸𑀲𑀺 𑀅𑀦𑀘𑁆𑀙𑀭𑀺𑀬𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸.

𑁩𑁭𑁫. ‘‘𑀅𑀧𑀭𑀸𑀧𑀺 𑀔𑁄 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑀼𑀢𑀺𑀬𑀸 𑀉𑀧𑀫𑀸 𑀧𑀝𑀺𑀪𑀸𑀲𑀺 𑀅𑀦𑀘𑁆𑀙𑀭𑀺𑀬𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸. 𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀮𑁆𑀮𑀁 𑀓𑀝𑁆𑀞𑀁 𑀲𑀲𑁆𑀦𑁂𑀳𑀁, 𑀆𑀭𑀓𑀸 𑀉𑀤𑀓𑀸 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀁. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑁋 ‘𑀅𑀕𑁆𑀕𑀺𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺, 𑀢𑁂𑀚𑁄 𑀧𑀸𑀢𑀼𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀅𑀫𑀼𑀁 𑀅𑀮𑁆𑀮𑀁 𑀓𑀝𑁆𑀞𑀁 𑀲𑀲𑁆𑀦𑁂𑀳𑀁, 𑀆𑀭𑀓𑀸 𑀉𑀤𑀓𑀸 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀁, 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑀅𑀪𑀺𑀫𑀦𑁆𑀣𑁂𑀦𑁆𑀢𑁄 𑀅𑀕𑁆𑀕𑀺𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀢𑁂𑀚𑁄 𑀧𑀸𑀢𑀼𑀓𑀭𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀤𑀼𑀜𑁆𑀳𑀺, 𑀪𑁄 𑀕𑁄𑀢𑀫, 𑀅𑀮𑁆𑀮𑀁 𑀓𑀝𑁆𑀞𑀁 𑀲𑀲𑁆𑀦𑁂𑀳𑀁, 𑀓𑀺𑀜𑁆𑀘𑀸𑀧𑀺 𑀆𑀭𑀓𑀸 𑀉𑀤𑀓𑀸 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀁. 𑀬𑀸𑀯𑀤𑁂𑀯 𑀘 𑀧𑀦 𑀲𑁄 𑀧𑀼𑀭𑀺𑀲𑁄 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸𑀢𑀺. 𑀏𑀯𑀫𑁂𑀯 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀓𑀸𑀬𑁂𑀦 𑀘𑁂𑀯 𑀘𑀺𑀢𑁆𑀢𑁂𑀦 𑀘 𑀓𑀸𑀫𑁂𑀳𑀺 𑀯𑀽𑀧𑀓𑀝𑁆𑀞𑀸 𑀯𑀺𑀳𑀭𑀦𑁆𑀢𑀺, 𑀬𑁄 𑀘 𑀦𑁂𑀲𑀁 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀧𑀺𑀧𑀸𑀲𑀸 𑀓𑀸𑀫𑀧𑀭𑀺𑀴𑀸𑀳𑁄 𑀲𑁄 𑀘 𑀅𑀚𑁆𑀛𑀢𑁆𑀢𑀁 𑀦 𑀲𑀼𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀑𑀧𑀓𑁆𑀓𑀫𑀺𑀓𑀸 𑀘𑁂𑀧𑀺 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺, 𑀅𑀪𑀩𑁆𑀩𑀸𑀯 𑀢𑁂 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬. 𑀦𑁄 𑀘𑁂𑀧𑀺 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀑𑀧𑀓𑁆𑀓𑀫𑀺𑀓𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺, 𑀅𑀪𑀩𑁆𑀩𑀸𑀯 𑀢𑁂 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬. 𑀅𑀬𑀁 𑀔𑁄 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑀼𑀢𑀺𑀬𑀸 𑀉𑀧𑀫𑀸 𑀧𑀝𑀺𑀪𑀸𑀲𑀺 𑀅𑀦𑀘𑁆𑀙𑀭𑀺𑀬𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸’’.

𑁩𑁭𑁬. ‘‘𑀅𑀧𑀭𑀸𑀧𑀺 𑀔𑁄 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀢𑀺𑀬𑀸 𑀉𑀧𑀫𑀸 𑀧𑀝𑀺𑀪𑀸𑀲𑀺 𑀅𑀦𑀘𑁆𑀙𑀭𑀺𑀬𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸. 𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀼𑀓𑁆𑀔𑀁 𑀓𑀝𑁆𑀞𑀁 𑀓𑁄𑀴𑀸𑀧𑀁, 𑀆𑀭𑀓𑀸 𑀉𑀤𑀓𑀸 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀁. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑁋 ‘𑀅𑀕𑁆𑀕𑀺𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺, 𑀢𑁂𑀚𑁄 𑀧𑀸𑀢𑀼𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀅𑀫𑀼𑀁 𑀲𑀼𑀓𑁆𑀔𑀁 𑀓𑀝𑁆𑀞𑀁 𑀓𑁄𑀴𑀸𑀧𑀁, 𑀆𑀭𑀓𑀸 𑀉𑀤𑀓𑀸 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀁, 𑀉𑀢𑁆𑀢𑀭𑀸𑀭𑀡𑀺𑀁 𑀆𑀤𑀸𑀬 𑀅𑀪𑀺𑀫𑀦𑁆𑀣𑁂𑀦𑁆𑀢𑁄 𑀅𑀕𑁆𑀕𑀺𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀢𑁂𑀚𑁄 𑀧𑀸𑀢𑀼𑀓𑀭𑁂𑀬𑁆𑀬𑀸’’𑀢𑀺? ‘‘𑀏𑀯𑀁, 𑀪𑁄 𑀕𑁄𑀢𑀫’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀤𑀼𑀜𑁆𑀳𑀺, 𑀪𑁄 𑀕𑁄𑀢𑀫, 𑀲𑀼𑀓𑁆𑀔𑀁 𑀓𑀝𑁆𑀞𑀁 𑀓𑁄𑀴𑀸𑀧𑀁, 𑀢𑀜𑁆𑀘 𑀧𑀦 𑀆𑀭𑀓𑀸 𑀉𑀤𑀓𑀸 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀓𑀸𑀬𑁂𑀦 𑀘𑁂𑀯 𑀘𑀺𑀢𑁆𑀢𑁂𑀦 𑀘 𑀓𑀸𑀫𑁂𑀳𑀺 𑀯𑀽𑀧𑀓𑀝𑁆𑀞𑀸 𑀯𑀺𑀳𑀭𑀦𑁆𑀢𑀺, 𑀬𑁄 𑀘 𑀦𑁂𑀲𑀁 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀧𑀺𑀧𑀸𑀲𑀸 𑀓𑀸𑀫𑀧𑀭𑀺𑀴𑀸𑀳𑁄, 𑀲𑁄 𑀘 𑀅𑀚𑁆𑀛𑀢𑁆𑀢𑀁 𑀲𑀼𑀧𑁆𑀧𑀳𑀻𑀦𑁄 𑀳𑁄𑀢𑀺 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀑𑀧𑀓𑁆𑀓𑀫𑀺𑀓𑀸 𑀘𑁂𑀧𑀺 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺, 𑀪𑀩𑁆𑀩𑀸𑀯 𑀢𑁂 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬. 𑀦𑁄 𑀘𑁂𑀧𑀺 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀑𑀧𑀓𑁆𑀓𑀫𑀺𑀓𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺, 𑀪𑀩𑁆𑀩𑀸𑀯 𑀢𑁂 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬. 𑀅𑀬𑀁 𑀔𑁄 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀢𑀺𑀬𑀸 𑀉𑀧𑀫𑀸 𑀧𑀝𑀺𑀪𑀸𑀲𑀺 𑀅𑀦𑀘𑁆𑀙𑀭𑀺𑀬𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸. 𑀇𑀫𑀸 𑀔𑁄 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀺𑀲𑁆𑀲𑁄 𑀉𑀧𑀫𑀸 𑀧𑀝𑀺𑀪𑀁𑀲𑀼 𑀅𑀦𑀘𑁆𑀙𑀭𑀺𑀬𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸.’’

𑁩𑁭𑁭. ‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀤𑀦𑁆𑀢𑁂𑀪𑀺 𑀤𑀦𑁆𑀢𑀫𑀸𑀥𑀸𑀬 [𑀧𑀲𑁆𑀲 𑀫. 𑀦𑀺. 𑁧.𑁨𑁨𑁧 𑀯𑀺𑀢𑀓𑁆𑀓𑀲𑀡𑁆𑀞𑀸𑀦𑀲𑀼𑀢𑁆𑀢𑁂], 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘, 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑁂𑀬𑁆𑀬𑀁 𑀅𑀪𑀺𑀦𑀺𑀧𑁆𑀧𑀻𑀴𑁂𑀬𑁆𑀬𑀁 𑀅𑀪𑀺𑀲𑀦𑁆𑀢𑀸𑀧𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑀦𑁆𑀢𑁂𑀪𑀺 𑀤𑀦𑁆𑀢𑀫𑀸𑀥𑀸𑀬, 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘, 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀸𑀫𑀺 𑀅𑀪𑀺𑀦𑀺𑀧𑁆𑀧𑀻𑀴𑁂𑀫𑀺 𑀅𑀪𑀺𑀲𑀦𑁆𑀢𑀸𑀧𑁂𑀫𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑀦𑁆𑀢𑁂𑀪𑀺 𑀤𑀦𑁆𑀢𑀫𑀸𑀥𑀸𑀬 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀢𑁄 𑀅𑀪𑀺𑀦𑀺𑀧𑁆𑀧𑀻𑀴𑀬𑀢𑁄 𑀅𑀪𑀺𑀲𑀦𑁆𑀢𑀸𑀧𑀬𑀢𑁄 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀼𑀩𑁆𑀩𑀮𑀢𑀭𑀁 𑀧𑀼𑀭𑀺𑀲𑀁 𑀲𑀻𑀲𑁂 𑀯𑀸 𑀕𑀳𑁂𑀢𑁆𑀯𑀸 𑀔𑀦𑁆𑀥𑁂 𑀯𑀸 𑀕𑀳𑁂𑀢𑁆𑀯𑀸 𑀅𑀪𑀺𑀦𑀺𑀕𑁆𑀕𑀡𑁆𑀳𑁂𑀬𑁆𑀬 𑀅𑀪𑀺𑀦𑀺𑀧𑁆𑀧𑀻𑀴𑁂𑀬𑁆𑀬 𑀅𑀪𑀺𑀲𑀦𑁆𑀢𑀸𑀧𑁂𑀬𑁆𑀬, 𑀏𑀯𑀫𑁂𑀯 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑀦𑁆𑀢𑁂𑀪𑀺 𑀤𑀦𑁆𑀢𑀫𑀸𑀥𑀸𑀬, 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘, 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀢𑁄 𑀅𑀪𑀺𑀦𑀺𑀧𑁆𑀧𑀻𑀴𑀬𑀢𑁄 𑀅𑀪𑀺𑀲𑀦𑁆𑀢𑀸𑀧𑀬𑀢𑁄 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑀻𑀭𑀺𑀬𑀁 𑀳𑁄𑀢𑀺 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀲𑀸𑀭𑀤𑁆𑀥𑁄 𑀘 𑀧𑀦 𑀫𑁂 𑀓𑀸𑀬𑁄 𑀳𑁄𑀢𑀺 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀢𑁂𑀦𑁂𑀯 𑀤𑀼𑀓𑁆𑀔𑀧𑁆𑀧𑀥𑀸𑀦𑁂𑀦 𑀧𑀥𑀸𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑁄. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

𑁩𑁭𑁮. ‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀅𑀧𑁆𑀧𑀸𑀡𑀓𑀁𑀬𑁂𑀯 𑀛𑀸𑀦𑀁 𑀛𑀸𑀬𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀉𑀧𑀭𑀼𑀦𑁆𑀥𑀺𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀓𑀡𑁆𑀡𑀲𑁄𑀢𑁂𑀳𑀺 𑀯𑀸𑀢𑀸𑀦𑀁 𑀦𑀺𑀓𑁆𑀔𑀫𑀦𑁆𑀢𑀸𑀦𑀁 𑀅𑀥𑀺𑀫𑀢𑁆𑀢𑁄 𑀲𑀤𑁆𑀤𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀓𑀫𑁆𑀫𑀸𑀭𑀕𑀕𑁆𑀕𑀭𑀺𑀬𑀸 𑀥𑀫𑀫𑀸𑀦𑀸𑀬 𑀅𑀥𑀺𑀫𑀢𑁆𑀢𑁄 𑀲𑀤𑁆𑀤𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀓𑀡𑁆𑀡𑀲𑁄𑀢𑁂𑀳𑀺 𑀯𑀸𑀢𑀸𑀦𑀁 𑀦𑀺𑀓𑁆𑀔𑀫𑀦𑁆𑀢𑀸𑀦𑀁 𑀅𑀥𑀺𑀫𑀢𑁆𑀢𑁄 𑀲𑀤𑁆𑀤𑁄 𑀳𑁄𑀢𑀺. 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑀻𑀭𑀺𑀬𑀁 𑀳𑁄𑀢𑀺 𑀅𑀲𑀮𑁆𑀮𑀻𑀦𑀁 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸. 𑀲𑀸𑀭𑀤𑁆𑀥𑁄 𑀘 𑀧𑀦 𑀫𑁂 𑀓𑀸𑀬𑁄 𑀳𑁄𑀢𑀺 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀢𑁂𑀦𑁂𑀯 𑀤𑀼𑀓𑁆𑀔𑀧𑁆𑀧𑀥𑀸𑀦𑁂𑀦 𑀧𑀥𑀸𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑁄. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀅𑀧𑁆𑀧𑀸𑀡𑀓𑀁𑀬𑁂𑀯 𑀛𑀸𑀦𑀁 𑀛𑀸𑀬𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀉𑀧𑀭𑀼𑀦𑁆𑀥𑀺𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀫𑀼𑀤𑁆𑀥𑀦𑀺 𑀊𑀳𑀦𑀦𑁆𑀢𑀺 [𑀊𑀳𑀦𑁆𑀢𑀺 (𑀲𑀻.), 𑀑𑀳𑀦𑀦𑁆𑀢𑀺 (𑀲𑁆𑀬𑀸. 𑀓𑀁.), 𑀉𑀳𑀦𑀦𑁆𑀢𑀺 (𑀓.)]. 𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀺𑀡𑁆𑀳𑁂𑀦 𑀲𑀺𑀔𑀭𑁂𑀦 𑀫𑀼𑀤𑁆𑀥𑀦𑀺 𑀅𑀪𑀺𑀫𑀢𑁆𑀣𑁂𑀬𑁆𑀬 [𑀫𑀼𑀤𑁆𑀥𑀸𑀦𑀁 𑀅𑀪𑀺𑀫𑀦𑁆𑀣𑁂𑀬𑁆𑀬 (𑀲𑀻. 𑀧𑀻.), 𑀫𑀼𑀤𑁆𑀥𑀸𑀦𑀁 𑀅𑀪𑀺𑀫𑀢𑁆𑀣𑁂𑀬𑁆𑀬 (𑀲𑁆𑀬𑀸. 𑀓𑀁.)], 𑀏𑀯𑀫𑁂𑀯 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀫𑀼𑀤𑁆𑀥𑀦𑀺 𑀊𑀳𑀦𑀦𑁆𑀢𑀺. 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑀻𑀭𑀺𑀬𑀁 𑀳𑁄𑀢𑀺 𑀅𑀲𑀮𑁆𑀮𑀻𑀦𑀁 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸. 𑀲𑀸𑀭𑀤𑁆𑀥𑁄 𑀘 𑀧𑀦 𑀫𑁂 𑀓𑀸𑀬𑁄 𑀳𑁄𑀢𑀺 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀢𑁂𑀦𑁂𑀯 𑀤𑀼𑀓𑁆𑀔𑀧𑁆𑀧𑀥𑀸𑀦𑁂𑀦 𑀧𑀥𑀸𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑁄. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀅𑀧𑁆𑀧𑀸𑀡𑀓𑀁𑀬𑁂𑀯 𑀛𑀸𑀦𑀁 𑀛𑀸𑀬𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀉𑀧𑀭𑀼𑀦𑁆𑀥𑀺𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀅𑀥𑀺𑀫𑀢𑁆𑀢𑀸 𑀲𑀻𑀲𑁂 𑀲𑀻𑀲𑀯𑁂𑀤𑀦𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀴𑁆𑀳𑁂𑀦 𑀯𑀭𑀢𑁆𑀢𑀓𑁆𑀔𑀡𑁆𑀟𑁂𑀦 [𑀯𑀭𑀢𑁆𑀢𑀓𑀩𑀦𑁆𑀥𑀦𑁂𑀦 (𑀲𑀻.)] 𑀲𑀻𑀲𑁂 𑀲𑀻𑀲𑀯𑁂𑀞𑀁 𑀤𑀤𑁂𑀬𑁆𑀬, 𑀏𑀯𑀫𑁂𑀯 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀅𑀥𑀺𑀫𑀢𑁆𑀢𑀸 𑀲𑀻𑀲𑁂 𑀲𑀻𑀲𑀯𑁂𑀤𑀦𑀸 𑀳𑁄𑀦𑁆𑀢𑀺. 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑀻𑀭𑀺𑀬𑀁 𑀳𑁄𑀢𑀺 𑀅𑀲𑀮𑁆𑀮𑀻𑀦𑀁 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸. 𑀲𑀸𑀭𑀤𑁆𑀥𑁄 𑀘 𑀧𑀦 𑀫𑁂 𑀓𑀸𑀬𑁄 𑀳𑁄𑀢𑀺 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀢𑁂𑀦𑁂𑀯 𑀤𑀼𑀓𑁆𑀔𑀧𑁆𑀧𑀥𑀸𑀦𑁂𑀦 𑀧𑀥𑀸𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑁄. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀅𑀧𑁆𑀧𑀸𑀡𑀓𑀁𑀬𑁂𑀯 𑀛𑀸𑀦𑀁 𑀛𑀸𑀬𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀉𑀧𑀭𑀼𑀦𑁆𑀥𑀺𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀓𑀼𑀘𑁆𑀙𑀺𑀁 𑀧𑀭𑀺𑀓𑀦𑁆𑀢𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸 𑀕𑁄𑀖𑀸𑀢𑀓𑀦𑁆𑀢𑁂𑀯𑀸𑀲𑀻 𑀯𑀸 𑀢𑀺𑀡𑁆𑀳𑁂𑀦 𑀕𑁄𑀯𑀺𑀓𑀦𑁆𑀢𑀦𑁂𑀦 𑀓𑀼𑀘𑁆𑀙𑀺𑀁 𑀧𑀭𑀺𑀓𑀦𑁆𑀢𑁂𑀬𑁆𑀬, 𑀏𑀯𑀫𑁂𑀯 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀓𑀼𑀘𑁆𑀙𑀺𑀁 𑀧𑀭𑀺𑀓𑀦𑁆𑀢𑀦𑁆𑀢𑀺. 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑀻𑀭𑀺𑀬𑀁 𑀳𑁄𑀢𑀺 𑀅𑀲𑀮𑁆𑀮𑀻𑀦𑀁 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸. 𑀲𑀸𑀭𑀤𑁆𑀥𑁄 𑀘 𑀧𑀦 𑀫𑁂 𑀓𑀸𑀬𑁄 𑀳𑁄𑀢𑀺 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀢𑁂𑀦𑁂𑀯 𑀤𑀼𑀓𑁆𑀔𑀧𑁆𑀧𑀥𑀸𑀦𑁂𑀦 𑀧𑀥𑀸𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑁄. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀅𑀧𑁆𑀧𑀸𑀡𑀓𑀁𑀬𑁂𑀯 𑀛𑀸𑀦𑀁 𑀛𑀸𑀬𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀉𑀧𑀭𑀼𑀦𑁆𑀥𑀺𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀅𑀥𑀺𑀫𑀢𑁆𑀢𑁄 𑀓𑀸𑀬𑀲𑁆𑀫𑀺𑀁 𑀟𑀸𑀳𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑁆𑀯𑁂 𑀩𑀮𑀯𑀦𑁆𑀢𑁄 𑀧𑀼𑀭𑀺𑀲𑀸 𑀤𑀼𑀩𑁆𑀩𑀮𑀢𑀭𑀁 𑀧𑀼𑀭𑀺𑀲𑀁 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀬𑀸 𑀲𑀦𑁆𑀢𑀸𑀧𑁂𑀬𑁆𑀬𑀼𑀁 𑀲𑀫𑁆𑀧𑀭𑀺𑀢𑀸𑀧𑁂𑀬𑁆𑀬𑀼𑀁, 𑀏𑀯𑀫𑁂𑀯 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀼𑀔𑀢𑁄 𑀘 𑀦𑀸𑀲𑀢𑁄 𑀘 𑀓𑀡𑁆𑀡𑀢𑁄 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀉𑀧𑀭𑀼𑀤𑁆𑀥𑁂𑀲𑀼 𑀅𑀥𑀺𑀫𑀢𑁆𑀢𑁄 𑀓𑀸𑀬𑀲𑁆𑀫𑀺𑀁 𑀟𑀸𑀳𑁄 𑀳𑁄𑀢𑀺. 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑀻𑀭𑀺𑀬𑀁 𑀳𑁄𑀢𑀺 𑀅𑀲𑀮𑁆𑀮𑀻𑀦𑀁 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸. 𑀲𑀸𑀭𑀤𑁆𑀥𑁄 𑀘 𑀧𑀦 𑀫𑁂 𑀓𑀸𑀬𑁄 𑀳𑁄𑀢𑀺 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀢𑁂𑀦𑁂𑀯 𑀤𑀼𑀓𑁆𑀔𑀧𑁆𑀧𑀥𑀸𑀦𑁂𑀦 𑀧𑀥𑀸𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑁄. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀅𑀧𑀺𑀲𑁆𑀲𑀼 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑁂𑀯𑀢𑀸 𑀤𑀺𑀲𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀓𑀸𑀮𑀗𑁆𑀓𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘𑀦 𑀓𑀸𑀮𑀗𑁆𑀓𑀢𑁄 𑀲𑀫𑀡𑁄 𑀕𑁄𑀢𑀫𑁄, 𑀅𑀧𑀺 𑀘 𑀓𑀸𑀮𑀗𑁆𑀓𑀭𑁄𑀢𑀻’𑀢𑀺. 𑀏𑀓𑀘𑁆𑀘𑀸 𑀤𑁂𑀯𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘𑀦 𑀓𑀸𑀮𑀗𑁆𑀓𑀢𑁄 𑀲𑀫𑀡𑁄 𑀕𑁄𑀢𑀫𑁄, 𑀦𑀧𑀺 𑀓𑀸𑀮𑀗𑁆𑀓𑀭𑁄𑀢𑀺, 𑀅𑀭𑀳𑀁 𑀲𑀫𑀡𑁄 𑀕𑁄𑀢𑀫𑁄, 𑀯𑀺𑀳𑀸𑀭𑁄𑀢𑁆𑀯𑁂𑀯 𑀲𑁄 [𑀯𑀺𑀳𑀸𑀭𑁄𑀢𑁆𑀯𑁂𑀯𑁂𑀲𑁄 (𑀲𑀻.)] 𑀅𑀭𑀳𑀢𑁄 𑀏𑀯𑀭𑀽𑀧𑁄 𑀳𑁄𑀢𑀻’𑀢𑀺 [𑀯𑀺𑀳𑀸𑀭𑁄𑀢𑁆𑀯𑁂𑀯𑁂𑀲𑁄 𑀅𑀭𑀳𑀢𑁄’’𑀢𑀺 (?)].

𑁩𑁭𑁯. ‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀲𑀩𑁆𑀩𑀲𑁄 𑀆𑀳𑀸𑀭𑀼𑀧𑀘𑁆𑀙𑁂𑀤𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀫𑀸 𑀔𑁄 𑀢𑁆𑀯𑀁, 𑀫𑀸𑀭𑀺𑀲, 𑀲𑀩𑁆𑀩𑀲𑁄 𑀆𑀳𑀸𑀭𑀼𑀧𑀘𑁆𑀙𑁂𑀤𑀸𑀬 𑀧𑀝𑀺𑀧𑀚𑁆𑀚𑀺. 𑀲𑀘𑁂 𑀔𑁄 𑀢𑁆𑀯𑀁, 𑀫𑀸𑀭𑀺𑀲, 𑀲𑀩𑁆𑀩𑀲𑁄 𑀆𑀳𑀸𑀭𑀼𑀧𑀘𑁆𑀙𑁂𑀤𑀸𑀬 𑀧𑀝𑀺𑀧𑀚𑁆𑀚𑀺𑀲𑁆𑀲𑀲𑀺, 𑀢𑀲𑁆𑀲 𑀢𑁂 𑀫𑀬𑀁 𑀤𑀺𑀩𑁆𑀩𑀁 𑀑𑀚𑀁 𑀮𑁄𑀫𑀓𑀽𑀧𑁂𑀳𑀺 𑀅𑀚𑁆𑀛𑁄𑀳𑀸𑀭𑁂𑀲𑁆𑀲𑀸𑀫 [𑀅𑀚𑁆𑀛𑁄𑀳𑀭𑀺𑀲𑁆𑀲𑀸𑀫 (𑀲𑁆𑀬𑀸. 𑀓𑀁. 𑀧𑀻. 𑀓.)], 𑀢𑀸𑀬 𑀢𑁆𑀯𑀁 𑀬𑀸𑀧𑁂𑀲𑁆𑀲𑀲𑀻’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀲𑀩𑁆𑀩𑀲𑁄 𑀅𑀚𑀚𑁆𑀚𑀺𑀢𑀁 [𑀅𑀚𑀤𑁆𑀥𑀼𑀓𑀁 (𑀲𑀻. 𑀧𑀻.), 𑀚𑀤𑁆𑀥𑀼𑀓𑀁 (𑀲𑁆𑀬𑀸. 𑀓𑀁.)] 𑀧𑀝𑀺𑀚𑀸𑀦𑁂𑀬𑁆𑀬𑀁, 𑀇𑀫𑀸 𑀘 𑀫𑁂 𑀤𑁂𑀯𑀢𑀸 𑀤𑀺𑀩𑁆𑀩𑀁 𑀑𑀚𑀁 𑀮𑁄𑀫𑀓𑀽𑀧𑁂𑀳𑀺 𑀅𑀚𑁆𑀛𑁄𑀳𑀸𑀭𑁂𑀬𑁆𑀬𑀼𑀁 [𑀅𑀚𑁆𑀛𑁄𑀳𑀭𑁂𑀬𑁆𑀬𑀼𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)], 𑀢𑀸𑀬 𑀘𑀸𑀳𑀁 𑀬𑀸𑀧𑁂𑀬𑁆𑀬𑀁, 𑀢𑀁 𑀫𑀫𑀲𑁆𑀲 𑀫𑀼𑀲𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀸 𑀤𑁂𑀯𑀢𑀸 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, ‘𑀳𑀮’𑀦𑁆𑀢𑀺 𑀯𑀤𑀸𑀫𑀺.

𑁩𑁮𑁦. ‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀣𑁄𑀓𑀁 𑀣𑁄𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬𑀁, 𑀧𑀲𑀢𑀁 𑀧𑀲𑀢𑀁, 𑀬𑀤𑀺 𑀯𑀸 𑀫𑀼𑀕𑁆𑀕𑀬𑀽𑀲𑀁, 𑀬𑀤𑀺 𑀯𑀸 𑀓𑀼𑀮𑀢𑁆𑀣𑀬𑀽𑀲𑀁, 𑀬𑀤𑀺 𑀯𑀸 𑀓𑀴𑀸𑀬𑀬𑀽𑀲𑀁, 𑀬𑀤𑀺 𑀯𑀸 𑀳𑀭𑁂𑀡𑀼𑀓𑀬𑀽𑀲’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀣𑁄𑀓𑀁 𑀣𑁄𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀲𑀺𑀁, 𑀧𑀲𑀢𑀁 𑀧𑀲𑀢𑀁, 𑀬𑀤𑀺 𑀯𑀸 𑀫𑀼𑀕𑁆𑀕𑀬𑀽𑀲𑀁, 𑀬𑀤𑀺 𑀯𑀸 𑀓𑀼𑀮𑀢𑁆𑀣𑀬𑀽𑀲𑀁, 𑀬𑀤𑀺 𑀯𑀸 𑀓𑀴𑀸𑀬𑀬𑀽𑀲𑀁, 𑀬𑀤𑀺 𑀯𑀸 𑀳𑀭𑁂𑀡𑀼𑀓𑀬𑀽𑀲𑀁. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀣𑁄𑀓𑀁 𑀣𑁄𑀓𑀁 𑀆𑀳𑀸𑀭𑀁 𑀆𑀳𑀸𑀭𑀬𑀢𑁄, 𑀧𑀲𑀢𑀁 𑀧𑀲𑀢𑀁, 𑀬𑀤𑀺 𑀯𑀸 𑀫𑀼𑀕𑁆𑀕𑀬𑀽𑀲𑀁, 𑀬𑀤𑀺 𑀯𑀸 𑀓𑀼𑀮𑀢𑁆𑀣𑀬𑀽𑀲𑀁, 𑀬𑀤𑀺 𑀯𑀸 𑀓𑀴𑀸𑀬𑀬𑀽𑀲𑀁, 𑀬𑀤𑀺 𑀯𑀸 𑀳𑀭𑁂𑀡𑀼𑀓𑀬𑀽𑀲𑀁, 𑀅𑀥𑀺𑀫𑀢𑁆𑀢𑀓𑀲𑀺𑀫𑀸𑀦𑀁 𑀧𑀢𑁆𑀢𑁄 𑀓𑀸𑀬𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀆𑀲𑀻𑀢𑀺𑀓𑀧𑀩𑁆𑀩𑀸𑀦𑀺 𑀯𑀸 𑀓𑀸𑀴𑀧𑀩𑁆𑀩𑀸𑀦𑀺 𑀯𑀸, 𑀏𑀯𑀫𑁂𑀯𑀲𑁆𑀲𑀼 𑀫𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀪𑀯𑀦𑁆𑀢𑀺 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀑𑀝𑁆𑀞𑀧𑀤𑀁, 𑀏𑀯𑀫𑁂𑀯𑀲𑁆𑀲𑀼 𑀫𑁂 𑀆𑀦𑀺𑀲𑀤𑀁 𑀳𑁄𑀢𑀺 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀯𑀝𑁆𑀝𑀦𑀸𑀯𑀴𑀻, 𑀏𑀯𑀫𑁂𑀯𑀲𑁆𑀲𑀼 𑀫𑁂 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀉𑀡𑁆𑀡𑀢𑀸𑀯𑀦𑀢𑁄 𑀳𑁄𑀢𑀺 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀚𑀭𑀲𑀸𑀮𑀸𑀬 𑀕𑁄𑀧𑀸𑀡𑀲𑀺𑀬𑁄 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀸 𑀪𑀯𑀦𑁆𑀢𑀺, 𑀏𑀯𑀫𑁂𑀯𑀲𑁆𑀲𑀼 𑀫𑁂 𑀨𑀸𑀲𑀼𑀴𑀺𑀬𑁄 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀸 𑀪𑀯𑀦𑁆𑀢𑀺 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀫𑁆𑀪𑀻𑀭𑁂 𑀉𑀤𑀧𑀸𑀦𑁂 𑀉𑀤𑀓𑀢𑀸𑀭𑀓𑀸 𑀕𑀫𑁆𑀪𑀻𑀭𑀕𑀢𑀸 𑀑𑀓𑁆𑀔𑀸𑀬𑀺𑀓𑀸 𑀤𑀺𑀲𑁆𑀲𑀦𑁆𑀢𑀺, 𑀏𑀯𑀫𑁂𑀯𑀲𑁆𑀲𑀼 𑀫𑁂 𑀅𑀓𑁆𑀔𑀺𑀓𑀽𑀧𑁂𑀲𑀼 𑀅𑀓𑁆𑀔𑀺𑀢𑀸𑀭𑀓𑀸 𑀕𑀫𑁆𑀪𑀻𑀭𑀕𑀢𑀸 𑀑𑀓𑁆𑀔𑀸𑀬𑀺𑀓𑀸 𑀤𑀺𑀲𑁆𑀲𑀦𑁆𑀢𑀺 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀢𑀺𑀢𑁆𑀢𑀓𑀸𑀮𑀸𑀩𑀼 𑀆𑀫𑀓𑀘𑁆𑀙𑀺𑀦𑁆𑀦𑁄 𑀯𑀸𑀢𑀸𑀢𑀧𑁂𑀦 𑀲𑀁𑀨𑀼𑀝𑀺𑀢𑁄 𑀳𑁄𑀢𑀺 𑀲𑀫𑁆𑀫𑀺𑀮𑀸𑀢𑁄, 𑀏𑀯𑀫𑁂𑀯𑀲𑁆𑀲𑀼 𑀫𑁂 𑀲𑀻𑀲𑀘𑁆𑀙𑀯𑀺 𑀲𑀁𑀨𑀼𑀝𑀺𑀢𑀸 𑀳𑁄𑀢𑀺 𑀲𑀫𑁆𑀫𑀺𑀮𑀸𑀢𑀸 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬.

‘‘𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀤𑀭𑀘𑁆𑀙𑀯𑀺𑀁 𑀧𑀭𑀺𑀫𑀲𑀺𑀲𑁆𑀲𑀸𑀫𑀻𑀢𑀺 𑀧𑀺𑀝𑁆𑀞𑀺𑀓𑀡𑁆𑀝𑀓𑀁𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀫𑀺, 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀧𑀭𑀺𑀫𑀲𑀺𑀲𑁆𑀲𑀸𑀫𑀻𑀢𑀺 𑀉𑀤𑀭𑀘𑁆𑀙𑀯𑀺𑀁𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀫𑀺, 𑀬𑀸𑀯𑀲𑁆𑀲𑀼 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀤𑀭𑀘𑁆𑀙𑀯𑀺 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀅𑀮𑁆𑀮𑀻𑀦𑀸 𑀳𑁄𑀢𑀺 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑀘𑁆𑀘𑀁 𑀯𑀸 𑀫𑀼𑀢𑁆𑀢𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻𑀢𑀺 𑀢𑀢𑁆𑀣𑁂𑀯 𑀅𑀯𑀓𑀼𑀚𑁆𑀚𑁄 𑀧𑀧𑀢𑀸𑀫𑀺 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀇𑀫𑀫𑁂𑀯 𑀓𑀸𑀬𑀁 𑀅𑀲𑁆𑀲𑀸𑀲𑁂𑀦𑁆𑀢𑁄 𑀧𑀸𑀡𑀺𑀦𑀸 𑀕𑀢𑁆𑀢𑀸𑀦𑀺 𑀅𑀦𑀼𑀫𑀚𑁆𑀚𑀸𑀫𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀧𑀸𑀡𑀺𑀦𑀸 𑀕𑀢𑁆𑀢𑀸𑀦𑀺 𑀅𑀦𑀼𑀫𑀚𑁆𑀚𑀢𑁄 𑀧𑀽𑀢𑀺𑀫𑀽𑀮𑀸𑀦𑀺 𑀮𑁄𑀫𑀸𑀦𑀺 𑀓𑀸𑀬𑀲𑁆𑀫𑀸 𑀧𑀧𑀢𑀦𑁆𑀢𑀺 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬. 𑀅𑀧𑀺𑀲𑁆𑀲𑀼 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀓𑀸𑀴𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀏𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘𑀦 𑀓𑀸𑀴𑁄 𑀲𑀫𑀡𑁄 𑀕𑁄𑀢𑀫𑁄, 𑀲𑀸𑀫𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀏𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘𑀦 𑀓𑀸𑀴𑁄 𑀲𑀫𑀡𑁄 𑀕𑁄𑀢𑀫𑁄, 𑀦𑀧𑀺 𑀲𑀸𑀫𑁄, 𑀫𑀗𑁆𑀕𑀼𑀭𑀘𑁆𑀙𑀯𑀺 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀬𑀸𑀯𑀲𑁆𑀲𑀼 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀸𑀯 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄 𑀉𑀧𑀳𑀢𑁄 𑀳𑁄𑀢𑀺 𑀢𑀸𑀬𑁂𑀯𑀧𑁆𑀧𑀸𑀳𑀸𑀭𑀢𑀸𑀬.

𑁩𑁮𑁧. ‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀑𑀧𑀓𑁆𑀓𑀫𑀺𑀓𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀺𑀁𑀲𑀼, 𑀏𑀢𑀸𑀯𑀧𑀭𑀫𑀁, 𑀦𑀬𑀺𑀢𑁄 𑀪𑀺𑀬𑁆𑀬𑁄. 𑀬𑁂𑀧𑀺 𑀳𑀺 𑀓𑁂𑀘𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀑𑀧𑀓𑁆𑀓𑀫𑀺𑀓𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀺𑀲𑁆𑀲𑀦𑁆𑀢𑀺, 𑀏𑀢𑀸𑀯𑀧𑀭𑀫𑀁, 𑀦𑀬𑀺𑀢𑁄 𑀪𑀺𑀬𑁆𑀬𑁄. 𑀬𑁂𑀧𑀺 𑀳𑀺 𑀓𑁂𑀘𑀺 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀑𑀧𑀓𑁆𑀓𑀫𑀺𑀓𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺, 𑀏𑀢𑀸𑀯𑀧𑀭𑀫𑀁, 𑀦𑀬𑀺𑀢𑁄 𑀪𑀺𑀬𑁆𑀬𑁄. 𑀦 𑀔𑁄 𑀧𑀦𑀸𑀳𑀁 𑀇𑀫𑀸𑀬 𑀓𑀝𑀼𑀓𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀅𑀥𑀺𑀕𑀘𑁆𑀙𑀸𑀫𑀺 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁. 𑀲𑀺𑀬𑀸 𑀦𑀼 𑀔𑁄 𑀅𑀜𑁆𑀜𑁄 𑀫𑀕𑁆𑀕𑁄 𑀩𑁄𑀥𑀸𑀬𑀸’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁 𑀧𑀺𑀢𑀼 𑀲𑀓𑁆𑀓𑀲𑁆𑀲 𑀓𑀫𑁆𑀫𑀦𑁆𑀢𑁂 𑀲𑀻𑀢𑀸𑀬 𑀚𑀫𑁆𑀩𑀼𑀘𑁆𑀙𑀸𑀬𑀸𑀬 𑀦𑀺𑀲𑀺𑀦𑁆𑀦𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀸. 𑀲𑀺𑀬𑀸 𑀦𑀼 𑀔𑁄 𑀏𑀲𑁄 𑀫𑀕𑁆𑀕𑁄 𑀩𑁄𑀥𑀸𑀬𑀸’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀢𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀅𑀳𑁄𑀲𑀺 𑁋 ‘𑀏𑀲𑁂𑀯 𑀫𑀕𑁆𑀕𑁄 𑀩𑁄𑀥𑀸𑀬𑀸’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀓𑀺𑀁 𑀦𑀼 𑀔𑁄 𑀅𑀳𑀁 𑀢𑀲𑁆𑀲 𑀲𑀼𑀔𑀲𑁆𑀲 𑀪𑀸𑀬𑀸𑀫𑀺, 𑀬𑀁 𑀢𑀁 𑀲𑀼𑀔𑀁 𑀅𑀜𑁆𑀜𑀢𑁆𑀭𑁂𑀯 𑀓𑀸𑀫𑁂𑀳𑀺 𑀅𑀜𑁆𑀜𑀢𑁆𑀭 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀦 𑀔𑁄 𑀅𑀳𑀁 𑀢𑀲𑁆𑀲 𑀲𑀼𑀔𑀲𑁆𑀲 𑀪𑀸𑀬𑀸𑀫𑀺, 𑀬𑀁 𑀢𑀁 𑀲𑀼𑀔𑀁 𑀅𑀜𑁆𑀜𑀢𑁆𑀭𑁂𑀯 𑀓𑀸𑀫𑁂𑀳𑀺 𑀅𑀜𑁆𑀜𑀢𑁆𑀭 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺.

𑁩𑁮𑁨. ‘‘𑀢𑀲𑁆𑀲 𑀫𑀬𑁆𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀢𑀤𑀳𑁄𑀲𑀺 𑁋 ‘𑀦 𑀔𑁄 𑀢𑀁 𑀲𑀼𑀓𑀭𑀁 𑀲𑀼𑀔𑀁 𑀅𑀥𑀺𑀕𑀦𑁆𑀢𑀼𑀁 𑀏𑀯𑀁 𑀅𑀥𑀺𑀫𑀢𑁆𑀢𑀓𑀲𑀺𑀫𑀸𑀦𑀁 𑀧𑀢𑁆𑀢𑀓𑀸𑀬𑁂𑀦, 𑀬𑀁𑀦𑀽𑀦𑀸𑀳𑀁 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬𑀁 𑀑𑀤𑀦𑀓𑀼𑀫𑁆𑀫𑀸𑀲’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀲𑀺𑀁 𑀑𑀤𑀦𑀓𑀼𑀫𑁆𑀫𑀸𑀲𑀁. 𑀢𑁂𑀦 𑀔𑁄 𑀧𑀦 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀫𑀬𑁂𑀦 𑀧𑀜𑁆𑀘 [𑀧𑀜𑁆𑀘𑀯𑀕𑁆𑀕𑀺𑀬𑀸 (𑀅𑀜𑁆𑀜𑀲𑀼𑀢𑁆𑀢𑁂𑀲𑀼)] 𑀪𑀺𑀓𑁆𑀔𑀽 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀦𑁆𑀢𑀺 𑁋 ‘𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀥𑀫𑁆𑀫𑀁 𑀅𑀥𑀺𑀕𑀫𑀺𑀲𑁆𑀲𑀢𑀺, 𑀢𑀁 𑀦𑁄 𑀆𑀭𑁄𑀘𑁂𑀲𑁆𑀲𑀢𑀻’𑀢𑀺. 𑀬𑀢𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀲𑀺𑀁 𑀑𑀤𑀦𑀓𑀼𑀫𑁆𑀫𑀸𑀲𑀁, 𑀅𑀣 𑀫𑁂 𑀢𑁂 𑀧𑀜𑁆𑀘 𑀪𑀺𑀓𑁆𑀔𑀽 𑀦𑀺𑀩𑁆𑀩𑀺𑀚𑁆𑀚 𑀧𑀓𑁆𑀓𑀫𑀺𑀁𑀲𑀼 𑁋 ‘𑀩𑀸𑀳𑀼𑀮𑁆𑀮𑀺𑀓𑁄 [𑀩𑀸𑀳𑀼𑀮𑀺𑀓𑁄 (𑀲𑀻. 𑀧𑀻.) 𑀲𑀁𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀝𑀻𑀓𑀸𑀬 𑀲𑀫𑁂𑀢𑀺] 𑀲𑀫𑀡𑁄 𑀕𑁄𑀢𑀫𑁄, 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄, 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬𑀸’𑀢𑀺.

𑁩𑁮𑁩. ‘‘𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑁆𑀯𑀸, 𑀩𑀮𑀁 𑀕𑀳𑁂𑀢𑁆𑀯𑀸, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺𑀁, 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄. 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺𑀁 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

𑁩𑁮𑁪. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀅𑀬𑀁 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀢𑁆𑀢𑀺𑀬𑀸 𑀧𑀞𑀫𑁂 𑀬𑀸𑀫𑁂 𑀧𑀞𑀫𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄; 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

𑁩𑁮𑁫. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺…𑀧𑁂… 𑀅𑀬𑀁 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀤𑀼𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄; 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

𑁩𑁮𑁬. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀢𑀲𑁆𑀲 𑀫𑁂 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀅𑀳𑁄𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀅𑀬𑀁 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀢𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄; 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀏𑀯𑀭𑀽𑀧𑀸𑀧𑀺 𑀔𑁄 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

𑁩𑁮𑁭. ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀦𑁂𑀓𑀲𑀢𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀸. 𑀅𑀧𑀺𑀲𑁆𑀲𑀼 𑀫𑀁 𑀏𑀓𑀫𑁂𑀓𑁄 𑀏𑀯𑀁 𑀫𑀜𑁆𑀜𑀢𑀺 𑁋 ‘𑀫𑀫𑁂𑀯𑀸𑀭𑀩𑁆𑀪 𑀲𑀫𑀡𑁄 𑀕𑁄𑀢𑀫𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻’𑀢𑀺. ‘𑀦 𑀔𑁄 𑀧𑀦𑁂𑀢𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀯𑀁 𑀤𑀝𑁆𑀞𑀩𑁆𑀩𑀁; 𑀬𑀸𑀯𑀤𑁂𑀯 𑀯𑀺𑀜𑁆𑀜𑀸𑀧𑀦𑀢𑁆𑀣𑀸𑀬 𑀢𑀣𑀸𑀕𑀢𑁄 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀲𑁆𑀲𑀸𑀬𑁂𑀯 𑀓𑀣𑀸𑀬 𑀧𑀭𑀺𑀬𑁄𑀲𑀸𑀦𑁂, 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀦𑁆𑀦𑀺𑀲𑀸𑀤𑁂𑀫𑀺 𑀏𑀓𑁄𑀤𑀺𑀁 𑀓𑀭𑁄𑀫𑀺 𑀲𑀫𑀸𑀤𑀳𑀸𑀫𑀺, 𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’’𑀢𑀺.