𑁮. 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀁

𑁩𑁯𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀢𑀺𑀲𑁆𑀲 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀓𑁂𑀯𑀝𑁆𑀝𑀧𑀼𑀢𑁆𑀢𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺 𑀅𑀦𑀜𑁆𑀜’’𑀦𑁆𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑁋 ‘‘𑀲𑀸𑀢𑀺𑀲𑁆𑀲 𑀓𑀺𑀭 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀓𑁂𑀯𑀝𑁆𑀝𑀧𑀼𑀢𑁆𑀢𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁂, 𑀆𑀯𑀼𑀲𑁄 𑀲𑀸𑀢𑀺, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’’’𑀦𑁆𑀢𑀺? ‘‘𑀏𑀯𑀁 𑀩𑁆𑀬𑀸 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀓𑀸𑀫𑀸 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀺 𑀲𑀫𑀦𑀼𑀕𑀸𑀳𑀦𑁆𑀢𑀺 𑀲𑀫𑀦𑀼𑀪𑀸𑀲𑀦𑁆𑀢𑀺 𑁋 ‘‘𑀫𑀸 𑀏𑀯𑀁, 𑀆𑀯𑀼𑀲𑁄 𑀲𑀸𑀢𑀺, 𑀅𑀯𑀘, 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺, 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁, 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀯𑀼𑀲𑁄 𑀲𑀸𑀢𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀅𑀜𑁆𑀜𑀢𑁆𑀭 𑀧𑀘𑁆𑀘𑀬𑀸 𑀦𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄’’𑀢𑀺. 𑀏𑀯𑀫𑁆𑀧𑀺 𑀔𑁄 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀢𑀤𑁂𑀯 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺 𑁋 ‘‘𑀏𑀯𑀁 𑀩𑁆𑀬𑀸 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺 𑀅𑀦𑀜𑁆𑀜’’𑀦𑁆𑀢𑀺.

𑁩𑁯𑁭. 𑀬𑀢𑁄 𑀔𑁄 𑀢𑁂 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀁, 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀸𑀢𑀺𑀲𑁆𑀲 𑀦𑀸𑀫, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀓𑁂𑀯𑀝𑁆𑀝𑀧𑀼𑀢𑁆𑀢𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’𑀦𑁆𑀢𑀺. 𑀅𑀲𑁆𑀲𑀼𑀫𑁆𑀳 𑀔𑁄 𑀫𑀬𑀁, 𑀪𑀦𑁆𑀢𑁂, 𑀲𑀸𑀢𑀺𑀲𑁆𑀲 𑀓𑀺𑀭 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀓𑁂𑀯𑀝𑁆𑀝𑀧𑀼𑀢𑁆𑀢𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’𑀦𑁆𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀬𑁂𑀦 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀫𑁆𑀳; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀫𑁆𑀳 𑁋 ‘𑀲𑀘𑁆𑀘𑀁 𑀓𑀺𑀭 𑀢𑁂, 𑀆𑀯𑀼𑀲𑁄 𑀲𑀸𑀢𑀺, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀅𑀫𑁆𑀳𑁂 𑀏𑀢𑀤𑀯𑁄𑀘 𑁋 ‘𑀏𑀯𑀁 𑀩𑁆𑀬𑀸 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’𑀦𑁆𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀓𑀸𑀫𑀸 𑀲𑀫𑀦𑀼𑀬𑀼𑀜𑁆𑀚𑀺𑀫𑁆𑀳 𑀲𑀫𑀦𑀼𑀕𑀸𑀳𑀺𑀫𑁆𑀳 𑀲𑀫𑀦𑀼𑀪𑀸𑀲𑀺𑀫𑁆𑀳 𑁋 ‘𑀫𑀸 𑀏𑀯𑀁, 𑀆𑀯𑀼𑀲𑁄 𑀲𑀸𑀢𑀺, 𑀅𑀯𑀘, 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺, 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁, 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀯𑀼𑀲𑁄 𑀲𑀸𑀢𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀅𑀜𑁆𑀜𑀢𑁆𑀭 𑀧𑀘𑁆𑀘𑀬𑀸 𑀦𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄’𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀅𑀫𑁆𑀳𑁂𑀳𑀺 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀢𑀤𑁂𑀯 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀣𑀸𑀫𑀲𑀸 𑀧𑀭𑀸𑀫𑀲𑀸 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺 𑁋 ‘𑀏𑀯𑀁 𑀩𑁆𑀬𑀸 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’𑀦𑁆𑀢𑀺. 𑀬𑀢𑁄 𑀔𑁄 𑀫𑀬𑀁, 𑀪𑀦𑁆𑀢𑁂, 𑀦𑀸𑀲𑀓𑁆𑀔𑀺𑀫𑁆𑀳 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀁, 𑀅𑀣 𑀫𑀬𑀁 𑀏𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀫𑀸’’𑀢𑀺.

𑁩𑁯𑁮. 𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀳𑀺 𑁋 ‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀲𑀸𑀢𑀺, 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀲𑀸𑀢𑀺, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭, 𑀢𑁂, 𑀲𑀸𑀢𑀺, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’’’𑀦𑁆𑀢𑀺? ‘‘𑀏𑀯𑀁 𑀩𑁆𑀬𑀸 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’’𑀦𑁆𑀢𑀺. ‘‘𑀓𑀢𑀫𑀁 𑀢𑀁, 𑀲𑀸𑀢𑀺, 𑀯𑀺𑀜𑁆𑀜𑀸𑀡’’𑀦𑁆𑀢𑀺? ‘‘𑀬𑁆𑀯𑀸𑀬𑀁, 𑀪𑀦𑁆𑀢𑁂, 𑀯𑀤𑁄 𑀯𑁂𑀤𑁂𑀬𑁆𑀬𑁄 𑀢𑀢𑁆𑀭 𑀢𑀢𑁆𑀭 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺. ‘‘𑀓𑀲𑁆𑀲 𑀦𑀼 𑀔𑁄 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀬𑀸 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀲𑀺? 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀯𑀼𑀢𑁆𑀢𑀁, 𑀅𑀜𑁆𑀜𑀢𑁆𑀭 𑀧𑀘𑁆𑀘𑀬𑀸 𑀦𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄𑀢𑀺? 𑀅𑀣 𑀘 𑀧𑀦 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀲𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀡𑀲𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀲𑀺. 𑀢𑀜𑁆𑀳𑀺 𑀢𑁂, 𑀫𑁄𑀖𑀧𑀼𑀭𑀺𑀲, 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

𑁩𑁯𑁯. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀸𑀬𑀁 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀉𑀲𑁆𑀫𑀻𑀓𑀢𑁄𑀧𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂’’𑀢𑀺? ‘‘𑀓𑀺𑀜𑁆𑀳𑀺 𑀲𑀺𑀬𑀸 𑀪𑀦𑁆𑀢𑁂? 𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀻𑀤𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀢𑀼𑀡𑁆𑀳𑀻𑀪𑀽𑀢𑀁 𑀫𑀗𑁆𑀓𑀼𑀪𑀽𑀢𑀁 𑀧𑀢𑁆𑀢𑀓𑁆𑀔𑀦𑁆𑀥𑀁 𑀅𑀥𑁄𑀫𑀼𑀔𑀁 𑀧𑀚𑁆𑀛𑀸𑀬𑀦𑁆𑀢𑀁 𑀅𑀧𑁆𑀧𑀝𑀺𑀪𑀸𑀦𑀁 𑀯𑀺𑀤𑀺𑀢𑁆𑀯𑀸 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀜𑀸𑀬𑀺𑀲𑁆𑀲𑀲𑀺 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀏𑀢𑁂𑀦 𑀲𑀓𑁂𑀦 𑀧𑀸𑀧𑀓𑁂𑀦 𑀤𑀺𑀝𑁆𑀞𑀺𑀕𑀢𑁂𑀦. 𑀇𑀥𑀸𑀳𑀁 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀼𑀫𑁆𑀳𑁂𑀧𑀺 𑀫𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣 𑀬𑀣𑀸𑀬𑀁 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀡𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂! 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀳𑀺 𑀦𑁄, 𑀪𑀦𑁆𑀢𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀅𑀜𑁆𑀜𑀢𑁆𑀭 𑀧𑀘𑁆𑀘𑀬𑀸 𑀦𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀲𑀸𑀥𑀼 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀯𑀼𑀢𑁆𑀢𑀁 𑀫𑀬𑀸, 𑀅𑀜𑁆𑀜𑀢𑁆𑀭 𑀧𑀘𑁆𑀘𑀬𑀸 𑀦𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄𑀢𑀺. 𑀅𑀣 𑀘 𑀧𑀦𑀸𑀬𑀁 𑀲𑀸𑀢𑀺 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀡𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺 𑀧𑀲𑀯𑀢𑀺. 𑀢𑀜𑁆𑀳𑀺 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬.

𑁪𑁦𑁦. ‘‘𑀬𑀁 𑀬𑀤𑁂𑀯, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀢𑁂𑀦 𑀢𑁂𑀦𑁂𑀯 𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺 [𑀲𑀗𑁆𑀔𑀁 𑀕𑀘𑁆𑀙𑀢𑀺 (𑀲𑀻. 𑀧𑀻.)]. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀖𑀸𑀦𑀜𑁆𑀘 𑀧𑀝𑀺𑀘𑁆𑀘 𑀕𑀦𑁆𑀥𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀚𑀺𑀯𑁆𑀳𑀜𑁆𑀘 𑀧𑀝𑀺𑀘𑁆𑀘 𑀭𑀲𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀓𑀸𑀬𑀜𑁆𑀘 𑀧𑀝𑀺𑀘𑁆𑀘 𑀨𑁄𑀝𑁆𑀞𑀩𑁆𑀩𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀓𑀸𑀬𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀫𑀦𑁄𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀁 𑀬𑀤𑁂𑀯 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺 𑀢𑁂𑀦 𑀢𑁂𑀦𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀓𑀝𑁆𑀞𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺, 𑀓𑀝𑁆𑀞𑀕𑁆𑀕𑀺𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀲𑀓𑀮𑀺𑀓𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺, 𑀲𑀓𑀮𑀺𑀓𑀕𑁆𑀕𑀺𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀢𑀺𑀡𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺, 𑀢𑀺𑀡𑀕𑁆𑀕𑀺𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀕𑁄𑀫𑀬𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺, 𑀕𑁄𑀫𑀬𑀕𑁆𑀕𑀺𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀣𑀼𑀲𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺, 𑀣𑀼𑀲𑀕𑁆𑀕𑀺𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀲𑀗𑁆𑀓𑀸𑀭𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺, 𑀲𑀗𑁆𑀓𑀸𑀭𑀕𑁆𑀕𑀺𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀬𑀤𑁂𑀯 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀢𑁂𑀦 𑀢𑁂𑀦𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀖𑀸𑀦𑀜𑁆𑀘 𑀧𑀝𑀺𑀘𑁆𑀘 𑀕𑀦𑁆𑀥𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀖𑀸𑀡𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀚𑀺𑀯𑁆𑀳𑀜𑁆𑀘 𑀧𑀝𑀺𑀘𑁆𑀘 𑀭𑀲𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀓𑀸𑀬𑀜𑁆𑀘 𑀧𑀝𑀺𑀘𑁆𑀘 𑀨𑁄𑀝𑁆𑀞𑀩𑁆𑀩𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀓𑀸𑀬𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁, 𑀫𑀦𑁄𑀯𑀺𑀜𑁆𑀜𑀸𑀡𑀁𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺.

𑁪𑁦𑁧. ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀣𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀣𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁, 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀣𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀪𑀽𑀢𑀫𑀺𑀤𑀁 𑀦𑁄𑀲𑁆𑀲𑀽𑀢𑀺, 𑀪𑀺𑀓𑁆𑀔𑀯𑁂, 𑀓𑀗𑁆𑀔𑀢𑁄 𑀉𑀧𑁆𑀧𑀚𑁆𑀚𑀢𑀺 𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀲𑀫𑁆𑀪𑀯𑀁 𑀦𑁄𑀲𑁆𑀲𑀽𑀢𑀺, 𑀪𑀺𑀓𑁆𑀔𑀯𑁂, 𑀓𑀗𑁆𑀔𑀢𑁄 𑀉𑀧𑁆𑀧𑀚𑁆𑀚𑀢𑀺 𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁, 𑀢𑀁 𑀦𑀺𑀭𑁄𑀥𑀥𑀫𑁆𑀫𑀁 𑀦𑁄𑀲𑁆𑀲𑀽𑀢𑀺, 𑀪𑀺𑀓𑁆𑀔𑀯𑁂, 𑀓𑀗𑁆𑀔𑀢𑁄 𑀉𑀧𑁆𑀧𑀚𑁆𑀚𑀢𑀺 𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀯𑀺𑀘𑀺𑀓𑀺𑀘𑁆𑀙𑀸 𑀲𑀸 𑀧𑀳𑀻𑀬𑀢𑀻’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀯𑀺𑀘𑀺𑀓𑀺𑀘𑁆𑀙𑀸 𑀲𑀸 𑀧𑀳𑀻𑀬𑀢𑀻’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁, 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀯𑀺𑀘𑀺𑀓𑀺𑀘𑁆𑀙𑀸 𑀲𑀸 𑀧𑀳𑀻𑀬𑀢𑀻’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀇𑀢𑀺𑀧𑀺 𑀯𑁄 𑀏𑀢𑁆𑀣 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀇𑀢𑀺𑀧𑀺 𑀯𑁄 𑀏𑀢𑁆𑀣 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀇𑀢𑀺𑀧𑀺 𑀯𑁄 𑀏𑀢𑁆𑀣 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞’’𑀦𑁆𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞’’𑀦𑁆𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞’’𑀦𑁆𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀇𑀫𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀁 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀏𑀯𑀁 𑀧𑀭𑀺𑀬𑁄𑀤𑀸𑀢𑀁 𑀅𑀮𑁆𑀮𑀻𑀬𑁂𑀣 𑀓𑁂𑀮𑀸𑀬𑁂𑀣 𑀥𑀦𑀸𑀬𑁂𑀣 𑀫𑀫𑀸𑀬𑁂𑀣, 𑀅𑀧𑀺 𑀦𑀼 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀓𑀼𑀮𑁆𑀮𑀽𑀧𑀫𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑁂𑀬𑁆𑀬𑀸𑀣 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀦𑁄 𑀕𑀳𑀡𑀢𑁆𑀣𑀸𑀬𑀸’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀇𑀫𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀁 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀏𑀯𑀁 𑀧𑀭𑀺𑀬𑁄𑀤𑀸𑀢𑀁 𑀦 𑀅𑀮𑁆𑀮𑀻𑀬𑁂𑀣 𑀦 𑀓𑁂𑀮𑀸𑀬𑁂𑀣 𑀦 𑀥𑀦𑀸𑀬𑁂𑀣 𑀦 𑀫𑀫𑀸𑀬𑁂𑀣, 𑀅𑀧𑀺 𑀦𑀼 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀓𑀼𑀮𑁆𑀮𑀽𑀧𑀫𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑁂𑀬𑁆𑀬𑀸𑀣 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀦𑁄 𑀕𑀳𑀡𑀢𑁆𑀣𑀸𑀬𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

𑁪𑁦𑁨. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸, 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸, 𑀨𑀲𑁆𑀲𑁄 𑀤𑀼𑀢𑀺𑀬𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀢𑀺𑀬𑀸, 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣𑀁.

‘‘𑀇𑀫𑁂 𑀘, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸?

‘‘𑀇𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑀡𑁆𑀳𑀸𑀦𑀺𑀤𑀸𑀦𑀸 𑀢𑀡𑁆𑀳𑀸𑀲𑀫𑀼𑀤𑀬𑀸 𑀢𑀡𑁆𑀳𑀸𑀚𑀸𑀢𑀺𑀓𑀸 𑀢𑀡𑁆𑀳𑀸𑀧𑀪𑀯𑀸.

‘‘𑀢𑀡𑁆𑀳𑀸 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸?

‘‘𑀢𑀡𑁆𑀳𑀸 𑀯𑁂𑀤𑀦𑀸𑀦𑀺𑀤𑀸𑀦𑀸 𑀯𑁂𑀤𑀦𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀚𑀸𑀢𑀺𑀓𑀸 𑀯𑁂𑀤𑀦𑀸𑀧𑀪𑀯𑀸.

‘‘𑀯𑁂𑀤𑀦𑀸 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸?

‘‘𑀯𑁂𑀤𑀦𑀸 𑀨𑀲𑁆𑀲𑀦𑀺𑀤𑀸𑀦𑀸 𑀨𑀲𑁆𑀲𑀲𑀫𑀼𑀤𑀬𑀸 𑀨𑀲𑁆𑀲𑀚𑀸𑀢𑀺𑀓𑀸 𑀨𑀲𑁆𑀲𑀧𑀪𑀯𑀸.

‘‘𑀨𑀲𑁆𑀲𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄?

‘‘𑀨𑀲𑁆𑀲𑁄 𑀲𑀴𑀸𑀬𑀢𑀦𑀦𑀺𑀤𑀸𑀦𑁄 𑀲𑀴𑀸𑀬𑀢𑀦𑀲𑀫𑀼𑀤𑀬𑁄 𑀲𑀴𑀸𑀬𑀢𑀦𑀚𑀸𑀢𑀺𑀓𑁄 𑀲𑀴𑀸𑀬𑀢𑀦𑀧𑀪𑀯𑁄.

‘‘𑀲𑀴𑀸𑀬𑀢𑀦𑀁 𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁?

‘‘𑀲𑀴𑀸𑀬𑀢𑀦𑀁 𑀦𑀸𑀫𑀭𑀽𑀧𑀦𑀺𑀤𑀸𑀦𑀁 𑀦𑀸𑀫𑀭𑀽𑀧𑀲𑀫𑀼𑀤𑀬𑀁 𑀦𑀸𑀫𑀭𑀽𑀧𑀚𑀸𑀢𑀺𑀓𑀁 𑀦𑀸𑀫𑀭𑀽𑀧𑀧𑀪𑀯𑀁.

‘‘𑀦𑀸𑀫𑀭𑀽𑀧𑀁 𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁?

‘‘𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀦𑀺𑀤𑀸𑀦𑀁 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀯𑀺𑀜𑁆𑀜𑀸𑀡𑀚𑀸𑀢𑀺𑀓𑀁 𑀯𑀺𑀜𑁆𑀜𑀸𑀡𑀧𑀪𑀯𑀁.

‘‘𑀯𑀺𑀜𑁆𑀜𑀸𑀡𑀁 𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁?

‘‘𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀸𑀭𑀦𑀺𑀤𑀸𑀦𑀁 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀲𑀗𑁆𑀔𑀸𑀭𑀚𑀸𑀢𑀺𑀓𑀁 𑀲𑀗𑁆𑀔𑀸𑀭𑀧𑀪𑀯𑀁.

‘‘𑀲𑀗𑁆𑀔𑀸𑀭𑀸 𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸?

‘‘𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀦𑀺𑀤𑀸𑀦𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀚𑀸𑀢𑀺𑀓𑀸 𑀅𑀯𑀺𑀚𑁆𑀚𑀸𑀧𑀪𑀯𑀸.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.’’’

𑁪𑁦𑁩. ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀚𑀸𑀢𑀺𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 [𑀓𑀣𑀁 𑀯𑀸 𑀯𑁄 𑀏𑀢𑁆𑀣 (?)] 𑀳𑁄𑀢𑀻’’𑀢𑀺? ‘‘𑀚𑀸𑀢𑀺𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀚𑀭𑀸𑀫𑀭𑀡𑀁; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 [𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻𑀢𑀺 (𑀓.)] 𑁋 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺. ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀪𑀯𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀢𑀺, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀪𑀯𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀚𑀸𑀢𑀺; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺. ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀪𑀯𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀪𑀯𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺. ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀁, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀢𑀡𑁆𑀳𑀸𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀉𑀧𑀸𑀤𑀸𑀦𑀁; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺. ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀯𑁂𑀤𑀦𑀸𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀯𑁂𑀤𑀦𑀸𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀢𑀡𑁆𑀳𑀸; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺. ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀨𑀲𑁆𑀲𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀨𑀲𑁆𑀲𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀯𑁂𑀤𑀦𑀸; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺. ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀨𑀲𑁆𑀲𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺. ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀲𑀴𑀸𑀬𑀢𑀦𑀁, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀲𑀴𑀸𑀬𑀢𑀦𑀁; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺. ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀦𑀸𑀫𑀭𑀽𑀧𑀁, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀦𑀸𑀫𑀭𑀽𑀧𑀁; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺. ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀁; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺.

𑁪𑁦𑁪. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀧𑀺 𑀏𑀯𑀁 𑀯𑀤𑁂𑀣, 𑀅𑀳𑀫𑁆𑀧𑀺 𑀏𑀯𑀁 𑀯𑀤𑀸𑀫𑀺 𑁋 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺, 𑀬𑀤𑀺𑀤𑀁 𑁋 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺.

𑁪𑁦𑁫. ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀚𑀸𑀢𑀺𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀚𑀸𑀢𑀺𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀚𑀭𑀸𑀫𑀭𑀡𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺. ‘‘𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀪𑀯𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀢𑀺𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀪𑀯𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀚𑀸𑀢𑀺𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’’𑀢𑀺. ‘‘𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀪𑀯𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀉𑀧𑀸𑀤𑀸𑀦𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀪𑀯𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’’𑀢𑀺. ‘‘𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀢𑀡𑁆𑀳𑀸𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀢𑀡𑁆𑀳𑀸𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀉𑀧𑀸𑀤𑀸𑀦𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’’𑀢𑀺. ‘‘𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀯𑁂𑀤𑀦𑀸𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀯𑁂𑀤𑀦𑀸𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀢𑀡𑁆𑀳𑀸𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄’’𑀢𑀺. ‘‘𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀨𑀲𑁆𑀲𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀨𑀲𑁆𑀲𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀯𑁂𑀤𑀦𑀸𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺. ‘‘𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻𑀢𑀺? 𑀲𑀴𑀸𑀬𑀢𑀦𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀨𑀲𑁆𑀲𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄’’𑀢𑀺. ‘‘𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀦𑀸𑀫𑀭𑀽𑀧𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀲𑀴𑀸𑀬𑀢𑀦𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄’’𑀢𑀺. ‘‘𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀦𑀸𑀫𑀭𑀽𑀧𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’’𑀢𑀺. ‘‘𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀲𑀗𑁆𑀔𑀸𑀭𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’’𑀢𑀺. ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸, 𑀪𑀦𑁆𑀢𑁂, 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺.

𑁪𑁦𑁬. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀧𑀺 𑀏𑀯𑀁 𑀯𑀤𑁂𑀣, 𑀅𑀳𑀫𑁆𑀧𑀺 𑀏𑀯𑀁 𑀯𑀤𑀸𑀫𑀺 𑁋 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀺, 𑀬𑀤𑀺𑀤𑀁 𑁋 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺.

𑁪𑁦𑁭. ‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀧𑀼𑀩𑁆𑀩𑀦𑁆𑀢𑀁 𑀯𑀸 𑀧𑀝𑀺𑀥𑀸𑀯𑁂𑀬𑁆𑀬𑀸𑀣 𑁋 ‘𑀅𑀳𑁂𑀲𑀼𑀫𑁆𑀳 𑀦𑀼 𑀔𑁄 𑀫𑀬𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀦𑀦𑀼 𑀔𑁄 𑀅𑀳𑁂𑀲𑀼𑀫𑁆𑀳 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀅𑀳𑁂𑀲𑀼𑀫𑁆𑀳 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀅𑀳𑁂𑀲𑀼𑀫𑁆𑀳 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁂𑀲𑀼𑀫𑁆𑀳 𑀦𑀼 𑀔𑁄 𑀫𑀬𑀁 𑀅𑀢𑀻𑀢𑀫𑀤𑁆𑀥𑀸𑀦’’’𑀦𑁆𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀅𑀧𑀭𑀦𑁆𑀢𑀁 𑀯𑀸 𑀧𑀝𑀺𑀥𑀸𑀯𑁂𑀬𑁆𑀬𑀸𑀣 𑁋 𑀪𑀯𑀺𑀲𑁆𑀲𑀸𑀫 𑀦𑀼 𑀔𑁄 𑀫𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫 𑀦𑀼 𑀔𑁄 𑀫𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀏𑀢𑀭𑀳𑀺 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀤𑁆𑀥𑀸𑀦𑀁 𑀅𑀚𑁆𑀛𑀢𑁆𑀢𑀁 𑀓𑀣𑀁𑀓𑀣𑀻 𑀅𑀲𑁆𑀲𑀣 𑁋 𑀅𑀳𑀁 𑀦𑀼 𑀔𑁄𑀲𑁆𑀫𑀺, 𑀦𑁄 𑀦𑀼 𑀔𑁄𑀲𑁆𑀫𑀺, 𑀓𑀺𑀁 𑀦𑀼 𑀔𑁄𑀲𑁆𑀫𑀺, 𑀓𑀣𑀁 𑀦𑀼 𑀔𑁄𑀲𑁆𑀫𑀺, 𑀅𑀬𑀁 𑀦𑀼 𑀔𑁄 𑀲𑀢𑁆𑀢𑁄 𑀓𑀼𑀢𑁄 𑀆𑀕𑀢𑁄, 𑀲𑁄 𑀓𑀼𑀳𑀺𑀁𑀕𑀸𑀫𑀻 𑀪𑀯𑀺𑀲𑁆𑀲𑀢𑀻’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀸𑀣 𑁋 𑀲𑀢𑁆𑀣𑀸 𑀦𑁄 𑀕𑀭𑀼, 𑀲𑀢𑁆𑀣𑀼𑀕𑀸𑀭𑀯𑁂𑀦 𑀘 𑀫𑀬𑀁 𑀏𑀯𑀁 𑀯𑀤𑁂𑀫𑀸’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀸𑀣 𑁋 𑀲𑀫𑀡𑁄 𑀏𑀯𑀫𑀸𑀳, 𑀲𑀫𑀡𑀸 𑀘 𑀦𑀸𑀫 𑀫𑀬𑀁 𑀏𑀯𑀁 𑀯𑀤𑁂𑀫𑀸’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀬𑀸𑀦𑀺 𑀢𑀸𑀦𑀺 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀢 𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀦𑀺 𑀢𑀸𑀦𑀺 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀦𑀦𑀼, 𑀪𑀺𑀓𑁆𑀔𑀯𑁂, 𑀬𑀤𑁂𑀯 𑀢𑀼𑀫𑁆𑀳𑀸𑀓𑀁 𑀲𑀸𑀫𑀁 𑀜𑀸𑀢𑀁 𑀲𑀸𑀫𑀁 𑀤𑀺𑀝𑁆𑀞𑀁 𑀲𑀸𑀫𑀁 𑀯𑀺𑀤𑀺𑀢𑀁, 𑀢𑀤𑁂𑀯 𑀢𑀼𑀫𑁆𑀳𑁂 𑀯𑀤𑁂𑀣𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀉𑀧𑀦𑀻𑀢𑀸 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀇𑀫𑀺𑀦𑀸 𑀲𑀦𑁆𑀤𑀺𑀝𑁆𑀞𑀺𑀓𑁂𑀦 𑀥𑀫𑁆𑀫𑁂𑀦 𑀅𑀓𑀸𑀮𑀺𑀓𑁂𑀦 𑀏𑀳𑀺𑀧𑀲𑁆𑀲𑀺𑀓𑁂𑀦 𑀑𑀧𑀦𑁂𑀬𑁆𑀬𑀺𑀓𑁂𑀦 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁂𑀦 𑀯𑀺𑀜𑁆𑀜𑀽𑀳𑀺. 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺 𑁋 𑀇𑀢𑀺 𑀬𑀦𑁆𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺.

𑁪𑁦𑁮. ‘‘𑀢𑀺𑀡𑁆𑀡𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀇𑀥 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀦 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀦𑁂𑀯 𑀢𑀸𑀯 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀇𑀥 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀦𑁂𑀯 𑀢𑀸𑀯 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺 𑁋 𑀏𑀯𑀁 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀸 𑀦𑀯 𑀯𑀸 𑀤𑀲 𑀯𑀸 𑀫𑀸𑀲𑁂 𑀕𑀩𑁆𑀪𑀁 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀢𑀺 𑀫𑀳𑀢𑀸 𑀲𑀁𑀲𑀬𑁂𑀦 𑀕𑀭𑀼𑀪𑀸𑀭𑀁 [𑀕𑀭𑀼𑀫𑁆𑀪𑀸𑀭𑀁 (𑀲𑀻. 𑀧𑀻.)]. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀸 𑀦𑀯𑀦𑁆𑀦𑀁 𑀯𑀸 𑀤𑀲𑀦𑁆𑀦𑀁 𑀯𑀸 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀯𑀺𑀚𑀸𑀬𑀢𑀺 𑀫𑀳𑀢𑀸 𑀲𑀁𑀲𑀬𑁂𑀦 𑀕𑀭𑀼𑀪𑀸𑀭𑀁. 𑀢𑀫𑁂𑀦𑀁 𑀚𑀸𑀢𑀁 𑀲𑀫𑀸𑀦𑀁 𑀲𑀓𑁂𑀦 𑀮𑁄𑀳𑀺𑀢𑁂𑀦 𑀧𑁄𑀲𑁂𑀢𑀺. 𑀮𑁄𑀳𑀺𑀢𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀬𑀤𑀺𑀤𑀁 𑀫𑀸𑀢𑀼𑀣𑀜𑁆𑀜𑀁. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀓𑀼𑀫𑀸𑀭𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀬𑀸𑀦𑀺 𑀢𑀸𑀦𑀺 𑀓𑀼𑀫𑀸𑀭𑀓𑀸𑀦𑀁 𑀓𑀻𑀴𑀸𑀧𑀦𑀓𑀸𑀦𑀺 𑀢𑁂𑀳𑀺 𑀓𑀻𑀴𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀯𑀗𑁆𑀓𑀓𑀁 𑀖𑀝𑀺𑀓𑀁 𑀫𑁄𑀓𑁆𑀔𑀘𑀺𑀓𑀁 𑀘𑀺𑀗𑁆𑀕𑀼𑀮𑀓𑀁 𑀧𑀢𑁆𑀢𑀸𑀴𑁆𑀳𑀓𑀁 𑀭𑀣𑀓𑀁 𑀥𑀦𑀼𑀓𑀁. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀓𑀼𑀫𑀸𑀭𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺 𑁋 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀭𑀽𑀧𑁂𑀳𑀺 𑀇𑀝𑁆𑀞𑁂𑀳𑀺 𑀓𑀦𑁆𑀢𑁂𑀳𑀺 𑀫𑀦𑀸𑀧𑁂𑀳𑀺 𑀧𑀺𑀬𑀭𑀽𑀧𑁂𑀳𑀺 𑀓𑀸𑀫𑀽𑀧𑀲𑀁𑀳𑀺𑀢𑁂𑀳𑀺 𑀭𑀚𑀦𑀻𑀬𑁂𑀳𑀺, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀲𑀤𑁆𑀤𑁂𑀳𑀺… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀕𑀦𑁆𑀥𑁂𑀳𑀺… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀭𑀲𑁂𑀳𑀺… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀺 𑀇𑀝𑁆𑀞𑁂𑀳𑀺 𑀓𑀦𑁆𑀢𑁂𑀳𑀺 𑀫𑀦𑀸𑀧𑁂𑀳𑀺 𑀧𑀺𑀬𑀭𑀽𑀧𑁂𑀳𑀺 𑀓𑀸𑀫𑀽𑀧𑀲𑀁𑀳𑀺𑀢𑁂𑀳𑀺 𑀭𑀚𑀦𑀻𑀬𑁂𑀳𑀺.

𑁪𑁦𑁯. ‘‘𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀲𑀸𑀭𑀚𑁆𑀚𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑁋 𑀬𑀢𑁆𑀣𑀲𑁆𑀲 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑁄 𑀏𑀯𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑁄 𑀅𑀪𑀺𑀯𑀤𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻. 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻 𑀢𑀤𑀼𑀧𑀸𑀤𑀸𑀦𑀁, 𑀢𑀲𑁆𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀲𑀸𑀭𑀚𑁆𑀚𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑁋 𑀬𑀢𑁆𑀣𑀲𑁆𑀲 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑁄 𑀏𑀯𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑁄 𑀅𑀪𑀺𑀯𑀤𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻. 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻 𑀢𑀤𑀼𑀧𑀸𑀤𑀸𑀦𑀁, 𑀢𑀲𑁆𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

𑁪𑁧𑁦. ‘‘𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁; 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄. 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑀸𑀧𑀣𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸. 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸, 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’’’𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬, 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬, 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬, 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸, 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺.

𑁪𑁧𑁧. ‘‘𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀤𑀺𑀦𑁆𑀦𑀸𑀤𑀸𑀬𑀻 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻 𑀅𑀣𑁂𑀦𑁂𑀦 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺.

‘‘𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬 𑀩𑁆𑀭𑀳𑁆𑀫𑀘𑀸𑀭𑀻 𑀳𑁄𑀢𑀺, 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸.

‘‘𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲.

‘‘𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀇𑀢𑁄 𑀲𑀼𑀢𑁆𑀯𑀸 𑀦 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀦 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻, 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻, 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀓𑀸𑀮𑁂𑀦, 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁.

‘‘𑀲𑁄 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀏𑀓𑀪𑀢𑁆𑀢𑀺𑀓𑁄 𑀳𑁄𑀢𑀺 𑀭𑀢𑁆𑀢𑀽𑀧𑀭𑀢𑁄, 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀥𑀸𑀭𑀡𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀚𑁂𑀴𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀼𑀓𑁆𑀓𑀼𑀝𑀲𑀽𑀓𑀭𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀬𑀯𑀺𑀓𑁆𑀓𑀬𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀢𑀼𑀮𑀸𑀓𑀽𑀝𑀓𑀁𑀲𑀓𑀽𑀝𑀫𑀸𑀦𑀓𑀽𑀝𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀉𑀓𑁆𑀓𑁄𑀝𑀦𑀯𑀜𑁆𑀘𑀦-𑀦𑀺𑀓𑀢𑀺-𑀲𑀸𑀘𑀺𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀙𑁂𑀤𑀦-𑀯𑀥𑀩𑀦𑁆𑀥𑀦𑀯𑀺𑀧𑀭𑀸𑀫𑁄𑀲-𑀆𑀮𑁄𑀧-𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 [𑀧𑀲𑁆𑀲 𑀫. 𑀦𑀺. 𑁧.𑁨𑁯𑁩 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑁂].

‘‘𑀲𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀓𑁆𑀔𑀻 𑀲𑀓𑀼𑀡𑁄 𑀬𑁂𑀦 𑀬𑁂𑀦𑁂𑀯 𑀟𑁂𑀢𑀺 𑀲𑀧𑀢𑁆𑀢𑀪𑀸𑀭𑁄𑀯 𑀟𑁂𑀢𑀺, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦, 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀦𑀯𑀚𑁆𑀚𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

‘‘𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀩𑁆𑀬𑀸𑀲𑁂𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

‘‘𑀲𑁄 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺.

𑁪𑁧𑁨. ‘‘𑀲𑁄 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄, (𑀇𑀫𑀸𑀬 𑀘 𑀅𑀭𑀺𑀬𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄) [𑀧𑀲𑁆𑀲 𑀫. 𑀦𑀺. 𑁧.𑁨𑁯𑁬 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑁂], 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑁋 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸, 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬, 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻, 𑀩𑁆𑀬𑀸𑀧𑀸𑀤𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀣𑀻𑀦𑀫𑀺𑀤𑁆𑀥𑀁 𑀧𑀳𑀸𑀬 𑀯𑀺𑀕𑀢𑀣𑀻𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻, 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀻𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺.

𑁪𑁧𑁩. ‘‘𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

𑁪𑁧𑁪. ‘‘𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦 𑀲𑀸𑀭𑀚𑁆𑀚𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑁋 𑀬𑀢𑁆𑀣𑀲𑁆𑀲 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑁄 𑀏𑀯𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀳𑀻𑀦𑁄 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀁 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀢𑀁 𑀯𑁂𑀤𑀦𑀁 𑀅𑀦𑀪𑀺𑀦𑀦𑁆𑀤𑀢𑁄 𑀅𑀦𑀪𑀺𑀯𑀤𑀢𑁄 𑀅𑀦𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻 𑀲𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀦𑀦𑁆𑀤𑀻𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦 𑀲𑀸𑀭𑀚𑁆𑀚𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑁋 𑀬𑀢𑁆𑀣𑀲𑁆𑀲 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑁄 𑀏𑀯𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀳𑀻𑀦𑁄 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀁 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀢𑀁 𑀯𑁂𑀤𑀦𑀁 𑀅𑀦𑀪𑀺𑀦𑀦𑁆𑀤𑀢𑁄 𑀅𑀦𑀪𑀺𑀯𑀤𑀢𑁄 𑀅𑀦𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻 𑀲𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀦𑀦𑁆𑀤𑀻𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺. 𑀇𑀫𑀁 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀥𑀸𑀭𑁂𑀣, 𑀲𑀸𑀢𑀺𑀁 𑀧𑀦 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀫𑀳𑀸𑀢𑀡𑁆𑀳𑀸𑀚𑀸𑀮𑀢𑀡𑁆𑀳𑀸𑀲𑀗𑁆𑀖𑀸𑀝𑀧𑁆𑀧𑀝𑀺𑀫𑀼𑀓𑁆𑀓’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.