𑁧𑁦. 𑀘𑀽𑀴𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀁

𑁪𑁩𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀅𑀗𑁆𑀕𑁂𑀲𑀼 𑀯𑀺𑀳𑀭𑀢𑀺 𑀅𑀲𑁆𑀲𑀧𑀼𑀭𑀁 𑀦𑀸𑀫 𑀅𑀗𑁆𑀕𑀸𑀦𑀁 𑀦𑀺𑀕𑀫𑁄. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀫𑀡𑀸 𑀲𑀫𑀡𑀸𑀢𑀺 𑀯𑁄, 𑀪𑀺𑀓𑁆𑀔𑀯𑁂, 𑀚𑀦𑁄 𑀲𑀜𑁆𑀚𑀸𑀦𑀸𑀢𑀺. 𑀢𑀼𑀫𑁆𑀳𑁂 𑀘 𑀧𑀦 ‘𑀓𑁂 𑀢𑀼𑀫𑁆𑀳𑁂’𑀢𑀺 𑀧𑀼𑀝𑁆𑀞𑀸 𑀲𑀫𑀸𑀦𑀸 ‘𑀲𑀫𑀡𑀸𑀫𑁆𑀳𑀸’𑀢𑀺 𑀧𑀝𑀺𑀚𑀸𑀦𑀸𑀣. 𑀢𑁂𑀲𑀁 𑀯𑁄, 𑀪𑀺𑀓𑁆𑀔𑀯𑁂, 𑀏𑀯𑀁𑀲𑀫𑀜𑁆𑀜𑀸𑀦𑀁 𑀲𑀢𑀁 𑀏𑀯𑀁𑀧𑀝𑀺𑀜𑁆𑀜𑀸𑀦𑀁 𑀲𑀢𑀁 𑁋 ‘𑀬𑀸 𑀲𑀫𑀡𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀤𑀸 𑀢𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫; 𑀏𑀯𑀁 𑀦𑁄 𑀅𑀬𑀁 𑀅𑀫𑁆𑀳𑀸𑀓𑀁 𑀲𑀫𑀜𑁆𑀜𑀸 𑀘 𑀲𑀘𑁆𑀘𑀸 𑀪𑀯𑀺𑀲𑁆𑀲𑀢𑀺 𑀧𑀝𑀺𑀜𑁆𑀜𑀸 𑀘 𑀪𑀽𑀢𑀸; 𑀬𑁂𑀲𑀜𑁆𑀘 𑀫𑀬𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀸𑀫, 𑀢𑁂𑀲𑀁 𑀢𑁂 𑀓𑀸𑀭𑀸 𑀅𑀫𑁆𑀳𑁂𑀲𑀼 𑀫𑀳𑀧𑁆𑀨𑀮𑀸 𑀪𑀯𑀺𑀲𑁆𑀲𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸, 𑀅𑀫𑁆𑀳𑀸𑀓𑀜𑁆𑀘𑁂𑀯𑀸𑀬𑀁 𑀧𑀩𑁆𑀩𑀚𑁆𑀚𑀸 𑀅𑀯𑀜𑁆𑀛𑀸 𑀪𑀯𑀺𑀲𑁆𑀲𑀢𑀺 𑀲𑀨𑀮𑀸 𑀲𑀉𑀤𑁆𑀭𑀬𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑁪𑁩𑁬. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀲𑀫𑀡𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺? 𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀪𑀺𑀚𑁆𑀛𑀸𑀮𑀼𑀲𑁆𑀲 𑀅𑀪𑀺𑀚𑁆𑀛𑀸 𑀅𑀧𑁆𑀧𑀳𑀻𑀦𑀸 𑀳𑁄𑀢𑀺, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀤𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀓𑁄𑀥𑀦𑀲𑁆𑀲 𑀓𑁄𑀥𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀉𑀧𑀦𑀸𑀳𑀺𑀲𑁆𑀲 𑀉𑀧𑀦𑀸𑀳𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀫𑀓𑁆𑀔𑀺𑀲𑁆𑀲 𑀫𑀓𑁆𑀔𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀧𑀴𑀸𑀲𑀺𑀲𑁆𑀲 𑀧𑀴𑀸𑀲𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀇𑀲𑁆𑀲𑀼𑀓𑀺𑀲𑁆𑀲 𑀇𑀲𑁆𑀲𑀸 𑀅𑀧𑁆𑀧𑀳𑀻𑀦𑀸 𑀳𑁄𑀢𑀺, 𑀫𑀘𑁆𑀙𑀭𑀺𑀲𑁆𑀲 𑀫𑀘𑁆𑀙𑀭𑀺𑀬𑀁 𑀅𑀧𑁆𑀧𑀳𑀻𑀦𑀁 𑀳𑁄𑀢𑀺, 𑀲𑀞𑀲𑁆𑀲 𑀲𑀸𑀞𑁂𑀬𑁆𑀬𑀁 𑀅𑀧𑁆𑀧𑀳𑀻𑀦𑀁 𑀳𑁄𑀢𑀺, 𑀫𑀸𑀬𑀸𑀯𑀺𑀲𑁆𑀲 𑀫𑀸𑀬𑀸 𑀅𑀧𑁆𑀧𑀳𑀻𑀦𑀸 𑀳𑁄𑀢𑀺, 𑀧𑀸𑀧𑀺𑀘𑁆𑀙𑀲𑁆𑀲 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀧𑁆𑀧𑀳𑀻𑀦𑀸 𑀳𑁄𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀧𑁆𑀧𑀳𑀻𑀦𑀸 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀡𑀫𑀮𑀸𑀦𑀁 𑀲𑀫𑀡𑀤𑁄𑀲𑀸𑀦𑀁 𑀲𑀫𑀡𑀓𑀲𑀝𑀸𑀦𑀁 𑀆𑀧𑀸𑀬𑀺𑀓𑀸𑀦𑀁 𑀞𑀸𑀦𑀸𑀦𑀁 𑀤𑀼𑀕𑁆𑀕𑀢𑀺𑀯𑁂𑀤𑀦𑀺𑀬𑀸𑀦𑀁 𑀅𑀧𑁆𑀧𑀳𑀸𑀦𑀸 ‘𑀦 𑀲𑀫𑀡𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄’𑀢𑀺 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀢𑀚𑀁 𑀦𑀸𑀫 𑀆𑀯𑀼𑀥𑀚𑀸𑀢𑀁 𑀉𑀪𑀢𑁄𑀥𑀸𑀭𑀁 𑀧𑀻𑀢𑀦𑀺𑀲𑀺𑀢𑀁. 𑀢𑀤𑀲𑁆𑀲 𑀲𑀗𑁆𑀖𑀸𑀝𑀺𑀬𑀸 𑀲𑀫𑁆𑀧𑀸𑀭𑀼𑀢𑀁 𑀲𑀫𑁆𑀧𑀮𑀺𑀯𑁂𑀞𑀺𑀢𑀁. 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀚𑁆𑀚𑀁 𑀯𑀤𑀸𑀫𑀺.

𑁪𑁩𑁭. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸𑀝𑀺𑀓𑀲𑁆𑀲 𑀲𑀗𑁆𑀖𑀸𑀝𑀺𑀥𑀸𑀭𑀡𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀘𑁂𑀮𑀓𑀲𑁆𑀲 𑀅𑀘𑁂𑀮𑀓𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀭𑀚𑁄𑀚𑀮𑁆𑀮𑀺𑀓𑀲𑁆𑀲 𑀭𑀚𑁄𑀚𑀮𑁆𑀮𑀺𑀓𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀉𑀤𑀓𑁄𑀭𑁄𑀳𑀓𑀲𑁆𑀲 𑀉𑀤𑀓𑁄𑀭𑁄𑀳𑀡𑀫𑀢𑁆𑀢𑁂𑀦 [𑀉𑀤𑀓𑁄𑀭𑁄𑀳𑀓𑀫𑀢𑁆𑀢𑁂𑀦 (𑀲𑀻. 𑀧𑀻.)] 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀫𑀽𑀮𑀺𑀓𑀲𑁆𑀲 𑀭𑀼𑀓𑁆𑀔𑀫𑀽𑀮𑀺𑀓𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑁄𑀓𑀸𑀲𑀺𑀓𑀲𑁆𑀲 𑀅𑀩𑁆𑀪𑁄𑀓𑀸𑀲𑀺𑀓𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀉𑀩𑁆𑀪𑀝𑁆𑀞𑀓𑀲𑁆𑀲 𑀉𑀩𑁆𑀪𑀝𑁆𑀞𑀓𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑀪𑀢𑁆𑀢𑀺𑀓𑀲𑁆𑀲 𑀧𑀭𑀺𑀬𑀸𑀬𑀪𑀢𑁆𑀢𑀺𑀓𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑀦𑁆𑀢𑀚𑁆𑀛𑀸𑀬𑀓𑀲𑁆𑀲 𑀫𑀦𑁆𑀢𑀚𑁆𑀛𑀸𑀬𑀓𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀚𑀝𑀺𑀮𑀓𑀲𑁆𑀲 𑀚𑀝𑀸𑀥𑀸𑀭𑀡𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺.

‘‘𑀲𑀗𑁆𑀖𑀸𑀝𑀺𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸𑀝𑀺𑀥𑀸𑀭𑀡𑀫𑀢𑁆𑀢𑁂𑀦 𑀅𑀪𑀺𑀚𑁆𑀛𑀸𑀮𑀼𑀲𑁆𑀲 𑀅𑀪𑀺𑀚𑁆𑀛𑀸 𑀧𑀳𑀻𑀬𑁂𑀣, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑁂𑀣, 𑀓𑁄𑀥𑀦𑀲𑁆𑀲 𑀓𑁄𑀥𑁄 𑀧𑀳𑀻𑀬𑁂𑀣, 𑀉𑀧𑀦𑀸𑀳𑀺𑀲𑁆𑀲 𑀉𑀧𑀦𑀸𑀳𑁄 𑀧𑀳𑀻𑀬𑁂𑀣, 𑀫𑀓𑁆𑀔𑀺𑀲𑁆𑀲 𑀫𑀓𑁆𑀔𑁄 𑀧𑀳𑀻𑀬𑁂𑀣, 𑀧𑀴𑀸𑀲𑀺𑀲𑁆𑀲 𑀧𑀴𑀸𑀲𑁄 𑀧𑀳𑀻𑀬𑁂𑀣, 𑀇𑀲𑁆𑀲𑀼𑀓𑀺𑀲𑁆𑀲 𑀇𑀲𑁆𑀲𑀸 𑀧𑀳𑀻𑀬𑁂𑀣, 𑀫𑀘𑁆𑀙𑀭𑀺𑀲𑁆𑀲 𑀫𑀘𑁆𑀙𑀭𑀺𑀬𑀁 𑀧𑀳𑀻𑀬𑁂𑀣, 𑀲𑀞𑀲𑁆𑀲 𑀲𑀸𑀞𑁂𑀬𑁆𑀬𑀁 𑀧𑀳𑀻𑀬𑁂𑀣, 𑀫𑀸𑀬𑀸𑀯𑀺𑀲𑁆𑀲 𑀫𑀸𑀬𑀸 𑀧𑀳𑀻𑀬𑁂𑀣, 𑀧𑀸𑀧𑀺𑀘𑁆𑀙𑀲𑁆𑀲 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀧𑀳𑀻𑀬𑁂𑀣, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀬𑁂𑀣, 𑀢𑀫𑁂𑀦𑀁 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀚𑀸𑀢𑀫𑁂𑀯 𑀦𑀁 𑀲𑀗𑁆𑀖𑀸𑀝𑀺𑀓𑀁 𑀓𑀭𑁂𑀬𑁆𑀬𑀼𑀁, 𑀲𑀗𑁆𑀖𑀸𑀝𑀺𑀓𑀢𑁆𑀢𑀫𑁂𑀯 [𑀲𑀁𑀖𑀸𑀝𑀻𑀓𑀢𑁆𑀢𑁂 𑀘𑁂𑀯 (𑀓.)] 𑀲𑀫𑀸𑀤𑀧𑁂𑀬𑁆𑀬𑀼𑀁 𑁋 ‘𑀏𑀳𑀺 𑀢𑁆𑀯𑀁, 𑀪𑀤𑁆𑀭𑀫𑀼𑀔, 𑀲𑀗𑁆𑀖𑀸𑀝𑀺𑀓𑁄 𑀳𑁄𑀳𑀺, 𑀲𑀗𑁆𑀖𑀸𑀝𑀺𑀓𑀲𑁆𑀲 𑀢𑁂 𑀲𑀢𑁄 𑀲𑀗𑁆𑀖𑀸𑀝𑀺𑀥𑀸𑀭𑀡𑀫𑀢𑁆𑀢𑁂𑀦 𑀅𑀪𑀺𑀚𑁆𑀛𑀸𑀮𑀼𑀲𑁆𑀲 𑀅𑀪𑀺𑀚𑁆𑀛𑀸 𑀧𑀳𑀻𑀬𑀺𑀲𑁆𑀲𑀢𑀺, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀺𑀲𑁆𑀲𑀢𑀺, 𑀓𑁄𑀥𑀦𑀲𑁆𑀲 𑀓𑁄𑀥𑁄 𑀧𑀳𑀻𑀬𑀺𑀲𑁆𑀲𑀢𑀺, 𑀉𑀧𑀦𑀸𑀳𑀺𑀲𑁆𑀲 𑀉𑀧𑀦𑀸𑀳𑁄 𑀧𑀳𑀻𑀬𑀺𑀲𑁆𑀲𑀢𑀺, 𑀫𑀓𑁆𑀔𑀺𑀲𑁆𑀲 𑀫𑀓𑁆𑀔𑁄 𑀧𑀳𑀻𑀬𑀺𑀲𑁆𑀲𑀢𑀺, 𑀧𑀴𑀸𑀲𑀺𑀲𑁆𑀲 𑀧𑀴𑀸𑀲𑁄 𑀧𑀳𑀻𑀬𑀺𑀲𑁆𑀲𑀢𑀺, 𑀇𑀲𑁆𑀲𑀼𑀓𑀺𑀲𑁆𑀲 𑀇𑀲𑁆𑀲𑀸 𑀧𑀳𑀻𑀬𑀺𑀲𑁆𑀲𑀢𑀺, 𑀫𑀘𑁆𑀙𑀭𑀺𑀲𑁆𑀲 𑀫𑀘𑁆𑀙𑀭𑀺𑀬𑀁 𑀧𑀳𑀻𑀬𑀺𑀲𑁆𑀲𑀢𑀺, 𑀲𑀞𑀲𑁆𑀲 𑀲𑀸𑀞𑁂𑀬𑁆𑀬𑀁 𑀧𑀳𑀻𑀬𑀺𑀲𑁆𑀲𑀢𑀺, 𑀫𑀸𑀬𑀸𑀯𑀺𑀲𑁆𑀲 𑀫𑀸𑀬𑀸 𑀧𑀳𑀻𑀬𑀺𑀲𑁆𑀲𑀢𑀺, 𑀧𑀸𑀧𑀺𑀘𑁆𑀙𑀲𑁆𑀲 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀧𑀳𑀻𑀬𑀺𑀲𑁆𑀲𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀬𑀺𑀲𑁆𑀲𑀢𑀻’𑀢𑀺. 𑀬𑀲𑁆𑀫𑀸 𑀘 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸𑀝𑀺𑀓𑀫𑁆𑀧𑀺 𑀇𑀥𑁂𑀓𑀘𑁆𑀘𑀁 𑀧𑀲𑁆𑀲𑀸𑀫𑀺 𑀅𑀪𑀺𑀚𑁆𑀛𑀸𑀮𑀼𑀁 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀁 𑀓𑁄𑀥𑀦𑀁 𑀉𑀧𑀦𑀸𑀳𑀺𑀁 𑀫𑀓𑁆𑀔𑀺𑀁 𑀧𑀴𑀸𑀲𑀺𑀁 𑀇𑀲𑁆𑀲𑀼𑀓𑀺𑀁 𑀫𑀘𑁆𑀙𑀭𑀺𑀁 𑀲𑀞𑀁 𑀫𑀸𑀬𑀸𑀯𑀺𑀁 𑀧𑀸𑀧𑀺𑀘𑁆𑀙𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀁, 𑀢𑀲𑁆𑀫𑀸 𑀦 𑀲𑀗𑁆𑀖𑀸𑀝𑀺𑀓𑀲𑁆𑀲 𑀲𑀗𑁆𑀖𑀸𑀝𑀺𑀥𑀸𑀭𑀡𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺.

‘‘𑀅𑀘𑁂𑀮𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂…𑀧𑁂… 𑀭𑀚𑁄𑀚𑀮𑁆𑀮𑀺𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂…𑀧𑁂… 𑀉𑀤𑀓𑁄𑀭𑁄𑀳𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂…𑀧𑁂… 𑀭𑀼𑀓𑁆𑀔𑀫𑀽𑀮𑀺𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂…𑀧𑁂… 𑀅𑀩𑁆𑀪𑁄𑀓𑀸𑀲𑀺𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂…𑀧𑁂… 𑀉𑀩𑁆𑀪𑀝𑁆𑀞𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂…𑀧𑁂… 𑀧𑀭𑀺𑀬𑀸𑀬𑀪𑀢𑁆𑀢𑀺𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂…𑀧𑁂… 𑀫𑀦𑁆𑀢𑀚𑁆𑀛𑀸𑀬𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂…𑀧𑁂… 𑀚𑀝𑀺𑀮𑀓𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀚𑀝𑀸𑀥𑀸𑀭𑀡𑀫𑀢𑁆𑀢𑁂𑀦 𑀅𑀪𑀺𑀚𑁆𑀛𑀸𑀮𑀼𑀲𑁆𑀲 𑀅𑀪𑀺𑀚𑁆𑀛𑀸 𑀧𑀳𑀻𑀬𑁂𑀣, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑁂𑀣, 𑀓𑁄𑀥𑀦𑀲𑁆𑀲 𑀓𑁄𑀥𑁄 𑀧𑀳𑀻𑀬𑁂𑀣, 𑀉𑀧𑀦𑀸𑀳𑀺𑀲𑁆𑀲 𑀉𑀧𑀦𑀸𑀳𑁄 𑀧𑀳𑀻𑀬𑁂𑀣, 𑀫𑀓𑁆𑀔𑀺𑀲𑁆𑀲 𑀫𑀓𑁆𑀔𑁄 𑀧𑀳𑀻𑀬𑁂𑀣, 𑀧𑀴𑀸𑀲𑀺𑀲𑁆𑀲 𑀧𑀴𑀸𑀲𑁄 𑀧𑀳𑀻𑀬𑁂𑀣, 𑀇𑀲𑁆𑀲𑀼𑀓𑀺𑀲𑁆𑀲 𑀇𑀲𑁆𑀲𑀸 𑀧𑀳𑀻𑀬𑁂𑀣, 𑀫𑀘𑁆𑀙𑀭𑀺𑀲𑁆𑀲 𑀫𑀘𑁆𑀙𑀭𑀺𑀬𑀁 𑀧𑀳𑀻𑀬𑁂𑀣, 𑀲𑀞𑀲𑁆𑀲 𑀲𑀸𑀞𑁂𑀬𑁆𑀬𑀁 𑀧𑀳𑀻𑀬𑁂𑀣, 𑀫𑀸𑀬𑀸𑀯𑀺𑀲𑁆𑀲 𑀫𑀸𑀬𑀸 𑀧𑀳𑀻𑀬𑁂𑀣, 𑀧𑀸𑀧𑀺𑀘𑁆𑀙𑀲𑁆𑀲 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀧𑀳𑀻𑀬𑁂𑀣, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀬𑁂𑀣, 𑀢𑀫𑁂𑀦𑀁 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀚𑀸𑀢𑀫𑁂𑀯 𑀦𑀁 𑀚𑀝𑀺𑀮𑀓𑀁 𑀓𑀭𑁂𑀬𑁆𑀬𑀼𑀁, 𑀚𑀝𑀺𑀮𑀓𑀢𑁆𑀢𑀫𑁂𑀯 [𑀚𑀝𑀺𑀮𑀓𑀢𑁆𑀢𑁂 𑀘𑁂𑀯 (𑀓.)] 𑀲𑀫𑀸𑀤𑀧𑁂𑀬𑁆𑀬𑀼𑀁 𑁋 ‘𑀏𑀳𑀺 𑀢𑁆𑀯𑀁, 𑀪𑀤𑁆𑀭𑀫𑀼𑀔, 𑀚𑀝𑀺𑀮𑀓𑁄 𑀳𑁄𑀳𑀺, 𑀚𑀝𑀺𑀮𑀓𑀲𑁆𑀲 𑀢𑁂 𑀲𑀢𑁄 𑀚𑀝𑀸𑀥𑀸𑀭𑀡𑀫𑀢𑁆𑀢𑁂𑀦 𑀅𑀪𑀺𑀚𑁆𑀛𑀸𑀮𑀼𑀲𑁆𑀲 𑀅𑀪𑀺𑀚𑁆𑀛𑀸 𑀧𑀳𑀻𑀬𑀺𑀲𑁆𑀲𑀢𑀺 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀺𑀲𑁆𑀲𑀢𑀺, 𑀓𑁄𑀥𑀦𑀲𑁆𑀲 𑀓𑁄𑀥𑁄 𑀧𑀳𑀻𑀬𑀺𑀲𑁆𑀲𑀢𑀺…𑀧𑁂… 𑀧𑀸𑀧𑀺𑀘𑁆𑀙𑀲𑁆𑀲 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀧𑀳𑀻𑀬𑀺𑀲𑁆𑀲𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀬𑀺𑀲𑁆𑀲𑀢𑀻’𑀢𑀺. 𑀬𑀲𑁆𑀫𑀸 𑀘 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀚𑀝𑀺𑀮𑀓𑀫𑁆𑀧𑀺 𑀇𑀥𑁂𑀓𑀘𑁆𑀘𑀁 𑀧𑀲𑁆𑀲𑀸𑀫𑀺 𑀅𑀪𑀺𑀚𑁆𑀛𑀸𑀮𑀼𑀁 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀁 𑀓𑁄𑀥𑀦𑀁 𑀉𑀧𑀦𑀸𑀳𑀺𑀁 𑀫𑀓𑁆𑀔𑀺𑀁 𑀧𑀮𑀸𑀲𑀺𑀁 𑀇𑀲𑁆𑀲𑀼𑀓𑀺𑀁 𑀫𑀘𑁆𑀙𑀭𑀺𑀁 𑀲𑀞𑀁 𑀫𑀸𑀬𑀸𑀯𑀺𑀁 𑀧𑀸𑀧𑀺𑀘𑁆𑀙𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁, 𑀢𑀲𑁆𑀫𑀸 𑀦 𑀚𑀝𑀺𑀮𑀓𑀲𑁆𑀲 𑀚𑀝𑀸𑀥𑀸𑀭𑀡𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀺.

𑁪𑁩𑁮. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑀡𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺? 𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀪𑀺𑀚𑁆𑀛𑀸𑀮𑀼𑀲𑁆𑀲 𑀅𑀪𑀺𑀚𑁆𑀛𑀸 𑀧𑀳𑀻𑀦𑀸 𑀳𑁄𑀢𑀺, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀤𑁄 𑀧𑀳𑀻𑀦𑁄 𑀳𑁄𑀢𑀺, 𑀓𑁄𑀥𑀦𑀲𑁆𑀲 𑀓𑁄𑀥𑁄 𑀧𑀳𑀻𑀦𑁄 𑀳𑁄𑀢𑀺, 𑀉𑀧𑀦𑀸𑀳𑀺𑀲𑁆𑀲 𑀉𑀧𑀦𑀸𑀳𑁄 𑀧𑀳𑀻𑀦𑁄 𑀳𑁄𑀢𑀺, 𑀫𑀓𑁆𑀔𑀺𑀲𑁆𑀲 𑀫𑀓𑁆𑀔𑁄 𑀧𑀳𑀻𑀦𑁄 𑀳𑁄𑀢𑀺, 𑀧𑀴𑀸𑀲𑀺𑀲𑁆𑀲 𑀧𑀴𑀸𑀲𑁄 𑀧𑀳𑀻𑀦𑁄 𑀳𑁄𑀢𑀺, 𑀇𑀲𑁆𑀲𑀼𑀓𑀺𑀲𑁆𑀲 𑀇𑀲𑁆𑀲𑀸 𑀧𑀳𑀻𑀦𑀸 𑀳𑁄𑀢𑀺, 𑀫𑀘𑁆𑀙𑀭𑀺𑀲𑁆𑀲 𑀫𑀘𑁆𑀙𑀭𑀺𑀬𑀁 𑀧𑀳𑀻𑀦𑀁 𑀳𑁄𑀢𑀺, 𑀲𑀞𑀲𑁆𑀲 𑀲𑀸𑀞𑁂𑀬𑁆𑀬𑀁 𑀧𑀳𑀻𑀦𑀁 𑀳𑁄𑀢𑀺, 𑀫𑀸𑀬𑀸𑀯𑀺𑀲𑁆𑀲 𑀫𑀸𑀬𑀸 𑀧𑀳𑀻𑀦𑀸 𑀳𑁄𑀢𑀺, 𑀧𑀸𑀧𑀺𑀘𑁆𑀙𑀲𑁆𑀲 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀧𑀳𑀻𑀦𑀸 𑀳𑁄𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀦𑀸 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀡𑀫𑀮𑀸𑀦𑀁 𑀲𑀫𑀡𑀤𑁄𑀲𑀸𑀦𑀁 𑀲𑀫𑀡𑀓𑀲𑀝𑀸𑀦𑀁 𑀆𑀧𑀸𑀬𑀺𑀓𑀸𑀦𑀁 𑀞𑀸𑀦𑀸𑀦𑀁 𑀤𑀼𑀕𑁆𑀕𑀢𑀺𑀯𑁂𑀤𑀦𑀺𑀬𑀸𑀦𑀁 𑀧𑀳𑀸𑀦𑀸 ‘𑀲𑀫𑀡𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄’𑀢𑀺 𑀯𑀤𑀸𑀫𑀺. 𑀲𑁄 𑀲𑀩𑁆𑀩𑁂𑀳𑀺 𑀇𑀫𑁂𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺 ( ) [(𑀯𑀺𑀫𑀼𑀢𑁆𑀢𑀫𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺) (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀢𑀲𑁆𑀲 𑀲𑀩𑁆𑀩𑁂𑀳𑀺 𑀇𑀫𑁂𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑁄 ( ) [(𑀯𑀺𑀫𑀼𑀢𑁆𑀢𑀫𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑁄) (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺.

‘‘𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑁄𑀓𑁆𑀔𑀭𑀡𑀻 𑀅𑀘𑁆𑀙𑁄𑀤𑀓𑀸 𑀲𑀸𑀢𑁄𑀤𑀓𑀸 𑀲𑀻𑀢𑁄𑀤𑀓𑀸 𑀲𑁂𑀢𑀓𑀸 𑀲𑀼𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸. 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀖𑀫𑁆𑀫𑀧𑀭𑁂𑀢𑁄 𑀓𑀺𑀮𑀦𑁆𑀢𑁄 𑀢𑀲𑀺𑀢𑁄 𑀧𑀺𑀧𑀸𑀲𑀺𑀢𑁄. 𑀲𑁄 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀆𑀕𑀫𑁆𑀫 𑀯𑀺𑀦𑁂𑀬𑁆𑀬 𑀉𑀤𑀓𑀧𑀺𑀧𑀸𑀲𑀁 𑀯𑀺𑀦𑁂𑀬𑁆𑀬 𑀖𑀫𑁆𑀫𑀧𑀭𑀺𑀴𑀸𑀳𑀁…𑀧𑁂… 𑀧𑀘𑁆𑀙𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬…𑀧𑁂… 𑀉𑀢𑁆𑀢𑀭𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬…𑀧𑁂… 𑀤𑀓𑁆𑀔𑀺𑀡𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬. 𑀬𑀢𑁄 𑀓𑀼𑀢𑁄 𑀘𑁂𑀧𑀺 𑀦𑀁 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀖𑀫𑁆𑀫𑀧𑀭𑁂𑀢𑁄, 𑀓𑀺𑀮𑀦𑁆𑀢𑁄 𑀢𑀲𑀺𑀢𑁄 𑀧𑀺𑀧𑀸𑀲𑀺𑀢𑁄. 𑀲𑁄 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀆𑀕𑀫𑁆𑀫 𑀯𑀺𑀦𑁂𑀬𑁆𑀬 𑀉𑀤𑀓𑀧𑀺𑀧𑀸𑀲𑀁, 𑀯𑀺𑀦𑁂𑀬𑁆𑀬 𑀖𑀫𑁆𑀫𑀧𑀭𑀺𑀴𑀸𑀳𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀢𑁆𑀢𑀺𑀬𑀓𑀼𑀮𑀸 𑀘𑁂𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀲𑁄 𑀘 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀆𑀕𑀫𑁆𑀫, 𑀏𑀯𑀁 𑀫𑁂𑀢𑁆𑀢𑀁 𑀓𑀭𑀼𑀡𑀁 𑀫𑀼𑀤𑀺𑀢𑀁 𑀉𑀧𑁂𑀓𑁆𑀔𑀁 𑀪𑀸𑀯𑁂𑀢𑁆𑀯𑀸 𑀮𑀪𑀢𑀺 𑀅𑀚𑁆𑀛𑀢𑁆𑀢𑀁 [𑀢𑀫𑀳𑀁 (𑀓.)] 𑀯𑀽𑀧𑀲𑀫𑀁 [𑀢𑀫𑀳𑀁 (𑀓.)]. 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀫𑀸 ‘𑀲𑀫𑀡𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄’𑀢𑀺 𑀯𑀤𑀸𑀫𑀺. 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀘𑁂𑀧𑀺…𑀧𑁂… 𑀯𑁂𑀲𑁆𑀲𑀓𑀼𑀮𑀸 𑀘𑁂𑀧𑀺…𑀧𑁂… 𑀲𑀼𑀤𑁆𑀤𑀓𑀼𑀮𑀸 𑀘𑁂𑀧𑀺…𑀧𑁂… 𑀬𑀲𑁆𑀫𑀸 𑀓𑀲𑁆𑀫𑀸 𑀘𑁂𑀧𑀺 𑀓𑀼𑀮𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀲𑁄 𑀘 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀆𑀕𑀫𑁆𑀫, 𑀏𑀯𑀁 𑀫𑁂𑀢𑁆𑀢𑀁 𑀓𑀭𑀼𑀡𑀁 𑀫𑀼𑀤𑀺𑀢𑀁 𑀉𑀧𑁂𑀓𑁆𑀔𑀁 𑀪𑀸𑀯𑁂𑀢𑁆𑀯𑀸 𑀮𑀪𑀢𑀺 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀫𑀁. 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀫𑀸 ‘𑀲𑀫𑀡𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄’𑀢𑀺 𑀯𑀤𑀸𑀫𑀺.

‘‘𑀔𑀢𑁆𑀢𑀺𑀬𑀓𑀼𑀮𑀸 𑀘𑁂𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀲𑁄 𑀘 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀺. 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀘𑁂𑀧𑀺…𑀧𑁂… 𑀯𑁂𑀲𑁆𑀲𑀓𑀼𑀮𑀸 𑀘𑁂𑀧𑀺… 𑀲𑀼𑀤𑁆𑀤𑀓𑀼𑀮𑀸 𑀘𑁂𑀧𑀺… 𑀬𑀲𑁆𑀫𑀸 𑀓𑀲𑁆𑀫𑀸 𑀘𑁂𑀧𑀺 𑀓𑀼𑀮𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀲𑁄 𑀘 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀘𑀽𑀴𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑀫𑀳𑀸𑀬𑀫𑀓𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀘𑀢𑀼𑀢𑁆𑀣𑁄.