𑁧𑁩. 𑀘𑀽𑀴𑀭𑀣𑀯𑀺𑀫𑀸𑀦𑀯𑀢𑁆𑀣𑀼

𑁯𑁮𑁧. ‘‘𑀤𑀴𑁆𑀳𑀥𑀫𑁆𑀫𑀸 𑀦𑀺𑀲𑀸𑀭𑀲𑁆𑀲, 𑀥𑀦𑀼𑀁 𑀑𑀮𑀼𑀩𑁆𑀪 𑀢𑀺𑀝𑁆𑀞𑀲𑀺;

𑀔𑀢𑁆𑀢𑀺𑀬𑁄 𑀦𑀼𑀲𑀺 𑀭𑀸𑀚𑀜𑁆𑀜𑁄, 𑀅𑀤𑀼 𑀮𑀼𑀤𑁆𑀤𑁄 𑀯𑀦𑁂𑀘𑀭𑁄’’𑀢𑀺 [𑀯𑀦𑀸𑀘𑀭𑁄𑀢𑀺 (𑀲𑁆𑀬𑀸. 𑀓.)].

𑁯𑁮𑁨. ‘‘𑀅𑀲𑁆𑀲𑀓𑀸𑀥𑀺𑀧𑀢𑀺𑀲𑁆𑀲𑀸𑀳𑀁, 𑀪𑀦𑁆𑀢𑁂 𑀧𑀼𑀢𑁆𑀢𑁄 𑀯𑀦𑁂𑀘𑀭𑁄;

𑀦𑀸𑀫𑀁 𑀫𑁂 𑀪𑀺𑀓𑁆𑀔𑀼 𑀢𑁂 𑀩𑁆𑀭𑀽𑀫𑀺, 𑀲𑀼𑀚𑀸𑀢𑁄 𑀇𑀢𑀺 𑀫𑀁 𑀯𑀺𑀤𑀽 [𑀯𑀺𑀤𑀼𑀁 (𑀲𑀻.)].

𑁯𑁮𑁩. ‘‘𑀫𑀺𑀕𑁂 𑀕𑀯𑁂𑀲𑀫𑀸𑀦𑁄𑀳𑀁, 𑀑𑀕𑀸𑀳𑀦𑁆𑀢𑁄 𑀩𑁆𑀭𑀳𑀸𑀯𑀦𑀁;

𑀫𑀺𑀕𑀁 𑀢𑀜𑁆𑀘𑁂𑀯 [𑀫𑀺𑀕𑀁 𑀕𑀦𑁆𑀢𑁆𑀯𑁂𑀯 (𑀲𑁆𑀬𑀸.), 𑀫𑀺𑀕𑀯𑀥𑀜𑁆𑀘 (𑀓.)] 𑀦𑀸𑀤𑁆𑀤𑀓𑁆𑀔𑀺𑀁, 𑀢𑀜𑁆𑀘 𑀤𑀺𑀲𑁆𑀯𑀸 𑀞𑀺𑀢𑁄 𑀅𑀳’’𑀦𑁆𑀢𑀺.

𑁯𑁮𑁪. ‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀧𑀼𑀜𑁆𑀜, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀏𑀢𑁆𑀢𑁄 𑀉𑀤𑀓𑀫𑀸𑀤𑀸𑀬, 𑀧𑀸𑀤𑁂 𑀧𑀓𑁆𑀔𑀸𑀮𑀬𑀲𑁆𑀲𑀼 𑀢𑁂.

𑁯𑁮𑁫. ‘‘𑀇𑀤𑀫𑁆𑀧𑀺 𑀧𑀸𑀦𑀻𑀬𑀁 𑀲𑀻𑀢𑀁, 𑀆𑀪𑀢𑀁 𑀕𑀺𑀭𑀺𑀕𑀩𑁆𑀪𑀭𑀸;

𑀭𑀸𑀚𑀧𑀼𑀢𑁆𑀢 𑀢𑀢𑁄 𑀧𑀺𑀢𑁆𑀯𑀸 [𑀧𑀻𑀢𑁆𑀯𑀸 (𑀲𑀻. 𑀲𑁆𑀬𑀸.)], 𑀲𑀦𑁆𑀣𑀢𑀲𑁆𑀫𑀺𑀁 𑀉𑀧𑀸𑀯𑀺𑀲𑀸’’𑀢𑀺.

𑁯𑁮𑁬. ‘‘𑀓𑀮𑁆𑀬𑀸𑀡𑀻 𑀯𑀢 𑀢𑁂 𑀯𑀸𑀘𑀸, 𑀲𑀯𑀦𑀻𑀬𑀸 𑀫𑀳𑀸𑀫𑀼𑀦𑀺;

𑀦𑁂𑀮𑀸 𑀅𑀢𑁆𑀣𑀯𑀢𑀻 [𑀘𑀢𑁆𑀣𑀯𑀢𑀻 (𑀲𑀻.)] 𑀯𑀕𑁆𑀕𑀼, 𑀫𑀦𑁆𑀢𑁆𑀯𑀸 [𑀫𑀦𑁆𑀢𑀸 (𑀲𑁆𑀬𑀸. 𑀧𑀻. 𑀓.)] 𑀅𑀢𑁆𑀣𑀜𑁆𑀘 𑀪𑀸𑀲𑀲𑀺 [𑀪𑀸𑀲𑀲𑁂 (𑀲𑀻.)].

𑁯𑁮𑁭. ‘‘𑀓𑀸 𑀢𑁂 𑀭𑀢𑀺 𑀯𑀦𑁂 𑀯𑀺𑀳𑀭𑀢𑁄, 𑀇𑀲𑀺𑀦𑀺𑀲𑀪 𑀯𑀤𑁂𑀳𑀺 𑀧𑀼𑀝𑁆𑀞𑁄;

𑀢𑀯 𑀯𑀘𑀦𑀧𑀣𑀁 𑀦𑀺𑀲𑀸𑀫𑀬𑀺𑀢𑁆𑀯𑀸, 𑀅𑀢𑁆𑀣𑀥𑀫𑁆𑀫𑀧𑀤𑀁 𑀲𑀫𑀸𑀘𑀭𑁂𑀫𑀲𑁂’’𑀢𑀺.

𑁯𑁮𑁮. ‘‘𑀅𑀳𑀺𑀁𑀲𑀸 𑀲𑀩𑁆𑀩𑀧𑀸𑀡𑀻𑀦𑀁, 𑀓𑀼𑀫𑀸𑀭𑀫𑁆𑀳𑀸𑀓 𑀭𑀼𑀘𑁆𑀘𑀢𑀺;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀢𑀺.

𑁯𑁮𑁯. ‘‘𑀆𑀭𑀢𑀺 𑀲𑀫𑀘𑀭𑀺𑀬𑀸 𑀘, 𑀩𑀸𑀳𑀼𑀲𑀘𑁆𑀘𑀁 𑀓𑀢𑀜𑁆𑀜𑀼𑀢𑀸;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀥𑀫𑁆𑀫𑀸 𑀏𑀢𑁂 𑀧𑀲𑀁𑀲𑀺𑀬𑀸𑀢𑀺.

𑁯𑁯𑁦. ‘‘𑀲𑀦𑁆𑀢𑀺𑀓𑁂 𑀫𑀭𑀡𑀁 𑀢𑀼𑀬𑁆𑀳𑀁, 𑀑𑀭𑀁 𑀫𑀸𑀲𑁂𑀳𑀺 𑀧𑀜𑁆𑀘𑀳𑀺;

𑀭𑀸𑀚𑀧𑀼𑀢𑁆𑀢 𑀯𑀺𑀚𑀸𑀦𑀸𑀳𑀺, 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑀬𑀸’’𑀢𑀺.

𑁯𑁯𑁧. ‘‘𑀓𑀢𑀫𑀁 𑀲𑁆𑀯𑀸𑀳𑀁 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸, 𑀓𑀺𑀁 𑀓𑀫𑁆𑀫𑀁 𑀓𑀺𑀜𑁆𑀘 𑀧𑁄𑀭𑀺𑀲𑀁;

𑀓𑀸𑀬 𑀯𑀸 𑀧𑀦 𑀯𑀺𑀚𑁆𑀚𑀸𑀬, 𑀪𑀯𑁂𑀬𑁆𑀬𑀁 𑀅𑀚𑀭𑀸𑀫𑀭𑁄’’𑀢𑀺.

𑁯𑁯𑁨. ‘‘𑀦 𑀯𑀺𑀚𑁆𑀚𑀢𑁂 𑀲𑁄 𑀧𑀤𑁂𑀲𑁄, 𑀓𑀫𑁆𑀫𑀁 𑀯𑀺𑀚𑁆𑀚𑀸 𑀘 𑀧𑁄𑀭𑀺𑀲𑀁;

𑀬𑀢𑁆𑀣 𑀕𑀦𑁆𑀢𑁆𑀯𑀸 𑀪𑀯𑁂 𑀫𑀘𑁆𑀘𑁄, 𑀭𑀸𑀚𑀧𑀼𑀢𑁆𑀢𑀸𑀚𑀭𑀸𑀫𑀭𑁄.

𑁯𑁯𑁩. ‘‘𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸, 𑀭𑀝𑁆𑀞𑀯𑀦𑁆𑀢𑁄𑀧𑀺 𑀔𑀢𑁆𑀢𑀺𑀬𑀸;

𑀧𑀳𑀽𑀢𑀥𑀦𑀥𑀜𑁆𑀜𑀸𑀲𑁂, 𑀢𑁂𑀧𑀺 𑀦𑁄 [𑀢𑁂𑀧𑀺 𑀦 (𑀩𑀳𑀽𑀲𑀼)] 𑀅𑀚𑀭𑀸𑀫𑀭𑀸.

𑁯𑁯𑁪. ‘‘𑀬𑀤𑀺 𑀢𑁂 𑀲𑀼𑀢𑀸 𑀅𑀦𑁆𑀥𑀓𑀯𑁂𑀡𑁆𑀟𑀼𑀧𑀼𑀢𑁆𑀢𑀸 [𑀅𑀦𑁆𑀥𑀓𑀯𑁂𑀡𑁆𑀳𑀼𑀧𑀼𑀢𑁆𑀢𑀸 (𑀲𑀻.), 𑀅𑀡𑁆𑀟𑀓𑀯𑁂𑀡𑁆𑀟𑀧𑀼𑀢𑁆𑀢𑀸 (𑀲𑁆𑀬𑀸. 𑀓.)], 𑀲𑀽𑀭𑀸 𑀯𑀻𑀭𑀸 𑀯𑀺𑀓𑁆𑀓𑀦𑁆𑀢𑀧𑁆𑀧𑀳𑀸𑀭𑀺𑀦𑁄;

𑀢𑁂𑀧𑀺 𑀆𑀬𑀼𑀓𑁆𑀔𑀬𑀁 𑀧𑀢𑁆𑀢𑀸, 𑀯𑀺𑀤𑁆𑀥𑀲𑁆𑀢𑀸 𑀲𑀲𑁆𑀲𑀢𑀻𑀲𑀫𑀸.

𑁯𑁯𑁫. ‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀏𑀢𑁂 𑀘𑀜𑁆𑀜𑁂 𑀘 𑀚𑀸𑀢𑀺𑀬𑀸, 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸.

𑁯𑁯𑁬. ‘‘𑀬𑁂 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀙𑀴𑀗𑁆𑀕𑀁 𑀩𑁆𑀭𑀳𑁆𑀫𑀘𑀺𑀦𑁆𑀢𑀺𑀢𑀁;

𑀏𑀢𑁂 𑀘𑀜𑁆𑀜𑁂 𑀘 𑀯𑀺𑀚𑁆𑀚𑀸𑀬, 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸.

𑁯𑁯𑁭. ‘‘𑀇𑀲𑀬𑁄 𑀘𑀸𑀧𑀺 𑀬𑁂 𑀲𑀦𑁆𑀢𑀸, 𑀲𑀜𑁆𑀜𑀢𑀢𑁆𑀢𑀸 𑀢𑀧𑀲𑁆𑀲𑀺𑀦𑁄;

𑀲𑀭𑀻𑀭𑀁 𑀢𑁂𑀧𑀺 𑀓𑀸𑀮𑁂𑀦, 𑀯𑀺𑀚𑀳𑀦𑁆𑀢𑀺 𑀢𑀧𑀲𑁆𑀲𑀺𑀦𑁄.

𑁯𑁯𑁮. ‘‘𑀪𑀸𑀯𑀺𑀢𑀢𑁆𑀢𑀸𑀧𑀺 𑀅𑀭𑀳𑀦𑁆𑀢𑁄, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸;

𑀦𑀺𑀓𑁆𑀔𑀺𑀧𑀦𑁆𑀢𑀺 𑀇𑀫𑀁 𑀤𑁂𑀳𑀁, 𑀧𑀼𑀜𑁆𑀜𑀧𑀸𑀧𑀧𑀭𑀺𑀓𑁆𑀔𑀬𑀸’’𑀢𑀺.

𑁯𑁯𑁯. ‘‘𑀲𑀼𑀪𑀸𑀲𑀺𑀢𑀸 𑀅𑀢𑁆𑀣𑀯𑀢𑀻, 𑀕𑀸𑀣𑀸𑀬𑁄 𑀢𑁂 𑀫𑀳𑀸𑀫𑀼𑀦𑀺;

𑀦𑀺𑀚𑁆𑀛𑀢𑁆𑀢𑁄𑀫𑁆𑀳𑀺 𑀲𑀼𑀪𑀝𑁆𑀞𑁂𑀦, 𑀢𑁆𑀯𑀜𑁆𑀘 𑀫𑁂 𑀲𑀭𑀡𑀁 𑀪𑀯𑀸’’𑀢𑀺.

𑁧𑁦𑁦𑁦. ‘‘𑀫𑀸 𑀫𑀁 𑀢𑁆𑀯𑀁 𑀲𑀭𑀡𑀁 𑀕𑀘𑁆𑀙, 𑀢𑀫𑁂𑀯 𑀲𑀭𑀡𑀁 𑀯𑀚 [𑀪𑀚 (𑀓.)];

𑀲𑀓𑁆𑀬𑀧𑀼𑀢𑁆𑀢𑀁 𑀫𑀳𑀸𑀯𑀻𑀭𑀁, 𑀬𑀫𑀳𑀁 𑀲𑀭𑀡𑀁 𑀕𑀢𑁄’’𑀢𑀺.

𑁧𑁦𑁦𑁧. ‘‘𑀓𑀢𑀭𑀲𑁆𑀫𑀺𑀁 𑀲𑁄 𑀚𑀦𑀧𑀤𑁂, 𑀲𑀢𑁆𑀣𑀸 𑀢𑀼𑀫𑁆𑀳𑀸𑀓 𑀫𑀸𑀭𑀺𑀲;

𑀅𑀳𑀫𑁆𑀧𑀺 𑀤𑀝𑁆𑀞𑀼𑀁 𑀕𑀘𑁆𑀙𑀺𑀲𑁆𑀲𑀁, 𑀚𑀺𑀦𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮’’𑀦𑁆𑀢𑀺.

𑁧𑁦𑁦𑁨. ‘‘𑀧𑀼𑀭𑀢𑁆𑀣𑀺𑀫𑀲𑁆𑀫𑀺𑀁 𑀚𑀦𑀧𑀤𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀢𑀢𑁆𑀣𑀸𑀲𑀺 𑀧𑀼𑀭𑀺𑀲𑀸𑀚𑀜𑁆𑀜𑁄, 𑀲𑁄 𑀘 𑀔𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

𑁧𑁦𑁦𑁩. ‘‘𑀲𑀘𑁂 𑀳𑀺 𑀩𑀼𑀤𑁆𑀥𑁄 𑀢𑀺𑀝𑁆𑀞𑁂𑀬𑁆𑀬, 𑀲𑀢𑁆𑀣𑀸 𑀢𑀼𑀫𑁆𑀳𑀸𑀓 𑀫𑀸𑀭𑀺𑀲;

𑀬𑁄𑀚𑀦𑀸𑀦𑀺 𑀲𑀳𑀲𑁆𑀲𑀸𑀦𑀺, 𑀕𑀘𑁆𑀙𑁂𑀬𑁆𑀬𑀁 [𑀕𑀘𑁆𑀙𑁂 (𑀲𑁆𑀬𑀸. 𑀧𑀻. 𑀓.)] 𑀧𑀬𑀺𑀭𑀼𑀧𑀸𑀲𑀺𑀢𑀼𑀁.

𑁧𑁦𑁦𑁪. ‘‘𑀬𑀢𑁄 𑀘 𑀔𑁄 [𑀬𑀢𑀸 𑀔𑁄 (𑀧𑀻. 𑀓.)] 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀲𑀢𑁆𑀣𑀸 𑀢𑀼𑀫𑁆𑀳𑀸𑀓 𑀫𑀸𑀭𑀺𑀲;

𑀦𑀺𑀩𑁆𑀩𑀼𑀢𑀫𑁆𑀧𑀺 [𑀧𑀭𑀺𑀦𑀺𑀩𑁆𑀩𑀼𑀢𑀁 (𑀲𑁆𑀬𑀸. 𑀓.)] 𑀫𑀳𑀸𑀯𑀻𑀭𑀁, 𑀕𑀘𑁆𑀙𑀸𑀫𑀺 𑀲𑀭𑀡𑀁 𑀅𑀳𑀁.

𑁧𑁦𑁦𑁫. ‘‘𑀉𑀧𑁂𑀫𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘𑀸𑀧𑀺 𑀅𑀦𑀼𑀢𑁆𑀢𑀭𑀁;

𑀲𑀗𑁆𑀖𑀜𑁆𑀘 𑀦𑀭𑀤𑁂𑀯𑀲𑁆𑀲, 𑀕𑀘𑁆𑀙𑀸𑀫𑀺 𑀲𑀭𑀡𑀁 𑀅𑀳𑀁.

𑁧𑁦𑁦𑁬. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀫𑀺 𑀔𑀺𑀧𑁆𑀧𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀸𑀫𑀺;

𑀅𑀫𑀚𑁆𑀚𑀧𑁄 𑀦𑁄 𑀘 𑀫𑀼𑀲𑀸 𑀪𑀡𑀸𑀫𑀺, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀫𑀺 𑀢𑀼𑀝𑁆𑀞𑁄’’𑀢𑀺.

𑁧𑁦𑁦𑁭. ‘‘𑀲𑀳𑀲𑁆𑀲𑀭𑀁𑀲𑀻𑀯 𑀬𑀣𑀸 𑀫𑀳𑀧𑁆𑀧𑀪𑁄, 𑀤𑀺𑀲𑀁 𑀬𑀣𑀸 𑀪𑀸𑀢𑀺 𑀦𑀪𑁂 𑀅𑀦𑀼𑀓𑁆𑀓𑀫𑀁;

𑀢𑀣𑀸𑀧𑀓𑀸𑀭𑁄 [𑀢𑀣𑀧𑁆𑀧𑀓𑀸𑀭𑁄 (𑀲𑀻. 𑀲𑁆𑀬𑀸.)] 𑀢𑀯𑀸𑀬𑀁 [𑀢𑀯𑀬𑀁 (𑀲𑀻. 𑀧𑀻.)] 𑀫𑀳𑀸𑀭𑀣𑁄, 𑀲𑀫𑀦𑁆𑀢𑀢𑁄 𑀬𑁄𑀚𑀦𑀲𑀢𑁆𑀢𑀫𑀸𑀬𑀢𑁄.

𑁧𑁦𑁦𑁮. ‘‘𑀲𑀼𑀯𑀡𑁆𑀡𑀧𑀝𑁆𑀝𑁂𑀳𑀺 𑀲𑀫𑀦𑁆𑀢𑀫𑁄𑀢𑁆𑀣𑀝𑁄, 𑀉𑀭𑀲𑁆𑀲 𑀫𑀼𑀢𑁆𑀢𑀸𑀳𑀺 𑀫𑀡𑀻𑀳𑀺 𑀘𑀺𑀢𑁆𑀢𑀺𑀢𑁄;

𑀮𑁂𑀔𑀸 𑀲𑀼𑀯𑀡𑁆𑀡𑀲𑁆𑀲 𑀘 𑀭𑀽𑀧𑀺𑀬𑀲𑁆𑀲 𑀘, 𑀲𑁄𑀪𑁂𑀦𑁆𑀢𑀺 𑀯𑁂𑀴𑀼𑀭𑀺𑀬𑀫𑀬𑀸 𑀲𑀼𑀦𑀺𑀫𑁆𑀫𑀺𑀢𑀸.

𑁧𑁦𑁦𑁯. ‘‘𑀲𑀻𑀲𑀜𑁆𑀘𑀺𑀤𑀁 𑀯𑁂𑀴𑀼𑀭𑀺𑀬𑀲𑁆𑀲 𑀦𑀺𑀫𑁆𑀫𑀺𑀢𑀁, 𑀬𑀼𑀕𑀜𑁆𑀘𑀺𑀤𑀁 𑀮𑁄𑀳𑀺𑀢𑀓𑀸𑀬 𑀘𑀺𑀢𑁆𑀢𑀺𑀢𑀁;

𑀬𑀼𑀢𑁆𑀢𑀸 𑀲𑀼𑀯𑀡𑁆𑀡𑀲𑁆𑀲 𑀘 𑀭𑀽𑀧𑀺𑀬𑀲𑁆𑀲 𑀘, 𑀲𑁄𑀪𑀦𑁆𑀢𑀺 𑀅𑀲𑁆𑀲𑀸 𑀘 𑀇𑀫𑁂 𑀫𑀦𑁄𑀚𑀯𑀸.

𑁧𑁦𑁧𑁦. ‘‘𑀲𑁄 𑀢𑀺𑀝𑁆𑀞𑀲𑀺 𑀳𑁂𑀫𑀭𑀣𑁂 𑀅𑀥𑀺𑀝𑁆𑀞𑀺𑀢𑁄, 𑀤𑁂𑀯𑀸𑀦𑀫𑀺𑀦𑁆𑀤𑁄𑀯 𑀲𑀳𑀲𑁆𑀲𑀯𑀸𑀳𑀦𑁄;

𑀧𑀼𑀘𑁆𑀙𑀸𑀫𑀺 𑀢𑀸𑀳𑀁 𑀬𑀲𑀯𑀦𑁆𑀢 𑀓𑁄𑀯𑀺𑀤𑀁 [𑀓𑁄𑀯𑀺𑀤 (𑀓.)], 𑀓𑀣𑀁 𑀢𑀬𑀸 𑀮𑀤𑁆𑀥𑁄 𑀅𑀬𑀁 𑀉𑀴𑀸𑀭𑁄’’𑀢𑀺.

𑁧𑁦𑁧𑁧. ‘‘𑀲𑀼𑀚𑀸𑀢𑁄 𑀦𑀸𑀫𑀳𑀁 𑀪𑀦𑁆𑀢𑁂, 𑀭𑀸𑀚𑀧𑀼𑀢𑁆𑀢𑁄 𑀧𑀼𑀭𑁂 𑀅𑀳𑀼𑀁;

𑀢𑁆𑀯𑀜𑁆𑀘 𑀫𑀁 𑀅𑀦𑀼𑀓𑀫𑁆𑀧𑀸𑀬, 𑀲𑀜𑁆𑀜𑀫𑀲𑁆𑀫𑀺𑀁 𑀦𑀺𑀯𑁂𑀲𑀬𑀺.

𑁧𑁦𑁧𑁨. ‘‘𑀔𑀻𑀡𑀸𑀬𑀼𑀓𑀜𑁆𑀘 𑀫𑀁 𑀜𑀢𑁆𑀯𑀸, 𑀲𑀭𑀻𑀭𑀁 𑀧𑀸𑀤𑀸𑀲𑀺 𑀲𑀢𑁆𑀣𑀼𑀦𑁄;

𑀇𑀫𑀁 𑀲𑀼𑀚𑀸𑀢 𑀧𑀽𑀚𑁂𑀳𑀺, 𑀢𑀁 𑀢𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺.

𑁧𑁦𑁧𑁩. ‘‘𑀢𑀸𑀳𑀁 𑀕𑀦𑁆𑀥𑁂𑀳𑀺 𑀫𑀸𑀮𑁂𑀳𑀺, 𑀧𑀽𑀚𑀬𑀺𑀢𑁆𑀯𑀸 𑀲𑀫𑀼𑀬𑁆𑀬𑀼𑀢𑁄;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀉𑀧𑀧𑀦𑁆𑀦𑁄𑀫𑁆𑀳𑀺 𑀦𑀦𑁆𑀤𑀦𑀁.

𑁧𑁦𑁧𑁪. ‘‘𑀦𑀦𑁆𑀤𑀦𑁂 𑀘 𑀯𑀦𑁂 [𑀦𑀦𑁆𑀤𑀦𑁄𑀧𑀯𑀦𑁂 (𑀲𑀻.), 𑀦𑀦𑁆𑀤𑀦𑁂 𑀧𑀯𑀦𑁂 (𑀲𑁆𑀬𑀸. 𑀓.)] 𑀭𑀫𑁆𑀫𑁂, 𑀦𑀸𑀦𑀸𑀤𑀺𑀚𑀕𑀡𑀸𑀬𑀼𑀢𑁂;

𑀭𑀫𑀸𑀫𑀺 𑀦𑀘𑁆𑀘𑀕𑀻𑀢𑁂𑀳𑀺, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄’’𑀢𑀺.

𑀘𑀽𑀴𑀭𑀣𑀯𑀺𑀫𑀸𑀦𑀁 𑀢𑁂𑀭𑀲𑀫𑀁.