𑁧𑁪. 𑀫𑀳𑀸𑀭𑀣𑀯𑀺𑀫𑀸𑀦𑀯𑀢𑁆𑀣𑀼

𑁧𑁦𑁧𑁫. ‘‘𑀲𑀳𑀲𑁆𑀲𑀬𑀼𑀢𑁆𑀢𑀁 𑀳𑀬𑀯𑀸𑀳𑀦𑀁 𑀲𑀼𑀪𑀁, 𑀆𑀭𑀼𑀬𑁆𑀳𑀺𑀫𑀁 𑀲𑀦𑁆𑀤𑀦𑀁 𑀦𑁂𑀓𑀘𑀺𑀢𑁆𑀢𑀁;

𑀉𑀬𑁆𑀬𑀸𑀦𑀪𑀽𑀫𑀺𑀁 𑀅𑀪𑀺𑀢𑁄 𑀅𑀦𑀼𑀓𑁆𑀓𑀫𑀁, 𑀧𑀼𑀭𑀺𑀦𑁆𑀤𑀤𑁄 𑀪𑀽𑀢𑀧𑀢𑀻𑀯 𑀯𑀸𑀲𑀯𑁄.

𑁧𑁦𑁧𑁬. ‘‘𑀲𑁄𑀯𑀡𑁆𑀡𑀫𑀬𑀸 𑀢𑁂 𑀭𑀣𑀓𑀼𑀩𑁆𑀩𑀭𑀸 𑀉𑀪𑁄, 𑀨𑀮𑁂𑀳𑀺 [𑀣𑀮𑁂𑀳𑀺 (𑀲𑀻.)] 𑀅𑀁𑀲𑁂𑀳𑀺 𑀅𑀢𑀻𑀯 𑀲𑀗𑁆𑀕𑀢𑀸;

𑀲𑀼𑀚𑀸𑀢𑀕𑀼𑀫𑁆𑀩𑀸 𑀦𑀭𑀯𑀻𑀭𑀦𑀺𑀝𑁆𑀞𑀺𑀢𑀸, 𑀯𑀺𑀭𑁄𑀘𑀢𑀻 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄.

𑁧𑁦𑁧𑁭. ‘‘𑀲𑀼𑀯𑀡𑁆𑀡𑀚𑀸𑀮𑀸𑀯𑀢𑀢𑁄 𑀭𑀣𑁄 𑀅𑀬𑀁, 𑀩𑀳𑀽𑀳𑀺 𑀦𑀸𑀦𑀸𑀭𑀢𑀦𑁂𑀳𑀺 𑀘𑀺𑀢𑁆𑀢𑀺𑀢𑁄;

𑀲𑀼𑀦𑀦𑁆𑀤𑀺𑀖𑁄𑀲𑁄 𑀘 𑀲𑀼𑀪𑀲𑁆𑀲𑀭𑁄 𑀘, 𑀯𑀺𑀭𑁄𑀘𑀢𑀻 𑀘𑀸𑀫𑀭𑀳𑀢𑁆𑀣𑀩𑀸𑀳𑀼𑀪𑀺.

𑁧𑁦𑁧𑁮. ‘‘𑀇𑀫𑀸 𑀘 𑀦𑀸𑀪𑁆𑀬𑁄 𑀫𑀦𑀲𑀸𑀪𑀺𑀦𑀺𑀫𑁆𑀫𑀺𑀢𑀸, 𑀭𑀣𑀲𑁆𑀲 𑀧𑀸𑀤𑀦𑁆𑀢𑀭𑀫𑀚𑁆𑀛𑀪𑀽𑀲𑀺𑀢𑀸;

𑀇𑀫𑀸 𑀘 𑀦𑀸𑀪𑁆𑀬𑁄 𑀲𑀢𑀭𑀸𑀚𑀺𑀘𑀺𑀢𑁆𑀢𑀺𑀢𑀸, 𑀲𑀢𑁂𑀭𑀢𑀸 𑀯𑀺𑀚𑁆𑀚𑀼𑀭𑀺𑀯𑀧𑁆𑀧𑀪𑀸𑀲𑀭𑁂.

𑁧𑁦𑁧𑁯. ‘‘𑀅𑀦𑁂𑀓𑀘𑀺𑀢𑁆𑀢𑀸𑀯𑀢𑀢𑁄 𑀭𑀣𑁄 𑀅𑀬𑀁, 𑀧𑀼𑀣𑀽 𑀘 𑀦𑁂𑀫𑀻 𑀘 𑀲𑀳𑀲𑁆𑀲𑀭𑀁𑀲𑀺𑀓𑁄;

𑀢𑁂𑀲𑀁 𑀲𑀭𑁄 𑀲𑀼𑀬𑁆𑀬𑀢𑀺 [𑀲𑀽𑀬𑀢𑀺 (𑀲𑀻.)] 𑀯𑀕𑁆𑀕𑀼𑀭𑀽𑀧𑁄, 𑀧𑀜𑁆𑀘𑀗𑁆𑀕𑀺𑀓𑀁 𑀢𑀼𑀭𑀺𑀬𑀫𑀺𑀯𑀧𑁆𑀧𑀯𑀸𑀤𑀺𑀢𑀁.

𑁧𑁦𑁨𑁦. ‘‘𑀲𑀺𑀭𑀲𑁆𑀫𑀺𑀁 𑀘𑀺𑀢𑁆𑀢𑀁 𑀫𑀡𑀺𑀘𑀦𑁆𑀤𑀓𑀧𑁆𑀧𑀺𑀢𑀁, 𑀲𑀤𑀸 𑀯𑀺𑀲𑀼𑀤𑁆𑀥𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁;

𑀲𑀼𑀯𑀡𑁆𑀡𑀭𑀸𑀚𑀻𑀳𑀺 𑀅𑀢𑀻𑀯 𑀲𑀗𑁆𑀕𑀢𑀁, 𑀯𑁂𑀴𑀼𑀭𑀺𑀬𑀭𑀸𑀚𑀻𑀯 𑀅𑀢𑀻𑀯 𑀲𑁄𑀪𑀢𑀺.

𑁧𑁦𑁨𑁧. ‘‘𑀇𑀫𑁂 𑀘 𑀯𑀸𑀴𑀻 𑀫𑀡𑀺𑀘𑀦𑁆𑀤𑀓𑀧𑁆𑀧𑀺𑀢𑀸, 𑀆𑀭𑁄𑀳𑀓𑀫𑁆𑀩𑀽 𑀲𑀼𑀚𑀯𑀸 𑀩𑁆𑀭𑀳𑀽𑀧𑀫𑀸.

𑀩𑁆𑀭𑀳𑀸 𑀫𑀳𑀦𑁆𑀢𑀸 𑀩𑀮𑀺𑀦𑁄 𑀫𑀳𑀸𑀚𑀯𑀸, 𑀫𑀦𑁄 𑀢𑀯𑀜𑁆𑀜𑀸𑀬 𑀢𑀣𑁂𑀯 𑀲𑀺𑀁𑀲𑀭𑁂 [𑀲𑀩𑁆𑀩𑀭𑁂 (𑀓.), 𑀲𑀧𑁆𑀧𑀭𑁂 (?)].

𑁧𑁦𑁨𑁨. ‘‘𑀇𑀫𑁂 𑀘 𑀲𑀩𑁆𑀩𑁂 𑀲𑀳𑀺𑀢𑀸 𑀘𑀢𑀼𑀓𑁆𑀓𑀫𑀸, 𑀫𑀦𑁄 𑀢𑀯𑀜𑁆𑀜𑀸𑀬 𑀢𑀣𑁂𑀯 𑀲𑀺𑀁𑀲𑀭𑁂;

𑀲𑀫𑀁 𑀯𑀳𑀦𑁆𑀢𑀸 𑀫𑀼𑀤𑀼𑀓𑀸 𑀅𑀦𑀼𑀤𑁆𑀥𑀢𑀸, 𑀆𑀫𑁄𑀤𑀫𑀸𑀦𑀸 𑀢𑀼𑀭𑀕𑀸𑀦 [𑀢𑀼𑀭𑀗𑁆𑀕𑀸𑀦 (𑀓.)] 𑀫𑀼𑀢𑁆𑀢𑀫𑀸.

𑁧𑁦𑁨𑁩. ‘‘𑀥𑀼𑀦𑀦𑁆𑀢𑀺 𑀯𑀕𑁆𑀕𑀦𑁆𑀢𑀺 𑀧𑀢𑀦𑁆𑀢𑀺 [𑀧𑀯𑀢𑁆𑀢𑀦𑁆𑀢𑀺 (𑀧𑀻. 𑀓.)] 𑀘𑀫𑁆𑀩𑀭𑁂, 𑀅𑀩𑁆𑀪𑀼𑀤𑁆𑀥𑀼𑀦𑀦𑁆𑀢𑀸 𑀲𑀼𑀓𑀢𑁂 𑀧𑀺𑀴𑀦𑁆𑀥𑀦𑁂;

𑀢𑁂𑀲𑀁 𑀲𑀭𑁄 𑀲𑀼𑀬𑁆𑀬𑀢𑀺 𑀯𑀕𑁆𑀕𑀼𑀭𑀽𑀧𑁄, 𑀧𑀜𑁆𑀘𑀗𑁆𑀕𑀺𑀓𑀁 𑀢𑀼𑀭𑀺𑀬𑀫𑀺𑀯𑀧𑁆𑀧𑀯𑀸𑀤𑀺𑀢𑀁.

𑁧𑁦𑁨𑁪. ‘‘𑀭𑀣𑀲𑁆𑀲 𑀖𑁄𑀲𑁄 𑀅𑀧𑀺𑀴𑀦𑁆𑀥𑀦𑀸𑀦 𑀘, 𑀔𑀼𑀭𑀲𑁆𑀲 𑀦𑀸𑀤𑁄 [𑀦𑀸𑀤𑀻 (𑀲𑁆𑀬𑀸.), 𑀦𑀸𑀤𑀺 (𑀧𑀻. 𑀓.)] 𑀅𑀪𑀺𑀳𑀺𑀁𑀲𑀦𑀸𑀬 𑀘;

𑀖𑁄𑀲𑁄 𑀲𑀼𑀯𑀕𑁆𑀕𑀽 𑀲𑀫𑀺𑀢𑀲𑁆𑀲 𑀲𑀼𑀬𑁆𑀬𑀢𑀺, 𑀕𑀦𑁆𑀥𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀺𑀘𑀺𑀢𑁆𑀭𑀲𑀁𑀯𑀦𑁂.

𑁧𑁦𑁨𑁫. ‘‘𑀭𑀣𑁂 𑀞𑀺𑀢𑀸 𑀢𑀸 𑀫𑀺𑀕𑀫𑀦𑁆𑀤𑀮𑁄𑀘𑀦𑀸, 𑀆𑀴𑀸𑀭𑀧𑀫𑁆𑀳𑀸 𑀳𑀲𑀺𑀢𑀸 𑀧𑀺𑀬𑀁𑀯𑀤𑀸;

𑀯𑁂𑀴𑀼𑀭𑀺𑀬𑀚𑀸𑀮𑀸𑀯𑀢𑀢𑀸 𑀢𑀦𑀼𑀘𑁆𑀙𑀯𑀸, 𑀲𑀤𑁂𑀯 𑀕𑀦𑁆𑀥𑀩𑁆𑀩𑀲𑀽𑀭𑀕𑁆𑀕𑀧𑀽𑀚𑀺𑀢𑀸.

𑁧𑁦𑁨𑁬. ‘‘𑀢𑀸 𑀭𑀢𑁆𑀢𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀸𑀲𑀲𑀸, 𑀯𑀺𑀲𑀸𑀮𑀦𑁂𑀢𑁆𑀢𑀸 𑀅𑀪𑀺𑀭𑀢𑁆𑀢𑀮𑁄𑀘𑀦𑀸;

𑀓𑀼𑀮𑁂 𑀲𑀼𑀚𑀸𑀢𑀸 𑀲𑀼𑀢𑀦𑀽 𑀲𑀼𑀘𑀺𑀫𑁆𑀳𑀺𑀢𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁨𑁭. ‘‘𑀢𑀸 𑀓𑀫𑁆𑀩𑀼𑀓𑁂𑀬𑀽𑀭𑀥𑀭𑀸 𑀲𑀼𑀯𑀸𑀲𑀲𑀸, 𑀲𑀼𑀫𑀚𑁆𑀛𑀺𑀫𑀸 𑀊𑀭𑀼𑀣𑀦𑀽𑀧𑀧𑀦𑁆𑀦𑀸;

𑀯𑀝𑁆𑀝𑀗𑁆𑀕𑀼𑀮𑀺𑀬𑁄 𑀲𑀼𑀫𑀼𑀔𑀸 𑀲𑀼𑀤𑀲𑁆𑀲𑀦𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁨𑁮. ‘‘𑀅𑀜𑁆𑀜𑀸 𑀲𑀼𑀯𑁂𑀡𑀻 𑀲𑀼𑀲𑀼 𑀫𑀺𑀲𑁆𑀲𑀓𑁂𑀲𑀺𑀬𑁄, 𑀲𑀫𑀁 𑀯𑀺𑀪𑀢𑁆𑀢𑀸𑀳𑀺 𑀧𑀪𑀲𑁆𑀲𑀭𑀸𑀳𑀺 𑀘;

𑀅𑀦𑀼𑀩𑁆𑀩𑀢𑀸 𑀢𑀸 𑀢𑀯 𑀫𑀸𑀦𑀲𑁂 𑀭𑀢𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁨𑁯. ‘‘𑀆𑀯𑁂𑀴𑀺𑀦𑀺𑀬𑁄 𑀧𑀤𑀼𑀫𑀼𑀧𑁆𑀧𑀮𑀘𑁆𑀙𑀤𑀸, 𑀅𑀮𑀗𑁆𑀓𑀢𑀸 𑀘𑀦𑁆𑀤𑀦𑀲𑀸𑀭𑀯𑀸𑀲𑀺𑀢𑀸 [𑀯𑁄𑀲𑀺𑀢𑀸 (𑀲𑁆𑀬𑀸.), 𑀪𑀽𑀲𑀺𑀢𑀸 (𑀓.)];

𑀅𑀦𑀼𑀩𑁆𑀩𑀢𑀸 𑀢𑀸 𑀢𑀯 𑀫𑀸𑀦𑀲𑁂 𑀭𑀢𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁩𑁦. ‘‘𑀢𑀸 𑀫𑀸𑀮𑀺𑀦𑀺𑀬𑁄 𑀧𑀤𑀼𑀫𑀼𑀧𑁆𑀧𑀮𑀘𑁆𑀙𑀤𑀸, 𑀅𑀮𑀗𑁆𑀓𑀢𑀸 𑀘𑀦𑁆𑀤𑀦𑀲𑀸𑀭𑀯𑀸𑀲𑀺𑀢𑀸;

𑀅𑀦𑀼𑀩𑁆𑀩𑀢𑀸 𑀢𑀸 𑀢𑀯 𑀫𑀸𑀦𑀲𑁂 𑀭𑀢𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁩𑁧. ‘‘𑀓𑀡𑁆𑀞𑁂𑀲𑀼 𑀢𑁂 𑀬𑀸𑀦𑀺 𑀧𑀺𑀴𑀦𑁆𑀥𑀦𑀸𑀦𑀺, 𑀳𑀢𑁆𑀣𑁂𑀲𑀼 𑀧𑀸𑀤𑁂𑀲𑀼 𑀢𑀣𑁂𑀯 𑀲𑀻𑀲𑁂;

𑀑𑀪𑀸𑀲𑀬𑀦𑁆𑀢𑀻 𑀤𑀲 𑀲𑀩𑁆𑀩𑀲𑁄 𑀤𑀺𑀲𑀸, 𑀅𑀩𑁆𑀪𑀼𑀤𑁆𑀤𑀬𑀁 𑀲𑀸𑀭𑀤𑀺𑀓𑁄𑀯 𑀪𑀸𑀡𑀼𑀫𑀸.

𑁧𑁦𑁩𑁨. ‘‘𑀯𑀸𑀢𑀲𑁆𑀲 𑀯𑁂𑀕𑁂𑀦 𑀘 𑀲𑀫𑁆𑀧𑀓𑀫𑁆𑀧𑀺𑀢𑀸, 𑀪𑀼𑀚𑁂𑀲𑀼 𑀫𑀸𑀮𑀸 𑀅𑀧𑀺𑀴𑀦𑁆𑀥𑀦𑀸𑀦𑀺 𑀘;

𑀫𑀼𑀜𑁆𑀘𑀦𑁆𑀢𑀺 𑀖𑁄𑀲𑀁 𑀭𑀽𑀘𑀺𑀭𑀁 𑀲𑀼𑀘𑀺𑀁 𑀲𑀼𑀪𑀁, 𑀲𑀩𑁆𑀩𑁂𑀳𑀺 𑀯𑀺𑀜𑁆𑀜𑀽𑀳𑀺 𑀲𑀼𑀢𑀩𑁆𑀩𑀭𑀽𑀧𑀁.

𑁧𑁦𑁩𑁩. ‘‘𑀉𑀬𑁆𑀬𑀸𑀦𑀪𑀽𑀫𑁆𑀬𑀸 𑀘 𑀤𑀼𑀯𑀤𑁆𑀥𑀢𑁄 𑀞𑀺𑀢𑀸, 𑀭𑀣𑀸 𑀘 𑀦𑀸𑀕𑀸 𑀢𑀽𑀭𑀺𑀬𑀸𑀦𑀺 𑀘 𑀲𑀭𑁄;

𑀢𑀫𑁂𑀯 𑀤𑁂𑀯𑀺𑀦𑁆𑀤 𑀧𑀫𑁄𑀤𑀬𑀦𑁆𑀢𑀺, 𑀯𑀻𑀡𑀸 𑀬𑀣𑀸 𑀧𑁄𑀓𑁆𑀔𑀭𑀧𑀢𑁆𑀢𑀩𑀸𑀳𑀼𑀪𑀺.

𑁧𑁦𑁩𑁪. ‘‘𑀇𑀫𑀸𑀲𑀼 𑀯𑀻𑀡𑀸𑀲𑀼 𑀩𑀳𑀽𑀲𑀼 𑀯𑀕𑁆𑀕𑀽𑀲𑀼, 𑀫𑀦𑀼𑀜𑁆𑀜𑀭𑀽𑀧𑀸𑀲𑀼 𑀳𑀤𑀬𑁂𑀭𑀺𑀢𑀁 𑀧𑀻𑀢𑀺𑀁 [𑀳𑀤𑀬𑁂𑀭𑀺𑀢𑀁 𑀧𑀢𑀺 (𑀲𑀻.), 𑀳𑀤𑀬𑁂𑀭𑀺𑀢𑀫𑁆𑀧𑀺 𑀢𑀁 (𑀲𑁆𑀬𑀸.)];

𑀧𑀯𑀚𑁆𑀚𑀫𑀸𑀦𑀸𑀲𑀼 𑀅𑀢𑀻𑀯 𑀅𑀘𑁆𑀙𑀭𑀸, 𑀪𑀫𑀦𑁆𑀢𑀺 𑀓𑀜𑁆𑀜𑀸 𑀧𑀤𑀼𑀫𑁂𑀲𑀼 𑀲𑀺𑀓𑁆𑀔𑀺𑀢𑀸.

𑁧𑁦𑁩𑁫. ‘‘𑀬𑀤𑀸 𑀘 𑀕𑀻𑀢𑀸𑀦𑀺 𑀘 𑀯𑀸𑀤𑀺𑀢𑀸𑀦𑀺 𑀘, 𑀦𑀘𑁆𑀘𑀸𑀦𑀺 𑀘𑀺𑀫𑀸𑀦𑀺 [𑀘𑁂𑀫𑀸𑀦𑀺 (𑀲𑀻.)] 𑀲𑀫𑁂𑀦𑁆𑀢𑀺 𑀏𑀓𑀢𑁄;

𑀅𑀣𑁂𑀢𑁆𑀣 𑀦𑀘𑁆𑀘𑀦𑁆𑀢𑀺 𑀅𑀣𑁂𑀢𑁆𑀣 𑀅𑀘𑁆𑀙𑀭𑀸, 𑀑𑀪𑀸𑀲𑀬𑀦𑁆𑀢𑀻 𑀉𑀪𑀢𑁄 𑀯𑀭𑀺𑀢𑁆𑀣𑀺𑀬𑁄.

𑁧𑁦𑁩𑁬. ‘‘𑀲𑁄 𑀫𑁄𑀤𑀲𑀺 𑀢𑀼𑀭𑀺𑀬𑀕𑀡𑀧𑁆𑀧𑀩𑁄𑀥𑀦𑁄, 𑀫𑀳𑀻𑀬𑀫𑀸𑀦𑁄 𑀯𑀚𑀺𑀭𑀸𑀯𑀼𑀥𑁄𑀭𑀺𑀯;

𑀇𑀫𑀸𑀲𑀼 𑀯𑀻𑀡𑀸𑀲𑀼 𑀩𑀳𑀽𑀲𑀼 𑀯𑀕𑁆𑀕𑀽𑀲𑀼, 𑀫𑀦𑀼𑀜𑁆𑀜𑀭𑀽𑀧𑀸𑀲𑀼 𑀳𑀤𑀬𑁂𑀭𑀺𑀢𑀁 𑀧𑀻𑀢𑀺𑀁.

𑁧𑁦𑁩𑁭. ‘‘𑀓𑀺𑀁 𑀢𑁆𑀯𑀁 𑀧𑀼𑀭𑁂 𑀓𑀫𑁆𑀫𑀫𑀓𑀸𑀲𑀺 𑀅𑀢𑁆𑀢𑀦𑀸, 𑀫𑀦𑀼𑀲𑁆𑀲𑀪𑀽𑀢𑁄 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸;

𑀉𑀧𑁄𑀲𑀣𑀁 𑀓𑀁 𑀯𑀸 [𑀉𑀧𑁄𑀲𑀣𑀁 𑀓𑀺𑀁 𑀯 (𑀲𑁆𑀬𑀸.)] 𑀢𑀼𑀯𑀁 𑀉𑀧𑀸𑀯𑀲𑀺, 𑀓𑀁 [𑀓𑀺𑀁 (𑀲𑁆𑀬𑀸.)] 𑀥𑀫𑁆𑀫𑀘𑀭𑀺𑀬𑀁 𑀯𑀢𑀫𑀸𑀪𑀺𑀭𑁄𑀘𑀬𑀺.

𑁧𑁦𑁩𑁮. ‘‘𑀦𑀬𑀻𑀤𑀫𑀧𑁆𑀧𑀲𑁆𑀲 𑀓𑀢𑀲𑁆𑀲 [𑀦𑀬𑀺𑀤𑀁 𑀅𑀧𑁆𑀧𑀲𑁆𑀲 𑀓𑀢𑀲𑁆𑀲 (𑀲𑀻. 𑀲𑁆𑀬𑀸.), 𑀲𑀸𑀲𑁂𑀤𑀁 𑀅𑀧𑁆𑀧𑀓𑀢𑀲𑁆𑀲 (𑀓.)] 𑀓𑀫𑁆𑀫𑀼𑀦𑁄, 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀲𑁆𑀲 𑀉𑀧𑁄𑀲𑀣𑀲𑁆𑀲 𑀯𑀸;

𑀇𑀤𑁆𑀥𑀸𑀦𑀼𑀪𑀸𑀯𑁄 𑀯𑀺𑀧𑀼𑀮𑁄 𑀅𑀬𑀁 𑀢𑀯, 𑀬𑀁 𑀤𑁂𑀯𑀲𑀗𑁆𑀖𑀁 𑀅𑀪𑀺𑀭𑁄𑀘𑀲𑁂 𑀪𑀼𑀲𑀁.

𑁧𑁦𑁩𑁯. ‘‘𑀤𑀸𑀦𑀲𑁆𑀲 𑀢𑁂 𑀇𑀤𑀁 𑀨𑀮𑀁, 𑀅𑀣𑁄 𑀲𑀻𑀮𑀲𑁆𑀲 𑀯𑀸 𑀧𑀦;

𑀅𑀣𑁄 𑀅𑀜𑁆𑀚𑀮𑀺𑀓𑀫𑁆𑀫𑀲𑁆𑀲, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑁧𑁦𑁪𑁦. 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑁄;

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀦𑁆𑀢𑀺.

𑁧𑁦𑁪𑁧. ‘‘𑀚𑀺𑀢𑀺𑀦𑁆𑀤𑁆𑀭𑀺𑀬𑀁 𑀩𑀼𑀤𑁆𑀥𑀫𑀦𑁄𑀫𑀦𑀺𑀓𑁆𑀓𑀫𑀁, 𑀦𑀭𑀼𑀢𑁆𑀢𑀫𑀁 𑀓𑀲𑁆𑀲𑀧𑀫𑀕𑁆𑀕𑀧𑀼𑀕𑁆𑀕𑀮𑀁;

𑀅𑀯𑀸𑀧𑀼𑀭𑀦𑁆𑀢𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁, 𑀤𑁂𑀯𑀸𑀢𑀺𑀤𑁂𑀯𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁.

𑁧𑁦𑁪𑁨. ‘‘𑀢𑀫𑀤𑁆𑀤𑀲𑀁 𑀓𑀼𑀜𑁆𑀚𑀭𑀫𑁄𑀖𑀢𑀺𑀡𑁆𑀡𑀁, 𑀲𑀼𑀯𑀡𑁆𑀡𑀲𑀺𑀗𑁆𑀕𑀻𑀦𑀤𑀩𑀺𑀫𑁆𑀩𑀲𑀸𑀤𑀺𑀲𑀁;

𑀤𑀺𑀲𑁆𑀯𑀸𑀦 𑀢𑀁 𑀔𑀺𑀧𑁆𑀧𑀫𑀳𑀼𑀁 𑀲𑀼𑀘𑀻𑀫𑀦𑁄, 𑀢𑀫𑁂𑀯 𑀤𑀺𑀲𑁆𑀯𑀸𑀦 𑀲𑀼𑀪𑀸𑀲𑀺𑀢𑀤𑁆𑀥𑀚𑀁.

𑁧𑁦𑁪𑁩. ‘‘𑀢𑀫𑀦𑁆𑀦𑀧𑀸𑀦𑀁 𑀅𑀣𑀯𑀸𑀧𑀺 𑀘𑀻𑀯𑀭𑀁, 𑀲𑀼𑀘𑀺𑀁 𑀧𑀡𑀻𑀢𑀁 𑀭𑀲𑀲𑀸 𑀉𑀧𑁂𑀢𑀁;

𑀧𑀼𑀧𑁆𑀨𑀸𑀪𑀺𑀓𑁆𑀓𑀺𑀡𑀫𑁆𑀳𑀺 𑀲𑀓𑁂 𑀦𑀺𑀯𑁂𑀲𑀦𑁂, 𑀧𑀢𑀺𑀝𑁆𑀞𑀧𑁂𑀲𑀺𑀁 𑀲 𑀅𑀲𑀗𑁆𑀕𑀫𑀸𑀦𑀲𑁄.

𑁧𑁦𑁪𑁪. ‘‘𑀢𑀫𑀦𑁆𑀦𑀧𑀸𑀦𑁂𑀦 𑀘 𑀘𑀻𑀯𑀭𑁂𑀦 𑀘, 𑀔𑀚𑁆𑀚𑁂𑀦 𑀪𑁄𑀚𑁆𑀚𑁂𑀦 𑀘 𑀲𑀸𑀬𑀦𑁂𑀦 𑀘;

𑀲𑀦𑁆𑀢𑀧𑁆𑀧𑀬𑀺𑀢𑁆𑀯𑀸 𑀤𑁆𑀯𑀺𑀧𑀤𑀸𑀦𑀫𑀼𑀢𑁆𑀢𑀫𑀁, 𑀲𑁄 𑀲𑀕𑁆𑀕𑀲𑁄 𑀤𑁂𑀯𑀧𑀼𑀭𑁂 𑀭𑀫𑀸𑀫𑀳𑀁.

𑁧𑁦𑁪𑁫.

‘‘𑀏𑀢𑁂𑀦𑀼𑀧𑀸𑀬𑁂𑀦 𑀇𑀫𑀁 𑀦𑀺𑀭𑀕𑁆𑀕𑀴𑀁, 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀢𑀺𑀯𑀺𑀥𑀁 𑀯𑀺𑀲𑀼𑀤𑁆𑀥𑀁.

𑀧𑀳𑀸𑀬𑀳𑀁 𑀫𑀸𑀦𑀼𑀲𑀓𑀁 𑀲𑀫𑀼𑀲𑁆𑀲𑀬𑀁, 𑀇𑀦𑁆𑀤𑀽𑀧𑀫𑁄 [𑀇𑀦𑁆𑀤𑀲𑁆𑀲𑀫𑁄 (𑀲𑁆𑀬𑀸. 𑀓.)] 𑀤𑁂𑀯𑀧𑀼𑀭𑁂 𑀭𑀫𑀸𑀫𑀳𑀁.

𑁧𑁦𑁪𑁬. ‘‘𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘, 𑀧𑀡𑀻𑀢𑀭𑀽𑀧𑀁 𑀅𑀪𑀺𑀓𑀗𑁆𑀔𑀢𑀸 𑀫𑀼𑀦𑀺;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀩𑀳𑀼𑀁 𑀲𑀼𑀲𑀗𑁆𑀔𑀢𑀁, 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀫𑀲𑀗𑁆𑀕𑀫𑀸𑀦𑀲𑁂.

𑁧𑁦𑁪𑁭. [𑀓𑀣𑀸. 𑁭𑁯𑁯]‘‘𑀦𑀬𑀺𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀁 [𑀦𑀬𑀺𑀫𑀲𑁆𑀫𑀺𑀁 𑀯𑀸 𑀮𑁄𑀓𑁂 𑀧𑀭𑀲𑁆𑀫𑀺𑀁 (𑀓𑀣𑀸𑀯𑀢𑁆𑀣𑀼 𑁭𑁯𑁯), 𑀦𑀬𑀺𑀫𑀲𑁆𑀫𑀺 𑀮𑁄𑀓𑁂 𑀯 𑀧𑀭𑀲𑁆𑀫𑀺 (?)] 𑀯𑀸 𑀧𑀦, 𑀩𑀼𑀤𑁆𑀥𑁂𑀦 𑀲𑁂𑀝𑁆𑀞𑁄 𑀯 𑀲𑀫𑁄 𑀯 𑀯𑀺𑀚𑁆𑀚𑀢𑀺;

𑀆𑀳𑀼𑀦𑁂𑀬𑁆𑀬𑀸𑀦𑀁 [𑀬𑀫𑀸𑀳𑀼𑀦𑁂𑀬𑁆𑀬𑀸𑀦𑀁 (𑀓.)] 𑀧𑀭𑀫𑀸𑀳𑀼𑀢𑀺𑀁 𑀕𑀢𑁄, 𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀯𑀺𑀧𑀼𑀮𑀧𑁆𑀨𑀮𑁂𑀲𑀺𑀦’’𑀦𑁆𑀢𑀺.

𑀫𑀳𑀸𑀭𑀣𑀯𑀺𑀫𑀸𑀦𑀁 𑀘𑀼𑀤𑁆𑀤𑀲𑀫𑀁.

𑀫𑀳𑀸𑀭𑀣𑀯𑀕𑁆𑀕𑁄 𑀧𑀜𑁆𑀘𑀫𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀡𑁆𑀟𑀽𑀓𑁄 𑀭𑁂𑀯𑀢𑀻 𑀙𑀢𑁆𑀢𑁄, 𑀓𑀓𑁆𑀓𑀝𑁄 𑀤𑁆𑀯𑀸𑀭𑀧𑀸𑀮𑀓𑁄;

𑀤𑁆𑀯𑁂 𑀓𑀭𑀡𑀻𑀬𑀸 𑀤𑁆𑀯𑁂 𑀲𑀽𑀘𑀺, 𑀢𑀬𑁄 𑀦𑀸𑀕𑀸 𑀘 𑀤𑁆𑀯𑁂 𑀭𑀣𑀸;

𑀧𑀼𑀭𑀺𑀲𑀸𑀦𑀁 𑀧𑀞𑀫𑁄 𑀯𑀕𑁆𑀕𑁄 𑀧𑀯𑀼𑀘𑁆𑀘𑀢𑀻𑀢𑀺.

𑀪𑀸𑀡𑀯𑀸𑀭𑀁 𑀢𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.