𑁨. 𑀧𑀼𑀭𑀺𑀲𑀯𑀺𑀫𑀸𑀦𑀁

𑁫. 𑀫𑀳𑀸𑀭𑀣𑀯𑀕𑁆𑀕𑁄

𑁧. 𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀯𑀺𑀫𑀸𑀦𑀯𑀢𑁆𑀣𑀼

𑁮𑁫𑁭. ‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺.

𑁮𑁫𑁮. ‘‘𑀫𑀡𑁆𑀟𑀽𑀓𑁄𑀳𑀁 𑀧𑀼𑀭𑁂 𑀆𑀲𑀺𑀁, 𑀉𑀤𑀓𑁂 𑀯𑀸𑀭𑀺𑀕𑁄𑀘𑀭𑁄;

𑀢𑀯 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲, 𑀅𑀯𑀥𑀻 𑀯𑀘𑁆𑀙𑀧𑀸𑀮𑀓𑁄.

𑁮𑁫𑁯. ‘‘𑀫𑀼𑀳𑀼𑀢𑁆𑀢𑀁 𑀘𑀺𑀢𑁆𑀢𑀧𑀲𑀸𑀤𑀲𑁆𑀲, 𑀇𑀤𑁆𑀥𑀺𑀁 𑀧𑀲𑁆𑀲 𑀬𑀲𑀜𑁆𑀘 𑀫𑁂;

𑀆𑀦𑀼𑀪𑀸𑀯𑀜𑁆𑀘 𑀫𑁂 𑀧𑀲𑁆𑀲, 𑀯𑀡𑁆𑀡𑀁 𑀧𑀲𑁆𑀲 𑀚𑀼𑀢𑀺𑀜𑁆𑀘 𑀫𑁂.

𑁮𑁬𑁦. ‘‘𑀬𑁂 𑀘 𑀢𑁂 𑀤𑀻𑀖𑀫𑀤𑁆𑀥𑀸𑀦𑀁, 𑀥𑀫𑁆𑀫𑀁 𑀅𑀲𑁆𑀲𑁄𑀲𑀼𑀁 𑀕𑁄𑀢𑀫;

𑀧𑀢𑁆𑀢𑀸 𑀢𑁂 𑀅𑀘𑀮𑀝𑁆𑀞𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺.

𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀯𑀺𑀫𑀸𑀦𑀁 𑀧𑀞𑀫𑀁.

𑁨. 𑀭𑁂𑀯𑀢𑀻𑀯𑀺𑀫𑀸𑀦𑀯𑀢𑁆𑀣𑀼

𑁮𑁬𑁧. [𑀥. 𑀧. 𑁨𑁧𑁯 𑀥𑀫𑁆𑀫𑀧𑀤𑁂] ‘‘𑀘𑀺𑀭𑀧𑁆𑀧𑀯𑀸𑀲𑀺𑀁 𑀧𑀼𑀭𑀺𑀲𑀁, 𑀤𑀽𑀭𑀢𑁄 𑀲𑁄𑀢𑁆𑀣𑀺𑀫𑀸𑀕𑀢𑀁;

𑀜𑀸𑀢𑀺𑀫𑀺𑀢𑁆𑀢𑀸 𑀲𑀼𑀳𑀚𑁆𑀚𑀸 𑀘, 𑀅𑀪𑀺𑀦𑀦𑁆𑀤𑀦𑁆𑀢𑀺 𑀆𑀕𑀢𑀁;

𑁮𑁬𑁨. [𑀥. 𑀧. 𑁨𑁨𑁦 𑀥𑀫𑁆𑀫𑀧𑀤𑁂] ‘‘𑀢𑀣𑁂𑀯 𑀓𑀢𑀧𑀼𑀜𑁆𑀜𑀫𑁆𑀧𑀺, 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀕𑀢𑀁;

𑀧𑀼𑀜𑁆𑀜𑀸𑀦𑀺 𑀧𑀝𑀺𑀕𑀡𑁆𑀳𑀦𑁆𑀢𑀺, 𑀧𑀺𑀬𑀁 𑀜𑀸𑀢𑀻𑀯 𑀆𑀕𑀢𑀁.

𑁮𑁬𑁩. [𑀧𑁂. 𑀯. 𑁭𑁧𑁪]‘‘𑀉𑀝𑁆𑀞𑁂𑀳𑀺 𑀭𑁂𑀯𑀢𑁂 𑀲𑀼𑀧𑀸𑀧𑀥𑀫𑁆𑀫𑁂, 𑀅𑀧𑀸𑀭𑀼𑀢𑀤𑁆𑀯𑀸𑀭𑁂 [𑀅𑀧𑀸𑀭𑀼𑀪𑀁 𑀤𑁆𑀯𑀸𑀭𑀁 (𑀲𑀻. 𑀲𑁆𑀬𑀸.), 𑀅𑀧𑀸𑀭𑀼𑀢𑀤𑁆𑀯𑀸𑀭𑀁 (𑀧𑀻. 𑀓.)] 𑀅𑀤𑀸𑀦𑀲𑀻𑀮𑁂;

𑀦𑁂𑀲𑁆𑀲𑀸𑀫 𑀢𑀁 𑀬𑀢𑁆𑀣 𑀣𑀼𑀦𑀦𑁆𑀢𑀺 𑀤𑀼𑀕𑁆𑀕𑀢𑀸, 𑀲𑀫𑀧𑁆𑀧𑀺𑀢𑀸 𑀦𑁂𑀭𑀬𑀺𑀓𑀸 𑀤𑀼𑀓𑁆𑀔𑁂𑀦𑀸’’𑀢𑀺.

𑁮𑁬𑁪. 𑀇𑀘𑁆𑀘𑁂𑀯 [𑀇𑀘𑁆𑀘𑁂𑀯𑀁 (𑀲𑁆𑀬𑀸. 𑀓.)] 𑀯𑀢𑁆𑀯𑀸𑀦 𑀬𑀫𑀲𑁆𑀲 𑀤𑀽𑀢𑀸, 𑀢𑁂 𑀤𑁆𑀯𑁂 𑀬𑀓𑁆𑀔𑀸 𑀮𑁄𑀳𑀺𑀢𑀓𑁆𑀔𑀸 𑀩𑁆𑀭𑀳𑀦𑁆𑀢𑀸;

𑀧𑀘𑁆𑀘𑁂𑀓𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀭𑁂𑀯𑀢𑀁, 𑀧𑀓𑁆𑀓𑀸𑀫𑀬𑀼𑀁 𑀤𑁂𑀯𑀕𑀡𑀲𑁆𑀲 𑀲𑀦𑁆𑀢𑀺𑀓𑁂.

𑁮𑁬𑁫. ‘‘𑀆𑀤𑀺𑀘𑁆𑀘𑀯𑀡𑁆𑀡𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀩𑁆𑀬𑀫𑁆𑀳𑀁 𑀲𑀼𑀪𑀁 𑀓𑀜𑁆𑀘𑀦𑀚𑀸𑀮𑀙𑀦𑁆𑀦𑀁;

𑀓𑀲𑁆𑀲𑁂𑀢𑀫𑀸𑀓𑀺𑀡𑁆𑀡𑀚𑀦𑀁 𑀯𑀺𑀫𑀸𑀦𑀁, 𑀲𑀽𑀭𑀺𑀬𑀲𑁆𑀲 𑀭𑀁𑀲𑀻𑀭𑀺𑀯 𑀚𑁄𑀢𑀫𑀸𑀦𑀁.

𑁮𑁬𑁬. ‘‘𑀦𑀸𑀭𑀻𑀕𑀡𑀸 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀸 [𑀘𑀦𑁆𑀤𑀦𑀲𑀸𑀭𑀸𑀦𑀼𑀮𑀺𑀢𑁆𑀢𑀸 (𑀲𑁆𑀬𑀸.)], 𑀉𑀪𑀢𑁄 𑀯𑀺𑀫𑀸𑀦𑀁 𑀉𑀧𑀲𑁄𑀪𑀬𑀦𑁆𑀢𑀺;

𑀢𑀁 𑀤𑀺𑀲𑁆𑀲𑀢𑀺 𑀲𑀽𑀭𑀺𑀬𑀲𑀫𑀸𑀦𑀯𑀡𑁆𑀡𑀁, 𑀓𑁄 𑀫𑁄𑀤𑀢𑀺 𑀲𑀕𑁆𑀕𑀧𑀢𑁆𑀢𑁄 𑀯𑀺𑀫𑀸𑀦𑁂’’𑀢𑀺.

𑁮𑁬𑁭. ‘‘𑀩𑀸𑀭𑀸𑀡𑀲𑀺𑀬𑀁 𑀦𑀦𑁆𑀤𑀺𑀬𑁄 𑀦𑀸𑀫𑀸𑀲𑀺, 𑀉𑀧𑀸𑀲𑀓𑁄 𑀅𑀫𑀘𑁆𑀙𑀭𑀻 𑀤𑀸𑀦𑀧𑀢𑀺 𑀯𑀤𑀜𑁆𑀜𑀽;

𑀢𑀲𑁆𑀲𑁂𑀢𑀫𑀸𑀓𑀺𑀡𑁆𑀡𑀚𑀦𑀁 𑀯𑀺𑀫𑀸𑀦𑀁, 𑀲𑀽𑀭𑀺𑀬𑀲𑁆𑀲 𑀭𑀁𑀲𑀻𑀭𑀺𑀯 𑀚𑁄𑀢𑀫𑀸𑀦𑀁.

𑁮𑁬𑁮. ‘‘𑀦𑀸𑀭𑀻𑀕𑀡𑀸 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀸, 𑀉𑀪𑀢𑁄 𑀯𑀺𑀫𑀸𑀦𑀁 𑀉𑀧𑀲𑁄𑀪𑀬𑀦𑁆𑀢𑀺;

𑀢𑀁 𑀤𑀺𑀲𑁆𑀲𑀢𑀺 𑀲𑀽𑀭𑀺𑀬𑀲𑀫𑀸𑀦𑀯𑀡𑁆𑀡𑀁, 𑀲𑁄 𑀫𑁄𑀤𑀢𑀺 𑀲𑀕𑁆𑀕𑀧𑀢𑁆𑀢𑁄 𑀯𑀺𑀫𑀸𑀦𑁂’’𑀢𑀺.

𑁮𑁬𑁯. ‘‘𑀦𑀦𑁆𑀤𑀺𑀬𑀲𑁆𑀲𑀸𑀳𑀁 𑀪𑀭𑀺𑀬𑀸, 𑀅𑀕𑀸𑀭𑀺𑀦𑀻 𑀲𑀩𑁆𑀩𑀓𑀼𑀮𑀲𑁆𑀲 𑀇𑀲𑁆𑀲𑀭𑀸;

𑀪𑀢𑁆𑀢𑀼 𑀯𑀺𑀫𑀸𑀦𑁂 𑀭𑀫𑀺𑀲𑁆𑀲𑀸𑀫𑀺 𑀤𑀸𑀦𑀳𑀁, 𑀦 𑀧𑀢𑁆𑀣𑀬𑁂 𑀦𑀺𑀭𑀬𑀁 𑀤𑀲𑁆𑀲𑀦𑀸𑀬𑀸’’𑀢𑀺.

𑁮𑁭𑁦. ‘‘𑀏𑀲𑁄 𑀢𑁂 𑀦𑀺𑀭𑀬𑁄 𑀲𑀼𑀧𑀸𑀧𑀥𑀫𑁆𑀫𑁂, 𑀧𑀼𑀜𑁆𑀜𑀁 𑀢𑀬𑀸 𑀅𑀓𑀢𑀁 𑀚𑀻𑀯𑀮𑁄𑀓𑁂;

𑀦 𑀳𑀺 𑀫𑀘𑁆𑀙𑀭𑀻 𑀭𑁄𑀲𑀓𑁄 𑀧𑀸𑀧𑀥𑀫𑁆𑀫𑁄, 𑀲𑀕𑁆𑀕𑀽𑀧𑀕𑀸𑀦𑀁 𑀮𑀪𑀢𑀺 𑀲𑀳𑀩𑁆𑀬𑀢’’𑀦𑁆𑀢𑀺.

𑁮𑁭𑁧. ‘‘𑀓𑀺𑀁 𑀦𑀼 𑀕𑀽𑀣𑀜𑁆𑀘 𑀫𑀼𑀢𑁆𑀢𑀜𑁆𑀘, 𑀅𑀲𑀼𑀘𑀻 𑀧𑀝𑀺𑀤𑀺𑀲𑁆𑀲𑀢𑀺;

𑀤𑀼𑀕𑁆𑀕𑀦𑁆𑀥𑀁 𑀓𑀺𑀫𑀺𑀤𑀁 𑀫𑀻𑀴𑁆𑀳𑀁, 𑀓𑀺𑀫𑁂𑀢𑀁 𑀉𑀧𑀯𑀸𑀬𑀢𑀻’’𑀢𑀺.

𑁮𑁭𑁨. ‘‘𑀏𑀲 𑀲𑀁𑀲𑀯𑀓𑁄 𑀦𑀸𑀫, 𑀕𑀫𑁆𑀪𑀻𑀭𑁄 𑀲𑀢𑀧𑁄𑀭𑀺𑀲𑁄;

𑀬𑀢𑁆𑀣 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀼𑀯𑀁 𑀧𑀘𑁆𑀘𑀲𑀺 𑀭𑁂𑀯𑀢𑁂’’𑀢𑀺.

𑁮𑁭𑁩. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑁂𑀦 𑀲𑀁𑀲𑀯𑀓𑁄 𑀮𑀤𑁆𑀥𑁄, 𑀕𑀫𑁆𑀪𑀻𑀭𑁄 𑀲𑀢𑀧𑁄𑀭𑀺𑀲𑁄’’𑀢𑀺.

𑁮𑁭𑁪. ‘‘𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀘𑀸𑀧𑀺, 𑀅𑀜𑁆𑀜𑁂 𑀯𑀸𑀧𑀺 𑀯𑀦𑀺𑀩𑁆𑀩𑀓𑁂 [𑀯𑀡𑀺𑀩𑁆𑀩𑀓𑁂 (𑀲𑁆𑀬𑀸. 𑀓.)];

𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑁂𑀲𑀺, 𑀢𑀁 𑀧𑀸𑀧𑀁 𑀧𑀓𑀢𑀁 𑀢𑀬𑀸.

𑁮𑁭𑁫. ‘‘𑀢𑁂𑀦 𑀲𑀁𑀲𑀯𑀓𑁄 𑀮𑀤𑁆𑀥𑁄, 𑀕𑀫𑁆𑀪𑀻𑀭𑁄 𑀲𑀢𑀧𑁄𑀭𑀺𑀲𑁄;

𑀢𑀢𑁆𑀣 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀼𑀯𑀁 𑀧𑀘𑁆𑀘𑀲𑀺 𑀭𑁂𑀯𑀢𑁂.

𑁮𑁭𑁬. ‘‘𑀳𑀢𑁆𑀣𑁂𑀧𑀺 𑀙𑀺𑀦𑁆𑀤𑀦𑁆𑀢𑀺 𑀅𑀣𑁄𑀧𑀺 𑀧𑀸𑀤𑁂, 𑀓𑀡𑁆𑀡𑁂𑀧𑀺 𑀙𑀺𑀦𑁆𑀤𑀦𑁆𑀢𑀺 𑀅𑀣𑁄𑀧𑀺 𑀦𑀸𑀲𑀁;

𑀅𑀣𑁄𑀧𑀺 𑀓𑀸𑀓𑁄𑀴𑀕𑀡𑀸 𑀲𑀫𑁂𑀘𑁆𑀘, 𑀲𑀗𑁆𑀕𑀫𑁆𑀫 𑀔𑀸𑀤𑀦𑁆𑀢𑀺 𑀯𑀺𑀨𑀦𑁆𑀤𑀫𑀸𑀦’’𑀦𑁆𑀢𑀺.

𑁮𑁭𑁭. ‘‘𑀲𑀸𑀥𑀼 𑀔𑁄 𑀫𑀁 𑀧𑀝𑀺𑀦𑁂𑀣, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀁;

𑀤𑀸𑀦𑁂𑀦 𑀲𑀫𑀘𑀭𑀺𑀬𑀸𑀬, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀬𑀁 𑀓𑀢𑁆𑀯𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀺, 𑀦 𑀘 𑀧𑀘𑁆𑀙𑀸𑀦𑀼𑀢𑀧𑁆𑀧𑀭𑁂’’𑀢𑀺.

𑁮𑁭𑁮. ‘‘𑀧𑀼𑀭𑁂 𑀢𑀼𑀯𑀁 𑀧𑀫𑀚𑁆𑀚𑀺𑀢𑁆𑀯𑀸, 𑀇𑀤𑀸𑀦𑀺 𑀧𑀭𑀺𑀤𑁂𑀯𑀲𑀺;

𑀲𑀬𑀁 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁, 𑀯𑀺𑀧𑀸𑀓𑀁 𑀅𑀦𑀼𑀪𑁄𑀲𑁆𑀲𑀲𑀻’’𑀢𑀺.

𑁮𑁭𑁯. ‘‘𑀓𑁄 𑀤𑁂𑀯𑀮𑁄𑀓𑀢𑁄 𑀫𑀦𑀼𑀲𑁆𑀲𑀮𑁄𑀓𑀁, 𑀕𑀦𑁆𑀢𑁆𑀯𑀸𑀦 𑀧𑀼𑀝𑁆𑀞𑁄 𑀫𑁂 𑀏𑀯𑀁 𑀯𑀤𑁂𑀬𑁆𑀬;

‘𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁂𑀲𑀼 𑀤𑀤𑀸𑀣 𑀤𑀸𑀦𑀁, 𑀅𑀘𑁆𑀙𑀸𑀤𑀦𑀁 𑀲𑁂𑀬𑁆𑀬 [𑀲𑀬𑀦 (𑀲𑀻.)] 𑀫𑀣𑀦𑁆𑀦𑀧𑀸𑀦𑀁;

𑀦𑀳𑀺 𑀫𑀘𑁆𑀙𑀭𑀻 𑀭𑁄𑀲𑀓𑁄 𑀧𑀸𑀧𑀥𑀫𑁆𑀫𑁄, 𑀲𑀕𑁆𑀕𑀽𑀧𑀕𑀸𑀦𑀁 𑀮𑀪𑀢𑀺 𑀲𑀳𑀩𑁆𑀬𑀢𑀁’.

𑁮𑁮𑁦. ‘‘𑀲𑀸𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀁;

𑀤𑀸𑀦𑁂𑀦 𑀲𑀫𑀘𑀭𑀺𑀬𑀸𑀬, 𑀲𑀁𑀬𑀫𑁂𑀦 𑀤𑀫𑁂𑀦 𑀘.

𑁮𑁮𑁧. ‘‘𑀆𑀭𑀸𑀫𑀸𑀦𑀺 𑀘 𑀭𑁄𑀧𑀺𑀲𑁆𑀲𑀁, 𑀤𑀼𑀕𑁆𑀕𑁂 𑀲𑀗𑁆𑀓𑀫𑀦𑀸𑀦𑀺 𑀘;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁮𑁮𑁨. ‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁮𑁮𑁩. ‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀦 𑀘 𑀤𑀸𑀦𑁂 𑀧𑀫𑀚𑁆𑀚𑀺𑀲𑁆𑀲𑀁, 𑀲𑀸𑀫𑀁 𑀤𑀺𑀝𑁆𑀞𑀫𑀺𑀤𑀁 𑀫𑀬𑀸’’𑀢𑀺;

𑁮𑁮𑁪. 𑀇𑀘𑁆𑀘𑁂𑀯𑀁 𑀯𑀺𑀧𑁆𑀧𑀮𑀧𑀦𑁆𑀢𑀺𑀁, 𑀨𑀦𑁆𑀤𑀫𑀸𑀦𑀁 𑀢𑀢𑁄 𑀢𑀢𑁄;

𑀔𑀺𑀧𑀺𑀁𑀲𑀼 𑀦𑀺𑀭𑀬𑁂 𑀖𑁄𑀭𑁂, 𑀉𑀤𑁆𑀥𑀧𑀸𑀤𑀁 𑀅𑀯𑀁𑀲𑀺𑀭𑀁.

𑁮𑁮𑁫. ‘‘𑀅𑀳𑀁 𑀧𑀼𑀭𑁂 𑀫𑀘𑁆𑀙𑀭𑀺𑀦𑀻 𑀅𑀳𑁄𑀲𑀺𑀁, 𑀧𑀭𑀺𑀪𑀸𑀲𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀯𑀺𑀢𑀣𑁂𑀦 𑀘 𑀲𑀸𑀫𑀺𑀓𑀁 𑀯𑀜𑁆𑀘𑀬𑀺𑀢𑁆𑀯𑀸, 𑀧𑀘𑁆𑀘𑀸𑀫𑀳𑀁 𑀦𑀺𑀭𑀬𑁂 𑀖𑁄𑀭𑀭𑀽𑀧𑁂’’𑀢𑀺.

𑀭𑁂𑀯𑀢𑀻𑀯𑀺𑀫𑀸𑀦𑀁 𑀤𑀼𑀢𑀺𑀬𑀁.

𑁩. 𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑀯𑀢𑁆𑀣𑀼

𑁮𑁮𑁬. ‘‘𑀬𑁂 𑀯𑀤𑀢𑀁 𑀧𑀯𑀭𑁄 𑀫𑀦𑀼𑀚𑁂𑀲𑀼, 𑀲𑀓𑁆𑀬𑀫𑀼𑀦𑀻 𑀪𑀕𑀯𑀸 𑀓𑀢𑀓𑀺𑀘𑁆𑀘𑁄;

𑀧𑀸𑀭𑀕𑀢𑁄 𑀩𑀮𑀯𑀻𑀭𑀺𑀬𑀲𑀫𑀗𑁆𑀕𑀻 [𑀩𑀮𑀯𑀻𑀭𑀲𑀫𑀗𑁆𑀕𑀻 (𑀓.)], 𑀢𑀁 𑀲𑀼𑀕𑀢𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀺.

𑁮𑁮𑁭. ‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓𑀁, 𑀥𑀫𑁆𑀫𑀫𑀲𑀗𑁆𑀔𑀢𑀫𑀧𑁆𑀧𑀝𑀺𑀓𑀽𑀮𑀁;

𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁, 𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀺.

𑁮𑁮𑁮. ‘‘𑀬𑀢𑁆𑀣 𑀘 𑀤𑀺𑀦𑁆𑀦 𑀫𑀳𑀧𑁆𑀨𑀮𑀫𑀸𑀳𑀼, 𑀘𑀢𑀽𑀲𑀼 𑀲𑀼𑀘𑀻𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀼;

𑀅𑀝𑁆𑀞 𑀘 𑀧𑀼𑀕𑁆𑀕𑀮𑀥𑀫𑁆𑀫𑀤𑀲𑀸 𑀢𑁂, 𑀲𑀗𑁆𑀖𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀺.

𑁮𑁮𑁯. ‘‘𑀦 𑀢𑀣𑀸 𑀢𑀧𑀢𑀺 𑀦𑀪𑁂 𑀲𑀽𑀭𑀺𑀬𑁄, 𑀘𑀦𑁆𑀤𑁄 𑀘 𑀦 𑀪𑀸𑀲𑀢𑀺 𑀦 𑀨𑀼𑀲𑁆𑀲𑁄;

𑀬𑀣𑀸 𑀅𑀢𑀼𑀮𑀫𑀺𑀤𑀁 𑀫𑀳𑀧𑁆𑀧𑀪𑀸𑀲𑀁, 𑀓𑁄 𑀦𑀼 𑀢𑁆𑀯𑀁 𑀢𑀺𑀤𑀺𑀯𑀸 𑀫𑀳𑀺𑀁 𑀉𑀧𑀸𑀕𑀸.

𑁮𑁯𑁦. ‘‘𑀙𑀺𑀦𑁆𑀤𑀢𑀺 𑀭𑀁𑀲𑀻 𑀧𑀪𑀗𑁆𑀓𑀭𑀲𑁆𑀲, 𑀲𑀸𑀥𑀺𑀓𑀯𑀻𑀲𑀢𑀺𑀬𑁄𑀚𑀦𑀸𑀦𑀺 𑀆𑀪𑀸;

𑀭𑀢𑁆𑀢𑀺𑀫𑀧𑀺 𑀬𑀣𑀸 𑀤𑀺𑀯𑀁 𑀓𑀭𑁄𑀢𑀺, 𑀧𑀭𑀺𑀲𑀼𑀤𑁆𑀥𑀁 𑀯𑀺𑀫𑀮𑀁 𑀲𑀼𑀪𑀁 𑀯𑀺𑀫𑀸𑀦𑀁.

𑁮𑁯𑁧. ‘‘𑀩𑀳𑀼𑀧𑀤𑀼𑀫𑀯𑀺𑀘𑀺𑀢𑁆𑀭𑀧𑀼𑀡𑁆𑀟𑀭𑀻𑀓𑀁, 𑀯𑁄𑀓𑀺𑀡𑁆𑀡𑀁 𑀓𑀼𑀲𑀼𑀫𑁂𑀳𑀺 𑀦𑁂𑀓𑀘𑀺𑀢𑁆𑀢𑀁;

𑀅𑀭𑀚𑀯𑀺𑀭𑀚𑀳𑁂𑀫𑀚𑀸𑀮𑀙𑀦𑁆𑀦𑀁, 𑀆𑀓𑀸𑀲𑁂 𑀢𑀧𑀢𑀺 𑀬𑀣𑀸𑀧𑀺 𑀲𑀽𑀭𑀺𑀬𑁄.

𑁮𑁯𑁨. ‘‘𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀲𑀲𑀸𑀳𑀺, 𑀅𑀕𑀭𑀼𑀧𑀺𑀬𑀗𑁆𑀕𑀼𑀘𑀦𑁆𑀤𑀦𑀼𑀲𑁆𑀲𑀤𑀸𑀳𑀺;

𑀓𑀜𑁆𑀘𑀦𑀢𑀦𑀼𑀲𑀦𑁆𑀦𑀺𑀪𑀢𑁆𑀢𑀘𑀸𑀳𑀺, 𑀧𑀭𑀺𑀧𑀽𑀭𑀁 𑀕𑀕𑀦𑀁𑀯 𑀢𑀸𑀭𑀓𑀸𑀳𑀺.

𑁮𑁯𑁩. ‘‘𑀦𑀭𑀦𑀸𑀭𑀺𑀬𑁄 [𑀦𑀭𑀦𑀸𑀭𑀻 (𑀓.), 𑀦𑀸𑀭𑀺𑀬𑁄 (?)] 𑀩𑀳𑀼𑀓𑁂𑀢𑁆𑀣𑀦𑁂𑀓𑀯𑀡𑁆𑀡𑀸, 𑀓𑀼𑀲𑀼𑀫𑀯𑀺𑀪𑀽𑀲𑀺𑀢𑀸𑀪𑀭𑀡𑁂𑀢𑁆𑀣 𑀲𑀼𑀫𑀦𑀸;

𑀅𑀦𑀺𑀮𑀧𑀫𑀼𑀜𑁆𑀘𑀺𑀢𑀸 𑀧𑀯𑀦𑁆𑀢𑀺 [𑀧𑀯𑀸𑀬𑀦𑁆𑀢𑀺 (𑀓.)] 𑀲𑀼𑀭𑀪𑀺𑀁, 𑀢𑀧𑀦𑀺𑀬𑀯𑀺𑀢𑀢𑀸 𑀲𑀼𑀯𑀡𑁆𑀡𑀙𑀦𑁆𑀦𑀸 [𑀲𑀼𑀯𑀡𑁆𑀡𑀘𑁆𑀙𑀸𑀤𑀦𑀸 (𑀲𑀻.)].

𑁮𑁯𑁪. ‘‘𑀓𑀺𑀲𑁆𑀲 𑀲𑀁𑀬𑀫𑀲𑁆𑀲 [𑀲𑀫𑀤𑀫𑀲𑁆𑀲 (𑀲𑀻.)] 𑀅𑀬𑀁 𑀯𑀺𑀧𑀸𑀓𑁄, 𑀓𑁂𑀦𑀸𑀲𑀺 𑀓𑀫𑁆𑀫𑀨𑀮𑁂𑀦𑀺𑀥𑀽𑀧𑀧𑀦𑁆𑀦𑁄;

𑀬𑀣𑀸 𑀘 𑀢𑁂 𑀅𑀥𑀺𑀕𑀢𑀫𑀺𑀤𑀁 𑀯𑀺𑀫𑀸𑀦𑀁, 𑀢𑀤𑀦𑀼𑀧𑀤𑀁 𑀅𑀯𑀘𑀸𑀲𑀺 𑀇𑀗𑁆𑀖 𑀧𑀼𑀝𑁆𑀞𑁄’’𑀢𑀺.

𑁮𑁯𑁫. ‘‘𑀲𑀬𑀫𑀺𑀥 [𑀬𑀫𑀺𑀥 (𑀲𑀻. 𑀲𑁆𑀬𑀸. 𑀧𑀻.)] 𑀧𑀣𑁂 𑀲𑀫𑁂𑀘𑁆𑀘 𑀫𑀸𑀡𑀯𑁂𑀦, 𑀲𑀢𑁆𑀣𑀸𑀦𑀼𑀲𑀸𑀲𑀺 𑀅𑀦𑀼𑀓𑀫𑁆𑀧𑀫𑀸𑀦𑁄;

𑀢𑀯 𑀭𑀢𑀦𑀯𑀭𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘 𑀩𑁆𑀭𑀯𑀺𑀢𑁆𑀣 𑀙𑀢𑁆𑀢𑁄.

𑁮𑁯𑁬. ‘‘𑀚𑀺𑀦𑀯𑀭𑀧𑀯𑀭𑀁 [𑀚𑀺𑀦𑀧𑀯𑀭𑀁 (𑀲𑁆𑀬𑀸. 𑀓.)] 𑀉𑀧𑁂𑀳𑀺 [𑀉𑀧𑁂𑀫𑀺 (𑀩𑀳𑀽𑀲𑀼)] 𑀲𑀭𑀡𑀁, 𑀥𑀫𑁆𑀫𑀜𑁆𑀘𑀸𑀧𑀺 𑀢𑀣𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 [𑀅𑀯𑁄𑀘𑀸𑀳𑀁 (𑀲𑀻. 𑀲𑁆𑀬𑀸. 𑀓.)] 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁮𑁯𑁭. ‘‘𑀫𑀸 𑀘 𑀧𑀸𑀡𑀯𑀥𑀁 𑀯𑀺𑀯𑀺𑀥𑀁 𑀘𑀭𑀲𑁆𑀲𑀼 𑀅𑀲𑀼𑀘𑀺𑀁,

𑀦 𑀳𑀺 𑀧𑀸𑀡𑁂𑀲𑀼 𑀅𑀲𑀜𑁆𑀜𑀢𑀁 𑀅𑀯𑀡𑁆𑀡𑀬𑀺𑀁𑀲𑀼 𑀲𑀧𑁆𑀧𑀜𑁆𑀜𑀸;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂,

𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁮𑁯𑁮. ‘‘𑀫𑀸 𑀘 𑀧𑀭𑀚𑀦𑀲𑁆𑀲 𑀭𑀓𑁆𑀔𑀺𑀢𑀫𑁆𑀧𑀺, 𑀆𑀤𑀸𑀢𑀩𑁆𑀩𑀫𑀫𑀜𑁆𑀜𑀺𑀣𑁄 [𑀫𑀫𑀜𑁆𑀜𑀺𑀢𑁆𑀣 (𑀲𑀻. 𑀧𑀻.)] 𑀅𑀤𑀺𑀦𑁆𑀦𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁮𑁯𑁯. ‘‘𑀫𑀸 𑀘 𑀧𑀭𑀚𑀦𑀲𑁆𑀲 𑀭𑀓𑁆𑀔𑀺𑀢𑀸𑀬𑁄, 𑀧𑀭𑀪𑀭𑀺𑀬𑀸 𑀅𑀕𑀫𑀸 𑀅𑀦𑀭𑀺𑀬𑀫𑁂𑀢𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁;

𑁯𑁦𑁦. ‘‘𑀫𑀸 𑀘 𑀯𑀺𑀢𑀣𑀁 𑀅𑀜𑁆𑀜𑀣𑀸 𑀅𑀪𑀸𑀡𑀺,

𑀦 𑀳𑀺 𑀫𑀼𑀲𑀸𑀯𑀸𑀤𑀁 𑀅𑀯𑀡𑁆𑀡𑀬𑀺𑀁𑀲𑀼 𑀲𑀧𑁆𑀧𑀜𑁆𑀜𑀸;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁯𑁦𑁧. ‘‘𑀬𑁂𑀦 𑀘 𑀧𑀼𑀭𑀺𑀲𑀲𑁆𑀲 𑀅𑀧𑁂𑀢𑀺 𑀲𑀜𑁆𑀜𑀸, 𑀢𑀁 𑀫𑀚𑁆𑀚𑀁 𑀧𑀭𑀺𑀯𑀚𑁆𑀚𑀬𑀲𑁆𑀲𑀼 𑀲𑀩𑁆𑀩𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁯𑁦𑁨. ‘‘𑀲𑁆𑀯𑀸𑀳𑀁 𑀇𑀥 𑀧𑀜𑁆𑀘 𑀲𑀺𑀓𑁆𑀔𑀸 𑀓𑀭𑀺𑀢𑁆𑀯𑀸, 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂;

𑀤𑁆𑀯𑁂𑀧𑀣𑀫𑀕𑀫𑀸𑀲𑀺𑀁 𑀘𑁄𑀭𑀫𑀚𑁆𑀛𑁂, 𑀢𑁂 𑀫𑀁 𑀢𑀢𑁆𑀣 𑀯𑀥𑀺𑀁𑀲𑀼 𑀪𑁄𑀕𑀳𑁂𑀢𑀼.

𑁯𑁦𑁩. ‘‘𑀏𑀢𑁆𑀢𑀓𑀫𑀺𑀤𑀁 𑀅𑀦𑀼𑀲𑁆𑀲𑀭𑀸𑀫𑀺 𑀓𑀼𑀲𑀮𑀁, 𑀢𑀢𑁄 𑀧𑀭𑀁 𑀦 𑀫𑁂 𑀯𑀺𑀚𑁆𑀚𑀢𑀺 𑀅𑀜𑁆𑀜𑀁;

𑀢𑁂𑀦 𑀲𑀼𑀘𑀭𑀺𑀢𑁂𑀦 𑀓𑀫𑁆𑀫𑀼𑀦𑀸𑀳𑀁 [𑀓𑀫𑁆𑀫𑀦𑀸𑀳𑀁 (𑀲𑀻.)], 𑀉𑀧𑁆𑀧𑀦𑁆𑀦𑁄 [𑀉𑀧𑀧𑀦𑁆𑀦𑁄 (𑀩𑀳𑀽𑀲𑀼)] 𑀢𑀺𑀤𑀺𑀯𑁂𑀲𑀼 𑀓𑀸𑀫𑀓𑀸𑀫𑀻.

𑁯𑁦𑁪. ‘‘𑀧𑀲𑁆𑀲 𑀔𑀡𑀫𑀼𑀳𑀼𑀢𑁆𑀢𑀲𑀜𑁆𑀜𑀫𑀲𑁆𑀲, 𑀅𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀧𑀸𑀓𑀁;

𑀚𑀮𑀫𑀺𑀯 𑀬𑀲𑀲𑀸 𑀲𑀫𑁂𑀓𑁆𑀔𑀫𑀸𑀦𑀸, 𑀩𑀳𑀼𑀓𑀸 𑀫𑀁 𑀧𑀺𑀳𑀬𑀦𑁆𑀢𑀺 𑀳𑀻𑀦𑀓𑀫𑁆𑀫𑀸.

𑁯𑁦𑁫. ‘‘𑀧𑀲𑁆𑀲 𑀓𑀢𑀺𑀧𑀬𑀸𑀬 𑀤𑁂𑀲𑀦𑀸𑀬, 𑀲𑀼𑀕𑀢𑀺𑀜𑁆𑀘𑀫𑁆𑀳𑀺 𑀕𑀢𑁄 𑀲𑀼𑀔𑀜𑁆𑀘 𑀧𑀢𑁆𑀢𑁄;

𑀬𑁂 𑀘 𑀢𑁂 𑀲𑀢𑀢𑀁 𑀲𑀼𑀡𑀦𑁆𑀢𑀺 𑀥𑀫𑁆𑀫𑀁, 𑀫𑀜𑁆𑀜𑁂 𑀢𑁂 𑀅𑀫𑀢𑀁 𑀨𑀼𑀲𑀦𑁆𑀢𑀺 𑀔𑁂𑀫𑀁.

𑁯𑁦𑁬. ‘‘𑀅𑀧𑁆𑀧𑀫𑁆𑀧𑀺 𑀓𑀢𑀁 𑀫𑀳𑀸𑀯𑀺𑀧𑀸𑀓𑀁, 𑀯𑀺𑀧𑀼𑀮𑀁 𑀳𑁄𑀢𑀺 [𑀯𑀺𑀧𑀼𑀮𑀨𑀮𑀁 (𑀓.)] 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂;

𑀧𑀲𑁆𑀲 𑀓𑀢𑀧𑀼𑀜𑁆𑀜𑀢𑀸𑀬 𑀙𑀢𑁆𑀢𑁄, 𑀑𑀪𑀸𑀲𑁂𑀢𑀺 𑀧𑀣𑀯𑀺𑀁 𑀬𑀣𑀸𑀧𑀺 𑀲𑀽𑀭𑀺𑀬𑁄.

𑁯𑁦𑁭. ‘‘𑀓𑀺𑀫𑀺𑀤𑀁 𑀓𑀼𑀲𑀮𑀁 𑀓𑀺𑀫𑀸𑀘𑀭𑁂𑀫, 𑀇𑀘𑁆𑀘𑁂𑀓𑁂 𑀳𑀺 𑀲𑀫𑁂𑀘𑁆𑀘 𑀫𑀦𑁆𑀢𑀬𑀦𑁆𑀢𑀺;

𑀢𑁂 𑀫𑀬𑀁 𑀧𑀼𑀦𑀭𑁂𑀯 [𑀧𑀼𑀦𑀧𑀺 (?)] 𑀮𑀤𑁆𑀥 𑀫𑀸𑀦𑀼𑀲𑀢𑁆𑀢𑀁, 𑀧𑀝𑀺𑀧𑀦𑁆𑀦𑀸 𑀯𑀺𑀳𑀭𑁂𑀫𑀼 𑀲𑀻𑀮𑀯𑀦𑁆𑀢𑁄.

𑁯𑁦𑁮. ‘‘𑀩𑀳𑀼𑀓𑀸𑀭𑁄 𑀅𑀦𑀼𑀓𑀫𑁆𑀧𑀓𑁄 𑀘 𑀲𑀢𑁆𑀣𑀸, 𑀇𑀢𑀺 𑀫𑁂 𑀲𑀢𑀺 𑀅𑀕𑀫𑀸 𑀤𑀺𑀯𑀸 𑀤𑀺𑀯𑀲𑁆𑀲;

𑀲𑁆𑀯𑀸𑀳𑀁 𑀉𑀧𑀕𑀢𑁄𑀫𑁆𑀳𑀺 𑀲𑀘𑁆𑀘𑀦𑀸𑀫𑀁, 𑀅𑀦𑀼𑀓𑀫𑁆𑀧𑀲𑁆𑀲𑀼 𑀧𑀼𑀦𑀧𑀺 𑀲𑀼𑀡𑁂𑀫𑀼 [𑀲𑀼𑀡𑁄𑀫 (𑀲𑀻.), 𑀲𑀼𑀡𑁄𑀫𑀺 (𑀲𑁆𑀬𑀸.)] 𑀥𑀫𑁆𑀫𑀁.

𑁯𑁦𑁯. ‘‘𑀬𑁂 𑀘𑀺𑀥 [𑀬𑁂𑀥 (𑀲𑀻. 𑀲𑁆𑀬𑀸. 𑀧𑀻.), 𑀬𑁂 𑀇𑀥 (𑀓.)] 𑀧𑀚𑀳𑀦𑁆𑀢𑀺 𑀓𑀸𑀫𑀭𑀸𑀕𑀁, 𑀪𑀯𑀭𑀸𑀕𑀸𑀦𑀼𑀲𑀬𑀜𑁆𑀘 𑀧𑀳𑀸𑀬 𑀫𑁄𑀳𑀁;

𑀦 𑀘 𑀢𑁂 𑀧𑀼𑀦𑀫𑀼𑀧𑁂𑀦𑁆𑀢𑀺 𑀕𑀩𑁆𑀪𑀲𑁂𑀬𑁆𑀬𑀁, 𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑀸 𑀳𑀺 𑀲𑀻𑀢𑀺𑀪𑀽𑀢𑀸’’𑀢𑀺.

𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑀁 𑀢𑀢𑀺𑀬𑀁.

𑁪. 𑀓𑀓𑁆𑀓𑀝𑀓𑀭𑀲𑀤𑀸𑀬𑀓𑀯𑀺𑀫𑀸𑀦𑀯𑀢𑁆𑀣𑀼

𑁯𑁧𑁦. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁, 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺;

𑀓𑀽𑀝𑀸𑀕𑀸𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀯𑁂𑀴𑀼𑀭𑀺𑀬𑀣𑀫𑁆𑀪𑀸 𑀭𑀼𑀘𑀓𑀢𑁆𑀣𑀢𑀸 [𑀭𑀼𑀘𑀺𑀭𑀢𑁆𑀣𑀢𑀸 (𑀲𑁆𑀬𑀸. 𑀓.) 𑁬𑁪𑁬 𑀕𑀸𑀣𑀸𑀬𑀁 ‘‘𑀭𑀼𑀘𑀓𑀼𑀧𑀓𑀺𑀡𑁆𑀡𑀁’’𑀢𑀺 𑀧𑀤𑀲𑁆𑀲 𑀲𑀁𑀯𑀡𑁆𑀡𑀦𑀸 𑀧𑀲𑁆𑀲𑀺𑀢𑀩𑁆𑀩𑀸] 𑀲𑀼𑀪𑀸.

𑁯𑁧𑁧. ‘‘𑀢𑀢𑁆𑀣𑀘𑁆𑀙𑀲𑀺 𑀧𑀺𑀯𑀲𑀺 𑀔𑀸𑀤𑀲𑀺 𑀘, 𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁 [𑀯𑀕𑁆𑀕𑀼 (𑀲𑀻. 𑀓.), 𑀯𑀕𑁆𑀕𑀽 (𑀲𑁆𑀬𑀸.)];

𑀤𑀺𑀩𑁆𑀩𑀸 𑀭𑀲𑀸 𑀓𑀸𑀫𑀕𑀼𑀡𑁂𑀢𑁆𑀣 𑀧𑀜𑁆𑀘, 𑀦𑀸𑀭𑀺𑀬𑁄 𑀘 𑀦𑀘𑁆𑀘𑀦𑁆𑀢𑀺 𑀲𑀼𑀯𑀡𑁆𑀡𑀙𑀦𑁆𑀦𑀸.

𑁯𑁧𑁨. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁯𑁧𑁩. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑁄 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑁄, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁯𑁧𑁪. 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑁄;

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁯𑁧𑁫. ‘‘𑀲𑀢𑀺𑀲𑀫𑀼𑀧𑁆𑀧𑀸𑀤𑀓𑀭𑁄, 𑀤𑁆𑀯𑀸𑀭𑁂 𑀓𑀓𑁆𑀓𑀝𑀓𑁄 𑀞𑀺𑀢𑁄;

𑀦𑀺𑀝𑁆𑀞𑀺𑀢𑁄 𑀚𑀸𑀢𑀭𑀽𑀧𑀲𑁆𑀲, 𑀲𑁄𑀪𑀢𑀺 𑀤𑀲𑀧𑀸𑀤𑀓𑁄.

𑁯𑁧𑁬. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁯𑁧𑁭. ‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑁄 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑁄, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀓𑀓𑁆𑀓𑀝𑀓𑀭𑀲𑀤𑀸𑀬𑀓𑀯𑀺𑀫𑀸𑀦𑀁 𑀘𑀢𑀼𑀢𑁆𑀣𑀁.

(𑀅𑀦𑀦𑁆𑀢𑀭𑀁 𑀧𑀜𑁆𑀘𑀯𑀺𑀫𑀸𑀦𑀁 𑀬𑀣𑀸 𑀓𑀓𑁆𑀓𑀝𑀓𑀭𑀲𑀤𑀸𑀬𑀓𑀯𑀺𑀫𑀸𑀦𑀁 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁)

𑁫. 𑀤𑁆𑀯𑀸𑀭𑀧𑀸𑀮𑀯𑀺𑀫𑀸𑀦𑀯𑀢𑁆𑀣𑀼

𑁯𑁧𑁮. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁, 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺;

𑀓𑀽𑀝𑀸𑀕𑀸𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀯𑁂𑀴𑀼𑀭𑀺𑀬𑀣𑀫𑁆𑀪𑀸 𑀭𑀼𑀘𑀓𑀢𑁆𑀣𑀢𑀸 𑀲𑀼𑀪𑀸.

𑁯𑁧𑁯. ‘‘𑀢𑀢𑁆𑀣𑀘𑁆𑀙𑀲𑀺 𑀧𑀺𑀯𑀲𑀺 𑀔𑀸𑀤𑀲𑀺 𑀘, 𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁;

𑀤𑀺𑀩𑁆𑀩𑀸 𑀭𑀲𑀸 𑀓𑀸𑀫𑀕𑀼𑀡𑁂𑀢𑁆𑀣 𑀧𑀜𑁆𑀘, 𑀦𑀸𑀭𑀺𑀬𑁄 𑀘 𑀦𑀘𑁆𑀘𑀦𑁆𑀢𑀺 𑀲𑀼𑀯𑀡𑁆𑀡𑀙𑀦𑁆𑀦𑀸.

𑁯𑁨𑁦. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁯𑁨𑁨. 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑁄;

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁯𑁨𑁩. ‘‘𑀤𑀺𑀩𑁆𑀩𑀁 𑀫𑀫𑀁 𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀼, 𑀯𑀸𑀘𑀸𑀪𑀺𑀕𑀻𑀢𑀁 𑀫𑀦𑀲𑀸 𑀧𑀯𑀢𑁆𑀢𑀺𑀢𑀁;

𑀏𑀢𑁆𑀢𑀸𑀯𑀢𑀸 𑀞𑀲𑁆𑀲𑀢𑀺 𑀧𑀼𑀜𑁆𑀜𑀓𑀫𑁆𑀫𑁄, 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄.

𑁯𑁨𑁪. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.