𑁯. 𑀅𑀫𑁆𑀩𑀧𑀸𑀮𑀺𑀣𑁂𑀭𑀻𑀅𑀧𑀤𑀸𑀦𑀁

𑁨𑁦𑁪. ‘‘𑀬𑁄 𑀭𑀁𑀲𑀺𑀨𑀼𑀲𑀺𑀢𑀸𑀯𑁂𑀴𑁄, 𑀨𑀼𑀲𑁆𑀲𑁄 𑀦𑀸𑀫 𑀫𑀳𑀸𑀫𑀼𑀦𑀺;

𑀢𑀲𑁆𑀲𑀸𑀳𑀁 𑀪𑀕𑀺𑀦𑀻 𑀆𑀲𑀺𑀁, 𑀅𑀚𑀸𑀬𑀺𑀁 𑀔𑀢𑁆𑀢𑀺𑀬𑁂 𑀓𑀼𑀮𑁂.

𑁨𑁦𑁫. ‘‘𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀳𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀧𑀢𑁆𑀣𑀬𑀺𑀁 𑀭𑀽𑀧𑀲𑀫𑁆𑀧𑀤𑀁.

𑁨𑁦𑁬. ‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀲𑀺𑀔𑀻 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀉𑀧𑁆𑀧𑀦𑁆𑀦𑁄 𑀮𑁄𑀓𑀧𑀚𑁆𑀚𑁄𑀢𑁄, 𑀢𑀺𑀮𑁄𑀓𑀲𑀭𑀡𑁄 𑀚𑀺𑀦𑁄.

𑁨𑁦𑁭. ‘‘𑀢𑀤𑀸𑀭𑀼𑀡𑀧𑀼𑀭𑁂 𑀭𑀫𑁆𑀫𑁂, 𑀩𑁆𑀭𑀸𑀳𑁆𑀫𑀜𑁆𑀜𑀓𑀼𑀮𑀲𑀫𑁆𑀪𑀯𑀸;

𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀓𑀼𑀧𑀺𑀢𑀸, 𑀪𑀺𑀓𑁆𑀔𑀼𑀦𑀺𑀁 𑀅𑀪𑀺𑀲𑀸𑀧𑀬𑀺𑀁.

𑁨𑁦𑁮. ‘‘𑀯𑁂𑀲𑀺𑀓𑀸𑀯 𑀅𑀦𑀸𑀘𑀸𑀭𑀸, 𑀚𑀺𑀦𑀲𑀸𑀲𑀦𑀤𑀽𑀲𑀺𑀓𑀸;

𑀏𑀯𑀁 𑀅𑀓𑁆𑀓𑁄𑀲𑀬𑀺𑀢𑁆𑀯𑀸𑀦, 𑀢𑁂𑀦 𑀧𑀸𑀧𑁂𑀦 𑀓𑀫𑁆𑀫𑀼𑀦𑀸.

𑁨𑁦𑁯. ‘‘𑀤𑀸𑀭𑀼𑀡𑀁 𑀦𑀺𑀭𑀬𑀁 𑀕𑀦𑁆𑀢𑁆𑀯𑀸, 𑀫𑀳𑀸𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸;

𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑁂𑀲𑀼, 𑀉𑀧𑀧𑀦𑁆𑀦𑀸 𑀢𑀧𑀲𑁆𑀲𑀺𑀦𑀻.

𑁨𑁧𑁦. ‘‘𑀤𑀲𑀚𑀸𑀢𑀺𑀲𑀳𑀲𑁆𑀲𑀸𑀦𑀺, 𑀕𑀡𑀺𑀓𑀢𑁆𑀢𑀫𑀓𑀸𑀭𑀬𑀺𑀁;

𑀢𑀫𑁆𑀳𑀸 𑀧𑀸𑀧𑀸 𑀦 𑀫𑀼𑀘𑁆𑀘𑀺𑀲𑁆𑀲𑀁, 𑀪𑀼𑀢𑁆𑀯𑀸 𑀤𑀼𑀝𑁆𑀞𑀯𑀺𑀲𑀁 𑀬𑀣𑀸.

𑁨𑁧𑁧. ‘‘𑀩𑁆𑀭𑀳𑁆𑀫𑀘𑀭𑀺𑀬𑀫𑀲𑁂𑀯𑀺𑀲𑁆𑀲𑀁 [𑀩𑁆𑀭𑀳𑁆𑀫𑀯𑁂𑀲𑀫𑀲𑁂𑀯𑀺𑀲𑁆𑀲𑀁 (𑀲𑁆𑀬𑀸.), 𑀩𑁆𑀭𑀳𑁆𑀫𑀘𑁂𑀭𑀫𑀲𑁂𑀯𑀺𑀲𑁆𑀲𑀁 (𑀧𑀻.)], 𑀓𑀲𑁆𑀲𑀧𑁂 𑀚𑀺𑀦𑀲𑀸𑀲𑀦𑁂;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀅𑀚𑀸𑀬𑀺𑀁 𑀢𑀺𑀤𑀲𑁂 𑀧𑀼𑀭𑁂.

𑁨𑁧𑁨. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀅𑀳𑁄𑀲𑀺𑀁 𑀑𑀧𑀧𑀸𑀢𑀺𑀓𑀸;

𑀅𑀫𑁆𑀩𑀲𑀸𑀔𑀦𑁆𑀢𑀭𑁂 𑀚𑀸𑀢𑀸, 𑀅𑀫𑁆𑀩𑀧𑀸𑀮𑀻𑀢𑀺 𑀢𑁂𑀦𑀳𑀁.

𑁨𑁧𑁩. ‘‘𑀧𑀭𑀺𑀯𑀼𑀢𑀸 𑀧𑀸𑀡𑀓𑁄𑀝𑀻𑀳𑀺, 𑀧𑀩𑁆𑀩𑀚𑀺𑀁 𑀚𑀺𑀦𑀲𑀸𑀲𑀦𑁂;

𑀧𑀢𑁆𑀢𑀸𑀳𑀁 𑀅𑀘𑀮𑀁 𑀞𑀸𑀦𑀁, 𑀥𑀻𑀢𑀸 𑀩𑀼𑀤𑁆𑀥𑀲𑁆𑀲 𑀑𑀭𑀲𑀸.

𑁨𑁧𑁪. ‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

𑁨𑁧𑁫. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁨𑁧𑁬. ‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑁂 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀯𑀸𑀳𑀲𑀸.

𑁨𑁧𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁨𑁧𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁧𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀅𑀫𑁆𑀩𑀧𑀸𑀮𑀺 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀫𑁆𑀩𑀧𑀸𑀮𑀺𑀣𑁂𑀭𑀺𑀬𑀸𑀧𑀤𑀸𑀦𑀁 𑀦𑀯𑀫𑀁.