𑁧𑁦. 𑀧𑁂𑀲𑀮𑀸𑀣𑁂𑀭𑀻𑀅𑀧𑀤𑀸𑀦𑀁

𑁨𑁨𑁦. ‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

𑁨𑁨𑁧. ‘‘𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂 𑀯𑀭𑁂, 𑀉𑀧𑀸𑀲𑀓𑀓𑀼𑀮𑁂 𑀅𑀳𑀁;

𑀧𑀲𑀽𑀢𑀸 𑀢𑀁 [𑀦𑀁 (𑀲𑁆𑀬𑀸.)] 𑀚𑀺𑀦𑀯𑀭𑀁, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀤𑁂𑀲𑀦𑀁.

𑁨𑁨𑁨. ‘‘𑀢𑀁 𑀯𑀻𑀭𑀁 𑀲𑀭𑀡𑀁 𑀕𑀦𑁆𑀢𑁆𑀯𑀸, 𑀲𑀻𑀮𑀸𑀦𑀺 𑀘 𑀲𑀫𑀸𑀤𑀺𑀬𑀺𑀁;

𑀓𑀤𑀸𑀘𑀺 𑀲𑁄 𑀫𑀳𑀸𑀯𑀻𑀭𑁄, 𑀫𑀳𑀸𑀚𑀦𑀲𑀫𑀸𑀕𑀫𑁂.

𑁨𑁨𑁩. ‘‘𑀅𑀢𑁆𑀢𑀦𑁄 𑀅𑀪𑀺𑀲𑀫𑁆𑀩𑁄𑀥𑀺𑀁, 𑀧𑀓𑀸𑀲𑁂𑀲𑀺 𑀦𑀭𑀸𑀲𑀪𑁄;

𑀅𑀦𑀦𑀼𑀲𑁆𑀲𑀼𑀢𑀥𑀫𑁆𑀫𑁂𑀲𑀼, 𑀧𑀼𑀩𑁆𑀩𑁂 𑀤𑀼𑀓𑁆𑀔𑀸𑀤𑀺𑀓𑁂𑀲𑀼 𑀘.

𑁨𑁨𑁪. ‘‘𑀘𑀓𑁆𑀔𑀼 𑀜𑀸𑀡𑀜𑁆𑀘 𑀧𑀜𑁆𑀜𑀸 𑀘, 𑀯𑀺𑀚𑁆𑀚𑀸𑀮𑁄𑀓𑁄 𑀘 𑀆𑀲𑀺 𑀫𑁂;

𑀢𑀁 𑀲𑀼𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸𑀦, 𑀧𑀭𑀺𑀧𑀼𑀘𑁆𑀙𑀺𑀜𑁆𑀘 𑀪𑀺𑀓𑁆𑀔𑀯𑁄.

𑁨𑁨𑁫. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁨𑁨𑁬. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑀸 𑀲𑁂𑀝𑁆𑀞𑀺𑀫𑀳𑀸𑀓𑀼𑀮𑁂;

𑀉𑀧𑁂𑀘𑁆𑀘 𑀩𑀼𑀤𑁆𑀥𑀁 𑀲𑀤𑁆𑀥𑀫𑁆𑀫𑀁, 𑀲𑀼𑀢𑁆𑀯𑀸 𑀲𑀘𑁆𑀘𑀽𑀧𑀲𑀁𑀳𑀺𑀢𑀁.

𑁨𑁨𑁭. ‘‘𑀧𑀩𑁆𑀩𑀚𑀺𑀢𑁆𑀯𑀸𑀘𑀺𑀭𑁂𑀦𑁂𑀯, 𑀲𑀘𑁆𑀘𑀢𑁆𑀣𑀸𑀦𑀺 [𑀲𑀩𑁆𑀩𑀢𑁆𑀣𑀸𑀦𑀺 (𑀲𑁆𑀬𑀸. 𑀓.)] 𑀯𑀺𑀘𑀺𑀦𑁆𑀢𑀬𑀁;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁨𑁨𑁮. ‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

𑁨𑁨𑁯. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁨𑁩𑁦. ‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑁂 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀯𑀸𑀳𑀲𑀸.

𑁨𑁩𑁧. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑀻𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁨𑁩𑁨. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁩𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀧𑁂𑀲𑀮𑀸 [𑀲𑁂𑀮𑀸 (𑀲𑁆𑀬𑀸. 𑀧𑀻.)] 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑁂𑀲𑀮𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀤𑀲𑀫𑀁.

𑀔𑀢𑁆𑀢𑀺𑀬𑀸𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.