𑁪. 𑀔𑀢𑁆𑀢𑀺𑀬𑀸𑀯𑀕𑁆𑀕𑁄

𑁧. 𑀬𑀲𑀯𑀢𑀻𑀧𑀫𑀼𑀔𑀅𑀝𑁆𑀞𑀸𑀭𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀅𑀧𑀤𑀸𑀦𑀁

𑁧. ‘‘𑀪𑀯𑀸 𑀲𑀩𑁆𑀩𑁂 𑀧𑀭𑀺𑀓𑁆𑀔𑀻𑀡𑀸, 𑀪𑀯𑀸 𑀲𑀦𑁆𑀢𑀺 𑀯𑀺𑀫𑁄𑀘𑀺𑀢𑀸;

𑀲𑀩𑁆𑀩𑀸𑀲𑀯𑀸 𑀘 𑀦𑁄 𑀦𑀢𑁆𑀣𑀺, 𑀆𑀭𑁄𑀘𑁂𑀫 𑀫𑀳𑀸𑀫𑀼𑀦𑁂.

𑁨. ‘‘𑀧𑀼𑀭𑀺𑀫𑀁 𑀓𑀼𑀲𑀮𑀁 𑀓𑀫𑁆𑀫𑀁 [𑀧𑀭𑀺𑀓𑀫𑁆𑀫𑀜𑁆𑀘 𑀓𑀼𑀲𑀮𑀁 (𑀲𑁆𑀬𑀸.)], 𑀬𑀁 𑀓𑀺𑀜𑁆𑀘𑀺 𑀲𑀸𑀥𑀼𑀧𑀢𑁆𑀣𑀺𑀢𑀁;

𑀧𑀭𑀺𑀪𑁄𑀕𑀫𑀬𑀁 𑀤𑀺𑀦𑁆𑀦𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁩. ‘‘𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀲𑀸𑀯𑀓𑀸𑀦𑀜𑁆𑀘 𑀧𑀢𑁆𑀣𑀺𑀢𑀁 [𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀜𑁆𑀘 (𑀲𑀻. 𑀓.)];

𑀧𑀭𑀺𑀪𑁄𑀕𑀫𑀬𑀁 𑀤𑀺𑀦𑁆𑀦𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁪. ‘‘𑀉𑀘𑁆𑀘𑀦𑀻𑀘𑀫𑀬𑀁 𑀓𑀫𑁆𑀫𑀁, 𑀪𑀺𑀓𑁆𑀔𑀽𑀦𑀁 𑀲𑀸𑀥𑀼𑀧𑀢𑁆𑀣𑀺𑀢𑀁;

𑀉𑀘𑁆𑀘𑀸𑀓𑀼𑀮𑀧𑀭𑀺𑀓𑀫𑁆𑀫𑀁, 𑀓𑀢𑀫𑁂𑀢𑀁 𑀫𑀳𑀸𑀫𑀼𑀦𑁂 [𑀓𑀢𑀫𑁆𑀳𑁂𑀳𑀺 𑀫𑀳𑀸𑀫𑀼𑀦𑁂 (𑀲𑁆𑀬𑀸. 𑀧𑀻.)].

𑁫. ‘‘𑀢𑁂𑀦𑁂𑀯 𑀲𑀼𑀓𑁆𑀓𑀫𑀽𑀮𑁂𑀦, 𑀘𑁄𑀤𑀺𑀢𑀸 𑀓𑀫𑁆𑀫𑀲𑀫𑁆𑀧𑀤𑀸;

𑀫𑀸𑀦𑀼𑀲𑀺𑀓𑀫𑀢𑀺𑀓𑁆𑀓𑀦𑁆𑀢𑀸, 𑀚𑀸𑀬𑀺𑀁𑀲𑀼 𑀔𑀢𑁆𑀢𑀺𑀬𑁂 𑀓𑀼𑀮𑁂.

𑁬. ‘‘𑀉𑀧𑁆𑀧𑀢𑁆𑀢𑁂 𑀘 𑀓𑀢𑁂 𑀓𑀫𑁆𑀫𑁂, 𑀚𑀸𑀢𑀺𑀬𑀸 𑀯𑀸𑀧𑀺 𑀏𑀓𑀢𑁄;

𑀧𑀘𑁆𑀙𑀺𑀫𑁂 𑀏𑀓𑀢𑁄 𑀚𑀸𑀢𑀸, 𑀔𑀢𑁆𑀢𑀺𑀬𑀸 𑀓𑀼𑀮𑀲𑀫𑁆𑀪𑀯𑀸.

𑁭. ‘‘𑀭𑀽𑀧𑀯𑀢𑀻 𑀪𑁄𑀕𑀯𑀢𑀻, 𑀮𑀸𑀪𑀲𑀓𑁆𑀓𑀸𑀭𑀧𑀽𑀚𑀺𑀢𑀸;

𑀅𑀦𑁆𑀢𑁂𑀧𑀼𑀭𑁂 𑀫𑀳𑀸𑀯𑀻𑀭, 𑀤𑁂𑀯𑀸𑀦𑀁 𑀯𑀺𑀬 𑀦𑀦𑁆𑀤𑀦𑁂.

𑁮. ‘‘𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀅𑀕𑀸𑀭𑀫𑁆𑀳𑀸, 𑀧𑀩𑁆𑀩𑀚𑀺𑀫𑁆𑀳𑀦𑀕𑀸𑀭𑀺𑀬𑀁;

𑀓𑀢𑀺𑀧𑀸𑀳𑀁 𑀉𑀧𑀸𑀤𑀸𑀬, 𑀲𑀩𑁆𑀩𑀸 𑀧𑀢𑁆𑀢𑀸𑀫𑁆𑀳 𑀦𑀺𑀩𑁆𑀩𑀼𑀢𑀺𑀁.

𑁯. ‘‘𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀉𑀧𑀦𑁂𑀦𑁆𑀢𑀺 𑀩𑀳𑀽 𑀅𑀫𑁆𑀳𑁂, 𑀲𑀤𑀸 𑀲𑀓𑁆𑀓𑀢𑀧𑀽𑀚𑀺𑀢𑀸.

𑁧𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀅𑀫𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑀻𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫 𑀅𑀦𑀸𑀲𑀯𑀸.

𑁧𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀦𑁄 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀬𑀲𑀯𑀢𑀻𑀧𑀫𑀼𑀔𑀸𑀦𑀺 𑀔𑀢𑁆𑀢𑀺𑀬𑀓𑀜𑁆𑀜𑀸𑀪𑀺𑀓𑁆𑀔𑀼𑀦𑀺𑀬𑁄 𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀬𑀲𑀯𑀢𑀻𑀧𑀫𑀼𑀔𑀅𑀝𑁆𑀞𑀸𑀭𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀘𑀢𑀼𑀭𑀸𑀲𑀻𑀢𑀺𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀅𑀧𑀤𑀸𑀦𑀁

𑁧𑁩. ‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀩𑁆𑀭𑀸𑀳𑁆𑀫𑀜𑁆𑀜𑀓𑀼𑀮𑀲𑀫𑁆𑀪𑀯𑀸 [𑀩𑁆𑀭𑀸𑀳𑁆𑀫𑀡𑀓𑀼𑀮𑀲𑀫𑁆𑀪𑀯𑀸 (𑀲𑁆𑀬𑀸. 𑀓.)];

𑀲𑀼𑀔𑀼𑀫𑀸𑀮𑀳𑀢𑁆𑀣𑀧𑀸𑀤𑀸, 𑀧𑀼𑀭𑁂 𑀢𑀼𑀬𑁆𑀳𑀁 𑀫𑀳𑀸𑀫𑀼𑀦𑁂.

𑁧𑁪. ‘‘𑀯𑁂𑀲𑁆𑀲𑀲𑀼𑀤𑁆𑀤𑀓𑀼𑀮𑁂 𑀚𑀸𑀢𑀸, 𑀤𑁂𑀯𑀸 𑀦𑀸𑀕𑀸 𑀘 𑀓𑀺𑀦𑁆𑀦𑀭𑀸;

𑀘𑀸𑀢𑀼𑀤𑁆𑀤𑀻𑀧𑀸 𑀩𑀳𑀽 𑀓𑀜𑁆𑀜𑀸, 𑀧𑀼𑀭𑁂 𑀢𑀼𑀬𑁆𑀳𑀁 𑀫𑀳𑀸𑀫𑀼𑀦𑁂.

𑁧𑁫. ‘‘𑀓𑀸𑀘𑀺 𑀧𑀩𑁆𑀩𑀚𑀺𑀢𑀸 𑀅𑀢𑁆𑀣𑀺, 𑀲𑀩𑁆𑀩𑀤𑀲𑁆𑀲𑀸𑀯𑀺𑀦𑁄 [𑀲𑀘𑁆𑀘𑀤𑀲𑁆𑀲𑀸𑀯𑀺𑀦𑁄 (𑀲𑀻. 𑀧𑀻.)] 𑀳𑀽;

𑀤𑁂𑀯𑀸 𑀘 𑀓𑀺𑀦𑁆𑀦𑀭𑀸 𑀦𑀸𑀕𑀸, 𑀨𑀼𑀲𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑁂.

𑁧𑁬. ‘‘𑀅𑀦𑀼𑀪𑁄𑀢𑁆𑀯𑀸 𑀬𑀲𑀁 𑀲𑀩𑁆𑀩𑀁, 𑀧𑀢𑁆𑀯𑀸𑀦 𑀲𑀩𑁆𑀩𑀲𑀫𑁆𑀧𑀤𑀸;

𑀢𑀼𑀫𑁆𑀳𑀁 [𑀢𑁆𑀯𑀬𑀺 (𑀲𑀻. 𑀧𑀻.)] 𑀧𑀲𑀸𑀤𑀁 𑀧𑀝𑀺𑀮𑀤𑁆𑀥𑀸, 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑁂.

𑁧𑁭. ‘‘𑀅𑀫𑁆𑀳𑁂 𑀩𑁆𑀭𑀸𑀳𑁆𑀫𑀡𑀥𑀻𑀢𑀸 𑀢𑀼, 𑀩𑁆𑀭𑀸𑀳𑁆𑀫𑀜𑁆𑀜𑀓𑀼𑀮𑀲𑀫𑁆𑀪𑀯𑀸;

𑀧𑁂𑀓𑁆𑀔𑀢𑁄 𑀦𑁄 [𑀮𑀓𑁆𑀔𑀡𑀸 𑀘 (𑀲𑁆𑀬𑀸.)] 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀸𑀫 𑀘𑀓𑁆𑀔𑀼𑀫.

𑁧𑁮. ‘‘𑀉𑀧𑀳𑀢𑀸 𑀪𑀯𑀸 𑀲𑀩𑁆𑀩𑁂, 𑀫𑀽𑀮𑀢𑀡𑁆𑀳𑀸 𑀲𑀫𑀽𑀳𑀢𑀸;

𑀲𑀫𑀼𑀘𑁆𑀙𑀺𑀦𑁆𑀦𑀸 𑀅𑀦𑀼𑀲𑀬𑀸, 𑀧𑀼𑀜𑁆𑀜𑀲𑀗𑁆𑀔𑀸𑀭𑀤𑀸𑀮𑀺𑀢𑀸.

𑁧𑁯. ‘‘𑀲𑀫𑀸𑀥𑀺𑀕𑁄𑀘𑀭𑀸 𑀲𑀩𑁆𑀩𑀸, 𑀲𑀫𑀸𑀧𑀢𑁆𑀢𑀺𑀯𑀲𑀻 𑀓𑀢𑀸;

𑀛𑀸𑀦𑁂𑀦 𑀥𑀫𑁆𑀫𑀭𑀢𑀺𑀬𑀸, 𑀯𑀺𑀳𑀭𑀺𑀲𑁆𑀲𑀸𑀫 𑀦𑁄 𑀲𑀤𑀸.

𑁨𑁦. ‘‘𑀪𑀯𑀦𑁂𑀢𑁆𑀢𑀺 𑀅𑀯𑀺𑀚𑁆𑀚𑀸 𑀘, 𑀲𑀗𑁆𑀔𑀸𑀭𑀸𑀧𑀺 𑀘 𑀔𑁂𑀧𑀺𑀢𑀸;

𑀲𑀼𑀤𑀼𑀤𑁆𑀤𑀲𑀁 𑀧𑀤𑀁 𑀕𑀦𑁆𑀢𑁆𑀯𑀸, 𑀅𑀦𑀼𑀚𑀸𑀦𑀸𑀣 [𑀅𑀦𑀼𑀚𑀸𑀦𑀺𑀫𑁆𑀳 (𑀲𑁆𑀬𑀸. 𑀧𑀻. 𑀓.)] 𑀦𑀸𑀬𑀓.

𑁨𑁧. ‘‘𑀉𑀧𑀓𑀸𑀭𑀸 𑀫𑀫𑀁 𑀢𑀼𑀫𑁆𑀳𑁂, 𑀤𑀻𑀖𑀭𑀢𑁆𑀢𑀁 𑀓𑀢𑀸𑀯𑀺𑀦𑁄;

𑀘𑀢𑀼𑀦𑁆𑀦𑀁 𑀲𑀁𑀲𑀬𑀁 𑀙𑁂𑀢𑁆𑀯𑀸, 𑀲𑀩𑁆𑀩𑀸 𑀕𑀘𑁆𑀙𑀦𑁆𑀢𑀼 𑀦𑀺𑀩𑁆𑀩𑀼𑀢𑀺𑀁.

𑁨𑁨. ‘‘𑀯𑀦𑁆𑀤𑀺𑀢𑁆𑀯𑀸 𑀫𑀼𑀦𑀺𑀦𑁄 𑀧𑀸𑀤𑁂, 𑀓𑀢𑁆𑀯𑀸 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁;

𑀓𑀸𑀘𑀺 𑀤𑀲𑁆𑀲𑁂𑀦𑁆𑀢𑀺 𑀆𑀮𑁄𑀓𑀁, 𑀅𑀦𑁆𑀥𑀓𑀸𑀭𑀫𑀣𑀸𑀧𑀭𑀸.

𑁨𑁩. ‘‘𑀤𑀲𑁆𑀲𑁂𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑁂, 𑀲𑀸𑀕𑀭𑀜𑁆𑀘 𑀲𑀫𑀘𑁆𑀙𑀓𑀁;

𑀲𑀺𑀦𑁂𑀭𑀼𑀁 𑀧𑀭𑀺𑀪𑀡𑁆𑀟𑀜𑁆𑀘, 𑀤𑀲𑁆𑀲𑁂𑀦𑁆𑀢𑀺 𑀧𑀸𑀭𑀺𑀙𑀢𑁆𑀢𑀓𑀁.

𑁨𑁪. ‘‘𑀢𑀸𑀯𑀢𑀺𑀁𑀲𑀜𑁆𑀘 𑀪𑀯𑀦𑀁, 𑀬𑀸𑀫𑀁 𑀤𑀲𑁆𑀲𑁂𑀦𑁆𑀢𑀺 𑀇𑀤𑁆𑀥𑀺𑀬𑀸;

𑀢𑀼𑀲𑀺𑀢𑀁 𑀦𑀺𑀫𑁆𑀫𑀺𑀢𑁂 𑀤𑁂𑀯𑁂, 𑀯𑀲𑀯𑀢𑁆𑀢𑀻 𑀫𑀳𑀺𑀲𑁆𑀲𑀭𑁂.

𑁨𑁫. ‘‘𑀩𑁆𑀭𑀳𑁆𑀫𑀸𑀦𑁄 𑀓𑀸𑀘𑀺 𑀤𑀲𑁆𑀲𑁂𑀦𑁆𑀢𑀺, 𑀘𑀗𑁆𑀓𑀫𑀜𑁆𑀘 𑀫𑀳𑀸𑀭𑀳𑀁;

𑀩𑁆𑀭𑀳𑁆𑀫𑀯𑀡𑁆𑀡𑀜𑁆𑀘 𑀫𑀸𑀧𑁂𑀢𑁆𑀯𑀸, 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀲𑀼𑀜𑁆𑀜𑀢𑀁.

𑁨𑁬. ‘‘𑀦𑀸𑀦𑀸𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸, 𑀇𑀤𑁆𑀥𑀺𑀁 𑀤𑀲𑁆𑀲𑀺𑀬 𑀲𑀢𑁆𑀣𑀼𑀦𑁄;

𑀤𑀲𑁆𑀲𑀬𑀺𑀁𑀲𑀼 𑀩𑀮𑀁 𑀲𑀩𑁆𑀩𑀸, 𑀧𑀸𑀤𑁂 𑀯𑀦𑁆𑀤𑀺𑀁𑀲𑀼 𑀲𑀢𑁆𑀣𑀼𑀦𑁄.

𑁨𑁭. ‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫 𑀫𑀳𑀸𑀫𑀼𑀦𑁂.

𑁨𑁮. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁨𑁯. ‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀅𑀫𑁆𑀳𑀁 𑀫𑀳𑀸𑀯𑀻𑀭, 𑀉𑀧𑁆𑀧𑀦𑁆𑀦𑀁 𑀢𑀯 𑀲𑀦𑁆𑀢𑀺𑀓𑁂.

𑁩𑁦. ‘‘𑀧𑀼𑀩𑁆𑀩𑀸𑀦𑀁 𑀮𑁄𑀓𑀦𑀸𑀣𑀸𑀦𑀁, 𑀲𑀗𑁆𑀕𑀫𑀁 𑀦𑁄 𑀦𑀺𑀤𑀲𑁆𑀲𑀺𑀢𑀁;

𑀅𑀥𑀺𑀓𑀸𑀭𑀁 𑀩𑀳𑀼𑀁 𑀅𑀫𑁆𑀳𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁩𑁧. ‘‘𑀬𑀁 𑀅𑀫𑁆𑀳𑁂𑀳𑀺 𑀓𑀢𑀁 𑀓𑀫𑁆𑀫𑀁, 𑀓𑀼𑀲𑀮𑀁 𑀲𑀭 𑀢𑀁 𑀫𑀼𑀦𑁂;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀼𑀜𑁆𑀜𑀸𑀦𑀼𑀧𑀘𑀺𑀢𑀸𑀦𑀺 𑀦𑁄.

𑁩𑁨. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺;

𑀧𑀼𑀭𑀁 𑀳𑀁𑀲𑀯𑀢𑀻 𑀦𑀸𑀫, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀼𑀮𑀸𑀲𑀬𑀁.

𑁩𑁩. ‘‘𑀤𑁆𑀯𑀸𑀭𑁂𑀦 𑀳𑀁𑀲𑀯𑀢𑀺𑀬𑀸, 𑀕𑀗𑁆𑀕𑀸 𑀲𑀦𑁆𑀤𑀢𑀺 𑀲𑀩𑁆𑀩𑀤𑀸;

𑀉𑀩𑁆𑀩𑀴𑁆𑀳𑀸 𑀦𑀤𑀺𑀬𑀸 𑀪𑀺𑀓𑁆𑀔𑀽, 𑀕𑀫𑀦𑀁 𑀦 𑀮𑀪𑀦𑁆𑀢𑀺 𑀢𑁂.

𑁩𑁪. ‘‘𑀤𑀺𑀯𑀲𑀁 𑀤𑁆𑀯𑁂 𑀢𑀬𑁄 𑀘𑁂𑀯, 𑀲𑀢𑁆𑀢𑀸𑀳𑀁 𑀫𑀸𑀲𑀺𑀓𑀁 𑀢𑀢𑁄;

𑀘𑀢𑀼𑀫𑀸𑀲𑀫𑁆𑀧𑀺 𑀲𑀫𑁆𑀧𑀼𑀡𑁆𑀡𑀁, 𑀕𑀫𑀦𑀁 𑀦 𑀮𑀪𑀦𑁆𑀢𑀺 𑀢𑁂.

𑁩𑁫. ‘‘𑀢𑀤𑀸 𑀅𑀳𑀼 𑀲𑀢𑁆𑀢𑀲𑀸𑀭𑁄, 𑀚𑀝𑀺𑀮𑁄 𑀦𑀸𑀫 𑀭𑀝𑁆𑀞𑀺𑀓𑁄;

𑀑𑀭𑀼𑀤𑁆𑀥𑁂 [𑀑𑀭𑀢𑀻𑀭𑁂 (𑀲𑁆𑀬𑀸.)] 𑀪𑀺𑀓𑁆𑀔𑀯𑁄 𑀤𑀺𑀲𑁆𑀯𑀸, 𑀲𑁂𑀢𑀼𑀁 𑀕𑀗𑁆𑀕𑀸𑀬 𑀓𑀸𑀭𑀬𑀺.

𑁩𑁬. ‘‘𑀢𑀤𑀸 𑀲𑀢𑀲𑀳𑀲𑁆𑀲𑁂𑀳𑀺, 𑀲𑁂𑀢𑀼𑀁 𑀕𑀗𑁆𑀕𑀸𑀬 𑀓𑀸𑀭𑀬𑀺;

𑀲𑀗𑁆𑀖𑀲𑁆𑀲 𑀑𑀭𑀺𑀫𑁂 𑀢𑀻𑀭𑁂, 𑀯𑀺𑀳𑀸𑀭𑀜𑁆𑀘 𑀅𑀓𑀸𑀭𑀬𑀺.

𑁩𑁭. ‘‘𑀇𑀢𑁆𑀣𑀺𑀬𑁄 𑀧𑀼𑀭𑀺𑀲𑀸 𑀘𑁂𑀯, 𑀉𑀘𑁆𑀘𑀦𑀻𑀘𑀓𑀼𑀮𑀸𑀦𑀺 𑀘;

𑀢𑀲𑁆𑀲 𑀲𑁂𑀢𑀼𑀁 𑀯𑀺𑀳𑀸𑀭𑀜𑁆𑀘 [𑀢𑁂𑀲𑀼 𑀲𑁂𑀢𑀼𑀯𑀺𑀳𑀸𑀭𑁂𑀲𑀼 (𑀲𑀻.), 𑀢𑀲𑁆𑀲 𑀲𑁂𑀢𑀽 𑀯𑀺𑀳𑀸𑀭𑁂 𑀘 (𑀧𑀻.)], 𑀲𑀫𑀪𑀸𑀕𑀁 𑀅𑀓𑀁𑀲𑀼 𑀢𑁂.

𑁩𑁮. ‘‘𑀅𑀫𑁆𑀳𑁂 𑀅𑀜𑁆𑀜𑁂 𑀘 𑀫𑀸𑀦𑀼𑀚𑀸, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀦𑀕𑀭𑁂 𑀚𑀦𑀧𑀤𑁂𑀲𑀼 𑀘.

𑁩𑁯. ‘‘𑀇𑀢𑁆𑀣𑀻 𑀧𑀼𑀫𑀸 𑀓𑀼𑀫𑀸𑀭𑀸 𑀘, 𑀩𑀳𑀽 𑀘𑁂𑀯 𑀓𑀼𑀫𑀸𑀭𑀺𑀓𑀸;

𑀲𑁂𑀢𑀼𑀦𑁄 𑀘 𑀯𑀺𑀳𑀸𑀭𑀲𑁆𑀲, 𑀯𑀸𑀮𑀼𑀓𑀸 𑀆𑀓𑀺𑀭𑀺𑀁𑀲𑀼 𑀢𑁂.

𑁪𑁦. ‘‘𑀯𑀻𑀣𑀺𑀁 𑀲𑀫𑁆𑀫𑀚𑁆𑀚𑀦𑀁 𑀓𑀢𑁆𑀯𑀸, 𑀓𑀤𑀮𑀻𑀧𑀼𑀡𑁆𑀡𑀖𑀝𑁂 𑀥𑀚𑁂;

𑀥𑀽𑀧𑀁 𑀘𑀼𑀡𑁆𑀡𑀜𑁆𑀘 𑀫𑀸𑀮𑀜𑁆𑀘, 𑀓𑀸𑀭𑀁 𑀓𑀢𑁆𑀯𑀸𑀦 𑀲𑀢𑁆𑀣𑀼𑀦𑁄.

𑁪𑁧. ‘‘𑀲𑁂𑀢𑀼𑀯𑀺𑀳𑀸𑀭𑁂 𑀓𑀸𑀭𑁂𑀢𑁆𑀯𑀸, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀯𑀺𑀦𑀸𑀬𑀓𑀁;

𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀲𑀫𑁆𑀩𑁄𑀥𑀺𑀁 𑀅𑀪𑀺𑀧𑀢𑁆𑀣𑀬𑀺𑀁.

𑁪𑁨. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀯𑀻𑀭𑁄, 𑀢𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀅𑀦𑀼𑀫𑁄𑀤𑀦𑀻𑀬𑀁𑀓𑀸𑀲𑀺, 𑀚𑀝𑀺𑀮𑀲𑁆𑀲 𑀫𑀳𑀸𑀫𑀼𑀦𑀺 [𑀓𑀢𑁆𑀯𑀸, 𑀯𑀺𑀬𑀸𑀓𑀸𑀲𑀺 𑀫𑀳𑀸𑀫𑀼𑀦𑀺 (𑀲𑁆𑀬𑀸.)].

𑁪𑁩. ‘‘‘𑀲𑀢𑀲𑀳𑀲𑁆𑀲𑀸𑀢𑀺𑀓𑁆𑀓𑀦𑁆𑀢𑁂, 𑀓𑀧𑁆𑀧𑁄 𑀳𑁂𑀲𑁆𑀲𑀢𑀺 𑀪𑀤𑁆𑀤𑀓𑁄;

𑀪𑀯𑀸𑀪𑀯𑁂𑀦𑀼𑀪𑁄𑀢𑁆𑀯𑀸𑀦, 𑀧𑀸𑀧𑀼𑀡𑀺𑀲𑁆𑀲𑀢𑀺 𑀩𑁄𑀥𑀺𑀬𑀁.

𑁪𑁪. ‘‘‘𑀓𑀸𑀘𑀺 𑀳𑀢𑁆𑀣𑀧𑀭𑀺𑀓𑀫𑁆𑀫𑀁, 𑀓𑀢𑀸𑀯𑀻 𑀦𑀭𑀦𑀸𑀭𑀺𑀬𑁄;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀲𑀩𑁆𑀩𑀸 𑀳𑁂𑀲𑁆𑀲𑀦𑁆𑀢𑀺 𑀲𑀫𑁆𑀫𑀼𑀔𑀸’.

𑁪𑁫. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀉𑀧𑁆𑀧𑀦𑁆𑀦𑀸 𑀤𑁂𑀯𑀪𑀯𑀦𑀁, 𑀢𑀼𑀬𑁆𑀳𑀁 𑀢𑀸 𑀧𑀭𑀺𑀘𑀸𑀭𑀺𑀓𑀸.

𑁪𑁬. ‘‘𑀤𑀺𑀩𑁆𑀩𑀲𑀼𑀔𑀁 𑀅𑀲𑀗𑁆𑀔𑀺𑀬𑀁, 𑀫𑀸𑀦𑀼𑀲𑀜𑁆𑀘 𑀅𑀲𑀗𑁆𑀔𑀺𑀬𑀁;

𑀢𑀼𑀬𑁆𑀳𑀁 𑀢𑁂 𑀧𑀭𑀺𑀘𑀸𑀭𑁂𑀫, 𑀲𑀁𑀲𑀭𑀺𑀫𑁆𑀳 𑀪𑀯𑀸𑀪𑀯𑁂.

𑁪𑁭. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀲𑀼𑀓𑀢𑀁 𑀓𑀫𑁆𑀫𑀲𑀫𑁆𑀧𑀤𑀁;

𑀲𑀼𑀔𑀼𑀫𑀸𑀮𑀻 𑀫𑀦𑀼𑀲𑁆𑀲𑀸𑀦𑀁, 𑀅𑀣𑁄 𑀤𑁂𑀯𑀧𑀼𑀭𑁂 𑀯𑀭𑁂.

𑁪𑁮. ‘‘𑀭𑀽𑀧𑀪𑁄𑀕𑀬𑀲𑁂 𑀘𑁂𑀯, 𑀅𑀣𑁄 𑀓𑀺𑀢𑁆𑀢𑀺𑀜𑁆𑀘 𑀲𑀓𑁆𑀓𑀢𑀁 [𑀓𑀺𑀢𑁆𑀢𑀺𑀲𑀼𑀔𑀁 𑀧𑀺𑀬𑀁 (𑀲𑁆𑀬𑀸.)];

𑀮𑀪𑀸𑀫 𑀲𑀢𑀢𑀁 𑀲𑀩𑁆𑀩𑀁, 𑀲𑀼𑀓𑀢𑀁 𑀓𑀫𑁆𑀫𑀲𑀫𑁆𑀧𑀤𑀁.

𑁪𑁯. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀚𑀸𑀢𑀸𑀫𑁆𑀳 𑀩𑁆𑀭𑀸𑀳𑁆𑀫𑀡𑁂 𑀓𑀼𑀮𑁂;

𑀲𑀼𑀔𑀼𑀫𑀸𑀮𑀳𑀢𑁆𑀣𑀧𑀸𑀤𑀸, 𑀲𑀓𑁆𑀬𑀧𑀼𑀢𑁆𑀢𑀦𑀺𑀯𑁂𑀲𑀦𑁂.

𑁫𑁦. ‘‘𑀲𑀩𑁆𑀩𑀓𑀸𑀮𑀫𑁆𑀧𑀺 𑀧𑀣𑀯𑀺𑀁, 𑀦 𑀧𑀲𑁆𑀲𑀸𑀫 𑀦 𑀮𑀗𑁆𑀓𑀢𑀁;

𑀘𑀺𑀓𑁆𑀔𑀮𑁆𑀮𑀪𑀽𑀫𑀺𑀫𑀲𑀼𑀘𑀺𑀁 [𑀘𑀺𑀓𑁆𑀔𑀮𑁆𑀮𑀁 𑀪𑀽𑀫𑀺𑀁 𑀕𑀫𑀦𑀁 (𑀲𑁆𑀬𑀸.)], 𑀦 𑀧𑀲𑁆𑀲𑀸𑀫 𑀫𑀳𑀸𑀫𑀼𑀦𑁂.

𑁫𑁧. ‘‘𑀅𑀕𑀸𑀭𑀁 𑀯𑀲𑀦𑁆𑀢𑁂 𑀅𑀫𑁆𑀳𑁂, 𑀲𑀓𑁆𑀓𑀸𑀭𑀁 𑀲𑀩𑁆𑀩𑀓𑀸𑀮𑀺𑀓𑀁;

𑀉𑀧𑀦𑁂𑀦𑁆𑀢𑀺 𑀲𑀤𑀸 𑀲𑀩𑁆𑀩𑀁, 𑀧𑀼𑀩𑁆𑀩𑀓𑀫𑁆𑀫𑀨𑀮𑁂𑀦 𑀦𑁄 [𑀧𑀼𑀩𑁆𑀩𑀓𑀫𑁆𑀫𑀨𑀮𑀁 𑀢𑀢𑁄 (𑀲𑀻. 𑀧𑀻.)].

𑁫𑁨. ‘‘𑀅𑀕𑀸𑀭𑀁 𑀧𑀚𑀳𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀢𑁆𑀯𑀸𑀦𑀕𑀸𑀭𑀺𑀬𑀁;

𑀲𑀁𑀲𑀸𑀭𑀧𑀣𑀦𑀺𑀢𑁆𑀣𑀺𑀡𑁆𑀡𑀸, 𑀯𑀻𑀢𑀭𑀸𑀕𑀸 𑀪𑀯𑀸𑀫𑀲𑁂 [𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄 (𑀲𑀻. 𑀲𑁆𑀬𑀸. 𑀧𑀻.)].

𑁫𑁩. ‘‘𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀉𑀧𑀦𑁂𑀦𑁆𑀢𑀺 𑀲𑀤𑀸 𑀅𑀫𑁆𑀳𑁂, 𑀲𑀳𑀲𑁆𑀲𑀸𑀦𑀺 𑀢𑀢𑁄 𑀢𑀢𑁄.

𑁫𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀅𑀫𑁆𑀳𑀁…𑀧𑁂… 𑀯𑀺𑀳𑀭𑀸𑀫 𑀅𑀦𑀸𑀲𑀯𑀸.

𑁫𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀦𑁄 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀘𑀢𑀼𑀭𑀸𑀲𑀻𑀢𑀺𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀸𑀦𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀢𑀼𑀭𑀸𑀲𑀻𑀢𑀺𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀉𑀧𑁆𑀧𑀮𑀤𑀸𑀬𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁫𑁭. ‘‘𑀦𑀕𑀭𑁂 𑀅𑀭𑀼𑀡𑀯𑀢𑀺𑀬𑀸, 𑀅𑀭𑀼𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀢𑀲𑁆𑀲 𑀭𑀜𑁆𑀜𑁄 𑀅𑀳𑀼𑀁 𑀪𑀭𑀺𑀬𑀸, 𑀏𑀓𑀚𑁆𑀛𑀁 𑀘𑀸𑀭𑀬𑀸𑀫𑀳𑀁.

𑁫𑁮. ‘‘𑀭𑀳𑁄𑀕𑀢𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘𑀓𑀼𑀲𑀮𑀁 𑀫𑁂 𑀓𑀢𑀁 𑀦𑀢𑁆𑀣𑀺, 𑀆𑀤𑀸𑀬 𑀕𑀫𑀺𑀬𑀁 𑀫𑀫.

𑁫𑁯. ‘‘‘𑀫𑀳𑀸𑀪𑀺𑀢𑀸𑀧𑀁 𑀓𑀝𑀼𑀓𑀁, 𑀖𑁄𑀭𑀭𑀽𑀧𑀁 𑀲𑀼𑀤𑀸𑀭𑀼𑀡𑀁;

𑀦𑀺𑀭𑀬𑀁 𑀦𑀽𑀦 𑀕𑀘𑁆𑀙𑀸𑀫𑀺, 𑀏𑀢𑁆𑀣 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄’.

𑁬𑁦. ‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀧𑀳𑀁𑀲𑁂𑀢𑁆𑀯𑀸𑀦 𑀫𑀸𑀦𑀲𑀁;

𑀭𑀸𑀚𑀸𑀦𑀁 𑀉𑀧𑀕𑀦𑁆𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁬𑁧. ‘‘‘𑀇𑀢𑁆𑀣𑀻 𑀦𑀸𑀫 𑀫𑀬𑀁 𑀤𑁂𑀯, 𑀧𑀼𑀭𑀺𑀲𑀸𑀦𑀺𑀢𑁆𑀢𑀭𑀸 𑀅𑀳𑀼 [𑀧𑀼𑀭𑀺𑀲𑀸𑀦𑀼𑀕𑀢𑀸 𑀲𑀤𑀸 (𑀲𑀻.), 𑀧𑀼𑀭𑀺𑀲𑀸 𑀦 𑀪𑀯𑀸𑀫 𑀦𑁄 (𑀲𑁆𑀬𑀸.), 𑀧𑀼𑀭𑀺𑀲𑀸𑀦𑀁 𑀪𑀭𑀸 𑀫𑀬𑀁 (𑀧𑀻.)];

𑀏𑀓𑀁 𑀫𑁂 𑀲𑀫𑀡𑀁 𑀤𑁂𑀳𑀺, 𑀪𑁄𑀚𑀬𑀺𑀲𑁆𑀲𑀸𑀫𑀺 𑀔𑀢𑁆𑀢𑀺𑀬’.

𑁬𑁨. ‘‘𑀅𑀤𑀸𑀲𑀺 𑀫𑁂 𑀢𑀤𑀸 𑀭𑀸𑀚𑀸, 𑀲𑀫𑀡𑀁 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀁;

𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀧𑀭𑀫𑀦𑁆𑀦𑁂𑀦 𑀧𑀽𑀭𑀬𑀺𑀁.

𑁬𑁩. ‘‘𑀧𑀽𑀭𑁂𑀢𑁆𑀯𑀸 𑀧𑀭𑀫𑀁 𑀅𑀦𑁆𑀦𑀁, 𑀲𑀳 𑀲𑀼𑀕𑀦𑁆𑀥𑀮𑁂𑀧𑀦𑀁;

𑀫𑀳𑀸𑀘𑁂𑀮𑁂𑀦 𑀙𑀸𑀤𑀺𑀢𑁆𑀯𑀸, 𑀅𑀤𑀸𑀲𑀺𑀁 𑀢𑀼𑀝𑁆𑀞𑀫𑀸𑀦𑀲𑀸.

𑁬𑁪. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁬𑁫. ‘‘𑀲𑀳𑀲𑁆𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀳𑀲𑁆𑀲𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

𑁬𑁬. ‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀦𑀸𑀦𑀸𑀯𑀺𑀥𑀁 𑀩𑀳𑀼𑀁 𑀅𑀜𑁆𑀜𑀁, 𑀢𑀲𑁆𑀲 𑀓𑀫𑁆𑀫𑀨𑀮𑀁 𑀢𑀢𑁄.

𑁬𑁭. ‘‘𑀉𑀧𑁆𑀧𑀮𑀲𑁆𑀲𑁂𑀯 𑀫𑁂 𑀯𑀡𑁆𑀡𑁄, 𑀅𑀪𑀺𑀭𑀽𑀧𑀸 𑀲𑀼𑀤𑀲𑁆𑀲𑀦𑀸;

𑀇𑀢𑁆𑀣𑀺𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀅𑀪𑀺𑀚𑀸𑀢𑀸 𑀚𑀼𑀢𑀺𑀦𑁆𑀥𑀭𑀸.

𑁬𑁮. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀅𑀚𑀸𑀬𑀺𑀁 𑀲𑀸𑀓𑀺𑀬𑁂 𑀓𑀼𑀮𑁂;

𑀦𑀸𑀭𑀻𑀲𑀳𑀲𑁆𑀲𑀧𑀸𑀫𑁄𑀓𑁆𑀔𑀸, 𑀲𑀼𑀤𑁆𑀥𑁄𑀤𑀦𑀲𑀼𑀢𑀲𑁆𑀲𑀳𑀁.

𑁬𑁯. ‘‘𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀅𑀕𑀸𑀭𑁂𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀲𑀢𑁆𑀢𑀫𑀻𑀭𑀢𑁆𑀢𑀺𑀲𑀫𑁆𑀧𑀢𑁆𑀢𑀸 [𑀲𑀢𑁆𑀢𑀫𑀺𑀁𑀭𑀢𑁆𑀢𑀺𑀫𑀧𑀢𑁆𑀢𑀸 (𑀲𑀻. 𑀲𑁆𑀬𑀸. 𑀧𑀻.)], 𑀘𑀢𑀼𑀲𑀘𑁆𑀘𑀫𑀧𑀸𑀧𑀼𑀡𑀺𑀁.

𑁭𑁦. ‘‘𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀧𑀭𑀺𑀫𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀧𑀺𑀡𑁆𑀟𑀧𑀸𑀢𑀲𑁆𑀲𑀺𑀤𑀁 𑀨𑀮𑀁.

𑁭𑁧. ‘‘𑀬𑀁 𑀫𑀬𑁆𑀳𑀁 𑀧𑀽𑀭𑀺𑀢𑀁 𑀓𑀫𑁆𑀫𑀁, 𑀓𑀼𑀲𑀮𑀁 𑀲𑀭𑀲𑁂 𑀫𑀼𑀦𑀺;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀭𑀺𑀘𑀢𑁆𑀢𑀁 𑀩𑀳𑀼𑀁 𑀫𑀬𑀸.

𑁭𑁨. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀺𑀡𑁆𑀟𑀧𑀸𑀢𑀲𑁆𑀲𑀺𑀤𑀁 𑀨𑀮𑀁.

𑁭𑁩. ‘‘𑀤𑁆𑀯𑁂 𑀕𑀢𑀺𑀬𑁄 𑀧𑀚𑀸𑀦𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;