𑁮. 𑀧𑀼𑀡𑁆𑀡𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁧𑁮𑁪. ‘‘𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄, 𑀲𑀺𑀔𑀺𑀦𑁄 𑀯𑁂𑀲𑁆𑀲𑀪𑀼𑀲𑁆𑀲 𑀘;

𑀓𑀓𑀼𑀲𑀦𑁆𑀥𑀲𑁆𑀲 𑀫𑀼𑀦𑀺𑀦𑁄, 𑀓𑁄𑀡𑀸𑀕𑀫𑀦𑀢𑀸𑀤𑀺𑀦𑁄.

𑁧𑁮𑁫. ‘‘𑀓𑀲𑁆𑀲𑀧𑀲𑁆𑀲 𑀘 𑀩𑀼𑀤𑁆𑀥𑀲𑁆𑀲, 𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀸𑀲𑀦𑁂;

𑀪𑀺𑀓𑁆𑀔𑀼𑀦𑀻 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀦𑀺𑀧𑀓𑀸 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀸.

𑁧𑁮𑁬. ‘‘𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸, 𑀥𑀫𑁆𑀫𑀢𑁆𑀣𑀧𑀝𑀺𑀧𑀼𑀘𑁆𑀙𑀺𑀓𑀸;

𑀉𑀕𑁆𑀕𑀳𑁂𑀢𑀸 𑀘 𑀥𑀫𑁆𑀫𑀸𑀦𑀁, 𑀲𑁄𑀢𑀸 𑀧𑀬𑀺𑀭𑀼𑀧𑀸𑀲𑀺𑀢𑀸.

𑁧𑁮𑁭. ‘‘𑀤𑁂𑀲𑁂𑀦𑁆𑀢𑀻 𑀚𑀦𑀫𑀚𑁆𑀛𑁂𑀳𑀁, 𑀅𑀳𑁄𑀲𑀺𑀁 𑀚𑀺𑀦𑀲𑀸𑀲𑀦𑁂;

𑀩𑀸𑀳𑀼𑀲𑀘𑁆𑀘𑁂𑀦 𑀢𑁂𑀦𑀸𑀳𑀁, 𑀧𑁂𑀲𑀮𑀸 𑀅𑀢𑀺𑀫𑀜𑁆𑀜𑀺𑀲𑀁.

𑁧𑁮𑁮. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑀼𑀢𑁆𑀢𑀫𑁂;

𑀅𑀦𑀸𑀣𑀧𑀺𑀡𑁆𑀟𑀺𑀦𑁄 𑀕𑁂𑀳𑁂, 𑀚𑀸𑀢𑀸𑀳𑀁 𑀓𑀼𑀫𑁆𑀪𑀤𑀸𑀲𑀺𑀬𑀸.

𑁧𑁮𑁯. ‘‘𑀕𑀢𑀸 𑀉𑀤𑀓𑀳𑀸𑀭𑀺𑀬𑀁, 𑀲𑁄𑀢𑁆𑀣𑀺𑀬𑀁 𑀤𑀺𑀚𑀫𑀤𑁆𑀤𑀲𑀁;

𑀲𑀻𑀢𑀝𑁆𑀝𑀁 𑀢𑁄𑀬𑀫𑀚𑁆𑀛𑀫𑁆𑀳𑀺, 𑀢𑀁 𑀤𑀺𑀲𑁆𑀯𑀸 𑀇𑀤𑀫𑀩𑁆𑀭𑀯𑀺𑀁.

𑁧𑁯𑁦. ‘‘‘𑀉𑀤𑀳𑀸𑀭𑀻 𑀅𑀳𑀁 𑀲𑀻𑀢𑁂, 𑀲𑀤𑀸 𑀉𑀤𑀓𑀫𑁄𑀢𑀭𑀺𑀁;

𑀅𑀬𑁆𑀬𑀸𑀦𑀁 𑀤𑀡𑁆𑀟𑀪𑀬𑀪𑀻𑀢𑀸, 𑀯𑀸𑀘𑀸𑀤𑁄𑀲𑀪𑀬𑀝𑁆𑀝𑀺𑀢𑀸 [𑀯𑀸𑀘𑀸𑀭𑁄𑀲𑀪𑀬𑀝𑁆𑀝𑀺𑀢𑀸 (𑀲𑁆𑀬𑀸.)].

𑁧𑁯𑁧. ‘‘‘𑀓𑀲𑁆𑀲 𑀩𑁆𑀭𑀸𑀳𑁆𑀫𑀡 𑀢𑁆𑀯𑀁 𑀪𑀻𑀢𑁄, 𑀲𑀤𑀸 𑀉𑀤𑀓𑀫𑁄𑀢𑀭𑀺;

𑀯𑁂𑀥𑀫𑀸𑀦𑁂𑀳𑀺 𑀕𑀢𑁆𑀢𑁂𑀳𑀺, 𑀲𑀻𑀢𑀁 𑀯𑁂𑀤𑀬𑀲𑁂 𑀪𑀼𑀲𑀁’.

𑁧𑁯𑁨. ‘‘‘𑀚𑀸𑀦𑀦𑁆𑀢𑀻 𑀯𑀢 𑀫𑀁 𑀪𑁄𑀢𑀺, 𑀧𑀼𑀡𑁆𑀡𑀺𑀓𑁂 𑀧𑀭𑀺𑀧𑀼𑀘𑁆𑀙𑀲𑀺;

𑀓𑀭𑁄𑀦𑁆𑀢𑀁 𑀓𑀼𑀲𑀮𑀁 𑀓𑀫𑁆𑀫𑀁, 𑀭𑀼𑀦𑁆𑀥𑀦𑁆𑀢𑀁 [𑀦𑀺𑀤𑁆𑀥𑀦𑁆𑀢𑀁 (𑀲𑀻. 𑀧𑀻.), 𑀦𑀼𑀤𑀦𑁆𑀢𑀁 (𑀲𑁆𑀬𑀸.)] 𑀓𑀢𑀧𑀸𑀧𑀓𑀁.

𑁧𑁯𑁩. ‘‘‘𑀬𑁄 𑀘𑁂 𑀯𑀼𑀟𑁆𑀠𑁄 𑀤𑀳𑀭𑁄 𑀯𑀸, 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑀺;

𑀤𑀓𑀸𑀪𑀺𑀲𑀺𑀜𑁆𑀘𑀦𑀸 𑀲𑁄𑀧𑀺 [𑀪𑁄𑀢𑀺 (𑀲𑀻. 𑀓.) 𑀣𑁂𑀭𑀻𑀕𑀸. 𑁨𑁩𑁯], 𑀧𑀸𑀧𑀓𑀫𑁆𑀫𑀸 𑀧𑀫𑀼𑀘𑁆𑀘𑀢𑀺’.

𑁧𑁯𑁪. ‘‘𑀉𑀢𑁆𑀢𑀭𑀦𑁆𑀢𑀲𑁆𑀲 𑀅𑀓𑁆𑀔𑀸𑀲𑀺𑀁, 𑀥𑀫𑁆𑀫𑀢𑁆𑀣𑀲𑀁𑀳𑀺𑀢𑀁 𑀧𑀤𑀁;

𑀢𑀜𑁆𑀘 𑀲𑀼𑀢𑁆𑀯𑀸 𑀲 𑀲𑀁𑀯𑀺𑀕𑁆𑀕𑁄 [𑀲𑀼𑀲𑀁𑀯𑀺𑀕𑁆𑀕𑁄 (𑀲𑁆𑀬𑀸.)], 𑀧𑀩𑁆𑀩𑀚𑀺𑀢𑁆𑀯𑀸𑀭𑀳𑀸 𑀅𑀳𑀼.

𑁧𑁯𑁫. ‘‘𑀧𑀽𑀭𑁂𑀦𑁆𑀢𑀻 𑀊𑀦𑀓𑀲𑀢𑀁, 𑀚𑀸𑀢𑀸 𑀤𑀸𑀲𑀺𑀓𑀼𑀮𑁂 𑀬𑀢𑁄;

𑀢𑀢𑁄 𑀧𑀼𑀡𑁆𑀡𑀸𑀢𑀺 𑀦𑀸𑀫𑀁 𑀫𑁂, 𑀪𑀼𑀚𑀺𑀲𑁆𑀲𑀁 𑀫𑀁 𑀅𑀓𑀁𑀲𑀼 𑀢𑁂.

𑁧𑁯𑁬. ‘‘𑀲𑁂𑀝𑁆𑀞𑀺𑀁 𑀢𑀢𑁄𑀦𑀼𑀚𑀸𑀦𑁂𑀢𑁆𑀯𑀸 [𑀢𑀢𑁄 𑀅𑀦𑀼𑀫𑁄𑀤𑁂𑀢𑁆𑀯𑀸 (𑀲𑀻. 𑀲𑁆𑀬𑀸.), 𑀢𑀢𑁄 𑀅𑀦𑀼𑀫𑀸𑀦𑁂𑀢𑁆𑀯𑀸 (𑀧𑀻.)], 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁯𑁭. ‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

𑁧𑁯𑁮. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁯𑁯. ‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑁂 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀯𑀸𑀳𑀲𑀸.

𑁨𑁦𑁦. ‘‘𑀪𑀸𑀯𑀦𑀸𑀬 𑀫𑀳𑀸𑀧𑀜𑁆𑀜𑀸, 𑀲𑀼𑀢𑁂𑀦𑁂𑀯 𑀲𑀼𑀢𑀸𑀯𑀺𑀦𑀻;

𑀫𑀸𑀦𑁂𑀦 𑀦𑀻𑀘𑀓𑀼𑀮𑀚𑀸, 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀺 [𑀧𑀦𑀲𑁆𑀲𑀢𑀺 (𑀲𑁆𑀬𑀸.)].

𑁨𑁦𑁧. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁨𑁦𑁨. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁦𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀧𑀼𑀡𑁆𑀡𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀡𑁆𑀡𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.