𑁯. 𑀧𑀜𑁆𑀘𑀤𑀻𑀧𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁯𑁧. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀘𑀸𑀭𑀺𑀓𑀻 [𑀘𑀸𑀭𑀺𑀦𑀺𑀁 (𑀲𑁆𑀬𑀸.)] 𑀆𑀲𑀳𑀁 𑀢𑀤𑀸;

𑀆𑀭𑀸𑀫𑁂𑀦 𑀘 𑀆𑀭𑀸𑀫𑀁, 𑀘𑀭𑀸𑀫𑀺 𑀓𑀼𑀲𑀮𑀢𑁆𑀣𑀺𑀓𑀸.

𑁯𑁨. ‘‘𑀓𑀸𑀴𑀧𑀓𑁆𑀔𑀫𑁆𑀳𑀺 𑀤𑀺𑀯𑀲𑁂, 𑀅𑀤𑁆𑀤𑀲𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀳𑀁.

𑁯𑁩. ‘‘𑀕𑀭𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑁂𑀢𑁆𑀯𑀸, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀺 𑀢𑀸𑀯𑀤𑁂.

𑁯𑁪. ‘‘‘𑀬𑀤𑀺 𑀩𑀼𑀤𑁆𑀥𑁄 𑀅𑀫𑀺𑀢𑀕𑀼𑀡𑁄, 𑀅𑀲𑀫𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀻𑀭𑀁 𑀫𑁂, 𑀩𑁄𑀥𑀺 𑀑𑀪𑀸𑀲𑀢𑀼 𑀅𑀬𑀁’.

𑁯𑁫. ‘‘𑀲𑀳 𑀆𑀯𑀚𑁆𑀚𑀺𑀢𑁂 𑀫𑀬𑁆𑀳𑀁, 𑀩𑁄𑀥𑀺 𑀧𑀚𑁆𑀚𑀮𑀺 𑀢𑀸𑀯𑀤𑁂;

𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀆𑀲𑀺, 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀭𑁄𑀘𑀢𑀺.

𑁯𑁬. ‘‘𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 [𑀲𑀢𑁆𑀢𑀭𑀢𑁆𑀢𑀺𑀤𑀺𑀯𑀁 (𑀧𑀻. 𑀓.)] 𑀢𑀢𑁆𑀣, 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀳𑀁;

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀢𑁆𑀢𑁂, 𑀤𑀻𑀧𑀧𑀽𑀚𑀁 𑀅𑀓𑀸𑀲𑀳𑀁.

𑁯𑁭. ‘‘𑀆𑀲𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀧𑀜𑁆𑀘𑀤𑀻𑀧𑀸𑀦𑀺 𑀧𑀚𑁆𑀚𑀮𑀼𑀁;

𑀬𑀸𑀯 𑀉𑀤𑁂𑀢𑀺 𑀲𑀽𑀭𑀺𑀬𑁄, 𑀤𑀻𑀧𑀸 𑀫𑁂 𑀧𑀚𑁆𑀚𑀮𑀼𑀁 𑀢𑀤𑀸.

𑁯𑁮. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁯𑁯. ‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀧𑀜𑁆𑀘𑀤𑀻𑀧𑀸𑀢𑀺 𑀯𑀼𑀘𑁆𑀘𑀢𑀺;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁 [𑀲𑀢𑀬𑁄𑀚𑀦𑀫𑀼𑀩𑁆𑀩𑁂𑀥𑀁 (𑀲𑀻. 𑀲𑁆𑀬𑀸. 𑀧𑀻.)], 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁 [𑀲𑀝𑁆𑀞𑀺… (𑀲𑁆𑀬𑀸. 𑀧𑀻.)].

𑁧𑁦𑁦. ‘‘𑀅𑀲𑀗𑁆𑀔𑀺𑀬𑀸𑀦𑀺 𑀤𑀻𑀧𑀸𑀦𑀺, 𑀧𑀭𑀺𑀯𑀸𑀭𑁂 𑀚𑀮𑀦𑁆𑀢𑀺 𑀫𑁂;

𑀬𑀸𑀯𑀢𑀸 𑀤𑁂𑀯𑀪𑀯𑀦𑀁, 𑀤𑀻𑀧𑀸𑀮𑁄𑀓𑁂𑀦 𑀚𑁄𑀢𑀢𑀺.

𑁧𑁦𑁧. ‘‘𑀧𑀭𑀫𑁆𑀫𑀼𑀔𑀸 𑀦𑀺𑀲𑀻𑀤𑀺𑀢𑁆𑀯𑀸 [𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀸 𑀲𑀦𑁆𑀢𑀺 (𑀲𑁆𑀬𑀸.), 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀸 𑀣𑀺𑀢𑀸 (𑀧𑀻.)], 𑀬𑀤𑀺 𑀇𑀘𑁆𑀙𑀸𑀫𑀺 𑀧𑀲𑁆𑀲𑀺𑀢𑀼𑀁;

𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀁, 𑀲𑀩𑁆𑀩𑀁 𑀧𑀲𑁆𑀲𑀸𑀫𑀺 𑀘𑀓𑁆𑀔𑀼𑀦𑀸.

𑁧𑁦𑁨. ‘‘𑀬𑀸𑀯𑀢𑀸 𑀅𑀪𑀺𑀓𑀗𑁆𑀔𑀸𑀫𑀺, 𑀤𑀝𑁆𑀞𑀼𑀁 𑀲𑀼𑀕𑀢𑀤𑀼𑀕𑁆𑀕𑀢𑁂 [𑀲𑀼𑀓𑀢𑀤𑀼𑀓𑁆𑀓𑀢𑁂 (𑀧𑀻.];

𑀢𑀢𑁆𑀣 𑀆𑀯𑀭𑀡𑀁 𑀦𑀢𑁆𑀣𑀺, 𑀭𑀼𑀓𑁆𑀔𑁂𑀲𑀼 𑀧𑀩𑁆𑀩𑀢𑁂𑀲𑀼 𑀯𑀸.

𑁧𑁦𑁩. ‘‘𑀅𑀲𑀻𑀢𑀺 𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

𑁧𑁦𑁪. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀤𑀻𑀧𑀲𑀢𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂 𑀚𑀮𑀦𑁆𑀢𑀺 𑀫𑁂.

𑁧𑁦𑁫. ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀉𑀧𑁆𑀧𑀚𑁆𑀚𑀺𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀸 𑀲𑀦𑁆𑀢𑀻 [𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀁 𑀲𑀦𑁆𑀢𑀺𑀁 (𑀲𑀻.)], 𑀅𑀓𑁆𑀔𑀺 𑀫𑁂 𑀦 𑀦𑀺𑀫𑀻𑀮𑀢𑀺.

𑁧𑁦𑁬. ‘‘𑀤𑀻𑀧𑀲𑀢𑀲𑀳𑀲𑁆𑀲𑀸𑀦𑀺, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀢𑀸;

𑀚𑀮𑀦𑁆𑀢𑀺 𑀲𑀽𑀢𑀺𑀓𑀸𑀕𑁂𑀳𑁂 [𑀲𑀽𑀢𑀺𑀖𑀭𑁂 𑀧𑀚𑁆𑀚𑀮𑀦𑁆𑀢𑀺 (𑀲𑀩𑁆𑀩𑀢𑁆𑀣)], 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

𑁧𑁦𑁭. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀫𑀸𑀦𑀲𑀁 𑀯𑀺𑀦𑀺𑀯𑀢𑁆𑀢𑀬𑀺𑀁;

𑀅𑀚𑀭𑀸𑀫𑀢𑀁 𑀲𑀻𑀢𑀺𑀪𑀸𑀯𑀁, 𑀦𑀺𑀩𑁆𑀩𑀸𑀦𑀁 𑀨𑀲𑁆𑀲𑀬𑀺𑀁 𑀅𑀳𑀁.

𑁧𑁦𑁮. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀸𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀻 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀕𑁄𑀢𑀫𑁄.

𑁧𑁦𑁯. ‘‘𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀧𑀸𑀲𑀸𑀤𑁂𑀲𑀼 𑀕𑀼𑀳𑀸𑀲𑀼 𑀯𑀸;

𑀲𑀼𑀜𑁆𑀜𑀸𑀕𑀸𑀭𑁂 𑀯𑀲𑀦𑁆𑀢𑀺𑀬𑀸 [𑀘 𑀛𑀸𑀬𑀦𑁆𑀢𑁂 (𑀲𑀻.), 𑀘 𑀛𑀸𑀬𑀦𑁆𑀢𑀸 (𑀧𑀻.), 𑀧𑀚𑁆𑀛𑀸𑀬𑀦𑁆𑀢𑀸 (𑀲𑁆𑀬𑀸.)], 𑀧𑀜𑁆𑀘𑀤𑀻𑀧𑀸 𑀚𑀮𑀦𑁆𑀢𑀺 𑀫𑁂.

𑁧𑁧𑁦. ‘‘𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑀼𑀤𑁆𑀥𑀁 𑀫𑁂, 𑀲𑀫𑀸𑀥𑀺𑀓𑀼𑀲𑀮𑀸 𑀅𑀳𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

𑁧𑁧𑁧. ‘‘𑀲𑀩𑁆𑀩𑀯𑁄𑀲𑀺𑀢𑀯𑁄𑀲𑀸𑀦𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸;

𑀧𑀜𑁆𑀘𑀤𑀻𑀧𑀸 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀸𑀫𑀺 [𑀯𑀦𑁆𑀤𑀢𑀺 (𑀲𑀻. 𑀓.)] 𑀘𑀓𑁆𑀔𑀼𑀫.

𑁧𑁧𑁨. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀻𑀧𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

𑁧𑁧𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁧𑁧𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁧𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀧𑀜𑁆𑀘𑀤𑀻𑀧𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀜𑁆𑀘𑀤𑀻𑀧𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀦𑀯𑀫𑀁.