𑁧𑁦. 𑀉𑀤𑀓𑀤𑀸𑀬𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁧𑁧𑁬. ‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀅𑀳𑁄𑀲𑀺𑀁 𑀉𑀤𑀳𑀸𑀭𑀺𑀓𑀸;

𑀉𑀤𑀳𑀸𑀭𑁂𑀦 𑀚𑀻𑀯𑀸𑀫𑀺, 𑀢𑁂𑀦 𑀧𑁄𑀲𑁂𑀫𑀺 𑀤𑀸𑀭𑀓𑁂.

𑁧𑁧𑁭. ‘‘𑀤𑁂𑀬𑁆𑀬𑀥𑀫𑁆𑀫𑁄 𑀘 𑀫𑁂 𑀦𑀢𑁆𑀣𑀺, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂;

𑀓𑁄𑀝𑁆𑀞𑀓𑀁 𑀉𑀧𑀲𑀗𑁆𑀓𑀫𑁆𑀫, 𑀉𑀤𑀓𑀁 𑀧𑀝𑁆𑀞𑀧𑁂𑀲𑀳𑀁.

𑁧𑁧𑁮. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁;

𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀉𑀤𑀳𑀸𑀭𑁂𑀦 𑀦𑀺𑀫𑁆𑀫𑀺𑀢𑀁.

𑁧𑁧𑁯. ‘‘𑀅𑀘𑁆𑀙𑀭𑀸𑀦𑀁 𑀲𑀳𑀲𑁆𑀲𑀲𑁆𑀲, 𑀅𑀳𑀜𑁆𑀳𑀺 𑀧𑀯𑀭𑀸 𑀢𑀤𑀸;

𑀤𑀲𑀝𑁆𑀞𑀸𑀦𑁂𑀳𑀺 𑀢𑀸 𑀲𑀩𑁆𑀩𑀸, 𑀅𑀪𑀺𑀪𑁄𑀫𑀺 𑀲𑀤𑀸 𑀅𑀳𑀁.

𑁧𑁨𑁦. ‘‘𑀧𑀜𑁆𑀜𑀸𑀲𑀁 𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀯𑀻𑀲𑀢𑀺𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

𑁧𑁨𑁧. ‘‘𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑀓𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁨. ‘‘𑀧𑀩𑁆𑀩𑀢𑀕𑁆𑀕𑁂 𑀤𑀼𑀫𑀕𑁆𑀕𑁂 𑀯𑀸, 𑀅𑀦𑁆𑀢𑀮𑀺𑀓𑁆𑀔𑁂 𑀘 𑀪𑀽𑀫𑀺𑀬𑀁;

𑀬𑀤𑀸 𑀉𑀤𑀓𑀫𑀺𑀘𑁆𑀙𑀸𑀫𑀺, 𑀔𑀺𑀧𑁆𑀧𑀁 𑀧𑀝𑀺𑀮𑀪𑀸𑀫𑀳𑀁.

𑁧𑁨𑁩. ‘‘𑀅𑀯𑀼𑀝𑁆𑀞𑀺𑀓𑀸 𑀤𑀺𑀲𑀸 𑀦𑀢𑁆𑀣𑀺, 𑀲𑀦𑁆𑀢𑀢𑁆𑀢𑀸 𑀓𑀼𑀣𑀺𑀢𑀸𑀧𑀺 [𑀲𑀦𑁆𑀢𑀢𑁆𑀢𑀸 𑀓𑀼𑀣𑀺𑀢𑀸 𑀦 𑀘 (𑀲𑀻. 𑀧𑀻.), 𑀲𑀦𑁆𑀢𑀢𑁆𑀢𑀸 𑀔𑀼𑀧𑁆𑀧𑀺𑀢𑀸 𑀳𑀺 𑀫𑁂 (𑀲𑁆𑀬𑀸.)] 𑀘;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀢𑀺.

𑁧𑁨𑁪. ‘‘𑀓𑀤𑀸𑀘𑀺 𑀦𑀻𑀬𑀫𑀸𑀦𑀸𑀬, 𑀜𑀸𑀢𑀺𑀲𑀗𑁆𑀖𑁂𑀦 𑀫𑁂 𑀢𑀤𑀸;

𑀬𑀤𑀸 𑀇𑀘𑁆𑀙𑀸𑀫𑀳𑀁 𑀯𑀲𑁆𑀲𑀁, 𑀫𑀳𑀸𑀫𑁂𑀖𑁄 𑀅𑀚𑀸𑀬𑀣.

𑁧𑁨𑁫. ‘‘𑀉𑀡𑁆𑀳𑀁 𑀯𑀸 𑀧𑀭𑀺𑀴𑀸𑀳𑁄 𑀯𑀸, 𑀲𑀭𑀻𑀭𑁂 𑀫𑁂 𑀦 𑀯𑀺𑀚𑁆𑀚𑀢𑀺;

𑀓𑀸𑀬𑁂 𑀘 𑀫𑁂 𑀭𑀚𑁄 𑀦𑀢𑁆𑀣𑀺, 𑀤𑀓𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁬. ‘‘𑀯𑀺𑀲𑀼𑀤𑁆𑀥𑀫𑀦𑀲𑀸 𑀅𑀚𑁆𑀚, 𑀅𑀧𑁂𑀢𑀫𑀦𑀧𑀸𑀧𑀺𑀓𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁨𑁭. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀓𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑀓𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁧𑁨𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁩𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀉𑀤𑀓𑀤𑀸𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀤𑀓𑀤𑀸𑀬𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀤𑀲𑀫𑀁.

𑀲𑀼𑀫𑁂𑀥𑀸𑀯𑀕𑁆𑀕𑁄 𑀧𑀞𑀫𑁄.