𑁧. 𑀲𑀼𑀫𑁂𑀥𑀸𑀯𑀕𑁆𑀕𑁄

𑁧. 𑀲𑀼𑀫𑁂𑀥𑀸𑀣𑁂𑀭𑀻𑀅𑀧𑀤𑀸𑀦𑀁

𑀅𑀣 𑀣𑁂𑀭𑀺𑀓𑀸𑀧𑀤𑀸𑀦𑀸𑀦𑀺 𑀲𑀼𑀡𑀸𑀣 𑁋

𑁧. ‘‘𑀪𑀕𑀯𑀢𑀺 𑀓𑁄𑀡𑀸𑀕𑀫𑀦𑁂, 𑀲𑀗𑁆𑀖𑀸𑀭𑀸𑀫𑀫𑁆𑀳𑀺 𑀦𑀯𑀦𑀺𑀯𑁂𑀲𑀦𑀫𑁆𑀳𑀺 [𑀦𑀺𑀯𑁂𑀲𑀫𑁆𑀳𑀺 (𑀲𑁆𑀬𑀸.)];

𑀲𑀔𑀺𑀬𑁄 𑀢𑀺𑀲𑁆𑀲𑁄 𑀚𑀦𑀺𑀬𑁄, 𑀯𑀺𑀳𑀸𑀭𑀤𑀸𑀦𑀁 𑀅𑀤𑀸𑀲𑀺𑀫𑁆𑀳.

𑁨. ‘‘𑀤𑀲𑀓𑁆𑀔𑀢𑁆𑀢𑀼𑀁 𑀲𑀢𑀓𑁆𑀔𑀢𑁆𑀢𑀼𑀁, 𑀤𑀲𑀲𑀢𑀓𑁆𑀔𑀢𑁆𑀢𑀼𑀁 𑀲𑀢𑀸𑀦𑀜𑁆𑀘 𑀲𑀢𑀓𑁆𑀔𑀢𑁆𑀢𑀼𑀁 [𑀲𑀢𑀸𑀦𑀺 𑀘 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 (𑀲𑀻. 𑀓.)];

𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑀺𑀫𑁆𑀳, 𑀓𑁄 𑀯𑀸𑀤𑁄 𑀫𑀸𑀦𑀼𑀲𑁂 𑀪𑀯𑁂.

𑁩. ‘‘𑀤𑁂𑀯𑁂 𑀫𑀳𑀺𑀤𑁆𑀥𑀺𑀓𑀸 𑀅𑀳𑀼𑀫𑁆𑀳, 𑀫𑀸𑀦𑀼𑀲𑀓𑀫𑁆𑀳𑀺 𑀓𑁄 𑀯𑀸𑀤𑁄;

𑀲𑀢𑁆𑀢𑀭𑀢𑀦𑀫𑀳𑁂𑀲𑀻 [𑀲𑀢𑁆𑀢𑀭𑀢𑀦𑀲𑁆𑀲 𑀫𑀳𑁂𑀲𑀻 (𑀲𑀻. 𑀧𑀻.)], 𑀇𑀢𑁆𑀣𑀺𑀭𑀢𑀦𑀁 𑀅𑀳𑀁 𑀪𑀯𑀺𑀁.

𑁪. ‘‘𑀇𑀥 𑀲𑀜𑁆𑀘𑀺𑀢𑀓𑀼𑀲𑀮𑀸 [𑀢𑀢𑁆𑀣 𑀲𑀜𑁆𑀘𑀺𑀢𑀁 𑀓𑀼𑀲𑀮𑀁 (𑀲𑁆𑀬𑀸.)], 𑀲𑀼𑀲𑀫𑀺𑀤𑁆𑀥𑀓𑀼𑀮𑀧𑁆𑀧𑀚𑀸;

𑀥𑀦𑀜𑁆𑀚𑀸𑀦𑀻 𑀘 𑀔𑁂𑀫𑀸 𑀘, 𑀅𑀳𑀫𑁆𑀧𑀺 𑀘 𑀢𑀬𑁄 𑀚𑀦𑀸.

𑁫. ‘‘𑀆𑀭𑀸𑀫𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀲𑀩𑁆𑀩𑀸𑀯𑀬𑀯𑀫𑀡𑁆𑀟𑀺𑀢𑀁;

𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑀗𑁆𑀖𑀲𑁆𑀲, 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀲𑀫𑁄𑀤𑀺𑀢𑀸.

𑁬. ‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸;

𑀤𑁂𑀯𑁂𑀲𑀼 𑀅𑀕𑁆𑀕𑀢𑀁 𑀧𑀢𑁆𑀢𑀸, 𑀫𑀦𑀼𑀲𑁆𑀲𑁂𑀲𑀼 𑀢𑀣𑁂𑀯 𑀘.

𑁭. ‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

𑁮. ‘‘𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀲𑁆𑀲, 𑀢𑀤𑀸 𑀆𑀲𑀺 𑀦𑀭𑀺𑀲𑁆𑀲𑀭𑁄;

𑀓𑀸𑀲𑀺𑀭𑀸𑀚𑀸 𑀓𑀺𑀓𑀻 𑀦𑀸𑀫, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂.

𑁯. ‘‘𑀢𑀲𑁆𑀲𑀸𑀲𑀼𑀁 𑀲𑀢𑁆𑀢 𑀥𑀻𑀢𑀭𑁄, 𑀭𑀸𑀚𑀓𑀜𑁆𑀜𑀸 𑀲𑀼𑀔𑁂𑀥𑀺𑀢𑀸 [𑀲𑀼𑀔𑁂𑀣𑀺𑀢𑀸 (𑀲𑁆𑀬𑀸.)];

𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀦𑀺𑀭𑀢𑀸, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀁𑀲𑀼 𑀢𑀸.

𑁧𑁦. ‘‘𑀢𑀸𑀲𑀁 𑀲𑀳𑀸𑀬𑀺𑀓𑀸 𑀳𑀼𑀢𑁆𑀯𑀸, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑀸;

𑀤𑀢𑁆𑀯𑀸 𑀤𑀸𑀦𑀸𑀦𑀺 𑀲𑀓𑁆𑀓𑀘𑁆𑀘𑀁, 𑀅𑀕𑀸𑀭𑁂𑀯 𑀯𑀢𑀁 [𑀅𑀕𑀸𑀭𑁂𑀯 𑀯𑀢𑁆𑀢𑀁 (𑀲𑁆𑀬𑀸.)] 𑀘𑀭𑀺𑀁.

𑁧𑁧. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑀸 𑀅𑀳𑀁.

𑁧𑁨. ‘‘𑀢𑀢𑁄 𑀘𑀼𑀢𑀸 𑀬𑀸𑀫𑀫𑀕𑀁 [𑀬𑀸𑀫𑀲𑀕𑁆𑀕𑀁 (𑀲𑁆𑀬𑀸.)], 𑀢𑀢𑁄𑀳𑀁 𑀢𑀼𑀲𑀺𑀢𑀁 𑀕𑀢𑀸;

𑀢𑀢𑁄 𑀘 𑀦𑀺𑀫𑁆𑀫𑀸𑀦𑀭𑀢𑀺𑀁, 𑀯𑀲𑀯𑀢𑁆𑀢𑀺𑀧𑀼𑀭𑀁 𑀢𑀢𑁄.

𑁧𑁩. ‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑀫𑁄𑀳𑀺𑀢𑀸;

𑀢𑀢𑁆𑀣 𑀢𑀢𑁆𑀣𑁂𑀯 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

𑁧𑁪. ‘‘𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑀢𑁆𑀢𑁂, 𑀭𑀸𑀚𑀽𑀦𑀁 𑀘𑀓𑁆𑀓𑀯𑀢𑁆𑀢𑀺𑀦𑀁;

𑀫𑀡𑁆𑀟𑀮𑀻𑀦𑀜𑁆𑀘 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

𑁧𑁫. ‘‘𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑁂𑀲𑀼 𑀫𑀸𑀦𑀼𑀲𑁂𑀲𑀼 𑀘;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑀸 𑀳𑀼𑀢𑁆𑀯𑀸, 𑀦𑁂𑀓𑀚𑀸𑀢𑀻𑀲𑀼 𑀲𑀁𑀲𑀭𑀺𑀁.

𑁧𑁬. ‘‘𑀲𑁄 𑀳𑁂𑀢𑀼 𑀘 𑀲𑁄 𑀧𑀪𑀯𑁄, 𑀢𑀫𑁆𑀫𑀽𑀮𑀁 𑀲𑀸𑀲𑀦𑁂 𑀔𑀫𑀁 [𑀢𑀫𑁆𑀫𑀽𑀮𑀁 𑀲𑀸 𑀘 𑀲𑀸𑀲𑀦𑁂 𑀔𑀦𑁆𑀢𑀺 (𑀲𑀻. 𑀧𑀻. 𑀓.)];

𑀧𑀞𑀫𑀁 𑀢𑀁 𑀲𑀫𑁄𑀥𑀸𑀦𑀁, 𑀢𑀁 𑀥𑀫𑁆𑀫𑀭𑀢𑀸𑀬 𑀦𑀺𑀩𑁆𑀩𑀸𑀦𑀁 [𑀦𑀺𑀩𑁆𑀩𑀼𑀢𑀁 (𑀲𑁆𑀬𑀸.)].

𑁧𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑀻𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁧𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 [𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 (𑀲𑀻. 𑀲𑁆𑀬𑀸. 𑀓.)] 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀲𑀼𑀫𑁂𑀥𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀫𑁂𑀥𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀫𑁂𑀔𑀮𑀸𑀤𑀸𑀬𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁨𑁦. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀣𑀽𑀧𑀓𑀸𑀭𑀸𑀧𑀺𑀓𑀸 𑀅𑀳𑀼𑀁 [𑀣𑀽𑀧𑀓𑀸𑀭 𑀫𑀓𑀸𑀲𑀳𑀁 (𑀲𑁆𑀬𑀸.)];

𑀫𑁂𑀔𑀮𑀺𑀓𑀸 𑀫𑀬𑀸 𑀤𑀺𑀦𑁆𑀦𑀸, 𑀦𑀯𑀓𑀫𑁆𑀫𑀸𑀬 𑀲𑀢𑁆𑀣𑀼𑀦𑁄.

𑁨𑁧. ‘‘𑀦𑀺𑀝𑁆𑀞𑀺𑀢𑁂 𑀘 𑀫𑀳𑀸𑀣𑀽𑀧𑁂, 𑀫𑁂𑀔𑀮𑀁 𑀧𑀼𑀦𑀤𑀸𑀲𑀳𑀁;

𑀮𑁄𑀓𑀦𑀸𑀣𑀲𑁆𑀲 𑀫𑀼𑀦𑀺𑀦𑁄, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁨𑁨. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀫𑁂𑀔𑀮𑀫𑀤𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑀽𑀧𑀓𑀸𑀭𑀲𑁆𑀲𑀺𑀤𑀁 𑀨𑀮𑀁.

𑁨𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁨𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀫𑁂𑀔𑀮𑀸𑀤𑀸𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑁂𑀔𑀮𑀸𑀤𑀸𑀬𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀫𑀡𑁆𑀟𑀧𑀤𑀸𑀬𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁨𑁬. ‘‘𑀓𑁄𑀡𑀸𑀕𑀫𑀦𑀩𑀼𑀤𑁆𑀥𑀲𑁆𑀲, 𑀫𑀡𑁆𑀟𑀧𑁄 𑀓𑀸𑀭𑀺𑀢𑁄 𑀫𑀬𑀸;

𑀥𑀼𑀯𑀁 𑀢𑀺𑀘𑀻𑀯𑀭𑀁𑀤𑀸𑀲𑀺𑀁 [𑀣𑀽𑀧𑀜𑁆𑀘 𑀧𑀯𑀭𑀫𑀤𑀁 (𑀲𑁆𑀬𑀸.), 𑀥𑀼𑀯𑀜𑁆𑀘 𑀘𑀻𑀯𑀭𑀁 𑀅𑀤𑀁 (𑀧𑀻.)], 𑀩𑀼𑀤𑁆𑀥𑀲𑁆𑀲 𑀮𑁄𑀓𑀩𑀦𑁆𑀥𑀼𑀦𑁄.

𑁨𑁭. ‘‘𑀬𑀁 𑀬𑀁 𑀚𑀦𑀧𑀤𑀁 𑀬𑀸𑀫𑀺, 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄;

𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀳𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁨𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁨𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀫𑀡𑁆𑀟𑀧𑀤𑀸𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀡𑁆𑀟𑀧𑀤𑀸𑀬𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀲𑀗𑁆𑀓𑀫𑀦𑀢𑁆𑀣𑀸𑀣𑁂𑀭𑀻𑀅𑀧𑀤𑀸𑀦𑀁

𑁩𑁧. ‘‘𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 [𑀓𑁄𑀡𑁆𑀟𑀜𑁆𑀜𑀲𑁆𑀲 𑀪𑀕𑀯𑀢𑁄 (𑀲𑁆𑀬𑀸. 𑀧𑀻.)], 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀭𑀣𑀺𑀬𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀢𑀸𑀭𑀬𑀦𑁆𑀢𑀲𑁆𑀲 𑀧𑀸𑀡𑀺𑀦𑁄.

𑁩𑁨. ‘‘𑀖𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀅𑀯𑀓𑀼𑀚𑁆𑀚𑀸 𑀦𑀺𑀧𑀚𑁆𑀚𑀳𑀁;

𑀅𑀦𑀼𑀓𑀫𑁆𑀧𑀓𑁄 𑀮𑁄𑀓𑀦𑀸𑀣𑁄, 𑀲𑀺𑀭𑀲𑀺 [𑀲𑀻𑀲𑀦𑁆𑀢𑁂 (𑀲𑀻. 𑀓.)] 𑀅𑀓𑁆𑀓𑀫𑀻 𑀫𑀫 [𑀢𑀤𑀸 (𑀲𑁆𑀬𑀸. 𑀧𑀻.)].

𑁩𑁩. ‘‘𑀅𑀓𑁆𑀓𑀫𑀺𑀢𑁆𑀯𑀸𑀦 𑀲𑀺𑀭𑀲𑀺 [𑀲𑀫𑁆𑀩𑀼𑀤𑁆𑀥𑁄 (𑀓.)], 𑀅𑀕𑀫𑀸 𑀮𑁄𑀓𑀦𑀸𑀬𑀓𑁄;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀢𑀼𑀲𑀺𑀢𑀁 𑀅𑀕𑀫𑀸𑀲𑀳𑀁.

𑁩𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁩𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀲𑀗𑁆𑀓𑀫𑀦𑀢𑁆𑀣𑀸 [𑀲𑀗𑁆𑀓𑀫𑀦𑀤𑀸 (𑀲𑁆𑀬𑀸.)] 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀗𑁆𑀓𑀫𑀦𑀢𑁆𑀣𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀦𑀴𑀫𑀸𑀮𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁩𑁭. ‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑀻 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁.

𑁩𑁮. ‘‘𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀯𑁂𑀤𑀚𑀸𑀢𑀸 𑀓𑀢𑀜𑁆𑀚𑀮𑀻;

𑀦𑀴𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀁 𑀅𑀪𑀺𑀧𑀽𑀚𑀬𑀺𑀁.

𑁩𑁯. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀓𑀺𑀦𑁆𑀦𑀭𑀻𑀤𑁂𑀳𑀁, 𑀅𑀕𑀘𑁆𑀙𑀺𑀁 𑀢𑀺𑀤𑀲𑀁 𑀕𑀢𑀺𑀁.

𑁪𑁦. ‘‘𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀤𑀲𑀦𑁆𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀁𑀯𑁂𑀚𑁂𑀢𑁆𑀯𑀸𑀦 𑀫𑁂 𑀘𑀺𑀢𑁆𑀢𑀁 [𑀯𑁂𑀤𑀬𑀺𑀢𑁆𑀯𑀸𑀦 𑀓𑀼𑀲𑀮𑀁 (𑀲𑁆𑀬𑀸.), 𑀲𑀁𑀯𑁂𑀤𑀬𑀺𑀢𑁆𑀯𑀸 𑀓𑀼𑀲𑀮𑀁 (𑀧𑀻.)], 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁪𑁧. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸 [𑀪𑀯𑀸 𑀲𑀁𑀖𑀸𑀢𑀺𑀢𑀸 𑀫𑀫 (𑀓.)];

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁪𑁨. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁪𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀦𑀴𑀫𑀸𑀮𑀺𑀓𑀸 𑀣𑁂𑀭𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀴𑀫𑀸𑀮𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀏𑀓𑀧𑀺𑀡𑁆𑀟𑀧𑀸𑀢𑀤𑀸𑀬𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁪𑁬. ‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀩𑀦𑁆𑀥𑀼𑀫𑀸 𑀦𑀸𑀫 𑀔𑀢𑁆𑀢𑀺𑀬𑁄;

𑀢𑀲𑁆𑀲 𑀭𑀜𑁆𑀜𑁄 𑀅𑀳𑀼𑀁 𑀪𑀭𑀺𑀬𑀸, 𑀏𑀓𑀚𑁆𑀛𑀁 𑀘𑀸𑀭𑀬𑀸𑀫𑀳𑀁 [𑀏𑀓𑀘𑁆𑀘𑀁 𑀯𑀸𑀤𑀬𑀸𑀫𑀳𑀁 (𑀲𑁆𑀬𑀸.)].

𑁪𑁭. ‘‘𑀭𑀳𑁄𑀕𑀢𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘𑀆𑀤𑀸𑀬 𑀕𑀫𑀦𑀻𑀬𑀜𑁆𑀳𑀺, 𑀓𑀼𑀲𑀮𑀁 𑀦𑀢𑁆𑀣𑀺 𑀫𑁂 𑀓𑀢𑀁.

𑁪𑁮. ‘‘‘𑀫𑀳𑀸𑀪𑀺𑀢𑀸𑀧𑀁 𑀓𑀝𑀼𑀓𑀁, 𑀖𑁄𑀭𑀭𑀽𑀧𑀁 𑀲𑀼𑀤𑀸𑀭𑀼𑀡𑀁;

𑀦𑀺𑀭𑀬𑀁 𑀦𑀽𑀦 𑀕𑀘𑁆𑀙𑀸𑀫𑀺, 𑀏𑀢𑁆𑀣 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄’.

𑁪𑁯. ‘‘𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑁆𑀫, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

‘𑀏𑀓𑀁 𑀫𑁂 𑀲𑀫𑀡𑀁 𑀤𑁂𑀳𑀺, 𑀪𑁄𑀚𑀬𑀺𑀲𑁆𑀲𑀸𑀫𑀺 𑀔𑀢𑁆𑀢𑀺𑀬’.

𑁫𑁦. ‘‘𑀅𑀤𑀸𑀲𑀺 𑀫𑁂 𑀫𑀳𑀸𑀭𑀸𑀚𑀸, 𑀲𑀫𑀡𑀁 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀁;

𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀧𑀭𑀫𑀦𑁆𑀦𑁂𑀦 𑀧𑀽𑀭𑀬𑀺𑀁 [𑀢𑀧𑁆𑀧𑀬𑀺𑀁 (𑀲𑀻.)].

𑁫𑁧. ‘‘𑀧𑀽𑀭𑀬𑀺𑀢𑁆𑀯𑀸 𑀧𑀭𑀫𑀦𑁆𑀦𑀁, 𑀕𑀦𑁆𑀥𑀸𑀮𑁂𑀧𑀁 𑀅𑀓𑀸𑀲𑀳𑀁;

𑀚𑀸𑀮𑁂𑀦 𑀧𑀺𑀤𑀳𑀺𑀢𑁆𑀯𑀸𑀦, 𑀯𑀢𑁆𑀣𑀬𑀼𑀕𑁂𑀦 [𑀧𑀻𑀢𑀘𑁄𑀴𑁂𑀦 (𑀲𑁆𑀬𑀸.), 𑀫𑀳𑀸𑀦𑁂𑀮𑁂𑀦 (𑀧𑀻.)] 𑀙𑀸𑀤𑀬𑀺𑀁.

𑁫𑁨. ‘‘𑀆𑀭𑀫𑁆𑀫𑀡𑀁 𑀫𑀫𑀁 𑀏𑀢𑀁, 𑀲𑀭𑀸𑀫𑀺 𑀬𑀸𑀯𑀚𑀻𑀯𑀺𑀳𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁫𑁩. ‘‘𑀢𑀺𑀁𑀲𑀸𑀦𑀁 𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀫𑀦𑀲𑀸 𑀧𑀢𑁆𑀣𑀺𑀢𑀁 𑀫𑀬𑁆𑀳𑀁, 𑀦𑀺𑀩𑁆𑀩𑀢𑁆𑀢𑀢𑀺 𑀬𑀣𑀺𑀘𑁆𑀙𑀺𑀢𑀁 [𑀬𑀢𑀺𑀘𑁆𑀙𑀓𑀁 (𑀲𑁆𑀬𑀸.), 𑀬𑀤𑀺𑀘𑁆𑀙𑀓𑀁 (𑀧𑀻. 𑀓.)].

𑁫𑁪. ‘‘𑀯𑀻𑀲𑀸𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀑𑀘𑀺𑀢𑀢𑁆𑀢𑀸𑀯 [𑀉𑀧𑀘𑀺𑀢𑀢𑁆𑀢𑀸 (𑀲𑁆𑀬𑀸.)] 𑀳𑀼𑀢𑁆𑀯𑀸𑀦, 𑀲𑀁𑀲𑀭𑀸𑀫𑀺 𑀪𑀯𑁂𑀲𑁆𑀯𑀳𑀁.

𑁫𑁫. ‘‘𑀲𑀩𑁆𑀩𑀩𑀦𑁆𑀥𑀦𑀫𑀼𑀢𑁆𑀢𑀸𑀳𑀁, 𑀅𑀧𑁂𑀢𑀸 𑀫𑁂 𑀉𑀧𑀸𑀤𑀺𑀓𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁫𑁬. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀺𑀡𑁆𑀟𑀧𑀸𑀢𑀲𑁆𑀲𑀺𑀤𑀁 𑀨𑀮𑀁.

𑁫𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁫𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀏𑀓𑀧𑀺𑀡𑁆𑀟𑀧𑀸𑀢𑀤𑀸𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀧𑀺𑀡𑁆𑀟𑀧𑀸𑀢𑀤𑀸𑀬𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁬𑁦. ‘‘𑀧𑀺𑀡𑁆𑀟𑀘𑀸𑀭𑀁 𑀘𑀭𑀦𑁆𑀢𑀲𑁆𑀲, 𑀢𑀺𑀲𑁆𑀲𑀦𑀸𑀫𑀲𑁆𑀲 𑀲𑀢𑁆𑀣𑀼𑀦𑁄;

𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀤𑀸𑀲𑀳𑀁.

𑁬𑁧. ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀯𑀻𑀣𑀺𑀬𑀸 𑀲𑀡𑁆𑀞𑀺𑀢𑁄 𑀲𑀢𑁆𑀣𑀸, 𑀅𑀓𑀸 𑀫𑁂 𑀅𑀦𑀼𑀫𑁄𑀤𑀦𑀁.

𑁬𑁨. ‘‘‘𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀢𑀸𑀯𑀢𑀺𑀁𑀲𑀁 𑀕𑀫𑀺𑀲𑁆𑀲𑀲𑀺;

𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀲𑀺.

𑁬𑁩. ‘‘‘𑀧𑀜𑁆𑀜𑀸𑀲𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀲𑀺;

𑀫𑀦𑀲𑀸 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀧𑀝𑀺𑀮𑀘𑁆𑀙𑀲𑀺 𑀲𑀩𑁆𑀩𑀤𑀸.

𑁬𑁪. ‘‘‘𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀧𑀩𑁆𑀩𑀚𑀺𑀲𑁆𑀲𑀲𑀺𑀓𑀺𑀜𑁆𑀘𑀦𑀸;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺𑀦𑀸𑀲𑀯𑀸’.

𑁬𑁫. ‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀯𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁬𑁬. ‘‘𑀲𑀼𑀤𑀺𑀦𑁆𑀦𑀁 𑀫𑁂 𑀤𑀸𑀦𑀯𑀭𑀁 [𑀲𑀼𑀤𑀺𑀦𑁆𑀦𑀫𑁂𑀯 𑀫𑁂 𑀤𑀸𑀦𑀁 (𑀲𑁆𑀬𑀸.)], 𑀲𑀼𑀬𑀺𑀝𑁆𑀞𑀸 𑀬𑀸𑀕𑀲𑀫𑁆𑀧𑀤𑀸;

𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀧𑀢𑁆𑀢𑀸𑀳𑀁 𑀅𑀘𑀮𑀁 𑀧𑀤𑀁.

𑁬𑁭. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀺𑀓𑁆𑀔𑀸𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁬𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀤𑀸𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀲𑀢𑁆𑀢𑀼𑀧𑁆𑀧𑀮𑀫𑀸𑀮𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁭𑁧. ‘‘𑀦𑀕𑀭𑁂 𑀅𑀭𑀼𑀡𑀯𑀢𑀺𑀬𑀸, 𑀅𑀭𑀼𑀡𑁄 𑀦𑀸𑀫 [𑀅𑀭𑀼𑀡𑀯𑀸 𑀦𑀸𑀫 (𑀲𑀻. 𑀧𑀻.)] 𑀢𑁆𑀢𑀺𑀬𑁄;

𑀢𑀲𑁆𑀲 𑀭𑀜𑁆𑀜𑁄 𑀅𑀳𑀼𑀁 𑀪𑀭𑀺𑀬𑀸, 𑀯𑀸𑀭𑀺𑀢𑀁 𑀯𑀸𑀭𑀬𑀸𑀫𑀳𑀁 [𑀘𑀸𑀭𑀺𑀓𑀁 𑀘𑀸𑀭𑀬𑀸𑀫𑀳𑀁 (𑀲𑀻.), 𑀦 𑀕𑀼𑀮𑀁 𑀧𑀸𑀤𑀬𑀸𑀫𑀳𑀁 (𑀲𑁆𑀬𑀸.), 𑀦 𑀫𑀸𑀮𑀁 𑀧𑀸𑀤𑀬𑀸𑀫𑀳𑀁 (𑀧𑀻.)].

𑁭𑁨. ‘‘𑀲𑀢𑁆𑀢𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀉𑀧𑁆𑀧𑀮𑀸 𑀤𑁂𑀯𑀕𑀦𑁆𑀥𑀺𑀓𑀸;